Post: #1
Title: كيف تملأ بوستك ركّاب ؟؟؟؟
Author: بدرالدين شنا
Date: 06-01-2003, 11:03 AM
Parent: #0
بسم الله الرحمن الرحيم
شوف ياخوي داير تملأ بوستك دا ركاب؟؟؟
في طريقتين لا ثالث لهما
الطريقة الأولى
تقوم تقول هذا البوست للأخوة والأخوات فلان وفلانة وفرتكان وفرتكانة زي 25 نفر
أها كدا بتكون ضمنت ليك 25 مداخلة
أها لمن ترد على أي واحد منهم معناها 25 رد تصبح معاك الجملة 50 راكب أها تلقط عليهم من الشارع كمين نفر وتتطلع حق ملاحك
الطريقة التانية
تكتب البوست حقك وتنتظر يوم يومين كان ما جوك ركاب تعاين في المنبر وتشوف أغلد بوست فيهو ركاب تقوم تشيل بوستك من أضانو في عملية أعتقد بسموها (لنك) ولا شنو ما عارف المهم تقلعوا من عروشو وتمش ترزعو في البوست المليان بتاع الزول داك وتحرسو زي الهنود البتلقاهم قاعدين في الجوامع ويقول ليك عندنا جامع في (شنب أباد) أها طبعاً أي زول بخش في بوست الزول داك لازم يغشى (اللنك) بتاعك دا ويدفع في الكشف .. وبي كدا تكون مليت بوستك وطلعت حق ملاحك وفكرت في بوست بكرة
|
Post: #2
Title: Re: كيف تملأ بوستك ركّاب ؟؟؟؟
Author: قرشـــو
Date: 06-01-2003, 11:07 AM
Parent: #1
حبيبنا بدر الدين
لك التحية
ياخوى ده بوست ولا بص السجانة بالنص فى زمانو
والله ضحكتنى ياخى
لكن بينى وبينك بعض البوستات عاوزة دفرة عدييييييل كده
لك حبى
|
Post: #3
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-01-2003, 11:17 AM
Parent: #1
بسم الله الرحمن الرحيم
عمدتنا قرشو
سلام وإحترام وإكرام
أشكرك على الدفرة .. عفواً الطلة
|
Post: #4
Title: Re: كيف تملأ بوستك ركّاب ؟؟؟؟
Author: zola123
Date: 06-01-2003, 11:19 AM
Parent: #1
بدر الدين السمح
عندي طريقة اسهل من كدة
تختار اسم دخول بناتي ولا من النوع الما بيتعرف بت ولا ولد
ولحد ما الناس يعرفوا مويتك تضمن اكبر عدد من الزوار
عاين لو برضه ما نفع
ناديني باكتب ليك رد واجيب كم بت يشاركوا عشان اضمن تلاتة اربعة ردود ورانا
كدة تمام؟
الهه يستر كان زول رد لي تاني في البورد ده لوول
باهظر والله يا جماعة
تحياتي
زولة123
|
Post: #10
Title: Re: كيف تملأ بوستك ركّاب ؟؟؟؟
Author: almohndis
Date: 06-01-2003, 12:37 PM
Parent: #4
قالت كيف 25 ركاب في العنوان
وخمسه شماعه
الطريقه التانيه كويش
خاصة اخواك بيشتل بصل
وطماطم ولا احسن مزارع
|
Post: #5
Title: Re: كيف تملأ بوستك ركّاب ؟؟؟؟
Author: سجيمان
Date: 06-01-2003, 11:25 AM
Parent: #1
تعرف يا بدر الدين...... انا فكرت اكتب بوست واديهو لاي زول من الزيلان الغلاد ديل وينزلو باسمو..... لكن يكتب تحت مع تحيات سجيمان
|
Post: #6
Title: Re: كيف تملأ بوستك ركّاب ؟؟؟؟
Author: ود العجمى
Date: 06-01-2003, 11:28 AM
Parent: #1
سجيمان
مالك مزاحمنا يا زول انت زول ماشاء الله عينى باردة عليك جماهيرك كثيرة وزى ما بيقولوا عن فريق الهلال رغم لا يمكن تجاوزه
اها يا جماعة شوفى الخطة التانية دى
والله مرمى الله عمرو ما يترفع . نجرب طريقتك يا بدر الدين
باركوا لأبن اللورد عيد ميلاده
|
Post: #7
Title: Re: كيف تملأ بوستك ركّاب ؟؟؟؟
Author: اساسي
Date: 06-01-2003, 11:37 AM
Parent: #6
والله يا بدر الدين ابو شيبة غايتو ما عارف كان بيقولها ليك ولا لا لكن انت كنت معروف عندنا بي ابو شيبة
افكار حلوة
وحنحاول نتبعها تاني
عشان يعبرونا
وزي ما قال سجمان الرمدان
نتابع الناس الغلاد تاني
زي ناس ود عزة وشاموق والموصلي وسجمان زاتو
تاني بس لحام في بوستاتهم
|
Post: #8
Title: Re: كيف تملأ بوستك ركّاب ؟؟؟؟
Author: Ahlalawad
Date: 06-01-2003, 11:43 AM
Parent: #1
بدر الدين - دحين ما زي التكني سمعتك تقول طريقتين لا تالت لهن؟ كدي خل النهاية مفتوحة يمكن ربك يفتح علينا بي طريقتن تالتة .
