معتصم الطاهر ومولود جديد ..الف مبروك

URL=http://9q9q.com/][/URL]









مبروك معتصم الطاهر

مـبروك أحـي معتصـم البيبي...

ربنـا يسـعـدكـم ببعض...

مـني

أهو لسه فيك رقشة يا هندسة

مبروك المولود اخي معتصم الطاهر.

شكرا محمد عبد الرحمن (لم نسمعك من مدة) عل الداعي خير تحياتي لملح ومشاور.

عماد خليفة

لاتزال الامة بخير ما دام تبقى لها عرق ينبض ابداعا،،
الف مبروك المولود الابداعي
شكر وتحايا للحبيب محمد عبد الرحمن وعبره للمبدع معتصم الطاهر

الله يفرح قلبك يا محمد عبدالرحمن ..

التهنيئة لسمي العزيز معتصم الطاهر ..
بصدور ديوانه الأول شباك الحنين ..
ونتمنى المزيد من الإصدارات ..
والتوفيق والسداد ..

محمد تحيات وود

معتصم الطاهر فى شباك حنينك

عندنا معاك شبك كتيرة بس بعد مانشترى نسختنا

وهل الديوان وصل الدوحة

مبروك الديوان يا معتصم
وعفبال المزيد ...

ود قاسم يا الحبيب ..

تشكر

وعقبال نشوف (جديدك)

الحبيب معتصم

قالو لينا
اولادك سمر ومليانين بالعافيه
رغم بياض قلبك ورهافة حسك
وقديما قيل (النار بتلد الوهج)


مرحبا بمولودك الذي حجز مكانه بين رفوفنا
ومرحبا بالشبابيك التي توسع دوائر الحنين

شكرا لمحمد عبدالرحمن ذاك الكائن المدر للفرح فينا

والي من ياتي هنا نقول له
لك ان تستمتع بنص واحد هنا وبس (وابحث عن الباقي بطريقتك)

Quote: شباك الحنين وقلتِ ما هـَم’ نصل الهم .. المشاوير الَبدَنْ ما يلحق خُطاها حَـدْ ويتفاصح صهيل البدن خيل اللَّحوق يتلبدن وفى اللفة يلقاك المحل وكان حُضنك وهيط واعد البرم المواسم الطيبة ويقَّن ألوان السبيط دقّ باب الطيبة والوعد البسيط واستبدل الدم هواك يا قاعدة بين الجِّتة والروح وسيط ما جدوى الجداول والمتَـر تغسل أصابع الموية من وجع الفتر والبينا خصب واستوائى وما هم نصل .. وهمِّـك نصل رمش الحقيقة وحرّش على طيفِـك زحم النفس على ضيقـا واتوهط على كيفِـك وعلى كيفِـك .. بعيد منِّـك قريب من شهوة مجاديفك تطفِّر من سارية نزيف آهة يجدّف فى وجع الجرح سيفِك تقريفى ألمى البقردِن قشعريرة القهوة كلما سطل فنجان السفر كيفِـك وكيفِـك .. تسلِّمى على ساكت !! سلِّمى على النفس متصالحة جازيتك على عيونك فكى الضايقة يا صالحة وأبرى من دم العشق والخوف تنقيك الموية للورتاب تضاريس الصبية نصاب زكّت للحبيب قبلة وما عرفت يمينـا ما فعل الشباب !! وأنا ياتو باب !! فى السّكة لابس بسمتك سمّاك أول المشوار وصول حرسّك فى الجنة بيبان همتِّـك شفِّـعك بين العاشقين رسول شهَّـلك للعتمة حزمة ضوء واتشهى فيك الصباح ضحكة تقاسيم الفصول أطراك فى شباك الحنين ألقاك فى باب الدخول منو !! التاتاك .. قواك .. ولمْ .. لمْ علمِك صبر الرضاعة وانفطم وأنا كنت قايلك .. - والدرّة بكريه -..مشحتفة وطعم العشق فى الفم وأنا أسه ناحتك فى جدار القلب .. من جوه شباك الحنين للضم تدخلى فى خلايا الروح تمرقى من النفس للدم وأنا ما مرقتك من خلية عشان عسل ولا شهرتك للخليقة ضرب مثل فإذا أتحجب الريد فى العروق أتبرج الشوق فى المقل سابق الليل الشروق واتشابه الطين والوحل ما تِدّسى من شبق المروق ولا تتوبى من لذع النحل وسلِّــمى على ســاكــت .. مدنى 1996

التهاني الحارة للأخ معتصم بمناسبة الإصدار الجديد ..

إلى المزيدً من الإنتاج والإبداع بإذن الله ..


ممكن نقرأ بعض المقتطفات من الديوان؟؟

شكراً أخي عبدالرحمن ..

جاد

Babies are Gods gift, cute, amazing and so adorable... Congratulation

مبروك الديوان يا معتصم



فيصل محمد خليل

الف مبروك يا معتصم وانشاء الله عقبال المولود الالف

( انا لما قريت العنوان قلت اليومين ديل معتصم راس قام بسرعه بسرعه استغل الفرصه )

منى خوجلي وأبوساندرا شغالين بالعناوين ساكت..
محمد عبد الرحمن دقسمكم..
تهانينا يا معتصم

..
.

