Post: #1
Title: بوستات للإيجار
Author: بدرالدين شنا
Date: 05-26-2003, 04:51 AM
Parent: #0
بسم الله الرحمن الرحيم
النقول أنا سيد البكان دا وعندي دكاكين للإيجار
يعني أي واحد منكم يدخل يرد علي البوست يتقمص أي شخصية مثلاً صاحب بنشر وعايز يأجر دكان يعني حتى لغة المخاطبة تكون بتاعة أصحاب البنشر ويجي بي موالو معاهو يعني ممكن يكون معلق في أغنية وكلماتها ليها علاقة بي شغلو .. والبدخل بعده يتقمص شخصية جزار مثلاً وهكذا لغاية ما نعمل سوق كامل وشخصيات معروفة يعني إذا دخل واحد رد وكان نمرة 13 يكون عارف يتعامل مع نمرة 4 على أنه ترزي بناءا على الشخصية التي تقمصها نمرة 4 وليس بالضرورة أن أرد عليه أنا
أها رأيكم شنو نجرِب؟؟؟؟
وبعدين يا بكري القصة دي ما فيها قروش عشان بعدين ما تزرزرني دا مجرد تمثيل ساكت
|
Post: #2
Title: Re: بوستات للإيجار
Author: HOPELESS
Date: 05-26-2003, 05:02 AM
Parent: #1
اسمع يامعلم شناة
الناصيه دا كيف يا معلم ..؟
في زول حدقو ولا لسه..؟
آآآي يا جوك دايرنو نفتحو محل تاجير عجلات
اها الايجار كيييف.؟
(............)
شنوووووو..؟ كتيييره يا معلم نحن قلنا ليك دايرنو دكان جمله
كدي خجها شويه
(............)
ات يا معلم كان مادايرنا نأجر كلمنا عديييل كدا
ما تقعد تقولينا شنو ماعارف
بعد انت ماشايف الشارع القدامو دا مكسر كيف..؟ يعني العجله ما تتم السنه ترقد سلطه
اها قلت شنو
(...........)
يا زول انت مفلكب ولا شنو
ارح يافرده زولك دا طاير ليهو
....
|
Post: #3
Title: Re: بوستات للإيجار
Author: بدرالدين شنا
Date: 05-26-2003, 05:20 AM
Parent: #1
بسم الله الرحمن الرحيم
هيا ود أخوي إنت مالك نفسك حار الناصية هولك تب لكن ترى كلو بي سعره وبعدين قصة الشارع المكسر دا في مصلحتك إنت عشان شغلك يمش ولا شنو؟؟؟
|
Post: #4
Title: Re: بوستات للإيجار
Author: Ahlalawad
Date: 05-26-2003, 07:01 AM
Parent: #1
بدر الدين – المحل رقم 61 بالله .. لأنو بيتنا في شارع 61 .. وبعدين القروش ما حاضرة ، عندي ورقة كبيرة لامن أقوم أفكها .. ولي حدي ما ألقى فكة ، بستنى لامن تجي واحد تفتح ليها محل جبنة وندق لينا خيمة جنبها .. ونقووووول كدي وندوبي .
|
Post: #5
Title: Re: بوستات للإيجار
Author: بدرالدين شنا
Date: 05-26-2003, 07:57 AM
Parent: #1
بسم الله الرحمن الرحيم
قلت لي إسمك أهل العطا ولا منو؟؟؟
هي نان يا ولدي داير تدوبي لي في شارع 61 ؟؟؟
|
Post: #6
Title: Re: بوستات للإيجار
Author: ابو جهينة
Date: 05-26-2003, 09:52 AM
Parent: #5
بدر الدين
أنا أحجز لي أي محل ، كلها زي بعضها عندي ، لأنو بضاعتي مضمونة و ما دايرة ليها محل مميز.
أنا عندي كمية من باروكات الشعر و كريمات التفتيح و تنعيم الشعر و فردو.
و بما أن السودان مقبل على طفرة بعد توقيع إتفاقية السلام ، فمعنى كدة إنو الناس حتتجه للكماليات و لزوم البهرجات، عشان كدي خميت المخزون دة من محلات في جدة بالجملة. تشارك يا أبو البدور ؟
|
Post: #7
Title: Re: بوستات للإيجار
Author: ابوحراز
Date: 05-26-2003, 10:22 AM
Parent: #6
عاوز محلين في اي ركن مامشكلة
او جوة مامشكلة
محل لبيع اللبن
ومحل لتصليح السراير
وأهم شيء عندي خدمة التوصيل للمنازل مجاناً
قال البنشر الإسلامي قال
|
Post: #8
Title: Re: بوستات للإيجار
Author: بدرالدين شنا
Date: 05-26-2003, 11:03 AM
Parent: #1
بسم الله الرحمن الرحيم
أبو جهينة
سلام وإحترام
ياود أخوي قالوا بتك عندها الخبر اليقين دحين يعني خبر السلام دا خلاس بقى تب؟؟؟
إت تكوس تبيع في الباروكات وزولك البتحاوم دا شعيرة ما فيهو
قال أشارك قال
ياسلام أبو حراز بي شحمو ودمو
هازول سلام والله ليك طولة
أنا البكانين اللات اللبن والسراير عندي علا بهايمك بتوديهن وين؟؟؟
والله ياخوي توصل المنازل ولا توصل السكارى أنا ما شغلتي أنا داير حقي بس
عجبتني حكاية البنشر الإسلامي دي
|
Post: #9
Title: Re: بوستات للإيجار
Author: ابو جهينة
Date: 05-26-2003, 11:25 AM
Parent: #8
بدر الدين
السلام جاي جاي ما فيهو إتنين تلاتة ، كان رضينا أم أبينا ، العلوج عاوزين كدة لمصالحهم القومية العليا ، هم لا يهمهم بشير و لا الماركيز دي مابيور ، المهم عندهم سياستهم الواضعنها للقرن الأفريقي المسنون.
