عند الوالى بُشرانا..!! زاهر بخيت الفكى

خاويناهوا الفقر أصــبح طبــيقنا الجـوع
كم نادينا صحنا بس صـوتنا ما مسمـوع
محروقاتنا زادوها والدعم صار مرفوع
واطاتنا صبـحت بـور وادمر المشـروع
*****
الراتب ما بكفينا حاجــاتنا طــارت فـــوق
حالتنا بائسة صعيبة سيـطرعلينا الســـوق
تخش جيبك ملان تمرق تقول مســــروق
تتم شهرك ديون كاسات من مذلة تضوق
*****
شوف المواطن والجمرة كيــف واطيها
سارح ديمة شارد من ورطة واقـع فيها
يصبح جارى يلهث والحــبة مــا لاقيها
نار السوق فيه تحرق ما لاقي البطـفيها
*****
دولار السجم مالـــوا لعبك معانا خطـير
دمرت التجــارة خليت جنيــهنا صــغير
كان وزنوا الدهـب مقامــوا فينا كبيــــر
بكبر تانى زى أول إنشاء الله إنت تطير
*****
أبوالأفوال حبيبـنا وين يا اخوانا نلقاهوا
نسأل عليهوا الغالى أصلاً ما نسيناهوا
إتمرد علينا الفول لما الشـعب حبـاهوا
ياربى كان مدعوم ومنوالدعم شلناهوا؟
جائز يكون مدعوم ضمن محــــروقاتنا
وجبة أصيلة أصبح تكمل بيهوا وجباتنا
بقينا الليلة ندفع فيهوا آلاف من جنيهاتنا
مولاى ياكريم أرحمنا خفف من معاناتنا
******
لوكوهوا الصبر أهلى وعشيرتى وناسى
الرأس ديمة مشغول مليان هموم ومآسى
صعبت علينا حياتنا حالنا أصبـح قـاسـى
ضلت مراكبنا عديل ما لقينا ليها مراسى
******
ما توطيهوا رأسك خليهوا يوت مرفوع
ما تخاف من فقر يا خويا أو من جـوع
عارفين برانا العيشة الباقية لحسة كوع
عند الوالى بُشرانا نصبر كمان إسبوع


بلا أقنعة...
صحيفة الجريدة السودانية...