هم فاكرنها بتعيط عشان الفلم

لمن جاني خبر وفاة الوالد كنت في الصحراء فلملمت أطرافي ومشيت مسقط العاصمة حيث معظم أقربائي هناك أبن خالي وزوجته وعياله وكذلك الرحمابي إبن أختي ومجموعة أخرى من الأهل والأحباب .. المهم أقمنا مجلساً للعزاء في منزل أبن خالي وتوافدت علينا جموع السودانين كعادتهم بأعداد مهولة وتبودلت كلمات العزاء والتخفيف
الفاتحة آجماعة... اللهم ربي أرحمه... جيب موية ياولد... أدي عمك داك شاي ... ودَّي الكبابي دي
يازل كبابي داخلة وكبابي خارجة وسيرمس داخلة وسيرمس خارجة ... جبر الله كسركم ... شكر الله سعيكم ... جو ملئ بالحزن والبكاء ... واحد من الأولاد مشى المطبخ يجيب شاي لقى ليك الخدامة الهندية تبكي فإندهش لهذا الحزن أفتكر أن جو الحزن أثر عليها وبكت فسألها بتبكي مالك؟؟؟ قالت ليهو (واجد قلاس) وهي تقصد أن عدة الغسيل كتيرة فحاول يبرر لها هذه الزحمة والجموع الكثيرة من السودانين فقال ليها إنتي عارفة نحن عندنا عزاء قالت ليهو عارفة وعشان يخفف عليها أكتر ويستدر عطفها قال ليها إنتي عارفة المتوفي دا يطلع منو؟؟؟ قالت لا .. قال ليها بتعرفي بدرالدين؟؟؟ ... أيوه بعرفه ... أها دا أبوهو
فإندهشت وشهقت شهقة طويلة وبدت تردد أووووه نو ... أووووه نو (وصورة بدرالدين الشايب الشين تتراءاى لها) أووووووه نو ودخلت في حالة أشبه بالصدمة حتى أشفق عليها الجميع وقعدوا يلوموا في الولد قالوا ليهو ما كان تكلمها هم فاكرنها متعاطفة مع بدرالدين وبعد دقائق قذفتهم بهذا السؤال
بابا حق بدرالدين عايش حتى الحين؟؟؟

تانى
جبرالله كسركم يابدر الدين

البركة فيكم يا بدرالدين

بدر الدين الحبيب القريب
تاني رمضان كريم
و تاني عودا حميدا
أما هنا ،، فقد إنتزعت البسمة من بين أكوام الحزن كعادتك ،، فلك المعافاة
ألا رحم الله ذلك الشيخ و جبر كسركم و وضع البركة فيكم و في ذريته ،، آمين

ربنا يرحم امواتنا جميعاً يا بدر الدين
تعرف كنت قايلة الحركة دي يمنية بحتة
لانه كان كل ما اقول ابوي .. يقول لي " ابوش عادو بخير "
لحدي ما قصرو لي عمره .. اتاري الهنود برضو عندهم
تكون ياربي اسيوية ؟

بدر الدين البركه فيكم
واحسن الله عزايكم
ورمضان كريم
لكن الهنديه بالغت معاك
وتسلم يا ملك
ودعقاب

ملكة سبأ وملكة البورد سلااااااااااام
تاني شكر الله سعيكم وبارك الله فيكم ونحن الفراش رفعناه لكن أنا قصدت المفارقات البتحصل بين حزني على أبي وحزن الخدامة من كترة غسيل كبابي العزاء والفقد قطعاً ليس واحداً بالنسبة لنا الإثنين بالإضافة لشهقتا ودهشتها من أن بدرالدين العجوز الماثل أمامها بشيبه وشناته لايمكن أن يكون أبيه عائش حتى الآن وما بالك كمان يسولوا عزاء وغسيل عدة كمان
لكي تحياتي وتقديري يا ملكة

حنينة الحنينة
الله يبارك فيك يا بت أمي

المحبوب أبو جهينة
سلام يحمل كلام مضمونه حبي

Quote: أما هنا ،، فقد إنتزعت البسمة من بين أكوام الحزن كعادتك

فهمتني صاح يديك العافية

الجندرية النهج سلااااااااااام
أنا شيبي وشناتي وكرفسة وشي هي الجابت الكلام لي أبوي الله يرحمه إنتي مالك كان ماها حسادة يمنيين ساكت
الله يرحم موتانا وموتاكم وموتى المسلمين جميعاً

صديقي ود عقاب
سلاااااااام ورمضان كريم ياخي
والله فعلاً الهندية بالغت فيني الله لا بالغ فيها
تحياتي وأشواقي

