Post: #1
Title: شـهــر الـعـســـل
Author: سجيمان
Date: 06-21-2003, 08:12 AM
عايّن لها...ومرق حقتو واخد لو سفة....وقال لي شفت المرا دي.... من يومي الكشحت فوقها الفاتحة...مرا عليك الرسول.... يرقصوها لي في قطع الرحط وجضمها وارم.... كان عندها ضرس قايم عليها....وموصنها قالو لها نحن بنوقف لك العريس بالجنبه العيسرا....وانتي اصلك ما تجيهو بجضمك دا..تعالي لو بالجضم التاني.....علا هي البهمية.... في رقيصها وهوشتها... قابلتني بالجضم الوارم.....اها الجضم فشا... وقلنا الحمد لله..... تقوم تقرصها عقرب في نص راسها...عليك الرسول من الله خلقك في زول بتقرصو عقرب في نص راسو....؟ قالو دايرين يربطو محل القرصة عشان السم ما يمشي....ما عرفو يسووا كيفن... علا ود خير السيد سواق اللوري ...جاب لو زردية.... ومسكو محل العقرب بالزردية....ومسكوني لها...عليك امان الله انا عاصر راس المرا دي بالزردية لمن الشمش شرقت ترررررر.....ربك حميد مجيد....خيّرت من قرصة العقرب..... تقوم تدخل لها.... جندبة في اضانها اليمين...النضم دا كلو وانا عريس ما تميت اسبوع.... انتي يا جندبة الجن.... ابيتي تمرقي من اضان بنت وقيع الله.... عليك النبي الجندبة دي ما مجنونه في راسها دا؟ ما عندها صوب؟..... حسي اضان بيت وقيع الله دي بس ان بقت سينما؟ انا بدخلها؟ ........ يا الله وياامين..... حتين نفيسة الداية مرقت الجندبة من اضان المرا المسنوحة دي.....
اها يومنا الجاين من محطة القطر.... وركبنا التكسي... قومي يا بت وقيع الله... ملصي نعلاتك و خليهن في واطاتهن ديك....واركبي في التكسي....ما شفتها جات داخلة عليكم حفيانه؟.....
قلت نجي الخرتوم نتفسح من دوب ما نحن عرسان وقبال ما نبقى في وليدات وغاغة.....مشينا جنينة الحيوانات...وقعدنا تحت شُدرة مقابله قفص القرود....وتعال انت يا داك القرد..... وما تشوف لك شغله غير تشتح وتقابلنا انا وبت وقيع الله... قدر ما نهرتو ابدا ابى يفوتنا كلو كلو......شفت النعمة دي؟.....نهزت المرا المسنوحة دي ومرقنا.....اريت جنينتكم يا القرود طايرة عليكم.....الشي ديل ما يسو لهم سراويل؟......
قلت نمشي السينما...... دخلنا السينما.... وجانا الزول سيد الببسي... شايل قزازو.... اشتريت لي قزازتين واحدة لي وواحدة لبنت وقيع الله.....نان قايلنا ... نحن السينما شفنا فيها شي؟....... بنت وقيع الله المسنوحة ما بتعرف تشرب الببسي......اشربي بالقزازة.... وتعال يا لسان بت وقيع الله ادخل في خشم القزازة....وبقينا نحن في التمرقك يا لسان بت وقيع الله من رقبت القزازة.!!!!!!؟. مع اني كمين مرة قلت لها يا بنت وقيع الله وقت تجي تشربي ما تمدي لسانك.....الناس تتفرج وانا الاوي في القزازة داير امرق لسان بت وقيع الله .......شفت البخت دا؟.....قلت لها امسكي القزازة قوي.... وارفعيها.... واعاين لك للقزازة سمح....وبي عكازي دا....واضربها اكسرها حتة حتة....والببسي والقزاز يطاير فوق بت وقيع الله وفوقي وفوق الناس القاعدين قدامنا......حتين يا لسان بت وقيع الله اتفكيت من رقبة القزازة......
