الــــق.......الــــق...... يـا العـــزابة

يا اخونا... انا ما بفهم في الشعر ولا في الادب....ولافي قلتو..... لكن بعد مرات اشوبر... وامشي المنتديات السودانية اقرا لي كلام كبار كبار كدي.... تلاقي سطر فيهو كلمة واحدة بس....وبعدو عشرة سطور مليانات نقط...وتاني سطر فيهو كلمتين........وصاحبو يقول دا شعر...والغريبة يجي زول .......ويرد عليهو ويقول ليهو ابدعت يا مبدع..... لقد احسست بك....حتى وجعتني نخرتي......يا معبرا عن شقاء سكان امبدة...والحاج يوسف والشقلة.....وعذابات مدمنين الشطة.....في ساعة امساك متالق.... واكون انا ما فهمت أي حاجة.... لا من صاحب الشعر ولا من الزول الردا عليهو....... انا عارف نفسي بليد بلادة شديدة....لكن ما للدرجة الما افهم ولا كلمة واحدة... يمكن اكون انا زول ساكت من العوام...ومن الناس الفارغين... وما عندهم أي تذوق للفن والشعر... لكن نوعي دا... اكل الكسرة والفول خلا لو لسان يتذوق بو شي؟...... لقيت كل االشعراء الفحول والشاعرات الفحلات ديل..... ماسكين لي في اربعة خمسة كلمات.... و يقعدو يرصو فيهن بالتناوب....... كلمة الق وكلمة بنفسج...ديل ساكنات سكنة....وبكرة تجينا الفنانة...... حواء بنفسج........ والله... سميرة الق الله......ويقعدن ...وكية لسجيمان... يغنن

الق.......... الق
يا العزابة

تاكلو دوم ونبق

يا العزابة


البنات بنفسجيات

يا العزابة

شايلات موبيلات

يا العزابة

ويرسلن مسجات

يا العزابة

و.............
الق ...... الق


يا العزابة

تموتو غرق

يا العزابة

..........والجماعة يرقصو...ويبشرو.....وكل مرة السجارة تتألق في خشم واحد....والعريس متألق....ومتشعلق في الكوشه... جنبو عروسو ... البنفسج ضوت السهلة....ونسيبتو الكان لونها بنفسج لكن الكبر دخل...وهدت...ولونها بقى فأري....من شقاوة الدنيا...ويسمع ابو العريس بالغنية ويزعل لانو فهم كلمة الق دي فهم تاني....ويجي ويشيل الدلوكة ويضرب بيها الواطة ويكسرها.....حتة حتة.....ويمسك حواء بنفسج ويديها القة.....ما حصلت... ويمشي علي العريس ويالقو..... من اضنيهو....ويحلف طلاق انو المرا قليلة الحيا دي تاني ما تفتح خشمها تغني.....

إنت يا سجيمان ياأخوي بعد كل هذا الخيال الخصب وهذه العبارات البنفسجيه داير تفهم أكتر من كده شنو ويظهر لي إنت فاهم حتى القيادة العراقية مشت وين والدنمارك ليه وافقت على إتفاقية ماستريخت وريفالدو ليه شاكل مدربو ومشى فريق تاني والمغتربين له خايفين من العودة إلى السودان والمعترس لي توقيع إتفاق سلام نهائي في السودان شنو وأبو الطيب المتنبي ليه شاكل كافور الإخشيدي وإمرؤ القيس ليه كان بجيب الشراب من الكمبو تقول لى ده كلام عوام وما إبداع أريتنا بي عومك كان كدي

الملا عمر........ الله يجبر بخاطرك كان جبرت بخاطري.............وانا طمعان ناس في ناس التألق والتملق يدوني نظرة........ بنفسجية كدا

ابدعت يا سجيمان يا فنان
...

