أرسل لنا صديقنا (جيمي) نكتة مكانيكية فقمنا بإدخالها في ورشة ود الدابي لسمكرة النكات فطلعت بالشكل الآتي: زي ما عارفين، في مكانيكية شطار خالص، الواحد تسلمو عربية هكرة يصلحا ليك ويسلمك ليها عربية آخر موديل !!! وفي مكانيكية جربندية ساكت الواحد تسلمو عربية جديدة فيها عطل بسيط ينط ليك فيها زي ديك العدة ويفرتكا ليك حتة حتة ويسلمك ليها خردة... اها قال ليك واحد عربيتو جديدة لنج لاكين بطاريتا نامت ، على التعترو وداها لي مكانيكي جربندي ، المكانيكي الجربندي اول حاجة عملها فكفك لساتك العربية الاربعة عشان يضمن عدم تحركا نهائي من قدام القراش بتاعو !!!! بعداك وقع ليك في العربية فك وتركيب ، مرة يقول لي سيد العربية العطل في الاستراتر ، مرة العيب في الكربرتير ، مرة العطل في الفرامل !!!! آخر حاجة لمن غلبتو الشغلة المكانيكي الجربندي قال لي سيد العربية : اسمع انتا عربيتك دي كرمتا ليها بالدم لمن اشتريتا؟! سيد العربية عاين ليهو بي استغراب وقال ليهو : ايوا كرمتا ليها بالدم !! المكانيكي الجربندي قال ليهو: طيب الدم انتا طبعتو وين؟! سيد العربية قال ليهو: طبعتا الدم في ضهر الكبوت بتاع العربية! المكانيكي الجربندي كورك في سيد العربية لمن اتخلع ونطا: طيب يا فردة من الصباح ما كان تقول لي كده عشان اعرف انو العطل في المكنة ، ياخي انتا كان مفروض تطبع الدم بتاع الكرامة على راس المكنة مرقتا راسنا الله يمرق راسك ياخي!!!! فيصل الدابي/المحامي