طريقة جديدة اللي هي تجميع الاصحاب ، أعمل ليك كم صاحب كدي تكون ايدهن خفيفة ونفسم في البورد مقبول واشبكم بي المسنجر ، سلامات تحيات كيف الحال .. أها حولت القروش للبلد ولا ماشي اجازة؟ كملت البيت الحا يدفنوك فيه ؟ الزراعة كيف؟ جدادكم كيف؟ وحاجات زي دي . وممكن تناقش معاهم بوستاتهم وعندك سجيمان دا ، ناقشو في موضوع الشحدة والولادة بالحبل وسوق ليبيا ، أها وفوق دربك دا لامن تعمل ليك كان خمسة كان عشرين نفر
وما تنسى المناكفة . بي كدي أول ما تنزل بوست بشبكوك نضمي ، ما دايرين يخلسو حقهم ويدينوك لي بوستاتهم هم كمان
|
Post: #9
Title: Re: كيف تملأ بوستك ركّاب ؟؟؟؟
Author: manj
Date: 06-01-2003, 12:22 PM
Parent: #8
اضحك الله سنك يا ود شنان
حقيقة بوست ظريف جدا و طريقة مجربة و ناجحة بلا شك
في طريقة تالتة نؤدي نفس الغرض لكن بتجيب المرض و بعد ما الباص - اقصد البوست- يتشحن الشكله ح تدور و ما في زول ح يدفع
وهي انك تمسك واحد من تماسيح البورد و تعلن عليه الحرب ويا حبذا لو كان بنوتة. عشان الرجال تشيلهم الهاشمية و يدقو سدورهم و يهبو لنجدتها.. وبعد ما يتحقق المراد شوف ليك طريقة مخارجة دبلوماسية
|
Post: #11
Title: Re: كيف تملأ بوستك ركّاب ؟؟؟؟
Author: Ahmed satoor
Date: 06-01-2003, 12:39 PM
Parent: #9
العزيز ابو شيبة
طلعت راجل شايب وكمان تقول لى ابو صلعة ، غايتو كان ختيت صورتك ديك بس بوردك حيتملى ركاب،
مع تحياتى لجميع البورداب
|
Post: #12
Title: Re: كيف تملأ بوستك ركّاب ؟؟؟؟
Author: maia
Date: 06-01-2003, 12:43 PM
Parent: #1
والله ابدعت يا بدرالدين
ذكرتني حافلات الصحافة ظلط او الصحافة شرق والاقبال منقطع النظير عليهااكتر من غيرها من الحافلات في المحطة الوسطى
|
Post: #13
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-01-2003, 12:53 PM
Parent: #1
بسم الله الرحمن الرحيم
المحترمة زولة كريمة العم 123
مش بقولوا برضو على كريمة فلان الفلاني في دعوات العرس
سلام وإحترام
ياختي أنا بوستي قالوا ليك موقفوا عشان الناس يجوا يتاوقا ويفوتو أنا عايز ركاب
قالت زوار قالت
دايرة تلمي فوقي البنوت قالو ليك أنا عندي تعليمة ؟؟؟
المبدع سجيمان
شفت ياخوي مع تحيات سجيمان دي فطور ما بتفطرك
زي البوست الواقف وراكبين فيهو كماسرة البوستات التانيين بدفعوا؟؟
الحبيب ود العجمي
تحياتي ليك ولي لنكك
أنا غايتو دفعت ليك شوف الباقين
سلمت للطلة
صديقي وحبيبي أساسي
سلام وإعجاب بشخصك الجرئ الذي لا يخاف في قول الحق لومة لائم
أنا بستمتع بي بوستاتك لكن بعد مرات إنت بتكتر ليها الشطة وبتقبى لي حارة وأنا بطني ما بتستحمل فبتاوق وأزوغ .. أنا خواف وشيبي دا كلو من الخوف
أما إسم أبو شيبة دا فضحتني بيهو لأني كنت عايز أقشر بيهو قريب لأني زهجت من شناتي دي
لك التحية أخ وصديق
شيخنا المبروك أهل العوض
سلام وإحترام
أنا غلتان يا شيخنا وسافي التراب وطالب السماح كوني قلت طريقتين
إنت شيخنا وليك طريقتك
والله كان لقيت لما وفجخت بوستي دا في خيمة الحردلو حقتك دي أغنى لي جنا جناي
الغالي مانج
سلام وإكرام
إنشاء الله دائماً مبتسم
أما الباظات (البوستا) الفيهن المشاكل أنا ما بقدر عليهن أنا خواااااااااااف ياخوي ود عندها ناسا بتاعين النقة ومنابر النشاط
يا حلاة طلتك يا جميل
صديقي القديم الجديد أحمد ساطور
سلام وجميل كلام
والله يا جماعة رغم الساطور الشايلو في إسمو دا هو أرق من رقيق وفنان مبدع لكن مخفي نفسو وهل يخفى القمر في سماه
أحبك يا رائع