Quote: منى خوجلي وأبوساندرا شغالين بالعناوين ساكت..

قرقرقر
معقولة يا محمد ما يكونوا شافوا شهادة الميلاد
( تسجيل مصنف )

الف مبروكـ يا معتصم
مولودكـ البكر
وعقبال الجايين

مودتى للجميع؛

استني لي يامحمـد السـر أنـا لابـدة ليك...

وياتبلـدينـا المضـحك في الموضـوع أنـا عاينت في الشـهادة.... وقـدر مـاحـاولت أفهم المكـتوب غلبني..... قلت خـلاص تكـون شـهادات ميلاد الجمـاعة ديـل شـكلها ومضـمـونهـا كـده!

وشـكـرا يا خـالـد العبيـد باظـريف محـاولة اخـراجـنـا مـن المـوقف...
لكـن الجماعة ديـل صـعبين خـلاص...
أبو سـانـدرا قاطـع الحـركـة مالك?

مـبروك تاني يامعتصـم

مبروك اخي معتصم

محمد السر
تبلدينا

قد تكون منى خوجلي دقست
لكن أكيد انا دقستكم

راجعوا النص

معتصم

تحياتي

تهنئة حارة بصدور ديوانكم ، ونأمل أن يكون هذا أول الغيث ، وبعدها ينهمر مطر كلماتك ليسقى بعضاً من جدب مكتبتنا السودانية.
نسختنا محجوزة (من هسي) بس دلنا على المكتبة .

أكرر التهنئة .

صلاح عبدالله.

saif massad ali

شكرا ابتداءا ..
وأنت السبّاق ..


Muna Khugali

لقد كان مخاضا متأخرا
أرجو أن يسعد به الآخرين ..

أبو ساندرا

Quote: أهو لسه فيك رقشة يا هندسة

أنت شن رايك ؟

عفيف اسماعيل يدعوها ( الغيرية ) وأنها أخذتنى عن نشر أعمالى ..
ولا يعلكم كم كنت فرحا
بـ ( وضاحة) أزهرى
و ( فخاخ وثمة أثر ) ..

Imad Khalifa

ماذا أخذك منا ؟
هو بعض من جهد قديم .. عرفناه معا ..

نيازي مصطفى
الأمة يظل فيها نبض مادام فيها مثلك

نحاول ايقاظ دواخل رتيب ايقاعها ..

معتصم دفع الله
سمى العزيز

شكرا لمداخلاتك
وفرحك الذى يغمرنى ..

بدر الدين الأمير
لو وصل كنت عرفت
لو ليس منى
لدق قلبك
فالنبض واحد ..

ودقاسم

شكرا ود قاسم
ودا قطع نفسى
لذا أعجب من وبــ محسن خالد ..

فيصل عباس

يا حرف اللام ..
أنت من هذا الحنين
وتطل من شباكه وتعرف ..


Nada Abdelwahab

شكرا ندى
و ذوقك حنين ..

فيصل محمد خليل
تشكر يا فيصل
هناك ما يخبرنى أن بيننا ما يجب أن نتكشفه ..
ونكتشفه .. ونكشفه ..

wadalzain
هذا الديوان نبضه ودقاته الأولى كان من هناك
على ضفاف الأزرق
من البيت
أو المرفأ
أو مكاتب الأمن ..
لذا تخبره وربما خير منى ..

محمد السر
الرجل الجميل
وجوزدك زادنى سعة فى الجمال وبسطة فى الانبساط


Tabaldina
شهادة ميلاد فى عمر متأخر
تجعلنى صبيا ..
شكرا وجودك شهادة فخر ..

حمزاوي
شكرى
وطلتك من شباكى نورت ( الديوان)

مبروك يا هندسة
والعشم أن تكون الجايات اكتر
حتماً سنسعد بهذا المولود الذي خرج للدنيا في زمان الجدب ( والحطب ) الذي قضى على كل شيئ وقول يا لطيف

صلاح عبد الله

Quote: نسختنا محجوزة (من هسي) بس دلنا على المكتبة .

نسختك تأتيك فى مقعدك الأنيق
و فؤادك المكتبة ..

مبروك يا ريس
بس بقيت المواليد لازم ترى النور ..
قبل استعامل (...) أمرق ما عندك نرفع أقلامنا عنك
أمرق أطفالك الغير معترف بهم أبناء تلك (السرية) أولئك المنتشرين بين مقبرة الدرجة في تلك الطاولة .. وبين الشنطة الآثنة التى ترفض حتي التفليس ... أو سنرجعك لحملات التفيش مرة أخرى ..
النسخ شكلها وصلت .... والحاجزين بعد الفردة صلاح عبد الله أنا
شيل شيلتك
ياسر حامد

مبروك الحدث ..على المستوى الثقافى وعلى المستوى الشخصى ..

يطيل القامات ويرفع الراس..

