Post: #1
Title: مــراحل تطور الزواج.....تجربة شخصيــة
Author: سجيمان
Date: 09-05-2004, 05:46 AM
الزواج...تجيب لك زول تقعد تصاقرو ويصاقرك عمرك كلو.....وتجيبو ناس يبقو لك في رقبتك لحدي ما تموت......الواحد اول ما يكبر ويحس انو بقى زول كبير يفكر في العرس......يقعد يحوم ويكوس... لحدي ما يعرس.....اول شي يفكر فيهو العريس او العروس... انو يظهر بصورة سمحة قدام شريكو.......انا خاصة نفسي.... كنت بدس السفة من ام الخير..... ولما اسف بسف تحت الشلوفة الفوق....ولما اضحك وانا سافي سقافي..... بمد شلوفتي الفوق قدر ما اقدر...عشان ادس السفة.....وافتح خشمي واضحك.... منظري كان شين انا متاكد.... لكن ام الخير لي حسي ما قالت لي لما تضحك وانت سافي فوق يسكو بك الوليدات....كنت وانا عريس قاعد احاول اخفف دمي واضحّك عروسي..... وان شاء الله ربنا يغفر لي غايتو السويتا بها تدخلا هي الجنة.... غايتو بنيت الناس.. مرضتها مرض شديد.... اقعد انكت والنكتة باااااااايخة.... ام الخير الله بيسعلني تضحك لمن دموعها يجرن...... مسكينة تسوي كيفن؟ تضحك تجامل..... ودا راجلا الربنا قسمو ليها.......وهي برضها ما قصرت.... تصحا من النوم بدري....وتحضر لي الشاي وشربات الليمون..... ملحوظة لي من شربات الليمون من الصباح عشرة سنوات وتلاتة شهور وخمسة ايام وتلاتين دقيقة واظني تاني فارقتها فراق الطريفي لي جملو.........وتقابلني وهي مبتسمة.......
العروس دايما تحاول توري انها حنينة ورقيقة.......مشينا السينبا...دخلنا فلم هندي اسمو من اجل ابنائي....ام الخير مرقت من السينبا وهي تبكي....رجعنا البيت برضو تبكي..... قدر ما حنست...وقدر ما قلت لها الخرابة دا تمسيل وكضب... كضب الله يكسرني كضب.... ابدا..... خمستاشر صباح وانتي يا ام الخير حلفتي ما تسكتي.....يا الله ويا امين سكتت بعد دخلنا فلم تاني كايبوي....كلو دقش......الفلم الكايبوي كضما كضمت عدوك.....نان تاني بكت؟
اجي من الشغل.... تقابلني عن خشم الباب مسيكينة فاتحة خشما تضحك......وان ساكت قلت راسي موجعني.... تقعد عن راسي وتقرا...... غايتو ما بعرفا بتقرا في شنو....لكن وجع الراس قاعد يروح.....تكون يا ربي قاعدة تقرا لي دعاية الكافينول عن راسي؟.....
وبعدين ما كانت بترضى من زول يطراني ساكت..ولاّ يقول فيني شي...... اختها جاتنا مرة وشافتني وانا نايم......سمعتها تقول لام الخير ......والله يا ام الخير سجيمان يا شناتو وهو نايم علا فيهو....ام الخير اتحرقت..وحاربت اختا علا جات امها صالحتن....كلو عشاني........النصيحة لك يا الله انا نومتي شينة.....
جبنا جنانا الاولاني...... الاهتمام قلّ.... بقت ام الخير مقابلة البنية...... وتنضم معاها....وانا انا داير لي شي.... تاشر بايدا وتقول لي...هنوووووووووك.....وهي تسوي لي بنيتها ..كدي..كدي كبرت...كدي كدي...نضمت...كدي كدي ضحكت...كدي كدي غمدت.....وانا نص ساعة اكوس للشي الدايرا.....وام الخير مع معلقة كدي كدي...
