لعناية والى الخرطوم ودكتورة تابيتا بطرس انقذونا نحن محاصرون

عندما خرج علينا الوزير عبد الباسط سبدرات فى تصريح له بأن الفساد فى السودان لايحتاج انشاء لجان متخصصه قولنا يازول مافى مشكله وصدقناك نعمل شنو ؟ وعملنا ماسامعين وعارفين تلك التقارير الصادره التى تؤكد ان السودان من الدول المتقدمه جدا فى مجال الفساد بل مذدهرة ويانعه ومسمسمه تسر الفاسدين ...ومن منطلق ان المؤمن صديق مشت علينا ايضا قصة تلك الوظائف التى وعدت بهاالحكومة الخريجيين وان الاولويه ستكون للمواطن بعدها تدفق المئات من الاجانب داخل البلد وقولنا يمكن جايين سياحة ولم ننتبه الى الامر الا حينما رأيناهم يشاركوننا فى لقمة العيش ويتزاحمون معنا فى المواصلات وعندما استفسرنا عن طبيعة هؤلاء السياح وجدناهم اصبحوا مواطنين يضاهى دخلهم دخل اجعص موظف من المواطنين الغلابه وقولنا مامشكله (الفقرا اتقسموا النبكه) ومع مرور الوقت وجدناهم قد خطفوا النبكه وتركوا المواطن خشموا ملح ملح ، عشرات ومئات من الشباب لايجدون فرص للعمل ومثلهم من مطاريد الصالح العام الذين وجدوا انفسهم فجأة خارج الملعب مع انهم لازالوا يستطيعون العطاء ففرضت عليهم مهرجانات التكريم التى لاتتعدى سوى عبارات الشكر ان وجدت وتلك الشهادات التقديريه التى لايمكنها ان تفى بمتطلبات المسيرة الطويله التى تتنظره مع مبلغ مالى بسيط نظير تلك الخدمه الطويله وضع داخل مظروف بعنايه فايقه وكتب بخط جميل عليه السيد:فلان الفلانى... وعندما فتحه وجد المبلغ يسخر منه...هذا بشأن المشاطيب المكرمين هذا يعنى ان هناك اخرون خليهم ساكت .. دعونا نقلب الموجه فجأة لان هذه المشاكل لاتنتهى ونمشى لى والى الخرطوم ودكتوره تابيتا

اليوم ياسعادة والى الخرطوم ويادكتوره تابيتا وزيرة الصحة بالولاية والشريكه الاصيلة فى الثروة والسلطه لانريد ان نثقل كاهلكم بالاعباء وليس لدينا مطالب للحكومة سوى طلب واحد، الان سنترك الحديث عن كل تلك الكتل من الهموم والمشاكل (التحول الديمقراطى والانتخابات والشفافيه واجازة القوانين وحرب دارفور وانفصال الجنوب والصالح العام ) وسننسى لبرهة من الزمن اخواننا ممن يعانون ويلات الجوع والمرض والفقر والحرب فى شتى ربوع سوداننا الحبيب سننسى من لم يجدوا من يكفكف دموعهم لسنوات طويله ونتحدث بانانيه عن مشكله اظنها مضحكه ياوالى الخرطوم بل تدعو البعض الى اتهامى بعدم الموضوعيه ومعهم كل الحق لان الهموم اكبر لكن صدقونى دعونا نصرخ بالاشياء الصغيره علها تقودنا الى الاكبر مع انها مشكله حقيقيه تقاذمت امام مشاكلنا الكثيرة

ياوالى الخرطوم ويادكتوره الباعوض الباعوض الباعوض اكلنا عديل وحمانا حتى النوم الذى ينسينا لساعات مانحن فيه،، فى كل مكان تجده انقذونا نحن محاصرون حاولوا ولو لمره واحده ان تفكوا الحصار عن هذا المواطن المغلوب على امره .
لانريد كبارى طايره ولامشروع بصات جديده ولامطار جديد ولا ابراج تعانق السماء ولاطريق مسفلت فبئس طريق مسفلت ومنسق يمشى عليه انسان مهدوم نريد ان ننام كما ينام الناس..هل تعلم سيادة الوالى ان المبلغ المقترح لصيانة كبرى بحرى وترميمه يمكنه ان يطرد الباعوض الى اقاصى الدنيا هل تعلم ان مبلغ مثل هذا اذا استخدم لطائرات الرش ولاصحاح البيئه يمكنه ان ينقذك من دعوات ملايين المتضررين..لاتخرجوا علينا لتقولوا ان هذا الباعوض غير ناقل للملاريا فلن نصدق هذا الخروج
لانه ناقل للملاريا ولان الملاريا صارت تأتى من قلة النوم اعملوا حاجه خلونا من اى مشكله تحلوها بى تصريح مامعقول المواطن يقضى كل يومه فى المعاناه والجرى ورهق العيش ليس فى خاطره شى سوى العوده الى المنزل للراحة وتكون المفاجاة بوجود معركه جديد تستوجب الصبر وقلة النوم ..

