مالَك ؟/اكرم محمد زكي

بالي مشغول وانشبك
في بلد نشابا نبله . .
وقبلة العابد في شك
بس اخير يشختنا لوري
من رصاص يطلع فشنك
ندمن الغلب الثلاثي
ونبكي بى بره الشبك
ياريتني ماغنيت لشيه
وقندهار تقلب نبق

اسمع افتح لى عينك
بى اضانك شوفني حق
بستريح لمن اخش حمامكم
المعمول بلوك
الزهور تفتح يمينك
وبالشمال يضرب بلك
الله يفتح راسك انت
يملا ليك علوم فلك
كيفن حأوصل ليك كوستي
وتنكي ولع في ربك
كنت بحتاج ليك بشده
بس لقيت انك كبك

تشرب الشاي يشرقك
والشمِش تشرق حواليك
مشرئبه تدقشك
والشكوك لو تنتشر
او تنشر البشتن مرق
شوف ليك شمار او مرقه
تشفع تشفطك . .
واشتري مشابك شر بيها
واشتكي الفار للشرك
ما بشترك في قروب بلد
فات او بيشقي على وشك
لو بالكتير الكشه جاتو
لاهو ست شاي لا كشك

ياتو يوم ضنيت عليك
واستجبت لدعوتك
وياتو يوم في بص بتدفع
او تبنشر لستكك
ومتين بتم كهربتي مطشِ
او في بيتنا النت برِك
ما عهدتك فاكي اخرك
زي جمل احمق برك
بدفع براي بدفع انا
بس انت ادفع وجبتك

انا ما بجيبني بياض في حيطه
وما بليس لي شق
انا ما بربطوا جمبي بوت
وما بيجلدوا لي حَلَق
انا ما بتزرع لي حديد
ولا بتلحَم لي مِرق
انا اسكراتشي بجيو عديل
لو معلق في السلك
واشتت ارصدتي ف ترابِك
شان تمرقي من الضنك

مالك ؟



اللهم ارحمنا اجمعين

اكرم محمد زكي