Post: #1
Title: دايــر ابقــى..فســـِل
Author: سجيمان
Date: 08-20-2004, 12:00 PM
Parent: #0
من يوم الليلة داير ابقى فسل..بخيل...قحف....هم القحوف ديل احسن مني بي شنو؟.....اي زول فسل وقحف وسوى قروش الناس قاعدة تحترمو وتشيلو في راسا.....والغريبة ما لاقين منو التكتح...غايتو انا لابد من ان احسن ادائي الاقتصادي..... ومن الان الي الطريقة القحفية ...والفسالة.....
نحن مبذرين في الاكل وفي الشراب والكهرباء والتلفون واللبس....اول حاجة اي صحن يشيل اكتر من معلقتين من الطعام... لابد من اعدامو...بعد مراقبة مستفيضة لقيت انو الناس البياكلو بالشوكة والمعلقة اكلهم بسيط.... حيث ان اللقمة القاعدين ندردما نحن وناكلها.. حاجة غير معقولة وغير مطمنة....الاكل بالشوكة والسكين من الليلة....طريقة عواسة الكسرة لابد من تغيرا.... مساحة الصاج لابد ان تصغر اعدام الصاج القديم وتغطيس حجرو...عاوزين ام الخير تعوس لينا الكسرة في غُتاية علبة صلصلة...وتشيل العجين بحقنة مقاس خمسة سي سي....ودا يكون مقدار طرقة الكسرة الواحدة... كل زول في البيت كفاهو خمسة طرقات كسرة في اليوم...يعني خمسة وعشرين سي سي من عجين الكسرة.... الملاح..لابد من تقنين... اكل الملاح... البامية مثلا.. عدد قرون البامية في الحلة بعدد الاشخاص الموجودين بالبيت....ونحن كفانا...ستة قرون بامية في تلاتة صفايح موية... وطماطماية واحدة وبصله واحدة....وكذلك الملوخية يتم حساب الملوخية بعدد الصفق في الفرع الواحد.. كل زول كفاهو تلاتة صفقات ملوخية في الوجبة... يعني كلنا كفانا تمانتاشر صفقة ملوخية.....الشاي ... يوضع الشاي الحب وبعدد حبات الشاي حبتين لكل فرد...اتناشر حبة شاي تلف جيدا في شاش.. تغلي الموية لحدي ما تفور ..وتعطن الشاش في الموية الحارة لمدة تلاتين ثانية...ويحتفظ بالشاشة لاستعمالها مرة اخري لعدة ايام...السكر ايضا بالحبة...... وهكذا
النعلات.. نسبة لاستهلاكنا الكبير للنعلات... حيث ان الله قد حباني بعائلة حوامة داخل وخارج البيت...ممنوع منعا باتا لبس النعلات علا في المناسبات الكبيرة.... الشفع يمشو المدرسة .... كل واحد شايل نعلاتو في ايدو... يلبسن في الطابور واول ما الطابور ينتهي... يملصن ويختهن في شنطتو حقت الكتب.... ملحوظة اي مدرسة يكون فيها مدرس مبذر ويقول للطلبة اكتب في سطر وفط سطر امرق وليداتي منها طوالي....والله نحن ما عندنا قروش نضيعها في سطور فاضية ساكت.....
الكهرباء....الاصل اي لمبة طافية.... الاستثناء.. اللمبة تولع لمدة دقيقة او لحدي ما الزول يشوف داير شنو من الاوضة مثلا وبعد كدا نطفيها.. ايهما اقل..... حتى لو قاعدين نتونس في الاوضة.... والونسة في الضلمة زااااتا سمحة...... التلفزيون... نشرة الاخبار والغنا نسمعهم عند جيرانا وحتى لو فتحنا التلفزيون...... اي مسلسل معاد ممنوع... اي غنية سمعناها قبل كدا نقفل التلفزيون ونفتحو بعد الغنية تنتهي....لانو دا بذخ ساكت وقلة ادب...التلفون الدايرنا يضرب لنا..
