Post: #1
Title: الأخوة بورداب تشاد وبورندي
Author: بدرالدين شنا
Date: 05-10-2003, 04:50 AM
Parent: #0
بسم الله الرحمن الرحيم
يا ربي في بورداب في المحلات دي ؟
ولما لا؟
غايتو أنا أقترح إنو نشوف البلدان الفيها بورداب كتار ونوزعهم على البلدان الما فيها بورداب وذلك لتعم الفائدة
يعني مثلاً من السعودية نشيل أهل العوض ومعاهو إتنين تلاتة نوديهم بنغلاديش
ومن أمريكا تماضر وكمين نفر نوديهم رواندا
ومن عندنا هنا في سلطنة عمان ياسر حنا والرحمابي نوديهم سيراليون وأنا ما بقدر أمش معاهم لأن بيوتنا عورة
وبقترح تقوم إدارة البورد يتعيين موفدين لي ساحل العاج ودارفور وموفد لمتابعة حركة التاميل
وأي واحد يرفض التكليف أنا وناس الإدارة نقوم نحرش عليه الكفيل بتاعو يهددو إما ينفذ أو يرجع السودان
بس
|
Post: #2
Title: Re: الأخوة بورداب تشاد وبورندي
Author: HOPELESS
Date: 05-10-2003, 05:05 AM
Parent: #1
حبيبنا بدر الدين
اقتراح جميل في نشر الدعوه البورديه في كافه البريه
انا وناس اهل العوض وقرشو بتكلموا لينا الكفيل يا الله البقيه كيييييف؟؟
ابويه كفيل انا في كويس ما في قرقر كتير
|
Post: #3
Title: Re: الأخوة بورداب تشاد وبورندي
Author: بدرالدين شنا
Date: 05-10-2003, 05:35 AM
Parent: #1
بسم الله الرحمن الرحيم
المحبوب/ هوب لس
سلام وإحترام وترحاب وشكر على الطلة يا حبيب
انا وناس اهل العوض وقرشو بتكلموا لينا الكفيل يا الله البقيه كيييييف؟؟
البقية بنحرش ليهم كولن باول
|
Post: #4
Title: Re: الأخوة بورداب تشاد وبورندي
Author: Ahlalawad
Date: 05-10-2003, 06:41 AM
Parent: #1
بدر الدين .. صباحك أحسن من وشك قول آمين .. بنغلاديش دي أنا بمشي ليها وبمنع تصدير الرز وعمال البلديات للخليج والجماعة بقوموا عليكم .
صوت البندق نطق البندق .. بندق في بحر .. بعدين البندق دي حلاوة كان بتجيبا لينا أبلة نسرين في الروضة .
|
Post: #5
Title: Re: الأخوة بورداب تشاد وبورندي
Author: بدرالدين شنا
Date: 05-10-2003, 07:29 AM
Parent: #1
بسم الله الرحمن الرحيم
الأخ البنغالي أهل العوض
سلام وإحترام
آمييييييييييييييييين يارب العالمين
غايتو لو منعت عمال البلدية يكون عزو لأنك حا توفر لينا وظائف ولا أظنك قايلني شغال سفير؟ أما الرز أمنعو لكن أختا التوب البنغالي
بكون في الزمن داك إسمها أبلة نصرة وشوية شوية بقت نسرين
يا خوي ألنسعلك مسعول من الخير وين شيري بت أم شيري؟
|
Post: #6
Title: Re: الأخوة بورداب تشاد وبورندي
Author: shiry
Date: 05-10-2003, 09:43 AM
Parent: #5
ٍسلااام مربع
اها اهوندا انا جيت
