Post: #1
Title: اريتـو شِعِـر اليـابا والتـابا
Author: سجيمان
Date: 10-22-2003, 10:36 PM
الشنّاف.... شيال الحال.. هو الناقد.... نقد ينقد.... شنّف يشنِّف....شغلانة ساهلة ومريحة....ودايرة زول لسانو طويل....ودمو تقيل.... ومايهمو اليزعل من اليرضى.....وبعد دراسة متأنية لنفسي لقيت انو كل الصفات دي تنطبق علي......وعلشان كدا لازم اشتغل الشغلانة دي....واقعد للناس في حلوقهم....واليقول بغم..... طوالي اشنّفو....... وبداية ناوي اشنّف الميتين قبال الحيّن......وبما انني من انصار المدرسة التشنِّفية التجريببة.... لازم اجرب في الميتين....
اولا الشاعر.. المتشوعر...... قيس بن الملوح.... هذا الشاعر الجِلدة... البخيل...... حشاش بي دقنو...... قاعد شابكنا انا اسوي واسوي.... لمن ليلى عرسوها وتمو حِلوها....وبقى هو لافي في صواني بغداد... شايل سروالو في ايدو ويخيط فيهو....لننظر مثلا الي هذا البيت الركيك..... الذي لا طعم له ولا رائحة...ويثبت عدم ثقة بن الملوح في نفسه
يقولون ليلى بالعراق مريضةٌ ليتني كنت الطبيب المداويَ
اولا هذا الشويعر... مفروض يبدا البيت.... بي.... الله يكفينا شر قالو وقلنا....و عشان تعرفو انو الشاعر دا زول بتاع ونسة وقوالات.... واشاعات...... قال يقولون... كدا... من غير ما يحلف...عشان يثبت صحة قولو....اكان راجل كان يقول الكلام دا في السفارة و لاّ جهاز المغتربين لو ما حلفوهو.... والاصح... انو يقول
يقولون في ضمتهم ليلى بالعراق مريضةٌ
..... او عشان يقطع الشك.... يبدأ البيت بحلفان بالطلاق............ وبلاش يقولون......يصبح البيت اقوى....ومافي زول يغالتو والله يشكك فيهو....ويقرا البيت كالاتي
علي بالطلاق.... ليلى بالعراق مريضة.
وبي نظرة سريعة لللشطر التاني من البيت.....نجد ان الشاعر... حشاش بي دقنو قولا وفعلا.....وكذلك... به روح اجرامية للانتحال...والتزوير والدليل ليتني كنت الطبيب المداوي.... بن الملوح نسبتو في الشهادة السودانية 50%....ادبي وعاوز يكون دكتور. نوع من الهوس اللاواقعي..... وبخيل بخل شديد.....
يتمنى هذا الشويعر ان يكون الطبيب ..... بدل ان يسرج.. حصانه...ويكربو بدون سرج حتى ويصل ليلى يشوفها... قاعد في القهوة ويلم في الناس ويقول لهم يا ريت يا ريت.....او يمشي اقرب بنك ويحول حق الدكتور والعلاج...طيب يا قيس الجن.... انت هنا تبكي وليلى هناك عيانة.... نان ما بتفطس وتموت...اتصرف يا اخي....مفروض هذا الشطر من البيت... يكون بالقوة.. بحيث لا يثير الشبهات حول عدم مصداقية بن الملوح...... يكون كالاتي
وحرم... انا من يجيب الطبيب المداويّ
وبهذا يكون البيت كاملا ...... يُقرأ كالاتي:
علي الطلاق ... ليلى بالعراق مريضةٌ.........وحرم انا من يجيب الطبيب المداويّ
..... قومو بلا ابن الملوح.... بلا لمة
|
Post: #2
Title: Re: اريتـو شِعِـر اليـابا والتـابا
Author: kamalabas
Date: 10-22-2003, 10:43 PM
Parent: #1
خلينا من الميتين ديل يا سجمان فقد كتلتهم تاني
لكن دي حقاره يأخي الضرب علي الميت حرام ...ورينا
نقدك لصنع الله ابراهيم الحجاي أقصد الراوئ
كمال
|
Post: #3
Title: Re: اريتـو شِعِـر اليـابا والتـابا
Author: ود محجوب
Date: 10-23-2003, 02:07 AM
Parent: #2
هوى يا سجيمان مرض ليلى ده ما قول قالوا وقلنا الناس كلها سمعوبوا ومشوا ليها
إنت ما مشيت وداير تعمل فيها ما سمعت
|
Post: #4
Title: Re: اريتـو شِعِـر اليـابا والتـابا
Author: SAMIR IBRAHIM
Date: 10-23-2003, 02:45 AM
Parent: #3
السي جي مان...التابا ده اخوك عارف معناها ....اليابا دي شنو.....
