الداير يباكيني يجيب عامودو هنا

بسم الله الرحمن الرحيم

ياخوانا ما هي دواعي البكاء؟؟؟
وهل للبكاء مقاييس معينة؟؟؟

أنا بكيت تلاتة مرات ومافي زول عبرني وسخروا مني
يعني أكون بكيت في (الرونق تايم) زي ما بقولوا الخواجات ولا شنو؟؟؟

البكية الأولى
في واحد بنقلاديشي كان شغال بسلّك في (السبتك تانك) في بيت واحد سوداني في عمان فلسوء حظه حدث خطأ المهم الراجل الرملة دفنتو بالكامل ما فضل فيهو في الخارج إلا إحدى يديه والتي يزينها خاتم في أصبعو به فاروصة زرقاء
المهم الناس تجمعت حول الحادث وكان ضمن الحضور أخوات مصريات فأنا الموقف دا هزاني وبديت أبكي
واحدة من المصريات سألت
هو يأربلو حاقة؟؟؟
والإجابة كانت لا
طب ليه يعيط؟؟؟

البكية التانية
كانت أمي تحكي لأحدى جاراتها قالت ليها والله يا فاطنة نحن أولادنا ديل حنينين خلاس يعني البدري ولدي دا لمن مرتو ولدت بي بتها الأولى دي بكى جنس بكا وقبل ما تتم الجملة المرة نطت تقول قارصها دبيب وقالت لي أمي
عواليق وبس هسع الببكيهو شنو؟؟؟

البكية التالتة
في الإجازة الفاتت دي قبل شهرين حضرت لي حفلة وقام الفنان غنى أغنية (ياطير ياماشي لي أهلنا) بتاعة صالح الضي الله يرحمو ويغفر له وأنا بي صراحة الأغنية دي لو غناها حمار برضو أنا ببكي المهم قعدت في نص الحفلة وجعرت جعير شديد زي الزول الما حضر الموت وجاء متأخر النوع البخت عمتو في وشو ويكب الجعري داك
أها الحفلة كلها إستغربت وقالوا
هسع دا ببكي مالوا كان مو مجنون؟؟؟

يعني بكيت في السودان سخروا مني
بكيت في عمان سخروا مني
هسع داير أبكي في البورد دا والداير يباكيني يجيب عامود بكاهو ويجي هنا

تعرف يا بدر الدين
انا من الليلة بسميك بدر الحنيين
عشان كدا قاعدين نقول انو الثقافة الذكورية بتصادر انسانية الجنسين
البكاء احتياج انساني
والمابتعاطف مع زول ببكي دا زول الله يعينو على نفسه
البكية التالثة دي مشتركين معاك فيها انا وابومهيار
الاغنية دا انا هسي لو سمعتها ببكي ومتأكدة انو ابومهيار لو سمعها برضو حيجعر
ياحليلو الله يوفقو ويردو بالسلامة
بالمناسبة انا من امس رايحة لي بكية
خلاص بس ياني القاعدة اعزي ليك في بوستك دا للصباح

البدري الحلا
ياخوي البكاء بقي بدون عامود
يعني ماعندي عامود لكن جيت اباكيك وابكي معاك
الزمن دا البكاء بقي صعب الظاهر الناس قلوبها بقت قاسيه
لكن يااخوي كان نزلتا لينا اغنية ياطير ياماشي لاهلنا هنا في البوست دا ياانا الباكيناك وفرشنا معاك كمان

بدر الدين أخوى : صباحاتك عامرة بالفرح ،

أولا البركة فيكم في البنقلاديشي. و أظن أن الدموع مهمة يا أخي ، مهمة جدا. نفسيا و صحيا. يعني لا تقل أهمية عن الضحك و بقية المشاعر. و حبس الدموع و مغالبتها أمر له خطورته. فأطلق لدمعك العنان ، مع دعواتي لك بإبتسامات عريضة دائما.
أها جيتك بي عامودي العامر و جيتك.
واحد من جماعتنا مسطول قال لي واحد كدة بيبكي في المقابر : إنت الزول دة قريبك.
قال : لا
فقال ليهو : طيب فاقد سوائل مالك ؟

اللاخ بدر الدين حلا
سلام واحترام

هسع الببكيك شنو؟؟؟؟؟؟؟؟؟؟؟؟؟؟؟؟؟
دا بورد بكاء؟!!؟





.