|
Post: #2
Title: Re: دايــر ابقــى..فســـِل
Author: omer almahi
Date: 08-20-2004, 12:40 PM
Parent: #1
مبروووك أخيراً سجيمان يمزق فاتورة التغا والترف
|
Post: #10
Title: Re: دايــر ابقــى..فســـِل
Author: سجيمان
Date: 08-21-2004, 05:37 AM
Parent: #2
عمر الماحي
| Quote: مبروووك أخيراً سجيمان يمزق فاتورة التغا والترف |
دا انقلاب...... وتماشيا مع مطالب البنك الدولي
|
Post: #3
Title: Re: دايــر ابقــى..فســـِل
Author: الواثق تاج السر عبدالله
Date: 08-20-2004, 12:48 PM
Parent: #1
يا سجيمان ياخوى
لملمة القريشات بتجيب المشاكل
اول حاجة المرة تجيك كل يوم دايرة التوب داك ودايرة الحلق داك
والوليدات الداير البلاى استيشن والداير الجزمة ام عجلات .......
وتانى شى واهم شى قدر ما تلملم فى القريشات تجى فى اول اجازة نازل
البلد كلها يشيلوها منك ناس الحكومة شى ضرائب وشى ذكاة وشى قناة
وشى وصولات وشى جريح وشى ميت ................
وده كوم واهل العوض كوم تانى براهوا ود حميدان داير يبنيلوا اوضة
فوق حوش الرجال و عوضين مرته رقدوها ليهو فى مستشفى البندر عشان
عندها وجع فى صفحته.................... لمن يجيك انت ذاتك وجع فى
صفحتك تبرى انت من الوجع.
اسمع نصيحتى ليك خليك مفلس اسحن ليك مالك ومال وجع الراس كل يوم فى
خطة خمسية وعشرية وربط الاحزمة وكله بدون فايدة
خليها فاكه وشرط كل الفواتير ذى ناسنا شفتهم شطار كيف فى الشريط
|
Post: #11
Title: Re: دايــر ابقــى..فســـِل
Author: سجيمان
Date: 08-21-2004, 05:49 AM
Parent: #3
الواثق تاج السر
| Quote: لملمة القريشات بتجيب المشاكل |
انا لما الملم قريشات...ما حادي زول اي حاجة.... البيموت... وقع لك؟
|
Post: #4
Title: Re: دايــر ابقــى..فســـِل
Author: Elnasri Amin
Date: 08-20-2004, 01:29 PM
Parent: #1
يا سجيمان
احكى ليك قصه حقيقيه
مره واحد صاحبى جانى و هو فى اشد الاستغراب ..
و عند سؤالى قال انه شاهد منظر لم يتوقع ان يشاهده فى حياته..
قال..اتى لتوه من زياره احد الاصدقاء ..و يشاركه فى السكن شخصا اخر..
عند وصوله لشقتهم ...حضر صاحب المبنى لتصليح التلاجه الا ان زميل السكن كان غير سعيدا بمبدا التصليح...كان يقول لسيد العماره It's OK, It's Ok
و اتضح ان السبب ان تصليح التلاجه معناه ميز و اكل و صرف و هو ما داير كده
قصه تانيه
كنا فى امريكا ساكنين فى شقه مليانه فيران و جقور,,واحد صاحبنا مشى استلف كديسه من احد معارفه..... و طوالى الفيران بدات تختفى ..بعد يومين الكديسه ذاتا اختفت ..سالت صاحبى الحصل شنو قال لى"ياالنصرى ياخوى الكديسه كل يوم داير علبه طعام ب 50 سنت ..انا اربى الكديسه ولا اربى اولادى فى السودان!! رجعتها يا النصرى اخوى"
تحياتى
|
Post: #13
Title: Re: دايــر ابقــى..فســـِل
Author: سجيمان
Date: 08-21-2004, 08:32 AM
Parent: #4
النصري
| Quote: "ياالنصرى ياخوى الكديسه كل يوم داير علبه طعام ب 50 سنت |
يعني بتكلف اكتر من اي شافع في امبدة
|
Post: #5
Title: Re: دايــر ابقــى..فســـِل
Author: الفاتح يسن
Date: 08-20-2004, 01:56 PM
Parent: #1
سيجي فكها شوية وبلاش فساله حقو تتفرغ كده وتألف ليك كتاب في علم الفساله
|
Post: #6
Title: Re: دايــر ابقــى..فســـِل
Author: خضر عطا المنان
Date: 08-20-2004, 03:08 PM
Parent: #5
دا شنو السويتو الليلة ياشيخنا سجيمان ؟؟
والله داير ترجعنا لى مجاعة سنة 6 ذاتها !!