( نحن قبيل شن قلنا ؟ )

من ناحية البناء والاندفاع الخواصى وتراتيب الجمل لاتثريب على الموضوع,قد يتسائل قارئ يجافى التأمل عن المعنى المتدفق للألق خارج سياق النص .هذه بديهيه نقديه تتجاوز حدود المعقول فى المعالجه

اها ياخينا كان ده كلوا ماعجبك شيل زولك المبلم ده وشوف ليك بلد

الغريبه
عندى واحده صاحبتى قالت دايره تسمى بنوته
ألق وعبق وشفق
وإحتارت فى إسم الوليدات
هسه بعد دا أرسل ليها أقول ليها سميه نبق وشهق وغرق
د/ سجيمان
أبدعت لكن يا مُبدع


الملأ عمر
تحياتى
الصراحه أنا مُعجبه جداً بكل ما تكتب
وآى بوست ولا رد طاير ليك بتلقانى ماسكه فى طرفه
أنت برضو مبدع لكن مُبدع دى يتخيل لى شويه عليك
دائماً بتفأجنى أنت وسجيمان وبت قضيم وشيرىوأهل العوض
بكلام ما بتخيله حته
دمتم آحبتى

سجيمان انتا من اساسو البوديك للمنتديات دى شنو كان ماها شلاقه منك ما تمشى تكدلك شوال قشى لى بهماتك ديك الضهلانات ومحبوسات فى الزريبة ديك والله بس بتعرف لى لقفى
لبن اماتن بى العصارة
اها آجنا المسنجر وصلت معاهو وين عاد شحتا ربى عليك
شاكوشا لامن يكسر رويسك المقودس دا عشان انا مية مرة
قلت ليك امشى غتى قدحك وبت عمك عبدالقا مستانياك

بصراحة
تدهشني كثيرا اخي سيجمان
بكلامك السيجمان ده
بمافيه من سخرية مبدعة
واستخفاف رائع
شفت كيف مدحت ليك المابتمدح
يلا يا ابو بنفسج
اتبسط وخلي سجمانيتك دي
تحياتي اخي
بس ده من اعجابي بكلامك الاعجب من العجب

سجيمان الجميل

وينك يا نبق

شايفك باقي بق


ما سمعت بي البعد الثالث للكلمة

وتحت السواهي دواهي

يازول لمن تسمع قصيدة تجيب معاك مفك وزردية

وتفككا حتة حتة

عشان تعرف التكوين الهلامي الراكن ورا شوية للتكوين اللفظي

وبعد تفكك يا الحبيب تجيب ليك

شوية بنزين تغسل فيهو الحاجات الفككتها دي

تلقى نفسك ما فهمت اي حاجة

تقوم تتصل بالشاعر

وتحاول تفهم منو

يقوم يقول ليك تفسير الشعر يفسده

وان سر الجذب في ان الشاعر نفسه لا يفهم ما يكتب

تقوم تكتشف انك متعب نفسك في الفاضي لانو الشاعر زاتو

زي اخوي الكاشف

سليمان
والله نحن نباريك ، نعدم المفصل ، والقايمة والمصران

لوووووووووووووووووووووووووول

وتاني

لوووووووووووول...يا فجراوي
انا بس..زي عايز اضيف حاجه بسيطة في الحته دي
وهي..انو..استدرار الانتباه خطيا..وبصوره مباشره..هو برضو شكل من اشكال التشبع الذاتي..لانو..قممية مخاطبة الانسانيه..ممكن تكون بالاشارة الي مواطن البدائع..او الي..مكامن الوضائع
والقوة الدافعه في كل.....البحث..عن الالق

سلام مربع

ويقوم واحد
والسجاره مولعة في خشمو
وقلم الرصاص على اضانو
والشعر لو زي شيطان الكوشه يكون زي شجر العوير(مع اني ماشفت العوير)لكن اتخيل حاجة كده شينه ومنكوشه وعويره
بالله افيدونا يا اهل العوض في المسعلة دي
لو وصفت لينا شجر العوير ، تكون ماقصرت وعلاقتها بالبنفسج والنوارس والمدى الامبرياليه
لاني عرفت اخيرا انها ترتهن صيرورتها
للرهاب الاجتماعي والالق العجوري
وينط ليك واحد تاني من الجمهور وعندما تهمس في اضان الذي يجاورك لتسأل عنه يشير ليك همسا بالسكوت ان الرجل من المثقفاتيه
ويبتدر كلامه(ذاك المثقفاتي) بعد تاصيل التلبك المعوي
والانغلاق الذاتي للكبد الفيروزي
الثالث
نقوم نحن في الحته زي
نقول انو الراوي اجترح التاصيل للبنفسجه

