منو فيكم أحمد الزبير

بسم الله الرحمن الرحيم

قبل يومين قلت أرسل رسالة لحبيبي الملا عمر في الهوت ميل بتاعو ولأني عارف عنوانه مين كدا الزبير أت هوت ميل عاينت في العناوين في الهوت ميل وأول عنوان فيهو الزبير وبدون أتبينه رسلت عليه رسالة بالعربي وجاء الرد التالي

Quote: who are you? do we know each other? How did you get my email?

فوجدت نفسي أسال نفس الأسئلة
من هو أحمد الزبير؟؟؟
هل نحن نعرف بعض؟؟؟
ومن أين لي بعنوانه؟؟؟

بعد شوية قلت ياخوانا يمكن الزول دا عشان رسالتي بالعربي وجهازو ما فيهو عربي ما قدر يتبين الحاصل
تاني قلت قلت يمكن لأني رسلت من عنوان غير الهوت ميل بتاعي والذي يعرفه فربما أنني لو حليت المشكلتين ديل يمكن يجد إجابات لأسئلته ويعرفني لكن المشكلة بقت أسئلتي أنا البجاوبها لي منو
يعني حتى لو عرفني أنا أعرفه كيف؟؟؟
فأتمنى إن كان الأخ أحمد الزبير من أعضاء البورد أن يرسل لي مسنجر يوضح اللبس الحاصل لي دا
وأرجو من الجميع المساعدة لسبر أغوار الفزورة دي
ولكم تحياتي

عزيزى بدر الدين لك تحياتى وكل الود معليش لللبس الذى حصل ونتواصل
اخوك احمد الزبير


























وييييييي وييييي غشيتك

ود الجعلي4
سلااااااااااااااام

البفتش عليهو أنا شايقي1

لكن يا بدر الدين كان ما بعرفك كويس !!!كنت قلت الزول ده رباطابي
ضحكتني الله يجازي محنك

ود الحاج كيف حالك
ياخي أعمل حسابك دفقت فيني الجمال الشايلو دا
لكن يا ابا ود الجعلي داير يتزوبر (الزبير) فيني أسوي ليهو شنو
تحياتي للأهل

This me Ya Beder Al Din

Its Nice to get an email from u even if u don't mean it.

and Elzobier is my Surname I USE IN MY HOTMAIL Email

يا بدر الدين شكيتك على الله الزول دا عرفتو شايقى كيف
اصلو ايميلو كان مشلخ والله شنو لكن لقيتك مسيييخ مسخ والله تكون شايقى وكنت لابدلى يازول مافى عوجه بعتزرلك
تانى ولك ولعموم الشوايقه العتبى حتى ترضون

المحبوب أحمد أمين سلام

Quote: who are you? do we know each other? How did you get my email?

يعني دا إنت الهرشتني؟؟؟
ياخي وأنا كمان سعيد بمعرفتك وياريت ترد على رسالة الإعتذار التي أرسلتها لك من ذلك العنوان عشان تبقى في كومي زي ما قالت د. بيان

لكن لازال السؤال قائم
عنوانك دا الجابو لي أنا شنو؟؟؟
والخلاني أنا أحفظه ضمن قائمة أصدقائي شنو؟؟؟
والله لكن الحكومة دي شديدة خلاس
ولا دي ما بتسويها الحكومة؟؟؟
يعني خلاس ختيت البلاطة وقفلت لي بوستي؟؟؟
هسع تاني الناس يقولوا شنو؟؟؟
حايقولوا أحمد الزبير ولقيتو تاني داير شنو؟؟؟
ولا داير تهدر الباندوث
ياحي مرة تانية أكرر سعادتي بك وبيناتنا مسنجرات


ود الجعلي4
سلااااااااام
تظل صديقي وحبيبي وأنا سعيد بذلك

فخور انا بمعرفتك وصداقتك وحبك اخى العزيز بدرالدين
والله دوما اباهى بك واعتز بك اخى الكريم وكما يقولون الرجال معادن
لك تقديرى وتحياتى وحبى

حسى الزول دا يعنى لقيتو ولا نواصل البحث ، المشكلة اذا اتلقى الزول دا بوستك ببقى ترمس لا ما بصل درجة البيض بس شوف ليك بوست تتكوم فيه

