Post: #1
Title: يا فتــاح العمايــا... ابصلعتــن ضــوايا
Author: سجيمان
Date: 07-18-2004, 05:04 AM
انا اظني عندي مرض نفسي.... ويمكن كمان كم يوم.. ايتلحس واحجز لي صينة في نص شوارع الخرتوم.....واول ما تجي عربية سمحة سايقاها واحدة سمحة... انط قداما واقولها... ادقشني... ادقشيني في التمانيات...و اديني بونية... بس لازم تكون فكة....ولاّ خليني افكها ليكي عن بتاع الركشة داك....ولاّ يلاقيني دكتور عمر بتاع صحة وعافية...ويديني الف جنية....ويحلف بي دينو وايمانو ما يديني نفسيّن من الخدرا....ديك....الايام دي باقي ماعندو شغلة غير الخدرا شايل حالا في التلفزيون وجايب لها بوليص كمان.....اها اليعالجو مرضي دا....وقت عاملين فيها تفتيحة.......
بقيت الايام دي لما افلس..... قاعد اكركب..... كل حتة فيني تكركب.. الايدين يكركبن والكرعين يكركبن... حتى الاضنين يكركبن.....انا ماشي انا قاعد.... انا راقد....كركبة في كركبة... لمن بقيت اخجل من نفسي....وناوي اعمل لي يافطة واعلقها في سدري واكتب عليها... لا تندهش انه الفلس...
والنوم وانا مفلس كلو هلاويس في هلاويس.... بقيت احلم بالزول المرسوم في ورقة الماية دولار...وشوفتي ليهو اشعبط فيهو واقعد ابكي واجعر بي طول حسي...واقول لو انا والله يا جورجي انا لايمك لوم شديد.. انت يا جورجي حاقر بي... تمشي للناس دي كلها علا انا ماك قاعد تجيني.. جيتني مرة واحدة زماااان قبال خمستعشر سنة وتاني ماشفتك.....انت يا جورجي ماك عارف ردتي ليك قدر شنو؟.... والله لما اشوفك من بعيد لي بعيد... اعرق ودقات قلبي تزيد...وبقيت قدر ما اشوف لي بتيخة في الشارع اتظكر صلعتك واقعد ابكي...يا ابصلعتن ما بتشبه صلع الرجال...وقدر ما الفيرجوني يغني...والفيرجوني دا بالمناسبة من ناسكم عرب الشكرية الفي فيرجينيا
عاجبني الكريم البيسند الضعفان
رباي اليتاما ومركز.... الضيفان
قدر ما يغني الغنية دي اتظكرك.....واقعد ابكي برضو...لكن انت قاعد تريد الناس اكتر مني..... وحبك للناس خلاني احبك تاني........وبقيت وقت اجي احلف خليت الفُقرا والفُكيا حقننا كلهم بقيت احلف بك.....وحات ابصلعة راجل الدولار.. تمساح المسيسيبي اب ضنبن جار...ووقت تصعب علي شي طوالي اناديك واندهك.... يا ابصلعتن بتيخة مو لاقة.... اب ايدن لاحقة........ يا فتّاح العمايا...... ابصلعتن ضوايا....تنجح وليدي محمد ...وتسهل عليهو دربو ويبقى حرامي عشان يلم فيك.......
|
Post: #2
Title: Re: يا فتــاح العمايــا... ابصلعتــن ضــوايا
Author: almulaomar
Date: 07-18-2004, 05:40 AM
Parent: #1
دكتور سجيمان
يحيا الفقير وكل شئ ضده
فالأرض تقفل دونه أوابها
وتراه منبوذاً وليس بمذنب
ويرى العداوة لا يرى أسبابها
حتى الكلاب إذا رأت ذا نعمة
هشت إليه وحركت أذنابها
وإذا رأت يوماً فقيراً بائساً
نبحت عليه وكشرت أنيابها
أتارى يا سجيمان أنا لي طاشر سنه أقول كلاب الحلة مالا معاي بتكرهني لي شنو راضع في كديسه يعني ولا أكلت هوت دوج ولا ذنبي شنو والغريبة الكلاب دي زاتها ما بتنبح في عادل شريف لأنو بجي حاشي ومتريح ولابس الساعه باليمين وطبعاً ساعة حبيبك زي عداد المويه يعني ساعات جوه ساعه ده غير الجزمة البتلمع بالرغم من إنو شارع بيتنا تراب ، ولمن يجي ماشي حتى الغنم بتوسع ليهو الشارع وناس نحنا تقول الواحد شايل ليهو زريعه الغنم يكابسوك زيك وزي أى برميل زباله.