عايز تكلفني ببلاد ماوراء النهرين
ولا الكوفه
ولا اظنك (حاري) لي
حيث ان (حاري) التقطتها مثل مغناطيس من (قاموس)اهل العوض
واردت ان اتاكد من (صلاحيتها) هنا
المهم اظنك حاري ولاية في التاميل حيث يكثر
ملاح الاسوود وياااااع على ملاح الاسود
وتقل تبعا لذلك فرص النجاة
ولا ماك عارف ليك ولاية تتحمل هذه الهترشاااات
التي تتشعلق فوق راسي المدوقس دا
بالله خليني من غير ولاية
اصلي الايام دي بفاوض في مسألة العرس
دا اذا لم يطير العريس
طيرة ابو الريش من الدريش
مع اني لا افهم صيغة الطيران هذه التي يتلبط فيها ابو الريش
ولا افهم اصلا لم هو متجنب الدريش
اها خليتني ولا اكلمك ليك السيرلانيكيه
ولا نحرش ليك (مايا) تجي تزعمط بتك المتسلبط فيها دي؟؟
اصل اهل العوض دا شايفاهو الايام دي (اعاد) صيغة الاتفاق الجديده مع الملا عمر ، وبموجبها تركه (يصول) )ويجول على كيفه
مرة يقول انه فوق الخمس وعشرين بشوية وشوية هذه قد
تعني عندنا 15 سنة وقد تعني 15 شهرا
ومرة يقول انه درس (الروضه) وانه طلع اول تمهيدي على مستوي الجمهوريه
ومرة يقول ان (ابلة) نسرين ادته شوكولاته (مارس) وايسكريم باسكن روبنز لانه عرف كيف يرسم الجوكوندا
واذا لم يطلع له سيدي الملا عمر
يقول ان (شيري)كانت دفعته في ثانوية مانشستر في بريطانيا
او اننا تزاملنا في البرلمان الاسكوتلندي
هو عن ولاية بحر الزراق
وأنا عن ولاية نهر النيل
ولا يقول ليك انو مارتينا هيننغس
دربتو على التنس في ملعب الشكينيبه الترابي
اقصد ملعب ويمبلدون
بالله يا شباب اندهوا لي الملا عمر دا
خليه اللي يجي يشوف لينا صرفه في اهل العوض دا
لقد كترت (صلبتاته) وتشعبت ثم عظمت
|
Post: #7
Title: Re: الأخوة بورداب تشاد وبورندي
Author: sari_alail
Date: 05-10-2003, 10:10 AM
Parent: #1
يا بدرالدين شنا
انا قريب منكم شديد انا قاعد على بعد 400كم من مسقط
في مدينة العين أها أنا حا توديني فين
ولك تحياتي
|
Post: #8
Title: Re: الأخوة بورداب تشاد وبورندي
Author: Yassir7anna
Date: 05-10-2003, 10:32 AM
Parent: #1
عليك الله يا بدر هسع جنيف ولا مونت كارلو ولا كان ولا امستردام ديل مالهم ما برضو عايزين بورداب ما لقيت لينا سيراليون دي، وهي سيراليوم دي زاتها بي وين انا ما بعرفها
فبالله صلح كشف النقليات ده ولا هسع بنقوم نعلن ليك الاضراب العام بكره تلقى روحك في خبر كان
نحن نطلع من حفرة نقع في دحريرة (ولا هي ما كده)... !؟
علي كيفك غايتو
|
Post: #9
Title: Re: الأخوة بورداب تشاد وبورندي
Author: بدرالدين شنا
Date: 05-10-2003, 12:19 PM
Parent: #1
بسم الله الرحمن الرحيم