وتقول لي شهر عسل..؟..... نحن شبه شهر عسل.؟والله دي مرة شهر عسل؟....... علا انا بس زولا متقدر ساكت....وتاني نان يا بت وقيع الله ان شفتي الخرتوم.... تشوفي قعر اضانك.....
|
Post: #2
Title: Re: شـهــر الـعـســـل
Author: Ahmedain
Date: 06-21-2003, 08:15 AM
Parent: #1
It is fabulous Sejiman...
|
Post: #5
Title: Re: شـهــر الـعـســـل
Author: سجيمان
Date: 06-21-2003, 09:21 AM
Parent: #2
احمدين شكرا........ عليك الله وضح لي التوقيع بتاعك ما فهمتو
|
Post: #12
Title: Re: شـهــر الـعـســـل
Author: Ahmedain
Date: 06-21-2003, 03:16 PM
Parent: #5
سجيمان حبابك،
مافى مشكة تب. بس لازم ندفعك "بياض اولا.
البياض عبارة عن:
1- تجيب نملة ضكر. عشان نضبحوها و تنط دمها
2- تجيب أبوت كنفوت، و لو ما لقيت أبوت كنفوت ممكن تجيب عصيدة كنفوت بدلها
3- تجيب تلاتة رطل لبن جدادة عشان يأكلوا بيها الأبوت أو اللعصيدة. و ياريت الجدادة دى تكون حمرا و عنداها غرة فى جبينها
4- تجيب دشيشة بعطرون و فيها شوية ملح ضريرى للتحلية
بعد ما تجيب البياض و نتفقك على أن تدفع بقية المال لاحقا، بعد داك نشرح ليك التوقيع.
و لا رايك شنو؟
أحمد محمدين
|
Post: #3
Title: Re: شـهــر الـعـســـل
Author: HOPELESS
Date: 06-21-2003, 08:21 AM
Parent: #1
لووووووول
ابشر يا عريس
بت وقيع الله في غضب الله
التنقعه ليكم شنو .. ابوها بناء العوضه في شانو تباركوها .. ما تجوها بعد تكملوا البركة بره
وابشر بالخير
|
Post: #7
Title: Re: شـهــر الـعـســـل
Author: سجيمان
Date: 06-21-2003, 10:03 AM
Parent: #3
هوبليس........ تراها حسي مدموسه في عوضة ابوها
|
Post: #4
Title: Re: شـهــر الـعـســـل
Author: albagir altahir
Date: 06-21-2003, 08:39 AM
Parent: #1
سجيمان المسينيح
اها بت وقيع الله دي فكيتها ولا لسه في حبلك
لكن انته كحيت الحاجات الحصلت في شهر العسل كلها بس الحصل في شهر العسل زاتو شنو ما عرفناهو
|
Post: #6
Title: Re: شـهــر الـعـســـل
Author: ابو جهينة
Date: 06-21-2003, 09:29 AM
Parent: #4
سجيمان : السلام كيمان
الدخلت أضان العروس دي جندبة ولا شافع المرقتا الداية دي ؟
أضحك الله ناجذيك يا سجيمان ، فقد تخيلتك و أنت ماسك الزردية و قارص على فروة راس العروس إلى أن أصبح الصباح..
|
Post: #8
Title: Re: شـهــر الـعـســـل
Author: انور عمر
Date: 06-21-2003, 10:23 AM
Parent: #6
الاخ سجيمان
يا اخي يقولوا الياكل في الحله يوم عرسو تقوم الهبوب لكن الظاهر انك كل يوم تاكل في الحلة عشان كدة قامت قيامتك
ثاني مبروك في شهر العسل شفت الدايه ودا شهر مرض وشقا
|
Post: #13
Title: Re: شـهــر الـعـســـل
Author: سجيمان
Date: 06-21-2003, 03:43 PM
Parent: #8
انور......اولا دا ما انا..... ثانيا الجندبة الفي الاضان والشافع الفي البطن طليعهم زي بعض.....مع الاحتفاظ بالنسبة والتناسب
|
Post: #10
Title: Re: شـهــر الـعـســـل
Author: سجيمان
Date: 06-21-2003, 11:24 AM
Parent: #6
لكن يا يا ابو جيهنة....... لو خيطو لها فروة الراس زي خياطة القفة ما كان ريحوني
|
Post: #9
Title: Re: شـهــر الـعـســـل
Author: سجيمان
Date: 06-21-2003, 10:39 AM
Parent: #4
الباقر.......... نان القرد اداهم فرصة هو
|
Post: #11
Title: Re: شـهــر الـعـســـل
Author: HOPELESS
Date: 06-21-2003, 12:14 PM
Parent: #9
ياتو قرد ....؟؟
الفي اليد.. ولا الفي القفص
اللع يعينك يا بت وقيع الله
دي وقعت شنوالوقعتيها دي.. قولي الرووووب بنطلقك
.
