Post: #1
Title: لســت جنجـويداً...ولكنـها سيــاحـة
Author: سجيمان
Date: 07-23-2004, 08:29 PM
تلفزيون السودان.... كل يوم يزداد شتارة...وبوامة....امس الجمعة كان اليوم المفتوح للسياحة لدعوة الناس عشان يجو يسيحو في السودان....اول ما قالو بسم الله.... لاندكروزر.. ومقبلة علي دارفور... العربية وحلت مرتين في الطين....جو كروها بي عربية تانية برضو وحلت...اتوكلو علي الله وقعدو يدفرو في العربتين...نص الدافرين وكرو.... لكن العربات مرقن...قالو السياحة في دارفور....وواشنطون واقفة علي كراع واحدة..عشان دارفور...وقالو فيها حرب وموت وجوع...وقدر مافي زول كبير في امريكا نضم وهرج لمن فتر واتجزم ويتحلف انو ما يخلي الحكاية دي تمر باخوي واخوك... وناس التلفزيون قالو لا فيها مطر وطين وبس....والداير يجي يسيح يجي.... قبال ما الامريكان يجو بي عصاية المعلم ويسيحو فيها ويسيحو الشعب السوداني...ونحن خاتين الخمسة فوق الاتنين
..... عمر احساس فنان دارفور المدلل.. جا برضو...وقعد يحلف ويخصم في واحدة علا تنضم معاهو...ما بنعرفا نضمت ولاّ في بوامتا؟...ونحن قاعدين خاتين الخمسة فوق الاتنين....وبناتو المعاهو في الفيديو كليب.... المكياج عاملو لهن شافع في حصة الاعمال...الواحدة انا متوكد لو شافا ابوها ما يعرفها....من شدة ما ملخبطة ومسيوطة و مجربنه... ما تقدر تفرز الحاجب من الاضان....وبرضو نحن خاتين الخمسة فوق الاتنين......
يعني ما لقو يوم يعملو فيهو دعاية للسياحة في السودان علا يوم الجمعة الحزين دا؟.. ما لقو غير دارفور؟...تلفزيونات العالم كلها تنضم في دارفور وشايلين حالنا..الحرب والابادة والجنجويد....وابدا تلفزيونا معاهو خبر خير....داير الناس تجي تتفسح وتتفرج في الحرب بمزاج....وتشوف الجنجويد البقى معلم سياحي بارز.....
جابو شباب نضمو فوق السياحة....والسقافة...نضم ما عندو عوجة.... علا اظنهم كانو مستعجلين لمن جو.......... لانو معاهم واحد شوف عيني لابس قميصو الماكلا لياقتو الغنماية...ومافي زول واحد قالو يا زول غير قميصك دا.....الناس دي وقت تجي تشر هدوما ما ترفع حبل الغسيل فوق..وتقفل باب الشارع عشان الغنم ما يدخلن....
وما زلنا خاتين الخمسة فوق الاتنين
|
Post: #2
Title: Re: لســت جنجـويداً...ولكنـها سيــاحـة
Author: humida
Date: 07-23-2004, 08:34 PM
Parent: #1
يا سجيمان ما تشيل حال الناس ساي
تلفزيونا دا اصلو مأخر سنة قمرية وسنة شمسية ..
وفي الوكت بتاعهم الحرب في دارفور لسع ما حصلت
انت ما سمعت بالحياة في الكواكب الآخري ..
|
Post: #3
Title: Re: لســت جنجـويداً...ولكنـها سيــاحـة
Author: سجيمان
Date: 07-24-2004, 10:00 AM
Parent: #2
حميدة
| Quote: يا سجيمان ما تشيل حال الناس ساي |
هم الشايلين حال رقبتم....... الناس في شنو وديل في شنو؟
|
Post: #7
Title: Re: لســت جنجـويداً...ولكنـها سيــاحـة
Author: تولوس
Date: 07-24-2004, 01:04 PM
Parent: #3
سجيمان ياخي ما قلنا ليك التلفزيون ده حالو ما بينصلح علا الناس الشغالين فيهو يلموهم كيمان كيمان ... كوم يودوه الارشيف وكوم يودوه المستودعات وكوم يودوه المخزن وكوم يرموه في الزبالة ... ونشوف لبنانيين ومغاربة لمزيعين الربط والاخبار وفلبينين للاخراج والتصوير والديكور وبرنامج الجرافيك والتصميم ...واروبين للتحرير والادارة .... والله انا بتكلم جد!!!!