غايتو يا البدري .. بس الجعيرة الـ بمناسبة وضوع الزوجة دي أنا ما راكبة لي في راسي تب. هو الزول مفروض يبكي وللا يضحك؟ أين الخبراء؟

اخى بدرالدين شنا


ياخــــوى المسعلة ما مسعلة عمود
اظن المهم عندك الكشف..... عليك الله تقسم لى معاك

حلاتو شناتو

بدر الدين الحبيب السمح


ابكى ابكى فضفض
عشان مرات الواحد
محتاج يخرج كمية املاح
زائدة
كدى زح لى معاك فرقة

النسعلك
انت قاعد فى راكوبة
ولا صالون ؟
عشان كلما الصالون
يكون كبير ... كلما
زاد الجعير


فضفض

بدرالدين


تلاتة بس
تلاتة الساهلات دي

اها ايه رايك

نحنا عمرنا كلو شايلنو بكاء

ودي من اعظمالامور الخصانا بيها ربنا سبحانه وتعالي كسودانيين ..بنحس بي الآم غيرنا وبنعبر بي انسانيتنا
ونعبر بي انسانا الجوانا

وما اصدق دموعنا وحوجتنا ليها في ساعات الشدة




اديك سامبل شان تعرف حاجه ؟؟؟




شكرن للبكية دي يا بدرالدين لانو كلامك ده ذاتووو يبكي ايه رايك
والا اصلو أنحنا الايام دي متحيلين


غايتو كان جاتني بكية كاربه
بجيك صاد

أخي الكريم أبو ربى
البكاء أنواع وأشكال أو قل خشم بيوت وتكون كمية زرف الدموع في عملية البكاء متناسبة مع نوع البكاء ورغم أن الأسباب قد تتعدد يسمي في النهاية مسمى واحد ألا وهو البكاء. فهناك الحنان شديد الذين يبكون في المسلسلات وأى فلم هندي أو دراما عربية ، وهناك الذين يبكون من الشطة أو خوفاً من كلاب الجيران ، وهناك الذي يبكي من الشماسة عندما يزروهو في فرقه وهناك دموع التماسيح وهناك البكاء من شدة الضحك وفي دموع تقطيع البصل خاصة إذا كان البصل أحمر وهناك دموع الغاز التي تستخدمها قوات البطش في كل مكان لتفريق التظاهرات والتجمعات سلمية كانت أم غير سلمية ، وهناك البكاء من دخول الصابون في العيون أيام أن كان الإستحمام مرتين عند اللزوم ووهناك بيت البكا بتاع عرس الشهيد وده عادة ما يكون بي ترباس أو الصحافة أو الثورة بالنص وهناك دموع الشموع الساخنة أيضاً البكاء على الأطلال. ابكي ألم الفراق أخي بدر الدين وعينك لو ما دمعت تكون شقي ، خليها تدمع إن شاء الله تطبظها بأصبعك حتى لو فيهو ريحة أو باقي تمباك. وأديها بكية تديك دموع وترتاح ، يقال أن الحاجة بنونه عليها رحمة الله كانت في مهمة لأداء العزاء لأسرة إحدى قريباتها وكان في معيتها فردتها وشقيقتها الحاجة عشه عليهن وعلى جميع أموات المسلمين رحمة الله ، فبكت الحاجة بنونه حتى جرى دمعها بشلوخها وتعبت من البكا فما كان منها إلا أن قالت لأختها عشة أبكي يا عاشه أختى أنا فترت.
وقد جاء في الأثر اللهم إنا نعوذ بك من علم لا ينفع، ومن قلب لا يخشع ومن عين لا تدمع ومن دعاء لا يسمع. اللهم إنا نسألك الهدى والسداد فأهدنا وسددنا.
--
أما حكاية العمود في بيت البكا فأنسي وعيش يا البدري الناس أصحاب البكا الزمن ده بيفاخروا بيهو وبقى القعاد في كراسي والفاتحة بالإنجليزي والشاي بالنعناع والونسة بالشبح واللاندكروزر وصيف لندن وشتاء القاهرة وصفقة الكمبيوترات والمخطط الجديد في مدينة النيل ومزارع شبعا ده في صيوان الرجال أما عند الحريم فهو عبارة عن فاشيون شو دى توبها من لندن وديك شعره عاملاهو بالميج وديك بإف ستة عشر وديك أصلها ما بتتنزل لي من حلق وهاك يا مشاط.