أها ، مادام شعر ما عندك ، ما تخاف ، إنت أحسن دعاية للمحل ( باب النجار مخلع )
عشان كدي ، شارك بصلعتك بس ، الباقي خليهو علي.
|
Post: #10
Title: Re: بوستات للإيجار
Author: بدرالدين شنا
Date: 05-26-2003, 12:22 PM
Parent: #1
بسم الله الرحمن الرحيم
يا ود أخوي أنا ماعندي صلعة .. الصلعة عند زولك العلج الخاتيهو في بروفايلك دا
أشكرك على العودة مرة أخرى
|
Post: #11
Title: Re: بوستات للإيجار
Author: Ahlalawad
Date: 05-26-2003, 12:30 PM
Parent: #1
يا البدري
سويتو لينا شنو في بكان الجا بنا
ولا جا كسر
|
Post: #12
Title: Re: بوستات للإيجار
Author: shiry
Date: 05-26-2003, 01:20 PM
Parent: #11
سلام مربع
اخوي بدر
شوفت الدكان داااااااااك
بالله لا تنطيه حد غيري
عندي النيه افتحوا
مرطبات
واسميهو
مرطبات احوال الناس الجمبنا
ابيع فيهو الليمون الباااارد
والكركدي
والشعير
مع اني ماعارفه الشعير بسوهو كيف
لكن اهو
اهل العوض بعرف يسوهو
|
Post: #13
Title: Re: بوستات للإيجار
Author: Ahlalawad
Date: 05-26-2003, 01:57 PM
Parent: #1
سيري
الغلت لزومو شنو
نحن نسوانا زاتو ما بسون الشعير
خلي اتشمر أنا واخت سكيني هناك
وعكازي هنوووك
واقعد أسويلك في الشعير
الشعرا الـ يقيسوها بالمتر
قولي آمين
|
Post: #14
Title: Re: مرطبات احوال الناس الجمبنا بادارة اهل العوض
Author: shiry
Date: 05-26-2003, 02:26 PM
Parent: #13
سلام مربع
اهل العوض
اميييييين يارب العالمين
اكان نتخلص من الزعمطه دي
|
Post: #15
Title: Re: بوستات للإيجار
Author: alfatih
Date: 05-26-2003, 02:38 PM
Parent: #1
شناء السمح..
انا جيت امبارح اول مرة
و إنت ما قلت لي إتفضل لا جوة..
كيف نتحاسب تجار ؟
خلاس ما مشكلة..حاقوم اشتري
لو سمحت يا ابو الشباب ..السوق بي وين ؟
هيناك ..تلف علي يدك اليمين ...تلقي شجرةنبق كبيرة..خليها..هههه
في شحاد اوعك تديهو قروش ...عشان قمت اديتو جنيه ..قال لي تديني جنيه يا مفتري..
قلت ليهو الجنيه كان بكم دولار!!
المهم خليهو ..امشي طوالي كدة.....تلقي صف عيش ..بعد الصف ..دةالسوق
في الكادر: زحمة وبتاعين اكياس نايلون
يا ولد ..جيب كيس
الكيس ب 500 الف
اسمع إنت شايفني جاي من برة ..ما صدقت اااآآ
الكيس ب 100 الف بس
الزول شال الكيس وقف في الجزارة اول حاجة
كيلو ضان لو سمحت..
ما شايف الناس دي قدامك ؟
معليش بس عندي زول عيان
زول عيان ..ودي مستشفي بدر الدين شنا ؟
اقيف في الصف لامن يجي دورك..
مافي مشكلة ..اشوف لي جدادة ..إن شالله حاضنة زاتو
يا ولية..الجداده دي بكم؟
يا ولدي الجداده دي مشربنها شطه امبارح بس ...والله ما عندها
جنون جداد ولا حاجة
جنون بقر ..؟ الكلام ده جبتيهو من وين ؟
اصلا اليومين ديل الناس كولهم بقولوا الكلام ده
خلاس يا حاجة
يا ربي اشوف شنو تاني
الولية قالت يجيبو ليها ..زيت كركار من هوب ليس
اها .. دكان الزول دة وين ؟
كدي شايف تماضر ديك جاية شايلةليها بطيخة اسألا من دكان هوب ليس
ولحدي القفةتتملي
افوت سوقكم الخمجان دة
|
Post: #16
Title: Re: بوستات للإيجار
Author: alfatih
Date: 05-26-2003, 02:52 PM
Parent: #1
والله نسيت حاجة ضروريه
السخانة القلاية اسوي ليها شنو.......اها
عرفت
شفت لي كشك قالوا حق شيري
الا ما قاعده تشغل شرايط ميرغني المأمون واحمد حسن جمعة
عشان اشرب عرديييييب
ابو القدح بعرف محل بعضي اخو
|
Post: #17
Title: Re: بوستات للإيجار
Author: Abdalla Gaafar
Date: 05-26-2003, 09:20 PM
Parent: #1
الجميل بدر الدين
ياخوي انت بقيت زي الجماعة والله شنو بعد تدي ناس منو وناس منو حتي بعد داك تطلعو الاعلان
داير كشك ناصية بي اربعة جهات شرط مايبقي قريب للبت البراية ديك والله جنب الداير يوصل للبيوت مجان دا
وبالله برضو نوصيك علي اهل العوض لانو عارفو مابقدر الا في 61 من ولدوهو مافارقو
يديك العافية
عبدالله جعفر
|
Post: #18
Title: Re: بوستات للإيجار
Author: بدرالدين شنا
Date: 05-27-2003, 08:35 AM
Parent: #1
بسم الله الرحمن الرحيم
كيف حالك أهل هيثم
لأنو كرت أهل العوض حاولت أدخلوا في ماكينة شارع 61 أبى يشتغل وجاتني رسالة بتقول الجهاز لم يتعرف إلا على أهل هيثم
كدي يا شباب خلو المرة النضامة دي التدخل
مالك جايطة المحل عندك شنو؟؟
داك ياتو؟؟ الواقف جنبو سيد الكارو داك ما محجوز لكن يا بتي ما أخير تسويهو محل كوفير بدل الليمون والشعير ولا ممنوع؟؟؟
أووووووك شيخ الفاتح لا حولة ولا قوة
ياخي أتلومنا ما سلمنا عليك هي نان المرة النضامة دي بتخلي ليها زول يسمع .. يا زول عرديب شنو؟؟؟ وشيري شنو؟؟؟ تعال آجنا أمش شوف ست الجبنة الجنب أهل الهيثم داك كان عندها جبنة .. كيف حالك الفاتح ومرحب بيك يا راجل يا طيب
أبو عمة دا منو؟؟؟
عبدالله جعفر شنو آزول إنت بعت دكانك الأول ولا نقول الحمد لله الخير باسط؟؟؟ وداير تفتح دكان جديد
إنت محل ناصية من الأربعة جهات دايرو جامع ولا شنو؟؟
في واحدة مرة زعلت وحردت الدواء من ناس القافلة الطبية لمن جو حلتهم وما أدوها سريع وقالت ما بدورو دواكن دا بعد أديتو الناس وش الدواء تدوني العقاب دحين الجماعة ديل أكون أديتهم وش الدكاكين ولا شنو؟؟؟
جيبي واحد ليمون
|
Post: #19
Title: Re: بوستات للإيجار
Author: shiry
Date: 05-27-2003, 10:40 AM
Parent: #18
سلام مربع
سجمي يا سيد الدكاكين
عايز تجرم على قروشي الدفعتها ليك
وتطلعني من الجنه وسقطا
ليه البلد قالوا ليك مافيها قانون
والله هسع اعمل مؤتمر صحفي
واقول سوقك ممول بقروش البنك الدولي وامريكا
لومني لو صحيت الصباح ولقيت فيهو طوبه واحده سليمه
ولا تاني وقف ليك مؤجر في دكانينك