الشغلانة بقت فلس والله دي كلاب مفترية خلاص يشيخوك لو عندك قروش وإنت أمي ولا بتفهم شئ لكين بقروشك يا شيخ وحتى الخواجات العاملين لينا فيها ثلاثة بي قرش ونص يقولوا ليك money talks and sometimes walks وحكاية ووك دي يا سجيمان أمانه ما مشينا مشي في الدنيا دي لغاية ما بقت أغنيتي المفضلة طريق الشوق مشيناهو ، وبرضو أغنية البلال مشينا مشينا مشينا، ومرات مرات بسمع يا ماشي لي رفاعه جيب لي معاك ساعه (نقطة نظام) دي رفاعه ولا سويسرا أصلو.
المهم يا سجيمان علم ولدك محمد - الله يخليهو ليك - السرقة والحرامية والإستهبال ولو فشبت دخلو الكلية الحربية وخليهو يعمل إنقلاب عسكري ويبقى الرئيس أو عضو مجلس قيادة الثورة بالنص بس ما تدفن دقن وتنساني يعني على الأقل أديني إعفاء من التجنيد الإجباري وعربية من المشي الكداري وبالعدم ركشة بس لازم تقطعهالي الكوبري لأنو قالوا محافظ بحري ما بخلي الركشات تمشي أمدرمان
|
Post: #5
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-18-2004, 11:35 AM
Parent: #2
الملا عمر
عليك الله خليني ابصق السغة دي واجيك
|
Post: #6
Title: Re: يا فتــاح العمايــا... ابصلعتــن ضــوايا
Author: almulaomar
Date: 07-19-2004, 03:55 AM
Parent: #5
السلفة أخي سجيمان بتفوها ما ببصقوها وقد تحتاج في تفتها إستخدام اليد لجر الشلوفة ربما.
وأنا منتظرك أخي سجيمان تف السفه وسف تاني وتلقانا نحن يانا نحن - مع الإعتذار للأغنية -
|
Post: #8
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-19-2004, 08:28 AM
Parent: #2
مولاي امير المؤمنين الملا عمر
نحن التنوع العندو جينات الفلس موجودة فيهو...... لا ولن يرطب..... الا يكون هو طفرة جينية.....ودي تحصل كل تلاتمائة سنة..... لي واحد .... يلقى ليهو ورقة ماية دولار واقعة.....او درهم عثماني.... او دينار من العصر الفاطمي....وتلقاهو لامي الناس ويونس فيهم.... كيف انو لقى اللقية دي....لا تحزن ان الله معنا................ النضم دا يا اخوانا لا شفرة ولا حاجة
|
Post: #3
Title: Re: يا فتــاح العمايــا... ابصلعتــن ضــوايا
Author: serenader
Date: 07-18-2004, 06:04 AM
Parent: #1
من مأثور الأمثال السودانية المو خمج في هذا الصدد:
العندو القرش الناس تعلي مقامو
والماعندو القرش يتعرج الورا والقدامو
وحتى الكديس يتواتا محل ما يودي حمامو
قبُل.. قبُل.. 
|
Post: #9
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-19-2004, 09:17 AM
Parent: #3
serenader
وحتى الكديس يتواتا محل ما يودي حمامو
دي باقية علي انا....
|
Post: #4
Title: Re: يا فتــاح العمايــا... ابصلعتــن ضــوايا
Author: saifkeli
Date: 07-18-2004, 06:15 AM
Parent: #1
سجيمان
الشيخ العطاي وما بياخد بياض .. أريتنا من حيرانو .. الوصية بالمهلة
|
Post: #7
Title: Re: يا فتــاح العمايــا... ابصلعتــن ضــوايا
Author: انور الطيب
Date: 07-19-2004, 06:27 AM
Parent: #4
الأخ سجيمان تحياتي الحارة لك وسيبك من الفلس بتاعك دة
| Quote: وناوي اعمل لي يافطة واعلقها في سدري واكتب عليها... لا تندهش انه الفلس |
ما حايصدقوك المفلسين لأنو انت على الأقل قاعد تتصفح وتكتب في الانترنت اذا أنت غير مفلس ولا ينطبق عليك مصطلح المفلّس هذا على حسب المعايير السودانية
وثاني كلامك في الآخر دة أخير تسحبوا قبل ما يجيك الزرقاوي لأنو الحليفة بصلعة الراجل دة معناها حب شديد ............ وأنا ضد ................ وخلي بالك من ...........
