Post: #1
Title: الـــبـرجــوازي
Author: سجيمان
Date: 06-13-2003, 07:35 PM
خالتي التومة لا بتعرف تقرا ولا تعرف تكتب.ساكنة بوررتسودان...... مرا .. خبّارة....وعاوزة تعرف أي حاجة...لقتني قاعد اقرا في كتاب..... سعالتني..... منو.... قلت لها يا خالتي التومة.. الكتاب دا عن صراع الطبقات....ومعاناة البلويتاريا...وحقارة البرجوازية...واستغلالها للطبقة العاملة..... خالتي لة واقفة فوق راسي ...وغازا كوعها...وتعاين لي متمحنة في النضم دا....واستمريت انا في الشرح وهي برضو فاتحة خشمها وتعاين.......وفي النهاية قلت لها تعرفي يا خالة.....انا زهجت وقنعت من الدنيا دي وحبانها..... وعاوز ابقى شيوعي....قالت لي بتدور تشيع يا سجيمان يا وليدي؟.... قلت لها اقعدي ... انتي عارفه الشيوعية دي.... الحل الوحيد... للفقر والقرف النحن فيهو دا....ونحن متين بنحس بالفقر؟ ..... لما نشوف زول غنيان.قالت لي والله صح... والله ابارح اتغديت عن ناس حاج الامين.... الصينية الجابوها دي شيالاتنها تلاتة نسوان... اصلي انا يا سجيمان رعيت في الاكل داك جنس رعية...لمن قربت اغمر... واصلت انا نضمي وقلت لها... و الله يجي واحد برجوازي حقير يحاول يستغلنا ويغفلنا ويقلع.... حقنا عينك عينك....خالتي التومة النضم الاخير دا عجبها..... وقالت لي والله صدقت في دي.... عليك الله يا سجيمان يا ولدي ما تسجلوني معاكم؟..... ضحكت...وقلت لها سمح... مرقت مني....... بعد شوية سمعتها تكورك في الحوش وتهرج.... وتداعي... الغراب خطف نص الكيلو حق اللحمة... بتاع ملاح الغدا..... لقيتها تداعي فيهو..... ان شاء الله ما ينفعك .... ان شاء الله يبقى لك اخر زاد....شوف عليك الرسول حقارة الغراب..دا... ان شاء الله يهري مصارينك......عاينت لي وصنقغت فوووق تعاين للغراب.... وقالت لو ...... امشي يا ....حقار...... يا..... برجوازي
|
Post: #2
Title: Re: الـــبـرجــوازي
Author: مريم بنت الحسين
Date: 06-13-2003, 07:51 PM
Parent: #1
الله يديك العافية..بتعرف تجيب القصة من وين.. ان شاء الله بحمة الغدا ما تنفع الغراب..
|
Post: #3
Title: Re: الـــبـرجــوازي
Author: abuguta
Date: 06-13-2003, 08:01 PM
Parent: #2
اخوى سجيمان
تحياتى
قلت اطلع شوية من البوست بتاعى الكان داير فيه الحوار بين فطاحلة شعرا البورد على راسهم الاستاذ كتيابى.
واشوف اخوى سجيمان دا وقت ما جاء على قلت امشى عليه عشان اغاديه بغداى دا بس لقيت لحمتكم شالة الغراب
|
Post: #6
Title: Re: الـــبـرجــوازي
Author: سجيمان
Date: 06-14-2003, 10:35 AM
Parent: #3
والله يا ابوقوتة ما قصرت.....لكن تفتكر الغراب دا عندو اي حق تاريخي في اللحمة دي؟
|
Post: #4
Title: Re: الـــبـرجــوازي
Author: سجيمان
Date: 06-14-2003, 09:54 AM
Parent: #2
ويديكي انتي برضو العافية يا بت الحسين
|
Post: #5
Title: Re: الـــبـرجــوازي
Author: ابو جهينة
Date: 06-14-2003, 10:13 AM
Parent: #4
أخوى سجيمان
التحية و التقدير
أما بعد :
سلم لي على خالتك ، و قول ليها الغراب دة ما برجوازي ، بالعكس ، دة غراب شيوعي و مخصوص خطف اللحمة عشان خالتك تأكد عضويتها مع البروليتارياو تكره البرجوازية،
( يعني غراب طابور خامس ).