نبكى من النوازل نحن كان نرتاح من بكانا
قلى كيف نرتاح ونحن بنكى من شده هوانا
بدر الدين الجميل الله لا جاب بكاء
ودعقاب

طبعا انا متخصصة دموع افلام

من ما الفيلم يبدا ينونى كدة، والموسيقى التصويريةتبدا "تتنايص"، اولادى طوالى بعاينو لى وشى

وانا ما بقصر ، الدموع للحنك


سؤالى يا بدر الدين خاتم البنقلاديشى حصل ليه شنو؟؟؟

لكن مصريتك دى بالغت

بدر الدين الماشين
ابكي ولا يهمك وكبكب الدموع بالعشرات

اما بالنسبة للعمود فما تشيل هم بنجيب ليك عمدان وصواني لو حبيت بس خلي حائط المبكى يكون جامد ما حيطة جالوص كمان تقوم توقع الناس نبقى في مشكلة تانية

غايتو يا بدر الدين الله بحاسبك نهارت الغيامة .. الغنوة بتهرس كباد ناس كتار .. نحن غايتو نحمد الله لا بكّانا الموت ولا الولادة ولا الوداع .. شفت القسوة دي؟ وكان فينا كبدة كان الغنوة دي ... لكن صالح الضي زماااان لمن كنا صغار (وأنا كنت صغير على فكرة) كانت بتكبينا أغنية سوف أنساكي وأنسى كل شيء عن هوانا . رغم إنو ما كان عندنا هوى ولا واحدة ننساها بل ما كنا عارفين معاني الكلمات زاتا . أنا قايل أحسن تقلع الصيوان دا قبل ما يبقى صيوان وصواني وطواقي ومراكيب .

بسم الله الرحمن الرحيم

الأخوة الأعزاء سلام
أولا أود الإعتذار لتأخير الردود وذلك بسبب إنقطاع الكهرباء مع ملاحظة إنو أنا في دولة خليجية .. يعني كان لازم الكهرباء دي تحرجني مع ضيوف اول مرة يزوروني

الغالية الجندرية
سلام وإحترام

أنا لو كنت عارف بكاي بجيبك كنت جعرت زماااااااااان
صدقيني رغم إنو بوست بكا لكن أنا سعدت سعادة لا حدود لها بهذه الطلة
تحياتي ليك يا شفيفة وللكثيف أبو مهيار

المحترمة بت الجزيرة
سلام وإكرام

مرحب بيك بدون عامود وأضم صوتي لي صوتك بل والح في الطلب من أي زول بإمكانه أن ينزلها لأنها ليست عندي بالإضافة إلى جهلي في كيفية إنزالها لك الود

الصديق ابو جهينة
سلام يا حُر

لكن عامودك خطير وضحكني في بيت البكا وقدام النسوان
لك التقدير

الحبيب هوب لس
سلام أردام

دا بورد بكاء؟!!؟
لا دا بورد إيفل
تحياتي

الجميل الخواض
سلام وحلو كلام

أديني اللات اليتيم وأنا بديك المناديل

الظريف شنتير
سلام بقدر حسنك

ولا أنا يا شنتير ما راكبة لي في راسي لكن ركبت في عاطفتي


العزيز دورنقاس
سلام بي كميات

تستاهل يا حبيب .. وانا ضاربني فيها حجر دغش


الرائع الفاتح
سلام وحب شديد

أنا هسع قاعد في صحراء فسحة كبيييييييييرة بس إنت أبقى جعار

الغالي تمبس
سلام مسلح بالأسمنت

والله يا تمبس وماك طالبني حليفة أنا أكتر زول بكاي وكان عندي هنا في الغربة حجر عاملو حجر المبكى وفي البيت عندي المراية بتاعة الحمام والله دي لو جربتها فيها حلات بكية لأنو كل ما تشوف روحك في المراية بتحس بالهزيمة أكتر والبكا بزيد
لك الود

