Post: #1
Title: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة)
Author: سجيمان
Date: 10-04-2010, 10:28 AM
Parent: #0
الزواج.. توافق.. واتفاق.. وقبول... بين اتنين رضو انهم يكونو زوجين.... وزمن البت لازمن يعرسها ود أعمها ولى... وبقت البت تختار زيها وزي الولد واحد... البيعجبها تعرسو... وان طلع كعب بعدين تاكل نارا...لكن بعض المجتمعات ما زالت تفرض الزوج على الزوجة بطريقة او باخرى...مرة بالترغيب ومرات كتيرة بالترهيب..
قرأت في احدى الصحف السعودية انه في الاحساء في السعودية..... يوم الزفاف... دخلت العروس الي منصة الزفاف... وهي لابسة كفن... كفن راسو عديل كما ذكرت االصحيفة السعودية... دخلت وهي تمشي الهوينا زيها وزي اي زول ميت ! والكفن يسوي "فطق فطق".... وزيادة في النكد... وبدل اغاني الزفاف وادلع يا عريسنا عروستك نايلون...شغلت العروس في الميكرفون قران كريم... واية(هذه جنهم التي كنتم توعدون)....بصوت مقرئ سعودي معروف هو الشيخ خالد القحطاني.. والشيخ يقرا ويبكي كمان..... والعريس بعد ما كان فرحان فتح خشمو من الخلعة والناس الفي الصالة كلهم اتخلعو واتهجمو وإتبهطو.... وبعد شوية العريس صحا من الهجيمة دي ما كضب و طلق العروس وهي في كفنها داك تلاتة طلقات.. بطول حسو.. ولملم بعضو وشال اهلو....العروس قالت عملت كدا عشان العريس ما عاجبها.... لانو بيشرب سجائر وبيسهر... بيشرب سجائر ولبست لو كفن يوم العرس....طيب دا لو بيشرب عرقي كان لبست شنو يوم العرس؟...والله غايتو جنس محن... زول خسران وتعبان وفرحان تجيهو عروسو لابسة كفن وتشغل ليهو اية( هذه جهنم التي كنتم توعدون)؟...العروس قالت قدر ما فهمّت العريس قبال العرس انها ما دايراهو ويا ود الناس اختاني ما دايراك... ما دايراك... هو لاصق فيها وحلف ما يخليها واستغل اهلها وضغطوها... اها اليضوق تراها لبست لو الكفن ووعدتو بجهنم.... والله الواحد خائف من الموضوات الما معروفة شنو دي تلم فينا هنا... ونسمع بي واحد... ماخد شاكوش من واحدة... وتكون اتزوجت واحد مرطب...ويجي صاحب الشاكوش.. ويدخل الصالة الفيها يوم العرس بتاع صاحبتو التي شوكشته..... براحة ويلبد ورا الاجهزة بتاعت الغنا ديك... واول ما العريس والعروس يجو داخلين بالزفة والزغاريت والهيلمانة فجأة يوقف الغنا..... يشغلهم سورة( تبت يدا ابي لهب وتب * ما اغنى عنه ماله وما كسب* سيصلى نارا ذات لهب* وامرأته حمالة الحطب* في جيدها حبل من مسد)...وبعد صدق الله العظيم.. يمسك الميكرفون ويقول ليهم( أها... بس!)
عش الزوجية.. الدايراهو عروس الجن السعودية دي
|
Post: #3
Title: Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة)
Author: فدوى الشريف
Date: 10-04-2010, 11:29 AM
Parent: #2
محن السواد والله ياسجيمان
|
Post: #4
Title: Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة)
Author: المر
Date: 10-04-2010, 12:17 PM
Parent: #1
ود اللحد دة مقاسو صاح؟؟
|
Post: #5
Title: Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة)
Author: علاء الدين حيموره
Date: 10-04-2010, 12:33 PM
Parent: #4
Quote: ماحدث بقاعه نياره في الرياض
----------------
السلام عليكم ورحمة الله وبركاته
طبعاً الناس في هذا الايام يحاولون يعملون فيديو كليب أثناء دخول العروس للمنصة .
ولكن ..
شيء حدث في قاعه ( نياره ) بالرياض ... مستحيل تصدق لكنها صارت
وهو أنه قبل دخول العروس للمعازيم ( الزفه ) تم تطفئة الأنوار كالعاده وكانوا
المعازيم ينتظرون دخول العروس مع صوت الموسيقى ولكنهم تفاجأوا بصوت
صياح وبكاء وكأنهم في مأتم ، إذا بأربع نساء يلبسن ثياب سوداء ويحملون فوق
رؤوسهم تابوت العروس وهي بداخله!!!
وماإن وصلوا الى المنصه
واذا بالعريس يدخل ويقوم بفتح التابوت ويقبِّــل العروسة ....
وعندها بدأ صوت الموسيقى والفرح وبعد ذلك قامت العروس من
التابوت وكأن الحياة رجعت لها بعد أن قبَلها .!!
عشنا و شفنا ..
|
http://www.kuwaikeb.com/vb/showthread.php?t=31246
|
Post: #6
Title: Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة)
Author: جمال محمود
Date: 10-04-2010, 02:44 PM
Parent: #5
دكتور سلام
فى انتظار مفجأتك الداوية
تحياتى
|
Post: #8
Title: Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة)
Author: cantona_1
Date: 10-04-2010, 03:34 PM
Parent: #4
حلفت يمين يا المر كان المر شاف الصورة الخاتيها في بروفايلك دي إلا يربطك في جمل هايج في شهر يوليو.. وبراك عارف البيحصل عليك شنو.
كبـَّـاشي الصــَّافي
|
Post: #9
Title: Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة)
Author: المر
Date: 10-04-2010, 03:38 PM
Parent: #8
| Quote: يربطك في جمل هايج في شهر يوليو.. وبراك عارف البيحصل عليك شنو. |
انا خايف هو ذاتو يتربط معاي في "الجمل"
|
Post: #7
Title: Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة)
Author: المر
Date: 10-04-2010, 03:25 PM
Parent: #1
| Quote: والكفن يسوي "فطق فطق".... |
امكن لابس "سفنجة" هاهاها
|
|