Post: #1
Title: كــلاب الســـودان... تستنـكــر
Author: سجيمان
Date: 07-01-2004, 03:23 PM
السيد رئيس الولايات المتحدة الأمريكية
بواسطة السيد وزير خارجيته
نحن الموقعين أدناه.... اتحاد عام كلاب السودان..... نستنكر وندين ونشجب بشده... حضور كلاب أمريكية مع السيد كولن باول بقصد حمايته وحراسته....إنها إهانة ما بعدها إهانة....وإساءة لنا نحن كلاب هذا البلد المعطاء.. نفيدكم أنكم اتلومتم فينا لوم شديد...وحقرتونا حقارة ما بعدها.....ان قصدتم أن كلابكم... شمامة..... إن لنا نخيرين..نفتخر بها.....وكما قال شاعرنا:-
حبيبي.............. يا الفقري
اجري قدر........ ما تجري
كان هجرتني وانا في بُري
اشمك حتى لو مشيت وين؟ و وين؟
ان شاء الله بحري
.........
وقالت شاعرتنا جِريِوة بت عبود تتغنى بخصال محبوبها جرقاس
ما بياكل من كوّش... ياكل كِرت مطاعم
اب ضنبن ملوي عُقبان لهيجو ....طاعم
حاشا ما خنقو عضُم
ولا شافوهو بالحلة حايم
ينبح... ليلو كلو.....ما قالو لِقهو نايم
هيع
...وبعد كل هذا يا سيادة الرئيس.... تجيبو كلاب من أمريكا وكمان بالإنجليزي؟.لا وألف لا.....إننا نتوج احتجاجنا هذا.... بالإضراب لمدة تلاتة أيام بلياليها..إضراب عن النبيح والهوهوة....وان شاء الله البلد كلها تتسرق اكتر مما هي مسروقة
أما لو كان قصدكم أن كلابكم.... نصيحة وشديدة في الحراسة...نقول لكم ما صدقتو....كلابكم كان بالصِح حراسّة....مالا ما حرست مونيكا من كلينتون؟...
السيد الرئيس.... أننا ككلاب من العالم التالت...ولكنها حرة... وتمارس حياتها بكل ديمقراطية... أحسن من اجعص زول حايم في البلد دي.... وأحسن من اجعص كلب حايم في أمريكا...ونتمتع بحرية التعبير...قولا وفعلا....واسال أي عمود بتاع كهرباء واقف.....او أي كفر ولستك بتاع عربية....او أي حجر قايم من الواطا شوية....يحكي لك .... كم نحتنا فيه... من ذكريات...ويقف شاهد على حريتنا في تبولنا بدون وصاية ولا طقيّع وضرب بالحجارة.....وكما قال شاعرنا:-
كم فتاة مثل ليلى
وفتى مثل ابن الملوّح
انفقا الساعات
هو يبول وهي تنبح
وقال شاعر اخر:-
سألت عنك كارو جارة
وزرعت اسمك حارة حارة
في مشاوير السكارى
في عماويد الإنارة
في لحى الاشجار
نحتو....كتبتو......
.... في صُم الحجارة
دا كلو بدون ما زول يقول لنا..جر
كما وأننا... نتمتع بثقافة جنسية عالية....ولا حجر على ممارسة الجنس لدينا.... في كل مكان وزمان...في البيت في الشارع في المسرح...حيث انه حق من حقوقنا الشرعية..الذي كفله لنا الدستور...ويشهد على ذلك مطربنا..بوبي جيفة...وهو يشدو
جاريني...وأنا جاارو
يا ناس وحياة الله
متلاصقين حايمين بالحِلة
الحِلة
الحِلة
جاريني وانا جاارووو
إننا نطالبكم بالاعتذار العلني..... عن الإساءة لنا...
اتحاد عام كلاب السودان
|
Post: #2
Title: Re: كــلاب الســـودان... تستنـكــر
Author: سجيمان
Date: 07-02-2004, 05:50 AM
Parent: #1
*
|
Post: #3
Title: Re: كــلاب الســـودان... تستنـكــر
Author: لقمان حسن همام
Date: 07-02-2004, 09:07 AM
Parent: #2
هههههههههههههههههههههههههههههه ..