هيا شيري
سلام وكتر كلام
كيف حالك وإنشاء الله طيبة شايفك غايبة
عايزك تجهزي زاد المجاهد للملا عمر أصلاً قررنا نوديهو لمتابعة حركة إيتا وخايفنو يقوم يئيتا كلها ما يخلي إلا العضام
إنتي رايك شنو نوديك سيرلانكا؟
عشان السيرلانكية دي تخلس فيك قديم وجديد وتفقع مرارتك
العزيز ساري الليل
سلام وإحترام
طالما إنت ساري الليل لازم تكون في العين عشان عينك تكون مفتحة
طبعاً إنت راجل محمول وأنا خايف أوديك محل 500 شلن حتى يساون 1 درهم
المحبوب/ ياسر حنا
ياخوي جنيف وأمستردام ديل محجوزات لي ناس الإدارة
مش دايماً الجزار بختار أطيب اللحمة للبيت
أها بتمشي ولا أحرش الكفيل؟
|
Post: #10
Title: Re: الأخوة بورداب تشاد وبورندي
Author: hammama
Date: 05-10-2003, 11:30 PM
Parent: #9
والله يا بدر الدين انا معروض علي شغل في سيراليون وأحتمال كبير امشــي يعني ما
محتاج نهره من الكفيل ولا حاجه لكن عليك الله ياسر ده ممكن ينفع جدا في نيبال لانو طويل وكمان بالو طويل اكيد ح ينفع مع ناس كاتمندو القصار ديل . اما اذا قبل احد الذهاب الي سيرلانكا في احتمال يلقى سودانيين هناك لانو مره في المتصفح لقيت اثار سودانيين في مدينه كولومبو في الانترنت كافيه.
ارجو الافاده في حاله موافقتكم الكريمه لاكون ممثلكم في freetown مع ارسال صوره من العقد مع عده الشغل(كمبيوتر وشويه دورارات لحدي ما الواحد يستقر و كده)
|
Post: #11
Title: Re: الأخوة بورداب تشاد وبورندي
Author: Tumadir
Date: 05-11-2003, 03:27 AM
Parent: #10
بدر الدين
ادينى بورداب
حلة عمر
سمعت بى حلة عمر؟؟؟
عندنا فيها اهل ، وطبعا نحن كل ما يصبح صباح، على حياة امى الله يرحمها ، كان بظهروا لينا اهل فى حلة زول
المهم حلة عمر دى جانا منها واحد من اهلنا ديل، وقاعدين حوالينو كلنا وهو بيونس فينا بحضارة حلة عمر
قال ، فيما قال انه يوم الانتفاضة ، كا ن يوم ما بتنسى فى حلة عمر ، قالها وهو يطوطح راسه ذات اليمين وذات الشمال، حتى ضاق صبرنا ، وسالناه ، الحصل شنو فى حلة عمر يوم الانتفاضة؟؟
فأجاب بعد سفة لو تمهله طويلا،
يوم الانتفاضة؟؟ على الطلاق
الحلة دى كلها مرقت ، ودفرت ليك على كشك الخدار كسروه ختوه فى الواطة دى حتيتة
نوال سالتو، وتانى يوم اشتريتو خدار من وين؟؟؟
قاليها هى ما الصباح قمنا صلحناه
انا غايتو مسكونى بورداب حلة عمر
يعنى كلها كشك خدار
والباقى عمر
ما بقدر على الشقاوة دى
|
Post: #12
Title: Re: الأخوة بورداب تشاد وبورندي
Author: BousH
Date: 05-11-2003, 03:53 AM
Parent: #11
بدر ا لدين السمح  سلام
ياخوي عندي ليك سعأل ....
