سلطة دكوه!

سلطة دكوه!


04-28-2007, 12:21 PM


  » http://sudaneseonline.com/cgi-bin/sdb/2bb.cgi?seq=msg&board=69&msg=1182848305&rn=0

Post: #1
Title: سلطة دكوه!
Author: Muna Khugali
Date: 04-28-2007, 12:21 PM

خالتو..ممكن سلطة دكوه؟


.....

......
Post: #2
Title: Re: سلطة دكوه!
Author: عاصم ابوبكر حامد
Date: 04-28-2007, 12:25 PM
Parent: #1



الاخت منى
كيفك

Quote: خالتو..ممكن سلطة دكوه؟



انا بموت فى سلطة الروب ....

ووممكن يا خالتو.. سلطة فواكه

تسلمى
Post: #3
Title: Re: سلطة دكوه!
Author: انعام عبد الحفيظ
Date: 04-28-2007, 12:25 PM
Parent: #1

بحبها شديد سلطة الدكوة دي

وبعرف أظبّطها كويس

ازيك يا منوية

ليك وحشة
Post: #5
Title: Re: سلطة دكوه!
Author: عاصم ابوبكر حامد
Date: 04-28-2007, 12:31 PM
Parent: #3



انعام حفيظ
كيفك

Quote: بحبها شديد سلطة الدكوة دي

وبعرف أظبّطها كويس

كويس مالك كنتى بتعملى خيانات ...

وايام الحملة ماكنتى بتعمليها ؟؟؟


تسلمى
Post: #16
Title: Re: سلطة دكوه!
Author: Muna Khugali
Date: 04-28-2007, 01:06 PM
Parent: #3

ما أشطر مني يانعومتي..
وأحسن أوصف ليك خضاري بتاع سلطة الدكوه ..
واوريك أنا بعملها كيف..
قبال ما اسمه منوداك يجي يقول لي اهدرتي الباندوث كما يهدر مين دم مين..
ولا يجيني معرفش مين يقول لي الناس بتموت وانتي بتعملي في سلطه..
ولما اجيب البصل الغمق لونه ده يجيني كده ويقول لي جبتي بصل غامق يا عنصريه..
المهم أنا بحب زيكم كلكم سلطة الدكوه..وبحبها موت..
بس المشكله..
آكل منها شوية جرامات..يزيد وزني كم كيلو!
مديحه اختي قالت لي الأكل ده حاجه تحير..تاكلي الليله بلحايه..بكره تتحول في جسمك كلم كيلو..
وكلامها صح!

تجيبي الطماطم والبصل والدكوه وقرن شطه خبيث..




الدكوه لازم تكون محمصه كويس وسلطتي ياكرمه احلي من سلطة خالتك.. حتي ضوق المعلقه دي وانت تتأكد..
انتظروني أكمل السلطه وأوريكم تقطعوها كيف؟
Post: #4
Title: Re: سلطة دكوه!
Author: عادل جبارة
Date: 04-28-2007, 12:28 PM
Parent: #1

منى خوجلي
سلطة الدكوة مالها كمان ؟؟ أوعي تقولي لينا كمان فيها مواد مسرطنة ... !!!!!
Post: #7
Title: Re: سلطة دكوه!
Author: Muna Khugali
Date: 04-28-2007, 12:44 PM
Parent: #4

هو متين جيت بيناتنا وحفظت اسم سلطة الدكوه؟!




شفت ياعاصم الولد ده كيف؟
Post: #10
Title: Re: سلطة دكوه!
Author: عاصم ابوبكر حامد
Date: 04-28-2007, 12:49 PM
Parent: #7







Quote: شفت ياعاصم الولد ده كيف؟


شفت والله يا خالتو

بث منتظرين موضوع الكوة ؟؟؟؟
Post: #47
Title: Re: سلطة دكوه!
Author: عماد محمود علي
Date: 04-30-2007, 08:22 AM
Parent: #10

يامنى حرام عليك !!!! هسه والله أنا صائم ومطقتيني ســاكت ، الله يسامحك .

إنت ما عارفة دي وجبتي المحببة بأكلها في الفطور والغداء وكمان في العشاء ، أنا بموت فيها عديل كده .

وكمان يا منى أنا مشهور بيها في الامتداد هي وموية الفول ومافي حد بنافسني فيها خااااااالص . وأنا والوحيد البعملها كان للشباب خاصة في المعسكرات والرحلات .
أها أنا بتحداك إنت وإنعام عبد الحفيظ وكمان زيادة تحدي كده جيبوا معاكم عاصم أبوبكر . وح أكتب ليك الطريقة الخاصة بتاعتي بس بعد ما أشوف طريقتك وطريقة إنعام دي كيف ....
Post: #52
Title: Re: سلطة دكوه!
Author: Muna Khugali
Date: 05-03-2007, 05:36 PM
Parent: #47

Quote: وكمان يا منى أنا مشهور بيها في الامتداد هي وموية الفول ومافي حد بنافسني فيها خااااااالص . وأنا والوحيد البعملها كان للشباب خاصة في المعسكرات والرحلات .


عماد انت كنت بتاكل موية الفول وتخلي الفول
طيب أنا والجماعه التحدي قبلناه!
وأسه كل واحد فينا يجيك بطريقه أحسن من طريقة أخوه..
الله علي سلطة الفول لما ماتكون خفيفه وماتكون تقيله!
وتكون الطماطم الفيها المقطعه ماسكه نفسها..الله علي طعم الليمون فيها!

هوي عماد.. أنا جني وجن الناسي البيسيحوا ولا يحلو الدكوه بادينهم..المعلقه دي بتعمل شنو؟
بعدين لما تقطع البصل فيها.. قطعوا قبل الأكل بشويه علشان طعمها يكون حلو..بس ضيف الطماطا ساعة الأكل علشان أعصابها ماتبوظ زي أعصابك كده وانت جعان..
قلت ليك شنو..

