Post: #1
Title: عمري بيناتكم سنة
Author: بدرالدين شنا
Date: 07-29-2003, 04:41 PM
Parent: #0
بسم الله الرحمن الرحيم
30-07-03
أحبتي في هذا الصرح الممرد
السلام عليكم ورحمة الله تعالى وبركاته
في مثل هذا اليوم قبل سنة نزلت ضيفاً عندكم وأكرمتموني كرم فاق حد التوقع بدءً بالشفيف العفيف بكري الذي فرش إكليل الترحاب وكذلك الإخوات تماضر ومسارات كل واحدة منهن ضبحت بوست له خوار لتقديمي للأخوة الأعضاء والذين لم يقصروا في التداخل والتعرف عن قرب فتعرفت على الكثير رغم أن السيرفر الضعيف حرمني في أحايين كثيرة ووقف عائقاً أمام عجلة التواصل
وعليه أعتذر لكل من لم أحفل بلقائه في بيته والعتبى لكل من جرحه حرف حاد شرد مني بغير قصد فصدقوني أنا فخور جداً بوسادة الإنتماء الحريرية
أحبتي بهذه المناسبة أهديكم هذه الإستراحات
إستراحة 1
في مجتمعنا البسيط في القرى تلقى الجزار مديون لي بتاع الخدار وبتاع الخدار مديون للجزار والإتنين مديونين لي بتاع الدكان وهو مديون للإتين وثلاثتهم مديونيين للراعي الذي يرعى بغنم الحلة يعني عبارة عن شبكة عنكبوتية ولو حسبت البورصة تلقاها عبارة عن خمسين جنيه حايمة داخل هذه الشبكة ويوم صرف المزارعية هو يوم الحساب الأكبر كل واحد شايل دفترو ومنتظر يعني المزارعي لمن يخلص من ديل كلهم بكون باقي ليهو قريشات يشتري بيهن رغيف وموز كنوع من التغيير
أها هناك فئة خامسة وهي أهم الفئات وهم الناس الشغاليين بي ضراعهم يشتغل مع بتاع الدكان وياخد أجره سكر وشاي يشتغل مع الجزار ياخد حقو لحم ومع بتاع الخدار ياخد حقو خدار وهذا الأخير هو بطل القصة التي أريد أن أرويها
صاحبنا ويدعى (سالم) لايملك في هذه الدنيا غير ضراع أخضر.. حظه من الدراسة أقل من أجره في اليومية التي يشتغلها والحمد لله رب العالمين.. فتعالوا نشوف الحوار الي دار بينه وبين بتاع الخدار
سالم : أديني باقي حسابي أنا ماش الخرتوم
بتاع الخدار: حسابك كم؟؟؟
سالم : أبعرفو
بتاع الخدار: سمح قروشك كلها الإشتغلتها كم؟؟؟
سالم : 21
وشلت خدار بي كم؟؟؟
سالم : 12
يلا 21 – 12 الباقي ليك كم؟؟؟
سالم : طيب نقول 1 ناقص 2 ما مكن .. نستلف 1 بقت 2 .. أها 2 – 2 الباقي صفر ودي هنا بقت 1 أها 1-1 الباقي صفر يعني ياعمي أنا ما اشتغلت ولا شنو؟؟؟
أستراحة 2
بعض الأطفال بعرف أسماء الألوان لكن ما بعرف الوان الألوان فسألت أحدهم يوماً
يا حسام المروحة الفوق دي لونها شنو؟؟؟
حسام : أحمر
يا حسام الطاقية دي لونها أبيض وهي لونها زي لون المروحة يبقى المروحة دي لونها شنو؟؟؟
حسام : أحمر
يا دين النبي .. ياخي قلت ليك الطاقية البيضاء دي لونها زي لون المروحة الفوق دي كويس؟؟؟
حسام : آي
يلا المروحة يبقى لونها شنو؟؟؟
حسام : لونها أحمر
إستراحة 3
ولدي لمن كان صغير كان ناس البيت بأشروا ليهو على صورتي المعلقة في البيت ويقولوا ليهو داك بابا .. داك بابا ... داك بابا .. بعد داك بقوا يسألوهو بابا وينو؟؟؟ يقوم يأشر على الصورة الفوق الحيطة .. أها أنا لمن مشيت الإجازة كنت شايلو وسألتو قلت ليهو بابا وينو؟؟؟
أشر على الصورة الفوق الحيطة
ملحوظة
لمن كنت صغير تعلمت المشي بعد أربعة سنوات وهذه حقيقة لكن في هذا البورد تعلمته في سنة واحدة وذلك بفضل التوكؤ على أقلامكم.