|
Post: #10
Title: Re: لســت جنجـويداً...ولكنـها سيــاحـة
Author: سجيمان
Date: 07-25-2004, 10:06 AM
Parent: #7
| Quote: والله انا بتكلم جد!!!! |
تولوس..... انا زاتي معاك وبتكلم جد
|
Post: #4
Title: Re: لســت جنجـويداً...ولكنـها سيــاحـة
Author: صديق الموج
Date: 07-24-2004, 10:22 AM
Parent: #1
| Quote: لانو معاهم واحد شوف عيني لابس قميصو الماكلا لياقتو الغنماية |
الله يشيل حسك يا مقطوع الطارى..لكن يا دفعة حقو تستغرب لو
كان القميص ما لايكاهو غنماية..لانى يوم داك شوف عينى جابو واحد
لابس جلابية وزرارتا مقطوعة،،
|
Post: #11
Title: Re: لســت جنجـويداً...ولكنـها سيــاحـة
Author: سجيمان
Date: 07-25-2004, 10:11 AM
Parent: #4
صديق الموج
Quote: كان القميص ما لايكاهو غنماية..لانى يوم داك شوف عينى جابو واحد
لابس جلابية وزرارتا مقطوعة،، |
دي مقبولة.....
سعلت واحد عن لياقة القميص ...قال لي دي موضة....... لقينا شغل لي غنمنا غايتو
|
Post: #5
Title: Re: لســت جنجـويداً...ولكنـها سيــاحـة
Author: ود حماد
Date: 07-24-2004, 11:04 AM
Parent: #1
لووووووووووول لحد بكرة،سجيمان تعرف أكتشفت انو السودانيين ما بعرفو يقعدو كويس في الكراسي والكنب الوثير،كم مرة بلاحظ في التلفزيون وبالذات في نشرة الاخبار يجيبو ليك ناس متجدعىن ونايمين نوم في الكراسي مع انو مرات بكونو في ضيوف اجانب تلقي الضيوف قعدين كويس وبأحترام والسودانيين ما فاضل ليهم الا يقلعو نعلاتم ويدوها غمضة.
|
Post: #12
Title: Re: لســت جنجـويداً...ولكنـها سيــاحـة
Author: سجيمان
Date: 07-25-2004, 10:15 AM
Parent: #5
ود حماد
| Quote: الوثير،كم مرة بلاحظ في التلفزيون وبالذات في نشرة الاخبار يجيبو ليك ناس متجدعىن ونايمين نوم في الكراسي |
عشان كدا انا بقترح انو يأصلو القُعاد..... يكون بنابر ....والنشرة تكون وقافي
|
Post: #6
Title: Re: لســت جنجـويداً...ولكنـها سيــاحـة
Author: حبيب نورة
Date: 07-24-2004, 11:59 AM
Parent: #1
| Quote: عمر احساس فنان دارفور المدلل.. جا برضو...وقعد يحلف ويخصم في واحدة علا تنضم معاهو...ما بنعرفا نضمت ولاّ في بوامتا؟...ونحن قاعدين خاتين الخمسة فوق الاتنين....وبناتو المعاهو في الفيديو كليب.... المكياج عاملو لهن شافع في حصة الاعمال...الواحدة انا متوكد لو شافا ابوها ما يعرفها |
هسة دة كلام شنو ياخ
والله انا الليل كلو مبسوط من بنوت عمر أحساس
قلت البلد خلاس بقت أم فكـّو وفارقنا جناح أم جكُّو
يا زول هوي سمحات وعاجباتننا انت موووووت بس!!!
