شفتو قلة ادب الزول دا؟....قال نحن مجتمع فسيفسائي

Post: #1
Title: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-05-2004, 04:20 AM
Parent: #0

النلوم لكم الزول دا..... مالو حمدي؟..... مصري صاحبي.... ليل نهار معاي...علا الليلة بلا سبب...وقدام الناس
احرجني ودخلني في ضفوري.....وخلاني اقل من السمسة الله بيسعلني...قاعدين في امانة الله ...تنونس وانا السوداني الوحيد.... الفيهم..... ننضم في دارفور وفي السودان...... قوم يا حمدي السجم والرماد... منو وليك...واخلف كراعك وقبل عليّ.....وقول لي يا سقيمان انتو مقتمع فسيفسائي..... شفتو عليكم الرسول قلة ادب الراجل دا؟.......وحات الله يا جماعة ماكم طالبني حليفة اتبهطت واتهجمت.....وما عرفت اقبل وين؟....طنشت قلت يمكن الزول دا يغير رايو.... ابدا تاني قال.... انتو مقتمع فسيفسائي وانا هاوريك ازاي؟.....الليلة يا اخوانا دي الشقاوة شنو؟.... النصيبة الوقعت فيها دي شنو؟....لكن المرة دي ما بسكت لو.....وان بقى داير دق بدقو.... قاطعتو قلتو يا حمدي... هووووي ارعى بي قيدك....نحن فسيفسائين؟..... عليك الله حسي في فسيفسائين في الدنيا دي اكتر منكم انتو المصرين؟......انت يا حمدي قايلني انا ما مشيت مصر ولاّ شنو؟....ولاّ ما ركبت باظات؟.. ولاّ ما ركبت قطركم الاسمو القشاش داك؟...ولاّ....ما دخلت سينما؟.....علي اليمين انتو اكبر فسيفسائين في الشرق الاوسط....علا بس انا من قبيل ساكت لك...وانت شابكني انتو مجتمع فسيفسائي.... انتو مجتمع فسيفسائي ...قدام الرجال؟.......يا حمدي النضم دا عيب منك....و نحن اصحاب...حصل يوم انا زعلتك في شي؟....ولاّ غلطت عليك؟........وبعدين نحن سكتنا علي نضمكم يا المصرين انو نحن كسلانين...كمان جابت لها فسيفساء؟...ودايرين تطلق علينا دعاية زي دي؟.......
استمرّ في نضمو..... وقال لي كدي.... يوم شوف اجتماع مجلس الوزراء حقكم في التلفزيون.... وحتعرف انكم مجتمع فسيفسائي.....افو انا اخوك انت...... النضم جاب لو نضم تاني...يعني يا حمدي ماك مارق مننا زول من الفسيفسائية....حتى ناسنا الكبار فسيفسائين؟...........وبعدين حسي لو سمعوك ناس مجلس الامني...يطلعو قرار تاني ويقولو للحكومة تقبضو الجنجويد وتقبضو معاهم الفسيفسائين..... اها الحكومة تقبض منو وتخلي منو؟
قال لي ... برضو شوف ناس دارفور ديل حسي؟....وشوف اشكالهم دي.... مش اشكال فسيفسائية؟....وتحس فعلا انو مجتمع دارفور قمة الفسيفسائية........والله يا جماعة في الحقيقة يا قول ناس الحكومة..... عيوني غمدن وبقيت ما بشوف.... وشوفتو المصري دا كضاب كيفن؟ وبهت ناس دارفور كيفن.....؟.......كلو شي ولا ناس دارفور ديل...... عليك الله يا حمدي حسي ناس دارفور ديل يبقو فسيفسائين كيفن؟ بس قول لي؟. يا حمدي خاف الله....يقولو لك يا حمدي ناس دارفور ما لاقين اكل ياكلوهو..وانت تقول فسيفسائين؟... منو وين بس؟..........اسمع يا حمدي......من يوم الليلة لا بيني لابينك ......وحات الله اسمع شفعك ساكت نضمو مع شفعي في الشارع ساكت وقالو لهم يا فسيفسائين...ولاّ يا سجم.... ولاّ يا رماد...... علا الدم يصل الركب

Post: #2
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-05-2004, 11:10 AM
Parent: #1

تسعين زول يدخلو..... وما يفتحو خشومهم... يعني راضين يكونو فسيفسائين... غايتو انا ما معاكم.....

