يااا . . حبه ! !/اكرم محمد زكى

قاشر كاسح وين يا حبه
شايل شنطتك البى الجمبه
اوع تكون قررت تهاجر
من البلد الليكم ربا
اوع يكون الياس اتملك
منك والاحباط اتعبا
اوع تكون حسيت بالغربة
مابين اهلك و وسط الصحبه
اوع يكون القهر اصابك
دك كرامتك بى مرزبه
والبى خدعة اتحكمو فينا
وعدمو معنى الدين الحبة
نجحوا ودمروا فى انسانك
كل طموح واعزاز ومحبة
مهد طفولتك وارض صباك
نقّط عمرك فوقا وكبا
هم بيقتلوا يفسدوا ينهبوا
ويرقصوا فى الحفلات والربه
هم تمكنوا ثم تحللوا
ولما اتذاكوا كانوا الاغبى
هم تناكحوا ثم تستروا
ثم توجهوا صوب الكعبه
وهيئة علماء السلطان
تمكث فى خرسانة وصبة
بس لو سرق الجيعان لقمة
افتوا بقتلو فى نص الخطبة
وانت بتتملل وتستغفر
وغيظك باقى مولع لمبه
اللهم تفرج همنا
اللهم تزيل الكربه
اللهم أريهم بأسك
فوق الارض وجوه التربه
اللهم ادينا القوة
وخلى حماس الشعب يتعبا
نحن بنغلى والله معانا
ريح الغضب الصرصر هبا
ولما رصاص الخونه يطقطق
وفى صدر الشهداء يتخبا
انت اكيد حتحس بالغيرة
وتلقى الدمع الساخن كبا
تقول ياريت لو قلتو هتاِفك
حكم الكيزان انجس حقبه
واتمنيت لو كنت عريِسك
مهرك روحو . . ولنداك لبى

كدى اتمهل واجل سفرك
خت الشنطه واقيف ياحبه
ناس الحله بيسالوا عنك
وانت بتملا الحله محبه
تضرب جيرهم وتبقى نفيرهم
وفى الدافورى حريف اللعبه
ود لكبيرهم واخو لصغيرهم
واخو جنيات فى سمحه وكعبه
إمكن انت الكاتبك الله
تعدل من الحالة الصعبه
اصبر واعزم . . وانت بتعزم
جند العز . . وتقودوا الهبه

( عسى ربك يفرجا )

رمية :
فجرنا من حزنك نشيد
وافتح شبابيك الخلود
خلي النشيد
يمرق يفوت
يملا الوجود




اكرم محمد زكي

اللهم ارحمنا أجمعين