يا زول أفسل براك .. مفسلنا معاك لى شنو؟؟؟؟
نحن هنا صقيع ومطر طول السنة كمان تجيب ليها فسالة ؟؟
والله الا تجي تلقانا فطايس في البلد التلاجة دي !!!!
|
Post: #7
Title: Re: دايــر ابقــى..فســـِل
Author: mohamed osman bakry
Date: 08-20-2004, 09:38 PM
يا سيـجــو...
كــان جــوكـم ضـيـوف من الـبلد
تـسـو شـنـو؟
|
Post: #8
Title: Re: دايــر ابقــى..فســـِل
Author: Ali Alhalawi
Date: 08-20-2004, 10:12 PM
Parent: #7
| Quote: ملحوظة اي مدرسة يكون فيها مدرس مبذر ويقول للطلبة اكتب في سطر وفط سطر امرق وليداتي منها طوالي....والله نحن ما عندنا قروش نضيعها في سطور فاضية ساكت..... |
و أنا أقول من زمان سجيمان "فاطى سطر" مالو؟!! .. أتارينو الكلام دا كان قبل ما تبقى فسـل 
|
Post: #19
Title: Re: دايــر ابقــى..فســـِل
Author: سجيمان
Date: 08-21-2004, 11:39 AM
Parent: #8
علي الحلاوي
| Quote: و أنا أقول من زمان سجيمان "فاطى سطر" مالو؟!! .. أتارينو الكلام دا كان قبل ما تبقى فسـل |
ابدا وحاتك... الفلسكاب املا طسورو كلها وازح علي الهامش.....هو جايبنو بي هينة؟
|
Post: #9
Title: Re: دايــر ابقــى..فســـِل
Author: المسافر
Date: 08-20-2004, 10:16 PM
Parent: #7
الخلا ولا الرفيق الفسل
الفسالة شينة شناة مرة
|
Post: #22
Title: Re: دايــر ابقــى..فســـِل
Author: سجيمان
Date: 08-21-2004, 12:52 PM
Parent: #9
المسافر
| Quote: الخلا ولا الرفيق الفسل |
غايتو كان في سفرك دا انا عترت ليك.... اقع الخلا ساااااااكت
|
Post: #18
Title: Re: دايــر ابقــى..فســـِل
Author: سجيمان
Date: 08-21-2004, 11:12 AM
Parent: #7
محمد عثمان بكري
كلو زول يجي بي حقو.....
|
Post: #16
Title: Re: دايــر ابقــى..فســـِل
Author: سجيمان
Date: 08-21-2004, 09:29 AM
خضر عطا المنان
Quote: دا شنو السويتو الليلة ياشيخنا سجيمان ؟؟
|
داير ابقى زول.. يشار اليه بالبنان....ويقولو القحف تراهو داااااك
|
Post: #15
Title: Re: دايــر ابقــى..فســـِل
Author: سجيمان
Date: 08-21-2004, 08:44 AM
Parent: #5
الفاتح يسين
| Quote: حقو تتفرغ كده وتألف ليك كتاب في علم الفساله |
علم الفسالة.....وعلم القوالة..... ديل علمين مهمين.....والله يقدرنا نتفرغ
|
Post: #21
Title: Re: دايــر ابقــى..فســـِل
Author: تولوس
Date: 08-21-2004, 12:39 PM
Parent: #15
| Quote: علم الفسالة.....وعلم القوالة..... ديل علمين مهمين |
افو ... أسد الخلا !!!؟؟
سجيمان أخو البنيات وعشا البايتات .....هلا هلا
أنأ اخوك يا وداب زهانة
|
Post: #24
Title: Re: دايــر ابقــى..فســـِل
Author: سجيمان
Date: 08-21-2004, 01:26 PM
Parent: #21
تولوس
| Quote: أنأ اخوك يا وداب زهانة |
ود ابزهانة يكسي في نسوان الناس ومرتو عريانة
|
Post: #12
Title: Re: دايــر ابقــى..فســـِل
Author: المكاشفي الخضر الطاهر
Date: 08-21-2004, 06:00 AM
Parent: #1
الاخ الدكتور عادل (( البيطري الناجح ))
لكن انت ما وريتنا الاسباب التى حملتك على هذا التحول والتغير الذي يمثل بمثابة تحول خطير
سؤال : انت ام الخير دي لو رفضت حا تسوي ليها شنو ؟؟؟
|
Post: #14
Title: Re: دايــر ابقــى..فســـِل
Author: saif massad ali
Date: 08-21-2004, 08:37 AM
Parent: #12
سجيمان انت داير تسف الواطة كلها ولا شنو يابا انا ماشي اكلم ابو الريش
ود عوج الدرب
|
Post: #17
Title: Re: دايــر ابقــى..فســـِل
Author: شمهروش
Date: 08-21-2004, 09:50 AM
Parent: #14
سجيمان حبابك
تعرف ماتكون فسل وجلد وقحف بس شوف وظيفة تانية وهي
حـــــــــــــــــــــــــــــــــــــــــرامــــــــــــــــــــــــــــي
نهـــــــــــــاب وتاكل ناقة النبي وزرق اليتامى
بس بالطريقة دي بتلقلا نفسك قحفلياردير
|
Post: #20
Title: Re: دايــر ابقــى..فســـِل
Author: حبيب نورة
Date: 08-21-2004, 11:57 AM
Parent: #17
يا شيخنا اتفاسل براك!!
