ها بت ناوليني الدلوكة دي

Post: #1
Title: ها بت ناوليني الدلوكة دي
Author: بدرالدين شنا
Date: 06-18-2003, 05:30 AM
Parent: #0

بسم الله الرحمن الرحيم

سلام يا أحباب

والله يا أخوانا ما مشتهي شئ في اللحظة دي إلاّ دلوكة ومكرفون عشان أغني .. أيوا أغني إنت قايلني مابعرف أغني ولا شنو؟؟؟ وداير ناس البورد ديل كلهم يكونوا متجمعين في مكان واحد ويرقصوا ويهيصوا
الحكاية دي ممكنة ولا لا؟؟؟؟

الحبيب بكري البوست دا كان ما مشى لي قدام أمسحو عشان الباندوث أنا سمعت قالوا الباندوث خلاس بقى (كرّاد) يعني في قعر البورد

Post: #2
Title: Re: ها بت ناوليني الدلوكة دي
Author: HOPELESS
Date: 06-18-2003, 05:36 AM
Parent: #1

الحبيب /بدرالدين شنا
سلام واحترام

حمي الدلوكه

الباندوووووث الباندووووث
الباندوث رقد في الساحه
الباندث اتهلط براحه

البانودوووث الباندوووث

جب جب جب

تر بعيد اجنا خلي الفسحه تكبر والهيصه تعمر

ارح

Post: #3
Title: Re: ها بت ناوليني الدلوكة دي
Author: بدرالدين شنا
Date: 06-18-2003, 05:58 AM
Parent: #1

بسم الله الرحمن الرحيم

الغالي هوب لس
سلام يا جميل

ياجماعة والله أنا جد عايز افطس في الصحراء القاعد فيها دي
ياخوانا والله لي فترة طويلة جداً ما غنيت إنتو بتبالغو ولا شنو؟؟؟

هوب لس ياخوي قول للبنات يمرقن وزح الشفع ديل من جنب المكرفون

الباندوث البندوث
آي سمح إنت وعسل إنت
الباندوث الباندوث

يلا شيلوا

Post: #4
Title: Re: ها بت ناوليني الدلوكة دي
Author: bushramk
Date: 06-18-2003, 06:23 AM
Parent: #1

أنت براك؟

الباندوث ..الباندوث
أنت عسـل بالكوز
الباندوث الباندوث
حلو يا عصير الموز
آآآآآآآآآآآيا آآآآآآيا
الباندوث الباندوث
أرقد قـفـا بالجوز

هووووى كوز الموية....ماتلف وتدور

Post: #5
Title: Re: ها بت ناوليني الدلوكة دي
Author: HOPELESS
Date: 06-18-2003, 06:28 AM
Parent: #4

الباندوووووث ان شاء الله تكتر
الباندوث شبيه الجندر
الباندوث لونو اخضر
وعريسنا رقيصو اشتر

الباندوووووث الباندووووث

جب جب جب

Post: #6
Title: Re: ها بت ناوليني الدلوكة دي
Author: Tabaldina
Date: 06-18-2003, 06:51 AM
Parent: #1

..
.
يا ربي دى صبحية ولا شنو ؟؟
من الصباح دلوكتكم فى السماء
وكمان معاها جبجبة
والله يا بدر الدين دى خرمة عرس سااااى
لكن دا ما شوق للدلاليك

كدى خلى دلكتك دى فى الفضاية لمن الناس تصحى وتجيك

صباح بلفحة الصحراء

Post: #7
Title: Re: ها بت ناوليني الدلوكة دي
Author: ود الشيخ
Date: 06-18-2003, 07:20 AM
Parent: #1

بدر الدين

هاك طرِق بيها خشمك

كانت لنا أيام لن ننسى ذكراها
في وكرنا المذكور والصمت قد عمّ
تحلو لنا الشهوة والحب والنجوى
لن أنسى نجواك والهمس والبسمة
وحرارة الأنفاس في قبلتي لما
ضمتك يمنايا يا سعد دنيايّ
وغفوتِ في صدري نشوانة في الأحلام