أبو أحمد ملا عمر
سلام وريد ومحبة

بالإضافة للبكاءات التي ذكرتها هناك بكاء أتمناه وأسعى إليه بكل ما أملك وهو البكاء عند قراءة القران أو سماع سيرة المصطفى صلى الله عليه وسلم
وكما بكيت مرة لمن حسيت بي أشياء تغيرت في مجتمعنا القروي
وكمان بكيت لمن جاتني بنت في منتهى الجمال صاغرة تتطلب مساعدتها بحفنة قروش لشراء دواء
والبكاء كتير وكتير

بسم الله الرحمن الرحيم

الحبيب ود عقاب
سلام يا رائع

ياخي زي ما قال أخونا ابو جهينة البكاء دا مشاعر لابد منها فإنت أبكي في النوازل وبعد تنتهى أبكي لي معاك في الحاجات التانية

الحنينة تماضر
سلام بقدر روعتك

الببكيك دا الجمال الجواك يا تماضر
أما موضوع الخاتم أبو فاروظة
ومال أنا بعيط عشان الفلم؟؟؟

بتنا ميّا
سلام وإحترام

الحيطة قوية تب رايك شنو نلهط الصواني أول وبعد داك نبكي؟؟؟

الصديق أهل العرض وفي رواية أهل العوض
سلام لمن تزهج
والله ما تبكي معاي ما أرضى منك
وصيواني ما بقلعوا وووووووووووووووووووووووووووووووووب علي
ااااااااااااااااااااااع

بدر الدين

الله يجازيك بكل خير

لقد أضحكتني حتى ( تعقد الخواجة الذي بجانبي ) ، بالله ممكن تقرم لي حتة من المراية بتاعة حمامكم أختها في الشنطة.
تسلم.

ما عندك مشكلة يا بدرالدين
والله كلنا رايحة لينا بكية
لكن ما مشكلة نلهط الصينية في الاول عشان الناس تبكي بمزاج

بسم الله الرحمن الرحيم

الصديق أبو جهينة
سلام مدجج بالحب

خلاس إنت إستحما في بيتكم وتعال ابكي عندنا رايك شنو؟؟؟


بنتا العفيفة ميّا
سلام وتهذيب

شبعتي ؟؟؟
يلا قومي نخلّص البكاء القدامنا دا

الحبيب بدر
حقيقة انا بديك العذر لما بكيت في زلادة بنتك لكن انت ابيت تقول كنت خايف علي منو
الزوجة اهما
ونحنا هنا بنقول عليها العضم والعضم اهما حاجة بعدين الكشب والتوابع بتجي

حقيقة نبكي ويكون البكاء عند ذكر الحبيب الصمطفي وابكي امام سيدنا حمزة ومصعب الخير وسيدي عبدالله بن جحش
ونبكي في الغربة كثير

انا ماقاعد ابكي يوم العيد تخيل لكن في مواقف كتير ببكي الا يوم العيد في السودان ببكي لاني بتذكر ناس عزاز فقدت طلتهم يوم العيد اما في الغربةة فبقي الموضوع عادي صلاة والسلام

ابكي اجمل حاجة انك تبكي

بدر الدين الحنين
سلام واعجاب واكبار


وبرضو من انواع البكاء
ذلك الذي يداهمك فجأة
عندما ترى مريضا مسكينا لا يستطيع
شراء دواء ليقيه شر معاناة المرض


الله يديك العافية
ويكفيك شر مبكيات الدهر

البدري ياحنيييييييين لكن ماتقول لي بكاي لمن غلط حسي نحن الواحد لو عائز يجاملك في الغربة ‏الحارة دي الا بعد ما خلاص يكون عائز ينوم ويذكر البلد وناس البلد وحلاة البلد وبت البلد وكل ‏حاجة حلوة في البلد بعد كده ممكن الواحد يجاملك بس بجي يقول ليك انا امبارح جاملتك ياشنا ‏بس ما فيها جوعير وكده بكاء صامت وهذا نوع خطير من انواع البكاء ‏
كان الله في عون الجميع تحياتي لك ياغالي (ملحوظة صغنتوتة دائماً تبداء ردودك أو بوستاتك ‏بالبسملة دا من العين ولا شنو لووووووووووول)‏

