Post: #1
Title: الزول دا...... شغــال في طــاحــونة؟
Author: سجيمان
Date: 09-09-2004, 01:38 AM
Parent: #0
الشيب....شاب يشيب فهو شايب.......انا عمري فوق الاربعين بي شوية كدي"الله يكسرني جد"..... لكن قليل الشيب...او يكاد يكون معدوم....لكن الايام دي...لاحظت لي الشعر الجوا نخريني ..وجوا اضنيا..... لقيتو شاب...بالله من الله خلكم شوفتو زول بيشيب من جوا لي برا...؟..... الناس بتشيب في الراس بعدين الشنب بعدين الدقن....حتين بعددددددين الاضنين والنخرين....
اللمين ود خالتي قال لي انت بخيت..دا بخت....خلي بالك الزول البي يشيبن حفرو...قبال كل شي دا بخيت... انا غايتو كلمة حفرو ضايقتني....وما ريحتني..علا دا ود خالتي....واصلو عوير كدي..... اسوي كيفن.....؟
معانا واحد اخونا هنا.....زول طيب وعديل..... علا شيبو عينة..... قدر مافيهو صوفة شايبة..... راسو وحواجبينو...ورشرش عيونو وشنبو ودقنو....يعني لو شفت صورة للزول دا تحلف تقول دا النيقاتيف بتاع الصورة...وخاصة هو ازرق زرقه شديدة....قلتو يا اخي انت مفروض تصبغ صوفك دا....ولو صعب عليك انا عندي فكرة لك.... جيب الهناية البيرشو بيها الفليت ديك... واملاها صبغة...وسوي لصقة في خشمك ولصقة في فتحات نخرينك ولصقة في عيونك.. وغتي اضنيك بي.وخلي زول يكون شغال سمكري عربات يرشك....لانو بيكون حريف وعارف...يجضم الشغلانة دي....
شفت زول من ناس الحكومة ديل...مرة في التلفزيون عاملين معاهو مقابلة..... والله باللوال كنت قايلو سواق طاحونة..... كلو ابيض في ابيض..... حتين بعددددين بعد ما ختيت بالي عرفتو..... دا سواق طاحونة الحكومة.....
|
Post: #2
Title: Re: الزول دا...... شغــال في طــاحــونة؟
Author: شمهروش
Date: 09-09-2004, 03:23 AM
Parent: #1
سيجم مان
خلي الجقلبة وماتبقى زي حمار البنطون يدفروك لي جوه تجي مارق
يااااابره.
خليت موضوع الطهور مولع
وجريت طهر يامطهر
وبعدين مارديت على المداحلة بتاعتي
انا اصلا بوصفك بالحيادية القاتلة
والكلمة بالانجليزي (كلين) من ناحية طبية
وكلين كم ناحية شرعيه
|
Post: #5
Title: Re: الزول دا...... شغــال في طــاحــونة؟
Author: سجيمان
Date: 09-09-2004, 10:26 AM
Parent: #2
شمهروش
| Quote: وبعدين مارديت على المداحلة بتاعتي |
رديت عليها...زماااااان
بس انت ما رجعت للبوست
|
Post: #3
Title: Re: الزول دا...... شغــال في طــاحــونة؟
Author: ود الشيخ
Date: 09-09-2004, 04:25 AM
Parent: #1
| Quote: الزول البي يشيبن حفرو |
وررووك يا سي جي
|
Post: #4
Title: Re: الزول دا...... شغــال في طــاحــونة؟
Author: saif massad ali
Date: 09-09-2004, 06:40 AM
Parent: #3
ياسجيمان يافردة الزول بتاع الحكومة يكون في برميل فرطق جنبو وانهلع قايل الحكومة انقلبت ودا شيب الخوف لانو شيب الخوف ما بخلي ولا شعره في حفره ولا بره
|
Post: #7
Title: Re: الزول دا...... شغــال في طــاحــونة؟
Author: سجيمان
Date: 09-10-2004, 08:45 AM
Parent: #4
سيف مساعد
| Quote: ياسجيمان يافردة الزول بتاع الحكومة يكون في برميل فرطق جنبو وانهلع قايل الحكومة انقلبت ودا شيب الخوف لانو شيب الخوف ما بخلي ولا شعره في حفره ولا بره |
يعني انا زول فارس....عشان كدا ماشيبت برا..............؟
|
Post: #6
Title: Re: الزول دا...... شغــال في طــاحــونة؟
Author: سجيمان
Date: 09-10-2004, 00:04 AM
Parent: #3
ود الشيخ بالله ما تعقدنا....برانا معقدين
|
Post: #8
Title: Re: الزول دا...... شغــال في طــاحــونة؟
Author: سجيمان
Date: 09-10-2004, 10:49 PM
Parent: #6
يعني كلكم صغاااااار؟
|
Post: #9
Title: Re: الزول دا...... شغــال في طــاحــونة؟
Author: معتز تروتسكى
Date: 09-10-2004, 10:58 PM
Parent: #8
انا قايتو بقراء لسه  ..
