Post: #1
Title: ســعادة الســــفيـر
Author: سجيمان
Date: 10-21-2003, 00:59 AM
Parent: #0
دخلت في البدلة الجديدة... وعاينت لي تفسي في المراية...اتبسطت من نفسي تب.... تاكسي والمطار... خمسين ريال بس في جيبي... دفعت للتاكسي الباقي خمستاشر...... جريت علي الكاونتر.... الطيارة قبيييييييييييل طارت انت وين يا سجم الرماد....طارت؟ اها كيف الراي؟.... الرجوع للبلد دايرو خمسة وتلاتين ريال...وانا عندي خمستاشر واقرب طيارة بعد اربعة وعشرين ساعة....
قلت كدي.. الملم نفسي واقعد... افكر....حمت في المطار مشيت علي السفريات... الدولية... اسمع واحد وراي.... بالانكليزي يناديني.... سعادة السفير؟... سعادة السفير؟..... الزول قصدني عديييييييييل..... انا اخوك انت..... سفير مرة واحدة..... شفت النعمة دي يا سجيمان؟..... يا ربي ما يديّّني خمسين ريال علي حس السفير دي؟....الزول نضم نضم كتير بالانكليزي شي قبضتو وشي ما قدرت عليهو....وبين كل كلمة والتانية شابكني يا سعادة السفير.....الليله وينك يا ام الخير.... تجي وتشوفي راجلك....وبيقولو ليهو سعادة السفير...عشان كل ما هو يقول سعادة السفير انتي تزغردي تلاتة زغريدات كبار.....قمت وقفت علي حيلي ونفخت سدري ... ولويت شلوفتي... وصريت صرة صغيرونة والزول ينضم..... وانا ما عندي ليهو غير كلمة يس... يس.....يا ام الخير دحين انا ان بقيت سفير.....توبك المشدر دا علي الطلاق ما يبارينا لي هنوك.....حسي يا ام الخير بتعرفي تسلمي علي نسوان السفراء التانين في جضومن؟....... والله ما ظانيتك.....انتي وقت تجي تسلمي علي وليدك في جضمو.... يا الله ويا امين... بعد ملاوة حتين .... نفك خشمك من جضمو...وبعدين خلي بالك السفراء قاعدين يسو حفلات وبيجيبو نسوانهم....وبيسلمو علي بعض..... ام الخير اووووووووعك تسوي احمر شلاليف...وتقعدي تسلمي عليهن في جضومن...... لاني متاكد كل واحدة حتكون شايلة الختم بتاعك في جضمها......ومكتوب عليهو صنع في البشاقرة..... ان كان دايره تحومي يا ام الخير خسمتك بالرسول تمشي براحة....... في فرق يا ام الخير بين مشي الكرعين وسواقة مكنة الخياتة.... انتي ابدا الاتنين عندك واحد....و القعاد فوق الكرسي تقعدي براحة...وتحاولي تخلفي كراعك.... انا عارفك ما تعرفي تخلفي كراعك علا وانت راكب لك حمارة...ووقت يجيبو العشاء اوووووعك تقعدي تعمطي...وتكوسي محل الدمعة وين.....وتلفي اللحمة داخل الرغيفة... انا عارفك.... انتي قايلاني ما قاعد اشوفك؟
الزول الضهبان دا لي حسي ينضم.... فهمت ان عندو مشكلة... مع السفارة الاثيوبية...وهو جنسيتو كيني.... قال انو شغال في.. منظمة انسانية....وما بيحتاج لفيزا وفهم من ناس السفارة.... انو التأشيرة في المطار يا خدها لكن ناس الخطوط السعودية ابو ما يركبوهو عشان ما عندو تأشيرة...وهو مسيّكين قاليني انا السفير الاثيوبي....غايتو اتلمو فوقنا كم زول كدي و كلهم اثيوبين.....النسوان...كوركن للرجال وجن بنيات يا ام الخير حلاة الدنيا عليهن........ عشان يجو يقابلو ويشوفو السفير..وقعدو ينضمو معاي بالامهري..... سجيمان امانة ما ورط زول....لكن برضو انا اتنفخت ومرقت صندوق السجاير وولعت لي سجارة.. وقدمت الكراع اليمين واخرت الشمال...ووقفت وقفة دبلوماسية بت ابوها......واشحد في الله ما يجي بوليص ويقول الناس ديل متلمين مالم؟....... عشان اثبت لو انوالحكاية فيها سؤ فهم ..... داير لي ستة شهور في السجن....... الحمامات يا سجيمان...امشي الحمامات ومن هناك ابقى رقيق...وزوغ...... وفعلا ...قد كان........
