منى عوض خوجلى.....( حبّوبه)

Post: #1
Title: منى عوض خوجلى.....( حبّوبه)
Author: علي عبد الرحيم
Date: 11-18-2006, 04:18 PM
Parent: #0

ألف مبرووووووك العزيزة منى عوض خوجلى....فلقد انتهت قبل قليل مراسم عقد قران ابنتها وابنتنا .... أية....نتمنى للابنة اية عشاً زوجياً سعيداً هانئاً.... ول ( حبّوبة ) منى كل الأمنيات الطيبة والتهانى موصولة لكل ال خوجلى داخل وخارج السودان

Post: #2
Title: Re: منى عوض خوجلى.....( حبّوبه)
Author: عاطف عمر
Date: 11-18-2006, 04:25 PM
Parent: #1

ألف مبروك
لآية
ولزوجها
ولمنى

كل الأماني بحياة زوجية هانئة

جزيل الشكر أخ علي عبدالرحيم

Post: #3
Title: Re: منى عوض خوجلى.....( حبّوبه)
Author: malamih
Date: 11-18-2006, 04:59 PM
Parent: #2

أحر التهاني والتبريكات
لآل المرحوم عوض خوجلى..وأحص منهم الأستاذة منى..

وكذلك لنجلكم العزيز.. وبيت مال و نضال إنشاء الله

Post: #82
Title: Re: منى عوض خوجلى.....( حبّوبه)
Author: Muna Khugali
Date: 11-22-2006, 04:36 PM
Parent: #3

تسلم ياملامح..شكرا علي الدعوات الكريمة ولو انه العريس يجمعنا
معه الدين الإسلامي..ولا شئ غيره..يعني الله أعلم قصةالنضال دي تكون في!

ربنا يسعـدك

Post: #81
Title: Re: منى عوض خوجلى.....( حبّوبه)
Author: Muna Khugali
Date: 11-22-2006, 03:32 PM
Parent: #2

شـفت ياعاطف أخـوي الحصل ?
آية فرحانة علشان عرست!

آية بتدرس صحافة..وبتدرس أولاد محمـد هارون علشان تعمل دخل..وكمان عرست!!
وبعـدين عبـد الرحيم زوجها عمره قـدرها..ومشغول زيها ..وانا مرات افكـر أمشي
أطـبخ ليهم.. تاني أقول لأ..خـليهم يتحملوا مسئولياتهم!!

عقبال بناتي وابني..نفرح بيهم كلهم..في رفاعة وفي دبي..
سلام لسعدية..

Post: #108
Title: Re: منى عوض خوجلى.....( حبّوبه)
Author: نيازي مصطفى
Date: 11-25-2006, 07:17 PM
Parent: #2

ألف مبروك ..
ربنا يجعله زواج مبارك كله سعادة وهناء ووئام
الف مبروك .

Post: #128
Title: Re: منى عوض خوجلى.....( حبّوبه)
Author: Muna Khugali
Date: 12-01-2006, 07:10 PM
Parent: #108

يسـعد أيامك أخي نيازي..

أعتـذر عن قفزي لمـداخلتك..لم أراها..
أنا نفسي بتكم آيه تجي تجكي ليكم بنفسهاا عن زواجها!
آيه قالت لون الجـدران عنـدها في البيت ممل (أبيض) ولون عجايز..
وقالت هم الإثنين صغار جـدا مالمفروض يعيشوا في أي شـكل ممل..
طـيب وانا مالي أنا?
خليك معانا وشـوف محن الشفع دي!

Post: #4
Title: Re: منى عوض خوجلى.....( حبّوبه)
Author: الملك
Date: 11-18-2006, 05:03 PM
Parent: #1

الف مبروك ..منى عوض خوجلى

...
...

واية

إن شاء الله بيت مال وعيال

Post: #7
Title: Re: منى عوض خوجلى.....( حبّوبه)
Author: Tumadir
Date: 11-18-2006, 05:06 PM
Parent: #4

ألف مبروك لابنة الطرفين ...

وأتمنى لها حياة زوجية هانئة.

"العقبال لأمها"

Post: #86
Title: Re: منى عوض خوجلى.....( حبّوبه)
Author: Muna Khugali
Date: 11-22-2006, 06:17 PM
Parent: #7

وعقبال مانفرح بنسرين واخـوانها طـمطم حبيبتي..

عارفة أبلة زينب اتصلت من أمريكا تسألني..
بكيتي سـاعة العقـد?

أبكي ليه?

أناعارفة.. مالناس كلها بتبكي!

لكن عارفة ياطـمطم..المأذون كان مصري وانا وهو آخر هظار..
اتصورت معاه وكـان شـرطـي إنه المنديل الأبيض يكـون ظاهر في الصورة..
تابعي معاي وانتي تعرفي قصة المنديل!

بحفظـك ويحفظ اولادك حبيبتي ..آمين

Post: #85
Title: Re: منى عوض خوجلى.....( حبّوبه)
Author: Muna Khugali
Date: 11-22-2006, 04:58 PM
Parent: #4

وعقبالك ياناجي..
وان شاء الله تلقي عروس زي آية تقول ليك ماعايزة مهر ولا شيلة...
وبس نحنا نجي نعمل حفلة حـلوة تلمنا كلنا..

يحفظـك ليناالكريم..

Post: #5
Title: Re: منى عوض خوجلى.....( حبّوبه)
Author: طارق جبريل
Date: 11-18-2006, 05:05 PM
Parent: #1

الف الف الف مبروك
وان شاء الله العريس يكون امتدادي

Post: #88
Title: Re: منى عوض خوجلى.....( حبّوبه)
Author: Muna Khugali
Date: 11-22-2006, 07:43 PM
Parent: #5

إزيك يا طارق..
مصيره يجي الإمتداد ويزور بيت الخليفة ومحل الشهيـد ما اتربي..
ونحكي ليه عن طـفولة جميلة وأيام عمر فرحانة استكثرها علينا مجرمين الطـغمة
الحاكمة..

شـفت آية كبرت سـريع كيف?
أنا لسة بوست عيـد ميلادهاال18 ماخلصته..أقوم أكتب عن عرسها?
سـلم علي الأولاد وعلي الخصوص اسماء..
يخليكم لبعض..قول آمين

Post: #6
Title: Re: منى عوض خوجلى.....( حبّوبه)
Author: nourelhadi awad
Date: 11-18-2006, 05:05 PM
Parent: #1

مبروك وسعيد

وإن شاء الله يتباخت
وربنا يحضرك يامنى جنا جناها

وألف ألف مبروك

نورالهادي

Post: #8
Title: Re: منى عوض خوجلى.....( حبّوبه)
Author: mahmed alhassan
Date: 11-18-2006, 05:19 PM
Parent: #6

مبـروك للاخت/ مني ولابنتها اية وجميع ال خوجلي خارج وداخل السودان وبالزومة بصفة خاصة0
وشكرا الاخ/ علي عبد الرحيم
مع الامنيات لهم بحياة زوجية سعيدة 0
محمد الحسن - الزومة - الجبل -جوار الزاكياب

Post: #92
Title: Re: منى عوض خوجلى.....( حبّوبه)
Author: Muna Khugali
Date: 11-23-2006, 08:39 AM
Parent: #6

آيه يانور الهادي طـلعت عيونا عـديل في إختيار لبس مناسب للعقد..
مشيت معاها انا وماما جارة علشان تختار بعـد ما اخواتي حردوا المشي معاها وده كله بسبب عنادها..

المهم دخلنا محل واحـدة مغربية..كـل ماتجيب فسـتان آية تصر لينا وشها وتقول No way, I am not going to wear this!
تقوم الزولة مسكينه تجيب حاجات تانية..تقوم آية تقول..
are you serious? this is too much!
طـبعا ماما قاعـدة ومطـولة بالها شـديد..وانا أطلع الشارع احرق اعصابي بره وأرجـع..
آية مابتحب الحاجات الفيها لمعة..ومابتحب الزينة الكتيرة..ولا الألوان الصارخة..
بعدين دي بقت مشكـلة!
بعد شـوية آية جات شايلة حاجة كـده أصلها ماحقت مناسبة زي دي..قالت دي عجبتها..امرنا لله
قيسيها!
طـبعا آية متحجبة..والفسـتان شـوية قصـير..طـيب يا آيه..الحاجة دي طـولها ناقص..
عارف قالت شنو وكانت جـادة جـدا?

مامشكلة بلبس معاه بنطلون جـينز!

بكره عيالك يكبروا يانور الهادي ويتزوجـوا وتشـوف محن أكتر من كده وبس تضحك بعد ماتتغاظ!

Post: #94
Title: Re: منى عوض خوجلى.....( حبّوبه)
Author: mahmed alhassan
Date: 11-23-2006, 11:36 AM
Parent: #92

Quote: طـبعا آية متحجبة..[/QUOTE

155%

ربنا يحفظها

Post: #95
Title: Re: منى عوض خوجلى.....( حبّوبه)
Author: Muna Khugali
Date: 11-23-2006, 01:26 PM
Parent: #92

محمـد الحسن قريبي من الزومة..
عارف أنا الزومة دي قاتلاني عـديل كـده..أسه مرات اسرح كده واتخيل حفلة عرس كبيرة في
يشانهم الكبيرة دي..والطـنبور ونغماته الشجية..وصفقات الشباب ورقيص نساء يبدأ من اول
الحوش وفجأة يصل لطرفه الثاني في رشاقة وفن عجيب..ورجـال يبشروا فرحانين وزغاريد تصل
لكريمة!
زمان أي مناسبة خطـوبة او زواج في بيتنا لازم تبـدأ بفنان شـايقي حتي بعـد كـده أي فنان تاني..ياحليل أيام زمان وياحليل الخليفة..وأقول ليك كـلام..ياحليل الزومة.. بيوتها
أغلبها مقفل أصحابها بس خـلو البلد جـاريين ورا أرزاقهم..

تسلم أخـوي..

Post: #9
Title: Re: منى عوض خوجلى.....( حبّوبه)
Author: نصار
Date: 11-18-2006, 05:21 PM
Parent: #1

التهاني للعروسين و اهل الطرفين خاصة الحبوبة الشابة مني

Post: #101
Title: Re: منى عوض خوجلى.....( حبّوبه)
Author: Muna Khugali
Date: 11-24-2006, 08:36 AM
Parent: #9

عارف انصار انا لغاية دلوقتي ماقادرة استوعب الفكرة..
شـوف ذاتها الجملة دي عجيبة كيف

"آية اتزوجت"!!!

قبل بومين فرمت ليها طـعمية..إتصلت تسألني..بيعملوها كيف!
زمان اقول ليها تعالي شـوفيني بأطـبخ كيف تقول لأ..أنا طالعة ..ولا ماشية الكلية..
ولا تعبانة لأني غسلت العدة!

بس كـده تمام ..موش عايزة تعملني حماه وبعدها حبوبة? يللا خليها تتعب في البيت الأول..

شكرا يا نصار وعقبال ماتفرح بأي حاجة بتحبها..

Post: #10
Title: Re: منى عوض خوجلى.....( حبّوبه)
Author: بكري الصايغ
Date: 11-18-2006, 05:32 PM
Parent: #1

الاخ الـحـبيــب الـحـبــــــــــــــوب،
عـلي عـبـد الـرحـيـم،
تـحــية طـيـبة،
والشـكــر لك علي إفادتنـا خـبـر السـرور
وافـرحتنــا، والـف تهـنـئـةلإبنتنــا آيــة،
وللأخـت مـنـي، وهـي فـي أسـعـد أيامـهـا، نقـول، ادام اللة الافـراح،
والــف الــف مـبـروك.

Post: #12
Title: Re: منى عوض خوجلى.....( حبّوبه)
Author: رأفت ميلاد
Date: 11-18-2006, 05:39 PM
Parent: #10

ألف ألف مبروك

بيت مال وعيال

مبروك للإبنة آية والعزيزة منى

Post: #117
Title: Re: منى عوض خوجلى.....( حبّوبه)
Author: Muna Khugali
Date: 11-26-2006, 07:52 PM
Parent: #12

رأفت اخـوي كدي حـدثني..
بنت الشهيد اتزوجت ولا لسه?
البنات ديل بيكبروا سـريع خلاص!

غايته أنا يادوب عرفت ماما كانت أول مره يعقدوا علي فيها مافرحانة شـديد ليه..كنت تقريبا
شهور أكبرمن آية ..وفي الجامعة ولسه المستقبل واسع وأكبر من العرس قدامي..لكن أنا كنت حبيت وخلاص!

دائما احنا عندنا أمنيات لأبناءنا تشبهنا نحن ولا تشبههم هم..والاستماع لخياراتهم ليس بالشئ السهل بالنسبة لنا..لكن في النهاية هي حياتهم ولا نملك حيالها الا النصح ثم الوقوف معهم..

الكريسماس وين يارأفت?

Post: #105
Title: Re: منى عوض خوجلى.....( حبّوبه)
Author: Muna Khugali
Date: 11-24-2006, 08:53 PM
Parent: #10

http://www.marinamool.com/pic/up/16441314420061125.gif

الله يبارك فيك أخي دكتور بكري الصايغ..
أنا سألت عبـدالرحيم زوج آية ..
هتناديني شنو?
نظر لي بخجل واستغراب ثم ابتسم..لكنه لم يرد بكلمة تشرح رأيه..

سألته
قلت شنو?
رد هو هذه المرة وابتسامته تتسع... رد بسؤال..

عايزاني أناديك بشنو?
أي حاجة تعجبك..
ثم استدركت
ممكن خالتو أو ماما..
آية سمعت كلمة ماما وقامت صرخت..
لأ مايقول ليك ماما!

قلت ليه ياعبـدالرحيم ناديني اي حاجة بس عيب تناديني بإسـمي..

إتعلم يقول خـالتو...وبيقولها حـلوة شـدييييييد ...

ربنا يسـعـدك

Post: #107
Title: Re: منى عوض خوجلى.....( حبّوبه)
Author: Muna Khugali
Date: 11-25-2006, 07:05 PM
Parent: #10

إزيك يادكتور بكري..

ماما جارة قامت الصباح بدري يوم العقـد..تسألنا واحـد واحد عن المنديل الأبيض..نسألها عن
سبب المنديل..تعاين لينا بدهشة وتقول..
إنتو جنيتو ولا شنو?
المنديل الأبيض علشان لحظة توقيع العقد!

طـبعا هي قاصـدة لحظة ماالعروسة والعريس بيسلموا علي بعض ..والمأذون يغطي ايديهم بالمنديل الأبيض ويقرا الفاتحة..
قلنا لماما الكلام ده موجـود في افلام يوسف وهبي وخلاص بقي ماينفع دلوقتي..
بس هي ما اقتنعت وما ارتاحت الا بعد ما جبنا المنديل الأبيض..
علي فكرة المأذون كان عنـده فعلا منديل ابيض تمم بيه العقد..

ربنا يسعدك أخي دكتور بكري..

Post: #11
Title: Re: منى عوض خوجلى.....( حبّوبه)
Author: سارة حمزة
Date: 11-18-2006, 05:36 PM
Parent: #1

الف مبروك ..منى عوض خوجلى
واية
إن شاء الله بيت مال وعيال
الف مبروك يا علي

Post: #13
Title: Re: منى عوض خوجلى.....( حبّوبه)
Author: عثمان سيد أحمد
Date: 11-18-2006, 05:45 PM
Parent: #11

شكرا الأخ علي عبد الرحيم

وألف مبروك الأخت منى خوجلي

والإبنة آية وللجميع

ومليار مبروووووووووووك و بيت مال وعيال

مع مودتي 000

Post: #118
Title: Re: منى عوض خوجلى.....( حبّوبه)
Author: Muna Khugali
Date: 11-29-2006, 05:56 PM
Parent: #13

شفت ياعثمان أخـوي زوج آية ده قام من أسه يتشهي لينا في الأكـل!
اليوم داك كـانوا جايين يتعشوا معاي..سـألته..
تحب تاكل شنو?
قال ملوخية!
حاجة عجيبة ده متين إتعلم الملوخية?

شـكرا لمباركتك الجميلة..

Post: #119
Title: Re: منى عوض خوجلى.....( حبّوبه)
Author: Muna Khugali
Date: 11-29-2006, 05:56 PM
Parent: #13

شفت ياعثمان أخـوي زوج آية ده قام من أسه يتشهي لينا في الأكـل!
اليوم داك كـانوا جايين يتعشوا معاي..سـألته..
تحب تاكل شنو?
قال ملوخية!
حاجة عجيبة ده متين إتعلم الملوخية?

شـكرا لمباركتك الجميلة..

Post: #109
Title: Re: منى عوض خوجلى.....( حبّوبه)
Author: Muna Khugali
Date: 11-25-2006, 07:46 PM
Parent: #11

إزيك سـرورة الغالية...

أم العريس كان شفتيها زولة صغيرة شـديـد..تفتكريها أخته..وكمان جميلة جـدا..
إحنا بقينا أصـحاب ..
وشفتي علي عبـد الرحيم قعد يعاكسها!

يباركوا ليك أي حاجة حـلوة يارب ...