نحن مالناش دعوة خالس
نملاها وتوكل علي الله
وبكرة الله كريم موجودة
مش في أختراع سوداني بالاسم دة!!
|
Post: #30
Title: Re: دايــر ابقــى..فســـِل
Author: سجيمان
Date: 08-21-2004, 04:38 PM
Parent: #20
| Quote: نملاها وتوكل علي الله |
تملا شنو يا حبيب نورة يا اخوي؟
|
Post: #29
Title: Re: دايــر ابقــى..فســـِل
Author: سجيمان
Date: 08-21-2004, 04:34 PM
Parent: #17
شمهروش
| Quote: بس بالطريقة دي بتلقلا نفسك قحفلياردير |
مصطلح سجماني ممتاز .....قحفلياردير......كتير مهضوم
|
Post: #28
Title: Re: دايــر ابقــى..فســـِل
Author: سجيمان
Date: 08-21-2004, 04:30 PM
Parent: #14
سيف مساعد على
| Quote: سجيمان انت داير تسف الواطة كلها ولا شنو يابا انا ماشي اكلم ابو الريش |
باقي لك الواطا فضل فيها شي عشان اجي اخمو انا؟
|
Post: #25
Title: Re: دايــر ابقــى..فســـِل
Author: سجيمان
Date: 08-21-2004, 01:29 PM
Parent: #12
المكاشفي
| Quote: سؤال : انت ام الخير دي لو رفضت حا تسوي ليها شنو ؟؟؟ |
جواب: القحفنة من بنات افكار ام الخير
|
Post: #23
Title: Re: دايــر ابقــى..فســـِل
Author: omar ali
Date: 08-21-2004, 12:56 PM
Parent: #1
| Quote: من يوم الليلة داير ابقى فسل..بخيل...قحف |
داير ابقي قال...علينا...بس نحن ما دايرين نقطع
|
Post: #31
Title: Re: دايــر ابقــى..فســـِل
Author: سجيمان
Date: 08-21-2004, 04:41 PM
Parent: #23
| Quote: داير ابقي قال...علينا...بس نحن ما دايرين نقطع |
|
Post: #26
Title: Re: دايــر ابقــى..فســـِل
Author: Ehab Eltayeb
Date: 08-21-2004, 02:18 PM
Parent: #1
Quote: ياالنصرى ياخوى الكديسه كل يوم داير علبه طعام ب 50 سنت
يعني بتكلف اكتر من اي شافع في امبدة |
!!!!
الخلا ولا الرفيق الفسل
اها دي تحلها كيف؟؟؟؟
|
Post: #27
Title: Re: دايــر ابقــى..فســـِل
Author: ناجى الزبير الملك
Date: 08-21-2004, 03:49 PM
Parent: #26
الحق سي جى مان ..........
داير يبقى فسل ..........يا ربى القروش البدخرها دى .... حيديها منو .......