وكل عام وأنتم بخير
|
Post: #2
Title: Re: عمري بيناتكم سنة
Author: عشة بت فاطنة
Date: 07-29-2003, 04:50 PM
Parent: #1
بدر الدين ابضراعا اخضر سلام اها ناس مناقزة ما بطلوا النقزي ،
انا ماشة رفاعة يوم الاحد اها اجيب ليك شنو ؟
واسلمم ليك على منو؟
|
Post: #3
Title: Re: عمري بيناتكم سنة
Author: ابو جهينة
Date: 07-29-2003, 04:59 PM
بدر الدين الجميل
لك تحياتي و مودتي
و كل سنة و إنت طيب و قلمك أخضر و عمرك طويل : آمين
إستراحاتك كلها حلوة و الله. و هي إستراحات معجونة بسماحة أهلنا و ترابنا و طين جروفنا و سعفات نخيلنا و سقوف بيوتنا المعرشة بجذوع النخل و قضبان القطر و ريحة الدعاش و صوت الشكشاكة على شوالات الفحم في الحوش.
تسلم ، و عمرا مديدا أيها الأخ الشفيف.
|
Post: #4
Title: Re: عمري بيناتكم سنة
Author: bayan
Date: 07-29-2003, 05:00 PM
البدرى كل سنة وانت
بالف خير
اسعدتنا طلتك
يا عشة
ودا سؤال دا
تسلمى على منو؟;) ;)
|
Post: #5
Title: Re: عمري بيناتكم سنة
Author: دورنقاس
Date: 07-29-2003, 05:34 PM
Parent: #4
بدرالدين شنا
عمرك بينهم سنة ومعاى انا شهر وواحد وعشرين يوم
بس انت العمر كلو ...... صدقنى انزقمته فى قلبى من اول بوست
وكل مرة بقول امرقك اخت واحدن حلو... قليبى يكنكش فيك وبيقول انت احلا ...... وبشناتك ووووووووووحلاتك
بدر الدين شنا
كل سنة وانت طيب
وانشاءالله ماتعتر ليك شينة فى دربك
لك حبى
|
Post: #6
Title: Re: عمري بيناتكم سنة
Author: بدرالدين شنا
Date: 07-29-2003, 06:33 PM
Parent: #1
بسم الله الرحمن الرحيم
الغالية عشة بت فاطنة
سلااااااااااام بقدر شوقك للبلد
ياختي ربنا يوصلك بالسلامة وتلقيهم طيبين وسالمين
وسلمي لي على أهلك وأهل أخي الغائب صداح وكل عائلة العمراب وأهل جمال عبدالرحمن في فريق العوضاب وأهلك الزميل الشفيف ود رملية
أما في حلتنا زي ماقالت بيان ودا سؤال برضو؟؟؟
صديقي ومرواد عيني أبو جهينة
سلاااااااام مسلّح
والله قلنا نحاكيكم في التفاصيل لكن هيهات هيهات
لك مودتي وحبي كله ولا أقول ليك خلي شوية لزوجتي وأولادي
دفعتي بيان
سلاااااااااام وإحترام
وإنت طيبة يا بت أمي وإن شاء الله بنارك ليك جديد البنيات
حبيبي دورنقاس
سلاااااااااااام وشوق شديد
هي بالأرقام شهر وواحد وعشرين يوم لكنها أكبر بقياس حبي لك
تمرقني كيف إنت ماعارف أنا كربة البكنكش فيهو يحلو مني الله
يديك العافية يا جميل
|
Post: #7
Title: Re: عمري بيناتكم سنة
Author: safwan13
Date: 07-29-2003, 06:54 PM
Parent: #6
كل سنه وانت طيب يا بدر الدين وعقبال ما تطفئ الشمعه التانه هنافي السودان ونحتفل بيك ..والسنه الجايه تكون اتعلمته الجري