خصوصا و"المولود" مننا وفينا.. اها نقراه كيف شباك الحنين ده نحن؟؟

تهانينا القلبية ومزيد من الاصدارات......



منى خوجلى ومحمد السر ....

باشمهندس معتصم..
شكرا للفضاءات التي سمحت لنا بان نقراك ؛كما لو اننا لم نحفر قافية فى خاصرة اللغه ونجلس...
شكرا كتير والف مبروك الباكوره..
ولى قدام
عزيزي...


شكرا محمد

والتحايا النواضر.

.


ألــف مبروك صـدور شباك الحنين يا معتصـم
عقبى لنشــر التالي




.

واصلوا نشر المقتطفات..أو انشروا لينك الشراء..وألف مبروك.

Quote: أو انشروا لينك الشراء..

يابناديها ...تحياتى ..

لنك الشراء دا قبال ماناخد عمولتنا ؟

ياخوى القصة فيها عمولات وترويج وكدا ..

بجيكم صادى .. ودى لكم جميعا ..

الأخ بناديها

أو أرسل لنا عنوانك البريدى ..

الطيب

يا رفيق الترعة
والتجانى
والبلد الطيب

بك يكون الثانى أقرب ..

معتز
أيها الرجل الحقيقة

أرسم للغة بنصرا
تأتينا بكفها مخضبة مفردات الحنان
فأراكم فى كفها ..
شذى .. وبللاً فى خد (الصفقة ..)

الى الجميع
يدفعنى حديثكم للقراءة ثم الهروب

كل هذا الحب وشحنة العواطف ..

سأعود ..

بس نتاكى باب الشجون ..

ياسر

خرجت أنا
أما محاكم التفتيش فلها حكومتها الأنيقة ..

دعنى أولا أرى خروج النار ..

الف مبروك شباك الحنين يا معتصم الطاهر

حبيبنا محمد عبد الرحمن شوقنا كتير والله

بالمناسبة هل عماد خليفه دي خريج الهند ومعاكم في قطر ؟(للمعلومية)

الصادق خليفة
تحياتى

عماد عبد الله معانا فى قطر وفى عيوننا
وعماد خليفة فى القلب رغم أنه فى أمريكا ( أظن*

شكرا
واسمك بشبه أحدهم من ربك ..
وآخر من الشكابة

وواحد من عندنا

شاعرنا المهندس ..

مبروك
شباك حنينك
( حنينك ) الذي أعرف ..
و لن أرضى بغير نسختي الموقعة .
تمنيت أن أرسم لك الغلاف .. و عرضت عليك ذلك , يبدو أن غيري كان له الشرف .

مبارك لنا ..
و يقينا أن لنا ندوات أخر مع ديوانك الوليد .. و نقاش لن يفتر .
( المشكلة أنك لن تساهم في تنظيم ندوتك تلك باعتبارك أبو العروس .. و سنفتقد تنظيمك لها , و سينفرد بنا ود الأمير .. و ما عافي ليك يا معتصم ) .
و سألح حينئذٍ في سؤالك عن ما أورته عن ( القصد ) و علاقته بالمنتج الإبداعي .. وعن علاقتك بنصوصك ( جدلية الخلق .. و مراوحة النقد القيمي فيه بين المطلق و النسبي ) و عن كل ما أفحمتني به من ردود لم و لن تشفي غليل , لكنني عرفت أن ذلك يتطلب حوارا مباشرا معك ..
فاشحذ أسلحتك الجميلة .

مبروك مرة أخرى

شاعرنا المعتصم الرائع

الف مبروك والى الامام دوما

والمزيد قادم باذن الله

ابومصطفى

مبروك يا ود ربك الديوان ...
قرات القصه التى بعثت لى بها ولى تعليقات ساتيك بها قريبا ..

ارجوا الاتصال بشقيقى الصحابى اذا ذهبت الى ربك فهو يعمل بكنانه عقبال اصدار قصصك ...

الفاضل الهاشمي

العزيز معتصم

ألف مبروك شباك الحنين
أعزه الله باب الجمال وحوش النشيد

بالله لو تكرمت مقتطفات منه من هنا وهناك ( ضواقة يعني )

تحياتي

( ضواقة يعني )
سنجاوى ..
تحية

وتذوق ..

إتلمِّـى فى صدرى
فارس حوارى الروح
حارس هواك تملّى
تاتيت بسيمتك ضل
والرمضا من رملى
إتلافيت الهجير من لاك
لقيت مرجلك يغلى
لما الحنين يلقاك
فاتح مسام البوح
ماتندسى تتدّلِّى
بين الجرح والنوح
شايل الحنان بلقاك
واسع الحُضُنْ مفتوح
عارف الصباح حساى
خابر النسيم مفضوح
مّـدِّى الخطاوى قريب
خلِّى المسافة تضيق
بين النّفِس و الروح

الهاشمى
صديق القوز
ما زالت قصيدة فاطمة يشدو جرسها
منها ومثلها ( ضوة ) فى الديوان

القصص سر قادم ..

