جوائز التلفزيون.....جوائز اليابا والتابا

جوائز المسابقات.. في التفلزيون....مافيها أي تشجيع عشان الناس تشترك.... ومافيها أي تجديد....نفس جوائز السنة الفاتت تلقاها السنة دي. وجوائز هايفة ساكت.... انا فكرت اطور الجوائز....تتماشى وتواكب تطلعات الشعب السوداني الكريم...مثلا:-



الجائزة الاولى:-



عقد عمل بالسعودية في وظيفة محاسب.... مقدم من سفارة السعودية....مع شهادة بكالريوس محاسبة معتمدة ومختومة مقدمة من جامعة النيلين مجانا.... حتى لو الفائز ساقط شهادة و ما بيعرف كوعو من بوعو



الجائزة الثانية:-



رتبة لواء أركان حرب لمدة عام.....مقدمة من قوات الشعب المسلحة.....مع بدلة عسكرية .... وكسكتة .....ومجموعة دبابير وصقور ومقصات.......وعصاية.......وشنب اتنين متر



الجائزة التالتة:-



رتبة رائد شرطة مع نقطة بوليص.... بي عساكرها....وعدد اربعين محتجز..... الجائزة مقدمة من وزارة الداخلية........وبرضو لمدة عام.... تكون ملك حر للفائز..... يعني يبرطع فيها بي راحتو



الجائزة الرابعة:-



ناموسية مصنوعة من الساكوبيس الأصلي ....زائدا خمستاشر فتيل فاضي.... لاخد عينات الفسحة والبول..... اضافة الي صفيحة بول مفحوص جاهز ....يعني ما حيخسر حق الفحص ولا حاجة....مقدمة من مركز سجيمان الطبي...."مركز سجيمان الطبي يعني العناية الفائقة....والراحة الزائدة ......تدخل ماشي علي كرعيك نطلعك بي عنقريب محمول على كتوف الراحة...."



الجائزة الخامسة:-



شهادة إعفاء من الضرائب والزكاة و المساهمة الإلزامية وإعفاء من الحليفة......مقدمة من جهاز العاملين بالخارج....إضافة إلي شهادة ضمان بعدم النهزرة والشحططة....مع ابتسامة مشرقة من المرا ام نضارات الموظفة في الجهاز... ديك ......الجدير بالذكر انه بالا مكان بيع هذه الجائزة....يعني لو فاز بها واحد من القاعدين في السودان ممكن يبيعها لي أي زول مغترب مشلهت زي كدا....



الجائزة السادسة:-



تلاتة سنون وضُرس من الدهب الخالص.... لزوم الضحك البلا سبب....مقدمة من مجوهرات البوبار.....بسوق امدرمان



الجائزة السابعة:-



مائة جوز سفنجات.ماركة" مشيناها خُطاً"مع مئة كيس صعوط.. و شريط كاسيت... مسجلة عليهو غنية يا صعوط حلتنا زولن كان بسفك يا حليلو.....عشان الفائز يعلق المسجل في كتفو...ويلبس السفنجة...ويحوم في الحلة.... لحدي ما يقطع المائة جوز......هذه الجائزة مقدمة من شركة كداري اخوان



الجائزة التامنة:-



مئة وخمسين متر من شارع بورتسودان الخرتوم.....مع كشك تفتيش...ويمكن للفائز اختيار موقع المائة وخمسين متر والكشك... في أي نقطة تعجبو من الشارع المذكور.....هذه الجائزة مقدمة من الطرق والمواصلات بالتعاون مع الجمارك



الجائزة التاسعة:-



عشرة كيات بالنار..علاج للغيرغان.....مقدمة من وزارة الصحة... قسم الفولكلور الشعبي.....



الجائزة العاشرة:-



خروف سماية....من خرفان التصدير.... من غير جلد....مقدمة مناصفة بين اتحاد رعاة السودان ومصدري الماشية..........والله راحات!!

يا دكتور


والله الخامسه دي موت عدييييييييل كدي

ابو فاطمة

Quote: والله الخامسه دي موت عدييييييييل كدي

شاحد الله وبركة ابو فاطنة.... يا ابو فاطنة تفوز بها

Quote: عشرة كيات بالنار..علاج للغيرغان.....مقدمة من وزارة الصحة... قسم الفولكلور الشعبي..... [/QUOTE غايتو دي انا متنازلة ليك منها من هسي مبروكة عليك.....