بالمناسبة أنا صورتي نزلوها ناس أهل العوض والملا عمر والرحمابي يوم الأمريكان نزلوا تمثال صدام
المحترمة/ ميا
سلام وإكرام
أشكرك شديد على الطلة البي قروش ..ومال البوست دا أنا موقفوا هنا عشان ناس العقد؟؟؟
تقديري لك يا ظريفة
|
Post: #14
Title: Re: كيف تملأ بوستك ركّاب ؟؟؟؟
Author: شرير والبرتقاله
Date: 06-01-2003, 01:05 PM
Parent: #13
امسياتكم
بشكل البدر
نسيت حاجة تقوم تعادي الناس المبدعين
وتخصص في عنوانين البوستات اللي ماعندها علاقة
بما في بطن البوست
وكمان لو كل ماشفت ليك بوست
دخلت فيها وتسجل حضور
موش رد في الموضوع
لكن تقوم تعزل اتخن شنب
وتسلم عليهو تسالوا من احواله
وتطلع دون ان تعلق على البوست
|
Post: #15
Title: Re: كيف تملأ بوستك ركّاب ؟؟؟؟
Author: sentimental
Date: 06-01-2003, 01:12 PM
Parent: #1
السيد بدرالدين شنا
اولا اعوذ بالله العظيم من شناتك
ثانيا. دى فكرة جميلة كونو تشيل بوستك من اضانو وتختو فى بوست عليه ما يسمى بالهاى ترافك كما يقول غردون واله.
ووشكرا
|
Post: #16
Title: Re: كيف تملأ بوستك ركّاب ؟؟؟؟
Author: قليبى المهضلم
Date: 06-01-2003, 01:40 PM
Parent: #1
الاخ بدر الدين
والله الموضوع ده كان شاغلنى
بحكم انو انا جديد
وكل ما افكر فى كتابة باص اقصد بوست
افكر فى اجتذاب الركاب اول شئ
وبافكارك دى وطريقة شيخنا اهل العوض
المسألة حتتصلح
شكرا ليك
|
Post: #17
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-01-2003, 02:07 PM
Parent: #1
بسم الله الرحمن الرحيم
المحبوب شرير والبرتقالة
سلام يا غالي
أسمع أنا عايز البرتقالة بس
وينك يا حبيب مختفي؟؟؟
ووين قصصك القصيرة وإبداعاتك العريضة؟؟؟
العزيز سنيمنتال
سلام يا حبيب
مالك بتتعوذ من شناتي يعني إنت سمح؟؟؟
والله إتلقي وشك طولو 10 سنتيمنتال
أشكرك على صورة سيدي
الله أكبر ولله الحمد
حبيبي قليبي المهضلم
سلام يحمل كلام مضمونة حبي
أها عرفت الطريقة بعدين تجي تزاحمنا في الموقف
لك محبتي يا جميل
|
Post: #18
Title: Re: كيف تملأ بوستك ركّاب ؟؟؟؟
Author: ابو جهينة
Date: 06-01-2003, 02:35 PM
Parent: #17
بدر الدين
السلام عليكم و رحمة الله تعالى و بركاته
أما بعد
هل جربت أخي أن توقد نارا في ( مبخرة مصنوعة من الفخار ) و تضع عليها بعضا من بخور التيمان و تقرؤه على البوست الذي يكون قليل الدسم ، أو قليل الركاب ؟
جرب هذه الطريقة و إن لم تنفع ، فإذن أغمس أصابع يدك في ماء الزعفران ، و ضع قليلا منه في ( بخاخة المكوة ) و رش الكي بورد و الشاشة.
و إن لم تنفع هذه الطريقة ، فأبحث عن ( هاكرز ) يقدون بقية البوستات فيضطرون لركوب البوست المذكور ، و ستجد بعض المسطحين و بعضا من المتشعلقين.
و ختاما تقبل تحيات الشيخ ويندوز البوردابي شيخ طريقة البوست أبو ركاب.
|
Post: #19
Title: Re: كيف تملأ بوستك ركّاب ؟؟؟؟
Author: عشة بت فاطنة
Date: 06-01-2003, 03:44 PM
Parent: #1
هي وقف سوقني معاك
ياماشي وياغاشي
يا بتاع الاوتو
اوتنا معاك
يا بتاع التلج
الجن بداوى
|
Post: #20
Title: Re: كيف تملأ بوستك ركّاب ؟؟؟؟
Author: ايهاب
Date: 06-01-2003, 05:24 PM
Parent: #19
او انك تنتحل شخصيه بدر الدين شنا
loOoOoOoOoOoOoOolz
|
Post: #21
Title: Re: كيف تملأ بوستك ركّاب ؟؟؟؟
Author: ABUHUSSEIN
Date: 06-01-2003, 06:11 PM
Parent: #1
الأخ بدر الدين ســــــــلااااااااااااااااام
كــلامـك لـذيـذ و دمـك خـفـيـف و نـصـائحـك كـويـسـة أتمنى إنو الشباب
المتعجل لجمع أكثر عـدد من المعجبين و المعجبات إعمل بيها.