Post: #14
Title: Re: منى عوض خوجلى.....( حبّوبه)
Author: محمد مكى محمد
Date: 11-18-2006, 06:36 PM
Parent: #1

Quote: مليار مبروووووووووووك و بيت مال وعيال

Post: #120
Title: Re: منى عوض خوجلى.....( حبّوبه)
Author: Muna Khugali
Date: 11-30-2006, 10:03 AM
Parent: #14

محمـد مكي أنا بحاول أنشغل عن حياة آية بحياتي أنا..
لكن آخـر حاجة في اليوم أعملها تكون الكلام معاها في التلفون..وفي الصباح أقلق لغاية
مااتكلم معاها..
ولما أتكلم معاها مرات أشطح وأتحشر بأسئلة وتعليق..بعدين أقوم آخـد بالي وأتراجـع..
فحياة آية الآن بها جانب غريب اسمه الزواج..وواحد راجل غريب إسمه الزوج!

يسـعدك الخالق ويكرمك..آمين

مني

Post: #15
Title: Re: منى عوض خوجلى.....( حبّوبه)
Author: Ahmed Hamza
Date: 11-18-2006, 08:35 PM
Parent: #1

الف مبروك واسال الله ان يجعله مباركا

Post: #16
Title: Re: منى عوض خوجلى.....( حبّوبه)
Author: ديامي
Date: 11-18-2006, 11:01 PM
Parent: #15

ألف ألف مبروك لأبنتنا آية وجعله الله زواجا مباركا

Post: #123
Title: Re: منى عوض خوجلى.....( حبّوبه)
Author: Muna Khugali
Date: 11-30-2006, 02:37 PM
Parent: #16

شـفت يا ديامي آية كبرت سـريع كيف?
الكويس في الموضوع إنها سـاكنة قريب..يعني الزيارات سـاهلة
وأنا أسه دي ماشية أكمل احتفال عيـد ميلادها التمنتاشر..
إنت مابتجي كتير النت ..لازم تجي كتير لأنه وجودك بيفرحني..ويفرح آيتنا كتير..

يحفظك المولي..

Post: #115
Title: Re: منى عوض خوجلى.....( حبّوبه)
Author: Muna Khugali
Date: 11-26-2006, 05:46 PM
Parent: #15

آمين أخي أحمـد..

عارف آية بعـد مارحلت مني...بقي لي كل شـئ كـضب..والدنيا بقت فاضية..
أمشي غرفتها كـل شـويه كأني هألقاها نايمة!

يحفظـك ويسـعدك يارب

Post: #121
Title: Re: منى عوض خوجلى.....( حبّوبه)
Author: Muna Khugali
Date: 11-30-2006, 01:33 PM
Parent: #15

ومن المدهش حقا كيف يختصر ابناءنا وبناتنا مشاوير طـويله من الإستعدادات لمظاهر يراها
أغلبنا في السودان أساسيات..ويراها هم أفعال لا معني لها علي الإطـلاق..

مهر ابنتي كـان جنيهات كما طلبت هي...مؤخـره كان أكبر من المقـدم ..بلغ ثلاثون جنيها
بالتمام..

نبارك ليك كل السمح أخي أحمـد حمزه..

Post: #17
Title: Re: منى عوض خوجلى.....( حبّوبه)
Author: Gaafar Ismail
Date: 11-18-2006, 11:04 PM
Parent: #1

الأخ علي عبد الرحيم

الأخت منى عوض خوجلي

ســلام

أصدق التهاني وأجمل ألأمنيات للعروسين بحياة سعيدة وإن شاء الله بيت مال وعيال.

تحياتي وفائق احترامي.

جعــفر

Post: #18
Title: Re: منى عوض خوجلى.....( حبّوبه)
Author: عبدالمنعم الرزوقي
Date: 11-18-2006, 11:44 PM
Parent: #17

الـف الـف مـبروك ابـنـتنا ايـة بـيت مـال وعـيال

والـتهـنئة موصـولة لـمـنـي خـوجلي ومـامـا جـارة وجـميع الاهـل

Post: #125
Title: Re: منى عوض خوجلى.....( حبّوبه)
Author: Muna Khugali
Date: 11-30-2006, 06:32 PM
Parent: #18

وفاتك العقـد يامنعم ومنظر بت أختك قاعدة قصاد عريسها تسمع في خطـبة المأذون..
كأنها فاهمه كلامه!

نقلت مباركتك لماما جارة وبتسلم عليك..
وعقبال مانبارك ليك كـل الحاجات الحلوة...

Post: #124
Title: Re: منى عوض خوجلى.....( حبّوبه)
Author: Muna Khugali
Date: 11-30-2006, 05:46 PM
Parent: #17

أنا علي قـدر مافرحانة بزواج آية لي قـدر ما أنا لسه بفكر فيها طـفلة شقية ولطـيفه
همها اللعب والأكـل وعمل واجب المدرسة!

شـكرا أخي جعـفر اسماعيل علي تمنياتك الجميلة..وان شاء الله نسمع بحاجات جميلة في حياتك
نفرح فيها معاك

Post: #19
Title: Re: منى عوض خوجلى.....( حبّوبه)
Author: عواطف ادريس اسماعيل
Date: 11-19-2006, 00:51 AM
Parent: #1

مبرووووووووووووووووك يا أحلى حبوبة بيت مال وعيال

Post: #20
Title: Re: منى عوض خوجلى.....( حبّوبه)
Author: نادر الفضلى
Date: 11-19-2006, 01:01 AM
Parent: #19

مبروك وإن شاء الله بيت مال وعيال

Post: #21
Title: Re: منى عوض خوجلى.....( حبّوبه)
Author: shazaly gafar
Date: 11-19-2006, 02:42 AM
Parent: #20

مبروووووووووووووووووووووووووك

عُش أخضر ومسيرة عامرة بالفرح والسعــــادة انشاء الله ..

قال شنــو :

وقــوع البـلاء ولا انتظارو ؛ حبوبه حبوبه ..

Post: #130
Title: Re: منى عوض خوجلى.....( حبّوبه)
Author: Muna Khugali
Date: 12-01-2006, 07:42 PM
Parent: #20

شـكرا أخي نادر يباركوا ليك السمح..أي سمح..

آية الأيام دي عايشة شـخصية الزول المسئول شـديد ..الله قادر!
شفت آية دي كـان لما أقول ليها قومي اعملي حاجة ..تطـلع عيني علي بال ماتعملها.. دايما في أعـذار..او تلكع!
دلوقتي تقوم من الصباح تعمل الحاجات في بيتها..وكمان قبل يومين لقيتها بتعمل شـوبنج!
انا فرحانة فيها لكن بيني وبينك ..هي واحشـاني شـديد!

Post: #126
Title: Re: منى عوض خوجلى.....( حبّوبه)
Author: Muna Khugali
Date: 11-30-2006, 06:51 PM
Parent: #19

الجميلة القادمة بقوة ويقين عواطـف...

شـفتي مجـدي زوج مديحة أخـتي قال لي شنو?

قال لي انتي ماعايزة آيه تتزوج علشان ماتبقي حبوبة!

اسة شـفع البلد دي لا قاعـدين يقولوا حبوبة لا حاجة..بس ينادوك بإسمك..
ولما ربنا يكتب وآية تجيب طـفل يتلخموا بالانجليزي وأنا مابعلمهم كلمة حبوبة!

ربنا يخليك ويعز مقـدارك...

Post: #131
Title: Re: منى عوض خوجلى.....( حبّوبه)
Author: Muna Khugali
Date: 12-02-2006, 02:21 PM
Parent: #126

شاذلي ...أسة آيه دي كان سمعت كلامي وجات عملنا ليها عرس هناك ما كان أخير?
كـان جينا رقصنا في حوشـكم الواسـع داك... وإنت طـبعا عارف رقيص بلدنا بدورلو حوشا كبير..
ولكن زي ماقلت ...أصلو أحسن وقوع البلا ولا انتظاره..

سـلم لي الجماعة ودايماطـاراكم وفي البال مشروع لقاء ربنا يقربه..قول آمين

Post: #22
Title: Re: منى عوض خوجلى.....( حبّوبه)
Author: Adel Sameer Tawfiq
Date: 11-19-2006, 02:42 AM
Parent: #1

الف مبرووووووووووووك منى ، آية والعريس السعيد !
بيت مال وعيال..
ويا..حليلك يامنى !
عادل سمير

Post: #132
Title: Re: منى عوض خوجلى.....( حبّوبه)
Author: Muna Khugali
Date: 12-02-2006, 03:35 PM
Parent: #22

تحلالك العافية أخـوي عادل سـمير..
انا مش قلتو علي حبوبة?
سـمح انتظروني..الحبوبات بيشـاكلوا م طـرف وآراءهم الصعبة مابيسمحوها..
وزول بيسـألهم مافي..
أها أرجـوني ولغاية ماأجيكم حبوبة..أقول لبك عقبال ولـدك وبنياتك يا ظـربف...

Post: #23
Title: Re: منى عوض خوجلى.....( حبّوبه)
Author: Ishraga Haimoura
Date: 11-19-2006, 02:54 AM
Parent: #1

العزيزة منى

الحكاية شنو إنتو ما بتشاوروا؟؟؟؟؟

ألف مبروك وربنا يسعدها بقدر نيتها ونية والدتها الحبيبة

Post: #24
Title: Re: منى عوض خوجلى.....( حبّوبه)
Author: ابو جهينة
Date: 11-19-2006, 03:15 AM
Parent: #23

ألف مبروك آية
و تهانينا أختي منى

Post: #25
Title: Re: منى عوض خوجلى.....( حبّوبه)
Author: إسماعيل وراق
Date: 11-19-2006, 03:26 AM
Parent: #24

ألف مبروك

تهانينا الحارة

Post: #137
Title: Re: منى عوض خوجلى.....( حبّوبه)
Author: Muna Khugali
Date: 12-02-2006, 09:51 PM
Parent: #25

إزيك اسماعيل أخـوي..

شـكرا علي مباركتك..ربي يبارك في اي زول وأي حاجة في حياتك..

الأيام بتجري شـديـد..أرسل لي صـديق عبـد الرحمن أبو آية..وهو صـديق عزيز لي..رسـاله
فرحانة جـدا..مامصـدق إنه آية اتزوجت...لأنه مامعقول تشوف الزول طـفل... وفجأة تلقاه
كبر شـوية...وفجـأة تاني تلقاه كبر خالص وكمان عرس!

تسلم أخي اسماعيل

Post: #135
Title: Re: منى عوض خوجلى.....( حبّوبه)
Author: Muna Khugali
Date: 12-02-2006, 06:27 PM
Parent: #24

أخي أستاذ أبو جهينة..
جـربت قبلي زواج الأبناء موش كـده?
شـعور بالإستغراب..يعقبه إنشغال..ثم يلي ذلك الحـدث وهو عقـد القران..
ثم يتبع ذلك شـعور الحمـد لله نرتاح شـويه من الزيطـة..
تنوم أول يوم وتاني يوم تســأل نفسـك..
ياربي آية عاملة كيف?
ثم تجلس تفكر في قلق..أتصل بيها ولا عيب?
ثـم يزيـد القلق ويكبر معه الإحساس بالوحـده..أنزل لغرفتها ويصـير دبدوبهاالذي تحتضنه أثناء
نومها آيتي التي اشتاقها..أرجـع لكم لأكتب عنها..
ثم يأتيني صوتها..

ماما كيفك?

تتلعثم الكلمات بعـد أن تتكاثر الأسئلة في رأسي..وأعجـز عن قول شـئ أكثر من قول..
وحشتيني حبيبتي..
فترد وانتي كمان ياماما..

تصبح علي مليون خـير أخي أستاذ أبو جهينه..

Post: #134
Title: Re: منى عوض خوجلى.....( حبّوبه)
Author: Muna Khugali
Date: 12-02-2006, 05:52 PM
Parent: #23

شـروقتي..
والله كان رغبتي آبه تعرس سـوداني..لكن القسـم!
مفهوم زواج سـوداني من سـودانية مع ابناءنا في الشتات غير موجـود بشـكل مأصل كما هو مأصل في أجـيالنا..حـتي وهم يصـرون علي اسلامهم!
عنـدما أخـبر العريس والـد آية برغبته في الزواج من آية ظـننت أنه سـيرفض..بل كنت أتمني ذلك..
لكنه ناقش الأمر معها ثم معي..وقبل هو فقبلت أنا وفرحنا وهيصنا..
والعروسـة للعريس والجـري للمتاعيس!

مشتاقين شـروقتي..وإن شاء الله نهيص ونفرح بفرح سـلمي

Post: #26
Title: Re: منى عوض خوجلى.....( حبّوبه)
Author: انعام حيمورة
Date: 11-19-2006, 04:04 AM
Parent: #1

الحبيبة منى خوجلي

الامورة آية

الف مبرووووووووووووك ، وضربت امبارح لحظة العقد .... لكن يظهر ام العروس كانت مشغولة شديد ... تركت مسج للمباركة ....

الف ميروك آل خوجلي

الف مبروك علي عبد الرحيم

بيت مال وعيال آية ...

Post: #138
Title: Re: منى عوض خوجلى.....( حبّوبه)
Author: Muna Khugali
Date: 12-02-2006, 10:23 PM
Parent: #26

نعومي..
اليوم داك أنا لا بشـوف لا بسمع..ضـيوف واستقبال وتباريك وحاجات كتيرة
أسة أنا يانعومي كان عايزة أزور نسابتي لازم احـدد معاهم من فترة مواعيـد الزيارة..
والونسة تكون بالإنجليزي وتكون عن شنو أنا ذاتي ماعارفة..بس عارفة حاجة واحـدة بس..
إنها لإنجـليز عامة كـده قطاعين..
يعني في أمل في شمارات!

سلامي الكتير لناس البيت ولناس المكتب..

وقبال ما أمشي..أقـول..تلقي الفي مرادك يارب..

Post: #27
Title: Re: منى عوض خوجلى.....( حبّوبه)
Author: Haytham Abdulaziz
Date: 11-19-2006, 04:09 AM
Parent: #1

مبروك وإن شاء الله بيت مال وعيال و عقبال ما تشوفي جديدا..

Post: #142
Title: Re: منى عوض خوجلى.....( حبّوبه)
Author: Muna Khugali
Date: 12-03-2006, 12:09 PM
Parent: #27

تسلم هيثم أخـوي...
شفت وليداتك الصغار ديل?
بكرة تلقاهم كبروا وفي الجامعات ولا كمان جاينك يقولوا ليك عايزين نعرس!

الخليفة وماما عاشة كانوا دايما بيقولو لينا أعـز من الولـد..ولد الولـد..
ياربي يكون الكلام ده صـح?

علي كـل حال أتمني ده مايحصل قبل كم سنه تكون هي خلصت قرايتها.. ويكون بالي أنا
طول شـوية!!

مبروك ليك ولينا كلنا...مش آيه بتنا كلنا?

Post: #28
Title: الف مبروك
Author: محمد عمر الفكي
Date: 11-19-2006, 04:27 AM
Parent: #1

العزيزة منى
الف مبروك وبيت مال وعيال

Post: #29
Title: Re: الف مبروك
Author: elham ahmed
Date: 11-19-2006, 04:38 AM
Parent: #28

الف مبروك

Post: #144
Title: Re: الف مبروك
Author: Muna Khugali
Date: 12-03-2006, 01:06 PM
Parent: #29

يارب آية تكون سعيـده في حياتكم زيكم ميـدو وهومي..ولا أزيـد معكما!

Post: #30
Title: Re: الف مبروك
Author: فيصل محمد خليل
Date: 11-19-2006, 04:41 AM
Parent: #28

حبوبة?

معقولة?

لا

دا انا حسع ما طول كنت اشوفه جاكة في الامتداد.

دي اصغر حبوبة.

مبروك للعرسيين وبيت بالفيهو يتساوا

Post: #148
Title: Re: الف مبروك
Author: Muna Khugali
Date: 12-03-2006, 02:24 PM
Parent: #30

الحبوبات كتيرات وانواع ...
زمان الحبوبات كانو كلهم مشلخات وممشطـات وعاملين 'نص أسـود شفايف'
وفي عيونهم في حـنية ظاااااهرة!

وبعـدين بقي في حبوبات من غير شـلوخ ومن غير مشاط ..بيتفننوا في الأكـل ...وحنينين
بس مازي أمهاتهم..يعني مابيحكوا ليك حكايات فاطمـة السمحة ولا حكايات بنات الشيخ الأغبش البيتقلبوا كـدايس..حبوبات بيحجـوا كويس حجاوي حـلوة..
ثم أتي علي الدهر حبوبات كـده بيمشوا الكوافير ويقروا جرايد وهم متحننات..وبياكلوا في المطاعم أحيانا بالشوكة والسكين... وبعدين الواحـدة فيهم تقول لبنتها وهي خارجة من البيت ومفتاح عربيتها عايز يقع من يدها بسبب استعجالها..
ماتنسي تدي فافي الوجبة قبل ماتطلعي..