|
Post: #13
Title: Re: لســت جنجـويداً...ولكنـها سيــاحـة
Author: سجيمان
Date: 07-25-2004, 10:19 AM
Parent: #6
حبيب نورة
| Quote: يا زول هوي سمحات وعاجباتننا انت موووووت بس!!! |
انا ما قلت شينات....... انا قلت مكترات البوهية
|
Post: #8
Title: Re: لســت جنجـويداً...ولكنـها سيــاحـة
Author: الفاتح يسن
Date: 07-24-2004, 01:48 PM
Parent: #1
هاااا ياسجيمان شايف الجنجويدي وتطعن في حصانو علا ماعندك خبر انته صرحوا وما اكثر ماصرحوا انو دولة الاجرام مستهدفة من دول الاستكبار والكفار دحكتونا نان انان وباول نزلتوهم في القطينة عشان مايقولوا الحكاية اباده والله ياسجيمان خايفين من سيناريو بغداد يصل كاب الجداد علا ماسمعته بوووش لامن اتكلم امس وقال الجنجويد وناس الحكومي ردوا ياتمرجي بصراحه بدون لف ولادوران الحيكوميي مضايقييي وبرنامجك الشفتو ده ما الا زي برامج بغداد قبل الشكلة الاخد فيها الجنجويدي بتاعم عكاز وتسلم ياسجيمان والايامات دي ابعد بعيد من قناة الجنجويد
|
Post: #9
Title: Re: لســت جنجـويداً...ولكنـها سيــاحـة
Author: ناجى الزبير الملك
Date: 07-24-2004, 05:04 PM
Parent: #8
سي جى
حضرت البرنامج ... من نصو ...
شفتا الشفتو ... وختيت الخمسة فوق الأتنين ....
لكن عجبتنى قمصان عمر إحساس ...
الغريبة الفيديو كلبات ... الجابوها دى ماها مصورة فى البلد دي ...الناس نضأأأأأأأف التقول مارقين اسى من الغسيل الجاف...
وتتفكر يا ... أستاذ فلان ...ده كلام ( ناجى عبد المنعم راضى ...
نضم وبرى ... ما خلو عصير ما شربو
غايتو فى النهاية جابو محمود عبد العزيز وجبل الرجاف ...
قلبت القناة لقيت مشروع القرار ... و مصطفى إسماعيل...
الله يهون القواسى .... الجايات ... والماشات
بالمناسبة ما جيت علقت على صورى كالعادة .... اقلاها سياحة مع بورداب الخرطوم الما خمج
بس نحنا ختينا الاتنين فوق الخمسة
متيـــــــــــــــــن يا الله تانى تلمنا
|
Post: #19
Title: Re: لســت جنجـويداً...ولكنـها سيــاحـة
Author: سجيمان
Date: 07-26-2004, 12:01 PM
Parent: #9
ناجي الزبير الملك
| Quote: وتتفكر يا ... أستاذ فلان ...ده كلام ( ناجى عبد المنعم راضى ... |
ابو قميص لياقتو لايكاهو الغنماية دا منو؟
|
Post: #18
Title: Re: لســت جنجـويداً...ولكنـها سيــاحـة
Author: سجيمان
Date: 07-26-2004, 11:54 AM
Parent: #8
الفاتح يسين
| Quote: والله ياسجيمان خايفين من سيناريو بغداد يصل كاب الجداد |
حيصل...حيصل....وربك يستر
|
Post: #14
Title: Re: لســت جنجـويداً...ولكنـها سيــاحـة
Author: abas
Date: 07-25-2004, 10:27 AM
Parent: #1
سجومي حبيب البي
تعرف انا عشان وجع المصارين ده ما قاعد اشوفو ابدا تلفزيون السودان ده ولا عندي بيه علاقه الا في كورة هلال مريخ
قلت لي اللياقه ما كلاها الغنمايه عشان كده فريقنا القومي تعبان لياقته ماكلاها البقره اظنها
|
Post: #15
Title: Re: لســت جنجـويداً...ولكنـها سيــاحـة
Author: اسوتريبا
Date: 07-25-2004, 08:13 PM
Parent: #14
سي جي ...تعرف لو لمو فيك ناس التلفزيون ح يودوك رحلة اليومين ديل لي دارفور ...بس اشترط يرسلو معاك عمر الجزلي و ناجي و حماميزو ...و البت الحاكانا من جنة الاطفال نسيت اسمها....و كمال حامض و احمد البلال شعب كل حكومة خلينا نستفيد من غيظتم منك...و ده بوست منك قديم في ناس التلفزيون..عشان تعرف انهم مغيوظين منك ليه.....