|
Post: #10
Title: Re: اريتـو شِعِـر اليـابا والتـابا
Author: سجيمان
Date: 10-23-2003, 04:35 PM
Parent: #4
سمير ..... التابا....مؤنث..... واليابا مذكر....اصلا هي التاباهو..... والياباهو
|
Post: #9
Title: Re: اريتـو شِعِـر اليـابا والتـابا
Author: سجيمان
Date: 10-23-2003, 04:07 PM
Parent: #3
ود محجوب.... اذا كان قيس قال قالو....دايرني انا اصدق وامشي ساكت
|
Post: #5
Title: Re: اريتـو شِعِـر اليـابا والتـابا
Author: سجيمان
Date: 10-23-2003, 02:50 AM
Parent: #2
يا كمال...... صنع الله دا خليتو للدكتورة تجيهو....... انا بتاع شعر وبس..... اي شعر تحس انو ما راكب عدلو حولو لي جاي ....وانا بجضمو ليك
|
Post: #6
Title: Re: اريتـو شِعِـر اليـابا والتـابا
Author: bayan
Date: 10-23-2003, 05:02 AM
Parent: #5
يا يابا تتعلى ما تندلى
لانى انا من زمان عندى رأى فى بكاء ابن الملوح الا طعم لا نغم
دا لو كان فارس وما بكاى كان مشى فريق ليلى و خطفها
وانا يتخيل انه مكناتو الكتيرة دى تبرير ساكت ان ما يتقدم لليلى
لانه عارف اذا عرسها الوهم بيمشى ويبقى فى الشكلة الصباحية
وين ياراجل قروش الملاح و قروش الصندوق وامك دى كرهتنى
تجى هنا قايلة الخباء دا هولها يعنى عشان حقك يبقى حقها
وكمان لو طلعت مثقفاتية تظبطوا ليك اسمع انا بؤمن بالاشياء الشخصية
والامتلاك خبائى دا خبائى مشاعية الملكية البتمارسها عائلتك دى ما بتنفع معاى.. وبعدين اختك مش ابوك قال الغنماية السوداء الاضانها بيضاء دى حقتنا مشيت الصباح الزريبة لقيتها حلبتها وانا عارفة عشان تغيظنى.. و بعدين كم مرة قلتا ليك ما تجدع هدومك دى هنا وهنا
الخ ..الخ... نشيد العلم الزوجى
|
Post: #13
Title: Re: اريتـو شِعِـر اليـابا والتـابا
Author: سجيمان
Date: 10-24-2003, 00:24 AM
Parent: #6
شفتي يا دكتورة..... بيان... الجماعة كانو خامننا كيف..... قيس قال...وقيس بكا...وقيس جاتو وردا.....وقيس ابو ليلى لابد ليهو في الزقاق...... وقيس طلع اي كلام..... زي وزي ناس قبلي جاي وقبلي جاي
|
Post: #7
Title: Re: اريتـو شِعِـر اليـابا والتـابا
Author: Maged
Date: 10-23-2003, 05:59 AM
Parent: #1
ياسى جى، أدينا من الشى البتاخدو ده عشان ننعنش معاك. أنا سمعتة أنو الشويعر ده كان عايز إمشى ليها فى العراق لكن ماأدوهو فيزا وما لقة ليهو دعوة عشان كده قعد إزازى وإشعر مع ناس الحلة، بكسر الحاء.
