Post: #1
Title: الشـــــات..........و....... الشتــــات
Author: سجيمان
Date: 06-02-2003, 05:30 AM
قلت... انا سجيمان الرميدان..... قلت ..... كنا زمان ...زمن زمننا.... الريدة واالحب...والنضم المو راكب عدلو بالجوابات... نشتري كتب لغة الحب والرسائل الغرامية.... ونكتب....ونهري الزول البنرسل ليهو... نقل صفحة كاملة
بضبانتها....واحدين كانو حتى رقم الصفحة تلقاهو مختوت في الجواب...بعد مرات واحدين يقعدو يكتبو من راسهم...ونضما لا في السماء لا في الواطا...المهم يكتب وخلاص.....واحد اخوانا كان بيكتب لتلاتة بنات..ونفس الورقة صورة طبق الاصل مع التحية لسكينة بت عبد القادر....وكانو يكضبو..... سهر الليالي....وهو من المغرب يخت حقة الصعوط تحت عنقريبو ويشخر الشخير وتوابعه للصباح...وباكر يقول لها الليل كلو قاعد اعد في النجوم....وسارح في عينوك الزي عيون حمارة جدي ود جبريل.....وشعرك الاملس السبيبي المتل شعر كلبة ناس السرة...وجضيماتك المتل الرغيف الدابو مارق من الفرن الحار.... ويدشن الجواب بقصيدة عصماء.........
اريدك واريدجضيماتك المتل الرغيف
مالو السقط سواهن متل طينة... القيف
كل ما اشوفك بلا تكوركي لي ..... اقيف
يا الرحلوكي من ضنب النعجة
وسكنوكي ................ الجريف
قلت انا سجيمان الرميدان..... النضم دا ذكرني ليهو الانترنت وونسة النت....ومحن الماسنجر..مافي زول بيرحم التاني والله يخاف الله فيهو... ضكر علي انتاية.....زمان كضبنا ما بيمرق من حلتنا.... حسي الكضب بقى.... عالمي....ولافي الدنيا كلها... قادر الله السفر بالبيوت والكضب بي خيوت وبدون خيوت...... الاسمو دفع الله يقول اسمي رامي...والاسمها خادم الله تقول اسمي شذى.....والعمرو خمسين..... يقسمن علي اتنين ويدي نصهن البحر......ومن اول كلمة.... تلقى الضكر قال للانتاية...... انا حبيتك....وعشقتك وما اظن اعيش بدونك.....وهي تقولو.... لووووووووووووول.... يا اخي بالغت ياخي شزيت......و في النهاية تطلع الانتاية ضكر......وزولنا يقعد يغني....
حبك ملك قلبي........ ..وفيهو........ اتحكر
وا خسارة شاتي معاكي يا الطلعتي... ضكر
قلت انا سجيمان الرميدان...... شباب الزمن جنية...ويجني علي بعضو.... المشاعر والعواطف ... معروضة في السوق...وبالمجان.....واللعب بيها.... بقى عادي واعتيادي.... ومافي زول يزعل.... وان زعلت تزعل من منو؟...... انت السويتها في نفسك.....وخليك رياضي....اتحمل البتجيك... زول يحب لو زولا ما شافو.....
النصيحة لك يا الله ...ديل قاعدين يحبو الكمبيوتر...يزعلو معاهو....بشاكلوهو.... تلاقي الراجل عندو جهاز والمرا عندها جهاز....وكلو شغال من ورا ضهر كلو.....حتى ونستهم مع بعضهم.... في البيت بقت زي الشات..... ان قال نكته المرا ما بتضحك..... تكتب لو لوووووووول في الحيطة.....وان هو ماشي الدكان برضو يكتب لها في الحيطة... بي.ار.بي.....
سجيمان عندو اقتراح.... كل واحد في بيتو يشتري لو حروف انكليزية... مكتوبة في كرتون.. وكل حرف يكون براهو....عشان لو عاوزين يتونسو.. يقعدو يرصو فيها.....بس يكترو من حرف الأو....عشان اللووووول.... ويدبلو الحروف للاحتياط... وبعدين كل واحد يقعد يوصف نفسو للتاني ... انا متاكد حيصدقو بعض.....والله اقول لكم قولة.... كل واحد يضيف التاني...في الماسنجر...وكل واحد في اوضة وتقعدو تتونسو بالشات.... منها ونسة ومنها تحديد نسل.