كيف أنسى أيامي يا فتنتي الكبرى
يا محيا إلهامي ونجمة الذكرى
ذكرى لياليكِ في خدر واديكِ
الليل أهواهُ في شعركِ الناعم
والنور والنوار في طرفكِ الساهر
لكن تباعدنا دهراً وما عدنا
للوكر يا سلمى وعادت الأيام
وعادت الأيام

Post: #8
Title: Re: ها بت ناوليني الدلوكة دي
Author: ابو جهينة
Date: 06-18-2003, 07:34 AM
Parent: #7

بدر الدين أخوى : صباحاتك خير :

قول بسم الله يا بدر ، دلوكة شنو ؟ قول جيتار ولا عود ،
دلوكة و مكرفون. ولا إنت عاوز تلبع ليك حاجةو السلام ؟
ممكن تنزل لينا عينة من صوتك يا أبو البدور ؟

Post: #9
Title: Re: ها بت ناوليني الدلوكة دي
Author: Ahlalawad
Date: 06-18-2003, 07:38 AM
Parent: #1

بدر الدين ، في إجازتي قبل القبل الفاتت دييك حضرت عرس ولقيت البنات بيغنن وبالحيل عجبني غناهن ، أها خسوسا الأغنية دي ، وهي مجاراة لأغنية الغزلية الـ انت بتعرفها ديك :

يا بهية
وشباب الزمن جنية
وعرس مااااافي

حال أولادنا حالتن شينة
من الضمنة للكشتينة
وبورتونا بورتن شينة
وعرس ماااافي
يا بهية

أها شيل علي راحتك

Post: #10
Title: Re: ها بت ناوليني الدلوكة دي
Author: بدرالدين شنا
Date: 06-18-2003, 07:40 AM
Parent: #1

بسم الله الرحمن الرحيم

الحبايب
بشرى
هوبلس
تبلدينا
ود الشيخ

سلام مجلبط بالمحبة

يا شباب والله والله جد جد أنا خرمان وعايز أغني اغنيات كتيرة
قائد السطول
فريع البانة
خمرة هواك
يجلي النظر ياصاحي
في الطيف أو في الصحيان زورني

بالإضافة إلى أغاني صغار صغار وأغاني بنات كمان

بس إنت شوفوا لي إمكانية الشئ دا كيف بحصل
أنا خرمان خرمان
ياشباب أنا غنيت في السودان قبل كدا والناس قالوا ما بطال
غنيت هنا في الصحراء دي البدو قالوا لي لاتصيح فينا كما الكلب
أها أسوي شنو؟؟؟
أفطس؟؟؟

Post: #11
Title: Re: ها بت ناوليني الدلوكة دي
Author: بدرالدين شنا
Date: 06-18-2003, 07:52 AM
Parent: #1

بسم الله الرحمن الرحيم

أخ العرب أبا جهينة
الأخوة أهل العوض
سلام وإحترام
Quote:
ممكن تنزل لينا عينة من صوتك يا أبو البدور؟؟؟

أبو جهينة قول كيف أنزلو وليك علي أنزلو

أهل العوض
الأغنية دي أنا حافظها بس إنت جيب لي البنوت
ودا عقابها

عامل قجتو الغجرية
بنطلون قماشتو قوية
وقضية العرس دي قضية
وعرس مافي

Post: #12
Title: Re: ها بت ناوليني الدلوكة دي
Author: قرشـــو
Date: 06-18-2003, 07:57 AM
Parent: #11

بدر الدين شنا

صباح الخير

شنو ياخى الفضائح دى من الصباح

ياخى هسع بنياتنا ديل يقولن علينا ناس متخلفين اكثر مما نحن

تعرف الكثير من اولادنا وبناتنا الجداد تربية خارج الحدود ديل يكونوا ما سمعوا بالدلوكة دى