وعبد الله جعفر دا ذاتو بستورد بضايعوا من امريكا
اها قلتوا شنو انت وعبد الله واهل العوض
تدويني الدكان العايزاهو
ولا اعمل المؤتمر الصحفي
هسع
|
Post: #20
Title: Re: بوستات للإيجار
Author: ابو جهينة
Date: 05-27-2003, 12:05 PM
Parent: #19
بدر الدين
في واحد موسطني عندك عاوز ليهو دكان ناصية ، عاوز يبيع فيهو ( داندرمة )
ممكن ؟
|
Post: #21
Title: Re: بوستات للإيجار
Author: بدرالدين شنا
Date: 05-27-2003, 01:09 PM
Parent: #1
بسم الله الرحمن الرحيم
يا ولية كدي اقيفي .. هي كدي اصبري .. أنا ماقصدت..أمريكا دي .. كدي أسمعيني .. مؤتمر صحف.. مش قروشك .. ياهن ديل قاعدات.. خلاس محل شعير محل شعير آآآآآي وكمان ليمون مبسوطة؟؟؟ عبدالله جعفر بتكلم معاهو بس إنتي ما تزعلي يا بت الناس
لا حولة ولا قوة إلا بالله العلي العظيم
أمريكا فت مرة
أبو شيري كيف حالك .. هي شيري شنو بسم الله؟؟ شيري تطير في السماء .. أبو جهينةكيف حالك .. ياخي دي مرة غلباوية خلاس قلت لي زولك المحل الدايرو ياتو؟؟؟
محل داندرمة؟؟؟
ياخوي لا داندرمة ولا دانفوديو قولوا ما ممكن
يعني زولك دا ينفخلو كم كيس عشان يديني حق الإيجار؟؟؟
|
Post: #22
Title: Re: بوستات للإيجار
Author: ابو جهينة
Date: 05-27-2003, 01:27 PM
Parent: #21
قال أكياسو منفوخات
|
Post: #23
Title: Re: بوستات للإيجار
Author: ود عقاب
Date: 05-27-2003, 01:30 PM
Parent: #1
بدر الدين شنا
بكرى كان مادير حقو فى المساحه نحن حقنا ما بنخلى فى تخطيك لينا انت قايل هنا مافى بلديه ولا شنو
1/ تصديق البلديه
2/ المجلس الهندسى الدكايين بنها ساكت كدى
3/معاينه الارض على الطبيعه امكن داير تقش الناس ديل
نشوف الناس القدموا طابات نقاصه واجيك راجع
هوبلس
1/ تصديق المرور العجلات بمشبها وين
2/ دمغه الزول الاول
3/ اورنيك1976
اهل العوض
انت عشان ما قلت النشاط
1/ عليك حق الغفاره
2/ اورنيك1976
ابوجهنيه
1/ شهاده الوارد
2/خلو طرف من جمعيه الرفق بالحيوان
3/اورنيك1976
ابو حراز
اولا محل البن
1/تصديق وزاره الصحه
2/دارين نعرف نوع القر بلدى ام مهجن
3/ اورنيك 1976
ومحل السراير
1/ شهاده ايزو2005
2/اورنيك1976
شيرى
1/تصديق الضهرب من السراء الحرام عشان اليومين الدنيا سخانه والتلج معدوم والمويه قاطعه
وانت دايره تعمل محل فيه اربع انواع بارد
2/اورنيك 1980
عبدالله جعفر
شفت النقاط الفوق دسل كلها عليك
ودعقاب
|
Post: #24
Title: Re: بوستات للإيجار
Author: ابو جهينة
Date: 05-27-2003, 02:12 PM
Parent: #23
ود عقاب : الحمد لله الجابك و جاب عقابك.
أولا بجيب ليك شهادة وارد بس ، أما خلو طرف من الجمعية ما ممكن ، لأنو بضاعتي من حيوانات في السودان جنسها مافي ، متل الكنغارو و دب الباندا و آكل النمل و الفقمة.
الأورنيك ، أنا عندي إعفاء من سانتينو دينق.
|
Post: #25
Title: Re: بوستات للإيجار
Author: بدرالدين شنا
Date: 05-27-2003, 02:22 PM
Parent: #1
بسم الله الرحمن الرحيم
أكياسو منفوخات؟؟؟
دا زول دا ولا بعير؟؟؟
يازول عشانك إنت وحسب جياتك ديل بنديهو .. يديك العافية
إنتو يا ناس البلدية شغلكم دائماً ردع؟؟؟
عليك الله أديني 4 صفر كمان
إنت يا ولدي حرم إستحقيت الإسم تب وكان مفروض يسموك ود عقاب رادع
يا ولدي الله يهديك أنا بقدر ليك على التلتلة دي؟؟؟
|
Post: #26
Title: Re: بوستات للإيجار
Author: Ahlalawad
Date: 05-27-2003, 02:28 PM
Parent: #1
ياخوانا اتو كلكم دايرين تبيعيو؟
طيب البشتري منكم منو؟
أنا غايتو لاني بايع ولاني شاري
|
Post: #27
Title: Re: بوستات للإيجار
Author: ود عقاب
Date: 05-27-2003, 03:16 PM
Parent: #1
اهل العوض
جيت خاشى
جيب رسوم ####ور
بقيت زى اخونا ادروب اشتغل رباطى
يوم كامل ماجاءهو زوال فى النهايه جاء واحد
ادروب قال ليه جيب العندك
قال ليه ما عندى حاجه
ادروب طيب شغال شنو ما عندك حاجه
قال ليه استاذ
ادروب قال املاء تدينى
بدرالدين شنا
انا قلت من الاول بكرى مادير حقو نحن حقنا ما بنخليه
ابوجينه
بديت شغل الوسطات من الان
مافى اعفاء وما فى وساطه
تدفع ولا نشيل العده
ودعقاب
|
Post: #28
Title: Re: بوستات للإيجار
Author: ابو جهينة
Date: 05-27-2003, 03:57 PM
Parent: #27
ود عقاب
بصراحة أنا خايف على العدة.
|
Post: #29
Title: Re: بوستات للإيجار
Author: 3mak Hasabo
Date: 05-27-2003, 05:27 PM
Parent: #1
اسمع ياخوى بدر الدين
انا الدكان دا....وح اخليه كدا فاضى
انت مالك مش قروشك بجوك كل اول شهر...ماتجننا نحن ماناقصين
|
Post: #30
Title: Re: بوستات للإيجار
Author: Abdalla Gaafar
Date: 05-27-2003, 06:13 PM
Parent: #1
البدر
يازول الحكاية دي جاطت وياخوي انت دكاكينك مالا التقول زي مشروع الزرعي دفعنا دم قلبنا وراجين ترزي فرعون.كدا نبدأ بالبت شيري ياخوي البنية دي الله يكفينا شرها قالت كيف مؤتمر صحفي لا اله الا الله يازول انت ماعارفا والله الا كان تخلي البلد وتهج ياخوي اديها الدايراهو كمان قالت نحنا بنجيب بضاعة من امريكا الحمد لله البضاعة مستزنها من بدر الدين سيد الدكاكين دي.تانيا ياخوي يابدر الدين انت ناس البلدية اصلك مااديتم حقهم تخلي لامن ود عقاب يدخل ينضم متل نضمو دا وانا ناس البلدية ديل ياخوي عارفم والله اسع بعد ندفع البقول فيهو ود عقاب باكر يطلع ليك بي رسوم تاني وكلامو دا كلو يكون منشن ليهو علي دكان فكدي اقعد معاهو وحل المشكلة.والله والله اخلي شيري تفرج فيك الله وخلقو,وبالله لوماقادر تحل المشاكل دي رجع لينا قروشنا ياها تحويشة العمر كلوزوشايف زولك ودعقاب لابد راجي البدخل ياخوي نحنا عشان حجتكم الكتيرة دي ورسومكم الما بتخلص دي خلينا البلد.
