سنة الف وتسعمائة وبيارة

بسم الله الرحمن الرحيم

يا شباب ما بلقى لي زول عندو تاريخ ميلاد زايد يديني ليهو؟؟؟

أنا الوحيد بعد أباؤنا الأولون الماعندو تاريخ ميلاد معروف والقصة دي مأرقاني شديد وبحثت فيها كتير مع الأهل وما لقيت ليها حل
سألت أمي
يما أنا مولود متين؟؟؟
قالت لي : إن خبرني بيك
يما لكن الكلام دا كيف؟؟؟
كدي عليك الله زح من قدامي خلي القهوة دي التنفعني
بس أبيت يما
هي يا خواتني ما تشوفوا لي حل من الشبكة دي .. غايتو ياولدي الزمن داك لا في قراية ولا كتابة علا البعرفو وكت حسين ود فاطنة دا كان بحبأ وبلولة ود النخيل كان بتعلم في المشي بالعنقريب أنا كنت شايلاك في بطني دي
لا خلاس تب عرفت .. بالله عليكم فيكم زول فهم حاجة
قلت أنا النسعل أبوي
يابا أنا مولود متين؟؟؟
يازول صنقع ودنقر وقال لي إت؟؟؟
آااااااااااااااي
إت مولود من زمااااااااااااان
لا يعني متين؟؟؟
قام سعل صاحبو القاعد معاهو
إت العوض دحين بتظكر ولادة الجنا دا؟؟؟
العوض بالحيل دحين السنة الجانا فيها (سيدي) ود المهدي مرتك كانت والدة بي العيفة دا ولا الخلاقة المات؟؟؟
يعني رجع السؤال لي ابوي تاني
أها أبو قال لي: هوي خلك من الشغلة الفارغة دي أمش جيب ليك قصبات للحمار دا
رجعت لي أمي تاني وأنا ببكي قامت قالت لي
أسمع خالتك بتجي من المحيريبا يوم السوق وبنسعلها
يازول بقيت أحسب في الأيام لمن جات وسعلناها قالت
إتي دحين يا عشة النسوان وكت جن يعزنك في موت صلاح ود رقية أختي ماك نفسا بي العيفة دا
ودا خيط أخر إنقطع .. أها باقي لي فرصة واحدة وهي خالي وهذا أعول عليه كتثراً لأنو خالي دا النوع البقرا الجريدة يعني ممكن يحلها أها سعلتو قال لي
والله أعتقد سنة سنة سنة أيوة سنة يكون ياربي قبل البيارة ولا بعدها أعتقد قبل البيارة
هسع يا أخوانا يعني أنا اقول مولود سنة الف وتسعمائة وبيارة ولا كيف؟؟؟

عشان كدا يا شباب أنا عايز الأخ بكري يجمع كبارات البورد الأبوات زي أبو جهينة وأبو الكنفد وأبو جلنبو وكل من يتأبب في هذا البورد والأعمام زي عمك تنقو وعمك حسبو ويختاروا لي تاريخ ميلاد عشان تاني تجي (إنسانة) الرقيقة وتقول لي كل سنة وإنت طيب يا بدرالدين شنا والناس كلها تعرف ويباركو لي
ولا أغيب لي كم يوم أجرجر فيهن لساني لمن يبقى قدر لسان الزول زاتووو وأقول لي .. الليلة عيد ميلادي شناتووو ياناس

عاطر التحايا

لوووووووووووول
والله آآآودحلا حسستني معاك علا المسعله محللول طب

كدي افتح خشمك النشوف ضروسك@لووووووووووووول

البدرى صباحاتك مشرقه يا ود امى الحنين
صباحك بنكهة لقيمات حاجة زينب
لووووووووووووووووووووووووووووول البديرى