البدري

هسع لو كان جاملتنا في البوست ده بكاء أفهمه .. وبكاء لاأفهمه " عندما بكى الكبيسي وعندما بكى بوش " كان جاملناك في بوستيك ده وبكينا معاك كمان

بسم الله الرحمن الرحيم ، الرجوع لله يا البدري ، اها العمود اختو وين
، نفسى انقطع لمن وصلت الصحرا ، والله ليك حق تجعر حسى الصقيعة دي ما بتكتل عديل اسكن اها اكل بسم الله الرحمن الرحيم ملاح مفروك ملحا انا بمشى وبجي راجعة النشوف حكاية خاتم لبنقلاديشى دا واجي..

بسم الله الرحمن الرحيم
الفاتحه؟؟؟
هو يعنى ما بيت بكى؟
اها نان شنو؟
والله الزول يا طمسه يا فكة منو؟؟؟
وما بتحصلنى؟؟ فيلم نبكى؟
نتكلم بالتلفون نبكى؟
نتذكر نبكى؟
اها انا جاييك اتباكاك واتباكى معاك؟
يقولو جنو؟ يقولو فكت؟
المهم البطين الايسر ده اتنفس؟
وناكل من عامود عشه بعد تخاسيم واستغفار؟؟
انور







يوم العركه الفى الحراره
بتشبع الصقار مراره

طبعااخي يابدر الدين
انا مسألة البكا والحزن دي فنانة فيهم شديد

اها ارجاني هسه بجيك
بس عامود شنو؟
انا عندي سيستمز جديدة للبكا

بس اصبر لي شوية راجعــــــــة

أول امبارح عايز ليك دلوكـة و هـجـيـج

و الليلة عايز تبكـي حكايتك شـنـو يا خـوي

جيت أرد ليك قبل ما أقرأ كلامك وأقول ليك أنا بباكيك
من غير ما أعرف الحاصل شنو زاتوووووو
عارف ليه لآنى بريدك لله فى لله يا أستاذى الغالى بدر الدين
والليله والليله إن شاء الله أم رُبى ما تزعل منى
هى زاته بريده والله من قبل ما أعرفه
لكن تانى قلت أحسن أشوف الببكيك شنو يا أستاذى
إن شاء الله آخر بكياتك فى الدنيا
يا راجل يا حنين

بسم الله الرحمن الرحيم

العزيز مهاجر
سلام وشوق

وإنت في هجرتك يا مهاجر لابد أن تحتوي أمتعتك حقيبة البكاء وإلا تقطعت بك السبل
لك تحياتي يا مرهف

الحنين جدو
سلام وتقدير

وما أكثر دواعي البكاء في بلادي
لك الجمال والعافية

الحبيب أبراهيم علي
سلام يا راجل
وين إنت من زمن ما شفناك
ما مشكلة أنا بنتظرك لمن تجي تنوم بس المهم تبكي وما شرط الجعير
أما بخصوص البسملة في كل بوستاتي ومداخلاتي فهي لقناعتي بأهمية ذلك وحسب علمي أن أي عمل لا يبدأ بإسم الله فهو مبتور رغم أن الأخ أهل العوض يرى أن ذلك في الأمور ذات البال وليس في كل الأحوال تحياتي لصديقي أهل العوض في هذا المقام وتحياتي لك أنت يا ربيع

الغالي ياسر رحمة عفواً حنا
سلام يا طيب
بوستك داك أنا ماقدرت أجامل فيه لأني لقيت عواميدكم كلها شطة

عشة يا بت أمي
سلام عليك
هسع دحين بكيتي؟؟؟
كدي ناوليني العامود دا

حبيب قلبي أنور
ود كبدي أنور
حبيب ريدي أنور
الليلة يا حليلنا يا أنور
إتفرقنا يا أنور
عليك الله بتذكر يوم ضربت لي التلفون وعديتو ليك كلو جعري؟؟؟
ودي واحدة كمان من البكيات ما ذكرتها ودا بسيط من كتير
ربنا يلمنا ياروحي يا أنور

المهذبة جداً هوزي
سلام ملئ بالحنين

إنتي في البكا دا شهد شاهد من خدها
الدموع السايلة مني يا ما سالت حرقتني
لك ولنا الله يا هوزي