مالكم يامن تملكون الامر كيف تحكمون

Quote: بعدها تدفق المئات من الاجانب داخل البلد وقولنا يمكن جايين سياحة ولم ننتبه الى الامر الا حينما رأيناهم يشاركوننا فى لقمة العيش ويتزاحمون معنا فى المواصلات وعندما استفسرنا عن طبيعة هؤلاء السياح وجدناهم اصبحوا مواطنين يضاهى دخلهم دخل اجعص موظف من المواطنين الغلابه

تصدق يا أخ مدثر بأن هؤلاء الأجانب كانوا
يتدربون على أيدي السودانيين , سألت
أختي عن عملها في السودان في إحدى
القطاعات , فذكرت لي بأنها استقالت
لأنه بجيبوا ليهم أجانب عشان يدربوهم
ثم يصرفو رواتب بالدولار . ونحنا بالجنيه
أقل منهم بكثير

Quote: تصدق يا أخ مدثر بأن هؤلاء الأجانب كانوا يتدربون على أيدي السودانيين , سألت أختي عن عملها في السودان في إحدى القطاعات , فذكرت لي بأنها استقالت لأنه بجيبوا ليهم أجانب عشان يدربوهم ثم يصرفو رواتب بالدولار . ونحنا بالجنيه أقل منهم بكثير

د: يوسف حبابك الف
والله الامثله الزى دى كتيره وملت البلد
وماتعرف السبب شنو؟ هل هى عقدت الاجنبى
سؤال كبير محتاج لكثير من الاجابات
مودتى

لك التحية مجدداً أخي مدثر

Quote: هل هى عقدت الاجنبى

لا بأس بالأجنبي إذا كان خبيرأ في مجال من
المجالات غير متوفرة لدينا , ولكن أن يأتي
الأجنبي ويتدرب على يد المحلي , ثم يحل
محله فهذا لم أسمع به إلا في السودان ,
وقد تكون عقدة بالفعل .

الحبيب مدثر سلامات والله انته لو راجي سبدرات وامثاله تكون واطاتك اصبحت ياراجل الجماعة ديل ما بيعرفو العيب ....

سبدرات ده اول ماتولى وزارة العدل للفتره الاولى فى عهد الانقاذ كان راكب عربيتو شاف ليك شوام كده فى شارع المطار عاملين

ترويج لمحل بتاع حلويات وذالك بعرض عربية فى الشارع والنظام شنو ياعمك تشتري باسطة أو بسبوسة وادوك كبون للسحب

الوزير كشف للعربية المقنطرة فى الشارع و أول ما وصل مكتبو أصدر قرار بمصادرة العربية قال شنو مراهنة واكل اموال الناس بالباطل ....


قلنا كويس الراجل هاميهو المواطن المغلوب على امره بالباطل.......

تعرف يا مدثر قرارو داك كان فى أول رمضان والجماعة الشوام ما اتهنو فى الشهر الكريم ببيع الحلويات .... يجى سبدرات ده زاتو

فى نفس الشهر عمل ليهو مسابقة فى التلفزيون أظن اسمها من ذاكرة الوطن وقالو الجائزة عربية ....... يا راجل مالك السودان ده ما كلو اشترك فيها

لانو دى كانت اول مسابقة رمضانية اقدمو فيها عربية ... لكن المشكلة كانت انو الاسئلة صعبة خالص خالص بالذات العشره الاوخركانو ذي نهار رمضان فى السودان ....

الناس بحاولو اعرفو الحل للثلاثون حلقة وماقادرين الا ان جااتهم الاجابة من الوزير نفسه فهو من قام باعداد الاسئله لكن الاجابة كانت فى شكل كتاب يباع فى المكتبات قال اسمو شنو..


