لو رجعنا أمدر كلمات:حسين شنقراى

لو رجعنا أمدر
كل شئ بي يزول
حتى طعم المُر
يبقى صافى زلول
كم جمال بيسُر
شايل فروع وأصول
واجب علينا نَمُر
كيف نقطع الموصول
راقى وعيونو فُتُر
روحنا أجمل زول
مابين ملام وعذُر
نبدأ السلام والقول
-----------
بلد الحِسان والدُر
مهد الساده والأنساب
بريه إنتى وكُر
ماتضوقى ليكى عذاب
حبيب جمالو كُتُر
عملنا ليهو حساب
دايماً نزورو عصُر
ودنوباوى والهاشماب
-------------
نوّر قَلُبنا عُمُر
ريدو ولع وداب
يا الله زيدنا صبُر
لامن نجيهو قُراب
أيامنا تبقى خُدُر
نُضْرَه وجَمال وشباب
ننسى الهموم والضُر
نرجع كتير أحباب
و نعيش هواك أمدر
لا غُربه لا أغراب