دارفور دي تقع في ياتو بلد
|
Post: #13
Title: Re: الأخوة بورداب تشاد وبورندي
Author: بدرالدين شنا
Date: 05-11-2003, 04:15 AM
Parent: #1
بسم الله الرحمن الرحيم
المحترم حمامة
سلام وموافقة مبدئية
والله أنا ذاتي شايف ياسر حنا متجرس
فإذن على بركة الله ونقول ليك ياحمامة مع السلامة
ياخوي رسل لينا أخبارك بي خط اليد ولا مع الحجاج إنشاء الله
كمبيوتر ودورات لا أحسن نرسل ليك تلفون الثريا كمان
لك حبي يا جميل
المبدعة بالجد تماضر
سلام وإحترام وإعجاب
لوووووووووووووووووووووول
ياخي أنا ضحكت رغم إنو المريخ مغلوب
أها بعد صلحوا الكشك تاني تلقي ليك خبر من وين للبورد؟
أنا بفتكر نعين قريبكم في حلة عمر ونملا ليهو كيس خدارو كل يوم
عندنا واحد بحكي زي قريبكم دا مرة كان بحكي للجماعة قال
والله والله يا جماعة السنة العرس فيها جابر داك الله يرحمه سنة عجيبة بالحيل وكت جابو العروس في الحفلة جابر دا كنكش فيها تكنكشة قدام الناس .. وبعد داك سكت الراوي .. إستمرت حالة من الصمت بعدها الجماعة قالوا ليهو أها
فرد عليهم
شن الأها ما تراها جابت عبدالله البتشوفوا عينكم دا
خلاص نشوف ليك حلة زول تاني ..أها رايك شنو في حلة عباس؟
تحياتي
الغالي/ بوش
سلام وإحترام
ياخي صورتك البترجف زي الفيروس دي كل مرة خالعاني
ياخوي إنت ياتو بوش البتسعل من دارفور؟
أشكرك على الطلة
|
Post: #18
Title: Re: الأخوة بورداب تشاد وبورندي
Author: garjah
Date: 05-12-2003, 07:02 AM
Parent: #13
شن الأها ما تراها جابت عبدالله البتشوفوا عينكم دا
من اول كنكشة عفيت منو
|
Post: #21
Title: Re: الأخوة بورداب تشاد وبورندي
Author: بدرالدين شنا
Date: 05-12-2003, 08:05 AM
Parent: #18
بسم الله الرحمن الرحيم
الذيذ/ قرجة
أقعد إنت دور لي كدي
|
Post: #14
Title: Re: الأخوة بورداب تشاد وبورندي
Author: شرووم
Date: 05-11-2003, 12:42 PM
Parent: #1
البدر علك عافي ااازول ورد الله غربتك من البلد ديك
جيت بجاي اشوف كشف النقليات ولقيت اسمي ما شملته النقليات قلت خليني اساهم ببعض القرارات التنقلاتية
أول شي اهل العوض دا ينقل إلى سيبريا وهو يقدر يمثلنا هناك خير تمثيل.
بعدين البت شيري دي محلها بس الصين هناك حيث مرض سارس وما ادراك ما سارس .
الملا عمر : نوديه الاسكا عشان البرد هناك بنفع مع الحالات الزي دي
بت قضيم بما انها جاية من السودان احسن ليها تمشي بوركينا فاسو .
بوش ده وديهو العراق عشان يا يغير اسمه يا يروح فيها .