سيجمان ...... ما تمسكنى الفضل بعد الفسالة وبرجعوا ليك بعد داك واللا ما كدى........
|
Post: #33
Title: Re: دايــر ابقــى..فســـِل
Author: سجيمان
Date: 08-21-2004, 05:15 PM
Parent: #27
ناجي الزبير الملك
| Quote: يا ربى القروش البدخرها دى |
يخربني يا يابا خراب سوبا...كان عندي شي
|
Post: #32
Title: Re: دايــر ابقــى..فســـِل
Author: سجيمان
Date: 08-21-2004, 05:11 PM
Parent: #26
ايهاب الطيب
Quote: الخلا ولا الرفيق الفسل
اها دي تحلها كيف؟؟؟؟ |
دي ما دايرة حل
دي باقية عليّ انا حسي
|
Post: #34
Title: Re: دايــر ابقــى..فســـِل
Author: خضر عطا المنان
Date: 08-22-2004, 05:27 AM
Parent: #32
ســــــــجـيــــــمــــان ؟؟؟؟؟
أيوا انت : يا سـجــــــيــمــــــــــــــــــــــــان ؟؟؟
شايفك تبرطع بي هنا براك !!
وكمان متفسح للنهاية : داير أبقى فسل !!!!!
وينا أم الخير دي ..... آ ........ شيخنا ؟؟ .. وين مشت ؟؟؟!!
أنا هادي والقعدة في خشم الحوش دا راجيها لامن تجي !!!!
خضر
|
Post: #35
Title: Re: دايــر ابقــى..فســـِل
Author: سجيمان
Date: 08-22-2004, 08:08 AM
Parent: #34
خضر عطا المنان
| Quote: وينا أم الخير دي ..... آ ........ شيخنا ؟؟ .. وين مشت ؟؟؟!! |
ام الخير قاعدة تخيت في الهدوم القديمة...تاني مافي دلقان يترمي
|
Post: #36
Title: Re: دايــر ابقــى..فســـِل
Author: خضر عطا المنان
Date: 08-22-2004, 08:37 AM
Parent: #35
كان كدي .. آ ..... شيخنا انا امانة ما اتمقلبت
انا فقد قعدة في خشم الحوش من أمس قايلا برة وقاعد راجيها عشان ترجع واقوم احكيلا بالقاعد تسوي فيهو انت دا..
أتاري هي المسيكينة غاطسي وسط الدلاقين تخيت َ؟؟؟
يا حليلك والله يا ام الخير... امانة مابتشبعي مغسةّّّ ***
خضر
|
Post: #37
Title: Re: دايــر ابقــى..فســـِل
Author: سجيمان
Date: 08-22-2004, 12:35 PM
Parent: #36
خضر عطا المنان
| Quote: يا حليلك والله يا ام الخير... امانة مابتشبعي مغسةّّّ *** |
هي شافت شي؟
|
Post: #38
Title: Re: دايــر ابقــى..فســـِل
Author: ود الشيخ
Date: 12-30-2004, 06:40 AM
Parent: #1
صحي بقيت فسل ده كيفن أنا شفتو
دسيتو مني مش عشان ما اشوف
مساحة الصاج دي يا دكتور يا راقي
يا اخوي اسمها مُعراكه الليلت الدوكه
قال مساحة الصاج هو صاج ولا قزاز عربية
|
Post: #41
Title: Re: دايــر ابقــى..فســـِل
Author: سجيمان
Date: 12-30-2004, 08:11 AM
Parent: #38
ود الشيخ
| Quote: قال مساحة الصاج هو صاج ولا قزاز عربية |
لووووووووووووووووول... يا جنا ها.......لووووووووووووووول
|
Post: #39
Title: Re: دايــر ابقــى..فســـِل
Author: ست البنات
Date: 12-30-2004, 07:29 AM
Parent: #1
سيجيمان أخوى ،
جاييى تبقى بشعى اخر الزمن ?
وتحرمنا من الكسترد كمان ? وا سيجيمتى !
وبس تانى ماب اقدر اجى بي حيلتكون أصلى ! عارف فيشان شنو ?
فيشان بتتملى عقارب ودبايب وألاس ( عارف الألس يا شنو ? الدبيب القصيير . أب دفان )
باقى الزول الفسل نحنا نقولو جيوبك فيها عقارب ( أكنو ماب يدخل ايدو فى جيبو خايف من العقارب )
والفسل ضومة ضومة - نقولو عندك دبايب فى جيوبك !
--
دحين يا خوى غيير بدل شوفلك صيرفى ، ولا يانا الجايين سايقيين بينيتنا منك وقت جاييى تقتلها بالمغسى والجوع زى قول الخدر !