جربت الطغميه السخنه مع العيش التركي مع الدكوه؟
خلاص جرب وكلمني..والله لو ما الأرشفه البقت لينا في رقبتنا دي كان وصلنا البوست ده لرمضان..
Post: #8
Title: Re: سلطة دكوه!
Author: عبدالكريم الامين احمد
Date: 04-28-2007, 12:47 PM
Parent: #4

والله كلام..
مالك يامني وسيرة سلطة الدكوة كمان حسع..
انا عندي (خالتي) الله يطراها بالخير ممكن اقدمها في مسابقة علي مستوي العالم (كاحسن زولة بزبط سلطة
دكوة في العالم ده كلو)...!!
يامني ديك سلطة دكوة تاريخية ومميزة وفيها خلطة بنسبة موزونة اكبر معامل السلطات العالمية ما تعمل زيو...
يبداء الشغل بنوعية الدكوة (ذاتتها) ودي مفروضة تكون دكوة مرحاكتها (سنينة) ولازم يكون( فول درت)
ثم كمية الخلطة بالموية وبالاضافة الي كمية الطماطم والتبش (ما عجور زي ما عندكم). ثم شطة دنقابة
وياريت الشغل ده كلو لو لقي ليهو زيت (سمسم) بالجنبة كده..!!!
ياخي ديك سلطة دكوة تظل في كل لحظات الجوع في الغربة زانة ليك في (راسك)....!!
..بالله يا مني تاني ما تجيبي سيرة الحاجات الزي دي عليك الله....
Post: #23
Title: Re: سلطة دكوه!
Author: Muna Khugali
Date: 04-28-2007, 01:48 PM
Parent: #8

عارف ياكرمه أنا بعمل الحاجات دي وبحب اشوفها في الأكل وما آكلها!

يعني مثلا سلطة الدكوه دي لازم أقطع ليها بصل موش؟
وشطه حمرا واحيانا خضره.. انا ما باكل شطه خالص..
ولا بصل ولا توم الا يكون مستوي في الأكل..طول حياتي كده..لكن بعملهم في السلطه للناس التانيه..
لكن برضه سلطتي دي أنا مستعده ادخل مع خالتك في سباق عديل ينتهي بجائزه..وآخد انا الجائزه..
شفت كيف؟
كمان شفت الفول...
الفول بالدكوه والبصل يستوي معاه وتفعصه وتخت ليه زيت وشمار أخضر...
غايتو ده برضه لا انت ولا خالتك تقدروا تغلبوني فيه..
أهه قلت شنو؟
قلت ليك مع الليمون بتخت حبة خل ولا لأ؟
Post: #20
Title: Re: سلطة دكوه!
Author: Muna Khugali
Date: 04-28-2007, 01:19 PM
Parent: #4

شفت يا عادل..
بودي زوج آيه بقي يجي يقعد حلاته.. ويقول لي
خالتو ممكن سلطة دكوه!
ياهو ده الأتعلموا في العربي..
باكر كمان يقول لي عايز قراصه



الله يستر مايجيني أساسي ويقول مني بقت تقول بودي كمان بعد ماكانت بتقول آيه بتي!
Post: #32
Title: Re: سلطة دكوه!
Author: Muna Khugali
Date: 04-28-2007, 09:30 PM
Parent: #4

لما جيت من كاس ياعادل جباره..جبت معاي 'فول اجات' كتير جـدا..
وكنت فرحانه بيه خالص..

بس سحوره بنت اختي قالت لي انتي ماعارفه انه الفول بيسبب السرطان?
وقعدت توصف لي وتتكلم كتير..لغاية ما زحيت الفول من فدامي انا زعلانه
شديد لأنه نفسي كان فيه..
Post: #6
Title: Re: سلطة دكوه!
Author: Zeinab
Date: 04-28-2007, 12:36 PM
Parent: #1

منويه سلامات

الساعه عندي اسي 2:35 يعني الغداء قرب وطبعن اسهل شي سلطه الدكوه

يا سلام علي سلطه الدكوه


زينب الشفيع
Post: #26
Title: Re: سلطة دكوه!
Author: Muna Khugali
Date: 04-28-2007, 02:08 PM
Parent: #6

Quote: منويه سلامات

الساعه عندي اسي 2:35 يعني الغداء قرب وطبعن اسهل شي سلطه الدكوه

يا سلام علي سلطه الدكوه


زينب الشفيع


زوبه..

الأسم ده أنا طولت شديد من سماعه..
آخر زول كان بيستعمله من ناسنا الكبار الخليفه عوض خوجلي نور الله قبره..
عارفه هو مربي خالتي..وكان دايما يناديها يازوبه..

المهم.. البوست ده حلاوته انه جه علي ساعة الغدا وانتي محتاسه..
موش بوست مفيد؟
اسه يجي اسمه مين يقول ده موضوع تكتبوا فيه؟
واحنا مواضيعنا الجاده بتضيع..
وانتو السبب في اي مصيبه بتحصل في الدنيا...

لا حول ولا قوه الا بالله..
يقي طبق سلطه يعمل كده؟
ماهي طريقتك المبتكره في عمل سلطة الدكوه يازوبه؟
Post: #9
Title: Re: سلطة دكوه!
Author: هشام مدنى
Date: 04-28-2007, 12:47 PM
Parent: #1

دكــــوه بالشطة الخضره وشوية ثوم ....


لا حوله ولا قوة الا بالله...
Post: #11
Title: Re: سلطة دكوه!
Author: Nadia Elsir
Date: 04-28-2007, 12:52 PM
Parent: #9

العزيزة منى,


Quote: ممكن سلطة دكوه؟


ايوة ممكن و ليه لا .

Quote: دكــــوه بالشطة الخضره وشوية ثوم ....


و كمان حبة زيت سمسم و شوية بصل ابيض !

هممممممممممممممممممممممم


يا سلام





نادية السر
Post: #12
Title: Re: سلطة دكوه!
Author: عاصم ابوبكر حامد
Date: 04-28-2007, 12:57 PM
Parent: #11



يا نادية
كيفك
مشتاقين والله


لكن ما عرفتك
Quote: هممممممممممممممممممممممم


بتاعت جومة وسلطات...