جوائز اليـــــابا و التـــابا
جوائز المسابقات.. في التفلزيون....مافيها أي تشجيع
عشان الناس تشترك.... ومافيها أي تجديد....نفس جوائز السنة الفاتت تلقاها السنة دي.
وجوائز هايفة ساكت.... انا فكرت اطور الجوائز....تتماشى وتواكب تطلعات الشعب
السوداني الكريم...مثلا:-
الجائزة الاولى:-
عقد عمل بالسعودية في وظيفة محاسب.... مقدم من سفارة السعودية....مع شهادة بكالريوس
محاسبة معتمدة ومختومة مقدمة من جامعة النيلين مجانا.... حتى لو الفائز ساقط شهادة
و ما بيعرف كوعو من بوعو
الجائزة الثانية:-
رتبة لواء أركان حرب لمدة عام.....مقدمة من قوات الشعب المسلحة.....مع بدلة عسكرية
.... وكسكتة .....ومجموعة دبابير وصقور ومقصات.......وعصاية.......وشنب اتنين متر
الجائزة التالتة:-
رتبة رائد شرطة مع نقطة بوليص.... بي عساكرها....وعدد اربعين محتجز..... الجائزة
مقدمة من وزارة الداخلية........وبرضو لمدة عام.... تكون ملك حر للفائز..... يعني
يبرطع فيها بي راحتو
الجائزة الرابعة:-
ناموسية مصنوعة من الساكوبيس الأصلي ....زائدا خمستاشر فتيل فاضي.... لاخد عينات
الفسحة والبول..... اضافة الي صفيحة بول مفحوص جاهز ....يعني ما حيخسر حق الفحص ولا
حاجة....مقدمة من مركز سجيمان الطبي...."مركز سجيمان الطبي يعني العناية
الفائقة....والراحة الزائدة ......تدخل ماشي علي كرعيك نطلعك بي عنقريب محمول على
كتوف الراحة...."
الجائزة الخامسة:-
شهادة إعفاء من الضرائب والزكاة و المساهمة الإلزامية وإعفاء من الحليفة......مقدمة
من جهاز العاملين بالخارج....إضافة إلي شهادة ضمان بعدم النهزرة والشحططة....مع
ابتسامة مشرقة من المرا ام نضارات الموظفة في الجهاز... ديك ......الجدير بالذكر
انه بالا مكان بيع هذه الجائزة....يعني لو فاز بها واحد من القاعدين في السودان
ممكن يبيعها لي أي زول مغترب مشلهت زي كدا....
الجائزة السادسة:-
تلاتة سنون وضُرس من الدهب الخالص.... لزوم الضحك البلا سبب....مقدمة من مجوهرات
البوبار.....بسوق امدرمان
الجائزة السابعة:-
مائة جوز سفنجات.ماركة" مشيناها خُطاً"مع مئة كيس صعوط.. و شريط كاسيت... مسجلة
عليهو غنية يا صعوط حلتنا زولن كان بسفك يا حليلو.....عشان الفائز يعلق المسجل في
كتفو...ويلبس السفنجة...ويحوم في الحلة.... لحدي ما يقطع المائة جوز......هذه
الجائزة مقدمة من شركة كداري اخوان
الجائزة التامنة:-
مئة وخمسين متر من شارع بورتسودان الخرتوم.....مع كشك تفتيش...ويمكن للفائز اختيار
موقع المائة وخمسين متر والكشك... في أي نقطة تعجبو من الشارع المذكور.....هذه
الجائزة مقدمة من الطرق والمواصلات بالتعاون مع الجمارك
الجائزة التاسعة:-
عشرة كيات بالنار..علاج للغيرغان.....مقدمة من وزارة الصحة... قسم الفولكلور
الشعبي.....
