Post: #1
Title: أديني من صوتك ضجيج قصيدة جديدة بقلم الشاعر / أحمد يوسف حمد النيل
Author: أحمد يوسف حمد النيل
Date: 11-21-2014, 03:34 AM
انا يا بلد ...
قاصدك عديل
اديني من صبرِك سُكات
اديني من وِردِك مدد
اديني من صوتِك ضجيج
لحظة تقيف الناس تكابس للحياة
اديني نور
لحظة اجيك واشتهيك
خليني ممدود في قفاك
*****
طاحونة الليل الطويل
راجياها ناس واقفين طويل
رافعين عراجين التمر
خاتين قناديل القصب
متلفحين هِدم الصبر
حال الفقر
نِعل الجلد
واليد ممحنة في الخديد
والسايقة واصلة على الجروف
لا بتلعن ا لواطة البِكر
لا بتلعن الموية التسيل
*****
ملعونة فيك سكك الغَزَل
ملعونة طاقات السؤال
مشحوطة قيمك زي عبوب
وزي كرامة المومسات
أكلت عصاك سوسة العساكر والمنافقين والهوام
جعلت يمينك في قفاك
اكلت غداك شلة شواطين البشر
*****
وبقيت تصلي علي ورا
ومرات تصلي يمين شمال
وبقت قبلتك القروش
لهفانة روحك للكروش
وسجدت غلطان يا ولد
وأكلت من حق البلد
لكن ضميرك فاق صحا
وسجدت تال بيت الله داك
قطعت سِبَح اليانصيب
ونضمت سبحة عود بقِس
حَقة صلاح أهل البِرِش
*****
جوك يا بلد ...
ناس مرجفين
ماعون خريفهم ما بلين
ناكرين جميل
حارسين جثث
والدم مجلبط
في السراويل
والملود
والطاسة
والصحن المطرقع والنعال
*****
وجات حبوبة
ما عاجباها ميلة الحال
ولا العجن البضوقوا جُهال بلدك
وناس راميها مر الحال
عاد يا وليد!
لو الناس تدور جنس دا الحال
اخير الموت
ولو شديت
ولو كَرًبت لِبدة سرجك المهزوز
ما كان الحصل وانقال
ولا كان حالك انت المال
*****
لمتين نشوفك منهزم؟
ما تقوم وتنهض يا ولد
فرّغ مرارات السكوت
حرّك دوافك وانتفض
مالك بقيت مسلوب قرار؟!
مالك بقيت حارس الشدر؟!
ولا الرويح الباقية ليك
كسروها جند الظالمين؟
حفرو لك الساس المتين
دفنوك ضِحا
وجلدك خشاش المرفعين
متين يقومن لك ضروس
وتهرس جباهن ما بتلين؟
متين تصيح وتهز عروش المرجفين؟
متين تدك الظالمين؟
ومتين تبقالنا ولداً للعشا
وتحرس بنات المسلمين؟!
|
Post: #2
Title: Re: أديني من صوتك ضجيج قصيدة جديدة بقلم الشاعر / أحمد يوسف حمد النيل
Author: Abdel Aati
Date: 11-21-2014, 03:17 PM
Parent: #1
| Quote: اديني من صوتِك ضجيج |
عمل قوي وناضج ...
شكرا استاذنا
|
Post: #3
Title: Re: أديني من صوتك ضجيج قصيدة جديدة بقلم الشاعر / أحمد يوسف حمد النيل
Author: alneel
Date: 11-21-2014, 07:29 PM
Parent: #2
لك الشكر الاخ عبد العاطي اتمنى ملاحظات الاخوان البورداب و خاصة بورداب الرياض لقد التقينا بهم كثيرا و قديما و لكن المشاغل صرفتنا عن مواصلة اللقاءات خاصة في الليالي الشعرية و الثقافية
|
|