ود الجعلي سلام
طبعاً سلام دا ما جدك وإنما تحية ليك
أخي اشكرك على هذا الود وهذه الأريحية والكلمات الطيبة ومعزوم عندي فنجان جبنة في المسنجر
لك تحياتي


عشة بت فاطنة
سلام وسعادة بعودتك من السودان

أنا لمن شفت أحمد أمين قلت دا أحمد الزبير لكن لمن إتقابلنا إتضح إنه ما هو فالبوست مستمر والبحث مستمر
لك التحايا

ما شفتو عوض
يا ساري الليل ما شفتو عوض
// // // //
// //
//

اها لقيتو عوض
ولا دي حركه استمراريه تكنيكيه بورديه مستتره اخت الضمير المستتر الراجع لعوض
غايتو احمدالزبير ما عرفتو لكن متاكده انو
ماانا
بدرالدين ازيك وطولت منك والله من الكومداكا
ونكته عوض كان ما عارفها بتبالغ والله يعوضك
باحمد الزبير
توما

توما/هوك
ما شفتو عوض؟؟؟

بري بري ما شفنا
لكن ممكن تسألي منو أهل العوض
القطاعة فوقك كان ما حكيتي لي نكتة عوض
تعليقاتك نفاخة جضوما بالكوميديا
الله يخليك ويزيد كومك

بدر الدين

اسف جدا اذا تاخرت فى الرد عليك

نسبة لمشغوليات منعنى من دخول البورد الايام الفاتت


انا من تقصده انشاء الله خير


ود الجعلى اعتزارك مقبول انا عن نفسى وبما اننى اجمل الجنسية الشايقية اتقبل بصدر رحب اعتزارك يا عزيز


اها يا بدر الحاصل شنو ؟

بدرالدين الشفيف
الحمدلله انك لميت في زولك
اها ممكن تفتش لينا عن ناسنا كمان ؟ ولا الباب قفل
يا بدرالدين شاكوشك ده تعبني خالص
عمل لي صداع في عيني

بدر الدين اخوي القطاعه الله بسالني ما بقدر عليها مش كفايه قطعه البورد الامس..اها فيما يخص العوض للعوض الذي فيما يخص العوض
انو ادروب ود عمنا عندو رمله بارده بياخد ليهو فيها جمه زي بوستك ده اها في ادروب تاني لكن داك عندو لوري بغسلو ليك مع غناء
تقيل ترا ترا ريرا //وما شفتوعوض// يا ساري الليل //وماشفتو عوض يا ساري الليل//ما شفتو عوض//ترا ريرا ريرا //
اها صاحبك ابو رمله شاميهو ليك جنس شمه عاد
حاميهو ليك النوم بنبيحو..ونفس الاسطوانه
العوضيه مع الغسله اليوميه ..اها يوم صاحبك جاء لقا ادروب غيرالاسطوانه يغني يا بلدي يا حبوب // ..//
قال ليو ادروب يااا..لقيتو عوض..
??


القطاعه الجد كان ماضحكت عاد
توما

بدرالدين الما شين
انت من احمد الزبير قبلت على عوض
شنو يا بدر
بعدين شاكوشك ده وحياة الله قرب يجيب لينا افغانستان في راسنا
توما اللذيذة
النكتة عندك
تسلمي

ود العجمي سمين

Quote: انا من تقصده انشاء الله خير

طبعاً خير
بس كنت عايز أسألك من واحد إسمه أحمد الزبير
نحن من ود الجعلي لي ود العجمي


ميّا أنا زولي ما جا
ميَّا أنا زولي ما جا
إنت عارفة الشاكوش دا عبارة عن (أنتي فايرس) لفيروس المحبين الحايم اليومين دي زي ما قال أخونا ابا
بس إنتي حاولي ما تعايني ليهو


اهاهاهاهاهاهاهاها يا توما
نكتتك شديييييييييييدة

عندي بت عمي فرحانة بي جزمتها الجديدة ومنوماها معاها في العنقريب
أها خالي جاء الصباح لقاها خاتاها تحت المخدة
المهم حاول يصبحها وقال ليها
سميرة شديدة؟؟؟
قالت ليه
آي جديييييييييييييدة