|
Post: #14
Title: Re: اريتـو شِعِـر اليـابا والتـابا
Author: سجيمان
Date: 10-24-2003, 01:15 AM
Parent: #7
ماجد يا اخوي....... قاعد اخد حبوب ضغط... الله يكفيك شرها........وبعدين قيس دا ما ممكن يمشي عن طريق سوريا
|
Post: #8
Title: Re: اريتـو شِعِـر اليـابا والتـابا
Author: 3mak Hasabo
Date: 10-23-2003, 02:58 PM
Parent: #1
السجيمان الرمدان
قلت كدا اخير؟؟؟
ذكرتنى واحد من ناس البلد الباردة دى...كل ما أمشى السنتر...القاهو كل يوم بشكل جديد...هو شحاد بمفهومنا نحنا وبمفهومهم هم ربما يكون مبدع متبرع بابداعه...المهم...صاحبك يوم يعمل فيها رسام..ملتجيب دخل...تانى يوم يقلب عازف...ماتجيب دخل يقلب نحات...وكداى طوالى كمل الفنون كلها..والله ماعارفو تانى يقلب شنو..!!!
اسى شايفك قلبت ناقد...
|
Post: #11
Title: Re: اريتـو شِعِـر اليـابا والتـابا
Author: انا بنت النيل
Date: 10-23-2003, 08:01 PM
Parent: #8
الأخ ..السي ..جي "لقيتها أخيرا البتفكني من ذاك الذي لا اريد ان اسميك به "..وردة مفتحة ونديانة ..وعطرة الرائحة اقطفها لك..من بستان مليان بالورود..يقع في السودان البلد التريان المليان بأهله وطيبتهم وسماحتهم وحلاة لسانهم زيك انت ..ما انت منهم وفيهم..
سلمت
|
Post: #16
Title: Re: اريتـو شِعِـر اليـابا والتـابا
Author: سجيمان
Date: 10-24-2003, 01:34 AM
Parent: #11
انتي بنت النيل.... شكرا لكي....وللكلام الظريف الحلو دا...... باقي انا مطووووووووول من نضم زي دا.... اريت ربي يديكي الفي ماردك ونيتك
|
Post: #15
Title: Re: اريتـو شِعِـر اليـابا والتـابا
Author: سجيمان
Date: 10-24-2003, 01:26 AM
Parent: #8
عمي حسبو.... البلد الباردة وين؟؟؟؟؟.......والله نحن هنا الحر داير يظلطنا
|
Post: #12
Title: Re: اريتـو شِعِـر اليـابا والتـابا
Author: wd al geran
Date: 10-23-2003, 08:17 PM
Parent: #1
احيييي انا يا سجيمان ...
بالله الكلام السمح الفوقي دا كلو ليك!!
ايامك والله ... دابك لقيت الناس البتقّدر.