أبو مصطفى

سلامات
تحياتى
وينك .. ولماذ وأنت منا لست فينا !!ِ

عماد أسبك بقدر ما أحبك

فى تلك الامسية ياسيدى سوف نتأبط كل شرورنا

والجهاد فى معتصم وديوانه لنا له شباك لن يفلت منها

ولكم فى ذلك ثلاثة حسنات وهى كماتعلم

000000001

00000002

0000003

والرابعة حقتى براى

الباشمهندس معتصم
المولود ما واحد كل قصيدة مولود بي حاله
والمحصلة مؤكد ولد واحد لكن بي سنونه
مبروك مبروك مبروك
و عقبال البقية يجو مارقين زي ما أخوهم البكر جا
مع خالص حبي

مبروووووووووووووووووووك
مع نفس كل قصيدة أمنية
مع كل كلمة محبة
وفي انتظار الندوةوحفل التوقيع
مودتي

Quote: المولود ما واحد كل قصيدة مولود بي حاله

الأخ أمين عمر عثمان
كل قصيدة ميلاد
وكل كلمة بعث
ويبقى الوصال بينها أنتم ..

شبّاك الحنين ,,

يا سلام ..
ممكن نتاوق ونبارك !

ألف مبروك أستاذ معتصم الطاهر
شبّاك مطل على الجمال ..

الاعزاء

سيف مساعد
منى خوجلى
ابوساندرا
عمادخليفة
نيازى مصطفى
معتصم دفع الله
بدرالدين الامير
ودقاسم
فيصل عباس
جاد
ندى عبدالوهاب
فيصل محمد خليل
ودالزين
محمد السر
تبلدينا
حمزاوى
صلاح عبدالله
ياسر حمد
معتز تروتسكى
الطيب بشر
بناديها
الصادق خليفة
عمادعبدلله
كيقا
الفاضل الهاشمى
امين عمر عثمان
محمد السنى دفع الله
تيسير عووضة
تحياتى وجزيل الشكر على المرور والمشاركة ...

وعذرا سأعود لاعقب على بعض التساؤلات والملاحظات ..

ودى لكم جميعا ..

ياخـوانـا أنـا زولة بسـيطة...البيقـولوه لي بصـدقـه..
وكـويس يا أبو سـانـدرا انك دقسـت بيهـم كـلهم..عشـان مـا أكـون براي داقسـة...
ومـبروك جـديـدة تانية لصـدور الـديـوان...ممكـن نشـتري بالإنترنت?

مـني

سلامات
وعوافي
معتصم الطاهر رجل كثيف الكتابة وهذا الديوان سيفتح الباب لدواوين اخري ..
الف مليون مبروك معتصم الطاهر وعقبال الثاني والتالت والرابع و..و..و..و ..

منى خوجلى
زولة زى نيتها .. صافية و نقيّة ..
اهديك ..

وش ع الحيط ...!
ولاّ مقدِّم موج البحر للضفات
وش ع الحيط
ولاّ محمِّم وجه الشمس للصافات
يا شاهِد عصرَك
مشهود إنّك
قربان وعروس
وعزيمة..

محسن خالد
يدهشنى بكتابته الكثيرة الجميلة
ولمقدرته فى الانتاج
أحتاج درسا أو دوزنة كتابية منه ..

لو علمنى قليلا لأنتجت القادم..

العزيز معتصم
مبروك المولود
نقراه كيف !

تخريمة
ابوساندرا دقس كلام الديامة ده انا بعرفوا كوييس
منى مادقست ولا حاجة الكتاب مولود وكمان بيبي !
تحياتي

الماجد معتصم محمد طاهر

تحياتي


الف ..الف مبروك..رغم ان هذا الميلاد جاء متأخرا كثيرا..عقبال مواليد أخر

ارجو ان ترسل لي نسخة..وقبل نسختي ارجو ان ترسل نسخة للصديق سليمان الامين..حتي تكون له الفرصة

في تغيير رأيه القديم..

لك مودتي..والود يتصل الي الاخ محمد عبد الحمن صاحب البوست

مبروك يا معتصم شباك الابداع
اها تذاكركم كيف ؟

مبروك ياريس...

وكم نحن فخورين بك ..وبشباك الحنين..

مبروك ياحنين شباك هواك الفتحتو لينا نتنفس عبرو نفحة حب وروعة وبهاء ياجميل يامعتصم الطاهر

Quote: منى خوجلي وأبوساندرا شغالين بالعناوين ساكت.. محمد عبد الرحمن دقسمكم.. تهانينا يا معتصم

يا موحمـد ود السـر أخوي.. إن كـان حـديثـك ده صـحي...
سـمح محمـد ود عب رحمـن.. سـوا تعـديله في شـنو?

الأخ سيف

سليمان الأمين ( رئيس اتحاد التمثيل النسبى)
هو من أخّر انتاج هذا الديوان
وهو من جعلنى لا أخرج الا عملا مجودا
وطبعا اولا عفيف وأزهرى ..

أهديك هذى الأبيات 0.