أنا بقي لما أبقي حبوبة هاكون فرحانة شـديـد ..لأني هألقي عيل ألعب معاه وبيه..وبدل
ماأجـك في الشارع لزوم الرياضة..أجري ورا البيبي.. ولما هـو يصرخ ويضحك بعد ما أمسكه .. أقعـد أزغزغه لغاية مانموت من الضحك احنا الإتنين!!

الله يباركك يافيصل وربنا يجمعنا في السودان..زي ماجامعنا هنا..

Post: #143
Title: Re: الف مبروك
Author: Muna Khugali
Date: 12-03-2006, 12:44 PM
Parent: #28

ود الفكي أخـوي..

أم زوج آية قالت أسـلمت..آيه فرحـانة شـديـد..أنا قلت ليها كدي الننتظر شـوية نشوف فهما للإسلام..إن كان طلع فهم حب وسـلام نفرح ونسعد..إن كمان طلع فهم غلط ..عنيف وارهابي كمان مانفرح..ولا شنو?

هو الدين الإسـلامي ده ناقص ناس يشوهوه زي البلاوي العندنا دي?!

لما تحصل ليك أي حاجة حلوة يامحمد عمر الفكي تعال كلمنا..علشان نشاركك الفرح ونبارك ليك..

Post: #31
Title: Re: منى عوض خوجلى.....( حبّوبه)
Author: حمد فتح الرحمن
Date: 11-19-2006, 04:45 AM
Parent: #1

الف مبروك
امنياتنا للعرسان بحياة زوجية سعيدة

Post: #152
Title: Re: منى عوض خوجلى.....( حبّوبه)
Author: Muna Khugali
Date: 12-04-2006, 06:04 PM
Parent: #31

الله يبارك فيك حمد فتح الرحمن أخـوي..يسعـد أيامك..
آية دي بت واحـدة ماعندي غيرها..ولو علي نفسي..أبدا ما أخليها تعرس..
لكن دي رغبتها وأنا لازم احترمها..أصله في النهاية علاقتنا بأبناءنا مالمفروض تكون
علاقة تملك..نقول رأينا وننصح وبعد ده نبارك الإختاره ربنا...موش?

عشت...

Post: #32
Title: Re: منى عوض خوجلى.....( حبّوبه)
Author: أبو الحسين
Date: 11-19-2006, 04:52 AM
Parent: #1

ألف مبرووووووووووك..

وإنشاء الله بيت سعادة وهناء للعروسين يااااااااااااارب...

تهانينا للفاضلة منى وكل آل خوجلي...

كميات مودتي...

أبو الحســــــــــــــين...

Post: #153
Title: Re: منى عوض خوجلى.....( حبّوبه)
Author: Muna Khugali
Date: 12-04-2006, 06:27 PM
Parent: #32

يسمع منك المولي أبو الحسين أخـوي.. ويسعـدهم وينجح خطواتهم..

لكن أنا كـده عايزه لي شـهور حتي أتعـود علي غياب آية وسـكنها في بيت تاني..
زول يكون معاك 18 سنه.. بس يقـوم كـده يمشي مع زول غريب علشان اتزوجه?

بيني وبينك حارة علي الرغم من الفرح والهيصة!

ربنا يطـولك عمرك ويسعـدك محل ماتكون خطـواتك..قول آمين..

Post: #33
Title: Re: منى عوض خوجلى.....( حبّوبه)
Author: خالدة البدوي
Date: 11-19-2006, 04:52 AM
Parent: #1

مبرووووووووووووك منو لآية

وربنا يهنيهم وبيت مال وعيال

الله يخليك منو حبيبتي وتشوفي احفادها ،،

وعقبال عندك ،،،

مودتي ،،،

Post: #154
Title: Re: منى عوض خوجلى.....( حبّوبه)
Author: Muna Khugali
Date: 12-05-2006, 07:05 PM
Parent: #33

شـوفتي ياخلودتي أولادنا ماشاء الله بيكبروا سـريع كيف?
الأجيال الجديـدة عنـدها عملية في التفكير تسبقنا كثير ..هم قطـعا أفضل مننا في
عمليتهم..
أسه عرس آيه كان في الـسودان.. كان احتمال كبير الأشياء تأخذ شكل آخر..بداية من طلب
اليـد الرجالي.. يليها طلب اليد النسائي وفتح الخشم ..ثم يلي ذلك خطـوبة.. وبعـدها
عقـد ثم زفاف ..
وبين كل اجراء وآخـر صرف في ملابس ودهب وأكـل.. وتعب ونقة في ده آيوه وده لأ..

وغايتو أختك ربنا ريحها جنس راحـة..لزومها شنو العوارة ووجـع القلب?

ربنا يسعـدك حبيبتي وتعيشي وتباركي ونفرح كلنا سـوا..

Post: #34
Title: Re: منى عوض خوجلى.....( حبّوبه)
Author: عبد اللطيف بكري أحمد
Date: 11-19-2006, 04:54 AM
Parent: #1

العزيزة منى ، نشارككم أفراحكم ،، ونبشر بميلاد المفهوم العصري للحماوات،،

Post: #55
Title: Re: منى عوض خوجلى.....( حبّوبه)
Author: رشا سالم
Date: 11-19-2006, 05:43 PM
Parent: #34

الف مبروك يا مني ...

ومبروك لاية وربنا يجعله بيت مال وعيال..

Post: #156
Title: Re: منى عوض خوجلى.....( حبّوبه)
Author: Muna Khugali
Date: 12-05-2006, 08:18 PM
Parent: #55

رشا الحلوة شـدييييد

كـل ماتمر السنين أفكـر انه موضـوع الزواج ده بيتغير..وأقول الواحدة أصلها مالمفروض
تفكـر في الزواج قبل عمرها مايصل نهاية العشرينات..
لأنه يادوب في الوقت داك تكون الواحـدة قرت وعملت مكان في الشغل وعرفت الحياة أكثر..
لكن نظريتي ما مشت..بتي عرست وعمرها 18 ...وده سـن أنا في رأيي صـغير لكن دي رغبتها
وأنا عاينت ليها من زوايا أخري ودعمت رغبتها مع والدها..

تسلمي حبيبتي وربنا يحقق ليك أمانيك...

Post: #155
Title: Re: منى عوض خوجلى.....( حبّوبه)
Author: Muna Khugali
Date: 12-05-2006, 07:43 PM
Parent: #34

عارف ياعبـداللطـيف علي الرغم من إني بحب وكادات ماري منيب أشهر حماه
في تاريخ السينما المصرية..لكن غلبني خالص أبقي حماه..
كان نفسي أشخط وأنطر وأجي ماشية كـده بطـريقة يا أرض إحـفظي ما عليكي
أو يا ارض انهـدي.. ماعليك قـدي..
بس ياحسارة غلبني..عارف غلبني ليه?

خيبة كـده بعيـد عنـك..جايانا من ورا ..وعيب أقـول ليك زي منو لأنه الكلام بيمس الأهل..إ
حنا أصلو حماه ونسيبة دي ماعنـدنا..من دخل عنـدنا هـو في الحب مفقود الا من غضب عليه ربي!
فزوج البنت عنـدنا ابن وأخ وليس فقط زوج..والحمـد لله علي رزقنا بوالد في نقاء الخليفة
وأم في طـيبة وكرم أمي علمونا كيف نحب..

شـكرا عبـد اللطـيف ويارب أكـون ماما حـلوة لعبـد الرحيم زي ما أنا مامة آية..

يـديك الفي مرادك..آمين

Post: #35
Title: Re: منى عوض خوجلى.....( حبّوبه)
Author: hameem
Date: 11-19-2006, 04:56 AM
Parent: #1

مبروك عليهم يا منى
ألف مبروك
وطار مني السبق الصحفي

Post: #157
Title: Re: منى عوض خوجلى.....( حبّوبه)
Author: Muna Khugali
Date: 12-05-2006, 08:37 PM
Parent: #35

هميم انت قاطـع الحركـة كـده مالك?
سـافرت خلاص ولا شنو?
وبعـدين ولا يهمـك انت عليك الحفلة ..تجيب لنا فنان حـلو هنا

وأنا بعمل العشا علي طـريقة لقمة هنية بتكفي مية..ولا كمان لو عايزنا نتفشخر ممكن..
بس آية ماتعرف!

في انتظارك ياجميل..ولغاية ماتجي أقول ليك أفرح كتير وتعال..
أنا نفسـي أزغرد ليك..

Post: #36
Title: Re: منى عوض خوجلى.....( حبّوبه)
Author: حمزاوي
Date: 11-19-2006, 05:04 AM
Parent: #1

ألف ألف مبروك
لآية
ولزوجها
ولحبوبه منى
الله يعمر بيتهم ويسعدهم

Post: #37
Title: Re: منى عوض خوجلى.....( حبّوبه)
Author: سيد محمد احمد سيدنا
Date: 11-19-2006, 05:55 AM
Parent: #36

الاخت الغالية الاستاذة

منى عوض خوجلى

الاموره العروسة اية

الف مبروووووووووووووووك

الفين مبروووووووووووووك

مائة الف مبرووووووووووك

مليون مبروووووووووووووك

مليار مبروووووووووووووك

بليون مبروووووووووووووك

لنهاية الارقام مبرووووووك

وتستاهلى اكثر يا اختى منى وصغيرتنا العروسه اية

التهنئة موصوله للاسرة الخوجلية والعريس البهية واسرتة

وبيت مال وعياااااااااااااااااااااااااااااااااااااال

مبروووووووووووووووووووووووووووووووووووووووووووووووك

تحياتـــــــــــــــــــــــــــــــــــــــــــــــى

ســـــــيد

Post: #41
Title: Re: منى عوض خوجلى.....( حبّوبه)
Author: محمد العميري
Date: 11-19-2006, 06:25 AM
Parent: #37

الف مبروك للعزيزة مني خوجلي

وانشاءاللة بيت مال وعيال يااية

Post: #163
Title: Re: منى عوض خوجلى.....( حبّوبه)
Author: Muna Khugali
Date: 12-06-2006, 06:33 PM
Parent: #41

إزيك محمـد العميري..

أنا بس ماعايزة آية تجيب أطفال أسة لأنها لسة صغيرة شـديـد وقـدامها مشوار طـويل قدامها..
لكن آية علشان كانت طـفلة واحـدة عايزة تعوض بعيال كتار..وبعدين أنا علي الرغم من اني
قلت ليها رأيي واني ماهأقـدر اشيل عيالها..لكن طـبعا لو حصل ربنا أداها عيال ماهايكون
قدامي غير أربي معاها!!
أصلو الدنيا دي الزول مايعرف يرتاح فيها!

يباركوا ليك الفرح بالنجاح في اي حاجة انت تقصـدها..

Post: #162
Title: Re: منى عوض خوجلى.....( حبّوبه)
Author: Muna Khugali
Date: 12-06-2006, 03:33 PM
Parent: #37

كيفك سيد محمد احمد سيدنا?

شـفت ولا عملنا عرس في الخرطـوم ولا حاجة..يعني لا انتو اهلنا في الإمتداد ولا أهل
آية حضـرتوه!
لكن مباركتك دي عنـدي كأننا قاعـدين في صوان واحـد في الفتحة الجنب الباب..
نتونس شـوبة ونقوم نـدخل البيت نتونس مع عجايزنا ونرجـع الصوان تاني انت تبشر
وأنا أدي الشبال!

يخليك لينا يارب...

Post: #159
Title: Re: منى عوض خوجلى.....( حبّوبه)
Author: Muna Khugali
Date: 12-06-2006, 11:49 AM
Parent: #36

تسلم حمزاوي خـال آية ..
شـفتوا انتو فعلا أهل آية..حضـرتوا وجـعي بولادتها في مايو1988 في بوست آيه عمرها 17 ..
لغاية ماوصلت 17 سـنة..طبعا فلاش باك..وبعدين لما آ يه كملت 18 سنه كلكم جيتو هنيتوها..
مش هي بتكم الكبرت بينكم?

حضـرتو حضانتها.. مدرستها..أسة زواجها..أصـله هو الأهل بيبقو أهل كيف لو ماعاشوا حياة
الطفل وتفاصيلها?

يخلي ليك أسرتك ويخليك ليهم..

Post: #38
Title: Re: منى عوض خوجلى.....( حبّوبه)
Author: انعام عبد الحفيظ
Date: 11-19-2006, 06:08 AM
Parent: #1

منوية

الف مبرووووووووك لآية

على عبد الرحيم

شكراً على الأخبار الحلوة دي

Post: #40
Title: Re: منى عوض خوجلى.....( حبّوبه)
Author: فاروق حامد محمد
Date: 11-19-2006, 06:20 AM
Parent: #38

ألف مليون مبروك لآية يا منى

نسأل الله لها السعادة الدائمة

Post: #166
Title: Re: منى عوض خوجلى.....( حبّوبه)
Author: Muna Khugali
Date: 12-07-2006, 01:55 PM
Parent: #40

شكرا فاروق إن شـاء الله عنـدنا حـفلة..أحجز ليك طربيزة لكن قول لي عايز منو يقعـد
معاك فيها..ممكـن الطـربيزة نعملها كبيرة لو حـبيت..

اول مرة شـفت عريس آية قلت في نفسي..
ده شـنو لعب العيال ده?!
لأنه صـغير في عمره..
وبعـدين قلت..
طيب ديل هايتحمـلوا المسئولية كيف?
أحسن أوريهم لو عايزين يعرسـوا يتحملوا مسئوليتهم.. طـبعا اختبرتهم..
هاتسكنوا وين..سألتهم..
وقبل مايردوا... قلت لآيه اياك تكونوا مفكرين تسكنوا معاي?!
أتاري الولـد عنـده بيته!
هو شغال.. وماعايزين مهر ولا شبكة آية قالت..
قلت ليها ماعايزة ماعايزة..أصلو المهر حقها..وهي قرت عنه كتير وعارفة الغرض منه..وخلاص..

شـفت الحياة ممكـن تكون سـاهلة كيف مرات يافاروق?

تسـلم

Post: #164
Title: Re: منى عوض خوجلى.....( حبّوبه)
Author: Muna Khugali
Date: 12-06-2006, 07:01 PM
Parent: #38

شـوفتي يا نعومتي علي عبـد الرحيم جه فك الخبر وتاني ماجه..تلفون سـاكت ما عمله!

أها نجي لأهل العريس..ماشـاء الله عنـده أخـوان تيمان يعني احتمال في المستقبل آيه تجيب لينا تيمان..تيمان ولد وبنت..والباقيين بنات صغار..طبعا هو الكبير ..

انا غايتو ممكـن اعمل تنازل واساعـد أيه لو يوم ولدت تيمان..أنا كان نفسي يكون عنـدي تيمان آيدينتكال..كنت أجنن بيهم الناس ..وألخبط العالم كـله.. ألبسهم زي بعض وأسرح ليهم نفس التسريحة...واحتمال.. احتمال يعني..
أخليهم يمتحنوا لبعض لو كانوا في فصول مختلفة..و...و...

نبارك ليك كـل الحاجات البتتمنيها....

Post: #39
Title: Re: منى عوض خوجلى.....( حبّوبه)
Author: Muna Khugali
Date: 11-19-2006, 06:18 AM
Parent: #1

أسه الزول يضحك ولا يسـوي شـنو?

والله فيلم عـديل كـده..قال ايه.. آيـة اتزوجت!
نحنا غايتو اثناء النهار كان عنـدنا مصارعة انا وآية..كنا متشاكلين علي الحمام..
منو يستحمي الأول..وبعـدين آية قامت قالت خلاص نتصارع والبيغلب يدخل الأول..
أنا رضيت وكنت ناسية انها الأكثر طـولا..وقوة!

شـكرا ياعلي ويـديم عليك الصحة يارب..بس حبوبة دي انا بقيتا من زمان..
لما سحر بت مديحة أخـتي ولدت..بس ساعتها انا بقيت indirect haboba ..
ولما آية ربنايرزقها بعيال وأكـون direct haboba يحلها حلال ..ومن ضمن الحلول نشر
اشاعة في ويب سايت تاني ..نقول فيه ..

مبروك لمني خـوجلي زواج شـقيقتها آية!

ربنا يخليك يا أخـوي وفعلا آية بنتك وبنتهم..تسلم..

مني

Post: #42
Title: Re: منى عوض خوجلى.....( حبّوبه)
Author: doma
Date: 11-19-2006, 06:34 AM
Parent: #39

مبروك يا مني فرح آيـــــــــــــــــــــــه
امنياتنا لهما بالسعاده ودوام الحـــــــب.

Post: #167
Title: Re: منى عوض خوجلى.....( حبّوبه)
Author: Muna Khugali
Date: 12-07-2006, 04:01 PM
Parent: #42

أهلا أختي دومة عقبال أولادك يارب..قـولي لي..
مستعـدة تبقي نسيبة ولا لأ?

في ناس بيقولوا علي النسـيبة مصيبة..ياربي كلامهم ده كيف?