تسلم
|
Post: #7
Title: Re: الـــبـرجــوازي
Author: Al-Masafaa
Date: 06-14-2003, 10:50 AM
Parent: #5
العزيز سجيمان لك التحية على هذا البوست الظريف مثلكم ، و لكن الشيوعية ما بتنفع مع الزهجانين و القنعانين من الدنيا و حبانها احسن ليك تشوف مؤتمر ولا اصلاح و لقدام
|
Post: #12
Title: Re: الـــبـرجــوازي
Author: سجيمان
Date: 06-14-2003, 02:56 PM
Parent: #7
المسافة.... البيني بينك..........اقول لك زهجان من الدنيا وحبانها .... تقول لي اصلاح؟
|
Post: #9
Title: Re: الـــبـرجــوازي
Author: سجيمان
Date: 06-14-2003, 11:24 AM
Parent: #5
شكرا يا ابو جهينة......خالتي بتسلم عليك..... وقالت لك الله بيسعلها...الغراب برجوازي كبير.... وشافتو راكب ليلى علوي كمان
|
Post: #8
Title: Re: الـــبـرجــوازي
Author: ودقاسم
Date: 06-14-2003, 10:54 AM
Parent: #1
سجيمان
كيفك يازميل
والله مش خالتك الما بتعرف تقرأ ولا تكتب ، حتى الجماعة نفسهم حاليا ما بيعرفوا المصطلحات دي ، ونكروها خالص ، ولو تذكر بوستات عادل عبد العاطي وأنا قلت يا جماعة أنتو خليتونا نحن الطبقة العاملة لي منو بعد ما سيبتو الديمقراطية المركزية وارتضيتوا الليبرالية ، ونسيتوا صراع الطبقات ومشيتوا لحقوق الأغلبية ، ونسيتوا كلامكم عن أن الأغلبية هي الطبقة العاملة وحاليا بقت أغلبيتكم أي أغلبية ان شاء الله تكون مجموعة إقطاعيين
لكن يا سجيمان ما لقيت واحد يرد علي أبدا في واحد أخونا اسمو سلطان كان بيلمح كده وكات في واحد أخونا اسمو امبدويات كان بيحوم حول الحمى ولا يقع فيه
وما زلت أتساءل
نحن الطبقة العاملة ، مين أبونا وهل أبونا مات ندور لينا على أبو جديد وللا نسوي شنو ،
نشكي الغراب على الله ونسكت ؟؟؟؟
|
Post: #10
Title: Re: الـــبـرجــوازي
Author: Eima
Date: 06-14-2003, 01:39 PM
Parent: #8
سيجمان
آخوى
يكون الغراب ...لزوم الليبرالية الجديدة
بعمل دعاية للحوم ..الوليد بن طلال
وقول لخالتك .. وشركات اللحوم الجاتكم فى غرابكم ...اقصد فى لحمتكم سامحتكم
|
Post: #11
Title: Re: الـــبـرجــوازي
Author: Ahmed satoor
Date: 06-14-2003, 02:02 PM
Parent: #10
ســـــجيمان يا عجيب
يعنى خالتك دى عندها نص كيلو لحمة بى حالها وتنبذ فى البرجوازية؟
|
Post: #15
Title: Re: الـــبـرجــوازي
Author: سجيمان
Date: 06-14-2003, 07:45 PM
Parent: #11
احمد ساطور............ هو ما كان نص كيلو كان ربع كيلو علا انا والله سويتو نص لزوم البوبار
|
Post: #14
Title: Re: الـــبـرجــوازي
Author: سجيمان
Date: 06-14-2003, 04:44 PM
Parent: #10
ليبرالية الجن دي ما لقت غير...... لحيمات خالتي ديل؟........ يا ايما
|
Post: #13
Title: Re: الـــبـرجــوازي
Author: سجيمان
Date: 06-14-2003, 03:48 PM
Parent: #8
ود قاسم اخوي......كل زول ياكل نارو
|
Post: #16
Title: Re: الـــبـرجــوازي
Author: HOPELESS
Date: 06-17-2003, 02:37 AM
Parent: #13
اها وخالتك دي ما بقت مدرسة روضه تخرجلنا شفع البلويتاريا البناعلو الصقر؟؟؟
الله يلعنك ياالصقر الجبت الفقر وجوطة شفع روضة خالتي التومه
|
Post: #17
Title: Re: الـــبـرجــوازي
Author: سجيمان
Date: 06-17-2003, 07:45 AM
Parent: #16
يا هب لس يا اخوي... اولك بالتبادي خالتي امية.... تاني شي مقطوع الطاري مو صقر غراب..... انت الجبت سيرة الصقور مو انا
|
|