لـكـن يا بـدر الدين خبرتك دي إكتسبتها من البوست و لا من الدفار
الواقف قدام بيتكم ؟؟؟؟؟.
|
Post: #22
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-02-2003, 03:49 AM
Parent: #1
بسم الله الرحمن الرحيم
حبيبي أبو جهينة
سلام عليك وعلى جهينة
قلت لي مبخر وبخور تيمان وموية زعفران؟؟؟
دا بوست ولا أوضة عريس ؟؟؟
بعد شوية كمان تقول لي أشوي ليك ورك نملة حوصا ولا كلية غراب عاقر وأمش عكس الهواء
عشة بت فاطنة
سلام وشوق
يا بتاع الاوتو
اوتنا معاك
ماشة وين أيتها الموؤتة؟؟؟
الجيميل إيهاب
سلام ولذيذ كلام
إنت دايرني أنا أنتحلني؟؟؟ إنت قايلني أنا معجب بي؟؟؟
أشكرك على الطلة وعلى اللوووووووووووووول
المحبوب أبو حسين
سلام مسلّح
لذيذ إنت وعسل إنت آااااااااااي
أما الخبرة إكتسبتا من الدفار ضط كوم
|
Post: #23
Title: Re: كيف تملأ بوستك ركّاب ؟؟؟؟
Author: HOPELESS
Date: 06-02-2003, 04:51 AM
Parent: #22
حبيبنا بدرالدين حلا
خليني كمساري في بوستك دا لحدي ما اتأهل وارجعلك
النفسيات تعبانه والكلام شتت
بجيك
سلام
|
Post: #24
Title: Re: كيف تملأ بوستك ركّاب ؟؟؟؟
Author: ولياب
Date: 06-02-2003, 05:27 AM
Parent: #1
يا بدر الدين
سلام
تقولون ،،، طريقتين لا ثالث لهما
بل أقول لك واحدة وإثنتان وثالثة كمان
الطريقة الثالثة
وتسمى العفرتة ، يعني رفع البوست مستخدما كلمة
UP
كده برضو تكون ضمنت ليك كام راكب
وبرضو عندي موضوع حبيت إستشيرك
عندي موضوع كارب ،،، عايز أنزلو في مناقصة _عطاء_ وصاحب العطاء
الفائز هو الذي سيحتكر الكتابة في الموضوع ،،، وكل الحقوق المالية والأدبية ،،، محفوظه لصاحب العطاء الفائز
وعشان نكون واضحين
أكثر ،،، دعني أصرح بموضوع المناقصة
إستلمت خطاب وارد من السودان بعد 12 سنة وشهر واحد إذ بعث لي أحد الأصدقاء خطاب بتاريخ 30/4/1991 ،،،، وقد إستلمت الخطاب مساء يوم الخميس 29/5/2003
أيه رايك أنزل الموضوع ده في مناقصة ولا له
أرجو الإفادة
|
Post: #25
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-02-2003, 05:28 AM
Parent: #1
بسم الله الرحمن الرحيم
يا جمال دنيانا
سلام وحب شديد
مالك يا ود أمي تعبان من شنو؟؟؟
اللس بقى يجيك تاني في هوبك ولا شنو؟؟؟
هسع قلت أقول ليك يا جمال عشان ما أذكرك ال (هوب لس) أنا راجيك يا حبيب
|
Post: #26
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-02-2003, 05:38 AM
Parent: #1
بسم الله الرحمن الرحيم
الظريف ولياب
سلام وإكرام
والله ياخي طريقة ال
up
دي فاتت علي لأنو دي بالميت بتجيب ليك راكب واحد لكن ما بدفع حق المشوار وهو أنت نفسك
أما موضوع الخطاب دا خطير وحقو ترفع السعر وتبدأ من فوق
لكن عندي سؤال
الخطاب رسلوا عن طريق العراق ولا شنو؟؟؟
تحياتي ليك يا جميل
|
Post: #27
Title: Re: كيف تملأ بوستك ركّاب ؟؟؟؟
Author: Yassir7anna
Date: 06-02-2003, 12:24 PM
Parent: #1
|
Post: #28
Title: Re: كيف تملأ بوستك ركّاب ؟؟؟؟
Author: جدو
Date: 06-02-2003, 10:08 PM
Parent: #27
الحبيب بدر الدين شنا
قالو بتزعل لو ما قالو ليك شنا
ياخي تسلم لينا كتير وتسلم لبوستاتك الظريفة اللطيفة
ودي برضها طريقة(بالمناسبة المقولة دي نكتة ذكرني اقولها ليك)في الاخر
وهي فيها نوع من الجبن (الرومي)لووووووول
اللي هي انك ترد علي اي رد بردين ..يعني تدبل البوست ..وبعدين