|
Post: #19
Title: Re: اريتـو شِعِـر اليـابا والتـابا
Author: سجيمان
Date: 10-24-2003, 02:25 PM
Parent: #12
من شر حاسد اذا حسد..... ياود الجيران
|
Post: #17
Title: Re: اريتـو شِعِـر اليـابا والتـابا
Author: جمال السنوسي
Date: 10-24-2003, 09:29 AM
Parent: #1
يقولون الكورة بالسودان مريضة وأقول ياليتني الكوري الشمالي
|
Post: #18
Title: Re: اريتـو شِعِـر اليـابا والتـابا
Author: bayan
Date: 10-24-2003, 09:48 AM
Parent: #17
السنوسى
بناء على مدرسة سجيمان النقدية
بيتك دا ناقص
وين الله يكفينا شر قالو واين تلك اليمين المغلظة
اما من ناحية كورى شمالى دى
كلنا بندورها
سجيمان مدرستك دى حتفوق المدرسة الخنفشارية
لازم يكن فى تدرج زمنى بين المدارس لانه المدارس دى بتظهر نتيجة حراك اجتماعى وفكرى.. بأختصار ما ممكن فى شهر واحد تولد مدرستين
عشان كدا نحنا بندعوك انه مدرستك دى تدمجها فى مدرستنا واها الوحدة قوة.. ما تخلينى اقص ليك قصة الراجل الداير يموت داك فى كتاب المطالعة وكسر العيدان لما مفترقات وغلبنه لما مجتمعات..
اها قلتا شنو يا ود العم؟
|
Post: #21
Title: Re: اريتـو شِعِـر اليـابا والتـابا
Author: bayan
Date: 10-24-2003, 03:34 PM
Parent: #18
سجيمان عايزاك تدفع لى خلو رجل فى بوست البحيرى
|
Post: #22
Title: Re: اريتـو شِعِـر اليـابا والتـابا
Author: سجيمان
Date: 10-24-2003, 03:50 PM
Parent: #21
يا بيان...... نتقسمو..... انتي شيلي الجزء بتاع الهندسة والشوارع.......وانا بشيل الجزء حق الحمل والولادة
|
Post: #20
Title: Re: اريتـو شِعِـر اليـابا والتـابا
Author: سجيمان
Date: 10-24-2003, 02:42 PM
Parent: #17
جمال.... برضو يقولون؟........شوف بيان قالت لك شنو؟
|
Post: #23
Title: Re: اريتـو شِعِـر اليـابا والتـابا
Author: aba
Date: 10-24-2003, 05:26 PM
Parent: #20
ليتنا يا عزة بعيران ** نرعي في الخلاء ونبعر
أها يا سيجيمان يا إبن عمي شن قولك في كلام كثير ده طبعا دي ريده بعيرية مبعرة خالص
أما زولك المجنون فقال :
دعا باسم ليلي غيرهافكأنما ** أطار بليلي طائرا كان في صدري
وكلما أقرا البيت ده بتخيل في واحد كان لابت ليهو ورا الباب وهجمو بأعلي صوت (ليلي) الجن بيداوي
|
Post: #26
Title: Re: اريتـو شِعِـر اليـابا والتـابا
Author: سجيمان
Date: 10-27-2003, 01:11 AM
Parent: #23
يا ابا ان هذا الكثير..... يعاني من الشذوذ...... كيف يقعدو هو وعازة يبعرو؟..... يعني داير عازة تجي وتدسا من اهلها....وتتلبد وتقابلو عشان يقعدو يبعرو....... والبعر دا حدو متين؟....... الهم انا لا نسألك رد القضاء ولكن نسألك اللطف فيه
|
Post: #24
Title: Re: اريتـو شِعِـر اليـابا والتـابا
Author: noha_g
Date: 10-24-2003, 07:36 PM
Parent: #1
سجيماااااااااااااااااااااااان
قلت لي قالوا و قلنا؟
و طيب الشاعر القال
قالوا قالوا علي شقي و مجنون
صحيح مجنون
و إنتم جنوني يا حلوين
انقده لي
ههههههههههههههههههههههه
|
Post: #25
Title: Re: اريتـو شِعِـر اليـابا والتـابا
Author: Amin Elsayed
Date: 10-24-2003, 09:48 PM
Parent: #24
up
|
Post: #27
Title: Re: اريتـو شِعِـر اليـابا والتـابا
Author: سجيمان
Date: 10-27-2003, 01:17 AM
Parent: #24
يا نها...... شاعرك دا..... عندو اندراوا... والاندراوا دي مرحلة من مراحل الجن التلاتة.... هي المرحلة الفي النص
|
|