الوليدات زادو......وانا بقيت زول يدخل ويمرق.....وياكل....وان قلت نكتة... مافي زول يهببو لي.....لمن ادخل في ضفوري....وان جيت من الشغل...... يقولو للبنت يا بنت امشي شوفي ابوكي جا؟....والبنت تجي تتاوق لي....ولما تشوفني..تمشي تحدس امها...... وام الخير تقول لها...بسم الله متين جا؟.... غايتو ابوكي دا يحير ؟؟؟؟؟؟........يتلبد ويدخل براااااااحة زي الضُل..... غايتو جنس حالة؟؟؟؟؟؟
|
Post: #2
Title: Re: مــراحل تطور الزواج.....تجربة شخصيــة
Author: خالد
Date: 09-05-2004, 10:02 AM
Parent: #1
ياخ والله انتا زول عجيب
ربنا يوفقك يا قريبي
بعدين وين مختفي مني ليك زمن ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
خالد
|
Post: #5
Title: Re: مــراحل تطور الزواج.....تجربة شخصيــة
Author: سجيمان
Date: 09-05-2004, 07:16 PM
Parent: #2
خالد
يا بلدينا
الما بيجينا
ازيك
| Quote: ربنا يوفقك يا قريبي |
آمممممممين
لكن يوقفني في شنو؟
|
Post: #3
Title: Re: مــراحل تطور الزواج.....تجربة شخصيــة
Author: falcon
Date: 09-05-2004, 10:17 AM
Parent: #1
و الله يا سجيمان ياخوي صدقت بالحيل
و الحمد لله انك بعد عشرة سنين نسيت عصير الليمون براهو
و ما قالت ليك انت اتاريك يا سجيمان احوص و انا ما عارفه
بس لو عاوز تعمل نص عمرة لمكينة الزواج جيب طاري العرس
و شوية اهتمام بنفسك و شوف النتيجة
|
Post: #4
Title: Re: مــراحل تطور الزواج.....تجربة شخصيــة
Author: nour tawir
Date: 09-05-2004, 02:48 PM
Parent: #3
CG MAN
Don't listen to FALCON. He want's to put you in trouble with UM ALKHAIR
|
Post: #10
Title: Re: مــراحل تطور الزواج.....تجربة شخصيــة
Author: سجيمان
Date: 09-06-2004, 10:33 AM
Parent: #4
نور تاور
| Quote: Don't listen to FALCON. He want's to put you in trouble with UM ALKHAIR |
باقي لك ام الخير...مستنية لحدي ما يحرشني فالكون
|
Post: #7
Title: Re: مــراحل تطور الزواج.....تجربة شخصيــة
Author: سجيمان
Date: 09-06-2004, 05:44 AM
Parent: #3
فالكون
Quote: بس لو عاوز تعمل نص عمرة لمكينة الزواج جيب طاري العرس
و شوية اهتمام بنفسك و شوف النتيجة |
ما خلاااااص
راحت علينا
|
Post: #6
Title: Re: مــراحل تطور الزواج.....تجربة شخصيــة
Author: تولوس
Date: 09-05-2004, 08:28 PM
Parent: #1
سجيمان انت ما فالح يا خوي ولا اي حاجة ... انا غايتو كلمتها من البداية وقلت ليها ....
|
Post: #12
Title: Re: مــراحل تطور الزواج.....تجربة شخصيــة
Author: سجيمان
Date: 09-07-2004, 00:57 AM
Parent: #6
تولوس
| Quote: سجيمان انت ما فالح يا خوي ولا اي حاجة |
انا زماااان ماقلت لك انا بومة وطيرة ساكت
|
Post: #8
Title: Re: مــراحل تطور الزواج.....تجربة شخصيــة
Author: willeim andrea
Date: 09-06-2004, 06:42 AM
Parent: #1
...... بس ..... لقيتها...... اها انا دي الوقت عرفته السبب في خفت الدم والكلام البيجيب كل الناس وخاصتا اللطيف ... ما تقولي يا خي انته بتفكر في التانيه ... لكن اعمل حسابك كله كده يعني مرحلي ............. بيبداء بالعسل وبينتهي .... حسب ظرف الزمان والمكان .... قال شربات ليمون قال ... ارجي رمضان اهو قرب
|
Post: #9
Title: Re: مــراحل تطور الزواج.....تجربة شخصيــة
Author: عثمان عووضة
Date: 09-06-2004, 08:22 AM
Parent: #8
عين الحسود فيها صاعوط
|
Post: #11
Title: Re: مــراحل تطور الزواج.....تجربة شخصيــة
Author: Esameldin Abdelrahman
Date: 09-06-2004, 10:52 AM
Parent: #9
تعرف يا سجيمان حالتك دى بقت زى حالة نفرين ساكنين فى ميز ومميزين مع بعض لكن البدفع زول واحد.