---

Post: #6 Title: Re: جوائز التلفزيون.....جوائز اليابا والتابا Author: سجيمان Date: 06-20-2004, 07:27 AM Parent: #3 مريم الطيب Quote: غايتو دي انا متنازلة ليك منها من هسي مافي كلام زي دا... الجائزة اجبارية....وما عندنا زول يحرد جائزتو

---

Post: #5 Title: Re: جوائز التلفزيون.....جوائز اليابا والتابا Author: abas Date: 06-20-2004, 07:06 AM Parent: #1 رتبة لواء أركان حرب لمدة عام.....مقدمة من قوات الشعب المسلحة.....مع بدلة عسكرية .... وكسكتة .....ومجموعة دبابير وصقور ومقصات.......وعصاية.......وشنب اتنين متر انا عاوز دي بس عاوزها عاوزها

---

Post: #12 Title: Re: جوائز التلفزيون.....جوائز اليابا والتابا Author: سجيمان Date: 06-21-2004, 12:32 PM Parent: #5 عباس Quote: انا عاوز دي بس عاوزها عاوزها انت زول صاحبي.... انا غايتو بحاول اساعدك... بجيب بنيتي فوفو واعلم الورقة بتاعت واخليها تختارها.... مبروك مقدما يا جنابو

---

Post: #7 Title: Re: جوائز التلفزيون.....جوائز اليابا والتابا Author: حبيب نورة Date: 06-20-2004, 02:13 PM Parent: #1 Quote: مائة جوز سفنجات.ماركة" مشيناها خُطاً"مع مئة كيس صعوط.. و شريط كاسيت... مسجلة عليهو غنية يا صعوط حلتنا زولن كان بسفك يا حليلو.....عشان الفائز يعلق المسجل في كتفو...ويلبس السفنجة...ويحوم في الحلة.... لحدي ما يقطع المائة جوز......هذه الجائزة مقدمة من شركة كداري اخوان

---

Post: #13 Title: Re: جوائز التلفزيون.....جوائز اليابا والتابا Author: سجيمان Date: 06-21-2004, 12:52 PM Parent: #7 حببيب نورة انا عارف............عجبتك اكياس الصعوط دي.........

---

Post: #8 Title: Re: جوائز التلفزيون.....جوائز اليابا والتابا Author: صديق الموج Date: 06-20-2004, 02:23 PM Parent: #1 الجائزة الحادية عشر: اشتراك فى موقع سجيمان مدى الحياة..وهاكم دى كان تقدروا تدخلوا. بعدين يا سجيمان على ايام طيب الذكر جراب الحاوى كان بقول للفائز باستهتار شديد شيل ليك صتدوق من هناك..وفى محطات التلفزيون المحترمة اول شى فيها بوسة ومرات من واحدات زى العسل ويقولوا ليك اول شىء كسبنا شوفتك والف مبروك ونشوفك مرة تانية..مش شيل ليك سفنجة من هناك واختانا.....يا حليلنا نحن،،،،

---

Post: #14 Title: Re: جوائز التلفزيون.....جوائز اليابا والتابا Author: سجيمان Date: 06-21-2004, 01:21 PM Parent: #8 صديق الموج Quote: اول شى فيها بوسة ومرات من واحدات زى العسل ويقولوا ليك اول شىء كسبنا شوفتك والف مبروك ونشوفك مرة تانية.. مناي في الدنيا قبل الرحيل...اشوف نوع ديل....واتني جنبها واقولها تأبريني....وبوسي بوسي..لحدي ما تبقي نورا

---

Post: #9 Title: Re: جوائز التلفزيون.....جوائز اليابا والتابا Author: omar_ragab Date: 06-20-2004, 02:33 PM Parent: #1 loooooooooooooooooooooooooooooool dr cgman ana dayir algayza rgm khmsaaaaaaaaaaaaaaaaaa pls give it 2me shayif fe moshtrk that means alkhamsa mushtrk hhhhhhhhhhhh very nice www.cgman.org i couldnt regsiter myself why ya sgman ana zlan lol

---

Post: #15 Title: Re: جوائز التلفزيون.....جوائز اليابا والتابا Author: سجيمان Date: 06-21-2004, 01:29 PM Parent: #9 عمر رجب Quote: i couldnt regsiter myself why ya sgman حاول..... قطعا سوف تنجح...والبورد فاتح على مشراعيه....وحبابك الف