ميَّا هوي عوض دا حق توما ما حقي
شاكوشي شي شي شي
قروشي شي شي

كان تعارف جميل
وصدفه ساظل ما حييت اترنم بها

اخوك احمد الزبير

والله ياتوما لكن ضحكتينى شديد عشان كده بهديلك النكته دى
واحده مكرها راجلا الا تجيب لى توب النجده ومتلحاهو ليك
النساوين كلهن رجالن جابولن توب النجدة انت خبارك
آبتجيبو لى الراجل مفلس والتوب موضه جديده كان غالى
قالها والله يا مره تانى بس تقولى كلمة النجده دى فى لسانك
انت طالق اها يوم ماشين هى ولدها الصغير فى السوق جات
فوقم عربيات حقات نجده الشافع قعد يكورك يمه يمه ديل
عربات شنو قالت ليهو اجى يا ولدى ديل ما بصات مدنى
عاد يا توما كان ماضحكتى تكونى شختى لى جنس شخيت

ود الجعلى

اعترازك ما بيفيدك

يا زول مالك فطيتنى
كنت احضر جملى التعبيرية واطرزها من اللالوب
تجى تفطنى
يا زول انا نطيت من قبول اعتزارك

امازحك على طريقة الجندرية حينما تحاكى شيرى
الموضوع بقى بنات ساكت يا جعلى لكنهم جميعا اخواتنا
قال جندرية قال

بدر عرفتنى كيف ما احمد الزبير

الحبيب ود العجمى لك تحياتى وكل الموده وانت تجاهد خلف الدتسون ميه واربعين مرات دفر مرات جر ربنا يعينك
قلت لى ما قبلان اعتزارى يا اخوى هو على كيفك مره
تقبلو مره ترفضو انا غايتو طوالى بشيل الكلمه الاولى
بعدين ياخى انا ما كلمتك قلت ليك خطيبتى بتحب فيروز
وقالت لى كلم صاحبك دا يهدى لى اغنيه هسع نسيت اسما لكن
كنتا كاتبو فى وريقه هنا
المهم يا زول عشان غلاوتك عندى مستعد اعتزر ليك مية
مره بس اهم حاجه تكون راضى
وبينى وبينك انا زاتو شليق الودانى زاتو اخفف فى دمى شنو واهدى للناس وانت قاعد تحياتى لك عزيزى

الغالي هوب فل
سلااااااااااااااامات

Quote: اخوك احمد الزبير

أها وجمال عبدالرحمن التحت دي خاتيها لصلاة الجمعة؟؟؟

ود الجعلي حبيبي
توما مافي لمن تجي بقول ليها أحمد الزبير جاء ومالقاك وخلاّ ليك النكتة دي وأنا ضحكت منها قدر كباية وخليت ليكي باقيها

ود العجمي سمين
إحترامي
طيب وأنا رديت قبل شوية لي منو ولا ااااه ود الجعلي
ياود العجمي ما تنط من إعتذارك لي ود الجعلي وسلموا لي على أخوكم ود البدري

ود الجعلي تاني سلام عليك
أنا لمن شفتك تاني إتخيلتك داير تقول لي عملت شنو في النكتة بتاعتي؟؟؟

Quote: منو فيكم أحمد الزبير

ده ما انا واللهي يا بدر الدين
بس عشان ما تختلط عليك الأمور
حبيت اوضح


تحياتي
زولة123

الأخ العزيز زولة 123
ياخي ماتخاف فالأمور ما بتتلخبط علي لأنو أحمد الزبير بتاعي ما عنده لييسن
مداخلتك حلوة يازولة
تحياتي

والله يا بدر الدين قطعت مصارينى عديل كده من الضحك قلت لى ما عندو ليسن كيف عرفتو ياخى انت بوليس حركه ونحن ما عارفين بعدين شكلو كده بوستك بقى يلم النحل
العسل
يا دكتوره والله لو احمد الزبير عارف انو الايميل بتاعو دا
بلخبطو مع ناس حلوين وراقين زيك كان بقى فايروس
واترسل لى كل الناس بعدين يا البدرى والله حقو تحتفل
بانو البوست دا جابليه ناس عندهم ليسن والله شنو يا
شباب