آية كانت معاي قبل شـوية لقيتها بتتكلم مع زوجها وبتحنس فيه مايجـوط ليها البيت..
عملت نفسي بريئة وسـألتها..
بيجوط البيت كيف يا آية?
قالت..ياماما بيقلع هـدومه ويرميها علي الأرض..ويسـيب باقي الأكـل في الصحن علشان
مايغسـله...فيها شنو يعني لوقلع هـدومه وختاها في الغسيل ولا علقها في الدولاب?

علقت لآية وأنا أبتسم في شماته..

ياربي أنا الكلام ده مر علي قبل كـده وين?

آيه فهمت طـوالي وقعـدت تضحك!

عارفة يادومة ده كـان كلامي لآية السنين الفاتت كـلها..اللهم لا شماته!

يخليك لينا يارب ولأسرتك..

Post: #65
Title: Re: منى عوض خوجلى.....( حبّوبه)
Author: الفاتح يوسف جبرا
Date: 11-20-2006, 03:18 AM
Parent: #39

ألف مليون مبروك للعروسين ... ويا منى ياأختى ياهو حال الدنيا !!!

كسرة : نحنا لمن شفنا (صورتك) فى البورد قلنا (آية) دى تكون (بترضع) نقوم نلاقيها (بتتعرس) .. عندك جنس (حركات) يا منى خوجلى !!! وإلا ما كده يا (عادل سمير) !!!

Post: #66
Title: Re: منى عوض خوجلى.....( حبّوبه)
Author: Adel Sameer Tawfiq
Date: 11-20-2006, 03:29 AM
Parent: #65

Quote: ويا منى ياأختى ياهو حال الدنيا !!!

هم السابقون ونحن اللاحقون !!
أشوف فيك يوم ياالفاتح في عرس ناجي و نشوى !!

Post: #68
Title: Re: منى عوض خوجلى.....( حبّوبه)
Author: الفاتح يوسف جبرا
Date: 11-20-2006, 03:45 AM

يا مولانا للزمن داك أنا أكون بقيت (بترول) .. حلك لامن (ناجى ونشوى) يخلصوا (الروضة)
و(المدارس) و(الجامعة) والشنو ما بعرف داك ... كعبين إنتو يا ناس (منى خوجلى) و(عادل سمير) البقيتو حبوبات ويا عادل ما تفرح أنا عندى عريس جاهز لى (هبة) ومافى حاجة إسمها عاوزة أواصل دراستى !!!!

Post: #69
Title: Re: منى عوض خوجلى.....( حبّوبه)
Author: Adel Sameer Tawfiq
Date: 11-20-2006, 04:39 AM
Parent: #68

Quote: عندى عريس جاهز لى (هبة) ومافى حاجة إسمها عاوزة أواصل دراستى !!!!

الفاتح ، شوف لي انا عروس أحسن ، أنا كملت تعليمي !

Post: #171
Title: Re: منى عوض خوجلى.....( حبّوبه)
Author: Muna Khugali
Date: 12-08-2006, 04:45 PM
Parent: #69

يللا واجهوا الواقع عادل والفاتح..شـاذلي قال لي وقوع البلا ولا انتظاره..
وبعـدين لو بقيتوا حـبوبين..قـولو عرسنا عمرنا تاشر سنة زي 'ود شـيقوق'
الليلة..أسة يجي يشـاكلني!!

Post: #70
Title: Re: منى عوض خوجلى.....( حبّوبه)
Author: Adel Sameer Tawfiq
Date: 11-20-2006, 04:49 AM
Parent: #65

الفاتح !!
إنت ماااالك وماااال الكاشف أخوي ؟؟!!
ومش لو بقت حبوبة ، برضو سممممحة شديييد !
أها نحن كدة إنتو كيف ؟؟!!

Post: #73
Title: Re: منى عوض خوجلى.....( حبّوبه)
Author: الفاتح يوسف جبرا
Date: 11-20-2006, 07:25 AM
Parent: #70

Quote: ومش لو بقت حبوبة ، برضو سممممحة شديييد !

يا جماعة شفتو جنس (البكا) بتاع (مولانا) ده !!!

Post: #170
Title: Re: منى عوض خوجلى.....( حبّوبه)
Author: Muna Khugali
Date: 12-08-2006, 04:14 PM
Parent: #65

أنا ذاتي إتغشيت الفاتح أخـوي..
أسـة أول أمس القريبة دي كنت بمسكها من إيـدها الصـغيرة وأوصلها المدرسة وأجيها راجـعة
نغشي البحيرة ..معانا عيش علشان نأكله للبط والوز!
فجـأة كـده لقيتها كبرت..أكـون اتغشيت ولا لأ?

لكن أنا أصـل ما ناوية أكـبر..وآية بطـريقتها!!

ربنا يكبر ليك عيـالك..وتعجـز إنت يارب..دعوتي حـلوة موش?
ربنا يسـعـدك ويسـعد اسرتك..

Post: #43
Title: Re: منى عوض خوجلى.....( حبّوبه)
Author: معتصم الطاهر
Date: 11-19-2006, 06:38 AM
Parent: #1

منى

إن شاء الله تحضرى عرس بتها

أنا قلت الزولة دى باعتنى لى زول مقرّش ولا شنو ؟

بالله أنا نمرة كم فى الصف ؟

Post: #173
Title: Re: منى عوض خوجلى.....( حبّوبه)
Author: Muna Khugali
Date: 12-08-2006, 08:16 PM
Parent: #43

معتصـم.. أنا أصلو ماكنت عايزه آيه تعرس زول غير سـوداني.. وكنت راسمة علي عريس منكم ..
ولما قلت لآية لازم تعرسي سـوداني..قالت علي عنصرية!
أكـون ياربي عنصرية وماجايبة خـبر?

أسة عريس آيه ده أمم متحـده عـديل ..أمه خلاسية..أبوها كاريبي وأمها انجليزية..
وبعـدين عرست هنـدي جـابو لينا عبـدالرحيم!!
شـفت الفيلم الطـويل ده كيف?
كمان آية لو جابت أطـفال هانزيـد علم سـوداني مع باقي الأعلام..

معتصـم.. أنا قلت ليك قبل كـده اني فرحـانة بيك شـديـد?

يسعـدك بأسرتك ويتمم عليك أفضاله..

Post: #44
Title: Re: منى عوض خوجلى.....( حبّوبه)
Author: عبد الدائم سيد أحمد
Date: 11-19-2006, 06:42 AM
Parent: #1

الف الف مبروك
وبيت مال وعيال
Quote: وان شاء الله العريس يكون امتدادي

يا أأأالله ناس الصحافة كانو جاهزين والشقة جاهزة
بس ناقصين العروس

Post: #45
Title: Re: منى عوض خوجلى.....( حبّوبه)
Author: يحى حسين القدال
Date: 11-19-2006, 09:07 AM
Parent: #44

الاستاذة / مني والاسرتين الكريمتين

بارك الله للعرسان و بارك عليهما و جمع بينهما في خير .

Post: #177
Title: Re: منى عوض خوجلى.....( حبّوبه)
Author: Muna Khugali
Date: 12-09-2006, 04:56 PM
Parent: #45

أهلا شـرفتنا أخي يحي القدال ..الله يبارك فيك وفي أيامك..

الليلة آية عاملة فيها ربة أسـرة..الليلة السـبت طـبعا إجـازة..
يوم الزيارات والمجاملات..بكرة قالت يوم الفسحة ..

جـاتنا بعـد إتصلت..وبعـد كـده مشت لنسابتها!

أنا طـبعا أي حـاجة تعملها بكون عايزة اضحك..لأني شـايفاها لسة صغيرة شـديد!!

ربنا يسـعدك دايما..آمين

Post: #175
Title: Re: منى عوض خوجلى.....( حبّوبه)
Author: Muna Khugali
Date: 12-09-2006, 07:30 AM
Parent: #44

عبـد الدايم يـديك العافية..
زول واحـد من الإمتـداد قـدم أوراقه مافي..
أسة بعـد آية عرست بقيتوا تقولوا الشقة جاهزة والعريس شـنو..
ياريتني كنت ولـدتهن عشرة..كـان نشوف كـلامكم ده حـده وين..
اليوم ديك خبطت ليكم وللؤي.. كـنت خابزة بتي فـور عشانكم لكن زول فيكم فتح علشان
أديه صحنه مافي..إضطريت أرجـع بيه ..اسه ياهو ده قاعـد يسـمع في كلامي!

نبارك ليك ان شاءالله تحقق كل الذي تتمناه..

Post: #46
Title: Re: منى عوض خوجلى.....( حبّوبه)
Author: ناذر محمد الخليفة
Date: 11-19-2006, 09:34 AM
Parent: #1

كل الأماني بحياة زوجية هانئة

جزيل الشكر أخ علي عبدالرحيم

Post: #181
Title: Re: منى عوض خوجلى.....( حبّوبه)
Author: Muna Khugali
Date: 12-10-2006, 02:35 PM
Parent: #46

ناذر الفنان..إيه رأيك في ونسة زي ونستنا ديك تاني?

مش كانت ونسة حـلوة?

أنا مازال في بالي عرسك الشهر ده..ياتري في موعـده ولا أخـرته?
طبعا أنا نفسي أجي وأحضر لكن ظروفي هنا في لنـدن صعبة شـوية..

آية وعبـد الرحيم قالوا عايزين يجـوا السودان يتعلموا عربي..
وأنا خايفة علي الولـد يجي السودان ويمرض بالأمراض العجيبة... وبعد شـوية تجي السخانة
والهبوب وعينه تطلع..

أها شـفت يانادر بـدل هم واحـد بقوا همين..آيه وعبـدالرحيم!
ومخلف البنات شايل الهم للممات!

ربنا يتم ليك زواجـك علي خـير ويسـعـدكم ببعض..

Post: #47
Title: Re: منى عوض خوجلى.....( حبّوبه)
Author: عبد المنعم سليمان
Date: 11-19-2006, 09:36 AM
Parent: #1

ألف ألف مبروك

بيت مال وعيال

Post: #182
Title: Re: منى عوض خوجلى.....( حبّوبه)
Author: Muna Khugali
Date: 12-11-2006, 03:27 PM
Parent: #47

أهلا ياعبـد المنعم..اله يبارك فيك..

أخـتي منال في الخرطـوم ما قادرة تخـيل إنه آية فعلا متزوجة دلوقتي ..
كل شـوية تسألني منها..
وطبعا ده شئ طـبيعي لأننا دايما بنكون شـايفين أطـفالنا ما بيكبروا وخـاصة في زمن يتأخـر
فيه سن الزواج عـن خيار..والخيار من أجـل النضوج واكمال التعليم ثم العمل وبعد ذلك الزواج..
بس طبعا الناس تختلف في خياراتها..وعلشان كـده قلت لمنال أحـسن تصـدقي بعد تتخيلي..آية فعلا متزوجة دلوقتي..

عقبال ماتفرح بخياراتك إنت..

Post: #48
Title: Re: منى عوض خوجلى.....( حبّوبه)
Author: omar ali
Date: 11-19-2006, 12:58 PM
Parent: #1

اتمني لها حياة زوجية سعيدة
والف مبروك لـ مني خوجلــي
ولكل آل خوجلي ...دامت الافراح

Post: #49
Title: Re: منى عوض خوجلى.....( حبّوبه)
Author: Adil Isaac
Date: 11-19-2006, 01:02 PM
Parent: #48

ألف مبروك آية و تهانينا

Post: #50
Title: Re: منى عوض خوجلى.....( حبّوبه)
Author: احمد العمار
Date: 11-19-2006, 02:13 PM
Parent: #49

الف الف مبروك وان شاء الله بيت مال وعيال

الاخت منى ادام الله افراحكم وافراح الجميع

احمد العمار

Post: #51
Title: Re: منى عوض خوجلى.....( حبّوبه)
Author: ود محجوب
Date: 11-19-2006, 02:26 PM
Parent: #50

الف مليون مبروك للعروسين

ومبروك لعلى ومنى

Post: #52
Title: Re: منى عوض خوجلى.....( حبّوبه)
Author: حسام يوسف
Date: 11-19-2006, 05:07 PM
Parent: #51

شكرا لي اخونا علي لنقل هذا الخبر السعيد

والف مبروك لي مني واية

Post: #189
Title: Re: منى عوض خوجلى.....( حبّوبه)
Author: Muna Khugali
Date: 12-12-2006, 10:36 AM
Parent: #52

شـكرا ياحسـام أخـوي ..
ألوانك البترقص في كلمة مبروك دي..براها جـالبه للفرح السـريع..

الليلة آية وعبـد الرحيم جايني بالمساء بعـد الشغل..هتكون في ونسه جميلة هاترجم
ليه كلامكم..عارف هايقول شنو?
ماشـاء الله..ويقعـد يرددها كـل شـويه..بس في إحتمال آيه تكون حفظته كلمتين زيادة..

تسلم حسـام ..وكل سنة وانت طـيب..

Post: #53
Title: Re: منى عوض خوجلى.....( حبّوبه)
Author: محمد المرتضى حامد
Date: 11-19-2006, 05:08 PM
Parent: #51

الأستاذه منى .. تهانيناوأدام الله أفراحكم.

Post: #54
Title: Re: منى عوض خوجلى.....( حبّوبه)
Author: sudania2000
Date: 11-19-2006, 05:18 PM
Parent: #53

مني حبوبة

احلي حبوبة ع الاطلاق

اية وام ايه وماما جارة حبوبة اية الف مبروك

وللجميع تحية مودة و فرح بالامورة

Post: #57
Title: Re: منى عوض خوجلى.....( حبّوبه)
Author: ودرملية
Date: 11-19-2006, 06:31 PM
Parent: #54

سلامات
وعوافي
مبروك الف مبروك اخت منى ..والف مبروك ابنتنا آية ..
واتمني ان تكون ايامكم جميعها افراح يامني ..
وخالص التهاني والتبريكات لكل آل خوجلي ..

Post: #192
Title: Re: منى عوض خوجلى.....( حبّوبه)
Author: Muna Khugali
Date: 12-12-2006, 05:01 PM
Parent: #57

شـكرا ود رملية أخـوي الجميل..

عايزين حفلة ولا رحـلة معاك تكون حـلوة زي أخلاقك الجميلة دي..
عبـد الرحيم ولـدي الجـديـد-زوج آية- أنا عايزة أناديه بإسم مختلف..فكرت
اناديه عبودي..لكن ماينفع لأني كـنت بنادي بيه أبو آية 'عبـدالرحمن'..
بتعرف إسم?
ولا ايه رأيك في بودي Boody ??
منتظراك..إسم عبـدالرحيم ده اسم عجايز وماخايل علي زول عمره ماوصل ال19 ..

تسـلم ود رملية ويخليك لكل البيحبوك ومن ضمنهم أنا وآية..

Post: #191
Title: Re: منى عوض خوجلى.....( حبّوبه)
Author: Muna Khugali
Date: 12-12-2006, 02:43 PM
Parent: #54

سـودانية حبيبتي..أناجاية أعمل حفلة لآية عندك في مدني..ممكن?
بس بـدون عريس وعروسة..موش.هم قالوا ماعايزين هيصات?
اتخيلي قبل العقـد النس تقوم وتقعـد في التحضيرات وفي حاجات آية بالتحـديـد..عارفة
قالت لينا شنو قبل العقـد بساعتين?

You are wasting your time and money!!

عقبال ماتتحقق كل أمانيك..ونفرح معاك بيها ياكريمة..

Post: #190
Title: Re: منى عوض خوجلى.....( حبّوبه)
Author: Muna Khugali
Date: 12-12-2006, 01:08 PM
Parent: #53

شـكرا أخي محمـد المرتضي علي مباركتك الكريمة..
كلمة مبروكزواج آية علي الرغم من اني اتعودت عليها دلوقتي.. لكن مرة مرة كـده تجيني
غريبة..
آية امس اتصلت مبسوطة..قالت اشتروا كنبتين للصالة وهايستلموهم بعد اسبوعين..
طـوالي قارنت بين زمنها وبين زمني أنا..إتذكرت كيف الخليفة دفع لي تمن الأثاث وكيف أنا
كنت فرحانة وانا بختار فيه..ماكان في احساس بالإتكالية علي الإطلاق بل بالعكس كان في فخـر
واحساس بالعزة..

وتبقي الثقافة وبيئتها في زمنها هي المشكـل لشخصياتنا..

تسلم يسعـدك المولي...

Post: #160
Title: Re: منى عوض خوجلى.....( حبّوبه)
Author: احمد النعيم
Date: 12-06-2006, 01:14 PM
Parent: #51

العزيزه مني
الف مبروك لايه وتمنياتنا لهم بالتوفيق ونسعد بزيارتهم للسودان لنغني
لهم علي شاطئ النيل بالبدر او بالزهر هم ما انصفوك
مبروك لهم

Post: #193
Title: Re: منى عوض خوجلى.....( حبّوبه)
Author: Muna Khugali
Date: 12-13-2006, 10:26 AM
Parent: #160

ياسـلام عليك يا أحمـد النعيم وعلي وعـودك الجميلة وإن شاء الله نجي
ونغني كلنا مع بعض زي ماغنينا قبل كـده..وماتجيك سـفرية فجـأه تضيع علينا
خطط الفرح..

http://www.marinamool.com/pic/up/16601814820061213.jpg

تسعـد في كـل خطـواتك ياطيب يازين..