البدرى انت ليه ما سعلت عمتك ؟ اكان كانت نايمه بتعرف الخبر وهو طااااااائر وبتديك نهره
وبتوريك متين تمشى الجنيد ومتين تسأل من عمرك
انت عارف انا فى راى انك مولود قبال مصنع سكر الجنيد
لانه لو قلنا قبل سكة حديد السودان بتكون اتلاشيت لى هسه
لكن حسب معرفتى القريبه بيك ..انت يا دوبك ابو كركوب .. يعنى المصنع وتاريخ البيارة ديل مناسبات معاك جدا
بالنسبه لى عيد الميلاد .انت لما يجو يحتفلوا بيك يجمعوا كم قصبة سكر كده .. وبعد ما تجمع خلاصة العصير .ويبقى القصب الجاف .. نولع النار فى طرفو ونعملو شموووووع
ونجيب لينا حبة لقيمات وشاى للمه والضيوف
وكل سنه وانت سمح يا سمااااحتوو

بسم الله الرحمن الرحيم

العزيز هوب لس
سلام وإحترام
هو كان في ضروس قاعدات لي هسع أنا بسعلك من تاريخ ميلادي؟؟؟

الغالية سوما
سلام وإكرام
يجازيك ربك آبنية أنا ابو كركوب؟؟؟

Quote: انت لما يجو يحتفلوا بيك يجمعوا كم قصبة سكر كده

إن خبرني بيهن؟؟؟
طيب 26 قصبة زايد 11 وهناك 9 قصبات أقول ليك خليها (كليقة) كدا
غايتو كان عرفتي كليقة دي معناها شنو بخليك تاكلي معاي

بدرالدين شنا
داكى الليله حبوتى قالت ودشنا مولود سنه التساب المات الفيها الكجم
يعنى قبل البياره بىكم شهر
وتاكيد لى كلام حبوبه ودمحاح قال شاف ابوك شيالك لما جو الخواجات لى حفر البياره
ودعقاب

لوووووووووول يا بدرى

انا بت البندر
ولدونى فى مستشفى
عشان كدا ادونى الاسم بتاعى
شهادتى بقدرة قادر
اتمسحت
وتانى ضاعت
وكتبن اتخرجنا داك الانتفاضة19
ومشينا لجنة الاختيار
طلعت الداهية
اهم من شهادة المعهد
قمنا انا واخوك دراج مشينا
الاحصاء
وكتبت للراجل
تأريخ الميلاد بالضبط
صنقع و غمض قال عللى اجيب
رقم الفايل
قالو تعالو بعد كم
يوم وكان انى غير مقيدة فى سجل المواليد
و بقى عيد ميلادى يوم واحد واحد كدى قدرة قدرة مع الاستقلال
فانت يا اخوى انجر ليك عيد ميلاد
وصدقو بعداك نجى نقول كل سنة
وشنونى بخير
طبعا لو قلنا الشمعة المية(القصبة المية).
انت حتزعل وتخاف لانك قربتا
ليها حنقول عقبال 1000 شمعة
اوعى تجى تقول انا وانت دفعة
لانى بت بنادر
انت دخلوك
بعد رعيت كل غنم الفريق وماخليت ليك
شجرة ما قرعتها
و طلعتها
ولا طيرة ما شركتا ليها
لما بقى عمرك 12 دخلتا المدرسة
وكل سنة وانت طيب

البدري
إنت مولود يوم واحد واحد
السنة مالنا بيها إن شاالله تكون سنة تمانين
ما عندنا شغلة بيها

بسم الله الرحمن الرحيم

الحبيب ود عقاب
سلام عليك وعلى حبوبتك وعلى ود محاح

ودمحاح ما البركة الما قال ليكم شافني مرقت التراب بتاع البيارة ولا شافني أترجم كلام الخواجة لي ناس الحلة

لكن يا ود عقاب (محاحكم) دا طاعم خلاص
حبي وتقديري

بسم الله الرحمن الرحيم

الدفعة بيان
سلام وإحترام

أنا فكرت أعمل زيك وأطلع شهادة تسنين لكن خفت الشناه تأثر في قرار الطبيب
فخلينا ننتظر نتائج إجتماع كبارات البورد وربما طلعنا لينا بي كم وتلاتين سنة حامدين شاكرين