من ذاكرة الوطن تاليف عبدالباسط سبدرات

فتهافت عليه البسطاء والحالمين بالسيارة الموعودة ليجنى وزيرنا عبدالباسط الاموال بنفس الطريقة التى حرم منها بائعي الباسطة

هسى عليك الله احسن ليك تاكل باسطة وتشيل كبون للعربية وله تشترى كتاب عبدالباسط وما تاكل باسطة قال شنو من ذاكرة الوطن....


( لاتنهى عن خلقٍ وتأتي بمثله عارٌ عليك إذا فعلت عظيم )... ذاكرة الوطن تحتفظ بالكثر لامثال سبدارت الذى ينكر الفساد وهو فيه يرتع....


وياحبيبنا اشترى ليك ناموسية ونوم نومك وماتنسى تتعشي وله تااكل باسطة ... تحياتى

Quote: فتهافت عليه البسطاء والحالمين بالسيارة الموعودة ليجنى وزيرنا عبدالباسط الاموال بنفس الطريقة التى حرم منها بائعي الباسطة هسى عليك الله احسن ليك تاكل باسطة وتشيل كبون للعربية وله تشترى كتاب عبدالباسط وما تاكل باسطة قال شنو من ذاكرة الوطن.... ( لاتنهى عن خلقٍ وتأتي بمثله عارٌ عليك إذا فعلت عظيم )... ذاكرة الوطن تحتفظ بالكثر لامثال سبدارت الذى ينكر الفساد وهو فيه يرتع.... وياحبيبنا اشترى ليك ناموسية ونوم نومك وماتنسى تتعشي وله تااكل باسطة ...

والى الخرطوم ذاتو بيكون عندو ناموسية !!

Quote: بأس بالأجنبي إذا كان خبيرأ في مجال من المجالات غير متوفرة لدينا , ولكن أن يأتي الأجنبي ويتدرب على يد المحلي , ثم يحل محله فهذا لم أسمع به إلا في السودان , وقد تكون عقدة بالفعل .

يادكتور يوسف سلااام

والله كلامك صاح دى الا هنا عندنا فى السودان
على وزن فلم اشتده ساعده مش رمانى كتلنى
عديل والله يكون فى العون .. الغريب يادكتور
نحن من الدول القليله الاستعمار ماخلف وراه مظاهر
كبيره او طمس للثقافات او تأثير جامح نفسى اعرف
العقده جات من وين ... يعنى اذا سلمنا وقولنا انو
السودانيين مابتاعين شغل وماعندهم كفاءة اها زى حالتك
القلتها دى تسميها شنو والله شى محير
مودتى

Quote: فتهافت عليه البسطاء والحالمين بالسيارة الموعودة ليجنى وزيرنا عبدالباسط الاموال بنفس الطريقة التى حرم منها بائعي الباسطة هسى عليك الله احسن ليك تاكل باسطة وتشيل كبون للعربية وله تشترى كتاب عبدالباسط وما تاكل باسطة قال شنو من ذاكرة الوطن.... ( لاتنهى عن خلقٍ وتأتي بمثله عارٌ عليك إذا فعلت عظيم )... ذاكرة الوطن تحتفظ بالكثر لامثال سبدارت الذى ينكر الفساد وهو فيه يرتع.... وياحبيبنا اشترى ليك ناموسية ونوم نومك وماتنسى تتعشي وله تااكل باسطة ... تحياتى

خالد ياحبيبنا
ليك وحشه ياخ
والله لكن ياخالد شى يحير ده شنو البحصل ده؟
يعنى فى فنون فى الفساد عجيبه تذكرنى زمان بالحاوى
لمن كنا فى المدرسه يعمل ليهو مليون حركه كده ويوهمك
ويتوهك ويطلع فى النهاية هو الكسبان طبعا احسن لى
الباسطه يا اخوى .. اها ياخالد ذاكرة الوطن دى بس
بقت بتحتفظ للناس بالفساد دون حسيب منذ عقود طويله
عشان كده اى زول بيجى بيرتع وياخد دورة الفساد بتاعتو
وفى ناس بيبقوا شرنقه ومابتخارجوا تانى بالساهل وكل هذا
دون حساب ....
والله ياخالد الا ترسل لى واحده لانو الناموسيات الهنا مغشوشه
انا اشتريت لى واحده لقيت الباعوض بيحتفل حولى عديل استغربته
قلت ياربى انا اشتريت ناموسيه ولا طعم للباعوض ؟؟!!!!!!!!!!!
محبتى الاكيده

>

>