|
Post: #15
Title: Re: شـهــر الـعـســـل
Author: سجيمان
Date: 06-21-2003, 07:19 PM
Parent: #11
نان باقي لك يا هوبليس بت وقيعة الله مو عاجبها؟
|
Post: #14
Title: Re: شـهــر الـعـســـل
Author: alfatih
Date: 06-21-2003, 05:53 PM
Parent: #1
سيجو
سلام يا مبدع
قالوا الشقى بلقى فى الفشفاش عضم
المرأة دى كتلت ليها فكى ولا شنو ؟
الله يكون فى عون راجل بت وقيع الله
|
Post: #16
Title: Re: شـهــر الـعـســـل
Author: سجيمان
Date: 06-21-2003, 09:11 PM
Parent: #14
الفاتح......... تكون عاضه لها ابو القدح
|
Post: #17
Title: Re: شـهــر الـعـســـل
Author: Teeta
Date: 06-21-2003, 10:00 PM
Parent: #1
عسل عسل عسل يا سجيمان ضحكتنى لامن بطنى وجعتنى يا مبدع
وانت فنان جد جد
الى الامام سر وفقك
الله
|
Post: #24
Title: Re: شـهــر الـعـســـل
Author: سجيمان
Date: 06-22-2003, 08:53 AM
Parent: #17
شكرا يا تيتا........
|
Post: #18
Title: Re: شـهــر الـعـســـل
Author: albagir altahir
Date: 06-22-2003, 05:46 AM
Parent: #1
سجيمان تحياتي
بعدين القرد ده كان مفروض يكون حبة فياغرا
والله لكن بت وقيع الله دي ما عرفنا عريسة عريس الشوم ده من وين
يمكن مغتي قدحو
وبقيت عليهو حكاية الزول الواقع في البير ووقع فوقو الفيل
|
Post: #19
Title: Re: شـهــر الـعـســـل
Author: albagir altahir
Date: 06-22-2003, 05:48 AM
Parent: #1
سجيمان تحياتي
بعدين القرد ده كان مفروض يكون حبة فياغرا
والله لكن بت وقيع الله دي ما عرفنا عريسة عريس الشوم ده من وين
يمكن مغتي قدحو
وبقيت عليهو حكاية الزول الواقع في البير ووقع فوقو الفيل
|
Post: #20
Title: Re: شـهــر الـعـســـل
Author: albagir altahir
Date: 06-22-2003, 05:53 AM
Parent: #1
سجيمان تحياتي
بعدين القرد ده كان مفروض يكون حبة فياغرا
والله لكن بت وقيع الله دي ما عرفنا عريسة عريس الشوم ده من وين
يمكن مغتي قدحو
وبقيت عليهو حكاية الزول الواقع في البير ووقع فوقو الفيل
|
Post: #21
Title: Re: شـهــر الـعـســـل
Author: bayan
Date: 06-22-2003, 07:07 AM
Parent: #20
والله يا بت وقيع الله مصيبتك مصيبة
الراجل الفقر دا اللماك فيهو شنو.. دون الرجال كلهم تقعى فى الراجل الفقر دا والله نقول شنو قسمتك عاد...بالله شوفو يا خواتنى من الراجل دا كشح فوقى الفاتحة يكشحو المرض اليشيلو
جانى وجع ضرس كرضم لى جضمى البنوت لى حدهن
يكونن سمحات يوم عرسن عللى انا ضرسى الجن دا قام على ما قلت ليكم الراجل فقر من شفتو
واها دخل ابدل هدوم ياعقرب الجن اقرصينى فى نص راسى لا ايدى لا كراعى
وقف فوقى الليل ما طال ماسك ليهو زردية عافصها محل القرصة ووب منو ما قلتليكم فقر ونقر
وكتين ودانى السينما القزازة الجابة لى من دون القزازت لسانى اتحشر فيها وتعبنا جنس تعب فشان تمرق