Post: #187
Title: Re: منى عوض خوجلى.....( حبّوبه)
Author: Muna Khugali
Date: 12-11-2006, 06:12 PM
Parent: #51

ود المحجوب إنت قايل علي أبو العريس موش?
ما فرقت كتير..عشرتنا لعلي عبـد الرحيم فاقت ال14 سنة يعني من آية عمرها 4 سـنوات ..
علشان كـده علي كـان فرحـان شـديـد وجاكم جاري علشان يكلمكم..أدعي ليه يا ود المحجوب
رينا يقومه بالسلامة..
وادعي كمان لآية ربنا يسـعـدها في زواجها..ويسعـدك ويـديك كل الفي مرادك..

Post: #186
Title: Re: منى عوض خوجلى.....( حبّوبه)
Author: Muna Khugali
Date: 12-11-2006, 05:53 PM
Parent: #50

سـعدت بمباركتك أخي احمد عمار..ونفرح معاك بإذن الله بكـل اللي يفرحـك..
ومافي أجمل في الـدنيا من تشوف وتسمع وتستمتع بفرح الإبن ولا الإبنة..
حصل جـربته?
أي ضـحكة لآية من عمرها شـهور لغاية دلوقتي وهي عمرها 18 سـنة..بتسـاوي الدنيا والفيها..
أنا مسجلاها في وجـداني..زي ماهي حافظة لي أول قصة قريتها ليها..
ربنا يســدك ويسعـدنا جميعا بأحـباءنا..

Post: #185
Title: Re: منى عوض خوجلى.....( حبّوبه)
Author: Muna Khugali
Date: 12-11-2006, 04:56 PM
Parent: #49

تسلم يا عادل اسحق..

كـلمت آية بمباركاتكم ..وهي فرحانة جـدا بيكم وكلمت زوجها عنكم كتير..

وكل ماتلقاني قاعـدة في الكمبيوتر تقول لي..
مع أصحابك في ـودانيز أون لاين مش كـده ?
أقـول ليها آآآي أصـحابي وقبل كـده أهلي..

شـكرا يا عادل اسـحق...

مني

Post: #195
Title: Re: منى عوض خوجلى.....( حبّوبه)
Author: Muna Khugali
Date: 12-18-2006, 08:39 PM
Parent: #185

up

Post: #183
Title: Re: منى عوض خوجلى.....( حبّوبه)
Author: Muna Khugali
Date: 12-11-2006, 04:21 PM
Parent: #48

بكـرة آية تجيني ونتونس كتير..
أسة اتصـلت بي آية..وضـحكتني كتير ..
سـألتها وقتها الليلة قضته كيف..
فالت تمام..خلصت قراية وتنضيف وكمان عبـد الرحيم رجـع من الشغل
واتعشوا..
طيب هو وين أسه?
بيلعب في ال play station !!

يسـعدك ربنا بأسرتك ويخليك ليهم عمر علي أخـوي ..

Post: #56
Title: Re: منى عوض خوجلى.....( حبّوبه)
Author: Elmoiz Abunura
Date: 11-19-2006, 06:23 PM
Parent: #1

الف مبروك يا مني .مبروك لاية

Post: #58
Title: Re: منى عوض خوجلى.....( حبّوبه)
Author: عامر تيتاوى
Date: 11-19-2006, 07:44 PM
Parent: #56

الف الف مبروك
ربنا يجعل كل ايامكم
افراح

Post: #197
Title: Re: منى عوض خوجلى.....( حبّوبه)
Author: Muna Khugali
Date: 12-18-2006, 10:19 PM
Parent: #58

آمين ياتيتاوي ويفرحـك انت كمان بأسرتك وحبانك..
عاين..
آية ليها كام يوم كـده بتجيب أخـوات عبـد الرحيم الصـغيرات معاها في البيت..وتقـوم
تطـبخ ليهم وتسرح ليهم وهي مبسوطة..
طـبعا آية من هي صغيرة بتقول نفسها يكون عـندها عيال كتار..علشان كـد قاعـده تهتم
بأخـوات عبـد الرحيم..

آية أمس قالت هي ماهاتفكر تجيب عيال دلوقتي ولما تجيبهم ما هايكونوا كتار..
سألتها ليه..
قالت..
متعبين ياماما..أسـه أنا عايزه أنوم وماقادره علشان لازم أخلي بالي منهم!!

تسلم تيتاوي

Post: #194
Title: Re: منى عوض خوجلى.....( حبّوبه)
Author: Muna Khugali
Date: 12-13-2006, 10:57 AM
Parent: #56

المعز ابو نورة..نورة دي بتك ولا بس لقب اخترته لنفسـك..
ياتنا دي لو قعـدنا ونظرنا ليها نظرة شـاملة وأخري متفحصة واحنا بنتخيل انها حياة
زول تاني..هانلقاها مليانه بالتفاصيل المدهشة..بتضيع مننا كتير التفاصيل واحنا عايشنها..
بنسي مرات نسجلها في عقولنا..
خبر الحمل بعـد ان تحقق..شـهور الحمل وترقب الولادة..ثم الولاده..
وأول حضنة للبيبي وملمس كف صغيرة نخاف علي ملمسها الناعم..
ثم تمييزهم لأصـواتنا وبسمتهم وضحكتهم وبداية خطـوات السير..
وفجـأة المـدرسة..ولسة ما ارتحـت كويس من مشوار المدرسة يجيك الزواج..

متي وكيف وأن?

ماهاتعرف بالتحـديـد العاطفي...

يحفظك وأعـزاءك يارب..

Post: #59
Title: Re: منى عوض خوجلى.....( حبّوبه)
Author: أحمد الشايقي
Date: 11-19-2006, 08:38 PM
Parent: #1

العزيزة منى

حبوبة (طيوبة)

بأبناء آية وبدونهم

اللهم اجعله زواجا مباركا

اللهم اجمع بينهم في خير

اللهم بارك لهم وبارك فيهم

تحياتي وتبريكاتي للاسرة جميعا في داخل وخارج السودان,

وفرحة لا تسعها السطور

أحمـد الشايقي

Post: #199
Title: Re: منى عوض خوجلى.....( حبّوبه)
Author: Muna Khugali
Date: 12-18-2006, 10:48 PM
Parent: #59

تسلم أحمـد خـال آيه..ربنا يـديك الفي مرادك كله ويتمم لكمقاصـدك
قـول آمين..
كنا فاقدنك في العقـد!
آية قالت لي ياماما هاتغيري لون الأوضة بتاعتي..قلت يها طـبعا..
موش انتي عنـدك بيتك? لونيه زي ماعايزه..وأنا ألون ده زي ماعايزه..
ولا شـنو يا أحمـد?
يهنيك بأسـرتك ويسـعـدك بصحتك وعملك..

Post: #60
Title: congratulations Muna Khugali
Author: Hisham Osman
Date: 11-19-2006, 10:50 PM
Parent: #1

the best of my amicable congratulations to you the ever dear Muna,wishing u and Aya all the best

Post: #61
Title: Re: congratulations Muna Khugali
Author: السنجك
Date: 11-20-2006, 00:15 AM
Parent: #60

الف مبروك يامنى لك وللاسره الكريمه

السنجك

Post: #62
Title: Re: congratulations Muna Khugali
Author: الخير محمد عوض
Date: 11-20-2006, 01:05 AM
Parent: #61

ألف مبروك آية
و تهانينا أختي منى

Post: #208
Title: Re: congratulations Muna Khugali
Author: Muna Khugali
Date: 12-19-2006, 12:22 PM
Parent: #62

مرحب أخي الخير محمـد الخير..يباركوا ليك كـل الأفراح..

إنت موش شايف أولادك قدامك كأنهم مولودين أمس?
بكـرة القريبة دي .. يجـوك عـديل ويقعـدوا قـدامك بثقة ويقولوا ليك
بابا عايزين نتكلم معاك..
أنصحك نصيحة مجرب ماترد طـوالي..قول تمام..مكـن بكره المسا عشان انا دلوقتي مشغول?
بعـد كـده توقف أي حاجة في يدك وتقعـد تفكر..
ياربي في شـنو?
أنصحك نصيحة تانية..فكر في إحتمال رغبتهم في الزواج وماتنهجم!

ربنا يحفظك لأولادك ويحفظهم ليك..

Post: #207
Title: Re: congratulations Muna Khugali
Author: Muna Khugali
Date: 12-19-2006, 11:55 AM
Parent: #61

شـكرا يالسنجـك علي مباركتك..

عارف في الدنيا دي في حاجات كتيره يدهشك حـدوثها لدرجة عـدم التصـديق!

الاستيقاظ من غيبوبه أحـد هذه الأشياء..

والغيبوبة هنا غيبوبة متعلقة بالزمن الذي يمر أو يسرق من عمرنا..

أنادلوقتي ماقادرة أصـدق تماما انه آية اتزوجت ومشت بيتها!

تسلم أخـوي

Post: #203
Title: Re: congratulations Muna Khugali
Author: Muna Khugali
Date: 12-18-2006, 11:39 PM
Parent: #60

إزيك يا هشام وكيف أحـوالك مع الشتاء?

الله يبارك فيك ياهشام..وعقبال مانفرح بكل البيفرحك..
نفسي أبقي زي الحموات لكن ماعارفة أبقي كيف!

بس بودي وده إسم عبد الرحيم الأناإخـترته ليه..
يعني معقول يكون إسمه زي اسم أبو علي صاحب البوست?
ماممكن موش?
الناس البيسلموا ديل لو يستشيرونا في الأسـماء كان أخير ليهم!
أسه أحمـد ولا محمـد كان ماله?
غايتو انا بناديه بودي وخلي ناس الجامع ينادوه عبـد الرحيم..

تسلم ياهشـام

Post: #63
Title: Re: منى عوض خوجلى.....( حبّوبه)
Author: عمر ادريس محمد
Date: 11-20-2006, 01:19 AM
Parent: #1

ألف ألف مبروك
الأخت العزيزة
منى
مبروك للإبنة آية
بيت سعادة وتفاهم
وعيال ان شاء الله

Post: #64
Title: Re: منى عوض خوجلى.....( حبّوبه)
Author: hajhamad
Date: 11-20-2006, 02:20 AM
Parent: #63

الف مبروك

بيت مال و عيال

الحاج حمد

Post: #67
Title: Re: منى عوض خوجلى.....( حبّوبه)
Author: محمد عمر الفكي
Date: 11-20-2006, 03:42 AM
Parent: #64

حاجة غريبة
انا رسلت التهاني من امس وما شايفها؟ عايزني تلوموني مع منى ولا شنو؟ طبعا يامني انت عارفا انو ما ممكن اتاخر عليك في واجب.
الف مبروك وبيت مال وعيال وقولي امين اول حفيد ليك ما يولد في ظل هذا النظام.

Post: #211
Title: Re: منى عوض خوجلى.....( حبّوبه)
Author: Muna Khugali
Date: 12-19-2006, 03:18 PM
Parent: #64

الله يبارك كـل أيامك أخي الحاج حمـد..

كنت أظـن ان الزواج ماعاد هاجسا في هذه السن الصغيرة عنـد الأجيال الجـدبدة..
لكن رأيت ارتفاع معـدله بين العديـد ممن نعرفهم..

وعرفت أن ظـني ما هـو الا ظـن!!

شـكرا أخي الحاج علي تهنئتك سعـدت بها كثيرا

Post: #140
Title: Re: منى عوض خوجلى.....( حبّوبه)
Author: Salah Musa
Date: 12-02-2006, 10:52 PM
Parent: #63

الدنيا مني وأحلام
مبروك يا مني

Post: #209
Title: Re: منى عوض خوجلى.....( حبّوبه)
Author: Muna Khugali
Date: 12-19-2006, 01:02 PM
Parent: #140

Quote: الدنيا مني وأحلام
مبروك يا مني

أسه بقت آيه وعبـد الرحيم..
يعني الأحلام دي زادت زيادة سـريعة..
طيب دي يحـلوها كيف مع عنصر المفاجأة.. وغيرة الأم.. وعين النسيبة المتفحصة
وكـده?

صـعب موش?

شكـرا لمباركتك أخي صلاح حسـن

ويسـعـدك ربنا بكـل أحباءك

Post: #210
Title: Re: منى عوض خوجلى.....( حبّوبه)
Author: Muna Khugali
Date: 12-19-2006, 01:39 PM
Parent: #63

عمـر إدريس أولادك الحلوين ديل ماشاء الله عليهم..بقي عمرهم كام?

ماتقول لسه بـدري!

أقـول ليك سـر..

ناس بيتنا كلهم بيخافوا من كلمة حـبوبة..وحكمة الله كلنا مستمرين في كـلمة ماما بس..
يعني ماما عاشة..بنتها ماما جـارة..بنتها ماما مديحة..بنتها ماما سحـر ولما أولاد
سحـر يكبرو ويتزوجـوا..هايقولوا ماما سحر!!

شـايف كـلمة حبوبة دي خطـره كيف??

الله يبارك فيك عمر أخـوي في أولادك ويحفظـكم لبعض..

Post: #71
Title: Re: منى عوض خوجلى.....( حبّوبه)
Author: يحيي مصطفي
Date: 11-20-2006, 05:36 AM
Parent: #1

مبروك وإن شاء الله
بيت مال وعيال

Post: #212
Title: Re: منى عوض خوجلى.....( حبّوبه)
Author: Muna Khugali
Date: 12-19-2006, 06:36 PM
Parent: #71

تسلم أخي يحي مصطفي...

اتفضل حلاوة وبلح وخبيز..
الله يبارك فيك..

عارف منال أخـتي وان شاءالله ماتجي تقرا كلامي ده..
بتشـاكل أولاد سـحر بت أختنا الكبيرة مـديحة..واحـد عمره 5 والتاني 4
عارف ليه?
لأنه بينادوها حبوبة!
مش خـالة أمهم?
واجمل حاجة بينادوني طـنط مني مع إني أكبر من منال!
أنا مبسوطة فيها كتير..لكن مبسوطة أكتر بمباركتك الحلوة..
شكرا

Post: #72
Title: Re: منى عوض خوجلى.....( حبّوبه)
Author: خالد العبيد
Date: 11-20-2006, 07:12 AM
Parent: #1

الف مبروك للعروس آية
حبوبة دي ما خايلة فيك ابدا يا منى

Post: #75
Title: Re: منى عوض خوجلى.....( حبّوبه)
Author: Solafa Alagib
Date: 11-20-2006, 07:43 AM
Parent: #72

It is so surprising ,and more beautyful grandmother ..............congratulation.

Post: #214
Title: Re: منى عوض خوجلى.....( حبّوبه)
Author: Muna Khugali
Date: 12-19-2006, 08:48 PM
Parent: #75

شكرا ياسـلافاالعاقب الظريفة علي كلماتك الطيبات..

حكاية الزول يكون أم حكاية جميلة ومدهشة..وخاصة لما دكتورالمعمل يمـد ليك نتيجة
الفوصات كـده ووشـه مافيه أي تعبير.. ثم يخبرك ببرود.. مبروك ..حـامل!
تقعدي كـده مخلوعة ومندهشة وفرحانة ومستغربة لغاية ماتبقي 7 شهـور ويبتدي البيبي
يخبطك في بطـنك..
وبعـد ماتولديه تندهشي الدهشة الكبيرة التانية..
وبس آخـر دهشة دي بتكون يوم عرس بتك..يادوب كـده بيقع ليك الفيلم المدهش!

شـكرا حبيبتي..نفرح ان شـاء الله معاك بكـل ما يفرحـك

Post: #213
Title: Re: منى عوض خوجلى.....( حبّوبه)
Author: Muna Khugali
Date: 12-19-2006, 08:44 PM
Parent: #72

ما أنا أصـلو ياخـالدالعبيد خـلصت الإبتدائية كلها عمري 9 سـنوات ونص!!
بـدين قريت المرلتين الباقيات في 3 سـنوات ونص..
بعـدين قريت الجامعة في 4 سنوات..الحاسـدين أبو يفططـوني!
أها بقي عمري سـاعة التخرج 17 سـنة!!
قبل مااتخرج بخمسة سنوات كنت عرست
وولدت آية!!

شـفتني بتصرف سـريع كيف?

تسلم خـالد أخـوي..رفعت معنوياتنا..
أنا ماناوية أبقي حبوبة..لكن ناوية أبقي نسيبة!

يسـعـدك واسرتك..

Post: #74
Title: Re: منى عوض خوجلى.....( حبّوبه)
Author: Mohammed Haroun
Date: 11-20-2006, 07:40 AM
Parent: #1

ألف ألف مبروك للأخت منى (الخوجلية) ولإبنتنا الرقيقة آية وإنشاء الله بيت مال وعيال. وشكراً للخوجلية على الدعوة الكريمة التي أعطتنا الضوء الأخضر لحضور مراسم عقد القران في ذلك المكان الوادع.