|
Post: #2
Title: Re: ســعادة الســــفيـر
Author: haneena
Date: 10-21-2003, 01:17 AM
Parent: #1
يجازي محنك يا سجيمان
بتجيب الكلام دة من وين؟؟
|
Post: #4
Title: Re: ســعادة الســــفيـر
Author: HOPEFUL
Date: 10-21-2003, 01:35 AM
Parent: #2
سعاده السفيييييير
سي جي ماااااااااااان
انت زول فنان .. بالجد
الا المرا دي جننتها فوق راسه دا
يا اخي حرام عليك
انت قايل المرا دي ما بتعرف جنس الحركات دي .. ؟؟
دي ما حركات فارغه .. أي زول بيالف علي كيفو .. بس نحن ناس قريعتي راحت بنفتكره حاجات سمحه .. وبنسميها (اتيكيت) .. يكتكتم الجن اليكتكتم ... خلقة الله مااااله!!!!؟؟؟
|
Post: #7
Title: Re: ســعادة الســــفيـر
Author: سجيمان
Date: 10-21-2003, 07:58 AM
Parent: #4
جمال......يا اخوي ناس قريعتي راحت لا بيعرفو للحاجات دي ولا شيتين......... غايتو....... نسوان السفراء ان بقن من النوع البي يقش نخرتو بي طرف توبو؟...... قول الدنيا كلها قاطعتنا
|
Post: #5
Title: Re: ســعادة الســــفيـر
Author: سجيمان
Date: 10-21-2003, 06:39 AM
Parent: #2
حنينة....كلو علا النضم..... في النضم دا.... نار الله الموقدة.........ان بقى ربنا داير يشقيها علي زول اليبيت معاي..... الباعوضة ارحم
|
Post: #3
Title: Re: ســعادة الســــفيـر
Author: Maged
Date: 10-21-2003, 01:33 AM
Parent: #1
لكن مابااالغتة وشزيت ياسى جى
البهجة ماعندك لكن
سفير واثيوبى كمان لكن ما اشى (بكسر الالف) عليك انته
اديك العافية ياحبوب
|
Post: #12
Title: Re: ســعادة الســــفيـر
Author: سجيمان
Date: 10-21-2003, 04:24 PM
Parent: #3
يا ماجد..... شفت كيف؟.... عشان تعرف الزول دا فعلا ضهبان
|
Post: #6
Title: Re: ســعادة الســــفيـر
Author: الزنجي
Date: 10-21-2003, 07:20 AM
Parent: #1
انشاء الله تكون واقع فى الامهرتا ديل ذى ..... اخ انا من بنات الامهرا
|
Post: #8
Title: Re: ســعادة الســــفيـر
Author: nazar hussien
Date: 10-21-2003, 08:24 AM
Parent: #6
دكتور CG Man
انت الوداك تلبس بدلة شنو ماك عارف لكل ضريبته وزكاته... وشوف عين شفت في مطار جدة وانا ترانسيتاواحد مسافر بي جلابية وسفنجة وسألتو قلت ليه انشاء الله مافي عوجة يااخونا وما كنت اعرف وجهته فقال لي لا لا سفرية سغيرة وراجع...ومشيت ابعد من ذلك وسألتو قلت ليه طيب ليه مسافر بي سفنجة نوع اسئلة حراق روح ناس الترنسيت ديك وانا كنت قبلو قاعد اربعة ساعات... قال لي طيب يا اخي بعد ده ما تدق لي الجرس وتعمل لي طابور وتفتش اضافريني يا اخي انا صحيت قبل مواعيد الطيارة ما تقلع بي نصف ساعة وعرفت انه عايز يتخارج من الاسئلة السخيفة واعتذرت ليه في محلتي ديك واتعافينا واتودعنا وخليتو في ترانسيتو وسافرت... ولا زالت صورته عالقة بذهني....
وتاني لو عملوك السفير الاثيوبي قول ليهم
كبراتنا كبرات اندمناجو اهون اثيوبيا اير لاين قنزب آلو واشهق بعد كل جملة..
وبالتالي تكون فكيت روحك من الورطة.