أما انت يا بدرالدين وعشان الوجيه الملصق لينا صورته دا نوديك بولندا
صدر تحت اسمي وتوقيعي في الحادي عشر من مايو للعام الفين وتلاتة
شرووم
|
Post: #15
Title: Re: الأخوة بورداب تشاد وبورندي
Author: بدرالدين شنا
Date: 05-11-2003, 01:26 PM
Parent: #1
بسم الله الرحمن الرحيم
شرووم يا رائع
سلام وخير كلام
ياخي إنت تنفع مدرب .. لكن صدقني حا تمشو الصين تلقوا السارس ميت وشيري قاعدة لأنو دي عندها سم السارس على وزن سم الفار
أما البقية ما عندي عليهم إعتراض
والأمورة ست الصورة ربى بدرالدين بتسلم عليك
|
Post: #16
Title: Re: الأخوة بورداب تشاد وبورندي
Author: Abdalla Gaafar
Date: 05-11-2003, 06:46 PM
Parent: #1
بدر الدين
السلام ملايين
بما اننا زي ماقال شاموق الله يطراهو بالخير ناس راحات (الدول الاسكندنافية)وما عندنا كفيل الا رب العالمين نحمد الله لازم يكون عندنا حق الفيتو في كشفك والله كشفك كشف امريكان علي العموم عندنا بعض الاخوة دايريين نتوسط ليهم والله كشفك دا تموصوا تشربو
اخونا ياسر حنا واخونا اهل العوض بالله شوف ليهم ترتيب لانو يبدوا انهم مستهدفين من جهات كتيرة اما البت شيري لينا العضم وليك اللحم اقول ليك وديها صماصي مخاريق السما تعرفا وين دي .وياخوي الهدية بتصلك ;كان اتوصيت بي الجماعة ديل وربنا يكفيل شرالكفيل وشر الدنيا
سلام
عبدالله جعفر
|
Post: #17
Title: Re: الأخوة بورداب تشاد وبورندي
Author: بدرالدين شنا
Date: 05-12-2003, 04:32 AM
Parent: #1
بسم الله الرحمن الرحيم
المهذب/ عبدالله حعفر
سلام وإحترام وموافقة بدون شروط
عندنا حق الفيتو في كشفك
عصير الفيتو مر بالحيل
ودومة النيتو ما بتنكد
سعادتك إنت عايزهم وين؟
|
Post: #19
Title: Re: الأخوة بورداب تشاد وبورندي
Author: ود عقاب
Date: 05-12-2003, 07:20 AM
Parent: #1
بدر الدين
نحن القاعدين فى السودان وعاملين الالزاميه حتودنا وين
شرووم دا صاحبى شوف ليه حته غير الصين يعنى كان جبتو ام طرق عراض يكون احسن العرجه لمراحه
ودعقاب
|
Post: #20
Title: Re: الأخوة بورداب تشاد وبورندي
Author: بدرالدين شنا
Date: 05-12-2003, 08:04 AM
Parent: #1
بسم الله الرحمن الرحيم
ودعقاب كيف أخبار العقاب
شرووم دا كان قريب في كوانتنمو.. نوديك ليهو؟
|
Post: #22
Title: Re: الأخوة بورداب تشاد وبورندي
Author: شرووم
Date: 05-12-2003, 08:38 AM
Parent: #1
مرحبا سيد الحوش بدر الدين صباحك كله سعادة انشاء الله
شايف ود عقاب بقى يتدخل وداير يرجعنا لي وراء ،،، وانا يازول اصلا بما بتدهور وارجع لي وراء تاني ،،، بس يا اظل هنا ويا امشي هناك مع ناس عبدالله جعفر محل الجليد والناس الطيبين المافي زول شغال بالتاني
واخيرك لك يا ود عقاب ترافقني لي هناك حيث الدول الاسكندنافية يا السويد جاك بلاء
يديك العافية
شرووم
|
Post: #23
Title: Re: الأخوة بورداب تشاد وبورندي
Author: ود عقاب
Date: 05-12-2003, 10:35 AM
Parent: #1
شروم هوك السويد والسقط الشديد
انا ماشى معاك لكن داير لى شى اطقطابوه
ودعقاب
|
Post: #24
Title: Re: الأخوة بورداب تشاد وبورندي
Author: بدرالدين شنا