الجائزة العاشرة:-
خروف سماية....من خرفان التصدير.... من غير جلد....مقدمة مناصفة بين اتحاد رعاة
السودان ومصدري الماشية..........والله راحات!!
|
Post: #21
Title: Re: لســت جنجـويداً...ولكنـها سيــاحـة
Author: سجيمان
Date: 07-26-2004, 12:27 PM
Parent: #15
اسوتريبا
| Quote: و ده بوست منك قديم في ناس التلفزيون |
تعرف تلفزيونا لو عمل بالكلام بتاع البوست القديم دا.....حيكون ثورة في عالم الفضائيات
|
Post: #20
Title: Re: لســت جنجـويداً...ولكنـها سيــاحـة
Author: سجيمان
Date: 07-26-2004, 12:17 PM
Parent: #14
عباس
ازيك
| Quote: قلت لي اللياقه ما كلاها الغنمايه عشان كده فريقنا القومي تعبان لياقته ماكلاها البقره اظنها |
فريك القومي ما عندو لياقة لابس جلابية
|
Post: #16
Title: Re: لســت جنجـويداً...ولكنـها سيــاحـة
Author: أحمد طه
Date: 07-25-2004, 09:40 PM
Parent: #1
أخى سجيمان ...سلامات
دى اول مره ادخل عليك رغم انى مابفوت حاجه من دررك البتقدمها لينا
ولى نضمك الفى المليان .
اتفرجت على برنامج السياحه القلتو وكنت عايز ادخل نفسى فى الموضوع
لكن بعد سجيمان مافى نضمى .
انا حسى موضوعى الفيديو كليب بتاع عمر احساس القدموه فى اليوم داك
اول الفيديو كليب مصور فى الشارقه ودبى رغم انو عمر احساس تميز بى غنا اهلو ناس دارفور..الغنيه عن التويه والمنظر البحيره الصناعيه فى الشارقه ... والله يا سجيمان لو شفت بحيرة انزيلى فى غرب دارفور
تقول لى ديك شنو ... ولا عشان ام دخن الفى شاطى انزيلى مازى الشارقه العلى البحيره الصناعيه ..ديك بحيره طبيعيه وشدت ماكبيره مشاركانا فيها تشاد وافريقيا الوسطى
اها نجى للبنات المعاه فى الفيديو كليب ... التلاته حبشيات شغالات مع فرقه حبشيه فى فندق ساندز فى ميدان عبد الناصر فى دبى .. يوم اتذكرت رقيص فرقة AGAR FIKIR الجات مع منغستو الخرتوم وصفوا لى الفندق ده لقيت ليك ظيطه و ظمبريته ولقيت ليك الممسوخات الشفتهم مع عمر احساس ..لانو القصه وظيفه لقيتم ليك يتحركوا يالله يالله ويرقصو
رقيصن مسيخ مافيه اى طعم ..لكن النصيحه لى الله البت الخدرا رقبصا غير ..لو ماكنت عارفهم حبش كنت قلت بت جنجويد,,تشبه عرب دارفور
مالو عمر احساس كان صور الاغانى فى دارفور على الطبيعه وسط طبيعتها السلحره وبناتها الزينه ساكت وخليهم يرقصوا التويه وعشان الجماعه التانين مايزعلوا خليهم يرقصوا الكاسوق وام جكتك وام جليله وانشاالله يلعبوا ابره ودرت بدل مساخة البنات الحبشيات ديا .. العمارات والابراج ومكياج بنات الحبش مابيطعموا الكليب لكن الغنا سمح فى خشم اسيادو وفى بلدو وبى بناتو
انا بلوم صاحبى اسامه احمد المصطفى ولعلمكم اسامه ده واحد من اميز الوجوه السودانيه فى قناة العربيه ودايما يطلع لينا بى برامج جميله خاصة الموضوع لمن يكون عن السودان لكن ماعارف الهداه على الموضوع ده شنو ... المره الجايه سوق عمر احساس وامشى بيه جيهةجبل مره و وادى اريبو وازوم وكبم وقارسلا وماركندى وشوف سحر الطبيعه هناك وحلاة الناس هناك... ان متأكد حتطلعوا حاجات رايعه لانو عمر فنان واسامه فنان وتسويق مثل هذه الاعمال اسهل من الحاجات الما حقتنا لانو الناس البره كرهانه الاسمنت ودايره تشم هوا ... عليكم الله اعيدوا الشغل ده تانى فى دارفور وشوفوه يطلع كيف وشكرا د.سجيمان
|
Post: #17
Title: Re: لســت جنجـويداً...ولكنـها سيــاحـة
Author: Ali Alhalawi
Date: 07-26-2004, 05:34 AM
Parent: #16
سلام أخوى سجيمان
بس حبيت أخش أسلم عليك و أقول ليك مشتاقين .. مالو منبركم الأيام دى مسخن ؟؟ نصو حرب و النص التانى إقتصاب .. شيتين ما عندنا ليهم قدرة الواحد قال أحسن يتضارف و يتاوق من بعيد لى بعيد
تعرف أحسن حاجة عاجبانى فى الغربة أنو لى أكتر من سبعة سنين التلفزيون الممسوخ و مسيخ ما شفتو علا من الكلامات البتجيبوها إنتو هنا و بعد دا كلو الواحد مصارينو بتنهرى .. لكن باقى لى ناسك العايزين يعملو سياحة فى دارفور فاكرين الشغلانى المدوّرة هناك بروفات لى فلم.