بس نحن يادووب بنحبي
|
Post: #8
Title: Re: عمري بيناتكم سنة
Author: maia
Date: 07-29-2003, 08:19 PM
Parent: #1
بدر الشفيف
سنة مرت من الابداع البدرديني الرائع
لك خالص التهنئة بعيدك ابداعك الاول في البورد
|
Post: #9
Title: Re: عمري بيناتكم سنة
Author: ودرملية
Date: 07-30-2003, 00:44 AM
Parent: #8
سلامات
بدرالدين الجميل
كل سنة وانت طيب وكل عام وانت الخير والحب والجمال
واستراحاتك واحات خضار وعرق تربال ومشوار ضحوية للبلدات وقهوة فنجرية وقعدت عصير غاشياه مطيرة رزاز تبلبل فوق الارض وتمتعنا بي ريحة الدعاش
بدر الدين
والله انت اروع من الخريف
فكن هطالا حتي لاتسقط هذه الصفة
لك امتداد الحب مابين الارض والارض ومابين السماء والسماء و
اما مابين الارض والسماء
فهو ضياء المحبة التي بين البين
|
Post: #10
Title: Re: عمري بيناتكم سنة
Author: haneena
Date: 07-30-2003, 01:14 AM
Parent: #9
الاخ بدرالدين
سنة حلوة يا جميل
كية في السموك الشين
انا انتظرت لغاية يوم30/7 جاء
وقلت اخش واهني في نفس اليوم
واها سامعة صوت الالعاب النارية
زي راس السنة وكدة
استمر
واللة يديك العافية
حنينة
|
Post: #11
Title: Re: عمري بيناتكم سنة
Author: جدو
Date: 07-30-2003, 01:32 AM
Parent: #10
بدر الدين حلا
كل سنة وانت طيب
والقابلة في السودان
وربنا يفكك من حجار عمان دي
ونلقاك هنا بين اهلك واصحابك
وتلقاهم سالمين وتامّين
|
Post: #12
Title: Re: عمري بيناتكم سنة
Author: بدرالدين شنا
Date: 07-30-2003, 04:55 AM
Parent: #1
بسم الله الرحمن الرحيم
العزيز صفوان13
سلااااااام أكتر من 13
وإنت طيب ياجميل يا راقي إنتو مولودين بي سنونكم ما شاء الله
أشكرك على التهنئة والإطلالة
بنتنا الظريفة ميّا
سلاااااااااااام وإحترام
ياريت يمتد إبداعنا من بحر فنكم
شكري وتقديري
حبيب قساي ود رملية
سلااااااااااام حي يبرق
غايتو كلامك دا أكبر مني لكن جيبو أنا بدسو في الدولاب لغاية ما أكبر وبعد داك بلبسو
والشوق ما تنسى ياغالي لكل من يسألك عنا
حنينة الحنينة
سلامي ليك أردام أردام زي العافية في العضام
لكن دقتك في المواعيد تحير الخواجات
شكري وترحابي وربنا يبعدك من كل شين ما عدا بدرالدين
صديقي جدو
سلاااااااااااام وإكرام
وإنت طيب وسالم لكن ما سالم الإشترى الخدار
إنت وكت نقلتني من (حجار) عمان ديل خلاص شغلني بي كهرباء
قال أرجع قال
|
Post: #13
Title: Re: عمري بيناتكم سنة
Author: degna
Date: 07-30-2003, 07:01 AM
Parent: #12
الاخ الرائع بدر الدين شنا دبايوا
كنت رائعا وماذلت اخي تواصل مواكب الابداع الجميلة