تجي تعتذر وتمسح الكلام المكرر ..ويكون ثبت ليك عدد اتنين راكب ..قصدي اتنين بوست ...يعني من دقنو وفتلو...لقيتني كيف؟؟ ختري وللا ما ختري؟
قلت شنو؟؟
النكتة
نكتة شنو؟؟
آآ القبيل ديك
كويس...قالليك في واحد جالب ليه دواوقال بيكتل الباعوض
بعدين لما ليه في عزابة كدة غشاهم وباع ليهم الدوا على اساس انه يكتل الباعوض العندهم في البيت ..طبعا الباعوض زاد كميات..الجماعة زعلو شديد وربطوا للزول ..اول ما جاء قبضوهو وقالو ليها انت دواك دا ما شغال ..كيف ما شغال؟؟انتو ما عرفتو طريقة الاستعمال ..اها كيف الطريقة؟؟انتو تقبضو الباعوضة وتفتحو خشمها وتكبو ليها الدوا
جوة..طيب لو مسكناها ما بتموت؟؟قال ليهم ودي برضها طريقة.لول
طريقة تانية
صاحب ليك زول برااااااي زيي كدة
|
Post: #29
Title: Re: كيف تملأ بوستك ركّاب ؟؟؟؟
Author: Hozy
Date: 06-02-2003, 10:42 PM
Parent: #1
الاخ بدر الدين شنا
وين البنات الحلوين
والحلوة ماعارفة اسمها نسيت اسمها
بس معليش انا خليتها صورتها في جهازي اذا ما عندك مانع؟؟
معليش برضو
عارف البوستات الاكثر اثارة
وبيدخلوها الناس اكتر
هي بوستات المشاكل
والمعارك
دي اووووووووووووك
شماعة ما تقدر تقيف فيها
لووووول
|
Post: #30
Title: Re: كيف تملأ بوستك ركّاب ؟؟؟؟
Author: ABUHUSSEIN
Date: 06-02-2003, 11:04 PM
Parent: #29
هــــوزي
شـكـلـك كــــدا إشــتــقــتي لـيـك لـي شـكـلـة
اســي الـبـوســت دا كــلـــو فـيـهـو ريـحـة شـكـلـة
البنات عملوا ليهم أوضـة بيهناك أمشى عليها أحسن ليك و لا ......
|
Post: #31
Title: Re: كيف تملأ بوستك ركّاب ؟؟؟؟
Author: tabaldy
Date: 06-03-2003, 02:21 AM
Parent: #1
شنا والجميع سلام
يا زول أول ما جيت قبل شهر دغري ما عمرة وزوغة كوركت زي طرزان أرررررووووووو وقلت أمانة ما تعب الباندويدث ده معاي
أها لامن بقينا في الجد واول موضوع قلت كدي النسلم علي الناس دي ولسوء حظي كان معاي واحدة دخلت التشكيلةفي نفس اليوم ونزلنا راس
والله لي الأسبوع الفات ده في ناس برحبوا بيها والكاشف ردوا عليهو 13 أكرر تلاتاشر بس لا غير طلع منهم البوست الأساسي وأتنين مني أب , لي فوق يعني وأربعة تسلم يا ظريف وكلك ذوق من الجمل الفي الأساس لي فوق بي صورة مستورة ومهذبة , وواحد شاكلت فيهو سيد الحوش لييه ما رد علي بي باقة زهور زي الجا شايلا في البوست داك. حتى قلت ليهو لو جبت معاك كيس فواكه أحسن لأني الزهور ما بعرف كيف أخلطا في الخلاطة بتاعة الجيران دي
لكن في النهاية أقنعت نفسي وقلت يا ود سيبك منهم وأكتب لي روحك وأضحك مع روحك وغني لي روحك كل الفرق بين غنا الحمام والحوش في الحوش صوتك بمشي بعيد وممكن يسمعو زول يقول ليك نقطنا بي سكاتك زي ما قال لي واحد في الماسينجر أسكت عشان الباندويدث ومن يوما سكت ما فتحت خشمي إلا الإسبوع ده خوفا علي لياقة الباند ده
تيب أوف توداي
العفش داخل البص علي مسئولية كاتبه
أبنوسي
|
Post: #32
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-03-2003, 07:37 AM
Parent: #1
بسم الله الرحمن الرحيم
المحبوب ياسر حنا
سلام وإكرام
واحد داير يقرب منهم مافي
وانا بعد
الغالي جدو
سلام وإحترام للجدود وأرض الجدود
انك ترد علي اي رد بردين ..يعني تدبل البوست ..وبعدين
تجي تعتذر وتمسح الكلام المكرر ..ويكون ثبت ليك عدد اتنين راكب
لا دي شينة تب دي الركاب بتاعنها بكونوا شايلين معاهم غنم ودقيق وحطب عرش .. صاح هم بركبوا لكن بنزلوا ليهم كم راكب وبعذبوك ساكت أخير عدمهم