ما قلت ليكم الراجل دا فقر ونقر الخير ما بيجى منو
وبعدين وكتين ساقنى جنينة الحيوانات
القفاص مالية الواطة لا بس ودانى جنب قفص القرود انت يا سجمان الطيور هن ما شايفن
قام واحد من القرود سوى جنس شى
وب على وكتلتى واخجلتى
قام ساقنى مشين
عليكم الله يا خواتنى شفتن ليكن راجل فقر متل دا الله يمرقنى ساكت من سناحتو وفقارتو
نظرة جندرية وقصة من المستوى الثانى لقصة الابن سجيمان
|
Post: #29
Title: Re: شـهــر الـعـســـل
Author: سجيمان
Date: 06-27-2003, 05:31 PM
Parent: #21
بيان الجندرية.....ماشة كويس بس حكاية القزازة دي ما قدرتي عليها......... العيب من القزازة ولاّ من لسانك
|
Post: #30
Title: Re: شـهــر الـعـســـل
Author: bayan
Date: 06-28-2003, 02:04 AM
Parent: #29
العيب فى الاختار القزازة
يقز مجنون شاحدة الله وراجياه
|
Post: #35
Title: Re: شـهــر الـعـســـل
Author: سجيمان
Date: 06-28-2003, 12:18 PM
Parent: #30
بيان....... القزازة اختارتها بت وقيع الله.. ما شليقة هي
|
Post: #22
Title: Re: شـهــر الـعـســـل
Author: انور عمر
Date: 06-22-2003, 07:07 AM
Parent: #20
الباقر
سجيمان بي العلي هو انت الواقع عليك شنو رد واحد تلات مرات
الله يستر عليك انت الماشي تعرس في عيد رمضان من الشهر حق سجيمان
بعدين الزول الشي الوقع في البئر دا عليك الله اشقي منو في بس غير سجيمان ما في واحد
|
Post: #26
Title: Re: شـهــر الـعـســـل
Author: سجيمان
Date: 06-22-2003, 03:44 PM
Parent: #22
اشقى منو الفيل.....يا انور
|
Post: #25
Title: Re: شـهــر الـعـســـل
Author: سجيمان
Date: 06-22-2003, 11:03 AM
Parent: #20
يا الباقر........ خشم البئر دا دخل الفيل كيفن؟ محنتني وحات الله؟
|
Post: #23
Title: Re: شـهــر الـعـســـل
Author: كوليل
Date: 06-22-2003, 07:13 AM
Parent: #1
ليك وحشة ياسيد الإسم
إنتا عسل شنو العليك فى الخرطوم
لاكن المالقى شبهو الله قبحو
يعنى كنتا عاوز تجيب تاجوج بت على
لاكن بت الناس دى حقو تحمد الله الفكاها منك
|
Post: #27
Title: Re: شـهــر الـعـســـل
Author: bayan
Date: 06-27-2003, 07:14 AM
Parent: #23
ز
|
Post: #28
Title: Re: شـهــر الـعـســـل
Author: سجيمان
Date: 06-27-2003, 07:22 AM
Parent: #27
كوليل.......القال لك منواتفكت منو؟
بيان.............. انت الازيّن
|
Post: #31
Title: Re: شـهــر الـعـســـل
Author: Maged
Date: 06-28-2003, 02:28 AM
Parent: #1
لكن يا سجيمان ما قطعته مصارينا جد. الروعة والخيال ماعندك لكن. وكان لأسلوب التعبير والوصف، أروع من الروعة زاتة. أنا لسة بضحك فى موضوع وحم الرجال، تقوم تلحقنا البهجة دى؟
غايتو ده سموهو شهر أى حاجة، إنشاالله كمونية، بس ما شهر عسل
بالله عليك تكتر من الإبداعات، إحنا مابنعرف نعبر زيكم كدة لكن كتاباتكم بتعوض فينا هذا النقص.....