عيد ميلاد سعيد وعقبال المائة شمعة
degna
|
Post: #14
Title: Re: عمري بيناتكم سنة
Author: بدرالدين شنا
Date: 07-30-2003, 01:26 PM
Parent: #1
بسم الله الرحمن الرحيم
الجميل دقنة
دبايوا عليكم ورحمة الله تعالى وبركاته
أسعدتني حروف الشرق وهي تهنيني بمرور عامي الأول
شكراً أخي ومازلت الهث وراء إبداعكم
وكل سنة والجميع بخير
|
Post: #15
Title: Re: عمري بيناتكم سنة
Author: AlRa7mabi
Date: 07-30-2003, 02:44 PM
Parent: #1
بدر الدين شنا
كان عاماً حافلا بالمتعة والإمتاع .. ولم يشد انتباهنا فقط موضوعاتك التى تخفف ما علق بنا من آثار الغربة .. ولكن ردودك ومداخلاتك جميعها ترفل البسمة بين حواشيها .. فنظل نتابع تعليقاتك الذكية غير المباشرة .. فلا تتوقف
كل سنة وانت جميل دائما
الرحمابي
|
Post: #16
Title: Re: عمري بيناتكم سنة
Author: بدرالدين شنا
Date: 07-30-2003, 04:55 PM
Parent: #1
بسم الله الرحمن الرحيم
الكثيف الرحمابي
سلاااااام بقدر روعة حروفك
في حضرة لو حاتك الأدبية يطيب الإتكاء
لكم الشكرك حبيبي على التهنئة والكلمات الرقيقة
ولنا فخر الطلّة
تحياتي
|
Post: #17
Title: Re: عمري بيناتكم سنة
Author: alfatih
Date: 07-30-2003, 09:26 PM
Parent: #1
الاستاذ بدر الدين السمح
كل سنة وانت طيب
ويديك العافية بالشوالات وتقوم تقسمها لينا ابداع
|
Post: #19
Title: Re: عمري بيناتكم سنة
Author: بدرالدين شنا
Date: 07-31-2003, 04:39 AM
Parent: #1
بسم الله الرحمن الرحيم
الشامخ الفاتح
سلاااااااااااام (مربع) لغاية ما تظهر شيري
ياخي وإنت طيب وشكراً على شولاتك المليئة إبداع أصلاً
الغالية المحترمة هالة قوتة
سلاااااااااام وإحترام
بالله إنتي متابعة دا كلو وأنا ما عارف
صدقيني هذا زادني فخراً وزاد من المسئولية الملقاة على عاتقي
وأنا أقول الزوار 100 والردود 10 ياربي المية ديل منو؟؟؟ يافرحتي ويافخري بطلتك وأعجز عن الشكر وأنتي تزوديني ببوستاتي المتواضعة
لك تقديري
|
Post: #20
Title: Re: عمري بيناتكم سنة
Author: الجندرية
Date: 07-31-2003, 08:40 AM
Parent: #1
وعقبال مية سنة ياالبدر الحنين
ما ستغرب ما قالوا بعد فكوا شفرة الجينوم متوسط عمر الانسان ممكن يصل الالف
|
Post: #21
Title: Re: عمري بيناتكم سنة
Author: بدرالدين شنا
Date: 07-31-2003, 11:57 AM
Parent: #1
بسم الله الرحمن الرحيم
الجندرية النهج
سلااااااااااام وإكرام
وإنت طيبة يا بت أمي
هي بالله شفرة الجينوم فكوها؟؟؟
وأنا ليه ما أدوني؟؟؟
إنتي عارفة أنا شفرة جينومي بتكون إنتهت زماااااااان وكما دايراني أعيش عشان أشوف الهلال والمريخ الف سنة تاني؟؟؟
بري إتحوينا النبي
|
|