|
Post: #2
Title: Re: الشـــــات..........و....... الشتــــات
Author: HOPELESS
Date: 06-02-2003, 05:37 AM
Parent: #1
looooooooooool
بجيك صادي
BRB
-
|
Post: #3
Title: Re: الشـــــات..........و....... الشتــــات
Author: HOPELESS
Date: 06-02-2003, 05:45 AM
Parent: #2
زمان قلتو
Quote:
اريدك واريدجضيماتك المتل الرغيف
مالو السقط سواهن متل طينة... القيف
كل ما اشوفك بلا تكوركي لي ..... اقيف
يا الرحلوكي من ضنب النعجة
وسكنوكي ................ الجريف
|
وهسي نحن قلنا
احبك واحب ماسنجراتك المتل الطيف
مالو الكمبيوتر اتلخبطط الوانو كيف
كل ما اتخيلك ارجف والدنيا صيف
وفي الآخر تطلعي ضكر .. يالطيف
وصادين
BRB
|
Post: #4
Title: Re: الشـــــات..........و....... الشتــــات
Author: سجيمان
Date: 06-02-2003, 06:17 AM
Parent: #3
هوبليس........اوعى تكون انت ...تشوكشت من طرف ضكر اغر؟
|
Post: #5
Title: Re: الشـــــات..........و....... الشتــــات
Author: HOPELESS
Date: 06-02-2003, 06:19 AM
Parent: #3
يا الله يا الشينه الفرصه جاتك
اتشكلي واتلوني واختاري حلاتك
في زول مغفل مستني ماسنجراتك
ولو احرجك وطلب صوره لزاتك
اختاري احلي واحده من جاراتك
وعاااااادي
BRB
|
Post: #6
Title: Re: الشـــــات..........و....... الشتــــات
Author: HOPELESS
Date: 06-02-2003, 06:21 AM
Parent: #5
ضكر اغر..؟؟؟
قول يا سجمو ضكر اشر
BRB
|
Post: #7
Title: Re: الشـــــات..........و....... الشتــــات
Author: سجيمان
Date: 06-02-2003, 06:26 AM
Parent: #6
اشر دي من ..... شر يشر فهو شرار.... على وزن فرار......ووزن حاجات تانية كتيرة
|
Post: #8
Title: Re: الشـــــات..........و....... الشتــــات
Author: HOPELESS
Date: 06-02-2003, 06:31 AM
Parent: #7
نصيحه ماسنجريه
لو واحد(واحده سابقا) شراك علي الماسنجر
ما عليك الا تدي الكمبيوتر شلوت باقوي مايمكن من قوه
وحزاري من الفرار ... دا بيخرب بيوت
BRB
|
Post: #9
Title: Re: الشـــــات..........و....... الشتــــات
Author: سجيمان
Date: 06-02-2003, 08:30 AM
Parent: #8
الشلوت ما يبرد المغصة.......رايك شنو في روسية
|
Post: #10
Title: Re: الشـــــات..........و....... الشتــــات
Author: HOPELESS
Date: 06-02-2003, 08:37 AM
Parent: #9
الروسيه محتاجه رأس..وأكان عندي رأس ما كان خشيت ماسنجر من اساسو
-
|
Post: #11
Title: Re: الشـــــات..........و....... الشتــــات
Author: Al-Masafaa
Date: 06-02-2003, 08:52 AM
Parent: #10
هوبلس آخوي صدقت تب
ما عندك رويس عشان كدة اتمنسجرت
|
Post: #12
Title: Re: الشـــــات..........و....... الشتــــات
Author: كوليل
Date: 06-02-2003, 11:43 AM
Parent: #1
والله ياسجيمان محنك تقول إنك ولد قشلاق
لاكن إنشاء الله ماتكون بقت عليك حكايت العرفة والحب بتاع الكى بورد
لاكن حاجة حلو
|
Post: #14
Title: Re: الشـــــات..........و....... الشتــــات
Author: سجيمان
Date: 06-03-2003, 04:14 AM
Parent: #12
ود قشلاق كيف؟ يا ...... كوليل
|
Post: #13
Title: Re: الشـــــات..........و....... الشتــــات
Author: alfatih
Date: 06-02-2003, 10:50 PM
Parent: #1
سجيمان
قالوا الجاتك في كمپيوترك سامحتك
وبعدين الكضب خشم بيوت
انا اقول اخوك كان حلقو ليهو ...
إنت بل راسك
|
Post: #15
Title: Re: الشـــــات..........و....... الشتــــات
Author: rani
Date: 12-07-2003, 07:38 AM
Parent: #13
HOPELESS
الزول دا شكلو عاداكـ يلا افرذ عيشتك
وانفرد بي بوستاتك
ولا رايك شنو
|
Post: #16
Title: Re: الشـــــات..........و....... الشتــــات
Author: Nejmuddin Hassan
Date: 12-07-2003, 09:37 AM
Parent: #1
أخوي سجيمان
لك الود الصادق .. والتحايا الشاهقة
باديء ذي بدء.. أود أن اعترف بأنني أقرأك كثيراً ومنذ فترة طويلة.. وكل ما أنوي الكتابة إليك .. أقول خليها شوية .. لكن بجيك راجع.. خصوصاً وأن إحداهن تعتقد حتى الآن بأنني (سجيمان) رغم تأكيدي بأنني أكتب بإسمي ذاتو .. وده موضوع طويل.. إحتمال أقولوا ليك بالتليفون..
ولي قدام يا سجيمان
نجم الدين علي حسن
|
|