شفت كيف ياسيجمان انا بقيت من المثقفاتيه
وبفهم اوي في شكل المنقه

_______________
شكتيكم على الله يا بوش وبليير وصدام

شيري أو سيري في لغة أخرى ... والله اذا كان شجر العوير هو بتاع زمان (زمان دي زي قبل ربع ساعة كدا) ، فهو كالآتي ..

هي شجرة خلوية تنبت في مناطق شبه الصحراء أو السافنا الفقيرة ، طولها في أسعد الحالات متر ونص ولها أوراق عريضة أد إيه يعني؟..

كان يقال لنا إن الأغنام (السائبة) إذا أكلت من تلك الشجرة المباركة تقوم أرجلها زي تتعوج كدا وقد تصاب ببعض الارتيكاريا .. وللعوير فوائد غير منظورة ، فهو يستعمل كسياج شائك للمدارس في المناطق المتحضرة نص نص .. وتستعمل سيقانه بدل السوط لتأديب التلاميذ ، لذلك لنا معه ذكريات غير سعيدة ..

ودا كلللللو كان زماااان . أما عوير اليومين دي فيسأل عنه قرشو .

طارق........... شن قلتو؟



فجراوي انشاء الله تنطحني بقرة متألقة لو فهمت منك حاجة



وجن..... شكرا لك...... صاحبتك دي تصبر شوية يمكن الناس ديل يبحترو ليها اسامي جديدة


ود الجعلي.....بت عبد القا.... عرسوها وريحتنا

هوزي.........هذا زمن الاندهاش البلوري


قرجة............. لوووووووووووول مفك وزردية... يا مهمش



اهل العوض........انت مباري لك جزار؟


دافي.........لووووووووول ليك براك يابا



شيري.........والله ما عندك عوجة تب...... غايتو انا النضم عجبني وادهشني.....

looooooooooooOOOOOOOOOOOL wo nos wo khamsa
والله يا سجيمان باااااااااالغت عديل كدي والله العظيم ضحكتني ضحك لامن اتاكدت انه ايدولجية الفكر المعاصر بترتبط بصيرورة الابداع الكامن في دواخل الاندياح والالق البللوري .. لقيني كيف ؟؟ما ختري؟؟؟
لكن ات جنس النضمي بتلقاه وين كدي حدسنا النمشي نجيب زيك..
والله مبدع يا سجيمان وانا من زمان (حتى قبل ما اكون ريجسترد,,على وزن كاسترد)معجب بكتاباتك المفعمة بالسخرية الناقدة ذات المضامين العميقة
تااااااااااني رجع للثقافة معليش استحملني شوية بس ,,باقي انا لي زمن بتاوق من بعيد والليلة الكلم وقف لي في حلقي تب .....وقلتو




ود الجعلي انت زاتك لوووووووووووووووول




لكم الالق
والمدى
والبنفسج

جدو

جدو شكرا.... لوصفي بالمبدع المتألق.... في سماء البورد البنفسجية


والنار ولعت بقلبي بطفيها

دافي.........لووووووووول ليك براك يابا
لغاية الأسبوع الجاي حا أكون بضحك يا سجيمان يا أخوي قربت تبالغ.