Post: #3
Title: Re: شفتو قلة ادب الزول دا؟....قال نحن مجتمع فسيفسائي
Author: PLAYER
Date: 08-05-2004, 11:17 AM
Parent: #2

سيجيمان
Quote: فسيفسائين
بالعربي السوداني يعني شنو

Post: #10
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-05-2004, 10:26 PM
Parent: #3

بلير
Quote: بالعربي السوداني يعني شنو

انا غايتو... قسمت الكلمة على اتنين ويعدين فهمتها.....عشان كدي زعلت

Post: #4
Title: Re: شفتو قلة ادب الزول دا؟....قال نحن مجتمع فسيفسائي
Author: rani
Date: 08-05-2004, 11:20 AM
Parent: #2

انت الفسسسسلبناكيئي البتتكلم عنها دي معناها شنو..؟؟؟؟؟
الواحد فينا كيبوردو ما قادر يقولها

Post: #11
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-05-2004, 11:16 PM
Parent: #4

راني
Quote: انت الفسسسسلبناكيئي البتتكلم عنها دي معناها شنو..؟؟؟؟؟

دي انا ما بعرفا..... بتعرفا انت القلتها

Post: #5
Title: Re: شفتو قلة ادب الزول دا؟....قال نحن مجتمع فسيفسائي
Author: تولوس
Date: 08-05-2004, 03:29 PM
Parent: #2

سجيمان الزوول ده فاكرنا بناكل بصل كتير زيهم ولا شنو .. والله الزول ده بالغ عديل كده

Post: #6
Title: Re: شفتو قلة ادب الزول دا؟....قال نحن مجتمع فسيفسائي
Author: عزيز
Date: 08-05-2004, 03:48 PM
Parent: #5

د. سجيمان
مساك الله بالخير

ياخوى دخلت مرتين قلت أمكن سجيمان ورانا معنى كلمتوا دى
أصلنا وحاتك ياسجيمان ياخوى بقينا ما عندنا لغه عديله وقدر الكنا بنعرفوا فى العربى ضيعتوا الغربه الله يقطع وشها ومرات تكوس للكلمه ما تلقاها..
غايتوا كان معناها حجار كريمه أنا منهم فسيفسائى كبير
وكان الشى شتيمه الفى بطنا للمصريين كتير بنورى ليهم

محبتى
عبدالعزيز خطاب

Post: #14
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-06-2004, 10:11 AM
Parent: #6

عزيز.. العزيز

Quote: وكان الشى شتيمه الفى بطنا للمصريين كتير بنورى ليهم

الكلمة دي قطع شك شتيمة...المصري دا كان لما يقولا يقعد يضحك...

Post: #13
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-06-2004, 07:11 AM
Parent: #5

تولوس
Quote: سجيمان الزوول ده فاكرنا بناكل بصل كتير زيهم ولا شنو

يعني البصل ليهو علاقة بالفسيفساء؟.....والفاصوليا كيف؟

Post: #7
Title: Re: شفتو قلة ادب الزول دا؟....قال نحن مجتمع فسيفسائي
Author: mohammed alfadla
Date: 08-05-2004, 04:00 PM
Parent: #1

loooooooooooooooooooooooooooool
يا سجيمان
بالغت كتلتنا بالضحك

يا شباب يا ما مسغفين
فيسفساء معناها البلاط الملون بألوان كتيرة حق ناس الأندلس داك
حاجة بتشبه المزايكو الحالي