تسلمى
Post: #15
Title: Re: سلطة دكوه!
Author: ناجى أحمد البشير
Date: 04-28-2007, 12:59 PM
Parent: #11

سبحان الله

قبل عدة ايام دخلت فى سجال مع احد الاخوان فى العقد الثالث من العمر عبر الهاتف

وفى معرض الحديث ولاكثر من مرة قال لى ( فول مسحون ) فى الاخر قلت ليه تقصد دكوة

رد قائلا دكوة يعنى شنو .. قلت ليه ما بتعرف الدكوة قال لى لا ..

قلت ليه دى امكن لغتنا برانا فى البندر , نحن بنعرف الدكوة وفول الفلاته ومرات نقول

ليه فول حاجات ..

خفت اقول ليه بتعرف حلاوة طحنيه يقوم افتكرها الطحنيه العادية دى وما نخلص , وما اقدر

اوصفها ليه بانها حلاوة مثل الشعر تباع بواسطة الحاجات ايضا فى ضل المدارس والاسواق

زمان , لها طعم خاص مختلف عن الطحنيه .
Post: #34
Title: Re: سلطة دكوه!
Author: Muna Khugali
Date: 04-29-2007, 10:01 AM
Parent: #15

Quote: خفت اقول ليه بتعرف حلاوة طحنيه يقوم افتكرها الطحنيه العادية دى وما نخلص , وما اقدر

اوصفها ليه بانها حلاوة مثل الشعر تباع بواسطة الحاجات ايضا فى ضل المدارس والاسواق

زمان , لها طعم خاص مختلف عن الطحنيه
.


اها ياناجي انا بعرف الطحنيه العاديه البي بيعوها في العلب والصفايح..
لكن طحنيه شعر دي ماسمعت ببها!
دي لازم المره الجايه اجي الخرطـوم آكل منها..

الله يستر مايجيني صديق الموج يفول لي.. بتعرفيها يامني..دي الحلاوه الشكلها زي الشعر وكانت بتتباع
في معرفش ايه كده..
Post: #31
Title: Re: سلطة دكوه!
Author: Muna Khugali
Date: 04-28-2007, 09:13 PM
Parent: #11

ناديه الندي..
الأكلات اللذيذه هي الأكلات الزي دي...
أنا كنت قايله سلطة الدكوه دي عندنا احنا السودانيين بس..
لكن زمان أيام الدراسه كان عندي زميلتي هولنديه بتعملها زينا بالضبط لكن من غير زيت..وبعدين لازم ياكلوها مع الشيه..
أسه انا نفسي أتلم عليكم في الخرطوم ..وآكل معاكم سلطة دكوه وفول.. لكن ماتقولوا مني نقناقه..
بس انا ما أكلت في حياتي زيت سمسم..وبصراحه مابحبه..
والحمد لله بودي أو عبد الرحيم ما بيعرفه..كان اسه قـال لي عايز السلطه بزيت السمسم ياخالتو!
Post: #13
Title: Re: سلطة دكوه!
Author: هاشم أحمد خلف الله
Date: 04-28-2007, 12:57 PM
Parent: #9

Quote: دكــــوه بالشطة الخضره وشوية ثوم ....


لا حوله ولا قوة الا بالله...



ياسلااااااااام عليك يا هشام أديني معاك والله لعابي سال .

مني خوجلي قصدك شنو ؟؟ يعني عايزة تجوعنا بعدما خلاص مليتيها علي الأخر .
Post: #17
Title: Re: سلطة دكوه!
Author: عادل جبارة
Date: 04-28-2007, 01:06 PM
Parent: #13

Quote: و كمان حبة زيت سمسم و شوية بصل ابيض !

والشمار .. الشمار .. منى بتحب الشمار
Post: #50
Title: Re: سلطة دكوه!
Author: Muna Khugali
Date: 04-30-2007, 02:07 PM
Parent: #13

نرفع البوست مواعيد الغداء جات..

زمان يا هاشم عندنا جارتنا بتتونس معانا في البيت بالودع..
كل ما نفلس نقول ليها عليك الله أرمي لينا ودع..
علشان عارفنها هاتقول شنو..
وهي ذاتها عارفانا عايزين شنو..
بس أول رميه والتانيه تقول بعد ما ترسم ضحكه فرحانه كده فوق وشها...

ماشاء الله..القروش كترن وجن..ياهن ديل..
وحات سيدي الأمين دخلن خزنتك يا جاره..الا محمدنه مديحه!

وأنا اسه رفعت ليكم البوست علشان تتغدوا سلطة دكوه..
Post: #14
Title: Re: سلطة دكوه!
Author: Fadl Karrar
Date: 04-28-2007, 12:59 PM
Parent: #9

سنة 93 فى البركس
الدنيا رمضان
مشينا بالعصر سوق الخضار فى بحري
جبنا ليمون ودكوة وبصل أخضر وشطة خضراء
عشان نزيد بيهم فطور الداخلية ( أول دفعة تكت فى الجامعة)
المهم
ظبطا الدكوة ظبطة شديدة خلاص وما أحلي الأكل مع الأصحاب
بعد ما وقفنا فل
غلبتنا القومة عشان نغسل أيدينا( عدلناها يا عادل جبارة ، شكراً )
قمت فى لحظة تجلي وقلت للزملاء
( والله يا أخوانا الدكوة دي فيها سر إلهي )
الجماعة من الضحك إنبطحوا عديل
وفي بعض الخبثاء اللذيذين
سموني ( السر الإلهي )
وفى جماعة ( فضل دكوة )

والله أيام يا زمان
Post: #18
Title: Re: سلطة دكوه!
Author: عادل جبارة
Date: 04-28-2007, 01:11 PM
Parent: #14

Quote: غلبتنا القومة عشان نسغل أيدينا

فضل كرار
والله ماكان في داعي ( تسغلوا ) إيدينكم ولا حاجة .. تحلسوا أصابعينكم وبث !!!
Post: #19
Title: Re: سلطة دكوه!
Author: عادل جبارة
Date: 04-28-2007, 01:14 PM
Parent: #18

Quote: هو متين جيت بيناتنا وحفظت اسم سلطة الدكوه؟!