نكتة الباعوض خطييييييييييييييييرة
لك حبي يا جدو
الكريمة/ هوزي
سلام وترحيب بمقدمك وطلتك الجميلة
الصغيرة إسمها (ربى) وما عندي مانع من حيازتك لصورتها
فعلاً بوستات المشاكل وربنا يكفينا شرها شماعتها مليانة وفيها ناس بسفّوا التمباك كمان
الحبيب أبو حسين
سلام وإحترام
هسع في ذمتك دي هوزي دي بتاعة مشاكل؟؟؟
وبعدين أنا ما صدقت إنها ركبت داير تنزلها؟؟؟
لك حبي وتقديري
المبدع تبلدي
سلام وحلو كلام وترحيب
بالمناسبة المبدع دي ما مجاملة أنا كتبتها بعد أن تأملت مداخلتك وقرأت فيها هذا الإبداع وكان ممكن أقول ليك لووووووووووووول لكن جد طرحك كان أكبر من كلمة لوووووول وكان ممكن يكون بوست لذاته.. أنا شخصياً إستمتعت به كثيراً
أما عشّتك الفلاتية كان تكرمك بي كم راكب من باب حق الزمالة
يديك العافية يا رائع
|
Post: #33
Title: Re: كيف تملأ بوستك ركّاب ؟؟؟؟
Author: Ahlalawad
Date: 06-03-2003, 07:57 AM
Parent: #1
أول مرة أقرا كلمة مشاترة في بوستاتك وكتاباتك يا بدر الدين
الكلمة المشاترة هي كلمة لول بواواتها الأنكاونتابل
تتذكر أنكاونتابل دي؟ ما أدوكم ليها زمان؟
غايتو أنا لو في زول داير يجيب لي الحمت ربت (الكسر في كل) بس يقول لي لول ويضيف ليها بعض الواوات
الواو الضكر ان شاالله الـ يفرطق راس عدوكم
راجي الله عليه
|
Post: #34
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-03-2003, 08:19 AM
Parent: #1
بسم الله الرحمن الرحيم
أهل العوض سلام
أمسك دي (لول) وباقي الواوات ألإنكاونتابل كان ما دايرن أنا ببيعن وأشتري بيهن كالووووووووووووون لي بوستي دا
حبي ليك يا شفيف
|
Post: #35
Title: Re: كيف تملأ بوستك ركّاب ؟؟؟؟
Author: tabaldy
Date: 06-03-2003, 09:28 PM
Parent: #1
بدر الدين شنا
يا زول راسنا كبر وما عارفين نطلعو من شباك الحديد بتاع البص ده .. قالوا الوالي قلب الدفارات بي صندوق زي البصات السفرية يعني لا عزيزي المشاهد لا حاجة وبكرة الوالي يقبل علي بصك ده يطلعو غير صالح للعضوية
اهل العوض ما شاف في الكلام ده غير لوووووووووول . يكون الدخان طشش بيهو؟
عشتي الفلاتية ما ردت حتى علي سلامي ليها اصلو جيتا مشمع في الباب قايلاني داير اتلب في اقرب ملف وازوغ من الكمساري
تيب اوف توداي
ما معاي يا نفسي
وشايلك في نفسي
وخاتيك في نفسي
وخايف من نفسي
أبنوسي
|
Post: #36
Title: Re: كيف تملأ بوستك ركّاب ؟؟؟؟
Author: ABUHUSSEIN
Date: 06-03-2003, 09:45 PM
Parent: #1
الأخ بدر الدين ســـــــــلاااااااااااام
بـس في واحـدة من الطــرق نسيتها و هي :-
إنـو إكـون البوسـت ظـــــــريييييييييف زي بوسـت بدرالدين دا
تحياتي
|
Post: #37
Title: Re: كيف تملأ بوستك ركّاب ؟؟؟؟
Author: Hozy
Date: 06-04-2003, 01:58 AM
Parent: #1
تشكر يابدر الدين
بالمناسبة لي ساعة بفتش في صورة
ربى العسل اختفت من الجهاز عندي
تسلم على كل
شفت ابو حسين ده اصله قاصدها معاي
انا عارفاه داير يغيظني وكده
بس بالله سكته مني
وانا اصلا باصكم ده ما بنزل منه
تحياتي
|
Post: #38
Title: Re: كيف تملأ بوستك ركّاب ؟؟؟؟
Author: جدو
Date: 06-04-2003, 02:54 AM
Parent: #37
اها يا بدر الدين يا حبيب
رايك شنو في التطبيق العملي دا
حمعنا بين الطريقتين...شحنا البوست بعدد 100 وشوية راكب
وبرضو شلناه من اضنيه وجينا ربطناهو في البوست الغليد دا
وجه الشبه بين الجماعة ديل شنو؟؟؟ كلكم مكتوبين ..
