شلعــــوهو....... الحــــلاقيــــن

زول طول في عرض.... وحكاية جهامة. وشنبو هاي وي.... حلاق.... سوداني في بلد غربة داخل غربة..... قلت قدر الشي المارقة لحلاقة دنقوسي دا..... اخير تمشي لو..... دخلت.. صنقرت فوق الكرسي.... جاب الفوطة..... ربطها ربطة..... اظنو ما تتفكا تاني علا بمفتاح نجمنجم....عليك الله يا الاخو ارخيها شوية... خليني اتنفس.... رخاها شوية الحمد لله.. علا وشي ورم واتنفخ....قلت لو... الاخو من وين؟ قال لي من امدرمان.... يا زول انت زولنا تب.... اهه من وين في امدرمان؟ قال لي ... من ارفع سدرك..قمت انا الغبيان شديت سدري لي برا.... قال لي ارفع سدرك دي ورا الفتيحاب. لكن اصلا من حتة في الجزيرة اسمها شلعوها الخوالدة.... اها... قلت لو اظنك طولت في شغلة الحلاقة دي... قال لي ابدا... انا اصلا.... وفي اللحظة دي كان يسن في الموس..... اصلا كنت جزار....اها انا هنا.... ضربات قلبي زادت وحاولت ابلع ريقي.. قلت جزار ؟.... قال لي... ايوا جزار وتصدق وتأمن بالله يا ابن العم ما بضبح علا بقر...تيران...التور ما ياخد في ايدي خمسة دقايق. ينضم معاي وهو يعضعض في شلوفتوالتحتانية...... انا بيني وبين نفسي قلت يا ربي انا الهوين دا باخد كم في ايدو... والله ورطة دي. يا سجيمان ما اخير لك كان تقعد بشعفتك؟... والزول دا نفسو قايم وعيونو منططات..الله يعدي الحلقة دي علي خير يا سجيمان..... دا لو عدت؟؟؟؟؟....بدا الحلاقة...وانا تحت ايدو مسيكين زي الزرزور..... وبدا يحكي وينضم..... تعرف يا ابن العم... العطبراوي بياكل خروف كامل ...براهو؟...وابداوود الله يرحمو نص التور دا يقومو جت...برااااااهو.... وقعد يضحك ويقرقر.... ومع الضحك مكنة الحلاقة قطعت راسي ماشة جاية يمكن اربعين مرة...... داير اعاين في المرايا....ما قدرت ارفع راسي... الزول عافص الراس بايد والايد التانية شغالة حلاقة....... ان شاء الله بركة سيدي الحسن الزول دا.... ما يقوم يذكر ايامو الخوالي ايام الضبح والسلخ..والله يعاودو الحنين لبلدو شلعو الخوالدة ويسوي بي السهوهو الخوالدة.. في الشي الشلعوهو دا.... ويتمرعف فوقي.....حكى لي يمكن ستين قصة...وكلها ضبح و سلخ واكل...و ساعة يجي يلف الراس.... وحات المكاشفي... اسمع عضام رقبتي ططقققققققققق.. يطقطقن.... حلاقة الراس انتهت...وانا ماني قادر ارفع الراس لفوق..... داير يبدا حلاقة الدقن... مسك حنكي من تحت....وطق... رفعو لفوق... لا اله الا الله محمد الرسول الله الموت حق والحياة باطلة.....الدنيا ضلمت في وشي...قلت لو عليك الله الحتات دي حساسة.. وبراحة.... قال لي ما تخاف يا ابن عم.... شدّ الجضم اليمين... اضاني صنت..وعيني غتست ما عرفتها راحت وين....واظنها كان قريبه تكون في نص راسي.....اول مرة سبحان الله الله اكتشف انو انا مصنوع من بلاستيك....الجضم الشمال شرحو.... الحمد لله .. الذي لا يحمد على مكروه سواه.... الحلاقة انتهت.... رجعت البيت..... الرقبه صلبت واتعسمت.... بقيت لا بقدر اعاين فوق ولا اعاين تحت... ان بقيت داير اعاين فوق علا ارقد في الواطا علي ضهري...وان داير اعاين تحت.... علا ابرك علي ايدي وكرعي........ الجضيمات ورمن وحالتن بقت حالها.... والعيونات الشوف بقى طشاش......والسمع تقل.....قلت انا من باكر دي اغير اسمي.... لي شلعوهو الحلاقين....