السلام لكل الناس السمحين جدا
بدر الدين وباقي النجوم
يديكم العافية
|
Post: #31
Title: Re: بوستات للإيجار
Author: Yassir7anna
Date: 05-27-2003, 06:14 PM
Parent: #1
استاذ بدر الدين
يا اخي لو سمحت انحن عندنا ندوة سياسية كبرى عن الوضع السياسي الراهن في الشرق الاوسط وافريقيا - السودان كانموذج، وح تكون الندوة بعنوان"علجي السبب لي اذاي" فلو سمحت اخي عايزين لينا بوست يكون كبير شوية عشان يقدر يشيل عدد الناس الح تشارك وكده وياريت برضو لو تورينا السعر كم ونظام الايجار عندكم كيف باليوم بالساعة بالشهر والشي المهم بالله المايكروفونات والكراسي وكده ح تكون على منو؟
بالنسبة للتصاريح والموافقات الامنية وكده نحن ح نقوم بيها ان شاء الله
اللجنة الدولية لمحاربة علوج البحر
تشكر
|
Post: #32
Title: Re: بوستات للإيجار
Author: بدرالدين شنا
Date: 05-28-2003, 03:55 AM
Parent: #1
بسم الله الرحمن الرحيم
أناغايتو لاني بايع ولاني شاري
أهل الموضوع إنت زعلت ولا شنو؟؟؟
لا بائع لا شاري .. خلاس خليهو محل حلاقة المهم تديني حقي
ود عقاب كيف العقاب خليتهن
انا قلت من الاول بكرى مادير حقو نحن حقنا ما بنخليه
هسع إنت مشنط كدي داير حقك ولا حق البلدية؟؟؟
أبو جهينة سلام
إنت لي هسع ما أكملت العدة؟؟؟
أهلين عمك حسبو
شفت الدكاكين الفاضية وأصحابها جيوبن كبار وغنيانين دي البتجيب لينا أمريكا .. تنظيم إيه وتنظيم إيه
الفاضل/ عبدالله جعفر
شيري خلها سكتناها تب وأديناها دكانها وهسع الليمون البتشرب فيهو دا من دكانها ما سامع شرائط الغنا والإزعاج دا كلو منها
ود عقاب أنا كشفت ليك موجتو وبرضيه بي قرشين تلاتة
قال بلدية قال
ياخوي إنت أياهو ياسر حنا الشيوعي المعروف دا ولا غيرو
علجي السبب لي اذاي
أنا دكان للسياسة ما عندي
وكل شاة معلّجها من عصبتها
|
Post: #33
Title: Re: بوستات للإيجار
Author: HOPELESS
Date: 05-28-2003, 04:29 AM
Parent: #32
سابت عندك
مافي زول يقفل دكانه
وانت يا سيد السوق خليك واقف ماتركب عربتك وتهرب
معاكم الضرائب
اي زول يجيب من دكانو الحاجه الببيع فيها ما بنقبل بالنقدي عشان القروش ما عندها قيمه..واوعي تتهربوا
وانت يا زول وين التصاديق ووين الاقرار الضريبي ووين حق العاملين عليها والكلام الذي منه...؟
حق الدوله نحن لازم نطلعوا والمابطلع بنطلعوا ونطلع....؟!؟!؟
|
Post: #34
Title: Re: بوستات للإيجار
Author: بدرالدين شنا
Date: 05-28-2003, 05:01 AM
Parent: #1
بسم الله الرحمن الرحيم
سبحان الله يا جماعة.. شوفوا الزول دا ما بشبه هوب لس بتاع العجلات الفي الناصية داك؟؟؟
يكون يا ربي دا أخوه كير لس؟؟؟
اي زول يجيب من دكانو الحاجه الببيع فيها ما بنقبل بالنقدي عشان القروش ما عندها قيمه..واوعي تتهربوا
أنا شخصياً متهم أهل العوض هو الجاب لينا الراجل دا ما شفتوهو قال أنا لا بايع لا مشتري
غايتو أنا ما بايع أنا بتاع إجارات
|
Post: #36
Title: Re: بوستات للإيجار
Author: HOPELESS
Date: 05-28-2003, 05:24 AM
Parent: #34
خلاص ادينا دكان مجاني نبيع فيهو الحاجات البنلقطه من الجماعه ديل ويكون جنب البنشر الاسلامي الناصيه داااك
|
Post: #35
Title: Re: بوستات للإيجار
Author: Yassir7anna
Date: 05-28-2003, 05:11 AM
Parent: #1
ياسر حنا (يتلفت) بالله يا استاذ ارجوك وطي صوتك وبعدين
عايز تدينا اهلا و سهلا ما عايز تدينا خلينا نمشي نشوف حتة تاني (مازال يتلفت) انت زاتك شكلك كده بتاع أمن
يلا نحن زاتنا ما عايزين بوستك ولا يحزنون، يلا يا شباب خلينا نشوف لينا واحد تاني
|
Post: #37
Title: Re: بوستات للإيجار
Author: بدرالدين شنا
Date: 05-28-2003, 05:57 AM
Parent: #1
بسم الله الرحمن الرحيم
كدي إنت لقط الحاجات أول وبعداك تعال لي
والله تمش تهبش المرة شيري دي تقوم فيك زي خلية النحل
وبتاع السراير واللبن داك أخير تختاهو والله بعد ماك هوب لس يخليك بون لس
أنا صوتي ما بوطيهو يلا لملم جماعتك وخارجونا ولا بلم فوقكن السوق دا هسع
قالولكم دا الكرملن؟؟؟
|
Post: #40
Title: Re: بوستات للإيجار
Author: HOPELESS
Date: 05-28-2003, 08:56 AM
Parent: #37
اول بالتبادي
نحن سلطه عليه ومافي زول بيتنطط علينا
وبعدين الحاجه سيري دي ليمونه العاملو سيد الخيمه داااك بنشربوا منها ضر ساااااااكت والباقي ندفقو للضبان البخلانه عليهو دا
وسيد اللبن دا كلامنا معاهو كتير يدينا اللبن مسخن وعليه سكر ولابأس بقليل من البسكويت الفاخر
والسرير طبعا لا غني لنا عنه لظروف عائليه مستعجله
وباقي الجماعه عليهم توصيل الضرائب العينيه لبيتنا العامر بحقوقهم ولهم... لا شئ..وفقط
ويازول افتحلنا الدكان خلانا نشوف شغلنه
|
Post: #38
Title: Re: بوستات للإيجار
Author: Yassir7anna
Date: 05-28-2003, 06:13 AM
Parent: #1
عموما كتر خيرك
لكن ده كله كله بنتهي
وزولا تريدو تشتهي
تلقاهو في
لا في السجن لا مختفي
لا يقلو ليك ما تمشي ليه
محطة بتذكر عيونك ونحن في المنفى
وبذكر سؤالك لي بتين جرح البلد يشفى
وبتين تضحك سما الخرطوم حبيبتنا وبتين تصفى
سؤالك كان بقربنا وبعذبنا وبزيد ما بينا من الفه
وكم في قلبي دقه نحاس
وطار منعيني باقي نعاس
واعاهدك يا اعز الناس
بدر الدين ده كان ما خليته بعدين يمشي ويتلفت
بس اصبر ده كله كله بينتهي
بعد داك بنتقابل يا بدر
|
Post: #39
Title: Re: بوستات للإيجار
Author: ابو جهينة
Date: 05-28-2003, 08:40 AM
Parent: #38
بدر الدين
عدتي كاملة و لله الحمد . بعد سعالك أمبارح قعدت راجعت ( العدة ) كويس ، كل الأجهزة شغالة كويس خط 220 ، علا سيد الداندرمة زعلان. قال إنك أديتو عين طرشقن أكياسو.