أهل العوض
سلام وتوقير لمن رأى الشمس قبلي

أنا عايز مسألة التاريخ دي تتحسم قبل ما يظهر الملا عمر ويحملني ما لا طاقة لي به من سنين
بعدين قصة يوم واحد واحد دي بتلمني مع الدكتور بيان ما شايفة تتبرأ مني كيف

الاخ بدرالدين شنا

تسمح لى أقول ليك

حلاتو شناتو

الأخ الشهم بدر الدين : تحياتي العطرة

بعد إن إستمعنا لشكوتكم الميلادية ، إتصلنا بالأخ الدكتور محمد أبو سليم ( مدير دار الوثائق المركزية سابقا ) أعطيناه كل معلومات الجارات و الخالات السالفة الذكر ، و أدخلوا المعلومات في الكمبيوتر المركزي فلم يعطهم أي نتيجة ، لذا حسع هم طالبنك تديهم بالفاكس أو الإيميل المعلومات الآتية عشان يدخلوها الكمبيوتر:
لون البشرة عند الولادة و الآن
عدد الأسنان المتبقية ( الأضراس و النواجذ و القواطع )
عدد الكرمشات في الجبين ( إن وجدت )
سي دي عليهو تسجيل بي صوتك في الصباح و صوتك في الليل قبل النوم و صوتك لما تنادي على الوليدات و صوتك لما تكح.
تاريخ خلع ضرس العقل
شريط فيديو مسجل عليهو مشيتك و إنت ماشي و إنت جاي و إنت بتجري .

هذه أشياء مهمة لمعرفة تاريخ ميلادك بالظبط ، و بعدها إن شاء الله سوف أقوم شخصيا بفتح بوست لعيد الميلاد و بوست آخر لتهنئتكم بعيد الجلوس ثم الحبو ثم المشي.

بدر أخوي ، زمان لما الطلبة السودانيين كانوا بيمشوا روسيا بأعداد كبيرة ، موظف الجوازاتفي موسكو سألهم : غريبة ليه كل السودانيين مولودين يوم واحد يناير ؟

تسلم ، و على كل حال : سنة حلوة يا جميل.

الحبيب بدر الدين

صباح الامل والفأل الجميل

كما قال الحبيب اهل العوض فان ناس الجوازات فى السودان حلوا المسألة وكتبوا تاريخ الميلاد لكل سودانى يوم واحد شهر واحد وخلاص انتهى بالله كل واحد يفتح جواز سفره يشوف الميلاد ولكن الاظرف انه ناس الجوازات بخبرتهم اصبحوا دكاترة يعنى ممكن يكتبوا ليك تاريخ الميلاد حسب رؤيتهم وليس حسب الشهادة التى يشككون فيها فقد اتفق اطباء الاسنان / التسنين ورجال الجوازات وحلت المشكلة ..

اعجبنى قول الوالد يا ولد امشى جيب ليك قصبات للحمار المسكين ده
اعجبنى لانها جميلة ورقيقة عند اهل الشام وتذكرنى باستاذنا حنا قاقيش الاردنى والذى عزمنا يوما على مطعم كان يرتاده الملك الراحل الملك حسين قائلا ان هنالك فولات ما احلاها. .. وهكذا يعمل جمع التكسير عند الشوام فتجده رائعا ويخرج لسانه لابى الاسود الدؤلى بان جمع التكسير هنا اروع من القاعدة فتأمل بالله
التينات .. جمع تين
الفولات ... جمع فول
الحليبات ... جمع حليب

وهكذا فى كل مناحى الحياة..