وتسلم
ماجد
|
Post: #37
Title: Re: شـهــر الـعـســـل
Author: سجيمان
Date: 06-28-2003, 12:31 PM
Parent: #31
ماجد شكرا لك.........وان شاء الله شهر عسلك يبقى اخير من دا...... بس اوعك تمشي جنينة الحيوانات
|
Post: #40
Title: Re: شـهــر الـعـســـل
Author: Maged
Date: 06-28-2003, 08:05 PM
Parent: #37
إحنامشينا شهر العسل زمااان والى كان كان، بس القرود و حركاتم الله حلاَنا منها. قال سراويل قال
|
Post: #32
Title: Re: شـهــر الـعـســـل
Author: wad gindeel
Date: 06-28-2003, 10:59 AM
Parent: #1
سجيمان
كيف حالك وكيف الصحة....الجندرية دى وحاتك غلبتك تب
|
Post: #39
Title: Re: شـهــر الـعـســـل
Author: سجيمان
Date: 06-28-2003, 06:46 PM
Parent: #32
ود قنديل حبابك........ الجندرية ما غلبتني علا انا براي داير اتغلب لها
|
Post: #33
Title: Re: شـهــر الـعـســـل
Author: maia
Date: 06-28-2003, 11:08 AM
Parent: #1
بالغ شهر العسل لكن !!! ده شهر عسل ولا رحلة لمعسكر الخدمة الالزامية ؟؟؟
|
Post: #34
Title: Re: شـهــر الـعـســـل
Author: shiry
Date: 06-28-2003, 12:04 PM
Parent: #33
ٍسلام مربع
ياسجيمان وحات نظري القطعة الفنيه
اتخيل يادوبي شفتها
العتب على النظر
قومي يا البت شيري واقريها لامك
وتقوم كدا امي تنفقع من الضحك
وقالت ليك
انت المسنوح يامسنوح الخلقه
موش بت وقيع الله
عليك الله في واحدا نصيحا يعزم عروسو
على قزازة بيبسي
هاههاههاهااه
سلمت ياسيدي للابداع دا
|
Post: #38
Title: Re: شـهــر الـعـســـل
Author: سجيمان
Date: 06-28-2003, 12:34 PM
Parent: #34
شيري هذا بعض مما لديكم...... بعدين الببسي في السينما....... يعني في السينما اعزمها على شنو؟...... لحم
|
Post: #36
Title: Re: شـهــر الـعـســـل
Author: سجيمان
Date: 06-28-2003, 12:27 PM
Parent: #33
مايا....... بالغتي انتي..... الخدمة الالزامية فيها ببسي؟
|
Post: #41
Title: Re: شـهــر الـعـســـل
Author: aba
Date: 10-29-2003, 07:14 PM
Parent: #36
والله يا سجيمان يومك الكتبت دي بتكون إشتريت من بتاع الداندرمة
الله يجازيك بطني وجعتني من الضحك
|
Post: #44
Title: Re: شـهــر الـعـســـل
Author: سجيمان
Date: 10-30-2003, 11:15 PM
Parent: #41
ابا.... بتاع الدندرما فال عاوز....رخصة سواقة
|
Post: #42
Title: Re: شـهــر الـعـســـل
Author: ود شندي
Date: 10-29-2003, 08:01 PM
Parent: #1
سي جيمي
ما خفي اعظم ،،،
ما كان تكمل!!!
|
Post: #43
Title: Re: شـهــر الـعـســـل
Author: yumna guta
Date: 10-30-2003, 01:02 AM
Parent: #42
الاخ سجيمان......التحيات الطيبات
متعك الله بالصحة و العافية و جعلك ذهنك دائما متقد لمثل هذه الروائع
لكن يا اخوى انت الظاهر اليومين ديل البلا ماخدك شديد!!!!!!!
|
Post: #46
Title: Re: شـهــر الـعـســـل
Author: سجيمان
Date: 10-30-2003, 11:36 PM
Parent: #43
يمنه........ ومتعك انتي برضو.........الايام دي ما خداني البليلة
|
Post: #45
Title: Re: شـهــر الـعـســـل
Author: سجيمان
Date: 10-30-2003, 11:21 PM
Parent: #42
ود شندي.......ما خفي اعظم..... اعظم من اعظم
|
|