وليد شكرا للدلوكة

الملا لما ابالغ اديني خبر عليك الله

سي دي مان

up

up

سجمان الدنيا رمضان ونحن ناس مشوكشين ارحمنا حلفت بى سيدى الحسن

Quote: وحدي ........ اقراك ياقصيده ............ وحدي والشارع كان فاضي الروح مليانه حزن .. مليانه بشوق زغرت للناس ناداها تجي ......... وطلعت هناك ....اعلي الانسان الحايم فينا ... قريتك تاني قصيده يا بلدي ... بحلم يمكن اوكات الريد تترتب انّا اعطيناك الفكره امرق كورك قول يا بكره ستّف وجعك جوّه خزاين الصرخه البكره ارتق جرح الورده بغنوه وامنح سوأة خوفك ستره ملّي الشوق للشارع النايم حزنك شكل حبيبتك واوعك تدّي الريح افكارك يشرد منّك وعي كلامك لحن الوتر الحاري مجيك عمّال واطفال وصراع اجيال ضد كل اشكال الزيف والهمبته والتزييف ياخ امرق كورك قول ياااا بكره

عليك الله يا سجيمان شوف الزول دا اسمه عاصم الحزين واتحداك لو تقعد لي يوم القيامه الضوهور اكان تكتب متله وما تلف وتدور وتقول لي لو خلوني لي العصر بكتب احسن منو لانه للعصر انت بكون دخلوك لظي. واسكت ساكت لوجبت ليك كلام الابيض وحات ربي الا دمعك يبقي سيول الا تكون زول قلبك حجر لكين حسب شوفي فيك انت جرسه وبكاي

سلامات يا سجيمان و تحايا

منذ أن انضممت للمنتدى و(ربما قبل ذلك) و أنا اتابع ما تكتبه باندهاش و تقدير أيضاً لبعض جوانب كتاباتك وعدة مرات هممت بالتعقيب لكن عندى مشكلة كبييييرة يا سجيمان مع
الpolitical correctness
أو انعدامه
يعنى مرة يثير البوست الحفيظة الجندرية عندى و أحياناًالحفيظة العرقية الخ الخ الخ و هكذا تختنق الضحكة فى حلقى قبل أن أتم قراءة البوست..

بالنسبة لبوست البنفسج هذا – بالإضافة الى أنه خفيف الظل كبقية كتاباتك وشبه خالٍ من الاشارات التى تناقض الpolitical correctness

أعتقد انه أثار نقطة هامة نحتاج أن نتناولها جميعاً هنا، وهى مسألة لغة الكتابة؟ و امكانية خلق تواصل مع من نكتب عنهم / معهم؟ اعتقد أنها غير قاصرة على الكتابة الأدبية بل تمتد للفن التشكيلى و الأنتاج السينمائى. وجود الناقد/ة هام كما قال الأستاذ ابراهيم الصلحى مؤخراً فى محاضرة بقاعة الكوفة لخلق هذا التواصل.
ليست المفردات وحدها أو اسلوب الكتابة بل محتوى الكتابة هو المهمّ
وخليك متابع نوع الكتابات دى (الجميلة منها زى القصيدة الفى رد دومة) و بعد شوية حاتلقى روحك أدمنتها و ما تعرف البخلصك شنو.

ولك التحية
ندى

اولا رمضان كريم .....

اهل العوض, قلتا لى

Quote: وتستعمل سيقانه بدل السوط لتأديب التلاميذ ، لذلك لنا معه ذكريات غير سعيدة

... والله طلعتى حنكوش يالبدقوق بالعوير .... عمرك سمعتا باسلحة جلد شامل اسمهم "البسطونة و الخرطوش الاسود"... لكن والله عجبنى وصف العوير somehow

سجيمان .... تعرف انك تحلق في سراميد الابداع عندما تجافى السياسة ....
خليك حريف و اوعك من الاف سايد .... دمت لنا

لوووووووووووووول
يا سجيمان
غايتو كتلتهم كتل

يا رائع يا الرجل الغابة

الأخ سجيمان تحياتي
مازال البيت أدناه في ذاكرتي من أيام الدراسة و اعتقد انه لازهري الحاج حيث يقول في مطلع قصيدة البنفسج:

و البنفسج لو تنفسج يبقي أفسج من بنفسج

لو كان البيت ده ما بيعني حاجة ما كان علق معاي كم وعشرين سنة ولا ايه رايك
تحياتي