الحبيب أبو حسين
سلام
الحكاية بي بساطة إنو الإنسان دا كلو مشاعر ووضع معقد جداً

وجن يا السمحة أم عجن
سلام وإحترام وشوق
أول حاجة وين إنتي ليك كم يوم ماظاهرة؟؟؟
يلا بعد كدا البكاء
أبادلك يا ظريفة نفس المشاعر ريدة في الله لله
وكان جات أم ربى ما عليك إلا تحرري البكاء بس
وبالمناسبة دي أحكي ليك قصة أتمنى ما تكون قديمة وما يفهما الناس خطأ ويجوني بالعكاكيز
القصة
قالوا واحد وصّل مرتو بيت بكا وقبل تنزل من العربية شاف ليهو مرة جوة بيت البكا سمحة جدأ .. أها نزل وجرى قدام مرتو ودخل يعزي في المرة السمحة قامت مرتو جرتو من إيدو قالت ليهو هوي دي ما عندها علاقة بي البكاء دا
قال ليها
زحي كدي هو دي الماتو ليها قبل كدا شوية؟؟؟
تسلمي يا رائعة

الأخ بدر الدين:
دحين اٍنتا عايز تحسب علينا بكياتك التلاتة ديل بكيات مع الرجال؟ كان كدى اٍنتة ماعارف حاجة سااااااااااى
أبكى وأبكى وبعد أن تتعب اٍرتاح شوية وابكى تانى. اٍحنا صحيح حساسين وعاطفيين لكن برضو، كرجال اٍتربينا على كتم المشاعر ودى حاجة غلط. نفس عن نفسك يارجل بالبكاء أو بغيره ولا تدع الأشياء تتراكم فى نفسك.
أقول يك حاجة
قبل بضعة ساعات رد أحد الأخوان فى واحد من البوستات بقصيدة مطلعها:
عافى منك وراضية عنك....
وهى قصيدة من أم لاٍبنها فى المهجر، وقد سمعتها قبل سنوات لأول مرة عندما أهدتها لى الولدة أها مافى يوم سمعتة الأغنية، الشايقية، دى و ما بكيت

الحاجة المؤكدة من البوست بتاعك أنك اٍنسان مرهف وذو عاطفة رقيقة وحساسة وده عمرو ما كان غلط أو عيب
وتسلم

بسم الله الرحمن الرحيم

الغالي ماجد
تحية خاصة لك يا حبيب
ياخي أغنية عافي منك وراضية عنك دي فيها كمية من الشجن ما طبيعية وفيها طعم الطنبور الحنين وفيها سماحة أهلنا في الشمال .. ياسلاااااااااااام يا ماجد
أنا ذكرت التلاتة بكيات المشهودات أما ما خفي فهو أعظم
لك الود يا جميل وأنت تأتيني بعامودك الدسم

البدري

اخوك برضو دموعو قراب

وعيني التقول هنبوكة ملانة موية

اي موقف يضحك او يبكي كانك قديت الهنبوكة بابرة

والله يا البدري انا محتار في طعم الدموع

ضوق ليك دمعة

وهي نازلة كده على حفر ودقداق خدك

اتناولا بلسانك

ياخي طعمها عجيب

ماعارف اقول ليك مملحة والا حامضة

حاجة طعمها براهووو



تسلم يا البدري

وانشاء الله ما نشوفك باكي الا من الفرح

الأخ بدر الديــــن
تحياتي وحبي
ياخوي شنو إنت قاعد تبكي وأنا فاتح خشمي وراجيك بي هنـــا؟؟؟الليله أربعاء وعقــاب شهـــــر يعني بالعربي الليله يوم 26/6..ألحقنا بالحلق القددنا إضنينا عشانه وبعدين أمش أبكي زي ماك داير..وكان داير ليك صيوان بعد داك أجرتو على...تحياتي

منتـــدى النيـــل

بسم الله الرحمن الرحيم

حبيب قلبي قرجة
سلام بقدر روعتك

فعلاً ياخي والله الدمعة طعمها غريب مع إنو أنا ماعنديش خدود
فالدمعة عندي بتجي تلقى ليها جضم مطفوق وتتكوم قدر كباية وتجيني داخلة
تسلم أبو هنبوكة