المحيرنى ليه الواحد بزعل لو قالوا ليه يا دلوكة

ما بحمسوها ويسخنوها وصوتها يبقى فى السماء
يعنى شنو

Post: #13
Title: Re: ها بت ناوليني الدلوكة دي
Author: HOPELESS
Date: 06-18-2003, 08:10 AM
Parent: #12

بدر الدين يا اخوي شايف الناس الكبار ديل الغناء الهابط دااااك مانفع معاهم احسن نرتقي بمستوي الاغنيه شويه ...وعشان نطلع طلعه سمحه نمسك فوق شاعرنا المعجزه .._الأمي -..امسك المايك وهيص

عيون الصيد

عيون الصيد ناعسات عيونى وعيون النيل حاكن عيونى

نسيت قلبي وروحى ونسونى وفقدت الكانوا يآنسونى

ليالى هناى جد عاكسونى وأخاصم النوم كيف درسونى

فقدت صحابي لا تنصحونى خطاب وعتاب كف بارحونى

عيون الصيد الجرحونى سرورى يتم لو يلموحونى

مع الآلام هاجت شجونى وأطبا الكون ما عالجونى

جفوا وبي نفورهم هيجونى متين فى الطيف يصبوا ويجون

غلبنى أسير هيا درجونى على الأطلال ليل عرجونى

هواى شريف لا تحرجونى وعلى الأكفان لا تدرجونى

مقر أملى وفيهم ظنونى يزيدوا دلال وتزيد جنونى

لذيذ تعذيبهم لو ضنونى وصالهم آه راحتى ومنونى

Post: #14
Title: Re: ها بت ناوليني الدلوكة دي
Author: bint algazeira
Date: 06-18-2003, 08:56 AM
Parent: #13

بدر الدين حلا اخوي ازيك
الله يديك العافيه ازلت عني هم الوحده في هذه الجزيره النايئه
طبعا الناس مفتكريني كاتبه بت الجزيره دي علي حقت اهل العوض
لكن هي جزيرة تانيه صغيره ونايئه بتكون سمعت بيها يابدرالدين

لكن دلوكتكم كاربه بس مافي بنات
المشكله اغاني الدلوكه دي اغاني البنات يعني شوفوا ليكم
بنيات يجن يغنن ليكم
لما مشيت الجازه الفاتت دي يعني بعد حقت اهل العوض
سمعت الاغنيه دي

ياماما ماتحومي
قطعتي دكتور شول
برااي بجيب الزول

لكم تحياتي

Post: #15
Title: Re: ها بت ناوليني الدلوكة دي
Author: بدرالدين شنا
Date: 06-18-2003, 10:41 AM
Parent: #1

بسم الله الرحمن الرحيم

عمدتنا قرشو
سلام وإكرام

المحيرنى ليه الواحد بزعل لو قالوا ليه يا دلوكة

زمان كان جاء خبر في حلتنا قالوا في بص إنقلب وفيهو من الحلة فلان
يازول أخوه أجّر عربية وملاها من ناس الحلة ومشوا مكان الحادث ما لقى أخوه وبدأوا يفتشوا في المستشفيات ونقاط البوليس المهم في النهاية فقدوا الأمل وكان في عرس في حلة جنبنا الجماعة وهم راجعيين قالوا يغشوا العرس عشان يأدوا الواجب
أها على دخلتهم لقوا ليك زولن بي فلقتو قاعد في العرس
قام أخوه بي زعل شديد قال ليهو
ياخي نحن ما خلينا مستشفى ولا بوليس ما فتشنا وإنت قاعد بي هنا يا دلوكة؟؟؟
أخوه زعل من النبذة دي زعل شديد ورد عليهو قال
دلوكة أنا يا..........؟؟؟؟