طبعا كل هذه الحذوفات نسبة للظروف الأمنية التي تحيط بالبورد وبرضوا في هاكرز وكمان لو شفت fahrenheit 9/11 حا تعذرني أخوك والله ما خواف لكن الواحد لازم يقفل الأبواب قبل ما ينوم
|
Post: #11
Title: Re: يا فتــاح العمايــا... ابصلعتــن ضــوايا
Author: خضر عطا المنان
Date: 07-19-2004, 12:07 PM
Parent: #7
سيدنا سيجمان
يابا تلحقنا وتنجدنا .. المرة الفاتت قلت ممكن تنجدنا ولكن
حكاية تلحقنا صعبة عليك !!!! نان عاد كيفن يا شيخنا ..
ونحن الماعندنا غيرك نقبل شقيش وبعدين موقفنا في الامم المتحدة يكون شكلو كيف ؟؟ .. عموما يا سجيمان نحن .. يعني انا وصاحبي الروح بالروح .. في ورطة حقيقية .. وأنا أسع بتكلم معاك بالدس .. عليك الله بس أقرا موضوع البورد ( مساحة للضحك ) وورينا نتصرف
كيف ؟؟؟؟
وهل يرضيك ياشيخنا تخلينا بالحالة دي اليوم دا لينا يومين
ونحن لا أكل ولا شراب .. ولا قادرين حتى نفتح باب الشقة ...
تلحقنا بسرعة عليك بركاتك .. ولا تنسى انو نحن من حواويرك
وما عندنا أي جهة تانية نلجأ ليها ..... سريع ونحن في انتظارك
الله يرضى عليك .. وألا سنضطر ولو بالشباك الخلفي نفر ونهرب لأي كهف من جبال تورابورا الافغانية . يلا قوام آ شيخنا مافي وكت للكلام أكتر !! .
حوارك المزنوق شديد خضر وليد عطا المنان وصاحبه الذي بالكهف
( أي أتنين لا ثالث لهما ) ويلا أتحرك بسرعة ياشيخنا سجيمان!!!!
|
Post: #13
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-21-2004, 07:04 AM
Parent: #11
يا خضر
انا خلي بالك..... اخر الشهر قاعد ابقى بليد وبومة..... ونضمك دا حسي يخربني كان عرفت منو شي
|
Post: #12
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-20-2004, 08:56 AM
Parent: #7
انور الطيب
| Quote: ما حايصدقوك المفلسين لأنو انت على الأقل قاعد تتصفح وتكتب في الانترنت |
والله مفلس فلس يعلم بو الله..............علا انا يا اخوي عندي حالة ود ابزهانة
|
Post: #10
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-19-2004, 11:58 AM
Parent: #4
سيف كلي
والله بالحيل دايرين نبقى من حيرانو......علا هو نافضنا
|
Post: #14
Title: Re: يا فتــاح العمايــا... ابصلعتــن ضــوايا
Author: خضر عطا المنان
Date: 07-21-2004, 09:35 AM
Parent: #10
شيخنا : سجيمان
انت ماك شبه البوامة يا سجيمان !!!! تبرأ يا شيخنا وتسبرا ....
لكن أظنك عشان تعرف الحكاية من البداية وترسل لينا وصفة علاج سريع تمرقنا من الزنقة دي .. لازم تخلي الليل يفوت وصباحات الله بخير تقرأ موضوع المنبر ( مساحة للضحك ) وبعدها .... ردك سريع ..
والله يطول عمرك يا شيخي ويديك الصحة
حوارك : خضر وليد عطا المنان
|
Post: #15
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-21-2004, 11:49 AM
Parent: #14
خضر
| Quote: وصباحات الله بخير تقرأ موضوع المنبر ( مساحة للضحك ) وبعدها .... ردك سريع .. |
سمح............. الله يصبح الواطا
|
Post: #16
Title: Re: يا فتــاح العمايــا... ابصلعتــن ضــوايا
Author: عثمان عووضة
Date: 07-21-2004, 11:58 AM
Parent: #15
انت تبرأ ما عندك مرض نفسي -- انت داير ليك والي يكتفك و بي سوط العنج في نص راسك المدوقس دا
|
Post: #17
Title: Re: يا فتــاح العمايــا... ابصلعتــن ضــوايا
Author: خضر عطا المنان
Date: 07-21-2004, 01:34 PM
Parent: #16
الحبيب : عووضة
كيف الكلام عاد ؟؟؟؟؟؟
وبعدين نحن البكون في راسنا منو تاني ؟؟؟؟
انت يا عووضة الظاهر عندك شيخ تاني غير سجيمان دا ؟؟؟؟
الراجل راجين الواطة تصبح يقوم يشوف شغلو وانت داير تكسر صلعتو كمان ؟؟؟ يا راجل حرام عليك!!!!!