حسع دحين داير يغير الرخصة و يبيع أمواس حلاقة . ممكن ؟
|
Post: #41
Title: Re: بوستات للإيجار
Author: بدرالدين شنا
Date: 05-28-2003, 10:45 AM
Parent: #1
بسم الله الرحمن الرحيم
خلاس أنا كان الديتك الدكان ما بملاهو ليك ... بس إنت قايل أنا خايف ولا خايف
وين يا بتاعين السياسة إنتو؟؟؟
ما سامعين الزول البقلع في الدكاكين بالقوة دا والله أحرشو عليكم تاني الشمش إلا يوصفوها ليكم وصف
يا ابو جبيهة ولا أبو جهينة إنت
ياخي أنا كلمتك زولك دا شغلاتو ديل كلهن ما بجيبن قروش وأمواسو ديل ما بنقدر نديهو بوست كامل خلي يبيعن في المسنجر
|
Post: #42
Title: Re: بوستات للإيجار
Author: ابو جهينة
Date: 05-28-2003, 11:04 AM
Parent: #41
أنا أبو جهينة يا بدر. مالك قعدت تلخبط في إسمي ؟ أبو جهــــــــــــــــــــينة
بعدين زولي راح لي ناس الماسنجر ، قال ليهم أنا جاييكم من طرف بدر الدين ، قالوا ليهو جيب خلو طرف. حنسناهم رفضو ، حسع الزول فارش بضاعتو برة.
يرضيك كدة أبو البدور ؟
|
Post: #43
Title: Re: بوستات للإيجار
Author: aboalkonfod
Date: 05-28-2003, 11:19 AM
Parent: #42
صاحب العمارة والمؤجرين .........سلام
أووب علي أنا يا ود الراجل ..نفسي إنقطع
أأأي ياحبيب القسا بالله وقف ... جنس حر ..
أأي جاي من بحري ... دكاني في السوق العربي
أكان جيتنا ..  .. ما بنقصر معاك
قلت لي أسمك منو ..... عصام
أجي يا ود أمي أنا قبيل ما قلت ليك .. وليد
أبو جهينة ... دة ما المؤجر لينا .. ولد ظريف ولطيف
المعاك دة ولدك  ... لا ما بسحرو .. ما كيافة لكن
عصام .. أكان جيتنا مرحب بيك في أي لحظة ..
شكرا ليك يا عصام
أها يا مان أنا شغال شنو؟؟؟
|
Post: #44
Title: Re: بوستات للإيجار
Author: ود عقاب
Date: 05-28-2003, 11:25 AM
Parent: #1
بدر الدين يا اخوى
انا داير مكتب كبير وفاتح فى 8 شوارع عشان هوبلس خش فيها
وطالق الشفع بالعجلات فى الشارع وادخل فى اختصاصاتنا
ودعقاب
|
Post: #45
Title: Re: بوستات للإيجار
Author: ود عقاب
Date: 05-28-2003, 11:28 AM
Parent: #1
بدر الدين يا اخوى
انا داير مكتب كبير وفاتح فى 8 شوارع عشان هوبلس خش فيها
وطالق الشفع بالعجلات فى الشارع وادخل فى اختصاصاتنا
ودعقاب
|
Post: #46
Title: Re: بوستات للإيجار
Author: Abdalla Gaafar
Date: 05-28-2003, 07:55 PM
Parent: #1
بدر الدين
والله عفيت منك
قدرت علي الجماعة تب
شايف زولتك مشغلة ندي القلعة وتبيع في الليمون
لكن ياخوي انت دحين الزول الفوق دا مازول البلدية
هلا هلا يالبدر قدرت عليهو لمن نسي الرسوم
كمان داير ليهو دكان فاتح علي تمانيه شوارع
ياخوي والله دا الا تديهو في صينية حركة
المهم الحمد لله الحكاية سلكت وربنا ينجيك شر الجماعة
وبالله عليك الله ابعدنا من جماعة السياسة والله يجيبو ليك ضقلا يلولح ويمكن كمان تجيب ليها مصادرة وانا عارف ياسر اسع تاني يجيك ياللفة اعمل حسابك
سلام
عبد الله جعفر
|
Post: #47
Title: Re: بوستات للإيجار
Author: عشة بت فاطنة
Date: 05-28-2003, 08:11 PM
Parent: #1
قت ليك ...البدري هي جيب اضانك جاي
زولك عملت ليهو شنو بسم الله الرحمن الرحيم القنا ليك طفشو
اصلو زولي الجايبو ليك دا تاجر عملة من الجماعةاياهم .المحل انشاالله حيكون بتاع بارد وتحت تحت حيكون العشا شعيرية وعشاك مضمون
|
Post: #48
Title: Re: بوستات للإيجار
Author: بدرالدين شنا
Date: 05-29-2003, 04:01 AM
Parent: #1
بسم الله الرحمن الرحيم
والله يا أبو جهينة ما برضيني لكن أسوي ليهو شنو
بعدين هو مرة أكياس ومرة أمواس .. كدي خليهو معاك لمن نطفش ليهو الزول المتسلبط داك
عصام (أجي يا ود أمي أنا قبيل ما قلت ليك) ...ياوليد
إنتو أبو الكنفد دا ما فيهو شوك ولا شنو؟؟؟
ود عقاب إنت جبتو آخر .. كيف يعني مكتب فاتح في تمانية شوارع؟؟؟
دا مكتب ولا أم 44؟؟؟
عبدالله كيف حالك؟؟؟
يازول الناس ديل دايرين المسايسا وأخوك واقع من السما سبع مرات
زولتك بتاع البارد مبسوطة أصلي فتحت معاها موضوع عرس كدا وإنشاء الله ربنا يتمو على خير
أما ياسر خوفتو بي الزول القاعد في الدكان نمر 7 قلت ليهم دا بتاع أمن
أما بتاع البلدية دا أمره هين وديت ليهو شوال سكر في البيت وكم صابونة وهو مبسوط تب
بت فاطنة أصبحتي طيبة؟؟؟
طفشتو بس إنتي جيبي زولك .. لكن أنا قايل قصة البارد دي بتسوي لينا مشاكل مع بت أم شيري ست الدكان دااك دي لسانا طويل بتدق الصفائح وتطلِع الفضائح ونحن ما ناقصين فضائح دحين سويهو أستديو وتصوير مستندات
|
Post: #49
Title: Re: بوستات للإيجار
Author: dabeep
Date: 05-29-2003, 07:38 AM
Parent: #1
