الانقـــاذ...و...الافخـــاذ

رقصّت تماضر عرائسها....والانترنت وقف على كراع واحدة.....تفاطر الناس من كل صوب وحدب.... الشايل عكازو والشايل سكينو...والسالي لسانو....الجاي يشاكل عشان قالو ليهو في شكلة هناك وهو اصلو زول بتاع شبك...والجاي يشاكل عشان تماضر دي قبل كدي شاكلتو.....والجاي يشاكل عشان ما عاجباهو صلعة بكري وفي امريكا اي زول عندو صلعة زي حقت بكري دا الامريكيات بيقولن عليهو سيكسي ويموتن فيهو وبكري الاسبوع الفات ماتن فيهو عشرة واطلع بالواحد...كيف يكون بكري سيكسي وانا يخسي..؟... وبكري دا اصلو قاعد يحامي لي تماضر...والجاي يشاكل عشان يا زول يا زول دا اخو تماضر ويا زول دا زول كعب وقبال كدا دفرني في باظات السورة.....وربط لي في الزرايب الاكانت بين الحارة حداشر والحارة تلاتاشر.....والجاي يشاكل عشان المقداد...زمان لما كان بيقرا في نشرة الاخبار وفي بيتنا النسوان قالن حلاتو البيقرا في النشرة دا...اها انا جني وجن زول يقولو حلاتو وانا قاعد....عشان كدا فرصة ادي تماضر علي راسا...وعشان تاني مافي مرا تقول المقداد حلاتو... والله كمان عدم سوعال رقيص وفي الرقيص في الغربة؟ وسط الاغراب...؟....والجاي يشاكل عشان يكاوي سجيمان لانو سجيمان دا صاحب ناس عصام جيران ناس تماضر..وناس تماضر كانو طوالي يشحدتوهم التلج وقت الكهرباء تقطع...وعلاقة سجيمان بهم علاقة تلج وملاح...والجاي يشاكل عشان الموصلي من جماعة تماضر...والموصلي دا زمان في حفلة في الحلة الجديدة ختو ليهو صينة عشاء الفنانين وقام عليها كلها برااااهو وانا حايم جنبو وابلع في ريقي حلف ما يقول لي العقرب التفطسك...والله الليلة علا اطرشو الاكل داك
وفي ناس جاين يشاكلو.. كية للشيوعين ولاد الكلب ديل....وقالو في ضمتم تماضر شيوعية...وكولن باول شيوعي...وناس حمبرا جو يشاكلو عشان
اخوانهم ناس الجبهة جو..ودايرين يساندوهم....ويجو تاني الشيوعين عشان يدافعو عن تماضر...ويدكو اركان الرجعية والتخلف..مش تماضر رفيقة؟. ناس الجبهة قالو كيف تعرضو افخاذ المؤمنات للكفار اعداء الدين والوطن والافخاذ.... هم الامريكان باقي لكم كايسين لي افخاذ؟ ولاّ...مصرومين في افخاذ؟ يا الغبيانين.... والله بيسعلني الافخاذ في الخرتوم الكيلو بي جنيهين اما لحم الراس داك بي ساكت..وهاك يا شتائم... وجو الهكرز....وقالو نصوط مع الصايطين.......ودا كلو عشان رقيص.... ؟...
لا..لا
القصة مو قصة.. رقيص

القصة قصة شعب فطيس

والله فعلا فطيس ..
وكت طلعنا كلنا اولاد ستين كلب .. !

حميدة

Quote: والله فعلا فطيس ..

مالك مفطس روحوك....... يا اخوي؟

سجيمان أول بالتبادي سلام يا خوي سي جي
لو كلامك هنا عن الجوطة والبوستات الإنفرعن من البوست الأساسي زي عنقوديات الأمريكان فوق العراق ف معاك حق إنو الموضوع كان ممكن يتعالج لو بالغ في بوستيهين تلاتة والله كان كفّانا شر كل الحصل .
اما لو كلامك قاصد بيهو الناس الأخدت وردّت وقالت رأيا في الموضوع ده فما ليك حق لأنو كل زول عبّر عن وجهة نظرو وما ظنيتك قاصد التانية دي , إلا كولن باول ده طلع بتاع بتين ؟





أبنوسي

عينك لى الفيل تطعن فى ضلو

سجيمان انت النوع البيطعن فى الفيل عديل وتتكى فى ضلو


الله يديك العافية

سجيمان

أعمل ساتر .

