فلسفة نجار/اكرم محمد زكى

هو فضل ناصر كان نجار
ماتت فاطمه شريكة عمرو
وخلت ليهو ذرية صغار
اكبر واحدة فى متوسط
واصغر واحد جوه اللفة
عدد ايامو قليل ما كتار
وفضل ناصر راجل مؤمن
بى اصرارو . . وبى الاقدار
قرر انو يقيف يتحدى
يربى عيالو . . وما ينهار
يصحى الديك يلقاهو يبدل
سايق العجلة على المشوار
من البيت للورشه مسافة
شايل عدتو . . والمنشار
صوت اللستك يداعب حلمو
باكر يلقى عيالو كبار
يرفعوا قدرو . . ويسندو ضهرو
يثلج صدرو الخلف البار
يشتروا ليهو . . ويفخروا بيهو
ويمشي الحج . . ويعود للدار
بى اولادو . . فرحت بلدو
وبى احفادو الدنيا عمار
صبرو الكان ايام الشده
بدل ليل الدنيا نهار
عزمو البقى مغروس زى شجرة
اصلها ثابت وفرعها ثار
وصل السما واتشتت اكتر
اكبر . . اغزر . . كلو خدار
لون الامل الفايح عطرو
اصبح لحن على الاوتار
غنى وردد . . لحن اتجدد
ينشد وينظم فى مسدار
يحكى علينا حكاية امه
انو في يوم . . الزول اختار
و فضل ناصر . .
كان نجار
وعاش نجار
ولما اتوفى
خلى كفاحو
طريق ومسار



اللهم ارحمنا اجمعين

اكرم محمد زكى