الله يجازي محنك يا سجيمان

Post: #9
Title: Re: شفتو قلة ادب الزول دا؟....قال نحن مجتمع فسيفسائي
Author: Abureesh
Date: 08-05-2004, 05:39 PM
Parent: #7

الأخ سجيمــان،

قبل كم سنــة، تعـرفت على واحـد من المغـرب العـربى، وذكـر لى اسمـه
عبـد الرحمن الـ (من فاس).. ومن اليـوم داك ما نضمت معـاه لحـد ما شــرح لى أنو هـو إزداد فى فاس.

ماحـوظـة: "إزداد" بالمغـربى معناها إتولـد.. (يعنى زاد واحـد)

Post: #16
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-06-2004, 11:58 PM
Parent: #9

ابو الريش
Quote: قبل كم سنــة، تعـرفت على واحـد من المغـرب العـربى، وذكـر لى اسمـه
عبـد الرحمن الـ (من فاس).

الله يكسرني حتةحتة.....هنا في حصان بتاع سبق اسمو (فضل الله)..حصان جراي خلاس....وسيدو اسمو (المن فاس) برضو زي زولك..وقالو متفلهم فلهمة يا جنا..فلهمة نفر البراها...حسي انا لو عندي زي اسمو دا الشارع بمرق... المصيبة تكون في مرا برضها من فاس...والنسوان يقعدن يكوركن لها في بيت العرس.... يا الختيتيها رقدت... يا الختيتيها رقدت....شفت جنس المحن دي؟... الله يقدرنا خشمنا

Post: #15
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-06-2004, 11:25 PM
Parent: #7

mohammed alfadla

Quote: فيسفساء معناها البلاط الملون بألوان كتيرة حق ناس الأندلس داك

يعني نحن طلعنا بلاط؟!!!!!

Post: #8
Title: Re: شفتو قلة ادب الزول دا؟....قال نحن مجتمع فسيفسائي
Author: Elnasri Amin
Date: 08-05-2004, 05:31 PM
Parent: #1

OK

ياسجيمان

الكلمه دى معناتها الزول الغالاط و كلامه كتير..

قالو نفرين شافو ليهم حاجه من بعيد و ما عرفوها شنو.

واحد قال دى غنمايه

التانى قال دى طياره..

غنمايه ,طياره ,غنمايه ,طياره ,غنمايه ,طياره ,غنمايه ,طياره ,

لمن وصلو قريب الشى طلع طياره و طارت فى السماء

صاحبك الفسيفسائي قال"برضو هى غنمايه"

Post: #12
Title: Re: شفتو قلة ادب الزول دا؟....قال نحن مجتمع فسيفسائي
Author: Adrob wad Elkhatib
Date: 08-05-2004, 11:59 PM
Parent: #8

Quote: فيسفساء معناها البلاط الملون بألوان كتيرة حق

او «فيسفساء» سجادة منسوجة من الوان وانماط نسج عديدة.
Sudan فسيفساء من الأعراق المختلفة،

Post: #18
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-07-2004, 06:39 AM
Parent: #12

ادروب

Quote: فسيفساء من الأعراق المختلفة،

شكرا للترجمة

يعني الزول دا حسي امشي اتعضر لو...واقع لو فوق راسو؟

Post: #17
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-07-2004, 05:02 AM
Parent: #8

النصري

Quote: صاحبك الفسيفسائي قال"برضو هى غنمايه

دا غالاط.....ومكابرابي

Post: #19
Title: Re: شفتو قلة ادب الزول دا؟....قال نحن مجتمع فسيفسائي
Author: حبيب نورة
Date: 08-07-2004, 07:01 AM
Parent: #17

looooooooolz
ههيهيهيههيهيهيهيهي
لا حولة لا قوة
ياخي دة كلام شنو
والمصري دة انت سامحتو أزاي!!
وبعيدن تعال هنا فسيفسائيين يعني شنو
باقي نحن ما بنشم ولا بنري ولا بنسمع
بالله شوف المصري دة
قول ليه نحن فسينا
واللا في أسكندرية
واللا فيفي عبده
ههيهيههيهيهيهيهي

Post: #20
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-07-2004, 10:22 AM
Parent: #19

Quote: والمصري دة انت سامحتو أزاي!!