|
Post: #18
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-21-2004, 09:42 PM
Parent: #16
خالي عثمان عووضة
| Quote: انت داير ليك والي يكتفك و بي سوط العنج في نص راسك المدوقس دا |
يبقن علي اتنين............ فلس ..و...دق؟....بارك الله فيك
|
Post: #19
Title: Re: يا فتــاح العمايــا... ابصلعتــن ضــوايا
Author: Khaalaleyaal
Date: 07-21-2004, 11:16 PM
Parent: #18
ابو صلعه وين هسع ...... كده شوف الصوره
|
Post: #20
Title: Re: يا فتــاح العمايــا... ابصلعتــن ضــوايا
Author: عثمان عووضة
Date: 07-21-2004, 11:49 PM
Parent: #19
سجيمان سيد الرجال
و الله و تالله و ما بكش -بفتح الباء و الكاف--انت ما طالبني حليفة
اكان جينا للفلس انت غني بي قلبك الابيض
و كان جينا للدق فاحترامك للكبير و الصغير يخليك ما ترفع ايدك لي نملة
هيععععععععع يا اب زرد -- انا غايتو عافي منك لله و الرسول
|
Post: #25
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-22-2004, 10:28 AM
Parent: #20
عثمان الخال
| Quote: هيععععععععع يا اب زرد -- انا غايتو عافي منك لله و الرسول |
عفوك دا براهو بالدنيا..... بارك الله فيك
|
Post: #21
Title: Re: يا فتــاح العمايــا... ابصلعتــن ضــوايا
Author: عثمان عووضة
Date: 07-21-2004, 11:52 PM
Parent: #19
خضر الحبيب
انت راس السوط لحقك ولا شنو
هسى تلقى صلعتك لحقت كفة البنطلون بي ورا
نعمل ليك شنو اذا كان كملت رطوبة الامارات و جليد الدنمارك
برضو انت عفيت منك
|
Post: #22
Title: Re: يا فتــاح العمايــا... ابصلعتــن ضــوايا
Author: ناجى الزبير الملك
Date: 07-22-2004, 07:54 AM
Parent: #21
سيجمان
أها الحكومة عصرتنا ... والفلس تم الناقصة ...........
العصر جاب الزيت
انا مفكر ابيع الزيت المرق منى
حد يشترى
|
Post: #23
Title: Re: يا فتــاح العمايــا... ابصلعتــن ضــوايا
Author: خضر عطا المنان
Date: 07-22-2004, 09:08 AM
Parent: #22
الحبيب : عووضة
انت خليني انا ونخلي الحكم لشيخنا سجيمان ( يلحقناوينجدنا !!! ) :
بس انت نزل العمة دي ولو سنتيمترات بس ؟؟
ورضاي عنك يا الحبيب فوق ما تدور وتدور ياسيدي ( تدور الاولي بمعنى تريد .. أما التانية فهي من عند العبد لله ويعني تدور حول نفسك خاصة امام المراية بدون عمة طبعا لترى !!! العجب العجاب !!!
|
Post: #29
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-23-2004, 10:30 AM
Parent: #23
خضر عطا المنان
| Quote: انت خليني انا ونخلي الحكم لشيخنا سجيمان ( يلحقناوينجدنا !!! ) |
عليك الله ما تكتر من كلمة شيخنا دي..... اقوم اصدق نفسي ويعضيني فار
|
Post: #26
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-22-2004, 10:40 AM
Parent: #22
ناجي
مبروك الظبوطية............. من متين؟
|
Post: #24
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-22-2004, 10:17 AM
Parent: #19
خال العيال
لبستوهو باروكة يا الفالحين؟
|
Post: #27
Title: Re: يا فتــاح العمايــا... ابصلعتــن ضــوايا
Author: ناجى الزبير الملك
Date: 07-22-2004, 01:46 PM
Parent: #24
الظبوطية
على قولك يا أستاذنا العزيز
ملك حر للوالد (عليه رحمة الله )
إحتفالا بذكرى 19 يوليو .....
(بس ما تكلم زول )
أنا مانى ناقص
والحالة صعبة علينا (زى ما بقولوا ناس عقد الجلاد )
مع تحياتى
|
Post: #28
Title: Re: يا فتــاح العمايــا... ابصلعتــن ضــوايا
Author: سجيمان
Date: 07-22-2004, 06:48 PM
Parent: #27
ناجي
اسأل الله لوالدك الرحمة والمغفرة
ولوالدي ايضا
|
|