| Quote: وما زلنا خاتين الخمسة فوق الاتنين |
لى الشايفو دا إخير ليك تنزلن لأنو الحاصل مالو نهاية وبعد شوية حا تشوف برنامج سياحى فى منتجعات البجـة
|
Post: #23
Title: Re: لســت جنجـويداً...ولكنـها سيــاحـة
Author: سجيمان
Date: 07-26-2004, 12:36 PM
Parent: #17
علي الحلاوي
مشتاقين عديل كدي
| Quote: بس حبيت أخش أسلم عليك و أقول ليك مشتاقين .. مالو منبركم الأيام دى مسخن ؟؟ نصو حرب و النص التانى إقتصاب .. شيتين ما عندنا ليهم قدرة الواحد قال أحسن يتضارف و يتاوق من بعيد لى بعيد |
البلد كلها مسخنة... البيحمي منبرنا يسخن شنو؟...اغتصاب....واغتصاب ناسن مو هينين..... غايتو يا دوب نخت الخمسة فوق الاتنين
|
Post: #22
Title: Re: لســت جنجـويداً...ولكنـها سيــاحـة
Author: سجيمان
Date: 07-26-2004, 12:32 PM
Parent: #16
احمد طه
شكرا لمرورك
ونضمك السمح
| Quote: اول الفيديو كليب مصور فى الشارقه ودبى رغم انو عمر احساس تميز بى غنا اهلو ناس دارفور |
يمكن يكون دارفور اضافوها للامارات....وبقت امارة دارفور....والله والله غلط
|
Post: #24
Title: Re: لســت جنجـويداً...ولكنـها سيــاحـة
Author: Outcast
Date: 07-26-2004, 01:51 PM
Parent: #22
يا سجيمان يا اخوى ما تلفزيون السودان براهو الاشتر .. الحكومة السودانية و جيشهاكلهم شتر...
تعرف امبارح بعاين فى الBBC ,, طبعا قايمين و قاعدين بالجنجويد و الابادة العرقية ,, و قدام الكاميرا جابوا ليك مجموعة من الجيش السودانى معطوا الجدادة حية و اكلوها !! اتخيل بس .. ناس الBBC جايين يصوروا و يحكوا عن فظائع الحكومة و الجنجويد هناك .. وجماعة الحكومة ا لمطاريش فرحانين قدام الكاميراو بنتفوا فى الجدادة حية .. غايتو .. الجاهل عدو نفسو فعلا ...
أنت عارف ناس الحكومة/التلفزيون ديل عندهم مشكلة واااا حدة ...زول العلاقات العامة حقهم دة تعبان خلاص.
|
Post: #25
Title: Re: لســت جنجـويداً...ولكنـها سيــاحـة
Author: سجيمان
Date: 07-26-2004, 09:07 PM
Parent: #24
Outcast
| Quote: أنت عارف ناس الحكومة/التلفزيون ديل عندهم مشكلة واااا حدة ...زول العلاقات العامة حقهم دة تعبان خلاص. |
صدقتي
بس انا ظانيتو ..... الناس ديل كلو زول في جيهة
|
|