حبيب نورة

ماتبقى لخبات زي صاحبك اساسي

ادروب قال الكلمة دي سمحة...وانا سامحتو

Post: #21
Title: Re: شفتو قلة ادب الزول دا؟....قال نحن مجتمع فسيفسائي
Author: Outcast
Date: 08-07-2004, 03:12 PM
Parent: #20

سجيمان..

الفسيفساء معناها البلاط المكون من عدة الوان كما تفضل الفاضلابى بشرحه .. ...وتعبير مجمتمع فسيفسائى يعنى انه مجتمع متعدد الاعراق و الاثنية كما تفضل ادروب ود الخطيب بتوضيحه...

لكن المشكلة صاحبك المصرى دة ممكن يكون قاصد حاجة تانية تماما ,, و يكون عندها معنى بعيد (تتذكر التورية فى البلاغة) نحن ما بنعرفو ... غايتو أكان كان بقولها و بضحك معناها قاصد شى شين...

بالمناسبة ابوى لما يكون عايز يقول انو فى زول مخه فاضى بيقول "الزول ده مخو فسافيسى" .....
بمعنى انه راسه فارغ .....

Post: #25
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-08-2004, 06:02 AM
Parent: #21

Outcast

Quote: غايتو أكان كان بقولها و بضحك معناها قاصد شى شين...

كان بيضحك...ويتمخت...كمان

Post: #22
Title: Re: شفتو قلة ادب الزول دا؟....قال نحن مجتمع فسيفسائي
Author: Adil Osman
Date: 08-07-2004, 11:57 PM
Parent: #1

سجيمان
بطّل السفسطائية يا فسيفسائى، ولاّ أرسّلك واحد سوريالى يعلّمك الداديزم!!!

Post: #23
Title: Re: شفتو قلة ادب الزول دا؟....قال نحن مجتمع فسيفسائي
Author: قلقو
Date: 08-08-2004, 01:20 AM
Parent: #22

اخوى سجيمان
عافى منك سجيمان صاحبى الراجل الكلس الغضنفر ياحامى حمى القبيلةليك حق والف حق تزعل من كلمة فسيفائيين..نحن ياسجيمان مابنخاف من زول ونعمل الفسيفساء بتاعنا كتامى..لكن بنعملا عدييييل كدة وبى امبلفير كمان .فسيفسائيين قال..افو.

Post: #27
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-08-2004, 06:12 AM

قلقو

ازيك
Quote: فسيفائيين..نحن ياسجيمان مابنخاف من زول ونعمل الفسيفساء بتاعنا كتامى..لكن بنعملا عدييييل كدة وبى امبلفير كمان .فسيفسائيين قال..افو

يعني هي حاجة سمحة؟

Post: #26
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-08-2004, 06:06 AM
Parent: #22

عادل عثمان
Quote: ولاّ أرسّلك واحد سوريالى

سروالو؟....سروالو دا منو؟

Post: #24
Title: Re: شفتو قلة ادب الزول دا؟....قال نحن مجتمع فسيفسائي
Author: willeim andrea
Date: 08-08-2004, 02:23 AM
Parent: #1

اها دخلنا في فن العماره

Post: #28
Title: Re: شفتو قلة ادب الزول دا؟....قال نحن مجتمع فسيفسائي
Author: سجيمان
Date: 08-08-2004, 06:17 AM
Parent: #24

وليم اندريا
Quote: اها دخلنا في فن العماره

دا هو فن العمارة البيقولوهو؟....كان كدي نحن من زمااااان فنانين