بدر الحسن فات القبله ووراهو

ازيك يا بدر الدين، والشوق بحور والله

اعتقد انه ناس الدراما بسمو الشى الزى ده كوميديا المفارقة ولا اسم قريب من كده تقريبا

المهم فى الموضوع انه مين الشخص العنده سنس أوف هيومر ويقدر يخلق موقف ويولد حدث جديد تانى من الحدث الأصلى

والزول ده طلع ياهو انت

انشاء الله تلقى العافية دائما وتسلم يا أجمل الحلوين

بدر الدين السمح
تسلم أيها النبيل
كعادتك تحمل إبتسامتك حتي في المواقف المؤلمة
رحمه الله رحمة واسعة

الصديق بدرالدين
البركة فيكم
رمضان كريم وليك مليون وحشة

عبدالله جعفر

الاخ البدرى
دوما نجدك كما عهدناك
تنفح البسمات حتى فى احلك المواقف
له الرحمة ولكم الصبر وحسن العزاء
ولنا منك احلى المواقف
يا سودانى وااااااحد

الغالي مطر الإبداع سلاااااااام
طبعاً النكتة دائماً تتطلع من صلب المفارقات والموقف الكوميدي عموماً أساسه المفارقة وأعتقد ناس الدراما بسموها المفارقة الدرامية ولا شنو يا تماضر وعشة؟؟؟
أحي فيك هذا الشمول


الرائع خالد
إنت صاحب الإبتسامة وحقلها شوقي لك أيها الشفيف


صديقي وحبيبي ونور عيني عبدالله جعفر
تحياتي وأشواقي وأسال المولى أن لا يريك مكروه
وين أراضيك عشان أجيك واراضيك


العزيز دباش
سلااااااااااااام وإحترام
شكر الله سعيكم ورسم الإبتسامة في وجوهكم
تحياتي المتدفقة لك

الاخ بدر الدين
انشاء الله البركه فيكم تاني
ومعليش...كل زول في همو

الموت حق قول نكرره في كل حين، ونزيد في تكراره عندما نفقد عزيزا أو نواسى صديقا مكلوما، رحم الله والدك أخي بدر الدين. ومن عمق كل هذا الحزن أجد في كلماتك قوة المؤمن بقضاء الله وقدره وروعة المسرحي بمقدرته على الإضحاك والإمتاع دون أن يكون في ما يعيشه من أحزان أثر على إبداعه. ويبقى الحزن هو الوجه الآخر للفرح وكذلك الفرح الوجه الآخر للحزن وكل شئ في هذه الحياة نستطيع إختزاله في هذين الشعورين.

حنين سلام
الله يبارك ليكم في كل خطوة تخطوها
فعلاً كل زول في همو والفقد ليس واحد بالنسبة لي ولها
أنا بعيط عشان أنا يتيم وهي بتعيط عشان (العدة) ضيقة


أخي وصديقي وحبيبي الملا عمر
سلام ورمضان كريم وإنت طاعم دائماً (طاعم في السن) نضمك حلو ومليان ومكنكش في الحقيقة ربنا يحفظك ويحفظ فهمك الزايد
وكل سنة وإنت طيب

الجميل بدرالدين أولا أحسن الله عزاءكم في الوالد رحمه الله و نسأل الله أن يغفر له ويتقبله

يا سلام عليك يا بدر وأنت تمنحنا الابتسام من عمق أحزانك و صحي كل زول بهمو

الأخ بدر الدين

أحسن الله عزاءكم
مع التحايا
ورمضان كريم

دبيب

ياسر المحجوب من كل عيب
سلام وتقدير وإرتياح لمداخلتك الرقيقة
لك تحياتي وربنا يحفظ ليك أحبابك


أخي وصديقي دبيب
بارك الله فيك وشرح صدرك للإيمان ولا أراك مكروهاً

انا زاتى فهمت يا بدر الدين
لكن انا عاد بدر الدين ؟ زى ما قالو ليك تمنح الابتسامة من عمق احزانك

اهاالخدامة كان تحن عليها وتناولها جرادل الموية
بالمناسبة جردلك البغادى لسة ما اتملأ ؟؟

ملكة البورد والفهم سلام
وأنا زاتي فاهم إنك فاهمة أما الإبتسامة فوجدناها بين سبايط تمرك وكت الحش
هي لكن جردلي البغادي ما بالغ عديل أنا يوم جيت أشيلو ما قدرت أدخل لقيت الباب مدكرنو بي عود ولا تاكلنو بي مسحانة دحين بتعرفي المسحانة يا الملكة؟؟؟