عرس الكوره ورفع سن البورة

.............. عرس الكوره ورفع سن البورة.................
.......................... واااحلات البوره فيها .........................

يمكن تعريف البوره لغوياً : بتأخر حدوث المأمول عن الموعد المعتاد.
تقول العرب بارت التجاره أى تأخر موعد بيعها المعتاد.
وبارت الأرض أي تأخر موعد أنتاجها.
ونقول فى السودان : البت بارت ياكافى البلاء . إذا تأخر موعد زواجها حسب التوقيت الشتوى للسودان.
وبحكم إنى أبو بنات ( أربعه فى عين العدو) تجدنى دائم التفكير فى موضوع البوره دا. وكل يوم الصباح بعد الصلاة تجينى سرحه كده وأقول لى نفسى أسع ياصلاح البنات ديل لو بارو ليك تقبل وين؟. وبالذات عندى وأحده حلبيه مدغلبه كده دى لو بارت واااااحلات البوره فيها.
بس برضو حاأشتكى شركة برنقلز في محكمة العنوسه الدوليه وأحملهم كامل المسئوليه وأدفعم دم قلبهم .

الليله الصباح وبعد تفكير عميق وجدت أن أسباب البوره لا هى أقتصاديه كما يدعى أهل اليسار الأشتراكى ولا هى بسبب الإكتفاء بالزوجه الواحده التى رسخها أهل الأنقاذ فى عقول البايرات حتى اصبحوا يغنوا:
راجل المراه حلو حلا...
طبعاً كلكم اسه فاتحين خشمكم وعايزين تعرفوا الأسباب الوصلت ليها لذلك حاأدخل فى الموضوع طوالى.
ياساده فى سببين بكل بساطه للبوره.
(1) إننا تركنا أسلوب المقايضه القديم . حسب المعادله التاليه
( تعرس أختى أعرس أختك.... تبور أختى... أختك تخم وتصر)
وحتى فى النواحى المظهريه فى الزواج كانت المعامله بالمثل يعنى لو ملحت أهل العروس وعملت رايح أخو العروس برضو يظبط اختك عرس كوره. عملاً بالقاعده الذهبيه (القدم بالقدم و الكوره بالكوره ياسادمبا اب جاقوره). ولمن تنتهى مراسم الزواج يغنى اهل العريس بعد الجرتقك
أغنية: شلتو فندقنا تدقوا تدونا... ندق ونديكم....
ابيتوا تدونا باعوضه تقرصكم...كاروشا تمسكم...
والغرض من هذه الأغنيه تذكير اهل العروس اننا اديناكم ولدنا ومنتظرين ولدكم وأحسن ليكم يجى بسرعه قبل مانقوم بإجراء اللازم ونرجع ليكم بتكم لمن تجيكم الكاروشه.
(2) عدم انتاج النساء ابن العم بالكميات الكافيه فى التوقيت المناسب.
زمان كان مافى دايه قانونيه محترمه بتطلع ليها بت قبل مايلدوا ليها ود عم يعنى من ماتمشى تجيب الدايه لى زوجتك وانت فى عز القلق تدق باب الدايه الفجر تجيك طالعه تتثآب.
....... منو الفى الباب؟
....... انا صلاح ياحاجه ثريا
....... ناديه بطنا وجعتا؟
....... وجع شديد والله مانومتنا الظاهر الليله دى حاتلدا.
....... انت دحين ياصلاح عندك واحد من أخونك جابو ليهو ولد قريب؟
....... لا مافى واحد جاب ولد.
....... سجم خشمى... مرتك الوالده ليها شنو؟
....... قصدك شنو يعنى؟
....... قصدى تمشى تشوف ليك دايه غيرى افرض انها جابت بت وماعندها ود عم انا اودى وشى وين من دايات البلد.

زمان كان البوره تبدأ فى عمر خمستاشر.
بمجرد ماتلحق البت شرط الزواج يمشى ابوها لى أخوهو ابو العريس المحتمل........
حاج وداعه : كيف حالك ياحاج محمد أخوي.
........ الحمد لله ياحاج وداعه كيفك انت وكيف البنات ... تعال اقعد بى هنا مالك واقف؟
........ والله قفاي اعوج مابقدر اقعد... بس جيت أقول ليك بتنا فلانه لحقت أمبارح وقلت اشوفكم لو عندكم فيها غرض؟
عفووو !!! ياحاج وداعه البت دى من اللفه نحنا ماخدنها لى ولدنا علان.... ياعلان ياعلان تعال.
علان... أزيك ياعمى .
..... أهلاً ياولدى علان
....... أيوه ياأبوي.
.... بكره ياعلان تمشى تحلق راسك دا وتفرش الأوضه الجوه ديك عشان الخميس الجاى حانعرس ليك بت عمك فلانه
... بس ياابوى.
.... مالك واقف كده زى اللوح.
.... انا ياأبوي لسه مابلغتا.
... بالله شوف الولد المطرطش دا.... أمشى أحلق انت بس ووضب الأوضه والبلوغ ملحوق .... ولاد أخر زمن.
حاج وداعه...... طيب ياحاج محمد ميعادنا الخميس الجاى انشالله.

المهندس صلاح سالم محمد سعيد