شفت ياعاصم الولد ده كيف؟


عاصم
إنت معاي والله معاها ... حدد موقفك قبل ما يجيك حبيب نورة ...
Post: #21
Title: Re: سلطة دكوه!
Author: عادل جبارة
Date: 04-28-2007, 01:44 PM
Parent: #19

Quote: شفت يا عادل..
بودي زوج آيه بقي يجي يقعد حلاته.. ويقول لي
خالتو ممكن سلطة دكوه!
ياهو ده الأتعلموا في العربي..
باكر كمان يقول لي عايز قراصه


أم آية
والله طالما بودي بحب سلطة الدكوة معناها بعرف عربي أحسن مني ومنك كمان .. وعلى فكرة طالما جات سيرة الدكوة .. أنا شخصيا ما لاقاني زول مابحبها .. لكن في الأيام الأخيرة سمعنا الكثير عن بعض المشاكل الصحية البسببها الفول المسحون وده المهم .. أنا كنت فاكرك عايزة تفتحي الموضوع ده .. طيب خلينا في موضوع بودي بصراحة عايزين نتعرف عليه .. ممكن
Post: #22
Title: Re: سلطة دكوه!
Author: غادة عبدالعزيز خالد
Date: 04-28-2007, 01:46 PM
Parent: #19

تذكرنى أيام طفولة صافية
.
.
Post: #40
Title: Re: سلطة دكوه!
Author: عاصم ابوبكر حامد
Date: 04-29-2007, 01:19 PM
Parent: #19


عادل جبارة
كيفك

Quote: إنت معاي والله معاها ... حدد موقفك قبل ما يجيك حبيب نورة ...


اى شئ ولا تجيب حبيب نورة

قول كطويس

سلامى له ا>ا قابلته
Post: #29
Title: Re: سلطة دكوه!
Author: Muna Khugali
Date: 04-28-2007, 02:32 PM
Parent: #9

Quote: دكــــوه بالشطة الخضره وشوية ثوم ....


لا حوله ولا قوة الا بالله...



هشام أخوي السلطه اصابتك في مقتل موش؟

استغربت في عبدالرحيم زوج آيه..
حب غريب للفول وسلطة الدكوه والطعميه..
وبيستعبط..
ماعايز يتلم يعملها براهو..لازم خالتو الهي أنا تعملها ليه..
وآيه بتستعبط أكتر منه..
اقوليها قومي أهمليها..
ترفع لي صوتها وتقتل حيلها وتقول لي..
لكن انتي ياماما بتعمليها حلوه..
الخطه الجايه امكن تكون حقت غتاتات..
اخت فيها شطه كتيره..ولا ايه رأيك؟
Post: #24
Title: Re: سلطة دكوه!
Author: انعام حيمورة
Date: 04-28-2007, 01:51 PM
Parent: #1

الله انا بحب سلطة الدكوة حب شديد

الا اني في هذه الايام حارمة نفسي من اي شي لاني عاملة رجيم وعايزة اضعف شدددديد

لكن عموما بوريكم عدد السعرات الحرارية لكا 100 جرام منها :

الطماطم = 25 سعرة حرارية
خيار = 17
بصل اخصر =37
جرجير = 23
جبنة بيضاء = 300
دكوة =580

يعني صحن سلطة دكوة 100 جرام من كل نوع خارج حسابات الزيت سمسم بتعادل 982 سعرة حرارية


لا لا كتير حا اخليها لحدى ما اضعف بعدين أحبها


ولا اقول يا منوية اول من تجي الخرطوم حا نكون مدكووين مع بعض
Post: #25
Title: Re: سلطة دكوه!
Author: د.محمد حسن
Date: 04-28-2007, 02:05 PM
Parent: #24

نعام قالت

الطماطم = 25 سعرة حرارية
خيار = 17
بصل اخصر =37
جرجير = 23
جبنة بيضاء = 300
دكوة =580

يعني صحن سلطة دكوة 100 جرام من كل نوع خارج حسابات الزيت سمسم بتعادل 982 سعرة حرارية


لا لا كتير حا اخليها لحدى ما اضعف بعدين أحبها


اولا دي حسابات خارم بارم

وحارمة نفسك ساي

بوست فاتح للشهية
Post: #27
Title: Re: سلطة دكوه!
Author: abubakr
Date: 04-28-2007, 02:27 PM
Parent: #1

يا مني .. دكوة .. يعني شنو ؟؟ بربري اها تعملي شنو؟
يا د.محمد : من فضلك اتاكد انو علبة الحبوب مافي المطبخ ؟ وانسي انك بزنزس مافي وما تقوم تعمل لنا سلطة دكوة بالحبوب دييك ؟
Post: #30
Title: Re: سلطة دكوه!
Author: اساسي
Date: 04-28-2007, 02:42 PM
Parent: #27

بودي منو يا مني ؟؟

انت الشفع ديل عرستوا ليهم في الروضة ؟


ـــــــــــــ
قسما بالله ماشي كويس في الموضوع لحدي ما وصلت بودي زوج اية ..طق... عيوني نططن .!!!

ولقيت تعليقك حق جيتي ...

