من دون عنوان "إذ أن المتفرد محمد بهنس أخذ معه العنوان" ابراهيم خالد احمد شوك

من دون عنوان

"إذ أن المتفرد محمد بهنس أخذ معه العنوان"
ابراهيم خالد احمد شوك

آه يا رايع
كيف الزيّك نسيبو يموت
بالبرد والجوع
وحيد موجوع
مننا مفجوع
مجدوع فى الشارع
ايه المانع
نخاف على بعض
بدل نتصارع
نسوى الماضى الزاهى مضارع
وبحصد خير لو بذرو الزارع
لمتين ينهشنا حلم الرجعة
ضاقت بينا أرض الله الواسعة
لكن لى وين
للحرزو أمين
والقلبو حنين
حيطوِّل أملك يامسكين
ما انت اتيت فى الزمن الشين
الصادق صار من المنبوذين
الحرامية هم السايدين
الأخلاق وكرت فى الطين
كل مانسدها بتدور لها رقعة
وسيد الوجعة
بقنلو اتنين
***************
الحجر الصلب
احتضنك سلم
لايوم خانك لا اتألم
الشارع أصبح بلدك وبيتك
فى حجر تتفجر منو الموية
يطلع منو الزرع الأخضر
نفس الخضرة يازول يا أسمر
يستناك وعنك كلم
كل من يمشى عليه
أو سار حواليه
لأنو ولوف
يوم فُتّو اتألم
نحن نشوفك
نتضارى نفوتك
ننسى الصحبة
لو نتعاطى حبة محبة
كنا يمين قدّرنا ظروفك
ماسبناك تغرق فى خوفك
وللا الحزن يصاقر جوفك
لو اتأملنا معانى حروفك
كنا ركبنا معاك فى طوفك
مادهستنا خيول الحرب
وما قسّمنا الوطن الواحد
كيمان ...... كيمان
كم أحزاب أشكال والوان
صار يحكمنا من هبّ ودب
يعصر ويمصر دم الشعب
يامتبلّم متين تتعلم
***************

"حضرت ولم أجد الاحباب"
قرب الباب
رميت الفحمة
انت بتعلم داك الحين
الكانو أصحاب عاملين
جُوَّه البيت قاعدين
لكن......
عاملين ماسامعين
رميت طوبة خيراً فيهم
آه مِن جورمَن قايلو حنين
لمّن حاولنا تعود للّمة
كان صوتك فارقتو النَّمة
سكت اللحن
هجرت الكلمة
لُكْتَ براك الوحدة.....الصبر
هجرت بشر مليان بالشر
لا انسانيين
جوطة وزحمة
ثم..........
طواك القبر.....
العتمة........
لاكذب لانفاق
لاخراب ذمة
نوم مرتاح وانجمّ
من الجَّنة تهِبَّك نسمة
عليك الرحمة
عليك الرحمة
عليك الرحمة