Post: #76
Title: Re: منى عوض خوجلى.....( حبّوبه)
Author: garjah
Date: 11-20-2006, 10:52 AM
Parent: #74

الف مبروك

للابنة اية وزوجها

وبيت مال وعيال

Post: #216
Title: Re: منى عوض خوجلى.....( حبّوبه)
Author: Muna Khugali
Date: 12-19-2006, 09:28 PM
Parent: #76

أخي garjah
شـكرا جزيلا علي مباركتك لآية وزوجها..
بإذن الله نبارك ليك أفراح كتيرة تجيك..

أنا المرة دي كتبت اسمك بالإنجليزي علشان يكون صح وانت ماتزعل..

شـكرا لأمنياتك لآية وبودي..هايفرحـوا بيها أكيـد

Post: #215
Title: Re: منى عوض خوجلى.....( حبّوبه)
Author: Muna Khugali
Date: 12-19-2006, 09:01 PM
Parent: #74

شـكرا ود هارون أخـوي علي حـضورك العقد انت والأسـرة..

شـفت المأذون ده كـلامه كتير كيف?

وكمان مره بالإنجليزي ومرة بالعربي..لغاية ماحـير أهل الولد!
وبعـدين ياهارون أخـوي ..الكلام الكتير البيكتبوه للعريس والعروس ده شـنو?

ذكرتني أقـوم اشوف القسيمة فيها شـنو أنا ماجايبة خبره!

يباركـوا ليك نجاح وفرح بناتك وأولادك ان شـاء الله..

Post: #77
Title: Re: منى عوض خوجلى.....( حبّوبه)
Author: عزاز شامي
Date: 11-20-2006, 11:34 AM
Parent: #1

ألف ألف ألف مبروك يا منى
وعقبال ما تفرحي بأولاد أولادها يا رب

تهانينا لأسرتك الكبيرة بحجم السودان ولأسرة العريس المحظوظ

كل الود،

Post: #127
Title: Re: منى عوض خوجلى.....( حبّوبه)
Author: تراث
Date: 11-30-2006, 08:46 PM
Parent: #77

مبروك للعروسة، العجزت أمها قبل الميعاد بكتير.

Post: #217
Title: Re: منى عوض خوجلى.....( حبّوبه)
Author: Muna Khugali
Date: 12-19-2006, 10:01 PM
Parent: #127

عـزوز ياحبيبتي..

كـده ياحـلوة ممكن نسافر لوقت أطـول..ونتفسح زي ما إحنا عايزين..
كضابة موش?
قعـدت أفكـر في السفر في العيـد..لكن قمت طـوالي فكرت في آية..
طيب هي لو احتاجت لي تعمل شنو?
خـاصة انو اهلي كلهم مسافرين?
شـوفتي حبيبتي ..الأم ماممكن ترتاح أبـدا!!
لما يكونوا صغار نخاف عليهم ..
ولما يكبروا برضه نخاف عليهم..وين ينتهي الخـوف?

ربنا يسـعـدهم..
ويسعـدك حبيبتي بحياتك وخلي ليكم ماما وكل البتحبيهم..

Post: #218
Title: Re: منى عوض خوجلى.....( حبّوبه)
Author: Muna Khugali
Date: 12-19-2006, 11:01 PM
Parent: #127

شـنو ياتراث يعني?

انتو مالكم كـده تغيروا مواقعكم بسرعة?

في الأول في ناس كـده قالت ماقايلا عنـدي أطـفال..
بعدين لما عرفـوا عمرها وكان 17 قالوا ماشاء الله..
بعـدين بقت ماشاء الله تمنتاشر ماحصل تغيير يقـولو عليه..
وفجأة كده قالوا أنا عجـزت..بس علشان بتي عرست..مع انها هي ذاتها البت الحليوة
الصغيرة ام18 سنة..

ماذا يقـول لك هذا يا هـذا?

شـكرا يا عثمان ياظـريف ..يللا عايزين رحـلة لجبل أولياء..
يخلي ليك أماني والأولاد ويسعـدكم ربنا..

Post: #78
Title: Re: منى عوض خوجلى.....( حبّوبه)
Author: معتصم دفع الله
Date: 11-20-2006, 11:58 AM
Parent: #1

ألف ألف مبروك لآية ..
ربنا يجعله زواج مبارك ..
وبيت مال وعيال ..

تهانينا يا منى وإن شاء الله دائماً في أفراح ..

شكراً على عبدالرحيم ..

Post: #79
Title: Re: منى عوض خوجلى.....( حبّوبه)
Author: Muna Khugali
Date: 11-21-2006, 01:27 PM
Parent: #78

بعـد إتمام مراسم العقـد والاستماع الي خطـبة الإمام عن الزواج بإنتباه مفروض وبدون التفوه بكلمة أيوه عارفين .. بدأنا في تقبل التهاني والتمنيات..
فجـأة إختفت آية..وإختفي عبـدالرحيم الذي أصبح بقـدرة قادر زوجها من انظارنا!
تفتكروا لقوهم وين?
هي مشت تلعب مع صـديقاتها في القاعة السفلي..وهو نادوه أصحابه مشي يتونس معاهم!!

كـان بودي أن أرد علي تهاني كل منكم ..لكن في الوقت الحالي ده صعب شـديـد ..
أولا عنـدي نزلة مطـلعة عيني ..بس إن شاء الله بأشفي منها..

كمان أنا لسة مااتعودت علي فكرة آية اتزوجت..وماأظن اتعود..بقيت انوم في أوضتها.. وعلي الرغم من انها كانت بتسافر كتير بـدوني وأنا برضه بسافر كتير بـدونها ومتعودة علي بعـدها..إلا انه غياب المرة دي ليه طـعم تاني!

حـتي ارجـع لكم..
أعلمكم للمرة المائة بعـد الألف..أنني أحبكم جميعا.. وفرحت كثيرا بتهنئاتكم المشاكسة منها والهادئة...جميعها أشعرتني بالقرب منكم والفرح وتصـور وجـودنا جميعا في حفلة كبيرة نتبادل فيها المعزة بكل أريحية..

ولغاية ماأرجـع..سـلام يباريكم محل ماتمشوا......

وانت ياعلي ..يادوب عرفت ليه ماتميت قعـادك معانا!!

1. عاطف عمر
2. malamih
3. الملك
4. Tumadir
5. طارق جبريل
6. nourelhadi awad
7. mahmed alhassan
8. نصار
9. بكري الصايغ
10. رأفت ميلاد
11. سارة حمزة
12. عثمان سيد أحمد
13. محمد مكى محمد
14. Ahmed Hamza
15. ديامي
16. Gaafar Ismail
17. عبدالمنعم الرزوقي
18. عواطف ادريس اسماعيل
19. نادر الفضلى
20. shazaly gafar
21. Adel Sameer Tawfiq
22. Ishraga Haimoura
23. ابو جهينة
24. إسماعيل وراق
25. انعام حيمورة
26. Haytham Abdulaziz
27. محمد عمر الفكي
28. elham ahmed
29. فيصل محمد خليل
30. حمد فتح الرحمن
31. أبو الحسين
32. خالدة البدوي
33. عبد اللطيف بكري أحمد
34. رشا سالم
35. hameem
36. حمزاوي
37. سيد محمد احمد سيدنا
38. محمد العميري
39. انعام عبد الحفيظ
40. فاروق حامد محمد
41. doma
42. الفاتح يوسف جبرا
43. Adel Sameer Tawfiq
44. الفاتح يوسف جبرا
45. معتصم الطاهر
46. عبد الدائم سيد أحمد
47. يحى حسين القدال
48. ناذر محمد الخليفة
49. عبد المنعم سليمان
50. omar ali
51. Adil Isaac
52. احمد العمار
53. ود محجوب
54. حسام يوسف
55. محمد المرتضى حامد
56. sudania2000
57. ودرملية
58. Elmoiz Abunura
59. عامر تيتاوى
60. أحمد الشايقي
61. Hisham Osman
62. السنجك
63. الخير محمد عوض
64. عمر ادريس محمد
65. hajhamad
66. محمد عمر الفكي
67. يحيي مصطفي
68. خالد العبيد
69.
Solafa Alagib
70. Mohammed Haroun
71. garjah
72. عزاز شامي
73. معتصم دفع الله

love you all

Muna

Post: #220
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 10:49 AM
Parent: #78

عصـومي..

أصـغرنا معتصـم كنا نناديه في الصغر 'صـاصا'..
ولما كبر بقي يحتج علي صـاصـا..فصـار عصـومي!
أنا كنت عايزة آية تتزوج واحـد سـوداني علي خـلق زيـك..
لكن آيه من جيل مختلف..مقاييس الأخـلاق عندها لا تعرف الجنسية..
والفرق في العمر بينها وبين من تتزوجه كان في رأيهاأمر لا يجب ان
يتجاوز العامين..
والمهم.. ثقافة ابناءنا تختلف عننا حـتي وهم يتدينون بنفس الديانة..

أتمني لها ولبودي الإستقرار والسعادة..

شـكرا عصـومي علي وجـودك مع آية وأنا في مراحل حياتها الجميلة..

وعقبال مانفرح معاك بأفراحـك..

Post: #80
Title: Re: منى عوض خوجلى.....( حبّوبه)
Author: سجيمان
Date: 11-21-2006, 03:57 PM
Parent: #1

منى

الف مبرك وبيت مال وعيال

وانشاء الله تخضري جديد وليداتا

Post: #83
Title: Re: منى عوض خوجلى.....( حبّوبه)
Author: munswor almophtah
Date: 11-22-2006, 04:42 PM
Parent: #80

الف مبروك وبيت ستره وصلحه وخالص الأمانى والتهانى للعروسين ولذويهم والخاص جدا لمنى.........................................

منصور

Post: #224
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 12:44 PM
Parent: #83

شـكرا أخي أسـتاذ منصـور علي تهانيك العزيزة...

لماذا يفرحنا كثيرا خـبر الزواج?
أعتقـد لأننا نحب مايحبه الآخـرين لإستقرار حياتهم..
ولأننا أيضا لنا أفكارنا أو فهمنا المحدد للإستقرار والسعادة..
وهي الزواج والإنجـاب والفرح في الإستغراق بتربيتهم..موش?

يهنيك ربنا ويسـعدك بأسـرتك..شـكرا لمشاركتنا الفرح

مني

Post: #223
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 12:19 PM
Parent: #80

ياسـلام عليك..
شـفت أنا نفسي نقعـد كلنا سـوا تاني ..نسـمع غـنا سـمح شـديـد..
زي الأغنية ديك الغلبك تقعـد منا تسمعها وطلعت بره تغالب روحك بالصبر!
ونسم أغنية تاني نغني فيها كلنا مع بعض في فرح كـده طـلع من قلوبنا ومشع
في عيونا..
لكن لازم لما يحصل الفي نفسي ده يا دكتور عادل " سجيمان" ..تتبعه حفلة تانية
بالدلوكة..عشان أنا بحب جـدا أغاني البنات... وتكونوا كلكم قاعدين..
وكمان آيه وبودي يكونوا قاعـدين..

شـكرا لتهنئتك الجميلة..

أتمني أن نشـاركك وأسرتك كـل أفراحكم..

Post: #84
Title: Re: منى عوض خوجلى.....( حبّوبه)
Author: hatim ibrahim
Date: 11-22-2006, 04:56 PM
Parent: #1

.
ألف الف مبروك للعروسين .. وبيت مال وعيال
مبروك الأخت منى

Post: #87
Title: Re: منى عوض خوجلى.....( حبّوبه)
Author: معتصم مصطفي الجبلابي
Date: 11-22-2006, 06:31 PM
Parent: #84

الاخت منى
تحياتى
العم علي عبد الرحيم
داير يكبرك ساي بكلمة حبوبة
هو لانو خجلان من صلعتو المطلعاهو اكبر زول في المنبر

فانت تبدين زهرة في ريعان الشباب

مع احر تهانينا للعروسين وبيت مال وعيال

عم عبدالرحيم لك الود والتحايا
وبنقرق معاك

Post: #89
Title: Re: منى عوض خوجلى.....( حبّوبه)
Author: بكرى ابوبكر
Date: 11-22-2006, 07:55 PM
Parent: #87

Post: #90
Title: Re: منى عوض خوجلى.....( حبّوبه)
Author: عبد الحميد البرنس
Date: 11-22-2006, 09:06 PM
Parent: #89

مبروك لشقيقتنا الجميلة منى وأمنيات قلبية بحياة زوجية سعيدة لآية.

Post: #228
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 03:39 PM
Parent: #90

أتي وقت الرد عليكم وانتم في حـزن شـديد ..
وأري من الذوق هنا ان ارد عليكم بالشكـر ..
وبتمنياتي ودعواتي بأن يصـبركم الله علي فقدكم العظيم..

Post: #91
Title: Re: منى عوض خوجلى.....( حبّوبه)
Author: Hololy
Date: 11-23-2006, 08:01 AM
Parent: #89

...
Quote: ....

.......و الف مبروك......

.......تعديل لخطأ كي بوردي

Post: #93
Title: Re: منى عوض خوجلى.....( حبّوبه)
Author: saif basheer
Date: 11-23-2006, 08:59 AM
Parent: #91

مبروك يا منى وآيه..

منعني "الشديد القوي" من الحضور للعقد.. (قابلت محمد خارج القاعة وتفهم جداً هذا الشديد القوي!)...

المفروض التحايا و"التهاني" تكون وصلتكم مع نجوى ونبته...

الف سلامة "للنزله"

سيف

Post: #110
Title: Re: منى عوض خوجلى.....( حبّوبه)
Author: عبد المنعم سيد احمد
Date: 11-25-2006, 08:28 PM
Parent: #93

الف مبروك
لاية عقد القران
وانشاء الله بيت تملؤه السعادة
وبالرفاء والبنين
والتهانى لمنى والاسرة الكريمة

Post: #236
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 11:02 PM
Parent: #110

اهلين عبـد المنعم .. كيفك وكيف الأسـره?

بلغت الأسـرة بتباريك اللطـيفه..
إن شـاء الله ياعبـد المنعم يوم نتلاقي في الخرطـوم ونمشي الإمتداد
منتصرين بإذن الله .. ونفرح بأولادنا كلنا سـوا ..
آيه وبودي قالوا عايزين يمشوا السـودان يتعلموا عربي كويس!
أنا متأكـده لو مشوا بيقعـدوا شـهر بالكتير..

تسلم يا أمير بلغ سـلامي لأسـرتك ولصـديقي مسعود...

Post: #234
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 09:38 PM
Parent: #93

أنا عارفة ياسيف بشير الشـديد القوي ده شـنو..لكن هأسـكت..

عارف ياسـيف لما أعاين لآية ونبته وانا بفكر في طـريقة حياتهم وتصرفاتهم ..بتجيني
أفكار كتيره خالص .. وموضوع أصـله ماهايروح من بالنا للأبد علي الرغم ن تخبطنا في
نقاشه اوالتفكير فيه بصمت او بصوت..أقصـد الهويه
معظـم حاجاتهم مدهشه... فيها قوة وعزيمه وبالطـبع ليست كل تصرفاتهم محل رضاءنا
التام..
أتحـدث هنا عن جانب القناعه في القرارات وعدم التردد..
لما شـفت نبته الطفله لابسه الحجاب وآيه نفس الحكايه..قعـدت افكر براي
ايه بالضبط أسباب لبس الحجاب?
لا اعتقـد انه الدين فقط..لكن اعتقـد انه الدين كهويه!

نتناقش في الكلام ده في بوست تاني..

عقبال ماتفرح وحبيبتي نجـوي ببناتكم..آمين يارب ..

Post: #116
Title: Re: منى عوض خوجلى.....( حبّوبه)
Author: Ahmed Abushouk
Date: 11-26-2006, 07:34 PM
Parent: #91

الأستاذ مني عوض خوجلي
ألف مبروك لآية وإن شاء الله بيت مال وعيال
وبهذه المناسبة يسرني إلى أرسل إليك التوصيلة(رمزية المكان وشرعية المطلب: الجابرية تحيي الثورة دايرين بوسطة ومدرسة وسطى) أدناه من شعر أهلك الشايقية ولأن اسمك ورد فيها، مع خالص تحتي ومودتي

رمزية المكان وشرعية المطلب: الجابرية تحيي الثورة .. داي...ن بوسطة ومدرسة أوسطي

أبوشوك،

Post: #237
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 11:44 PM
Parent: #116

جميله هي زيارتك لنا وحـلوة تهنئتك..
كيف حـالك وحال المؤتمرات?

زرت الرابط وقضـيت وقتا طـويلا أقرأ دون ملل أو تعب..
وهذا هو حالي عنـدما أقرأ لحميـد..
شـكرا دكتور أحمـد أبوشـوك علي الإهـداء بس نقول..

كون انه الله خلقنا سـودانيين شـماليين مامعناته إننا مابنعاني!

Post: #229
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 05:05 PM
Parent: #91

إزيـك يا هولولي..
أسهعليك الله احنا مش فعلا زي القاعدين في حـته واحـده بنبارك لبعض?
وزي البنعرف بعض كـده لينا سنين?
ما أحـلاها مودتنا السـودانيه ..صـادقة وبسيطه وسـريعه!

