بلا تهميش..!! زاهر بخيت الفكى

تعالوا نعيش..
فى رحاب وطن شاسع..
كبير واسع..
يشيل الكـل..
بلا إقصاء..
أو..تهميش..
نؤسس دولة ذات أركان..
شعارا العدل..
فيها الظلم ..مافيش..
نتساوى نحن جميع..
لما (الزول) يعود انسان..
زى ما كان..
ليهوا حقوق..
عليه واجب..
عنده (هُوية)..
يفخر بيها بيــن النـاس..
مزيج متعدد الأجنــاس..
(زولاً)هُويتـه سودانية..
أمه أفريقية..
أبنوسة زنجية..
حبوبته دارفورية..
التانية كسلاوية..
جده الكبير..وافد..
جذوره عربية..
يلا نعيش ..
بلا تهميش..
بلا تطفيش..
كفاية حروب..
كفاية فساد..
استبداد..
استعباد..
استبعاد..
صارت للنزاع أبعاد..
صراع شائن..
غبن بائن..
كتيير اتغيرت أحوال..
صبح مديون..
الكان قبيل دائن..
صبح قائد..
متمرد زمان خائن..
تعالوا نعيش..
فى بلداً صحيح مأزوم..
فيه الريف صبح أطلال..
شيوخ ونساء..
شوية من أطفال..
شباب هاجر ..بعيد سافر..
يبحث ديمة عن المال..
يلا تعال..
يلا نعيش..بلا تهميش..

بلا أقنعة..
صحيفة الجريدة السودانية...