باقيلى جاييى تلملم القريشات فحال تعرسبها ! نان امانى ماب احدس ام الخير فحال بس كل يوم تقولك الملاح ادففق ، وانت تمشى تانى فوق قلبك تبيعلك قفة خدار ووقة لحم ، وكمان اقولها دفقى ألمى فوق الفحم زى التكنك ماكى شايفا شى !
وانت تشيل السوق فوق قيليبك حانف ويشييك كدى تجيبلهون الرغيف المو خمج !
وما تقولى الغيرك وزعلك منى شنو !
انا باقى نضمك دا كيف وجعنى ! فحال الميسيكينى ديكا ماب تفتح خيشيمها تقولك لع ولا أييى تقوم تبرطع فوق ريويسا ?
ست البنات .
|
Post: #43
Title: Re: دايــر ابقــى..فســـِل
Author: سجيمان
Date: 12-30-2004, 11:09 AM
Parent: #39
ست البنات
Quote: نان امانى ماب احدس ام الخير فحال بس كل يوم تقولك الملاح ادففق ، وانت تمشى تانى فوق قلبك تبيعلك قفة خدار ووقة لحم ، وكمان اقولها دفقى ألمى فوق الفحم زى التكنك ماكى شايفا شى !
|
والله يا ست البنات بتعرفي للغتاتي جنس عرفي.......
اها يا زوله الفسالي دمسناها
|
Post: #40
Title: Re: دايــر ابقــى..فســـِل
Author: ود الشيخ
Date: 12-30-2004, 07:50 AM
Parent: #1
ست البنات
والله نضميك بس التقول سامعوا أنا ما قلت بس انتي
انضمي
|
Post: #49
Title: Re: دايــر ابقــى..فســـِل
Author: سجيمان
Date: 12-31-2004, 08:26 AM
Parent: #40
*
|
Post: #42
Title: Re: دايــر ابقــى..فســـِل
Author: ست البنات
Date: 12-30-2004, 08:17 AM
Parent: #1
ود الشيخ أخوى ،
كيف حالك ،
أساعيتى أنا بنضم ، عيلى ان بيقينا شيلنا نيجيريا دى جنس نضمنا دا تلقوا وين ???
يا ربى يبقى نلقالنا عندهم ساقى ومترة وتميرات وقرفتن شى ????
أسع النضم دا خلو ، كت جاييى اسعلك ،
انجيت أبوك الشيخ دا ماب يعزملنا فوق ايدياات سيجيمان دا فحال يبقى سخى ???
وكتر خيرك على المرور . ويريدك رب العالمين .
ست البنات .
|
Post: #45
Title: Re: دايــر ابقــى..فســـِل
Author: عماد عثمان
Date: 12-30-2004, 12:33 PM
Parent: #42
ست البنات أخيتى
سوقى أخيتك أم الخير
اندلى لشيخنا ود المبارك
خليهو إديكم كادوك السرير
( ده نوع بدخلوه فى ماسورة السرير)
وإن كمان شلتى نيجيريا ياه بكان
الكادوك الأصلى ...
الجنا دا باقى مسيخيت
بدور إلم القريشات ياخدلو بنيى صغيرى ...