لما آيه حكت لبودي عن سـودانيز اون لاين وعنكم وعن بوستات العيـد ميلاد.. هو ماكـان
قادر يتخيل الوضـع..مسكين ضـايعة منه حاجات كتيره زي دي لأنه ماسـوداني..إن شاء الله
نعلمه!

شـكرا علي تهنئتك الحـلوة ..نتمني نشاركك كـل أفراحـك..

Post: #113
Title: Re: منى عوض خوجلى.....( حبّوبه)
Author: Muna Khugali
Date: 11-26-2006, 01:06 PM
Parent: #89

عمو بكري أبو بكر..

أيوة.. موش انت لميتنا هنا كلنا وبفضل الله وبفضلك بقينا كـلنا أخـوان وأخـوات ..نحس ببعض ونحب بعض ونخلي بالنا من بعض?
خلاص يبقي إنت عمو!

شـكرا لمباركتك زواج آية.. والإتيان بالفنان الوردي والفرح..
عن اذنك امشي أطـلب ليكم العشاء..
يحفظ ليك اولادك ويحفظك ليهم ويهنيكم ببعض..مافي زول بيعرف يزغرد??

Post: #227
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 03:29 PM
Parent: #87

شـكرا معتصـم مصطـفي..

أولا علشان بتبارك لآية..
ثانيا علشان كشفت خطط علي الخبيثه
ثالثا علشان اسمك زي اسماء أخـواني الإثنين

السنة البوردية الجـديـده هانعمل حـفلة لآية هناارجـوك أن تحضـر مع من تحب ..

وأدعي معانا علي عبـد الرحيم يبقي كـويس..

Post: #225
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 01:11 PM
Parent: #84

تسلم أخي حاتم ابراهيم..
مرة زمان في التلفزيون السـوداني..كان في حـوار أدارته احدي مقدمات البرامج عن الزواج
ومعرقلات الزواج الماديه..
وبالطـبع جـاء ذكـر المهر وعلوه كأحـد الأسباب..ثـم جـاء ذكـرأو ما شابه.." خـذوهم فقراء يغنيهم الله" (أعتـذر لا أحفظها) ..
وكان ذكر هذا لدعم ان الفقر وضعف المهر لا يجب ان يكون في حـد ذاته مانعا للزواج..
أضحكني كثيرا رد المقدمة للبرنامج..

قالت وهي تضفي علي صوتها رنة احتجاج..

مع احترامي للدين الإسـلامي..لكن في ناس كتار عرسـوا فقرا ومازالوا فقرا!!

قلت شـنو?

فرحتنا جيتك هنا...وهانفرح معاك بإذن الله

Post: #96
Title: Re: منى عوض خوجلى.....( حبّوبه)
Author: تماضر الخنساء حمزه
Date: 11-23-2006, 01:32 PM
Parent: #1

ألف مبروك منى ..
ربى يسعدها ويوفقها فى حياتها الجديدة
وياربى تفرحى بأولاد أولادها ..

Post: #97
Title: Re: منى عوض خوجلى.....( حبّوبه)
Author: omer almahi
Date: 11-23-2006, 01:54 PM
Parent: #96

Quote: ألف مبروك منى ..
ربى يسعدها ويوفقها فى حياتها الجديدة
وياربى تفرحى بأولاد أولادها ..

·

قبل يومين قلت منى خوجلي مابترد علي زول في بوستها سريع

وبوستاتها ما شاءالله بتتصاعد بسرعة جنونية ...

في بوست أية في العيد السبعتاشر ردت علي بعد ما آية وصلت التمنتاشر .....

وفي بوست الاجازة .....قلت ياسيدي ولايهمك .. لما ترد عليك... تكون نزلت السودان تاني...

والجدير بالذكر منى بتنزل السودان كل تلتاشر سنة ....

علشان كدا على عبد الرحيم كتب حبوبة باعتبار ما سيكون......

عليه

اتوقع الرد على بعض المباركات من .......

حبوبة منى

Post: #98
Title: Re: منى عوض خوجلى.....( حبّوبه)
Author: نادية عثمان
Date: 11-23-2006, 02:19 PM
Parent: #97

الحبيبة منى خوجلى

فرحة من وسط كل احزانى غمرتنى حد التدفق عندما وقع هذا البوست الذى يحمل النبأ السعيد تحت عينى !!

الف الف مبرووووووووك للحبيبة آيه وعقبال تشوفى اولاد اولادها يارب

كل التبريكات لماما جارة وخالات وخيلان العروس الحلوة وياريت تجيبى لينا صورتها وهى عروس ..سمح؟

Post: #99
Title: Re: منى عوض خوجلى.....( حبّوبه)
Author: Muna Khugali
Date: 11-23-2006, 02:41 PM
Parent: #98

حبيبتي نادية..
ليس هناك أقوي وأروع من أن يصمـد الإنسان في حزنه ويتعـداها ليشارك الآخرين افراحهم..
الوقوف بقوة يتطلب قلب واع ومؤمن..وحب للبشرية فيه قيمه تسامح عالية..
ففي ضعفنا نفكر احيانا ... كيف يفرحون هم وحزننا يغرق بلاد?
ولكن كما قلت لك حبيبتي من قبل..

فقط ذوي القلوب المؤمنه والرحيمة يعلمون كيف يتخطون احزانهم ليشاركوا الآخـرين
أفراحهم..

لأحبائنا في السماء كل الدعاء ..ولك حبيبتي كـل الحب
وان شاء الله تشوفي صـورة آية وعريسها..

Post: #100
Title: Re: منى عوض خوجلى.....( حبّوبه)
Author: bint_alahfad
Date: 11-23-2006, 05:13 PM
Parent: #99

الحبيبه منى خوجلى

الف مبروك للحبيبه آلاء الكبرتك قبل ماتكبرى, وربنا يتمم ليها على خير

طبعا لسه مامصدقه الاء الصغيرونه الحضرنا اعياد ميلادها كبرت وبقت عروسه ماشاء الله, ربنا يحفظها ليك ويحفظكم لى بعض

Quote: طـبعا آية متحجبة..والفسـتان شـوية قصـير..طـيب يا آيه..الحاجة دي طـولها ناقص..
عارف قالت شنو وكانت جـادة جـدا?

مامشكلة بلبس معاه بنطلون جـينز!

عارفه انا كمان بلاقى صعوبه شديده فى اختيار الملابس ولو الفستان ماناذل للارض بلبس معاهو بنطلون ولا بوت طويل, فضحكت لما لقيت الآء بتعمل زى

آسفه جدا للتأخير فى التهنيئه بجد فرحت لآلاء شديد وياريت ترسلى ليها تهنيئتى وترسلى لى تلفونك فى الماسنجر لأبارك ليك

والف مبروك مره اخرى

وفى امان الله

لا اله الا الله

Post: #232
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 06:46 PM
Parent: #100

عارفة يابت الأحفاد.. انا برد ليك اسه وعارفاك مشغولة شـديد في استعدادت زواجك..

لما آيه اتحجبت قبل سنه ونص ..كنت قايلاها حاجه طـلعت في راسها وبتخليها..
قلت كـدي أراقبها..لقيتها ماشيه في الموضوع ..وبعد شهور كده عرفت انها جادة في
حجابها..قمت قلت تكون بت الأحـفـاد لمت فيها في لنـدن دي!!

ربنا يسـعدك حـبيبتي ويتمم ليك علي خير.. ويـديك كـل الفي مرادك.. ويجعل فسـتان
زفافك طـويل حتي لا ترتدي تحته جـينز فيلمحه 'بعضهم' من الحضور.. ويظـن انك ذاهبه
الي الجهاد
كما قلت أنا لآيه..

ليه حـبيبتي بطلتي تقولي لي خـالتو?

Post: #103
Title: Re: منى عوض خوجلى.....( حبّوبه)
Author: مروة احمد مكى
Date: 11-24-2006, 03:55 PM
Parent: #99

الف الف مبروك ماما منى
ومبروك للعروسه ايه وبيت مال وعيال

Post: #233
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 08:33 PM
Parent: #103

كيف حـالك مروه حبيبتي?

بتكوني مريتي بتجارب شـفتي فيها التحضيرات للزواج ..

متعب موش?

الحمـد لله ربنارفع عننا أغلب التعب..يعني الهيصـات بتاعة اهل العريس من الرجـال
جـايين الليلة... ولسه ما ارتحنا منها يجوك اهل العريس من النساء.. وشي فتخ خشم..
وشي شـبكة.. وشي ده عاجبنا ود ماعاجبنا وغايتو شـي عجيب خـالص!
دعـوه في قاعه تستضيف فيها المعزومين وخلاص ينفك المولد ايه رأيـك?

شـكرا علي حضـورك للتهنئة وربنا يسعـدك ويفرحـك دايما

Post: #114
Title: Re: منى عوض خوجلى.....( حبّوبه)
Author: Munir
Date: 11-26-2006, 01:35 PM
Parent: #99

الاخت العزيزة بت العم مني ..
آلاف التبريكات والامنيات بحياة زوجية سعيدة هانئة للعرسان وإن شاء الله تدوم فرحتك بيهم وتشيلي جني جناهم ..

منير

Post: #235
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 10:34 PM
Parent: #114

ود عمي منير كيفنك?

الأيام دي ماشيه أموت عشان امشي احضر العيـد في الشمالية!
أمشي الزومه وأحضر صـلاة العيـد في جامع أجـدادي الوهاهيب وبعـد داك
نعيـد علي بعضـنا.. واي زول بعـد داك يجي يهنيني زيك كـده بزواج آيه..

ان شالله نتلم كلنا في فرح كبير ونفرح بأولادنا سـوا

Post: #231
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 06:32 PM
Parent: #97

Quote: قبل يومين قلت منى خوجلي مابترد علي زول في بوستها سريع

وبوستاتها ما شاءالله بتتصاعد بسرعة جنونية ...

في بوست أية في العيد السبعتاشر ردت علي بعد ما آية وصلت التمنتاشر .....

شـفت يا عمر الماحي خـذلتك كيف?
جـيت أرد سـريع موش?

أنا بتأخر في الرد لأني بحاول أكـون قـدر كرم اي واحـد فرحني بتهنئه
والقدر عنـدي يعني المجهود والاحساس..

يعني انت كنت في عيـد ميلادات آيه موجـود وأسـه في زواجها..معقوله بس أكتب ليك
الله يبارك فيك بس وأمشي?

إتفضل حلاوة وماتنسي تجي الحفلة في البورد..
ممكن ياعمر تصمم لي كرت دعوه للحفلة لما نعرف مواعيـدها?

تسلم وان شاء الله نبارك ليك أفراح كتيره

Post: #230
Title: Re: منى عوض خوجلى.....( حبّوبه)
Author: Muna Khugali
Date: 12-20-2006, 06:20 PM
Parent: #96

تسلمي حبيبتي تمرا..

وعقبال كـده مانبارك ليك الديوان..وأي حـاجة بتتمنيها..
من أمس عايزه أمشي لآية لكن مكسوفه..أظنو دي حاجه اتعلمتها من اهلي!

اتعلمت إنه الزوج يجي سـاعة مايحب ويقعـد كمان ..لكن أهل الزوجـة عيب لغاية ماتمر
الأيام ولا السنين وبعـدين نشوف!

شـوفي بكـره الخميس آيه هاتجيني علشان كـده انا بكره هاكون فرحـانه!

ربنا يفرحـك انتي كمان وشـديد>>

أنايا تماضر سـميتك تمرا ممكن?

Post: #102
Title: Re: منى عوض خوجلى.....( حبّوبه)
Author: saadeldin abdelrahman
Date: 11-24-2006, 08:57 AM
Parent: #1

الف مبروك لآية و ام آية والعريس
و الكبير
و الصغير
و الحلوين آه ..
الوحشين لأ
ان شاء الله بيت مال و عيال

تحياتي و ودي

Post: #104
Title: Re: منى عوض خوجلى.....( حبّوبه)
Author: القلب النابض
Date: 11-24-2006, 05:16 PM
Parent: #102

الف مبروك يا آية ويا منى

فقد احتفلنا بعيد ميلادك السابع عشر والثامن عشر وها نحن نحتفي بزواجك

بيت مال وعيال ..

الف مبروك ..

Post: #106
Title: Re: منى عوض خوجلى.....( حبّوبه)
Author: Aymen Tabir
Date: 11-25-2006, 01:36 AM
Parent: #104

منى
اولا: الف الف مبروك لآيه وربنا يسعده في حياته يارب
ثانيا : استوقفني العنوان كذا مره ولكن لم اتوقع او اخمن حتى محتواه المفاجاه
ثالثا : شدي حيلك حتبقي حبوبه قريب لكن ولا يهمك انا بقيت جد لي تلاته سنه
رابعا : زي ما قالت تماضر
واخرا وليس اخيرا : عقبال كل الباقين ويديم عليكم الافراح يا رب
وشكرا علي عبد الرحيم

Post: #111
Title: Re: منى عوض خوجلى.....( حبّوبه)
Author: Yassir Tayfour
Date: 11-25-2006, 08:50 PM
Parent: #106

الشقيقة منى عوض خوجلى
أدام الله أفراحكم
مع كثير الأمنيات للعروسين
بحياة زوجية سعيدة
ملؤها الحب والسعادة

Post: #240
Title: Re: منى عوض خوجلى.....( حبّوبه)
Author: Muna Khugali
Date: 12-21-2006, 00:52 AM
Parent: #106

وعقبالك انت كمان ايمن وتبقي جـد زي مابقيت لبنت أخـتك ..
غايتو انا بحب البيبيهات شـديد لكن لما يصرخوا بزهج منهم!
يارا بت هاني ولد أخـتي حـلوه شـديـد.. وبتضحك كل الوقت ..وأحسن حاجه فيها
مابتصرخ لما تزعل.. تبكي شـويه وخلاص ..
وبعـدين يا أيمن جـدها وحبوبتها وابوها..كل زول عنـده أغنيه مختلفه ليها..
وهي عندها رقصة ليها..عمرها 7 شـهور ماشاء الله!

لو آيه لقدام شـويه جابت لينا بيبي وديع ولطـيف زي يارا أنا بفرح وبشيلو معاها..
غير كـده لأ..أنا أكتافي مملخات!

ربنا يخليك أيمن

Post: #239
Title: Re: منى عوض خوجلى.....( حبّوبه)
Author: Muna Khugali
Date: 12-21-2006, 00:24 AM
Parent: #104

أهلا ياقلب..

Quote: فقد احتفلنا بعيد ميلادك السابع عشر والثامن عشر وها نحن نحتفي بزواجك

وفي كل مره كنتي بتجي ..كنا بنفرح بجيتك..

وفعـلا آيه بتكم وأختكم وهي فرحانه بيكم خالص وبتفخر بيكم وسط
أصـحابها..
وأنا عارفه ياقلب اننا دايما بنلقي منكم كرم المشاركه في الحـزن
وفي الفرح..

ربنا يبعـد عننا وهنكم الحـزن ويجعل أيامنا كلها فرح..

تسلمي حـبيبتي..

Post: #238
Title: Re: منى عوض خوجلى.....( حبّوبه)
Author: Muna Khugali
Date: 12-21-2006, 00:07 AM
Parent: #102

أهلا سـعـد أختك عرست خلاص يللا عرس..مش قلت مابتعرس الا أختك الصغيره تعرس?
آيه قبل يومين جات وقعـدت ترقص علي شعبان عبـد الرحيم وأسه انت قاعـد تخت
النقطه وبعـد كـده رقصـني ياجـدع!

خلاص يا سـعد الحفله قربت..عليك تجيب لينا فنان كـده يعمل لينا حفله حلوه واوعك
من بتوع المواويل ولا الأوبرا!

وان شـاء الله تلقي علي الطـريقه القـديمه ولا الجديـده عروسه في الحفله..
أنا غايتو بأكلم صاحباتي مايجـوا الحفله بدون بناتهم..

عقبال ماكلنا نفرح بيك وخاصه أنا..

Post: #112
Title: Re: منى عوض خوجلى.....( حبّوبه)
Author: شرووم
Date: 11-26-2006, 08:22 AM
Parent: #1

الاخت العزيزة منى ،،

الف مبروك للابنة آية ،، وبالهناء والسعادة والرفاه والبنين

وألف مبروك لأم أية ورينا يحضرك زواج احفاده

شرووم

Post: #122
Title: Re: منى عوض خوجلى.....( حبّوبه)
Author: Sabah Hussein
Date: 11-30-2006, 01:56 PM
Parent: #1

الف مبروك لآيه وبيت مال وعيال . رغم انه التانيه دى مافى ليها داعى.

وعقبال آلآء بتـى انشاءالله. عـندى بت راسها حـجر اقول ليها دايرك تعرسى

بدرى . قالت الأ بعد تخلص الجامعه . انا طبعا عايزها تعرس وبعدها بى شهر

واحد اناكمان اعرس عشان ماابقى حبوبه .