الحبيب هوب لس
سلام

ياخي عيون الصيد دي عايزة ليها عمّة و رِق ما بتجي بالدلوكة

الجزيرة ينق دوتر
سلام وإحترام

رايك شنو في ينق دي؟؟؟

Quote: لكن هي جزيرة تانيه صغيره ونايئه بتكون سمعت بيها يابدرالدين

سمعت بي بتها بس

وبعدين أنا وكتين أدي الدلوكة للبنات البوست أنا فتحه لي شنو؟؟؟
إنت عارفة أنا ما بستمتع إلا أغني بالدلوكة ووسط البنوت كمان وهن يشيلن
حلوة أغنية براااي بجيب الزول

لكن لمن ما لقتو قالت
يما أنا زولي ماجاء
يما أنا زولي ماجاء

Post: #16
Title: Re: ها بت ناوليني الدلوكة دي
Author: maia
Date: 06-18-2003, 12:09 PM
Parent: #1

دلوكة في الحر ده يا بدرالدين الما شين ، لكن ما مشكلة بس اهم حاجة تغني لينا اغاني حقيبة
وبعدين ما تخاف صوتك سمعناه قبل كده يعني بنقدر نسمعه تاني
قصرنا معاك في جهنم المولعة دي
دمت يا استاذ

Post: #17
Title: Re: ها بت ناوليني الدلوكة دي
Author: Elmosley
Date: 06-18-2003, 01:07 PM
Parent: #1

عزيزي بدر الدين المساله بسيطه
اضبح ليك خروف في عمان والطين هناك راقد اعمل بيهو الدلوكه بس رسل لينا اللحمه الحلال

Post: #18
Title: Re: ها بت ناوليني الدلوكة دي
Author: بدرالدين شنا
Date: 06-18-2003, 01:51 PM
Parent: #1

بسم الله الرحمن الرحيم

الغالية ميا
سلام وإكرام

الحقيبة دي تقيلة بتقدري تشيلي
فيها عفش زي النوع البقول ليك

زبرجد لونك ما ضرّ
ولع نار قلبي وإخضرّ
أنا قلبي فدايتك ما ضرّ
لو كان يديدق ياروحي ويضرّ

تسلمي يا ميّا

الموصلي السوداني
سلام وإحترام

أنا سمعت بي ليكم اللحم ولينا العضم .. لكن ليكم اللحم ولي الدلوكة دي أول مرة أسمع بيها
بعدين الخرفان هنا في عمان مستوردة من استراليا والصومال دا ما بغير في النغمة دحين؟؟؟

Post: #20
Title: Re: ها بت ناوليني الدلوكة دي
Author: anwar abu gaidaa
Date: 06-18-2003, 04:01 PM
Parent: #18

الحنين[/]
البدرى
اقدر خرمتك ووجع حلقك ونشاف ريقك
ومهاتاتك؟
لكن نسوى ليك شنو.؟
انت قايل بيت بكرى ده بيت عرس؟
اها اقيف النحدثك؟
والله قايلو بص ود اب حاروق؟
والله عرس فى جنس حلالكم
الذين لا يكترثون ولا يعملون اى حساب للمغنى ؟
اذ يوجد فنان حيره على طول؟
ولعمرى يحصل هذا واكاد اجزم
من ابوفوته غربا وحتى ابوعشر شرقا؟
ومن النخيره الى شواطئى المناقل؟؟
ما تقول لى المناقل ما فبها شاطئى؟؟
فيها؟؟
انا شفته؟؟
وكان معانا ناس من الخرتوم؟ وبعدين منتظرين البص على احدى دورانات كنار رئيسى؟canal?
بعدين فى واحد قال ادونى الكاميرا عشان اصور جنب الشاطئى؟؟
بالله عليك نعمل ليهو شنو؟
غنى يا زول بالدلوكه بالجردل
بس رجاء ما تمشى جنب الرتينه وتعمل لينا عمايلك ديك؟؟
الرتينه ذات قاعده مقعره؟؟ حلوه؟؟ ممكن تعمل من وشك حاجات عجيبه؟؟
بعدين جلد الخروف الصومالى مش بغير النغم وبس؟؟
ده احتمال انفجر فيك
واحتمال اطلع من القاعده؟؟
اما الاسترالى ده انا شخصيا ما بحبذه لانه مع التحالف
وممكن ينفر ليك ناس اللمه
ليك الود
اسعدتنى شخصيا بهذه الاستراحه
وليكم الود يا حلويين جميعا
انور