لكن بالغتي فيهو عديل

لكن بالجد انا لو زوج بتي اسمه بودي بجيب ليهو بزة ما دكوة؟؟

اوع ما تقولي لي دا ما اسم الدلع كمان..؟؟

عشان نقلبها سخينة بدون دكوة اسع
Post: #33
Title: Re: سلطة دكوه!
Author: انعام حيمورة
Date: 04-29-2007, 08:52 AM
Parent: #30

Quote: عبدالرحيم زوج آيه



Quote: اوع ما تقولي لي دا ما اسم الدلع كمان..؟؟



Quote: لكن بالجد انا لو زوج بتي اسمه بودي بجيب ليهو بزة ما دكوة؟؟
Post: #28
Title: Re: سلطة دكوه!
Author: انعام حيمورة
Date: 04-28-2007, 02:31 PM
Parent: #1

ويا دكتور كمان ازيد

ودي الحالة ما اكلناها بالعيش لانو العيش الـ 160 جرام فيها 480 سعرة حرارية

يعني الوجبة بتبقى بي 1462 سعرة حرارية ..

عارف محتاجة لي كم دقيقة مشي عشان تتحرق 146 دقيقة ...
Post: #35
Title: Re: سلطة دكوه!
Author: د.محمد حسن
Date: 04-29-2007, 10:43 AM
Parent: #28

يا ناس السلطة
صباحكم خير

فيها شطة خضرا والا نجيب معانا ؟

انعام

146 دقيقة
يعني ساعتين و6 دقايق

يعني الخرطوم الكاملين بعد تحديد السرعة
لكن في حالتك
تكون امدرمان الثورة الحارة الخامسة
Post: #36
Title: Re: سلطة دكوه!
Author: عادل جبارة
Date: 04-29-2007, 10:52 AM
Parent: #35

Quote: بودي منو يا مني ؟؟

انت الشفع ديل عرستوا ليهم في الروضة ؟



تصدق يا سوسو أقصد يا أساسي .. يا دوب الليله عرفت أنو بودي ده إسمه عبد الرحيم !!!!

شكرا .. معاك أخوك .. دوليييي
Post: #38
Title: Re: سلطة دكوه!
Author: Muna Khugali
Date: 04-29-2007, 12:00 PM
Parent: #36

آولا يا دوللي..إسم دلع اساسي ماسوسو..
إسمه أوسه..
يعني ولد عمره 19 سنه يسمي نفسه عبد الرحيم ليه?
أصله هو قدر محمد عبدالجليل!
ولا الأسامي يعني عدمت?
بجبك راجعه..
Post: #37
Title: Re: سلطة دكوه!
Author: الطيب شيقوق
Date: 04-29-2007, 10:53 AM
Parent: #28

منى في حاجة قريبة سلطة الدكوة واحلى حاجة في الدنيا بحبوها دائما ناس البهجة ؟؟؟؟

وهى الموليتة وهي بدكوة السمسم احلى من بدكوة الفول .
Post: #39
Title: Re: سلطة دكوه!
Author: بشير دفع الله
Date: 04-29-2007, 01:15 PM
Parent: #37

منى العزيزه ..

يللا منتظرين ..

مع انو الدكوة والشطة .. تؤدى الى الشروع فى البهجه .. ودى زمان كانت فيها عقوبه حديه

مشتاقين والله يا منى ..
Post: #41
Title: Re: سلطة دكوه!
Author: الطيب شيقوق
Date: 04-29-2007, 03:54 PM
Parent: #39

Quote: مع انو الدكوة والشطة .. تؤدى الى الشروع فى البهجه .. ودى زمان كانت فيها عقوبه حديه


بشييييييييييير


تقصد المزّة؟
Post: #63
Title: Re: سلطة دكوه!
Author: Muna Khugali
Date: 06-20-2007, 06:27 PM
Parent: #39

Quote: منى العزيزه ..

يللا منتظرين ..

مع انو الدكوة والشطة .. تؤدى الى الشروع فى البهجه .. ودى زمان كانت فيها عقوبه حديه

مشتاقين والله يا منى ..


بشير انت بتظهر مع الأكل بس؟
انتظرني في رمضان وبوستات ملاح الروب والطعميه.. والكنافه والمحمر وكل فرخة نايمه علي جنبها..
سلطة الدكوه تعمل فيك كده؟
ليه حق بودي الغريب يموت فيها..
الأيام دي عامله نفسي ما متذكراها..

الشافع يقول داير الأكل..لما أعملوا ليه وياكله...يجيني يقول لي

khaltu, you are feeding me too much!
وبقي يقول وزنه زاد..خلاص مش اكلي ده بخليه..وسلطة الدكوه الا يحنسني اعملها ليه..بس!

الشوق اكوام يا بشير..انشالله تكون بخير..
Post: #60
Title: Re: سلطة دكوه!
Author: Muna Khugali
Date: 06-10-2007, 12:22 PM
Parent: #37

شيقوق ان بقيت طيب من العواصف تعال ورينا قصة

Quote: وهى الموليتة وهي بدكوة السمسم احلى من بدكوة الفول .
Post: #42
Title: Re: سلطة دكوه!
Author: abubakr
Date: 04-29-2007, 04:32 PM
Parent: #1

Quote: تقصد المزّة؟


العرريب .. اها دة البتسويهو لزوم الحت ؟؟ انت شيف المزة الحتات
Post: #43
Title: Re: سلطة دكوه!
Author: الطيب شيقوق
Date: 04-29-2007, 06:34 PM
Parent: #42

Quote: العرريب .. اها دة البتسويهو لزوم الحت ؟؟ انت شيف المزة الحتات


ووووووووووب منى بت العوض الله يعوضك العوض النافع الرطانى جاء لاحقنى وتاني الا تخلي دكوتك وتبقى حجازة ساااااااااى

خليها الدكوة يا بكوري هسع انت بتعرف العتي وبتعرف التين والزيتون وطور سنين وبتعرف الجبنة المضفرة والشطة الخضراء وبتعرف ال hang over

انت محتاج لاستيكة عدييييييييييل كده عشان تركز وتكتب كويس - منى سطحتى مش ؟ خليك مع دكوتك نحن هنا برانا بنمز وبنحت سااااااااااااااااااااااى .
Post: #44
Title: Re: سلطة دكوه!
Author: abubakr
Date: 04-29-2007, 06:48 PM
Parent: #1