اما حكاية البيارة فهى تدل على انك حديث عهد بالدنيا سيدى لانه سابقا كان هنالك الدونكى ولم تكن البيارة حينها الم تسمع اغنية البنات الحليوووونة والتى تقول :

يا راقصين التويا
كلموا لى ابويا
خلى النزور الدونكى
ونجيب لى منه مويه

اذن اشهد لك يا عزيزى بانك غر ما زلت وانك ما شفت اى حاجة فى الدنيا الزايلة دى وخليك من كلام المحبطين ديل فانت صغير وجاهل وحلاااااااااتك


لك تحياتى

بسم الله الرحمن الرحيم

المحترم دورنقاس
سلام يا جميل
يحلن ايامك ويعلى مقامك يا ظريف

المحبوب أبو جهينة
سلام وإعجاب
أمتعتني هذه المداخلة خفيفة الظل ووقفت عاجزاً في الرد عليها لك الود حبيبي الساخر حد الإشراق

لكن برضو شوف لي تحت تحت لو في زول بعملها بالقروش
قال عدد الكرمشات قالً

عمدتنا الغالي قرشو
سلام وإحترام
طبعاً أنا عندي قناعة تامة بي إنو أكتر زول مداخلاتو مفيدة وقيمة ولا تخرج من صلب الموضوع هو الجميل قرشو
ثانياً أشكرك جزيل الشكر على التصغير وإحباط محاولات المرجفين
وإن شاء الله ما أشوفك مزنوق وربنا يخلي ليك تاريخ ميلادك .. هو سنة كم قلت لي؟؟؟
خلاص خليتك ما تغمز لي
إطرشني أكان سمعت بي أغنيتك دي

الاخ بدرالدين
شفت ما عليك الا تحسب الايام الحلوة القضيتها في حياتك مما وعيت على الدنيا ، واذا لقيت العدد شوية اضربه في 2 او عشرة لاعطاء مزيد من التفاؤل ، واختار اي يوم بتتفائل بيهو في الشهر وخليه يبقى تاريخ ميلادك كل سنة
ومن حسه كل سنة وانت طيب يا بدرالدين واسرتك بالف خير

ود البدري
لووووووووووووول عليك

قالوا واحد اهل عوض مشى الدكتور سألوا
عمرك كم سنة؟؟
قال لي والله ما عارف لاكن طووووووولت

دي نكتة من زمن حفروا البحر
ما بتكون حفرت البحر ده معاهم؟؟

بسم الله الرحمن الرحيم

بتنا ميا كيف حالك؟؟؟
والله إذا كان القياس بي الأيام الحلوة أنا صغنووووني وحليوووووني وما شاء الله علي
يديك العافية إنتي وأسرتك ومن تحبين

بت قضيم سلام
لووووووووووووول عليكي إنتي دي
إنتي قايلاني ما بعرف أسدّا
إنتي سمعت بي الرباطاب الراكبين في القطر وكان واحد راكب جنبهم ونائم من أبو حمد ما صحى إلا في الجيلي
واحد سأل التاني دا هسع الصحاهو شنو؟؟؟
التاني رد ليهو قال
عشان دخل الشبكة
يعافيك ربي يا بت جضيم

أهااااااهاهاهاهاهاهاها
بدر الدين لو سمحت لتترك المساخات لأهلها
بتتعوق
بس ملعوبة والله

أخي الكريم بدر الدين شنا
والله يا بدر الدين بالغت عديل يا أخي معقول بس ، يعني تاريخ ميلادك يكون مؤرخاً بالظواهر الطبيعية فيضان ستة وأربعين أو زلزال وهران أو مجاعة سنة ستة أو الحرب العالمية الثانية أو الثورة المهدية أو معركة أم دبيكرات يا أخي إنت مالك ومال هبي بيرس دي تو يو وأنت المفروض تكون يو وبرضو كيو أند إس يا بدر الدين يعني لو ختينا ليك عدد الشموع الحقيقة بعدد سنوات ميلادك نكون عاوزين كتاحة أو ريح صرصر عاتيه ولو كان لازم تتحنكش بعد كل هذا العمر المديد وتعمل عيد ميلاد ولازم يكون البارتي بتاع البريس دي في العاصمة بدلاً عن القرى فمطلوب عدد إثنين عربة إطفاء وطائرة عمودية للإسناد ، ولازم يا البدري تكون الحفلة تنكرية يعني عشان لا نفرز الشين لا السمح وأى واحد يجي مقنع وفي بعض الناس في حل عن لبس القناع لأنهم مقنعين خلقه.
وأنت أضرب أخماس في أسداس وأرفع الناتج درجات وده يكون عمرك الحقيقي. وخلاص كبرت وليك تسعتاشر سنة بس أكيد التسعة عشر عاماً هذه إغتراب يا فرده