يا مُتْكَتِّفْ بالتكوين من..
إحباط الشارع
صمت الميدان الخايِس
يا محتوت من جذعى اليابس
مرتب فوضى ومُتجانس
يا مصيــــود من
شطْ الرفضْ
وأول ضِدْ
وهامش شكِّى
ورسماً فاضح ضلعى السادس

الأخ خالد

تحية
وتشكر

للحصول على الكتاب
اتصل بعفيف اسماعيل ..
أيام وتصله نسخ من الكتاب

مية مليون مبروك جميلة يا معتصم. أهو كدة قدرت تنكشني عديل . ده نوع البمرقني من الجحر . لك الباقات الجميلة بقدر كل لحظة ابداع عشتها
ما تخلي عماد يجنن جنك بي جدلية الابداع وفكرة الخلق . الله يجازي محنو كان عرفت الانقليزي ده بيجيبوا من وين!!

.....

.....

(أنا حاجزة نسختى من أسة)

بتغوينى حكايات الحنين

ألف مبروك....


...................

تخريمة:

أتخيلتو مولود بالجد...قررت ما اخش البوست دة ألا بمقترح للأسم

______________
التهاني الحارة للأخ معتصم

ومزيدا من الإنتاج والإبداع

معتصم ،،، أن تأتي متأخراً خير من أن لا تأتي ، سأورد مدحي في مولودك قبل أن أضعه في حضني واسمي الله عليه من عين كل حاسد ،، عظيم أن نرى الأيام وهي تخرج لنا من ظهر الفنان فنان وشاعر ،، ماهي حكاية المهندسين مع الفن هل هم مهندسون لأنهم فنانين أم العكس صحيح ورونا ياناس حكايتكم شنو ؟
معتصم الطاهر مهندس وفنان وشاعر وخبير في العلاقات العامة وفي إدارة الجلسات وحلقات النقاش ،، عماد عبدالله مهندس تشكيلي وروائي وشاعر وشقي وشفيف ، هاشم ميرغني مهندس معماري وشاعر وفنان ،، اللهم ألهمنا الفن والشعر لأننا تجاوزنا مرحلة الهندسة .

مبرووووووووووووووك لمعتصم وياريت نلقى من يجيد فن الالقاء ليتحفنا بشذرات من المولود الجديد في ليلة دوحاوية وفي ديوان طرزت جدرانه برسوم الفن والفنانين في حضرة بدرنا الساطع ود الامير.

أبو شيبة ..

Quote: معتصم ،،، أن تأتي متأخراً خير من أن لا تأتي

وهذا ما جعلنا نشرع فى الأول

وتشكر على بديع مقارنتك بينى وعماد وهاشم ..
يا زول أصرب للمثِل

الأديب الأريب
هشام آدم

شكرا

ووجودك الأدبى المهنى المهنئ .. فخر لى

ننتظر خطوة منك تجاه ابداعك
وإمتاعنا

شذابيلا .. سيدة الأرصفة..

ما زلنا فى اقتراح الاسم لمولود قادم

حتى حينها اهديك ..

أخير لو مركبك عَـدّت
و سوط الموج
فوق صفحة قفاها يصيح
وعزا الشطّان
إذا الطيفان يشيلها الريح
لى مُشْرَع غريب ولَدِيح
يترجّل فارس ضهور الخيل
من وجع السروج والقيح
وعزا النجمات..
يتوشحك القمر دورين

Quote: تمنيت أن أرسم لك الغلاف .. و عرضت عليك ذلك , يبدو أن غيري كان له الشرف .

ما زال الغلاف فى انتظارك ..

Quote: ما زال الغلاف فى انتظارك ..

حاضرين يا باشمهندس ..
بس أأمر

..


إزيك يا صاحبي محمد،..
مبروك يا معتصم، أهو ناول كرعيك للدرب دا، وما تسأل من الرمض في السكّة دي كم،..
أسوأ ما في الكتب هو تحريرها، ومراجعتها، ومتابعتها لاحدي ما تطبع،
أما تأليفها دا فخليهو ساي،..
في كلمة حلوة قالها إبراهيم نقد عن الكتابة:
(يتحدثون عن "القراية أم دق" وما دروا أنَّ الكتابة هي "الدق ذات نفسه")،..
مبروك من القلب،..
ونحو مستقبل طليعي في فعل الكتابة


...

-+


مبروك يا باشمهندس




وربنا يوسعه باب بضلفتين

ود محجوب

Quote: مبروك يا باشمهندس وربنا يوسعه باب بضلفتين

ضلفة لك

ودلفة لمجيئك ..

وتشكر ..

محسن خالد

Quote: أسوأ ما في الكتب هو تحريرها، ومراجعتها، ومتابعتها لاحدي ما تطبع،

تشكر يا ( بنى) .. شكّلها براك

وأهو الدرب مسكناهو ..


"ما هَـمْ نصل "..