رائع .. رائع .. رائع
|
Post: #4
Title: Re: كــلاب الســـودان... تستنـكــر
Author: سجيمان
Date: 07-02-2004, 06:08 PM
Parent: #3
لقمان
بارك الله فيك
نجاملك وانت عريس يا يابا
|
Post: #5
Title: Re: كــلاب الســـودان... تستنـكــر
Author: مراويد
Date: 07-02-2004, 06:43 PM
Parent: #1
نؤيدكم و نهنق بشده بى جنبكم ونهز ضنبنا معكم
ونذكر باول بقول شاعرنا حمار ابو دبار فى مدح كلاب امتنا :
جرقاس الاصيل
بى جنبو ما تشيل هم
حراس نهار و ليل
للحراميه كم عدم
فى الحب ده روميو عديل
كلبات حلتنا تتكلم
كم جرجرن بالحيل
شارعنا سال دم دم
الله يحفظك يا اصيل
للنبيح والشم
ونطالب بتدخل منظمة الوايبو وال WTO لحسم هذه القضيه
اتحاد عام حمير السودان
سجيمان تسلم لاثارة هذه القضيه الخطيره
الله لا جاب يوم جرجرتك
|
Post: #6
Title: Re: كــلاب الســـودان... تستنـكــر
Author: ترهاقا
Date: 07-02-2004, 07:01 PM
Parent: #5
شكلنا كدة يا سى جى حنطالب بتدخل الكلاب لحل الوضع الراهن فى السودان ويا ليتنا نستمد منهم هذه الحرية المطلقة،
يا كلبنا لو جئتنا بمقرنا * لو وجدتنا نحن الكلاب وانت ...تم لى الباقى
لكن بينى بينك يا سى جى الإستنكار دة مفروض يكون واحد من أجندة
الدستور القادم .
|
Post: #7
Title: Re: كــلاب الســـودان... تستنـكــر
Author: Rawia
Date: 07-02-2004, 07:38 PM
Parent: #6
كلاب مصر ماقدرو يقولوا تلت التلاته كم
لما جابوا ليهم كلاب امريكا تتضرع فى قاعه المؤتمرات -مدينه نصر- فى مؤتمر السكان العالمى
جايين انتو ناس كاكا وكنى وترك العايله تتكلموا كمان
هو بعرف لما يدهو يغرف
|
Post: #10
Title: Re: كــلاب الســـودان... تستنـكــر
Author: سجيمان
Date: 07-03-2004, 09:37 AM
Parent: #7
راوية
| Quote: كلاب مصر ماقدرو يقولوا تلت التلاته كم |
كلاب مصر ما عارفة حقوقها.....اما كلابنا نحن تفتيحة
|
Post: #9
Title: Re: كــلاب الســـودان... تستنـكــر
Author: سجيمان
Date: 07-03-2004, 06:08 AM
Parent: #6
ترهاقا
ازيك
بركة الشوفة
| Quote: يا كلبنا لو جئتنا بمقرنا * لو وجدتنا نحن الكلاب وانت ...تم لى الباقى |
يا كلبنا لو جئتنا بمقرنا * لو وجدتنا نحن الكلاب وانت رب المنزل
|
Post: #8
Title: Re: كــلاب الســـودان... تستنـكــر
Author: سجيمان
Date: 07-02-2004, 08:51 PM
Parent: #5
مراويد
| Quote: الله لا جاب يوم جرجرتك |
هههههههههه آآآآآآآآآآمين.....هههههههههه آآآآآآآآآآمين
|
Post: #11
Title: Re: كــلاب الســـودان... تستنـكــر
Author: singawi
Date: 07-03-2004, 02:57 PM
Parent: #1
السادة اتحاد عام كلاب السودان
السلام على من اتبع الهدى
نيابة عن اتحاد كلاب منطقة سنجة بولاية سنار
نشجب الشجب ، ونستنكر الاستنكار ، وندين الإدانة ... قف.
انبطاحكم أمام الصلف الكلابي الأمريكي موضع استهجاننا ... قف.
لا يسلم الشرف الرفيع من الأذى .. حتى يراق على جوانبه الدم ... قف.
وإننا من هذه الكوشة ، وبالتضامن مع كلاب ود المنسي الشرفاء ننذر كلاب أمريكا للمرة الأخيرة ولا عذر لمن أنذر .. وعلى الباغي تدور الدوائر .. قف.