Date: 05-12-2003, 10:51 AM
Parent: #1
بسم الله الرحمن الرحيم
الغالي شرووم
سلام وإحترام
المشكلة البيت بتاع السويد دا فيهو مشكلة كهربا وموية وسيدو قال عايزو إلا كان نرقدك مستشفى لغاية ما نلقى لينا بيت .. أما ود عقاب دا خليهو شوية
|
Post: #25
Title: Re: الأخوة بورداب تشاد وبورندي
Author: شرير والبرتقاله
Date: 05-12-2003, 11:02 AM
Parent: #24
سلاااامات
بدر الشين
انا حاجز (نواحي) الحكومه دقست
في ولاية كاسوكاجروغ
دي قريبة شوية ، يعني جبده كده
من زقلونا
|
Post: #26
Title: Re: الأخوة بورداب تشاد وبورندي
Author: بدرالدين شنا
Date: 05-12-2003, 11:35 AM
Parent: #1
بسم الله الرحمن الرحيم
صديقي القديم المعتق وبرتقالته
سلام وشوق وفرحة عارمة باطلة
يا خوي ولاية (كاسوكاجروغ) دي ما دايرة ليها تعيين دي بس تشيل عكازك وتمش
حبي وتقديري
|
Post: #27
Title: Re: الأخوة بورداب تشاد وبورندي
Author: قرشـــو
Date: 05-12-2003, 01:49 PM
Parent: #26
حبيبنا بدر الدين
بالله كل شىء ولا الكفيل ده لانه اصله متحيل وزعلان
يعنى كده كده ناوى لينا النية السودة
وعموما اذا فيها تذاكر وفنادق وبدل مواصلات وبدل اعاشة وبرديم فنحن ما عندنا مانع نمشى اى حتة ان شاء الله لبنان
يعنى شايف فى زول هنا فى لبنان ؟؟
انا حجزت لبنان يا سيدى
شو خيو ما بدها بورداب
لك الحب كله
|
Post: #28
Title: Re: الأخوة بورداب تشاد وبورندي
Author: بدرالدين شنا
Date: 05-12-2003, 02:04 PM
Parent: #1
بسم الله الرحمن الرحيم
الزلمة/ قرشو
شو أخبارك .. زينة؟
إي بدها بورداب وإنت بدك مصاري
حيّاك حبيبي
|
Post: #29
Title: Re: الأخوة بورداب تشاد وبورندي
Author: AlRa7mabi
Date: 05-12-2003, 03:01 PM
Parent: #1
يا جماعة دارفور دي لقيتو ليها مراسل ولا لسه
غايتو أنا جاهز؟؟؟؟؟
|
Post: #30
Title: Re: الأخوة بورداب تشاد وبورندي
Author: بدرالدين شنا
Date: 05-13-2003, 07:15 AM
Parent: #1
بسم الله الرحمن الرحيم
ود أختي الرحمابي
سلام وحب شديد
تجدني آسف لرد طلبك فالكل يتهافت ويتوق للسفر لدارفور .. رأيك شنو في تورا بورا؟
|
Post: #31
Title: Re: الأخوة بورداب تشاد وبورندي
Author: safrajat
Date: 05-13-2003, 08:41 AM
Parent: #1
شنا ..عقابا ليك يتم نفيك الى لختنشتاين! اها دي لو عرفتها وين اسلفك وسامتى لاسبوعين!!!
قرنفل و شيري لو بشبهو الصور المعلقه قدامهم دي الى امارة موناكو!
تماضر ذكرتينى ناس صلاح الزين المشو فى الانتفاضه قطعو سير الطاحونه , ده كان رمز السلطه الوحيد فى الحله,
|
Post: #32
Title: Re: الأخوة بورداب تشاد وبورندي
Author: بدرالدين شنا
Date: 05-13-2003, 11:05 AM
Parent: #1
بسم الله الرحمن الرحيم
صديقي/ صفرجت
سلام يا حبيب
لختنشتاين فإن النعمة لاتدم
|
Post: #33
Title: Re: الأخوة بورداب تشاد وبورندي
Author: oudenoord
Date: 05-13-2003, 11:38 AM
Parent: #1
الاخ/شنا
سلام ورحمه الله,انا غايتو عن نفسي بتبرع ابقي ليكم مراسل من قريتي السكان فيها مع انها مابتشبه القري لكن الله غالب.اما ناس تشاد اسألني منهم !!غايتو اتمني انهم يجدوا الوقت وينضموا للبورد دة..