Quote: بتعرف العتي وبتعرف التين والزيتون


شن عرفني يا مستر جون ما انا رطان ؟ ما شايفك بقيت تكتب بالانجليزي وانت مالك ومال الدكوة؟؟
Post: #45
Title: Re: سلطة دكوه!
Author: الطيب شيقوق
Date: 04-29-2007, 07:00 PM
Parent: #44

Quote: ما شايفك بقيت تكتب بالانجليزي وانت مالك ومال الدكوة؟؟


انت عارف يا بكوري اجمل ايام انا عشتها لما كنت محاميا في مدينة السوكى وقد صادف ذلك مرحلة انشاء بيارات مشروع السوكى الزراعي التى شارك فيها مجموعة من مهندسي المؤسسة الفرعية لاعمال الري وقد كانت لنا علاقة خاصة بهم وكنا نلتقي كل امسية في ميز المهندسين لنتحدث عن المنبر العام وكان ذلك في عام 1987 تقريبا . من اميز المهندسين الذين عرفتهم السر حماد وحمدان وابراهيم طه و وصلاح الجعلي وقد كان في راسة الموسسة وقتها السر كلودة ومحمد عبد الكريم عساكر واغبش .

يا حليل ايام زمان
Post: #46
Title: Re: سلطة دكوه!
Author: بشير دفع الله
Date: 04-30-2007, 07:58 AM
Parent: #45

شيقوق العزيز ...

نحييك يا دندراوى .. ونحي معاك ناس اعمال الرى

بس انت ذكرت اميز المجموعة .. وين امزهم ?

تحياتى .. والى صاحبة السلطة ..
Post: #48
Title: Re: سلطة دكوه!
Author: salma subhi
Date: 04-30-2007, 08:33 AM
Parent: #46

منى خوجلي ...عنوان البوست جوعنا...

سلطة الدكوة دي دايرة جنبها صحن فول تمام وطعمية حاااارة


مررت لالقاء التحية لأخت عزيزة.....مودتي واحترامي لك منى
Post: #49
Title: Re: سلطة دكوه!
Author: ابوبكر على
Date: 04-30-2007, 09:04 AM
Parent: #48

منى لكى التحية و للاخوة الاعزاء
البوست بدا بداية تخلى الواحد يمطق و الانزيمات و لا ماعرف شنو يادكتور البى جنبات اللسان تنزل لكن فجاءة البوست انحرف و زى وصلنا سريع للتحلية و كدا
تحياتى
دقيقة اتذكرت منى زى القالت انو الموضوع يخش النار قصدى الدكوة انا غايتو يطرشنى ماسمعت بى دكوة يلحقوها نار
comme si,je n'existais pas
Post: #51
Title: Re: سلطة دكوه!
Author: الطيب شيقوق
Date: 04-30-2007, 09:44 PM
Parent: #49

Quote: بس انت ذكرت اميز المجموعة .. وين امزهم ?


اخي بشير هولاء هم الرجال الذين قامت على اكتافهم اغلب مشاريع التنمية في السودان
Post: #53
Title: Re: سلطة دكوه!
Author: Muna Khugali
Date: 05-06-2007, 02:09 PM
Parent: #51

طيب يا ياحلوين..
أنا لما فتحت البوست ده كان ومازال هدفي ان أكمل شكري لكل من هنأني في زواج سعيده من سعيد والذي
لم ينته في البوستين السابقين بسبب الأرشفه..
ورأيتان طلب بودي المتكرر لسلطة الدكوه مدخل معقول يخرجنا من ملل الطرق التقليديه في العنوان..
وأعلمكم ان بودي هو الأسم الذي اختصرته لإسم عبدالرحيم زوج آيه .. كما اعلمك أن سلطة الدكوه
ليست طلبه الوحيد..بل معها يكثر من طلب الملوخيه والتي ينطق ال 'خ' فيها كاف..وكذلك الباميه!

داخل علي طـمع باين عليه موش?
Post: #54
Title: Re: سلطة دكوه!
Author: مجدي عبدالرحيم فضل
Date: 05-07-2007, 07:01 AM
Parent: #53

منو الرهيبة

،،، سلطة دكوه ،،،

تعرفي أنا ماري بيتكم لقيت لي طماطمتين ورا عربيتك اللفت باااك

البنية وكان ما أخاف الكطب كمان بصله مدردقه وصلت دكان ناااس عبدالشيخ

يعني سلطتك ناقصه طماطمتين + بصله وما حتظبط يعني دوري عربيتك والحقي

زنك الخضار قبال النهار وبجيكي علي مواعيد محمد ومعتصم يرجعوا وكمان أولاد

مديحة ومجدي لهم التحية ولآية وكل الخوجلاب يعني الغداء الليلة دكوه ساااي

وعندنا كورة ضد الدينمو وبنلبس في صالونكم الجامع داك لكل أحبابنا الجزائريين

وهنا نذكر "طيب الله ثراه الشهيد واللآعب الفنان وهويزين لنا الملعب بفنونه الجميلة

في كرة القدم بفريق الجزائر الف رحمة ونور علي قبرة وتابع المسير المعتصم المدور

وهذا اللقب كان يشتهر به آنذاك له التحية الصديق الغالي صاصه لاعب النص الفنان

وماتنسي الغداء يكون خفيف عشان الماتش وكده ،،فتك بسلطة فوله من سوق الندي محمصه

في فرن عصام للدكوة الحاجاتية(فول الحاجات). ،،،أبوقصي،،،

،،، مني من غير نظارة أعمليها عشان ماتجلي الزبطه،،،

رااااااااجع تاااني للبلد الدرجة الثالثة مربع (10)
Post: #55
Title: Re: سلطة دكوه!
Author: Muna Khugali
Date: 05-11-2007, 09:58 AM
Parent: #54