يوم العركه الفى الحراره
بتشبع الصقار مراره

Post: #26
Title: Re: ها بت ناوليني الدلوكة دي
Author: Elmosley
Date: 06-19-2003, 01:59 AM
Parent: #18

كلو خماسي ياشيخنا كدي اول اضبح الخروف

Post: #19
Title: Re: ها بت ناوليني الدلوكة دي
Author: ABUHUSSEIN
Date: 06-18-2003, 03:47 PM
Parent: #1

الأخ بـدر الما شـيـن ســــــلام

و الله حالتك تحـنـن لكن !!!! لحـصـل ليك شنو ما كنت كويس

و الله خايفك تكون داير ليك ظـــار عـديـل كــدا

أسـمـع عـنـدي لـيـك فــكــرة

قـدم دعـــوة لـي الفـنـان قـــدورة خـلـي إجـي إربـهـا ليك

و الله كـان عـنـدي دلـوكــة كان رسلتها ليك بالـDHLـ إنشاءالله

حـلـوة ليكم اللحم و لينا الجـلـد و هـو الموصـلـي دا ليهو كم يوم

شايفوا بتذكـر في العـضـة ما لو ســعـران و لا شـنـو ؟؟؟

Post: #21
Title: Re: ها بت ناوليني الدلوكة دي
Author: garjah
Date: 06-18-2003, 04:55 PM
Parent: #19

البدري اخوي

دلوكتك من النواعم جابت جزيرة دوووتر بس

لكن بنات البورد لو عايز تلمهن

غني ليهن

ههههههه

طرزان جرى

يلا ارح

Post: #22
Title: Re: ها بت ناوليني الدلوكة دي
Author: Yassir7anna
Date: 06-18-2003, 05:17 PM
Parent: #1

بدر سامي علاه

زي ماقال العزيز قرشو دلوكة شنو العليك انت عايز البنات ديل يقولوا علينا شنو؟

اها انا جبت ليك فرقة كاملة من مركز شباب السجانة، تصدق قاعد راجيهم من الصباح قالوا كان عندهم صبحية في حبرة

لكن شرطا تغني لينا اول شي خمرة هواك يا مي صافية وجلية

Post: #23
Title: Re: ها بت ناوليني الدلوكة دي
Author: saifkeli
Date: 06-18-2003, 06:00 PM
Parent: #22

أخوي البدري .. سلام مردم

أول شيء ك

Post: #24
Title: Re: ها بت ناوليني الدلوكة دي
Author: saifkeli
Date: 06-18-2003, 06:01 PM
Parent: #22

أخوي البدري .. سلام مردم

أول شيء كلنا خرمانين لدلوكة .. وعليك الله أهبكها هبِك نضيف لامن تقوم فينا الشعرة
طبعاً في جماعة لامن تقوم فيهم الشعرة بفتشوا على العنجاوي ويركزوا لى البطان
والداير يحضر من ناس البورد ديل يخت المسعلة في بالو

ونصيحتي ليك وهي توصية من أشهر من يصنع الدلوكة في منطقتنا
فأوجود الدلاليك صوتا وأحسنها نغماً هي التي تصنع من جلد (جرقاس) .. يكرم السامعين
وأخاف حبيبنا الموصلي يزعل مننا .. لأنه اللحم بتاع الشي دة ما في زول بقربو

لكن لو جوّدت الصنعة دي .. البدو المعاك ديل بعزروك وأخاف يزاحموك
ويمكن تفتح ليك باب رزق .. كان صناعة دلاليك .. كان ألبوم غنائي