بدر الدين الماشين

طيب داير شنو تاني ؟ انشاءالله تكون مولود سنة 90 ذاتو حد عنده حاجة عندك ؟
تسلم يا سيدى وكل سنة وانتم طيبين

بسم الله الرحمن الرحيم

بت قضيم يا لذيذة
يعني هسع تقول يا لذيذة المسالة تمشي عادي تقول يا حليوة يحمروا ليك وينزلوا فيك بوستات ويحلك الله
لو سمحتي ما تخليني مع الملا عمر دا براي اقيفي معاي الزول دا لسانو سليط وأنا مابقدر عليهو براي وكان أهل العوض قريب صيحي ليهو

أووووووووووووو الملا عمر
سلام وإحترام وشرفتنا

أنا قبيل قلت ليهم أسرعوا قبل ما يجي الملا ويشيل حالي هسع أنا اسوي شنو؟؟؟

Quote: يعني تاريخ ميلادك يكون مؤرخاً بالظواهر الطبيعية فيضان ستة وأربعين أو زلزال وهران أو مجاعة سنة ستة أو الحرب العالمية الثانية أو الثورة المهدية أو معركة أم دبيكرات

لا.. وإنت يعني شهادة ميلادك مطبوعة بالكمبيوتر ولا مرسلة بالفاكس ما برضها تلقاها عليها ختم السلطان عبدالحميد
بالمناسبة عندنا واحد في حلتنا النوع الما بتعرفو مولود متين داك كبيييييييييير لكن لسة شباب إسمو (القوي) (القاف مكسورة) الجماعة سألوا أبوهو قالوا ليهو إنت القوي دا عمرو كم؟؟؟ قال ليهم
والله ما بعرفو ترا من يوم قمت لقيتوا في حالتو دي

الغالية ميا
سلام وتاني إحترام
وطيبة إنتي يا راقية

أخي العزيز أبو ربى
الحمد لله وكفى
لعلمك أخي بدر الدين أنا من مواليد الراهبات بأمدرمان هل سمعت بهذه الدايه ، فقد كان أبو الملا أمد الله في أيامه يعمل خلال تاريخه الحافل بالعمل من أجل حفنة جنيهات لإطعامنا وكسوتنا وتعلمينا وتطبيبنا لدى ماما أمريكا بالسفارة الأمريكية في الخرطوم أى أنه كان إف بي آى وإن لبس عراقي وسروال طويل بعد العصر أيام أن كان في الخرطوم سفارات ووزارات وقطارات وقبل الهجمة الشرسة للدفارات والركشات وهلم ، فلم تنتبذ أم الملا متعها الله بالصحة والعافية مكاناً قصياً ولم يأتها المخاض في جزع سيالة أو شجرة طلح أو شقلة من أشجار الطندب بل أتها في الراهبات بأمدرمان وبحجز رسمي ومقدماً لذلك كان من الضرورة أن تكون ولادتي وقدومي للدنيا مؤرخة ومثقة توثقياً دقيقا ليس فيه أى لف أو دوران فشهادتي شهادة ميلاد ليس للسلطان عبد الحميد أو أمنحتب أى توقيع أو بصمة فيها وهي بالضرورة لم تؤرخ بعام الفيل أو سنة الجراد أو أيام الدميرة بل بالتاريخ والساعة وهل كانت ولادتي نهاراً أم ليلاً ، وهل تناولت السيرلاك وإس توني سيكس أم لا؟ وهل جربت البامبرز أم كنت تيوبليس في طفولتي شأني شأن أى عتوت في أى زريبة في أى ناحية من أى قرية وهل تم تصويري بالفيديو أم تصويراً فتوغرافياً وهل كان التصوير أبيض وأسود أم بالألوان ، وهل أقيم لي عيد ميلاد في العام الأول أم تأبين ولي عودة أخي بدر الدين.