ما هَـمْ طريق غير الدروب
الفاتحة حُضن الريد أهل
ما هَمْ بيوت غير القلوب
الواسعة أكبر من مَهَلْ

الهَمْ.. مشاويرنا الَبدَنْ
ما يَلحَقْ خُطاها حَـدْ
يتـفاصَح صهيل البَدَنْ
خيل اللِحوق يَتْلَبّدَنْ
فى اللَفّة يلقاكِ المَحَلْ
يوم كان حُضْنِك وهيط
واعَدْ البَرَم المَواسْم الطيبة
يَـقّن ألوانو السبِيط
بى رِقة دقّ باب الطيبة،
والوَعْد البسيط
واستبدَلْ الدم نبضة هواك،
يا قاعدة
بين الجِّتة والروح وسيط
ورينى جدوى الجداول والمتَـر،
تغسل أصابع الموية وجع الفَتر
والبينا خصب واستوائى !

إنجاز انت أهل له ..

كل الود لك ولجالب الخبر السعيد

الاخ معتصم
الف مبروك صدور الديوان

قف.....
سجل عندك اننى واحد من الذين يحتفون جدا لحرفك الندى

والى مزيدا من الجمال




لك الموده وما حولها

الاخ معتصم
الف مبروك صدور الديوان

قف.....
سجل عندك اننى واحد من الذين يحتفون جدا لحرفك الندى

والى مزيدا من الجمال




(تحيه خاصه جدا للجميل ابوساندرا والجميله منى خوجلى)





لك الموده وما حولها

المعتصم الطاهر، الباهر....

وأخيرا، سوف ندخل كالاطفال من الشباك، نرى الباب، ولكن لدخول الشباك حلاوة ولطافة، وشقاوة، وتمرد، وهي خاصية الانسان الفطري، يريد ان يكسر الحواز ويطير ويختفي، والله الشعر ده مشكلة، داير ذورة خاصة من الوعي والحس، وزائر غريب، بجي وبمشي بدون اذن، ولكن شيطانون كبير ومبارك، والله بلعب باللغة لعب، وبجسد ومض من المعاني، يتجاوز خمر العرقي والمريسة، ويحلق بنا لمشاعر داخلية، خارج إطار الزمان والمكان (وماذا خارج إطار الزمان والمكان غير الله).....

حرم ما بدخل من الباب، طالما شباك الحنين فاتح، زي قلب الام، وقلب الإله...

طبت عزيزي معتصم، ، بهذا الوليد الباسم، ما أسعدنا بهذه الحروف، وهي تحلق على اديم الورق، جزلى وفرحة...

اهه، نسختي وين؟ شئ لله ياحسن، يامعتمصم...

عبد الغنى كرم الله

Quote: ولكن لدخول الشباك حلاوة ولطافة، وشقاوة، وتمرد، وهي خاصية الانسان الفطري،

أشيل براى النجيهة
وأكُون الوليد البِخَالْف القبيلة
مِشَـنِّـق هوايا
أبارى القمارى
البِتَقْطَع تذاكِر لحفل الخريف
وترقص معايا
أقيفى النشوفك ..
واحَفِّظ ملامْحِك عيون المرايا

mohamed elshiekh

Quote: قف..... سجل عندك اننى واحد من الذين يحتفون جدا لحرفك الندى والى مزيدا من الجمال

قف ..
سجل أن حرفا تربصت بصيرتك
حافية به .. يطل ننظرته شباكاَ لحنينى .. إليك

الأستاذة عزاز


مِنِّـك..
عرفت الكلام الأباجِد
رأيت العيون السَوافِر
مسافِر.. وما لاقى جِيهة
رَميت الأكُف البِتَفرُك..
صقيع القليب البِكابِِر
كايس دفوها
لِقِيت.. الحدايِق تبادر..
ترسّل غصونها..
تَسَائل خُدودِك أزاهر
تنضِّـر وِجيها،

الف مبروك ويتربى في عزكم انشالله...


ست البنيــــــات

ألف ألف مبرروك ميلاد شباك الحنين ومتشوقين للقراءة

الاستاذ الشاعر الشفيف

معتصم الطاهر

الف مبروك علي باكورة انتاجك الشعري

شباك الحنين وبالتأكيد سيشكل اضافة

حقيقية للابداع الشعري ويفتح مساحات رحبه

عبر هذا الشباك لنشر المعرفه وتوسيع ماعون

الابداع وخلق تواصل وجداني بين ابناء وبنات

السودان المنتشرين في فضاءات العالم

ومتشوقين ومتعطشين للقرأة

وكيف نستطيع حجز نسختنا ؟

والتحية للاستاذ محمد عبد الرحمن

ودمتم

عفاف ابوكشوه

ضــــــــــوة

عـزّ مفتاح الكلام ..
"خاطرك .."
أدينى سر الصراخ ..أبدأ
طويت كل المخاوف فيك
نعيت برد الغنا الرّدة
دندن حر الدفوف مغناك
شهق همس المسام مُدة
.. وإتقاسم الشوق دهشتك
نتقاسم الشوف والنفس الحلو
وننقسم بين اللقيا والصبر الحرام
ألقاك .. أشتاقك ..أبدأ ..
ألفاك ..أشواقك تبدأ ..