يا مجدي يا حليلك وحليل أيام زمان..
عارف المدور في القاهره وعنده مصطفي وعائشه حلوين شديد ماشاء الله ربنا يحفظهم..
والمدور لسه في حركاته..وأيام كورة الهلال في مصر عمل عمايل غريبه..
عارف المدور طبعا هلالابي زينا..
عمك الخليفه والشهيد ومحمد..وماما جاره من منطلق حبها لأودها..كانوا مريخاب..
أحنا البنات كلنا وماما عاشه وخالي الوحيد والمدور كنا هلال..
بعد الغداء والذي غالبا ماكان لسلطة الدكوه فيه حيز..
كان دايما في نقاش عن الكوره يحتد وتعلو فيه الأصوات قدام مكاواتنا لفريق مريخ بيتنا..
ولما عمك الخليفه يتغاظ من المكاواه يقوم يحاول يستعمل سلطاته علشان نبطل..
تقوم ماما عاشه تتدخل..ويضطر هو يسكت قدامها..امال ايه مش أم مرته وليها مكانتها؟
لكن كدي اسألك يا مجدي سؤال كده علي الماشي..
انت المريخاب ديل ليه بيبكوا لما يغلبوهم؟
عارف..زمان المورده بعد الهلال كانت منجضاهم نجاض..وهم بس تلقاهم يبكوا..غايتو!

المهم دي صورة المدور عصوم علشانك..
Post: #56
Title: Re: سلطة دكوه!
Author: Muna Khugali
Date: 06-08-2007, 11:15 PM
Parent: #55

تتملكني صوره معينه للنسيبه..يعني النسيبه علي طريقه سودانيه من الطرق الماعديده..
ونفسي اتقمصها واوعملها للود بودي ده..
وهو انا اصله لو ما مارست سلطات النسيبات ولا الحموات يكون الفايده ايه من عرس بتي؟
يكون كده عرس بتي ناقص..ناقص قيمة النسيبه وعمايلها الصعبه..النسيبه العندها نظره كده
تخلي زوج الأبنه يعرف الله واحد اكتر مما هو عارف..
طيب النسيبه ام نظره زي دي في راسي عندها شكل معين..يعني مثلا تكون صحتها اولا مساعداها..
يعني اسم الله عليها..
وبعدين تكون مشلخه..وانا ماعارفه سبب اني شايفاها في خيالي مشلخه ايه...لكن احتمال بدري
شفت واحده نسيبه صعبه بالمواصفات دي..
وجنها تحنن رجلينها وتلبس شيشي أبيض..
وفي صباع يدها الشمال خاتم جنيه دهب..وما لابسه غوايش!

بعدين اتخيل نفسي كده قاعده اوزع في الأوامر..والسراميس مرصوصات جنبي في الحوش والمكيف
ابو عجلات مقبلاه علي أنا..وحتي التلفزيون يكون مقبل علي انا..

وكدي النفكر في الباقي..
Post: #57
Title: Re: سلطة دكوه!
Author: معتز القريش
Date: 06-08-2007, 11:20 PM
Parent: #56

Quote: سلطة دكوه!


اللــــــــــــــــــــــه
Post: #66
Title: Re: سلطة دكوه!
Author: Muna Khugali
Date: 06-21-2007, 08:53 PM
Parent: #48

Quote: منى خوجلي ...عنوان البوست جوعنا...

سلطة الدكوة دي دايرة جنبها صحن فول تمام وطعمية حاااارة


مررت لالقاء التحية لأخت عزيزة.....مودتي واحترامي لك منى

سلمي حبيبتي ليك فتره كده غايبه..خير؟

الطعميه انا بحبها شديد وممكن آكلها كل يوم..علشان كده بيتي ماممكن يفضي خالص من طعميه مفرومه..بفرمها كيف؟
سمح أوريك علشان اخواني الرجال الهنا ديل يتعلموها ويعملوها براهم..أصله رمضان قرب..

مثلا كيلو كبكبي..

نخته في مويه تغطيه وكل ماتنقص المويه نزيدها لمدة يوم تقريبا..
اربعه بصلات كبار
توم..
شطه خضرا
ممكن طماطمايه علي اربعه وممكن نستغني عنها..
نصفي الكبكبي ونقسمه علي اربعه وكذلك نقسم المقادير علي اربعه..
نفرم الكبكبي فرمه حفيفه براهه الأول..
بعدين نضيف المواد ليه ونفرمه لغاية مايصبح عجينة..

ونقسمها في اكياس ونختها في الفريزر..

عايزين تحمروها وتاكلوها مع سلطة الدكوه زي ما عملت انا الليله؟
خلاص..تطلعوا الصباح لما تقوموا من النوم كيس طعميه من الفريزر..ده اذا كنتوا نمتوا ..
علشان يسيح من التجميد

نسخن زيت دره في طوه صغيره..يكوز الزيت كتير شويه..

نضيف لعجين الطعميه..ملح..كزيره بيكنج بودر وممكن بيضه..
نضيف خضار الشمار..
نحمرها في الزيت السخن ومامحروق..

لو عايزين تضيفوا سمسم ممكن..
بس..

لو عايزين الطعميه بالفول بدل الكبكبي...يبقي نعمل نفس بالفول المدروش بدل الكبكبي
ونستبدل البصل العادي بالبصل الأخضر..
والشمار نضيف معاه بقدونس..

ونستمر في الباقي زي ماهو..

يللا بقي سلطة الدكوه مع الطعميه الحاره..
الفول ده قصه براها..اوريكم بعمله كيف؟
خلاص بعد شويه..

وسبحان مغير اتجاهات البوستات..
من مباركات لأكلات!
Post: #67
Title: Re: سلطة دكوه!
Author: Muna Khugali
Date: 06-21-2007, 08:55 PM
Parent: #48

Quote: منى خوجلي ...عنوان البوست جوعنا...