الغالي نايل ون
سلام يا كثيف
والله لكن البكا عندك يا نايل
وبعدين ياخي أنا قبل كدا رسلت ليك عامود في بكاكم البي هناك دا ما وصلك ولا شنو؟؟؟
حبي وتقديري

أنقر يا بدر الدين ما شفتك في تلفزيون السودان؟
والله جابوك مع فرقة الأصدقاء في محطة التلفزيون الأهلية
وكمان عايز تغني حقيبة؟
لكن يا بدر...أتاريك أسه احلويت

يا البدري
ويا إبراهيم ودعلي
وفي رواية فهو أبتر
وعليه سميت خطبة يزيد بالبتراء
لأنها لا تبدأ بذكر الله والصلاة على النبي
صلى الله عليه وسلم

نبكي مافي مشكله بس ورونا استايل البكي حيكون كيف
عشان الواحد ما يطلع من الخط

عزيزي
يكفي ان نعرف ان امير المؤمنين عمر
كان له خطين اسودين تحت عينيه من كثره البكاء

سلامات

بسم الله الرحمن الرحيم

الناصع فيصل صالح
سلام وإحترام
ومرحب بالطلة يا حبيب
طبعاً لازم إحلو عشان أدي فرصة للناس الماضاقوا الشنا ولا دايرني أحتكرها كمان
النبي شفتني متين زمان ولا قريب دا؟؟؟ عشان أنا مشتاق اشوفني في الأيام دي
لك الود وأفرحتني مرتين بالطلة أولاً وبالخبر تانياً


أهل العوض والعرض
سلام وشكر وفخر

ياخي أشكرك لتوضيح المعلومة وتسلم يا حبيبي

بسم الله الرحمن الرحيم

الشفيف عمدة4
سلام ورائع كلام

ياخي أبكي بي أي استايل جعري .. دموع .. بس المهم ما تكتم

أشكرك على معلومة يكاء أمير المؤمنين عمر رضي الله عنه وارضاه والخطين الأسودين تحت عينيه
لك كل التقدير برااااااااااك وما تدي معاك زول

بدرالدين الماشين
البكا لسه مدور ولا شنو ؟ شكله الناس كلها في بكية رايحة ليها
غايتو شايفة حائط المبكى بيتلولح شمال يمين

يا حليل
بندور نباكيك
اخواك فعالا
ثلات والا اربع
الا خيرة دموع لش
ما نشفت
لك التحية
اخوى البدرى

بسم الله الرحمن الرحيم

بنتا الظريفة ميّا
سلام وتقدير

مالك البارح ما جيتي قيلتي في نسوان سعلك منك
وبعدين المثل بقول حايط المبكى البتلولح يمين وشمال بسندو أهلو
تسلمي يا ميّا

سمح البكاء في خشم سيدو

البدر اللزيز مافي طريقه تسجل لينا بكيه علي السلم السباعي مطااااااطه

تحياتي يا ملك

سلام بالقيزان لي كل الاحباب

العزيز جدا بدر الدين ، تحياتي ،
ياخوانا والله بي صراحة انا رايحة لي بكية كااااااااربة كدي ، مما سمعت الموضوع فيهو بكى جيت جارية بي جاي ، اها لقيت ليك الامة كلها بتبكي ، حسبي الله ونعم الوكيل ، الحاصل شنو ؟ اها لسة ما في زول رد علي ، جاتني ليك الغنية الحنينة دي ، والدموع اربعة اربعة ، عشان بلبس نضارات يكون ،
تعددت الاسباب والبكية واحدة ، عندي امتحانات آخر سنة بعد يومين ، وكان قارية ليها قراية اولاد ناس ، الله يعمل لي ضنب ، بس على الله ، على قول واحد صاحبنا ، الايمانيات البتنزل على خلق الله ايام الامتحانات دي تحير
يا ناسي الدعوات الدعوات ، قالو لي يا بدوري ، على قول بعضهم ، من ناس حوش ابو صالح ، مع انو انا اشك في انو في حوش بالاسم ده ، لكن الحقني بي دعوة كدي سريييييعة الله يديك العافية انشاء الله ، بي قدر ما بتضحكني وتفرق علي كل ما ادخل بوست من بوستاتك ، ويديمك لينا فوق راسنا يا رايع