ولما تختم بأغنية السيرة والدارة يقوم غبارها (عجها .. على رأي البدو) خلي أهل العوض ينظم الناس
أصلو البسويهو الطرب مو هين

تحياتي .. ومحبتي
سيف كلي

Post: #25
Title: Re: ها بت ناوليني الدلوكة دي
Author: ابو مهند
Date: 06-18-2003, 06:25 PM
Parent: #1

سلام متلت
والله يا بداره بجد مشتاقين وزي ماقالك الاستاذ الموصلي سوي ليك دلوكه وانا بجيك وبجيب معاي صاحبي عشان يرقص رقصة سجمي القرد
بس قول عوووووك

Post: #27
Title: Re: ها بت ناوليني الدلوكة دي
Author: مبيوع
Date: 06-19-2003, 06:57 AM
Parent: #1

يا بدر الدين
امسك الدلوكه
وانا بمسك الشتم
واحرسك من البهم
بس ما تغنى غنا وهم

Post: #28
Title: Re: ها بت ناوليني الدلوكة دي
Author: بدرالدين شنا
Date: 06-19-2003, 07:22 AM
Parent: #1

بسم الله الرحمن الرحيم

ود بتول الغناي
سلام وريد شديد

طبعاً إنت أكتر زول بتكون حاسي بي خرمتي دي

ما تقول لى المناقل ما فبها شاطئى؟؟

وفيها منتجع صيفي إسمو (شرم الشيخ أهل العوض) كمان وفيها بيتزا هت كان ما عجبك

حبيبي الموصلي
سلام
أنا حا احكي ليك قصة
عندنا جماعة هنا النوع الهلكتم الغربة وعانو منها كثيراً
أها يوم مشوا يزوروا واحد في المستشفى ولمن خلاص دايرين يوقفوا العربية في (الباركنق) صاحبو قال ليهو ياخي ما شايف العلامة دي ؟ دي خاصة بالمعوقين فقط .. فرد عليه قائلاً
هو عليك الله في معوقين أكتر مننا نحنا الجايين نتحاوم في البلد دي

فأنت يا صديقي دايرني أضبح ؟؟؟
دحين في ضبح أكتر من الشلهتة دي؟؟؟

الغالي أبو حسين
سلام وكمية اشواق

أنا قالولك نطا علي حرامي عشان أنادي قدورة ولا عشا البايتات؟؟؟

الظريف قرجة
سلام وإعجاب

ياخوي طرزان دي بتقوم علي الهوب لس

المحبوب ياسر حنا
سلام يا حبيب

أنا لمن قلت أغني بالدلوكة عشان قصة حق العازفين دي
وبعدين كان داير تجيبهم جبيهم متعشيين لو سمحت

الحبيب سيف كلي
سلام يا جميل
Quote: وعليك الله أهبكها هبِك نضيف لامن تقوم فينا الشعرة
طبعاً في جماعة لامن تقوم فيهم الشعرة بفتشوا على العنجاوي ويركزوا

[blod]
ياخوي إنت الكلام دا كاتبو كداري ولا شنو؟؟؟
أشرح عشان النواعم زي ما قال قرجة

الصديق أبو مهند
سلام وشوق

أذا كان بتشوف كلام الموصلي صاح بدل ما تجيب صاحبك جيب الخروف
قال سجمي القرد قال

الغالي مبيوع
سلام وعاطر تحايا

هي الدلوكة دي أنا داير أدقها ولا أحلبها ماسك لي الشتم ؟؟؟
دحين الشتم دا مو جنا الدلوكة الصغير؟؟؟

Post: #29
Title: Re: ها بت ناوليني الدلوكة دي
Author: مبيوع
Date: 06-19-2003, 07:47 AM
Parent: #1

اتخيلتك فى الخلا داك
شايل الدلوكه وحايم
زى الكابوى المويتو كملت
انت يا اخوى صحى داير تغنى والا تشحد؟
انا غايتو شايف الشتم اخف
غشان كان جابت ليها جرى
تخارج روحك