مذكرات زول ساي! (السودانيون يحيرون قوقل)! بقلم فيصل الدابي المحامي

مقدمة سـاي!
بعض حكايات ، طرائف ، ملاحظات ، حوادث وأحداث مذكرات زول ساي واقعية بنسبة 100% ، وبعضها خيالي بنسبة 100% ، وبعضها الآخر خليط من الواقع والخيال، أما أبطالها فهم سودانيون عاديون ، يعني ناس ساي ، مثلك ، ومثلي ، ومثل أي زول ساي!


(معنى كلمة ساي!)
قال الفيلسوف السوداني العالم العلامة والفاهم الفهامة محمد أحمد ساي المتداخل الأطرف في موقع سودانيزاوفلاين:
السودانيون هم الشعب الوحيد في العالم الذي يستخدم كلمة ساي فهم يقولون (اقعد ساي!)، (اسكت ساي!) وهلم جرا وقد عجز قوقل ، أكبر محرك بحث في العالم، عن العثورعلى معنى كلمة ساي وقال الروبyogurt ، اجتهد كثيرون في البحث عن معنى كلمة ساي فقال أحدهم إنها تعني (ساكت) مثل قولهم (الزول ده بتكلم ساي) أي (الزول ده بتكلم ساكت)! لكن لا يُعْقَل أن يتكلم الزول وهو ساكت؛ فالسكوت في اللغة هو الامتناع عن الكلام، والذي يتكلم ساكت كمن يريد أن يتكلم وفمه مكمم وهذا لعمري هو العجب العجاب! أما التفسير الوطني السوداني الأرجح لكلمة ساي فقد جاء على النحو الآتي:
قال إبن مش عارف أيه في كتابه الماعارف برضو اسمه ايه إن الأمريكان وفي بداية حضارتهم كانوا عارفين إنو السودان ده نجمو حايسطع وحايسووووووود العالم اجمع ويبقى فخر أفريقيا ورجلها القوي " المرة وين ما عارف وما تسالوني لأنو أنا ما عندي قضية بحقوق النسوان " ! ، على أي حال الأمريكان أولاد الأيه قاموا رسلوا مندوب منهم اسود زي الفحم لزوم التمويه وكده ، يعني بدل المندوب الامريكي يتمسح بالزبادي قام إتمسح بالسكن من غير رماد "!
المهم الخواجة الامريكي لما نزل في مطار الخرطوم لاقاهو ليك ضابط جمارك سوداني شنبو كوليقة قش " ما حمادة تش شنبو قش "! وقام فنجر ليك عيونو للخواجة الأمريكاني وقال ليه: إنتا جااي السـودان تتفسح والله شنـو ؟! الخواجة كان قلبو خفيف وزولنا هجمهو وخلعو ليك بعيونو الكبار المنططات ، أها الخواجة الامريكي كان داير يقول ليهو بالإنكليزية Yes قام إتلخبط وجاط ابو الحروف الانجليزية ذاتا وشقلبها ليك قامت الكلمة طلعت " ساي "! .. الكلمة عجبت زولنا ضابط الجمارك السوداني ، أها قام مشي بيتو ، ومجرد ما دخل البيت مرتو سالتو وهي شايلا ليهو المقشاشة: يا راجل هوي ، ليه ما جبت معاك اللحمة ؟!.. زولنا السوداني الضكران إتذكر الخواجة السحسوحة قام اتسحسح شوية وقال ليها: ما جبتا اللحمة سااااااااي! بعد ما مطاها ليك ... زي قدوم الفيل، اها بعد داك ، والعهدة علي الراوي ، انتشرت كلمة (ساي) وعمت القرى والحضر في كل أنحاء السودان الحبيب وصارت كلمة (ساي) ماركة لفظية مسجلة لا تخرج إلا من خشم السوداني سواء أكان قابعاً في قرية اضان الحمار السودانية أو مقيماً في مدينة واشنطون الامريكية!


مكتبة فيصل الدابي المحامي