سيهدر دمك مثل الحاج وراق

أكتب وصيتك وأحجز لأسرتك على الخطوط السعودية فوراً
تجنب السودانية لدواعي الاستعجال

كل الدبابين معك في المملكة السعودية

رحمة الله عليك يا بني فقد كنت رجل بر وتقوى.

الفاتحة




سجيماننا عرسو الليلة

شماشي

Quote: كل الدبابين معك في المملكة السعودية

بي دباباتهم...ولاَ ...براهم؟

يا زول يا زول

Quote: سجيمان انت النوع البيطعن فى الفيل عديل وتتكى فى ضلو

اتكي في ضلو...وادوبي كمان

تبلدينا الحبيب

Quote: وما ظنيتك قاصد التانية دي

لا لا انا قاصد الاول....ويا دار ما دخلك شر

Quote: هم الامريكان باقي لكم كايسين لي افخاذ؟

بالله قول ليهم يا سجيمان يا عطر..وانا جنى جن الناس البتكلموا عن المرأة كماعون جنسى فقط...مهما كانت المبررات..ده تخلف!!!!!!
فليسمع من هو فى سذاجة ابوالدرداق ومن هو فى شدة ام قيردون!!

صديق الموج

Quote: فليسمع من هو فى سذاجة ابوالدرداق ومن هو فى شدة ام قيردون!!

وينك انت يا يايابا؟...... يا البي تحرر لي بوستاتي

Quote: والجاي يشاكل عشان المقداد...زمان لما كان

سي جي

دي مطاعنه

المُقداد الكبير

أنت من زمن زريبة الفحم....ياخ أنا قايلك صغير و جاهل و بعد ده تقول لي يا دفعه....المغداد ده 5 دفع قدامنا...أما صديق صاحبك ده حدث و لا حرج...و كمان حبوبتنا عصام الزبير أبو صلعه..... ألعبو بعيد ياجلاكين.

كوستاوي

Quote: و بعد ده تقول لي يا دفعه

الله بيسعلني انا الدفعة الوراك.....وكنت بركب معاك باظات الشنقيطي

ود الشيخ

Quote: المُقداد الكبير

انا لقصد المقداد الصغير..... شن جابو ليك يا يابا؟

..

Quote: اي زول عندو صلعة زي حقت بكري دا الامريكيات بيقولن عليهو سيكسي

لأخ سجيمان..

تخريمة: أقرب ترجمة عربية لكلمة "سيكسى" هى جذاب.. وجذاب تعنى إنجذاب الجنس الآخر..

النصيحة ليك ياالله.. ده أذكى تعليق حول قرأته حول الموضوع المثار، إطلاقاً..

يعنى الحاضرين لرقص فرقة عرائس النيل قد لايرون شيئاً "سكسياً" فى رقص الفرقة أو زيها.. بينما لو شافو بكرى بى صلعتوا لكان أكثر جاذبية -سيكسى- بالنسبة لهم!

يبقى السؤال ل "تيوسنا - جمع تيس!" هل ندين نشر صورة بكرى -بى صلعتو السكسية-؟! أم ندين رقص الفرقة الأقل جاذبية؟!!

صلعة بكرى أكثر خطراً على القيم -بمفهوم سكسى- من مساويك أؤلئك..، فلماذا الكيل بمكيالين ياهؤلاء.. أطمع فى كلمة خير من هؤلاء.. فى حق حاج نور!! ول لا حٍقيرتو فى بٍقيرتو؟


.

عدلان

شكرا للمرور والمشاركة.....

انا اطالب بكري بان يلبس طاقية على طول ....خوفا من الفتنة

..

تعرف ياسجيمان..

صاحباً لي.. من مترددى دار الرياضة أم درمان.. علق على قرار والى الخرطوم وقتها، يوسف عبد الفتاح.. بإطالة أردية لاعبى الكورة لتغطى "أفخاذهم"! علق صديقى بأنهم طوال سنى متابعاتهم لمنافسات كرة القدم.. لاينظرون إلا للكرة فى حركتها بين أقدام اللاعبين.. مابال هؤلاء يركزون بصرهم على أفخاذ اللاعبين؟!


الروس.. الروس.. حباب التيوس!

.