دبيب: سلام
بدر: وعليكم السلام أتفضل
دبيب:الدكاكين في ولا وزعتوها زى ماوزعتو الدقيق والهلع
بدر: يازول دقيق شنو وهلع شنو كدى إستهدى بالله , والدكان دايرو لشنو؟
دبيب: شركة إستيراد وتصديرلكل النفوس الطيبة وأقلب ليك عملة تحت تحت وأعمل لى كم مخبز ألي ومحل بتاع سمك
أسمع فطرتو إنتو؟
بدر: الحمد لله
دبيب: بتفطروا إنتو ياسكان العمارات والبكاسى , جنكم بكاسى ومش الدكان ده أنا ما دايرو , ودكان مافيه برندات ماعندو أى منظر فى الظلط
الله معاكم
بدر مندهشا: ده مالو ده؟
واحد مع بدر:أنتا ده ما عرفتو؟
بدر: ده منو ده
واحد: ده الدبيب واحدين قالو شاكوش, وفى ناس قالوالحكومة وقالو الزول ده كان راجل مهم وسياسى , لكن بينى وبينك دى السجارة
بدر: الله يكافينا شرو
أسمع انتا أهل العوض ده دفع قروشو؟
خالص الود
دبيب
|
Post: #50
Title: Re: بوستات للإيجار
Author: ود عقاب
Date: 05-29-2003, 07:52 AM
Parent: #1
انا داير دكان زى صينه سان جميس فى شارع الجمهوريه
وياعبد الله جعفر ان ورنيك1976 ما جبتو
وداير تصديق من ناس الجوده الشامله
ودكان الليون الليله اخر يوم ليه ما جاب شاده السراء الحرام
وابوجهينه خلاص افتح ما عندك مشكله
وهوبلس دا فتحنا ليه فائله كامل فى المرور عشان الشفع خربو الشارع وعملو حوادث كتير
وفاطنه بت عشه بتاع العمله النص بالنص
ودعقاب
|
Post: #51
Title: Re: بوستات للإيجار
Author: HOPELESS
Date: 05-29-2003, 08:33 AM
Parent: #50
ود عقاب اخوي
تعال لي بيجاي النكلمك كلام تحت تحت الزول الشين دا ما يسمعو
اها اسمع انا يومته لميت عجلاتي من الشفع بدري وقفلت دكاني وخفسته ليه مشوار كدا ورجعته متنكر قلت اهرش الزول الشين دا وناس السوق المقرشين ديل
اها آآآزول
زولك هرش من ما قلت ليهو معاك ناس الضرائب واداني دكان جنب بنشري الاسلامي عشان ابيع فيهو الحاجات البستنكحه من ناس سوقو مجان ساااااكت لا قرش لا تعريفه
ما انا عارف النوع المقرش دا من ما تقول ليهو معاك ...قبال تتم كلامك يقول ليك شيل الانت عاوزه كلو بس انت تكون راضي .. انا خايف يجي يوم تكون داير تقول ليهو معاك اخوك يقول ليك شيل الانت دايرو قبال يسمع كلمه اخوك
عالم جبناااااات بشكل
اها آآآزول
بما انك من ناس البلديه وحيث انك من الناس البلقطو قروش العتب والعتب علي النظر طبعا..دايرك تقسم معاي القروش اللقطها من الناس ديل عشان ديل تحت مظلتي
فهمت يا فتك..؟
|
Post: #52
Title: Re: بوستات للإيجار
Author: Yassir7anna
Date: 05-29-2003, 08:56 AM
Parent: #1
لآ لآ للعملاء
بدرالدين يا جبان
نحن ديل في الميدان
السدنة ديل لا تصوتللم
السدنة ديل
|
Post: #53
Title: Re: بوستات للإيجار
Author: بدرالدين شنا
Date: 05-29-2003, 11:07 AM
Parent: #1
بسم الله الرحمن الرحيم
بالله دا ياهو دبيب البعنوهو؟؟؟ يا سلااااااااام ما يستاهل ياخي
قلت لي سيجارة .. الله يلعن السيجارة ويوماً جابا في البلد
ود عقاب أنا أخلي ليك السوق دا ولا شنو؟؟؟
ياخي قلت ما عندي لا صينية سان جيمس ولا صينية باسطة .. وبعدين المرة الداير تقاسمها النص بالنص دي إسمها عشة بت فاطنة ما فاطنة بت عشة والنوع دا حرم ما (بتعشى) فيها
أنا كان عرفت ود عقاب وهوب لس ديل بوسوسو يقولوا في شنو كنت إرتحت بشوفن يعاينو لي ويضاحكوا .. تعال آجنا أمش جيب لي شربات من بت أم شيري دييييييييك وفي طريقك إتصنت أسمع لي هوب لس وود عقاب بقولوا في شنو
يا جماعة أنا كان قمت هسع شبكت زول السياسة البلعلع دا مع الحرامية البقطعوا فوقي ديل ما أخير .. يازول ما تختاني غادي غادي والله الدكان دا كان خليتو أدبخانة للمجانين والشحادين الفي السوق ديل ما أديك ليهو
|
Post: #54
Title: Re: بوستات للإيجار
Author: Abdalla Gaafar
Date: 05-29-2003, 04:07 PM
Parent: #1
الجميل
بدر الدين
السلام الاف
ياخوي انا مشيت ناس البلدية وقالوا ودغقاب دا ماشغال معاهم
وورقوا واختامو دي كلها مرورة
وقالوا برضو ماعندهم الارانيك البيطلب فيها ودعقاب لا 1967 و1970 لكن يبقي لي معاهو جماعة تانين من اامؤجرين منك الدكاكين كدي شوف زولك بتاع الدكان 7 يجيب ليك الخبر
وين زولك بتاع المظاهرات مايبقي الجماعة قبضو
غايتو ياخوي دكاكينك لمن تاجري كلها حتشوف افلام وافلام فيها
بالمناسبة البضاعة بتصل في ظرف يومين ودايرين لينا مخزن انشا الله مؤقت وطبعا بعيد من الجماعة
يديك العافية
عبدالله جعفر
|
Post: #55
Title: Re: بوستات للإيجار
Author: عشة بت فاطنة
Date: 05-30-2003, 09:22 AM
Parent: #1
شوف يازول انشاالله كسرة بطماطر ولا يهمك الكلام علي المدفون