بدر سامي علاه

انت هسع الفضائح لزومه شنو؟

قول عرفت...اها!!!؟

تبقى عليك كبر وشيب وشنا

خليها مستورة أحسن

أهل العوض

يا زول سنة تمانين شنو

غايتو كان الزول قاصد البيارة القدامية الفي حلتنا ديك
في ( جضيبة ) سوداء ملصقة على زنك البيارة مكتوب عليها باللون الأبيض حفرت سنة خمسة وخمسين
بس لا في يوم ولا شهر .. ولا يا ربي يكون قاصد بيارةً تانية

رحمابي

الحبيب بدر الدين السمح
كل سنة وانت طيب
مقدما لانو انا قربت للاجابة
فى زول ما سألتو
وهو حسين ود فاطنة ... اكان سألتو عن ميلادو كنت عرفت ميلادك
طوالى

بعدين عندنا واحد سأل امه نفس السؤال
قالت ليهو وكت ولدوك ورق مافى شهادتك
كتبوها فى الحيطة

وواحد برضو قال ولدوهو سنة الهبوب الحمراء ...
ولا زمن الكيلة بقت باربعين ما عارف

و الكليقة القلتها للاستاذة سوما
انا عرفتها .... دى الحزمة بتاعة القصب
يلا خلينى اجيك بالتورتة

ولا يهمك يا بدوري نعمل ليك عيد ميلاد بياري بعد سنة فيضان البحر
وكل عينة وانت بخير

سلامات
بدر التمام
كيفك ابوي شن جقلب بيك آآآجنا
والله سنك سن الفرهيد اازول انت القدرك منو والزييك منو ياقمر دوريين
لكن بيني وبينك كدا حتة تاريخ الميلاد دي خليها عشان ماتعوقك
بتهابش في المدفن مااالك بس وريني
اديك كلام
انت عسل وعسل العسل وعمرك عسل
ازيدك والاشبعتا
اسمعني بيارة شنو
بيارة دي اخت يبار روفائيل والاكيف
ايوة انت مولود في الفصل الاول من هاري بوتر 1
تتخيل وهسي هاري بوتر بقا 5 ومعاه العنقاء شفتا العنقاء دي انت قداما ان بي سنة والا عشرة سنتين
تسلم ياسغير
كل سنة وانت حالك خريف وطبعك شفيف
وكل سنة ونحن في الوطن

بسم الله الرحمن الرحيم

ود الراهبات الحبى في البلاط الملا عمر سلام

ولي عودة أخي بدر الدين

عودة لي شنو تاني؟؟ ما خلاص جننتني جن كفاية


الحبيب ياسر حنا
سلام وإكرام

شوف أنا ممكن أسامح في البامبرز أسامح في السيرلاك لكن ما بسامح في تاريخ الميلاد

ود أختي الرحمابي
سلام
إنت هسع في زول سعلك من تاريخ البيارة؟؟؟

الغالي الفاتح
سلام يا جميل

يعني خلاص حسين ود فاطنة ياهو العارف تاريخ ميلادو؟؟؟
مرحب بالتورتة

الظريفة عشة بت فاطنة
سلام
أنا مطرة بتأرخي لي بالعينة؟؟؟
تسلمي يا بت أمي


حبيبي ود رملية
سلامات

بيارة دي اخت يبار روفائيل والاكيف
حلوة جد
أشكرك كثيراً على الدعابات الشفيفة والحروف الكثيفة