وسرق لون الفراش شوفى
صهل فينى البصر والدم
شتت مصابيح ضوة
وقهر الظلام مقدور
لو صقر المخاوف هـَوّ
ونور المنارة يغور
لو قِدْر المراكبى النوّة
وضوّت مصابيح ضوّة
يا ضوة ..
فاتنى الزمان فى الدور
قاودنى الأتر
.. مجبور
مجبور ياضوة إلا أجيك
..أشيل إسمِك
أشق قرمصيص الموت
أشيل وسمك
عنوان الصراخ والصوت
متحيّز فيك الجمال بالعدل
وجايز ليك الظلم والعدل ..
انعدلى وسط الضلوع ضوة
كِملت ليالى العدة
وانعدل فى وقفتك ريقى
ندهت الخطى .. وسميت
سميتك : مَهَل ضيقى
وشفهتَ ..
" ماتضيقى.."
ندهتَ .." ماتضيقى "
صرختَ .. " ما تضيقى
ها .. ضوة .. ما تضيقى .. ماتضيقى ..
جاتك قوافل ريد فى الرمل مغسولة
والطينة مد الأيد وعيونها مبلـولة
أبنوسة مابية تبيت والغابة بتحجّـى
ضوة،فى عتبة البيت والنخل مترجّـى

يا ضوة .. ما تضجى ..
ضجى ..
ضجى ..
ضجى ..
وقرياف الصراخ مربوط
ما تلاوزى تلجّى
ضهبت خطاوى الصوت
اتقدرى وكجى
شرك الصقور للحوت
بلّل مناديلك
سفر البكا الجبدة
والخطوة حين تبدأ
بسقط قناع التوت
فيا حاجبك المرفوع
يا شقك الرقدة
يا ضوة حين نبدأ
يا ضوة حين نبدأ

ميادة

مرور فتّح باقى الشبابيك الفينى ..

لكم نرتجل :

في شُباك الحنين شوف الشِميس حَيرانة
لمحة عيون ناعسة وكَمان فَترانة
ما كُنتَ قَايلْ البِطين بعد العُمُر بطرانة

افرح لكل ميلاد
فماذا لو كان "شباكا من الحنين"
يفتح نافذة للامل
والشجن والشجو
مبروك معتصم الطاهر
بل الف مبروك

دي الولادة و للا بلاش
ألف ألف مبارك يا
معتصم يا الطاهر
و لي قدام

العزيز معتصم

الف مبروك عقبال اخوانه واخواته
وربنا يوعدنا بتؤام النوع ابو تلاتة تلاتة

معتصم الطاهر



مبروك شباك الحنين


شكرا محمد عبد الرحمن




مودتي واحترامي

وتاني بنبارك للحبيب ود الحلة

ومنتظرين نسختنا..

تحية وتقدير
يا محمد عبد الرحمن
ويا معتصم الطاهر

ودى وردة ندية جديدة يا معتصم

فتحت فى حديقة الشعر

التهنئة ليك والفرح بيك

ومزيد من التجلى والتفتح والندى

أنا طبعا سعدت بالقراية قبل الولادة
وهسه بعد "السماية" زادت السعادة

مع الود الجزيل

تهانيّ يامعتصم..

مبدع مبدع مبدع




وجميل ان نسمع مثل هذه الاخبار

والي الامام

بس ورونا نحصل علي نسختنا وين؟


خيط موده رفيعه

الأخ معتصم الطاهر

والله الواحد قايلو ولد جد جد .....
وقعدت أدقق فى الشهاده وأقول والله الشهاده بقت تشهى الولاده...
ويا ربى سماه منو....
لكن طلع مولود إبداعى إسمه شباك الحنين.....
ألف مبروك وإلى المزيد من الولاده الإبداعيه....

أخوك أسامه خلف الله

والشكر موصول لاخى محمد عبد الرحمن ....وعناوينك فيها فكره هبانيه(هبانى) إبداعيه...

التهانى
للشاعر معتصم الطاهر
وحاجزين نسختنا
مزيد من الابداع

مبروك معتصم



و عقبال المولود المليون



محمد
يعني ادعي اقول ان شاءالله يجيك فيروس تاني و لا شنو

بهاء الدين سليمان
أيها المبدع المهموم بقضايا الجمال ..

طلّتك نورت باقى الدار ..

الأخ معتصم الطارهر
مبروك المولود
وحمداً على سلامة والدته

Quote: الأخ معتصم الطارهر مبروك المولود وحمداً على سلامة والدته

عشان اسماعيل دا مايلحق يعدل ويقعد يغالط فينا بعدين ..

عفاف ابوكشوه
سلامات ..
حلمت أتشالق .. أدخل كتاباتك بقامة حرفك ..
تباقصت الحروف ..
وجيتى تباركى .. انفتحت طاقة فى سطر المعرفة ..
مبسوط حد التنطيط ..

عبدالله الشقليني

Quote: في شُباك الحنين شوف الشِميس حَيرانة لمحة عيون ناعسة وكَمان فَترانة ما كُنتَ قَايلْ البِطين بعد العُمُر بطرانة

من شُباك الحنين قايلين الشَقل فطّانا
مع مسدار (الظبى) أو أو رقَدّتَ بُطانة
بعضن فصيح وبعضن فيهو رطانة
لو كِمل الظهر القليب فيهو بُطانا ..