اما لو عملوك السفير الصومالي
فما عليك الا ان تقول
دحنعي حنعامرات سعرا
ديل هم الآتو بتاعك ما تحتو وتقعد في الصقيعة
|
Post: #9
Title: Re: ســعادة الســــفيـر
Author: ابو جهينة
Date: 10-21-2003, 08:53 AM
Parent: #8
سجيمان
صباح أكتوبري
يعطيك العافية على هذه الإبتسامة الصباحية
مرة واحدة أرترية كبيرة في السن ،، مسكتني نص سوق البطحاء بالرياض و قعدت تكورك و ترطن
فهمت بعد فكوها مني إنو أنا الخالق الناطق ولدها المات في الجبهة
إضطريت أديها تلفوني و عنواني و بقت تزورني كل خميس و جمعة و معاها الزغني و الإنجيرة و البخور
شبهينا و إتلاقينا
تسلم
|
Post: #18
Title: Re: ســعادة الســــفيـر
Author: سجيمان
Date: 10-22-2003, 02:04 AM
Parent: #9
يعني يا ابوجيهنة اكون انا بشبه السفير الاثيوبي صحي؟............. لالا.... يكون الزول الضهبان دا....احتار بيهو الدليل ولقى اقرب واحد لابس فل سوت وشبك فيهو........وكنت انا....... انت طلعت بي زقني وبخور........وانا مرقني كرعي.....من ورطة الله اعلم كانت توديني وين
|
Post: #15
Title: Re: ســعادة الســــفيـر
Author: سجيمان
Date: 10-22-2003, 00:19 AM
Parent: #8
تعرف زولك دا يانزار....ز يكون مضروب في الانكل......وحالتو شلش...وانت داير تتونس....... كويس الجات علي المساخة
دحنعي حنعامرات سعرا
|
Post: #13
Title: Re: ســعادة الســــفيـر
Author: سجيمان
Date: 10-21-2003, 08:28 PM
Parent: #6
يا زنجي.....عاين لي توقيعك و غير النظرية......
|
Post: #10
Title: Re: ســعادة الســــفيـر
Author: maia
Date: 10-21-2003, 09:52 AM
Parent: #1
دكتور سجيمان
تحية دبلوماسية
زمان قلنا حبشي الكبير وسوداني الكبير اكيدحبوبتهم واحدة
تسلم دكتور
|
Post: #11
Title: Re: ســعادة الســــفيـر
Author: Adrob wad Elkhatib
Date: 10-21-2003, 04:05 PM
Parent: #10
برضو تقولوا نحن عرب؟؟
|
Post: #19
Title: Re: ســعادة الســــفيـر
Author: سجيمان
Date: 10-22-2003, 02:08 AM
Parent: #11
ادروب............نحن بدويت
|
Post: #17
Title: Re: ســعادة الســــفيـر
Author: سجيمان
Date: 10-22-2003, 01:55 AM
Parent: #10
مايا.... حبوبتهم وجدهم واحد.......ما سمعتي الجماعة طلعو بلال سوداني....والنجاشي سوداني......
|
Post: #14
Title: Re: ســعادة الســــفيـر
Author: 3mak Hasabo
Date: 10-21-2003, 09:12 PM
Parent: #1
سجيمان الرمدان
عشان تعرف مرمى الله اصلو مابترفع
يوم بقيت سفير ...سفير اثيوبى
اسى لو إتغابى فيك العرفة زول تانى من ناس الدول الغنيانة دى كان مالو
سفبر امريكى...انجليزى
برضو عندهم ناس بشبهونا
لكن الحمد لله....دا ما حصل....لانو كان جيت مارق بالكمبيوتر دا وكفتنا
|
Post: #20
Title: Re: ســعادة الســــفيـر
Author: سجيمان
Date: 10-22-2003, 02:10 AM
Parent: #14
عمي حسبو.......... كمبيوتر شنو البجي مارق منو....هو انا البورد دا بجيهو......مالي ومال العالم التالت.......امشي هناك....محل مافي زول يقولك عينك في راسك
|
Post: #16
Title: Re: ســعادة الســــفيـر
Author: ABUHUSSEIN
Date: 10-22-2003, 01:35 AM
Parent: #1
الأخ سجيمان
كلامك حـلـو شـديد و ضحكنا لمن قلنا بس
لـكـن المـسـكـيـنـة أم الخـيـر دي ذنبها شنو
|
Post: #21
Title: Re: ســعادة الســــفيـر
Author: سجيمان
Date: 10-22-2003, 02:12 AM
Parent: #16
ابوحسين......والسفير الاثيوبي زنبو شنو؟ البقيت انا محلو
|
Post: #22
Title: Re: ســعادة الســــفيـر
Author: ابنوس
Date: 10-22-2003, 05:56 AM
Parent: #21
والله يا سجيمان
سجيمان عارف انا بقرأ كل بوستاتك ، وبضحك بالعكس بقينا بننتظر البوست الجديد يا ربي يكون شنو ؟؟؟ ودائما بتحاشى التعليق خايف من طولة لسانك وعشان ما تلحقني عصا السجمانيين
لك الضحكة
|
Post: #23
Title: Re: ســعادة الســــفيـر
Author: سجيمان
Date: 10-22-2003, 08:52 AM
Parent: #22
ابنوسي......... لك الضحكة انت برضو
|
|