Post: #1
Title: خاطرة ابداعية/صلاح الباشا
Author: صلاح الباشا
Date: 09-22-2014, 03:36 PM
كتب لها من داخل سجنه ببورتسودان عند اعتقاله بعد عودته من رحلة شهر العسل في العام 1977م :
احلي فصول العمر حنانك
اجمل حتة مشيتا عشانك
اجمل حتة لقيتا عيونك
احبك .... انا مجنونك
ساكن فيني هواك وبريدك
جوه القلب ... النبض بصونك
****
معاكي ... معاني حياتي بتبدا
وافتح بابا ... ياما انسدا
واشوف العالم ... ربوة جميلة
عليها نسيم الصبح مخدة
وبيني وبين النهر عشانك
عشرة بتبدا
وبيني عيني ... وخد الوردة
بتبقي مودة
اصالح روحي ... وتبري جروحي
اهلل باسمك ... اهلل اغني
واقيف .. واتحدا
احبك ... انا مجنونك
ساكن فيني هواك وبريدك
جوه القلب ... النبض بصونك
*****
لا ادري لماذا تذكرتكما للتو وبلا مقدمات ... والزمان بالطبع ليس هو الزمان ... وقد ظللت ادندن بها اليوم عدة مرات .. فاراحتني.
يرحمكما الله تعالي يا احباب اهل السودان .. محجوب شريف... ومحمد وردي
***
صلاح الباشا ... الخرطوم بحري
|
|