|
Post: #13
Title: Re: مــراحل تطور الزواج.....تجربة شخصيــة
Author: بنت الاحفاد 2001
Date: 09-07-2004, 01:10 AM
Parent: #11
سجيمان والله ده روتين قاتل
الله يعين ام الخير عليك
ويعينك على نومتك الزعلت الاخوات من بعض
يعيني الواحد ما يفكر يعرس ولا شنو
|
Post: #17
Title: Re: مــراحل تطور الزواج.....تجربة شخصيــة
Author: سجيمان
Date: 09-07-2004, 01:53 AM
Parent: #13
بنت الاحفاد
| Quote: يعيني الواحد ما يفكر يعرس ولا شنو |
لا ....لا....فكري
وربنا يقسم لك ود الحلال....الما عندو روتين
وربنا يسعد البنيات كلهن
|
Post: #16
Title: Re: مــراحل تطور الزواج.....تجربة شخصيــة
Author: سجيمان
Date: 09-07-2004, 01:42 AM
Parent: #11
عصام الدين عبد الرحمن
| Quote: تعرف يا سجيمان حالتك دى بقت زى حالة نفرين ساكنين فى ميز ومميزين مع بعض لكن البدفع زول واحد. |
يدفع ويغسل العدة
|
Post: #15
Title: Re: مــراحل تطور الزواج.....تجربة شخصيــة
Author: سجيمان
Date: 09-07-2004, 01:31 AM
Parent: #9
عثمان عووضة
| Quote: عين الحسود فيها صاعوط |
فيها صاعوط.....وبابور وارد واو
|
Post: #14
Title: Re: مــراحل تطور الزواج.....تجربة شخصيــة
Author: سجيمان
Date: 09-07-2004, 01:20 AM
Parent: #8
وليم اندريا
| Quote: ما تقولي يا خي انته بتفكر في التانيه |
انا عرفت شنو في الاولى؟.........لحدي ما افكر في التانية؟
|
Post: #18
Title: Re: مــراحل تطور الزواج.....تجربة شخصيــة
Author: abdalla BABIKER
Date: 09-07-2004, 06:57 AM
Parent: #1
اخونا سي جي مان
ناس يا زول احتفلوا بعيد الزواج الفضي
انت ليك كم ؟؟؟؟؟؟؟؟؟؟؟؟؟؟؟؟؟؟؟؟؟؟؟
|
Post: #19
Title: Re: مــراحل تطور الزواج.....تجربة شخصيــة
Author: سجيمان
Date: 09-07-2004, 07:52 AM
Parent: #18
عبد الله بابكر
| Quote: انت ليك كم ؟؟؟؟؟؟؟؟؟؟؟؟؟؟؟؟؟؟؟؟؟؟؟ |
عييييييييييييييييييييييييييييييييييييييك
|
Post: #20
Title: Re: مــراحل تطور الزواج.....تجربة شخصيــة
Author: abdalla BABIKER
Date: 09-07-2004, 07:54 AM
Parent: #1
سي جي مان
| Quote: عييييييييييييييييييييييييييييييييييييييك |
اوعى تكون بقيت ذهبي
|
Post: #21
Title: Re: مــراحل تطور الزواج.....تجربة شخصيــة
Author: سجيمان
Date: 09-07-2004, 08:55 AM
Parent: #20
| Quote: اوعى تكون بقيت ذهبي |
غاب قوسين او ادنى
ينعل ابو الفلهمة زاتا
|
Post: #22
Title: Re: مــراحل تطور الزواج.....تجربة شخصيــة
Author: تولوس
Date: 09-07-2004, 09:11 AM
Parent: #21
انا قلت ليها يا السعوط يا عرس مافي
عشان كده مبسوط .... وبختها وش دقار لوري
|
Post: #24
Title: Re: مــراحل تطور الزواج.....تجربة شخصيــة
Author: سجيمان
Date: 09-07-2004, 11:15 PM
Parent: #22
تولوس
| Quote: انا قلت ليها يا السعوط يا عرس مافي |
انت سمح يا اخوي
الصعوط ما مشكلة لك
لكن نحن يبقن عليها اتنين الصعوط والشنا
|
Post: #23
Title: Re: مــراحل تطور الزواج.....تجربة شخصيــة
Author: بلدى يا حبوب
Date: 09-07-2004, 09:22 AM
Parent: #1
سيجمان
الله يديك العافيه والله برافو عليك بس تعرف انته كويس واحسن من الزول القالوا كان بدس السفه تحت الشلوفه الفوق وكمان معاه تصليحة من اليوم الاول للزواج وبعد شعهر قالوا صاحبنا دردم سقته وهاك بمزاج فى الشلوفه التحت المهم زوجته شافته وقالت ليه معقول انته بسف صعود وانا ماعارفك على طول الزول قال ليها (تعرفى انا بسف صعود وكمان بطلق )
تحياتى
|
Post: #25
Title: Re: مــراحل تطور الزواج.....تجربة شخصيــة
Author: سجيمان
Date: 09-07-2004, 11:19 PM
Parent: #23
بلدي يا حبوب
| Quote: (تعرفى انا بسف صعود وكمان بطلق ) |
مرضن يكضما لي يوم القيامة
|
|