|
Post: #39
Title: Re: كيف تملأ بوستك ركّاب ؟؟؟؟
Author: ود عقاب
Date: 06-04-2003, 06:32 AM
Parent: #1
بدر الدين شنا
والكهرباء قاطعه عندو ليه 15 يوم يعملو شنو
دا لا قادر يقرا ولا قادر يكتب
الليله ما تدينى حل ما بخليك وبرجع لما الكهرباء تجى
ودعقاب
|
Post: #40
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-04-2003, 01:13 PM
Parent: #1
بسم الله الرحمن الرحيم
الشفيف تبلدي
سلام يا رائع
عزيزي المشاهد دي حلوة منك
وبعدين راسك يكبر ليه؟؟؟ ما إنت أصلاً كبير بس الناس ما تعرفوا عليك لسة
حبيبي أبو حسين
سلام حار
أشكرك كثيراً على الكلام الحلو دا .. وبعد تنزل ما تدفع
المحترمة هوزي
سلام وإكرام
أمبارح عملت تلفون السودان للمدام وأخبرتني أن صديقتك (ربى) كان عندها ملاريا لمن أدوها حبوب (فانسيدار) تخيلي يا هوزي طفلة عمرها سبعة شهور يدوها فانسيدار حاجة تألم لكن الخبر السمح قالوا قامن ليها عدد 2 سن والحمد لله وما شاء الله
أما موضوع أبوحسين
فتأكدي ما حا يسألك تاني لأنو أنا شايلو مجان وكان كتر كدا ولا كدا بنزلو
ياجدو لكن ماكدا
آي خت بوستك لكن ما تقفلني أنا كمان هسع أنا أطلع كيفن؟؟؟
ما بلقى لي عندك مفتاح عجل؟؟؟
ود عقاب كيف حالك
مشتاقيييييييييييييين
وبرجع لما الكهرباء تجى
ودعقاب
لا خلاص رجعت ولقيتني
|
Post: #41
Title: Re: كيف تملأ بوستك ركّاب ؟؟؟؟
Author: Hozy
Date: 06-04-2003, 01:21 PM
Parent: #1
الف سلامة والله ل ربى
حرام والله ما تستاهل
لا حول الله
الله يكون في العون
قد احزنني ذلك
والله يحفظها انشاء الله
تحياتي
|
Post: #42
Title: Re: كيف تملأ بوستك ركّاب ؟؟؟؟
Author: albagir altahir
Date: 06-04-2003, 01:48 PM
Parent: #1
والله من زمان اعاين لي بوستك مابي اركب ( اعني ادخل ) كدي ساكت زعلة
اها قمته عاينت لي الرقم لقيتلك الرقم بقي كبير والناس واقفين في السلم قلته النتاوق
اتاريك ماليهو براك
والله لكن طريقة حلوة سنتبعها علها تجيب مريسة الخادم
معليش الخادم لا تجر علينا حرب
|
Post: #43
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-04-2003, 02:17 PM
Parent: #1
بسم الله الرحمن الرحيم
الكثيفة هوزي
سلام وشكر
أشكرك على المشاعر العامرة
وإنتي ما ناقصة احزان ودمعتك قريبة
ربنا يلطف بالكل ويديك العافية
الحبيب الباقر الطاهر
سلام على الباقر وسلام على الطاهر وكدا حا تدفع تذكرتين
أملاهو براي مش بوستي إنشاء الله أربط ليهو كوز
الطريقة دي سمحة إنت جربها على الريق
أما بالنسبة للمريسة أنا فطرت والحمد لله
|
Post: #44
Title: Re: كيف تملأ بوستك ركّاب ؟؟؟؟
Author: ABUHUSSEIN
Date: 06-04-2003, 02:26 PM
Parent: #43
الأخ بدرالدين كفارة لي ربى و ربنا إديها الصحة و العافية.
و بعدين إنت عايز تشيلني في دفارك المكركب دا ملح علشان تزلني و لا كيف؟؟ كمان
علشان هـوزي يا خوي هوزي دي عندها معاي مشكلة و ما عايز أي زول إدخل فيها
و حق المشوار دا بدفعوا ليك بس خليني أتصرف بي حرية في الدفار الزحمة دا
و صدقني ناس هوزي البدخلو بي الباب القدام و إنزلو بي الباب الوارء ديل
ديل النشالين يعني الناس ديل لم تجي تخلص منهم القروش حا تلقى هوزي
نضفت جيوبهم و إنت حا تاكل نيم .