محمد خالد ابونورة

Quote: افرح لكل ميلاد

لذا ترتسم هذه الابتسامة
وتدوم .. ربنا يزيد فرحك ..
( الحصاحيصا .. هل لهذا الاسم علاقة بها)

ابوعسل السيد احمد

Quote: دي الولادة و للا بلاش

منك عسل ..
ومشكور .. عقبالك ..

الجندرية:
نحاول أن نطول مقام الكتابة والتأليف ..
وأقرأ لك ..
تتوسع المدارك ..
وتصير ( شبابيكنا) وعاء لفكركم ..


انعام عبد الحفيظ
و ما وجدت مداخلة منك..
الآ وأعلنت عليك حبا ..
وها أنت هنا ..
أعلن أنى شباكا مفتوح على ساحات لا نهائية

Dr. Moiz Bakhiet

Quote: ومنتظرين نسختنا..

وستصلك حتى بابك ..

أبوذر بابكر

Quote: أنا طبعا سعدت بالقراية قبل الولادة..

و كنت تستحق ..
وكنت أطمع فى تعليقكم ..قبل الطبع
فمنكم نستفيد ..

الفاتح وديدي

يا رجل زخم بالجمال
ومفردات الأدب الطرية
هنا أحبك أكثر ..

احمد العربي

Quote: بس ورونا نحصل علي نسختنا وين؟

العربى
ستصلك بواسطة ( الشقلينى أو محسن خالد)
وشكرا ..

الفاضل معتصم الطاهر

مبروك المولود

وان شاء الله يتربى في ظل ابداعك

وان شاء الله تغلبه بالمزيد من الانتاج ودور النشر تغلبك بالمزيد من الاصدارات لك.

دم بخير

ونحن طبعا الا ترسل لينا نسخنا بالبريد

على فكره عندنا موزع ممتاز للابدا السوداني اسمه (ابو سنينه)

بنشترى منه ابداعات محسن خالد

اسأل محسن خالد كيفية الوصول اليه

او اسأل(امبدويات)عضو المنبر قد يوصلك له.

نتمنى الاطلاع على اصدرااتك.

تراجي.

Quote: أشيل براى النجيهة وأكُون الوليد البِخَالْف القبيلة مِشَـنِّـق هوايا أبارى القمارى البِتَقْطَع تذاكِر لحفل الخريف وترقص معايا أقيفى النشوفك .. واحَفِّظ ملامْحِك عيون المرايا

معتصم الطاهر و إنجاب الدهشة
لك مني كل الحب أيها النقي

شمس الدين السنوسي

الأخ معتصم

مبروك المولود
واغر الله به عينك

وحمد لله علي سلامة المدام


--
جمال الزاكي

عفاف ابوكشوه
سلامات ..
حلمت أتشالق .. أدخل كتاباتك بقامة حرفك ..
تباقصت الحروف ..
وجيتى تباركى .. انفتحت طاقة فى سطر المعرفة ..
مبسوط حد التنطيط ..

عبدالله الشقليني

Quote: في شُباك الحنين شوف الشِميس حَيرانة لمحة عيون ناعسة وكَمان فَترانة ما كُنتَ قَايلْ البِطين بعد العُمُر بطرانة

من شُباك الحنين قايلين الشَقل فطّانا
ونحن نعوس فى الفصيح ورُطُانة
ياخوى النفيس رغم الصغر وَرْطانة
ما كِمل الظهر وبرضو القليب فيهو بُطانا ..


محمد خالد ابونورة

Quote: افرح لكل ميلاد

لذا ترتسم هذه الابتسامة
وتدوم .. ربنا يزيد فرحك ..
( الحصاحيصا .. هل لهذا الاسم علاقة بها)

ابوعسل السيد احمد

Quote: دي الولادة و للا بلاش

منك عسل ..
ومشكور .. عقبالك ..

الجندرية:
نحاول أن نطول مقام الكتابة والتأليف ..
وأقرأ لك ..
تتوسع المدارك ..
وتصير ( شبابيكنا) وعاء لفكركم ..


انعام عبد الحفيظ
و ما وجدتك فى مداخلة
الآ وأعلنت عليك حبا ..
وها أنت هنا ..
أعلن أنى شباكا مفتوح على ساحات لا نهائية

Dr. Moiz Bakhiet

Quote: ومنتظرين نسختنا..

وستصلك حتى بابك ..
فى حلّتك الزاهية
بالملايكة والزهور و المستحيلات

أبوذر بابكر

Quote: أنا طبعا سعدت بالقراية قبل الولادة..

و كنت تستحق ..
وكنت أطمع فى تعليقكم ..قبل الطبع
فمنكم نستفيد ..

الفاتح وديدي

يا رجل زخم بالجمال
ومفردات الأدب الطرية
هنا أحبك أكثر ..

احمد العربي[/B]

Quote: بس ورونا نحصل علي نسختنا وين؟

العربى
ستصلك بواسطة ( الشقلينى أو محسن خالد)
وشكرا ..