التحية ليك يا سجيمان وانت بتشجع البضاعة الوطنية
علا ما حدثتنا، اضانك التالته حصل ليها شنو؟

حبابك يا سجيمان
إنت ما وروك بحكاية الرباطابي
اللي راح محل الحلاقة وسلّم رأسو للحلاق
وجاتك نيلة يا رأس
وسخت الخلاقة بقت زي حرارة فرن التميس
بعد شوية في جمل يرغى في الخارج
الحلاق سأل الرباطابي : الجمل مالوا
الرباطابي قال له : أظنو بحلقو ليه
ههههه يكة
أحب الزول زاتو

يا دكتور برنجي........دي ما صناعة ....دي طهارة وطنية......... حسي يشطبوها




يا ايمو....... علي اليمين الجمل زاتو لو حلق ليهو زولي دا ما يقدر يقول بغيم

سجيمان

ها آآآزول حمدلله علي السلامه

قالوا ناس الشمار شافوك راجع من الحلاق مبلبل نعل ما عوجه

يازول الزول دا اختاهو تعال في جنبنا حلاق كان نجار سابق .. احسن ليك من الوحش دا .. علي الاقل دا بيستعدلك بشاكوش كان اتلفته

وبلدو اسمه شلعوها الاحامده

ماتتأخر حلاقتو بالحجز

هوبليس يا اخوي...... تاني ماني حالق تب...... لا شعلغعوهو الاحامدة ولا شلعوة.... ناس باكمبا.....بعدين انا زاتي الحلاقة العلي شنو؟ كلو واحد

قبلكم وحّدكم يا ناس سجيمان.. حلاقة شنو؟
لكن تصدق القصة دي ما مأمونة، في وكت من الأوكات حتى النسا بتقوم ليهن دقون.. في الحالة دي بس، نرجع لي بوستك دة نعرف مشاكل الحلاقة..
رباح

رباح يا اختي...... اليوم داك الله لا حضرنا ليهو....... يوم تقوم للنسوان دقون....لكن والله المصاورة البيسو فيها الخواجات ديل حتجيب لنا كوبة...........

سجيمان بن رميدان

والله يازول ماليك حق

انت الاتراك والسوريين الظراف

ديل غبيان منهم ولا شنو

على كل حال بركة الرقبة مرقت سليمة

اها اكان اتشلاقت مرة تانية الله معاك

كل الود

اخوى سجيمان
تحياتى

ياخو كان بقيت مع ناس الملا عمر ما كان احسن ليك

كان دقنك بقيت طويلة زى قمح الجزيرة بتكون سلمت من الجزارين لو وقعت فى مصيبة بقولو عنك ارهابى

وتمشى غونتنامو وهناك تلبس الاحمر الذى يشبة اللون البتكتب بيه

والتسوى بايدك يغلب حلاقنك

وشكرا

يا ابقوتة....... لكن شفت الجماعة رجعو... من قونتنامو... دي كيف؟ سمااااااان ولونهم فاتح...... تقول كانو في السعودية

ارتيقا بارك الله فيك والله يسلمك.....وان شاء الله رقبتك سالمة

تعرف ياسجيمان، عندي صاحب راجل نكتة زيك كده مقترح أنو عاصمة السودان بالتحديد تكون في شلعوها الخوالدة، وزي ما أنت عارف الحلاقين و سواقيين التاكسي أكتر ناس بيفهموا في السياسة، صاحبك ده أتوقعوا يكون في منصب خطير لو صدقت رؤية الصديق.

تعرف يا احمد امين دا يكون ............. وزير الداخلية بتاعهم

up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up up

القومه ليك يا سي جي مان........

تسلم يا سمير...... يا امير

يا حبيبو....بوستاتك واحه......واستراحه..........تسلم لينا انت...

كالعادة، دائماً رائع لكن المرة الجاية أعمل حسابك قبل ما تدنقرو لأى زول
إديك العافية

ماجد يا اخوي تاني بحلق عند الفلبينين.... صغااااااااااار...وان دايرين يعفصو بقدر ليهم

سجيمان العزيز

ازييييييييك

سلامة راسك يا اخوي

انت عارف انها بقي اسمها عمرة نميري بتشديد الميم

لانو فاطمة عبد المحمود مرة جات عندهم زيارة وقالت ليهم الاسم ده ما سياحب فقالو ليها اها نسميها شنو قالت عمره نميري

عباس حبابك




يا حليل فاطنة وزمن فاطنة



مسكينة حسي هي براها دايرة عمرة

وطعباً يا سى جى

هنا تحاول أن تميع و تبرر ما كتبتة فى بوستك الأول الذى كان عنوانة
(أبوماعارف منو)

فقد جاء ذاك البوست معبر صادقا عن رؤيتك فى (الزواج بين الحلاقين
و كان موقفك و رايك عنصريا وذلك لوصفك للرجل بالجزارـلووووووووووووووووول ـ بل أضفت ألية وصفك للحلاق بأنه فى بلد غربة داخل غربة...الخ،

ثم تبعتة بموقف جبان.... تحاول أن تصور فية أن و صفك (للحلاق) بالجزار.. ليس متميزا لأن أهل القبائل السودانية بأختلافعم يصفون بعضهم البعض بهذا...ثم... حاولت تبرير عدم موافقتك على
(أسلوبه فى الحلاقة
و هنا أتيت بهذا البوست محاولة يائسة منك للتخفيف من و قع الحلاقة الأخرى)

أها.....لقيتنى كيف؟