اها ياخواني ، انا قشقت الدميعات النزلن ، انمشي نشوف لي قراية بعد ده كان الصلاة بتنفع ... غايتو علي حالة ، اقرا وابكي ، واكل وابكي ، ولولا الملامة يا بدوري كنت حتلت ليك في بوستيك ده ، منقة مع حالتي النفسية الايام دي ، لكن بس نقول شنو ،
زي ما قال اخونا الشاعر ، لا بي ايدك لا بي ايدي ، اقرا بس ما تقول يابوووووووووي هريدي

سلامات

بسم الله الرحمن الرحيم

عزيزي المهندس
سلام وتقدير

كدي شوف لي الصيوان دا بشيل الناس ولا نوسعو شوية؟؟؟
أشكرك على مشاركتي ومباكاتي


حبيب قلبي هوب لس
سلام أردام زي العافية في العضام

يا ريت لو بقدر أسجلها والله كان أخلي ليك البورد كلو يجعر


العزيز/ة تونا
سلام ودعوات صادقة عسى ربي يوفقك في الإمتحان ويهدئ من روعك وتشرفينا بالدرجات العلى

سعدت جداً بهذه المداخلة التي إختلطت فيها القفشات الحلوة بالدموع
لك الود

كل ما اغيب واجي افتح البورد القى عدد البكايين زاد ، لاحول لله كل البكا ده كان موجود ؟ يعني غايتو يا بدرالدين الا كان توسع حائط المبكى
ولا عمدان ولا صواني ما حيكفوا الا كان نجيب حلل عديل كده
وانشاءالله ربنا يجعلها اخر البكيات
معليش اذا دموع فرح ، نحن ذاتو امة غريبة نفرح نبكي نزعل نبكي
وزي ما قال الاستاذ عبدالله الريح جدنا كان ماساوي الاكبر
التحية لكل الباكيين والباكيات

بسم الله الرحمن الرحيم

بنتنا الرقيقة ميّا
سلام وإحترام
إنتي بتمشي وين؟؟؟
يعني أنا أبكي ولا أخدم الناس؟؟؟
تعالي جيبي الحلل ديل قراب عشان الناس ديل يتغدو قبل المطرة دي ما تصب ما شايفة السحابة الشايلة دي
تسلمي

سلام مربع


يا البدري

وحات نظري نحن الافلام بالذات الامريكيه كملت دموعنا ذاتها
حتى الكورة مرات مرات لمن اقعد فيها
وفريقي يتغلب بقعد ببكي
وبتذكر يوم قعدت ابكي فيهو يومين
لمن سيد الجنيد لاعب الهلال وقع في الميدان
في مبارة مع فريق مصري مامتذكراهو
ومع اني ماكنت متابعة المباراة دي لكن بس جيت على الضربة طوالي

يوم .. عجيب
كل مااتذكر المنظر دا
اقعد ابكي
هسع دي انا عايزه اباكيك يا البدري
حضر جعيرك

بسم الله الرحمن الرحيم

شيري بت أم شيري
كيف حالك وإزيك


وحات نظري نحن الافلام بالذات الامريكيه كملت دموعنا ذاتها

في السينما ولا في الواقع؟؟؟

الله يا شيري ذكرتيني وقعة سيد الجنيد ياخي دي بكتنا كلنا وكتير مواقف زي دي بتبكينا وحادث بص المريخ كمان بكانا وموت زميلنا طه أبو قرجة بكانا
يديك العافية

الاخ ودبدر اهديك وكل البكايين اغنيه كمال ترباس عيني ماتبكي على السلم الخماسي وبعدها على طول اغنيه قلبي مالك والبكا خلي البكا لي للثلاثي الكوكباني على السلم اليماني الخشبي ابكوا وجعروا واستغفروا

بسم الله الرحمن الرحيم

الغالي الفاتح يسن
تحيات حلوات
أشكرك جداً على البكاء الحديث بي الساوندسستم وإنشاء الله نردها ليك بي (سي دي) في بكاءات أفراحك
وإن شاء الله ما تشوف شئ يبكيك يا راقي