فوق أخيتك
عماد كرنديس
|
Post: #48
Title: Re: دايــر ابقــى..فســـِل
Author: سجيمان
Date: 12-31-2004, 05:30 AM
Parent: #45
عمادعثمان
Quote: ست البنات أخيتى
سوقى أخيتك أم الخير
اندلى لشيخنا ود المبارك
خليهو إديكم كادوك السرير |
يا زول انا بلا كادوك سرير....وحات الله نعجة.. بااااااع... لا بهش ولا بنش
|
Post: #44
Title: Re: دايــر ابقــى..فســـِل
Author: ود الشيخ
Date: 12-30-2004, 11:18 AM
Parent: #1
ست البنات
عندي بنيتي اسمها سمر نضميها نجييض زي نضميك
بعزها متل معزتك علا بالدنقلاوي
وا فليلي البقيت مجهج بينكن
|
Post: #46
Title: Re: دايــر ابقــى..فســـِل
Author: كمال حسن
Date: 12-30-2004, 07:34 PM
Parent: #1
أهـــا يا ســجيمــــان أخوي أتاريك تفط في السطور ساكت هنا وتكتب كبار كبار، عشان بكري ابوبكر ده مدرستو بتوزع الكراسات مجان
طيب مدارس السجم ديك كراس الرسم البياني البفوطّو فيه صفحه كامله ده نعمل معاهو شنو لالالالا ما أنا من الأول قلتلك الشغلانيه دي ما بتبقى
وبعدين نقوم نقول للناس ديل يرجعو الأرديه للمدارس تاني بدل البناطلين الفيها تبزييير شديد دي؟
وطابور النضافه ده زاتو لازم يطلع قرار وزاري يبقوهو كل أول شهر (مع الماهيه) عشان الناس تقتصد في غسيل الملابس - يبقى شهري - وسنون المشط برضو من الكسير
بعدين أمريكا دي من زمان قلت ليكم بلد التبزير زاتو، يعني يفلحو يسوو لينا مكنة حلاقه (للإستعمال مره واحده)، وكميرا برضو مره واحده وما قدرو يسوو لي أخوانا الفي أمريكا كديسه (مره واحده) بدل البتكلف 50 سنت في اليوم دي
غايتو أنحنا مريحين دماغنا من الناحيه دي كديسة الجيران طبعا المسكينه - ماقعد تشوف التلفزيون وكدايس بره العندهم معلبات و(قصريه لامواخذه)وووإلخ - مافي زول بديها تاكل، المسكينه منضفه بويتات الفريق ريحة الفار(طعامها الأوحد)، تلقاها قاعده تسمع في ونسة النسوان كل ماتسمع واحده منهن تحكي شافتلها فار تقوم الكديسي من المغرب تشيل عفشا وتسكن عندهم،
لكن موضوعك ده وقصة كلب جيرانا (التانين) حايخلوني أكوّن معاك تكتّل (الرفيق الفسل) المحافظ. قبل ماتنطّو لي في حلقي أسمعو قصة كلب جيرانا حا أحكيها ليكم في البوست القادم بعد إذن سجيمان طبعا
|
Post: #50
Title: Re: دايــر ابقــى..فســـِل
Author: سجيمان
Date: 12-31-2004, 11:11 AM
Parent: #46
كمال حسن
Quote: وبعدين نقوم نقول للناس ديل يرجعو الأرديه للمدارس تاني بدل البناطلين الفيها تبزييير شديد دي؟
|
يا زول اردية شنو؟...... انت حسي فرقك منهم شنو؟ ما مبزر زيهم....... يعفوهم لا بناطلين ولا اردية..... والسترة من الله
|
Post: #47
Title: Re: دايــر ابقــى..فســـِل
Author: كمال حسن
Date: 12-30-2004, 07:45 PM
Parent: #1
اها ياخوانا
جيرانا الناصيه كان عندهم- في الزمن السمح - كلب سمين مدغلب مسمينو (رنقو) كانت وجباتو في مواعيدا اها ابوهم المسكين لأنو متمسك بي مبادؤو شديد ماقدر يتعايش مع إفرازات التكتلات الأقتصاديه النشأت في العهد الإنقاذي الجميل، أها في نفس الوكت البيت لصقهم كان فيه واحد من (قافزي الزانه) صعد من الصفر إلى الأعلى بسرعة حيرته هو شخصيا قبل الآخرين -عشان كده عيونو بقو منططات - اها زولنا الأخير ده ما كان عندهم كلب
فقام رنقو وهو الأكثر إلماما بهذه التحولات الجزرية، وبعد أن تأثر بإخوته (بعض البني آدمين في الزمن ده) كل يوم أشوف ليك محل رقدتو قدام البيت تتغير وتمشي إتجاه ناس (ابوعيون منططات) لغاية ما جا يوم لقيتو يتمغى ليك الصباح و طالع من بيت (الأخير)، ومن اليوم داك بقى كلب ناس اب عيون منططات
لغاية هنا والحكايه يمكن هضمها، لكن كونو يحصل بس بعد يومين يقوم الحرامي ينط بيت (المبدأجي) ويعدمو ليك قدر الفضل، و (رنقو) لم تهتز له جفن، ده اليخلي الواحد فعلا ينضم لي تكتل (الرفيق الفسل) عشان ما نفقد كدايسنا وكلابنا وسيد لبنا وآخـــــــــــرين
مش كده يا دكتور؟
|
|