---

Post: #10 Title: Re: جوائز التلفزيون.....جوائز اليابا والتابا Author: alfatih Date: 06-21-2004, 00:23 AM Parent: #1 سجيمان سلامات يا مدهش بالمناسبة انا داير الجائزة التالتة وعلى شرط اختار المحتجزين ويكونوا من الخارجية وشئون المغتربين والالزاميةوالقصر الجمهورى والجمارك وشرطة النظام العام ولحدى سنة ماتلقوا فيهم حاجة الا ملابسهم شايف عمر رجب مشترك فى الخامسة عشان كدة يدخل امتحان تانى

---

Post: #16 Title: Re: جوائز التلفزيون.....جوائز اليابا والتابا Author: سجيمان Date: 06-21-2004, 06:18 PM Parent: #10 الفاتح Quote: بالمناسبة انا داير الجائزة التالتة مافي مشكلة.... وبرضو نبشرك انو عندك حق اختيار نوعية المحتجزين

---

Post: #11 Title: Re: جوائز التلفزيون.....جوائز اليابا والتابا Author: almulaomar Date: 06-21-2004, 06:43 AM Parent: #1 الأخ سجيمان أتمنى أن أشارك في مسابقتكم العامرة يا سجيمان يا .. بشرط أن تكون الأسئلة ساهله أو فيها خيارات وفي رواية أخرى إختيارات ، المهم إذا فزت أتمنى أن أنال الجائزة الثانية لأنها أقصر الطرق المؤدية إلى القصر الجمهوري ، وبعد أن أتصلح في قعدتي في كرسي الرئاسة وأتنحنح وأتلفت متفقداً محتويات المكتب البيضاوي خاصتنا أقوم يا سيدي أصدر أول قرار جمهوري بالرقم واحد على واحد في واحد يقضي بتعيينكم وزيراً للثقافة والإعلام ومديراً للتلفزيون أسود وأبيض ومسئولاً عن الرقابة والتطوير بجهاز التلفزيون وجهاز العاملين بالخارج وجهاز المناعة لدى المواطن المغلوب على أمره والجهاز الهضمي لجميع الحيوانات المجترة والعادية وأجهزة الإستخبارات.

---

Post: #17 Title: Re: جوائز التلفزيون.....جوائز اليابا والتابا Author: سجيمان Date: 06-21-2004, 06:29 PM Parent: #11 الملاعمر Quote: أتمنى أن أشارك في مسابقتكم العامرة يا سجيمان يا .. يا سجيمان يا شنووووووووووووووووووووووووو؟.. انت الظاهر عليك بقيت بتاع مشاكل وكدا

---

Post: #18 Title: Re: جوائز التلفزيون.....جوائز اليابا والتابا Author: almulaomar Date: 06-22-2004, 05:35 AM Parent: #17 أخي سجيمان أوًلاً الشكر كل الشكر لك على هذا الرد الذي إنتظرته مثل إنتظاري لصباح العيد ، طبعاً دي مكنه من أخوك وكده ، وبالمناسبة يا دكتور أنا لا بقيت بتاع مشاكل لا بفتش ليها ، والدليل أن دقنوسي هذا لم يبقي فيه inch إلا وفيه فلقة طوبة أو ضربة فرار أو شلخة مطوه أو كسرة عصا مضببه ولا نامت أعين سجيمان لبس نظارته أم لم يلبسها. ثانياً عندما قلت يا سجيمان يا ، هي عبارة أتتني يأتيك الطلق إن شاء الله يا دكتور وتذكرت البرنامج المصري يا تلفزيون يا بس غلبني أنزل ليك الموسيقى بتاعت البرنامج. أها قلت شنو في الجائزة الثانية حا تديني ليها ولا ألم أهل العوض لى حدهم ونجيكم في البندر

---

Post: #19 Title: Re: جوائز التلفزيون.....جوائز اليابا والتابا Author: سجيمان Date: 06-22-2004, 09:16 AM Parent: #18 الملا عمر Quote: أها قلت شنو في الجائزة الثانية ? اوكي.... بس لو انتظرت شوية...يمكن يكبرو الجائزة

---

Post: #20 Title: Re: جوائز التلفزيون.....جوائز اليابا والتابا Author: سجيمان Date: 06-23-2004, 02:57 AM الملا عمر تاني دا ..............عشان ما تقول مطنشك

---

Post: #21 Title: Re: جوائز التلفزيون.....جوائز اليابا والتابا Author: ود الشيخ Date: 06-23-2004, 03:59 AM Parent: #1 . . [qb] سحيمان الجائزة المقدمه من مستشفى سجيمان يعني الواحد يدخل حمار ويخرج تيس ولا قرد عديل [/qb]