Post: #129
Title: Re: منى عوض خوجلى.....( حبّوبه)
Author: nourelhadi awad
Date: 12-01-2006, 07:32 PM
Parent: #1

Post: #133
Title: Re: منى عوض خوجلى.....( حبّوبه)
Author: محمد عبدالرحمن
Date: 12-02-2006, 04:18 PM
Parent: #129

الف مبروك للعروسة وامنياتى بحياة زوجية سعيدة ..

وعقبال تفرحى بذريتها يامنى خوجلى ..واسف ان اتيت

متاخرا الى هنا ..فلم ارى البوست الى الآن ..

الف مبروك مرة اخرى وربنا يجعل حياتكم كلها افراح

Post: #136
Title: Re: منى عوض خوجلى.....( حبّوبه)
Author: عبد المطلب خضر عبد المطلب
Date: 12-02-2006, 06:38 PM
Parent: #1

Quote: وان شاء الله تلقي عروس زي آية تقول ليك ماعايزة مهر ولا شيلة...

ما شاء الله عليها...ربنا يحفظها

الف الف مبروك وربنا يبارك عليهم

Post: #139
Title: Re: منى عوض خوجلى.....( حبّوبه)
Author: عزان سعيد
Date: 12-02-2006, 10:34 PM
Parent: #136

(وان شاء الله تلقي عروس زي آية تقول ليك ماعايزة مهر ولا شيلة...)

(طـبعا آية متحجبة..والفسـتان شـوية قصـير)
معليش يا منى,أخوك برلوم فى المنبر , وما بعرف أعمل الحركة بتاعة (َQuote) دى.
كل ما أعملها يجينى الكلام بلغة هيروغليفية!
عشان كدة كلامك ده عملت ليه نسخcopy-paste
المهم:ما عندك آية تانية؟
أو حتى لو نستنسخ الموجودة!
بنت بالمواصفات الذكرتيها دى ما بتتلقى بى هينة, خاصة قصة الشيلة دى!
وكمان أمها منى!
مباركات مليونية وتحياتى.

Post: #141
Title: Re: منى عوض خوجلى.....( حبّوبه)
Author: ali elhassan
Date: 12-02-2006, 11:25 PM
Parent: #139

العزيزة منى خوجلى
دا اول بوست ادخلو بعد فترة غياب
والف مبروك وعقبال لماتفرحى بى اولاد
اية وبى المناسبة بقى عليكى لقب
حبوبة ومحبوبة .

ودمتى

Post: #145
Title: Re: منى عوض خوجلى.....( حبّوبه)
Author: Rashid Elhag
Date: 12-03-2006, 01:23 PM
Parent: #141

ألف مبروك للعرسان...وإن شاء الله بيت مال وعيال...آمين

Post: #146
Title: Re: منى عوض خوجلى.....( حبّوبه)
Author: خالد عبد الله محمود
Date: 12-03-2006, 01:33 PM
Parent: #145

ألف مبروك للعرسان

مع تمنياتي بحياة رغيدة بأذن الله لهم و لك يا أخت مني

خالد

Post: #147
Title: Re: منى عوض خوجلى.....( حبّوبه)
Author: Tabaldina
Date: 12-03-2006, 01:55 PM
Parent: #1

..
.
أطيب الأمنيات تصحبها الدعوات
بحياة زوجية سعيدة ..
اسعدها الله .. وزوجهاووفقهم ..

وان شاء الله بيت مال وعيال ..

كبرت وتمت 19 سنه !!؟؟
عمر الزهور عمر الشباب عمر ( المنى)

مبروكـ تانى وتالت ورابع
ونأسف للتأخير ..
بقينا ما بنشوف ..

Post: #149
Title: Re: منى عوض خوجلى.....( حبّوبه)
Author: عادل فضل المولى
Date: 12-03-2006, 02:50 PM
Parent: #147

الأخت الرائعة منى
ألف ألف مبروك للإبنة آية
وآسف جداً لهذا التأخير غير المقصود
ويا آية
بارك الله لكما
وبارك عليكما
وجمع بينكما في خير
...

Post: #150
Title: Re: منى عوض خوجلى.....( حبّوبه)
Author: منى أحمد
Date: 12-03-2006, 09:48 PM
Parent: #149

الف مبروك بيت مال و عيال

Post: #151
Title: Re: منى عوض خوجلى.....( حبّوبه)
Author: عصام دهب
Date: 12-04-2006, 05:01 AM
Parent: #150

مبروك للعروسين و نسأل الله تعالى أن يبارك لهما و يبارك عليهما و أن يجمع بينهما في خير و أن يديم عليهم حياة هانئة بالرفاء و الذرية الصالحة .. .. و التهنئة مجدداً للأخت / منى و لأسرتهم الكريمة و ربنا يديم الأفراح على الجميع .

Post: #158
Title: Re: منى عوض خوجلى.....( حبّوبه)
Author: mohamed elshiekh
Date: 12-06-2006, 09:11 AM
Parent: #151

الف مبروك يا حبوبه...

ربنا يسعدها ويهنيها
وانشاء الله بيت مال ومال ومال ومال ومال ومال ... وبعدين بطان ..

Post: #161
Title: Re: منى عوض خوجلى.....( حبّوبه)
Author: احمد النعيم
Date: 12-06-2006, 02:09 PM
Parent: #1

العزيزه مني
الف مبروك لايه وتمنيتنا لها ولفارسها بالتوفيق والسعاده

Post: #165
Title: Re: منى عوض خوجلى.....( حبّوبه)
Author: مهيرة
Date: 12-07-2006, 01:22 PM
Parent: #161

الف مبروك للعروسين ولحبوبات وجدود المستقبل

وان شاء الله العديلة تقدمهم وتبراهم

تحياتى

Post: #168
Title: Re: منى عوض خوجلى.....( حبّوبه)
Author: Muna Khugali
Date: 12-07-2006, 07:20 PM
Parent: #165

دعونا ندعي لعلي صاحب هذا البوست كلما باركنا لآية ولعبـد الرحيم بالشفاء العاجـل..
تقوم لينا ياعلي بالسلامة وترجـع تضحـك وتهـظر معانا ياراجـل
ياطيب الأخلاق..

مني

Post: #169
Title: Re: منى عوض خوجلى.....( حبّوبه)
Author: wedzayneb
Date: 12-08-2006, 06:59 AM
Parent: #168

عذرا!

لم أنتبه لهذا البوست سوي الاّن.

أدعو الله أن يجعله زواجا سعيدا و مبروكا.

طارق الفزاري
ود زينب

Post: #172
Title: Re: منى عوض خوجلى.....( حبّوبه)
Author: خالد تاج السر
Date: 12-08-2006, 05:12 PM
Parent: #1

مليون مبروك
للرائعة والجميلة
والراقية مني خوجلي

وانشاء الله بيت مال وعيال

Post: #174
Title: Re: منى عوض خوجلى.....( حبّوبه)
Author: Ibrahim Adlan
Date: 12-08-2006, 08:42 PM
Parent: #1

يأأأأأأأأأأأأأأأأأأأأأأأأأأأأأأأأأأأأأأأأأه

الف الف الف مبروك و بيت مال و عيال

ما عارف ليه ما شفت البوست الجميل دا

يربنا يديك الصحة و طولة العمر يا بت الخليفة

و مبروك للخالة جارة و خالات العروس و جميع آل الخليفة عوض خوجلي

( يعني يا مني علي قول عبدالله فرح آية بقت من القميريات)

Post: #176
Title: Re: منى عوض خوجلى.....( حبّوبه)
Author: nazar hussien
Date: 12-09-2006, 10:16 AM
Parent: #174

يعني العرس جد جد وكان يوم 17 او 18 نوفمبر بتوقيت قرينتش....وفاتني....

والله الا يكون كان عندي زهايمر....يا ربي اكون لمحت البوست واعتبرتو هظار؟

نحن لم نخلص حكاوي عيد ميلاد آية بعد...وكنا سارحين معاكم يا مني...ومع أية
في شقاوتها...وحكاويها...وعنادها....فجاءة تقوموا تقولوا عرست...ونحن اخوالها وما عارفين...

او مزهمرين...

استطعت من خلال البوست...(عيد ميلاد آية) ان تؤلفي قلوبا شتي حولك وحول اية...بسرد واقعي
سلس...ونقي جدا...فيه قيم عالية من الادب وفنون التربية والاتصال...فيه الفة تتنفس وتمشي
بين حروف البوست...وفيه منتهي الحب والتواضع والاخلاق الرفيعة....

فانا آسف جدا ان اتيك واية في اخر المطاف مهنيا...وما ذلك الا لكوني كنت حلمان... وهسي
صحيت.....فالتبريكات وحدها لن تكفيكم...يا مني....لذلك سأقرنها بالدعاء المخلص...
ان يوفق أية في مسيرتها الجديدة....وان يحفظها ويحفظك من فوق سبع سموات...

وبيت مال وعيال...سمحين زي سماحتك وسماحتها...وربنا يقدرها تكون مني

Post: #178
Title: Re: منى عوض خوجلى.....( حبّوبه)
Author: nazar hussien
Date: 12-10-2006, 03:25 AM
Parent: #176

Quote: تقوم لينا ياعلي بالسلامة وترجـع تضحـك وتهـظر معانا ياراجـل
ياطيب الأخلاق

ربنا اشفه وعافه....

Post: #180
Title: Re: منى عوض خوجلى.....( حبّوبه)
Author: lana mahdi
Date: 12-10-2006, 06:30 AM
Parent: #178

الشكية لي الله
شدت ما البوست دة فيني قايلة روحي من أوائل المباركات و شدة ما اتونست مع منى حول عقد آية!!
ياخوانا دة خرف مبكر؟
ألف مبروك الحبيبة الحنينة منى و آية بتنا العاصرنا مولدها و نشأتها و أعياد ميلادها إسقيرياً دون أن نراها

هذه الأسرة تستحق الفرحة كلها لكم المنى و التقدير و الأمنيات الصادقة للحبيب علي بالشفاء و العودة لنثر الأفراح هنا كما يفعل خارج البورد.
محبتي

لنا

Post: #179
Title: Re: منى عوض خوجلى.....( حبّوبه)
Author: Muna Khugali
Date: 12-10-2006, 06:25 AM
Parent: #176

جـيتنا وزاد فرحنا نذار خـال آية..

Post: #184
Title: Re: منى عوض خوجلى.....( حبّوبه)
Author: بهاء بكري
Date: 12-11-2006, 04:39 PM
Parent: #1

ياجماعه رفقا بعقولنا .... مني منو الحبوبة ..... حرم انا حتي الان ماقادر اصدق انو قصي همرور كان طالب تجو تقولو لينا مني حبوبة ....... يعني انا عمري ده كلو فاكر قصي استاذ في الجامعة وهو قادر..... وفاكر مني ماعندها اية ..... عموما مبروك يامني وربنا يوفق اية.

Post: #188
Title: Re: منى عوض خوجلى.....( حبّوبه)
Author: nazar hussien
Date: 12-12-2006, 02:42 AM
Parent: #184

بعد اذن لنا .....

وان شاء الله دائما فرحانين....وزايد فرحكم ومدفق كما الندي في هذه الوردة

Post: #196
Title: Re: منى عوض خوجلى.....( حبّوبه)
Author: فاروق حامد محمد
Date: 12-18-2006, 08:52 PM
Parent: #188

في حبوبة اسمها منى ؟؟؟؟؟؟؟؟؟؟؟؟

يلزم تغيير الاسم الى بت المنا!!!!!!!

عشان تبقى حكاية حبوبة دي خايلة عليك

Post: #198
Title: Re: منى عوض خوجلى.....( حبّوبه)
Author: Faisal Salih
Date: 12-18-2006, 10:41 PM
Parent: #1

Mona
Are you serious?

مش السنة الفاتت اتعشينا معاكم في الوايتليز ..وهي كان شافعة صغيرة؟
عموما مبروك وبالعربي أو بالانجليزي حتبقي حبوبة ..عجبني ليك

فيصل

Post: #200
Title: Re: منى عوض خوجلى.....( حبّوبه)
Author: Anwar Ahmed
Date: 12-18-2006, 11:04 PM
Parent: #1

مبـروك للاخت/ مني و جميع ال خوجلي

و للابنة اية عشاً زوجياً سعيداً هانئاً

Post: #201
Title: Re: منى عوض خوجلى.....( حبّوبه)
Author: yasir Abdelgadir
Date: 12-18-2006, 11:16 PM
Parent: #200

لاحول ولا قوة الا بالله...هي بالله اية تزوجت وماتكلمينا يامني ....والله العظيم اول مرة افتح البوست دا...شفتو كم مرة لكن قلت دا منو البيهظر هظار بايخ دا...لاني عارف انو اية يادوب عمرها تمنطاشر سنة...واخر حاجة اتوقع انها تتزوج...علي العموم مليون مبروك ودي خطوة جميلة جدا وبيت مال وعيال وربنا يهنيهم واعتذر عن التهنئة المتأخرة دي.....

Post: #202
Title: Re: منى عوض خوجلى.....( حبّوبه)
Author: alfatih
Date: 12-18-2006, 11:25 PM
Parent: #1

الاستاذة منى

الف الف مبروك وبيت مال وعيال

وعقبالنا كدا...

تحت تحت :
الواحد كان داير يناسب يعمل شنو

Post: #204
Title: Re: منى عوض خوجلى.....( حبّوبه)
Author: فاروق حامد محمد
Date: 12-18-2006, 11:59 PM
Parent: #202

منى اعتقد ان هناك حفل لتنصيبك ملكة في بوست الملوك

فانصرفي الى هناك !!!!!!!!!!

Post: #205
Title: Re: منى عوض خوجلى.....( حبّوبه)
Author: الطيب شيقوق
Date: 12-19-2006, 05:56 AM
Parent: #204

يا اخوانا انتم جادون ؟

يا منى والله لو بقى الكلام ده صاح وما كلمتينا حنزعل شديييييييييييييد

Post: #206
Title: Re: منى عوض خوجلى.....( حبّوبه)
Author: الطيب شيقوق
Date: 12-19-2006, 06:01 AM
Parent: #205

Quote: آيه يانور الهادي طـلعت عيونا عـديل في إختيار لبس مناسب للعقد..
مشيت معاها انا وماما جارة علشان تختار بعـد ما اخواتي حردوا المشي معاها وده كله بسبب عنادها..

المهم دخلنا محل واحـدة مغربية..كـل ماتجيب فسـتان آية تصر لينا وشها وتقول No way, I am not going to wear this!
تقوم الزولة مسكينه تجيب حاجات تانية..تقوم آية تقول..
are you serious? this is too much!
طـبعا ماما قاعـدة ومطـولة بالها شـديد..وانا أطلع الشارع احرق اعصابي بره وأرجـع..
آية مابتحب الحاجات الفيها لمعة..ومابتحب الزينة الكتيرة..ولا الألوان الصارخة..
بعدين دي بقت مشكـلة!
بعد شـوية آية جات شايلة حاجة كـده أصلها ماحقت مناسبة زي دي..قالت دي عجبتها..امرنا لله
قيسيها!
طـبعا آية متحجبة..والفسـتان شـوية قصـير..طـيب يا آيه..الحاجة دي طـولها ناقص..
عارف قالت شنو وكانت جـادة جـدا?

مامشكلة بلبس معاه بنطلون جـينز!

بكره عيالك يكبروا يانور الهادي ويتزوجـوا وتشـوف محن أكتر من كده وبس تضحك بعد ماتتغاظ!

يا الله لوحة جميلة والحين صدقت والف مبروووووووووووووووك يامنى لآية الصغيرونة

Post: #219
Title: Re: منى عوض خوجلى.....( حبّوبه)
Author: khalid almohrib
Date: 12-20-2006, 06:58 AM
Parent: #206

اولا التهنيه الحاره جدا منى لك يامنى 00 واظن بعده المناسبه انتهت اسمعى كلام الفاروق وتعالى بى هناك وجودك مهم 00000
ودالمحرب

Post: #221
Title: Re: منى عوض خوجلى.....( حبّوبه)
Author: محمدين محمد اسحق
Date: 12-20-2006, 10:55 AM
Parent: #219

أختي العزيزة مني خوجلي لك التحية

و الف مبروك علي زواج البنت آية ..
و بيت مال و عيال ..
ومعذرة للتهنئة المتأخرة جدأ ..

تقبلي تقديري الدائم لك ..

شكرأ اخي علي عبد الرحيم علي نقل الاخبار السعيدة ..

Post: #222
Title: Re: منى عوض خوجلى.....( حبّوبه)
Author: الجندرية
Date: 12-20-2006, 11:00 AM
Parent: #1

الغالية منى

الف مبروك لايه
بالسعادة والهناء الدائم ياربي

Post: #226
Title: Re: منى عوض خوجلى.....( حبّوبه)
Author: محمد المختار الزيادى
Date: 12-20-2006, 01:28 PM
Parent: #1

خالتى منى

الف الف مبروك ويارب ما تشوفى الا كل خير وفرح لكل اولادك وكل الناس البتحبيهم
تبريكاتى وتحياتى وامنياتى للعروس وربنا يسعدها ويهنيها ويحفظها

تحياتى
محمد المختار الزيادى