|
Post: #45
Title: Re: كيف تملأ بوستك ركّاب ؟؟؟؟
Author: maia
Date: 06-04-2003, 10:52 PM
Parent: #1
الاستاذ بدرالدين الما شين
حسه ما قلت لينا البوست ده ماشي وين ابوسعد ولا ام دوم؟
شايفة الركاب زادوا خالص
|
Post: #46
Title: Re: كيف تملأ بوستك ركّاب ؟؟؟؟
Author: ABUHUSSEIN
Date: 06-04-2003, 11:52 PM
Parent: #45
و إنتي يا مايا بتسألي بعد ما ركبتي كـدي أدفعي لي الراجل حقوا بعدين أنزلي
حــركـات المـلـح دي لـسـة ما خـلـتـيـها
|
Post: #47
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-07-2003, 08:19 AM
Parent: #1
بسم الله الرحمن الرحيم
أشكرك يا ابوحسين ويسلم ليك حسين إنشاء الله من كل علة
كمان يا ابو حسين جابت ليها نشاليين ؟؟؟
لا لا لا أنا البوست دا بغشى بيهو المركز وإنت بعدين اركز على كلامك دا
يا ميّا سلام عليك
إنتي كدي اركبي وأنا بوديك محل ما ماشة وبعد بوصل ناس أبو حسين ديل
أبو حسين يا زول مالك مقابل الحريم ديل؟؟؟
كدي زح قففك ديل خليها التركب
|
Post: #48
Title: Re: كيف تملأ بوستك ركّاب ؟؟؟؟
Author: safrajat
Date: 06-07-2003, 11:03 AM
Parent: #1
بدر الدين , انا جربت كل الطرق ومافى فايده, بما فيها الشعبطه و التلبط فى البصات الملانه زيك كده, شماعه ..مسطح..فى السلم..ذكرنى كاريكتير كارورى راسم ليهو بص ملان و مدفق من كل فتحه فيهو و البشريه معلقه بى بره..و كاتب"شخصيات بارزة"
حقو نعمل موقف نسميهو موقف البورد..منو تطلع البوستات , حتكون فى خطوط رئيسيه دى طوالى زحمه (زى الحاج يوسف) تلقى الكمسارى واقف (من ضمنهم لازم يكون دكين لانو لديح و بخوف الركاب) يكورك..سجيمان نص.. سجيمان نص...التانى..شنا ظلط ..شنا ظلط... او قضيم ..قضيم(ما فى زمن لقول "بت")..اها العينه دى تلقاها دفسه و كتاحه..و رخيصه اى زول خاشى طالع..
تعرف دوافع الناس للتزاحم فى البصات كتيره الغالبيه عاديه لانهم ما عندهم حل غير يركبو القيامه القايمه دى بعد داك فى النشالين و الفريجه و تانيين مابقدر اقول مابقدر اصرح,و الله فى بوستات تعاين ليها تستغرب الزحمه فى شنو؟ وفى ناس تقرا مداخلاتم و تقول هسه ده الحاشرو هناشنو... و فى النوع الراميهو جمل داك .. و الطراحات والركشه و ياعم والطارئ ومقطوع الطاري
بمناسبة المواصلات..بص مستف للاخر فى شارع الخرطوم مدنى انقلب و الموت مايديك درب, الناس بطلعو فى الجثث ايد بى هنا و راس بي هناك, رفعوا ليهم واحد قام نصيح طلع الكمساري, اتنفض وقال ( لا حوله , لخبط لينا الدفع من الما دفع) سلام
|
Post: #49
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-07-2003, 11:55 AM
Parent: #1
بسم الله الرحمن الرحيم
العسل صفرجت
سلام وحب شديد
ياخي إنت راجل مبدع وعندك خيال خصب وهاك مني الزغرودة دي
لووووووووووووووووووووووووووووووووووووول كيتًا كدا لي أهل العوض
وعليك الله حاول وقف بوستك في الموقف عشان ألناس تستمتع بالشفافية وخفة الظل .. لك الود يا صديقي يا صفرجت
|
Post: #50
Title: Re: كيف تملأ بوستك ركّاب ؟؟؟؟
Author: maia
Date: 06-07-2003, 12:07 PM
Parent: #1
استاذنا بدرالدين ابو ربا
ما زلت بسال البوست ده ماشي وين؟ شكله كده بيقول انه ماشي كاب الجداد باللفة
|
Post: #51
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-07-2003, 02:09 PM
Parent: #1
بسم الله الرحمن الرحيم
العزيزة ميا
سلاااااااااااااااام
الليلة البوست دا ما لاقي ليهو ركاب قالوا ناس البورد كلهم مشوا يتحمدوا السلامة لتماضر
|
Post: #52
Title: Re: كيف تملأ بوستك ركّاب ؟؟؟؟
Author: HOPELESS
Date: 06-11-2003, 07:27 AM
Parent: #51
سواق البوست
بدرالدين حلا
سلام
كدي عد ليه الركاب ديل وشوفن كلهم دافعين ولا لا
وما تلخمني بورقه واحده كبر خطك وانشاء الله تكتبن ليه في عشرين رد اقصد صفحه ما مهم الاهم انو يكون خط مقرؤ
يلا باسم الله ابدا
|
Post: #53
Title: Re: كيف تملأ بوستك ركّاب ؟؟؟؟
Author: بدرالدين شنا
Date: 06-11-2003, 08:10 AM
Parent: #1
بسم الله الرحمن الرحيم
الأخ المفتش
سلام وإكرام
ياخي في واحدة وقفت ليها بوست قبل شوية شالت ركابي كلهم واتخارجت وفي طلبة بي كارنيهات أها أسوي شنو؟؟؟
|
Post: #54
Title: Re: كيف تملأ بوستك ركّاب ؟؟؟؟
Author: HOPELESS
Date: 06-11-2003, 08:17 AM
Parent: #53
دي الحجج الخلتنا نطير السواق القبلك
كبر خطع ووضح عدد ركابك ورينا معاك كم
سيبو الكربات الشغالين بيها دي
|
|