سلطة الدكوة دي دايرة جنبها صحن فول تمام وطعمية حاااارة


مررت لالقاء التحية لأخت عزيزة.....مودتي واحترامي لك منى

سلمي حبيبتي ليك فتره كده غايبه..خير؟

الطعميه انا بحبها شديد وممكن آكلها كل يوم..علشان كده بيتي ماممكن يفضي خالص من طعميه مفرومه..بفرمها كيف؟
سمح أوريك علشان اخواني الرجال الهنا ديل يتعلموها ويعملوها براهم..أصله رمضان قرب..

مثلا كيلو كبكبي..

نخته في مويه تغطيه وكل ماتنقص المويه نزيدها لمدة يوم تقريبا..
اربعه بصلات كبار
توم..
شطه خضرا
ممكن طماطمايه علي اربعه وممكن نستغني عنها..
نصفي الكبكبي ونقسمه علي اربعه وكذلك نقسم المقادير علي اربعه..
نفرم الكبكبي فرمه حفيفه براهه الأول..
بعدين نضيف المواد ليه ونفرمه لغاية مايصبح عجينة..

ونقسمها في اكياس ونختها في الفريزر..

عايزين تحمروها وتاكلوها مع سلطة الدكوه زي ما عملت انا الليله؟
خلاص..تطلعوا الصباح لما تقوموا من النوم كيس طعميه من الفريزر..ده اذا كنتوا نمتوا ..
علشان يسيح من التجميد

نسخن زيت دره في طوه صغيره..يكوز الزيت كتير شويه..

نضيف لعجين الطعميه..ملح..كزيره بيكنج بودر وممكن بيضه..
نضيف خضار الشمار..
نحمرها في الزيت السخن ومامحروق..

لو عايزين تضيفوا سمسم ممكن..
بس..

لو عايزين الطعميه بالفول بدل الكبكبي...يبقي نعمل نفس بالفول المدروش بدل الكبكبي
ونستبدل البصل العادي بالبصل الأخضر..
والشمار نضيف معاه بقدونس..

ونستمر في الباقي زي ماهو..

يللا بقي سلطة الدكوه مع الطعميه الحاره..
الفول ده قصه براها..اوريكم بعمله كيف؟
خلاص بعد شويه..

وسبحان مغير اتجاهات البوستات..
من مباركات لأكلات!
Post: #58
Title: Re: سلطة دكوه!
Author: Alsa7afa_30
Date: 06-09-2007, 00:45 AM
Parent: #1





يلا بسم الله
Post: #59
Title: Re: سلطة دكوه!
Author: مجدي عبدالرحيم فضل
Date: 06-09-2007, 06:35 AM
Parent: #58



له التحية صاحبنا وحبيبنا المدور لاعب النص الفنان أبو مصطفي وعائشه

وأنت يامنو المريخاب ديل ما الحنية والجمال والكورة ذاته ويكفي أنو

الحاج ومحمد من هذا الفريق وأنتو زمان لمَا الهلال بيعسكر عندنا في الأمتداد

في بيت القطب الهلالي الكبير عبدالله السماني والمريخ في عظمة كمال عبدالوهاب

وبشارة والطيب سند طوالي غالبين حبيبي هلال مني والجماعة الطيبين وبعود الي

معتصم الخرخار زمن الدافور بتاع ميدان مربع تسعه كان طوالي مغلوب عشان بيلعب

مع الهلالاب والمريخاب في التيم هم الشايلين الفريق!



كدي يامنو نشوف خبرتك الضبابية كيف ذي زمان ولا فكت ذي كورة الهلال السلطة دي موزونه

ولا كده زابطه؟

،،،،،،،،أبوقصي،،،،
Post: #61
Title: Re: سلطة دكوه!
Author: Dr. Abdalla Siddig
Date: 06-10-2007, 02:15 PM
Parent: #59

عاشت سلطة الدكوه

Quote: [سلطة الدكوة دي دايرة جنبها صحن فول تمام وطعمية حاااارة



احسن حاجه جنب سلطة الدكوه سلطه الدكوه ذاتها.


مع تحياتي لكل امهاتنا واخواتنا الآئي علمننا عمل سلطة الدكوه.
Post: #62
Title: Re: سلطة دكوه!
Author: Muna Khugali
Date: 06-20-2007, 03:45 PM
Parent: #61

Quote: احسن حاجه جنب سلطة الدكوه سلطه الدكوه ذاتها.


مع تحياتي لكل امهاتنا واخواتنا الآئي علمننا عمل سلطة الدكوه.


اسه صحيح انتو الرجال ديل لو ماكان علموكم سلطة الدكوه كنتوا تاكلوا شنو في عزوبيتكم؟
الا جاهز موش؟

اهه يللا ناكل كلنا سلطة دكوه مواعيد الكل جات..
Post: #64
Title: Re: سلطة دكوه!
Author: ALI KHAIR
Date: 06-20-2007, 06:48 PM
Parent: #1

يعنى انتى لى فاتحة لينا كدا . انا اضفتك فى لماسنجر وبرضو ما شغالة بى على العموم اتمنى انك تضيفينى فى الماسنجر عشان هنا ما محل الونسات والنقاشات الجانبية .
Post: #65
Title: Re: سلطة دكوه!
Author: Muna Khugali
Date: 06-20-2007, 10:56 PM
Parent: #64

الأخ او الأبن علي خير..

قرات مشاركتك عدة مرات ولم افهم ما تبتغيه..
هذه اول مره علي ما اعتقد أتداخل او تتداخل معي..
اشرح مره اخرس ماتقصد..
وفي نفس الوقت حتي لا يطول انتظارك..اعلمك أنك من الممكن ان تضيفني لما سنجرك كما شئت..ولكني قطعا لن اضيفك ان لم تستأذني أولا أو اكون علي معرفه بك..
وانا في انتظار تفسيرك

Quote: يعنى انتى لى فاتحة لينا كدا . انا اضفتك فى لماسنجر وبرضو ما شغالة بى على العموم اتمنى انك تضيفينى فى الماسنجر عشان هنا ما محل الونسات والنقاشات الجانبية .


وماذا تنتظر من ونسه في المسنجر!

وبعد ذلك سيكون لنا حديث آخر..

سلام..