وانشاالله يور كمشن ردي > ,;وعندي ليك زباين بالكوم وكلهم عايزين دكاكين ما ناصية اهم شي الضرا قول يا ابشرا من راجل المرة
وعرس الضرا بالنسبة لي انا صراحة ماعايز اي محل افضل الامركزية حاكون لايصة في نصكم اي انكبة عضلات ماشاالله 
|
Post: #56
Title: Re: بوستات للإيجار
Author: بدرالدين شنا
Date: 05-31-2003, 03:53 AM
Parent: #1
بسم الله الرحمن الرحيم
حاج عبدالله كيف حالك
يازول إنت متأكد من الكلام البتقول فوقو دا؟؟؟
أنا كان شايلني الشك من أول يوم .. هسع أوع يكون الجماعة أدوهن شئ ديل عصابة لكن أصبر لي أنا بسايسهم ليك .. هيع والله أنا ختري خلاس
يا بت فاطنة سلام
أنا قلت ليك إنتي ما تظهري في الصورة وأنا برسل ليك الولد في البيت تأكدي أمورك ماشة تمام .. بس كمان المرة الجاية خلي زولك يكبر الكمية
|
Post: #57
Title: Re: بوستات للإيجار
Author: doma
Date: 05-31-2003, 04:37 AM
Parent: #56
اها يا بدرحلا ولدي ما عندك دكان صدقه رسول الله لي حبوبتك دومه؟؟؟
كدي سوي حق الله اول شي لانه هو الباقي ولا تيمموا الخبيث منه تنفقون. معني كدي اعزل لي احسن دكان ناصيه وفي شارع رئيسي ولازم يكون الشارع بودي لمناطق سكن القطط السمان النوع البتلمع جضوموا تقول ضاربناها ورنيش داك
|
Post: #58
Title: Re: بوستات للإيجار
Author: HOPELESS
Date: 05-31-2003, 04:58 AM
انت يا خاله
بدوري بشحدتك السياحيه دي تشيلي الدكان الناصيه كمان
مابتقري في اليافطه الكبيره عريضه دي ولا شنو ..؟
مركز عجلات شفع الحله
لبيع وشراء وتأجير العجلات
جوار البنشر الاسلامي الحديث
وانت زاتك غلطانه الزول البخيل اب خليقه دا بيشحدوهو حاجه ..؟
دا كبايه الليمون مستخسره في نفسو
وكان بدور امشي البيت يحنس في الشفع يوصلوهو البيت بعجلاتي المؤجرنها مني شفتي جنس دا...؟
|
Post: #59
Title: Re: بوستات للإيجار
Author: doma
Date: 05-31-2003, 05:10 AM
Parent: #58
انت زاتك انا من امس كايسه ليك داير حقي في زكاة اللوتريات ما تقول لي لسه ما بلغن النصاب, بلغن, وانا من الغارمين وفي الرقاب وطلبي فتيل ريحه فرير دمور الفرير ما تقول لي مافي.
بجيبو من السعوديه دي اصلواالخواجات ناس فرنسابسوهوا مخسوس لينا وولدي بدر حلا الخاتي الشنا برمكي يبز حاتم الطائ في الكرم يتصدق لي حبوبتوا بالدكان الناصيه وشارع رئيسي وزواره ناس متعافيه, باقي انا زوله ست ظهر (الزار) ودايره افتح لي دكان عطور وروائح وحاجات تفتح النفس بلا عجلات بلا لحم بلا طماطم
|
Post: #60
Title: Re: بوستات للإيجار
Author: HOPELESS
Date: 05-31-2003, 05:43 AM
Parent: #59
يا حاجه
ماقلنا ليك امشي تلاقيهن في الاوضه البهناك ديييك
ماتفضحينه قدام الزول سيد السوق يزود علينا الاجار
الزول دا انا عارف انتهازي ماشايفه حقين المظاهرات فلقوا ليهو راسو كيف...؟
|
Post: #61
Title: Re: بوستات للإيجار
Author: doma
Date: 05-31-2003, 05:51 AM
Parent: #60
اها خلاس تاني ما بجيب سره الهنايات الا ترسل الفرير ضروري من الضروري وما تسوي حكايه اساسي زاغ مني وماجاب لي توب الكرب الساده ات تعال النسعلك البنشر الاسلامي دا بياكلوا ولا بلبسوأ؟؟؟
|
Post: #62
Title: Re: بوستات للإيجار
Author: HOPELESS
Date: 05-31-2003, 06:08 AM
Parent: #61
يقال في مجمل ما يقال حاجه دومه
انو البنشر الاسلامي يعني في اللغه اللف والدوران
واستعاروا بكلمه بنشر لانو العجلات بتلف ودور واللساتك ملايانه هواء يعني مليانه كلام فارغ .. والله اعلم
|
Post: #64
Title: Re: بوستات للإيجار
Author: doma
Date: 05-31-2003, 06:14 AM
Parent: #62
لوووووووول اهاكان كدي اخير نسميهو بنشر ام فكو لانه بنشر اسلامي دا بجيب ليك ناس الشريعه والدقه سريعه
|
Post: #63
Title: Re: بوستات للإيجار
Author: بدرالدين شنا
Date: 05-31-2003, 06:13 AM
Parent: #1
بسم الله الرحمن الرحيم
العمة دوما
سلام وإحترام وإكرام
دكان بي طولو؟؟؟؟
لا حولة ولا قوة إلا بالله العلي العظيم
الحقوني بي حبوب السكري والضغط المرة بتدور تودرني آآآآآآآآآآآآآآآه كح كح كح عوووووووووووووووع ياناس الحقوني أنا كان مت سببي المرة دي آآآآآآآآآآآآآه
هوب لس .. يا هوب لس .. يا بتاع العجلات
جيب عجلتك دي وديني المستشفى الخيري ما توديني المستوصف يقدوا جيبي
المرة بتبرطم تقول في شنو؟؟؟
شايفا بتقول ليك لوتريات ونصاب وزكاة الحاصل شنو؟؟؟
|
Post: #65
Title: Re: بوستات للإيجار
Author: aboalkonfod
Date: 05-31-2003, 10:24 AM
Parent: #63
بدر الدين ... الدشن وشين .... كيفك
أجي يا ود أمي .. أنا مافيني شوك
يسمعن يا يابا بنات الغابــة ..!!