وبهذا نعلن انسلاخنا عن اتحاد الذل والمهانة وندعو كل كلاب السودان للتخلي عن اتحاد ( الهوهوة ) وتكوين اتحاد العضعضة والقِـرييييم .. قف
يا كلاب العالم .. إتحـدوا
عاش تحالف ود جـرقاس
ود جرقاس للأمة أسـاس
ود جرقـاس التاج للراس
كـلاب العـزة لا بنخـاف ولا بنتُـر
كلاب العزة نقرش عضمة نشرب مُر
كلاب اليانكي مـن بيناتنا ما بتمُـر
كان اتلاقينا تعرف بُـرة مين الحُـر
|
Post: #12
Title: Re: كــلاب الســـودان... تستنـكــر
Author: سجيمان
Date: 07-04-2004, 04:54 AM
Parent: #11
سنجاوي
نشكر تعاضدكم... لنا
| Quote: كان اتلاقينا تعرف بُـرة مين الحُـر |
دا الكلام
|
Post: #13
Title: Re: كــلاب الســـودان... تستنـكــر
Author: شمهروش
Date: 07-04-2004, 09:47 AM
Parent: #12
سيجمااااااااااان
ديل ياتوا كلاب مابقى عندنا منها انواع كتيرة ولوبي الضغط بيتشكل على حسب النوعية كلما كان الكلب اعرق كلما كان تاثيره على القرار السياسي اكبر
|
Post: #15
Title: Re: كــلاب الســـودان... تستنـكــر
Author: سجيمان
Date: 07-04-2004, 09:28 PM
Parent: #13
شمهروش
| Quote: كلما كان الكلب اعرق كلما كان تاثيره على القرار السياسي اكبر |
ديل اكتر كلاب بيعرقن في الدنيا.....لكن للاسف لا يمثلن اي ضغط
اوعى يكون النضم دا سياسة؟
|
Post: #14
Title: Re: كــلاب الســـودان... تستنـكــر
Author: singawi
Date: 07-04-2004, 02:35 PM
Parent: #1
السادة الاتحاد العام لكلاب السودان
تحية واحترام
عميق أسفنا وصادق ألمنا واعتذارنا لاتحادكم الموقر لما لحق بكم من إساءة وتطاول عليكم وعلى ضيوفكم الكرام السادة الكلاب الأمريكية التي نعلم نبل مقصدها ، ونقاء سريرتها ، ونعلم علم عين اليقين أن تجاوزها المحمود ودخولها تووووووش إلى بلادنا المضيافة كان بحسن نية لعلمها أن الحالة واحدة فكلنا كلاب يجمعنا المصير المشترك ووحدة اللغة والمهام المتكاملة . ونشكر لضيوفنا الكرام تفضلهم بمشاركتنا الشمشمة والهمهمة ونعتبر تواجدهم بيننا دورة تدريبية فاز بها سعيد الحظ منا . ونثمن غالياً تعريض أنوفهم السااااقطة للخطر بحشرها في شئوننا المغبرة ونفيدهم عبركم أننا وإياهم " هنايين في هناي " لحام ستلين للميتين . يسرنا ما يسرهم ويضرنا ما يضرهم ويزيد في ألمنا وحرجنا أن الذين أتوا بالإفك عصبة منا نحن الكلاب السنجاوية التي لا تعرف الأذية ، ولا تحزنكم برقيتهم النارية ، نحن الملوك وهم الرعية ولولا الفلس كنا نربهم رب ، ونصبهم صب ، ونشربهم جوووووت . وبهذه المناسبة نفيد أصدقائنا عبركم أن حسابنا في بنك الكوشة الكبير وشعارنا بارك الله في من فاد واستفاد ، ونفع واستنفع .
وتقبلوا سيادتكم تحياتنا وأطيب أمنياتنا
إخوانكم حركة التصحيح لتجويد العضعضة والنبيح بمنطقة سنجة
عنهم :
بوبي السحسوح
لاسي بنت نباح
|
Post: #17
Title: Re: كــلاب الســـودان... تستنـكــر
Author: سجيمان
Date: 07-05-2004, 02:24 AM
Parent: #14
سنجاوي
الكلب ابن الكلب دا لسه في الحركة دي؟....ما قالو انفصل
|
Post: #16
Title: Re: كــلاب الســـودان... تستنـكــر
Author: أمير تاج السر
Date: 07-04-2004, 10:14 PM
Parent: #1
مار أيك لو وزنا قصيدة جريوة بت عبود وأضفنا إليها بعض البهارات لتصبح هكذا :
ما بيغشى الكوش
ياكل كرت في مطاعم .
أب ضنبا ملولو
لهيجو سكر طاعم .
ما خنقو العضم
ولا أكلو شتايم .
وفي وش اللصوص
أسدا عديل متلاطم .
ينبح ليلو كلو
ما تغطغط نايم .
وإن شاف الصغار
ياهو الرحيم الناعم .
جر يا ود أبوي
الليلة شفت مظالم .
سوولك سجل إرهابي
وانت مسالم .
وجابولك خلق رطانة
صوفهم قايم .
على استعداد لتفعيل قصائدك كلها يا سجيمان بس تدفع .. وحا أعملك تخفيض عشان زمالة المهنة .
وانت مسالم .
|
Post: #18
Title: Re: كــلاب الســـودان... تستنـكــر
Author: سجيمان
Date: 07-05-2004, 02:53 AM
Parent: #16
امير تاج السر
| Quote: على استعداد لتفعيل قصائدك كلها يا سجيمان بس تدفع |
تفعيل كيف يعني؟................. مع اتفاقية السلام؟
|
Post: #19
Title: Re: كــلاب الســـودان... تستنـكــر
Author: زوربا
Date: 07-05-2004, 11:54 AM
Parent: #18
د / سجيمان اللذيذ
والشوق الجاري عليك
والله العظيم بالغت عديل كدا ياخ الواحد لامن بطنو وجعتوا من الضحك
سلمت للدفاع عن حقوق كل المظاليم المطاليق
والريد نيلين ِ
|
Post: #20
Title: Re: كــلاب الســـودان... تستنـكــر
Author: سجيمان
Date: 07-05-2004, 06:41 PM
Parent: #19
زوربا الالذ
| Quote: سلمت للدفاع عن حقوق كل المظاليم المطاليق |
وتقول لي بارجيت باردو.....؟
|
|