تاني جييييت
ناس بدر الدين ازيكم
ود الجعلي سلامات


لوووول لوووولين علي من
نكتتك ضحكتني زي بالفين دولار لكن بدر الدين
استغل غيابي وقرطعها وهاك دي بدل نكته قالو المره مكرهه راجلها بالمشاوير يومي
بكاء منو وفلانه عيانه والنبي بس اتناول لي
حاجه من طرف السوق وتمشي تلطعو بالساعات
اها يوم حلف بالتقطعو ما يوديها والنبي
واموت ليك كلها ما اشتغلت عليك الله
فتحيه صحبتي دي ابوها مات بس اعزي امها
وامرق ولا بقعد..قال ليها اسمعي هنا انا بقيف ربع ساعه بضرب بوري واحد التاني
ما جيتي التالت ولا تجي ذاتو انتي طلقانه
اها مشو دخلت تعزي في البنات وماشه علي امهم سمعتهم قالو فتحيه ذاتو في التلفون
مسكت السماعه تبكي وتعزي معاها سمعت البوري
كلفتتها سريع وجاريه تعزي الام عشان تتخارج
سمعت البوري التاني ..مسكتها زلعه مدت يدها
علي راس المره وبالها في البوري التالت
وقالت تيييييييييت


والنكته المناسبه مهداه الي احمد الزبير ومنه
الي بدر بن شنا ..يجده بخير
بدر الدين ما تحاول تعمل زهجان ولا خايله فيك والله
توما

يا بدر الدين وناس الدكان والراكوبة الجنبو

ياخ دا ما أنا . يعني ما عرفتني ؟ أنا ما كنت بقدم برنامج أشكال وألوان في النصف الأول من الستينات وحصل استضفتك في فقرة المواهب وإت قلت لي بقطع ليك جلابية ... أها ومن ديك لا إنت لا الجلابية .. هسع الشورة كيف .. بتجيب الجلابية ولا نجدع البدل والقمصان ديل ونتعارك بالأيدي والنعل وجريد النخل ونخلي عسير فد تكل .

بعدين سلم لينا علي المولى عمر
أخوك في التاريخ أحمد الزبير ، أهل العوض باللفة والشنقيطي

يا بدر الدين
تحياتي

يا خي شوف لي شغل معاكم انشاء الله مساعد لوري
الواحد أكتشف أنه عنده مواهب مدفونة
معقول الايميل بتاعي عمل ده كله بعدين الواحد أصبح مشهور بالعافية
والبركة فيك وفي ايميلك الصايع ومتلقي الحجج

ودمت
أخوك
أحمد الزبير
الحقيقي

والله أنا كنت بتعامل مع الناس المشاركين في البوست ده كلهم على أساس إنهم ناس عاقلين

لكين
تبدي لك الأيام

يا أخوانا واحد بيفتش على أحمد الزبير
يعني زي اللي بيقول
أين مي؟
وهو بيرددها من زمان بس حتى الآن ما حد رد عليه
وإلا كان بنات السودان كلهم يكونوا مي ، وكل واحدة تقول الراجل ده بيناديني
وبعدين يجي واحد أبو شنبات كده ويقول للراجل اللي بينادي مي
يا مالك ومال بتي ؟ بتعرفها من وين ؟
وتقع الشكلة وطبعا الزول أبو شنبات حا يضرب الراجل اللي بينادي على مي
وبيني وبينك يستاهل
لأنو ما ممكن يكورك في نص الشارع
يا مي
يا مي

بمناسبة غياب بدر الدين
وعودة الملا عمر

أهل العوض والعضد شكراً جزيل على تفقدك للأخوة والأخوات الأحياء منهم والأموات ، والشكر قيزان قيزان لأهي أبو أواب وربى بدر الدين شنا الذي خصني برسالتين إحداها بالهوت ميل ولم تصل وسمعت تحت تحت بها سمع ساكت من جمعكم العامر هذا والرسالة التانية كانت من تحت الماء ووصلتني عن طريق الأوت لوك أدخل ليك وأجي ألوك ألقى صورة بدر الدين شنا الما بتغباني بقميصو المخطط تكتلني مغستو في وشي عديل كده.
أحمد الله كثيرا أن إسمي ليس أحمد الزبير حتى لا يضيع ويتفرق بين ود العجمي وود الجعلي وأحمد أمين وهوب فل وزولا وعاشه بت فاطنه وتوما وحتى أنت يا أيها العوض.

ناس البوست
سلام
بمناسبه غياب الشنا واحتكار الحلا للبوست

ويا بدر الدين يا ود امي الله يجيبك بالسلامه ووالله فاقدنك فقده شينه جد

ود قاسم..يمين انا دي الكنت قايلاك عاقل

اهل العوض والملا عمر ازيكم بالنيابه مع فايق الحلاه
ولا ببقا لبدر الدين ولا حاجه..
توما