ما بنفع معاها شفِط..!! زاهر بخيت الفكى

منتظرين شنو..؟
مطيرة وحيدة ..لو يوم جات..
تعفِن سنتر الخرطوم..
تكشِف لينا كم عورات..
تخلِط حابل العربى..
مع نابل.. الثورات..
ما بنفع معاها شفِط..
أو جبتوا ردميات..
بنشوف والينا ..طائف فوق..
راكبلوا طيارة..
شرق النيل عصية..عليهوا..
محال تمشيها ..سيارة..
فى بابك يا ..خريف واقفين..
ما شايفين ولا حاجة..
لا ردمية لا مُجـرى..
نسيتوا الفـــات..؟
سيول جاريات..
لا خلت عفش فى بيت..
لا حيطة واقفة عديل..
لا ملاية لا منديل..
لا شنطة لابرميل..
مدخورنا القبيـــل..
حافظنوا..
للحاجة والحوبات..
راح فى رمشة عيــن..
فى عز خريفنا الفات..
نسيتوا..؟
معاكم حق لو نسيتوهوا..
حقيقة مشغوليــن ..
بالمهدى واقوالوا..
حميدتى وافعالوا..
غسان وامــوالوا..
بت الدابى والراستا..
بما فعلوا..
وما قالوا..
فضـائح الواتســاب..
سيد الشقة وامثالوا..
مريخ والهلال..فى الفاضى ..
كم صالوا..
وكم جالوا..
بلا كاسات..
قدامنا الخريف واقف..
ما يخلى بيت..حالف..
يهدِم الباقيـات..
يدمِرالواقفات..

بلا أقنعة..
صحيفة الجريدة السودانية...