حرم شبالي من أم خطور بت الجركندي ..
تغنيبو الحكامات في ديار ود حامد
.. بالمناسبة داير لي جحرين في الطابق الخامس
تديني ليهم بي كم.
شرطا معاهم خدمة توصيل الفئران للمنزل في حالة
الطلب ... وكاشي يا يابا جااااهز
فتك عافية يا شين
قال شنو ما عندي شوك ... يا يابا أنا بي شوكي
وشراي ..
|
Post: #66
Title: Re: بوستات للإيجار
Author: بدرالدين شنا
Date: 05-31-2003, 01:04 PM
Parent: #1
بسم الله الرحمن الرحيم
في أغنية قديمة بتقول
قلابة قلّبي لي .. قلابة قلّبي لي .. قلاااااااااابة
في يوم الإتنين
إتلملمن فارين
ودخلن الجحرين
الجحر يشيل كيلتين وزيااااادة
وكمان عايز يوصولوا ليك طلبات الفئران للطابق الخامس
بعد شوية تقول لي
عايز لي فأر بالطوة
وفأر مقلى
والله صدق المثل القال
الكنفذ قام ليهو شوك
|
Post: #67
Title: Re: بوستات للإيجار
Author: ابو جهينة
Date: 05-31-2003, 02:40 PM
Parent: #66
أخوى بدر
إنت لسع عندك بكانات فاضية بتأجر فيهن ؟ أنا سمعت شمارات الجحور قلت أجي أشوف الحكاية شنو؟
بعدين ( صورتك الخايف عليها ) راحت وين ؟ بالله البوست بقى زى الزول الحلق شنبو ، أو الزول الحلق نمرة واحد.
تسلم.
|
Post: #68
Title: Re: بوستات للإيجار
Author: قرنفل
Date: 06-01-2003, 00:27 AM
Parent: #66
بدرالدين شنا سلام
بالله اى واحد يتم اخلاءه اتصلو بى طوالى
اصلوا البلد بلدنا ونحنا اسياده.....؟
بس ابعدنى من دوما دى لسانها طويل و كلامها كتير
بس ممكن جنب شيرى اصلى بحب الشعير..؟
|
Post: #69
Title: Re: بوستات للإيجار
Author: abdel abayazid
Date: 06-01-2003, 01:17 AM
Parent: #68
يا جماعة عاوزين سيد السوق
سيد الحلوين
الرجل الشهم
الرجل الكريم
وين الراجل ده
نشوفوا اولا وبعدين نمر عليكم
اسمع كدي ارح نسال البنت ديك في محل المرطبات
ومشينا علي البت
يازول المسجل شغال والتلج في حلل القيزان والشعير
اخ
قرصت ليك صاحبي وتحت تحت اسمع انحنا جاين نسال ما نبحلق
اها بكل تهذيب
يا استاذة لو سمحتي
وبصوت رقيق
انت معاي ااانا؟
اي لو سمحتى
تشربوا شنو؟
لا والله مشكورة اصلوا نحن بنسال من سيد السوق
اه عمو بدر
ايوة الراجل السمح
ضحكت من تحت النظارة
كان معاي هنا وشرب كباية شعير بالثلج وعلي ما اظن
مشي الي محل البسكيلتات
نحن في وجوم بسكويتات؟ عنده مصنع بسكويت
هي
ياي بسكيلتات الدراجات
العجلات ها ها ها
اي اصلو الراجل بتاع العجلات ده عمل حمد لبد بالايجار
علي حسب كلام عمو بدر
طيب محل البسكيلتيات ده بوين
هي
شفت لف يمينك واول شمال جوار محل حفاظات الموية الصبارات
طيب شكرا يا استاذة
هيyou are welcome
اها لفينا بجاي ولكن هنا مافي محل صبارات ده محل ازيار
يا خي الراجل الوجيه السمح اهداك مع العجلاتي الشين
ده
سلام عليكم
سلام بفتور من الوجيه
العجلاتي الشين يرحب بنا ترحيب شديد
ناخذ الرجل الوجيه ونتكلم معه علي انفراد
ياخي نحن ناس جمعية الرفق بالحيوان عاوزين تبرعات
الراجل
ينفجر فينا حيوان ياخي بلا فقر معاكم
كدي قولو للمعلم ده ينوم من الايجار شوية
ونكتشف ان الراجل الشين هو سيد السوق
ومن التكشيرة عرفنا الرد
الاخ بدرالدين لك التحية رغم شناتك
|
Post: #70
Title: Re: بوستات للإيجار
Author: aboalkonfod
Date: 06-04-2003, 10:55 AM
Parent: #69
الأخ بدر الدين شنا سلام
يا أخوي نحنا مقدمين طلبنا للشقة، من سنوات لا رد
ولا توضيح والكاش قابضو مقدم .. يا أخوي شناتك ما
بنقدر نقول فيها شئ، لكن عقدك معانا برقدك بيهو
السجن !!
الشقة بتاعتي لازم تكون أرضية ومطلة على الخور، أو
بالعدم ترعة، لزوم الفئران وكدة، وبعدين ممنوع منعا
باتا وجود الكدايس في منطقتي، يا أخوي دي بتزاحمني
في رزقي ..
أها فتناك عافية يا دشن
|
Post: #71
Title: Re: بوستات للإيجار
Author: بدرالدين شنا
Date: 06-04-2003, 01:14 PM
Parent: #1
بسم الله الرحمن الرحيم
المحبوب أبو جهينة
سلام وإعتذار لتأخر الرد لك وللجميع
الجحور دي أنا بأجرا عشان الواحد لمن يحلق راسو يخت فيها الشعر إنت شعرك وينو؟؟؟
الصورة بتاعتي نزلوها الحساد
الغالي قرنفل
سلام وإكرام يا زكي
اصلوا البلد بلدنا ونحنا اسياده.....؟
تشرفنا سعادتك
العزيز عبدالرحيم أبايزيد
سلام يحمل محنّة
غايتو الحاجة البقدر أعملها ليك بغير ليك إسمك للإسم الصحيح
عبدالرحيم أبا يزيد
أما الرفق بالحيوان دا
شايفني هسع خانق لي عتود؟؟؟
أبو الكنفد
سلام
شقتك جاهزة ومفرّشة وفيرانك تلقاها في التلاجة
تقديري يا جميل
|
Post: #72
Title: Re: بوستات للإيجار
Author: ابو جهينة
Date: 06-04-2003, 02:42 PM
Parent: #71
الساخر النحرير بدر الدين
لك تحياتي
شعري مسجل غياب تام أثناء فترة الصيف ، و اليومين ديل أنا مرتاح و الهمبريب ضارب السقف.
صورتك منو الحسدك فيها ؟ دي حسادة غتيتة خلاس.
|
|