مع ودي
|
Post: #34
Title: Re: الأخوة بورداب تشاد وبورندي
Author: Tumadir
Date: 05-13-2003, 11:44 AM
Parent: #33
قبل ما نفرتق من السودان وكنا اسرة سعيدة ، والحال بدا يتبهدل
كان الوافر كلما يسمع شكوى من الناس يقول ليهم
ياجماعة احمدوا الله ، فى تشاد....كدة وكدة وكدة
يعنى الحتة الوحيدة الاكعب حالا من السودان
مرة بدوا ناس بيع الفول يقولوا ما بيعوا الرغيف الا بى فول
والناس يتزمروا
الوافر
قاليهم ياجماعة احمدوا الله فى تشاد الخلال الا بالظهرة
|
Post: #37
Title: Re: الأخوة بورداب تشاد وبورندي
Author: oudenoord
Date: 05-13-2003, 01:26 PM
Parent: #34
الغاليه/تماضر
تحيه ود واحترام
الظاهر انو الصورة انعكست او انك ايييييييييك قديمه جدا...امزح تشاد كانت وماذالت بلد تجاري ضخم وهي بتشهد تطور في العمران وتطور في وجميع النواحي والزائر ليها بيشهد ذالك.
|
Post: #35
Title: Re: الأخوة بورداب تشاد وبورندي
Author: بدرالدين شنا
Date: 05-13-2003, 12:59 PM
Parent: #1
بسم الله الرحمن الرحيم
oudenoord المحبوب
سلام وإحترام
كدي أديني أخبار قريتكم قبل الخط ما يقطع
الغالية/ تماضر
سلام وشوق
لووووووووووووووول
الوافر دا مباااااااااالغة
يا حليل زمن الوافر وعبدالعظيم محمد الطيب وتبارك والصادق
هؤلاء قنابل فكاهة متحركة
|
Post: #36
Title: Re: الأخوة بورداب تشاد وبورندي
Author: oudenoord
Date: 05-13-2003, 01:08 PM
Parent: #1
الحبوب/شنا
والله قريتنا ده الى يكتبوا عليها قريه زي حله الجداد بعد الساعه خمسه ونص والله الى تكلام نفسك في الشارع
|
Post: #38
Title: Re: الأخوة بورداب تشاد وبورندي
Author: بدرالدين شنا
Date: 05-13-2003, 02:08 PM
Parent: #1
بسم الله الرحمن الرحيم
المحبوب/ منو؟
ياخي إسمك دا والله أخير قريتكم
المهم معاك من اليلة لي رمضان كان لقيت ليك خبر من حلتكم دي نحن بنجي شيلوا برانا
ناس قريتكم ديل بعرفوا رامسفيلد؟
|
Post: #39
Title: Re: الأخوة بورداب تشاد وبورندي
Author: oudenoord
Date: 05-13-2003, 03:43 PM
Parent: #1
ودالحاج.. اسم عرفت (بضم العين ) بيهو ياحبوب بين اخوني واحبابي مع انو الوالد ضابح حله بتاعت خرفان لكن مما قمت وتبيت الناس تقول ي ودالحاج .
وكان علي ناسي ديل وزير الدفاع حقهم مابيعرفوه..بعد (التكنولجيا) العندهم لكن مسجمين ومرمدين..
لكن عندي ليك خبر >>>
فريقم بتاع الكورة نزل من الدوري الممتاز..للدرجه الاوله والسنه الجايه بقدرة قادر ح ينزل للتانيه
أها قصرت معاك ???
|
Post: #40
Title: Re: الأخوة بورداب تشاد وبورندي
Author: بدرالدين شنا
Date: 05-14-2003, 05:45 AM
Parent: #1
بسم الله الرحمن الرحيم
المحبوب/ ود الحاج
سلام وإحترام
ما قصرت تب والله
معناها خبرك الجاي بكون فريقكم دا ما لاقي محل ينزل ليهو ذاتو
|
|