كبار لكن بنقرا..
يعنى لسه صغار  ..
|
Post: #10
Title: Re: الزول دا...... شغــال في طــاحــونة؟
Author: ابو جهينة
Date: 09-10-2004, 11:16 PM
Parent: #9
د. عادل
(خلي بالك الزول البي يشيبن حفرو...قبال كل شي دا بخيت ) ..
حسع الناس على حس كدة تجيب البخاخ الأنت إقترحتو داك و يرشو الحفر بصبغة بيضا ... يمكن البخت يجي .. و تقع المسعولية على قريبك لو الحكاية فشلت..
|
Post: #13
Title: Re: الزول دا...... شغــال في طــاحــونة؟
Author: سجيمان
Date: 09-11-2004, 10:43 AM
Parent: #10
ابو جهينة الحبيب
| Quote: و تقع المسعولية على قريبك لو الحكاية فشلت.. |
قريبي المسعولية............مو خايف منها
|
Post: #12
Title: Re: الزول دا...... شغــال في طــاحــونة؟
Author: سجيمان
Date: 09-11-2004, 09:37 AM
Parent: #9
معتز
Quote: انا قايتو بقراء لسه ..
كبار لكن بنقرا..
يعنى لسه صغار .. |
معادلة منطقية
انا بقرا اذن انا صغير
|
Post: #11
Title: Re: الزول دا...... شغــال في طــاحــونة؟
Author: almulaomar
Date: 09-11-2004, 06:29 AM
Parent: #1
دكتور سجيمان
يقول الشاعر:
عيرتني بالشيب وهو وقار ليتها عيرت بما هو عار
وخلينا من قول الشاعر لي قول الواقع ، الناس بتكره الشيب شديد جداً نسوان ورجال ، والنسوان البكونن في عمر يعني أقرب لرفقه مأمونه بستمعلن الصبغة عديل كده أما اللائي يئسن من المحيض فديل بيستخدمن الحناء الواحده يا سجيمان يا أخوي بعد أسبوع من ختة الحنه تشوف شعرها منكوش زي الشرا في القندول بتاع عيش الريف طبعاً.
أما معشر الرجال فقد كان جارنا عليه رحمة الله متصابي وعامل فيها إبن لبون – على وزن بنت لبون – فكان إذا صبغ شعره صار قرداً و...... إذا تركه دون صبغة ففكر وقرر وهداه تفكيره إلى أن يحلق شعره ويجزه من جذوره ويصبح صلعه تضاهي صلعة كوجاك وروبرتو كارلوس فأصبح بجهة متابع جيد للموضه ومن جهة أخرى غطي الشيب والعيب ، لكن بقت هناك مشكلة عويصة تمثلت في شنبه الذي يخيل إلى الناظر إليه للوهلة الأولى أنه ربما شرب لبن رائب أو أكل ملاح روب ونسى أو تناسي أن يتمضمض أو ربما يكون قد نفخ في جردل متوسط الحجم به رغوة صابون فونا أو تايد لا فرق. من عمق هذه المأساة هداه تفكيره الذي عادة ما يهديه في أوقات الزنقة إلى أن يحلق شنبو وأريت أب صلعه طاير ، فالشنب حسب تبريره القريب طبعاً هو ليس من السنة في شئ وهو وجه من أوجه الحضارة يدل على أن حليق الشارب خريج كلية أوروبية أو جامعة مصرية ، وأهو جاك شيراك بلا شنب وجورج دبليو سي بلا شنب وجورج واشنطن بلا شنب وحسني مبارك وزين العابدين بن على وزين الدين زيدان كل هؤلاء العظام بلا شنبات.
لكن الملاحظ الآن أن جميع السودانيين شابو الواحد تلقاهو ماشي وشنبو أبيض وشعر رأسه أبيض فهل يا ترى ده بسبب المصيبة البسوها في الدقيق عشان الرغيف يتنفخ ويبقى سمح أم هو بفعل الهم والغم والوجه الحسن أم ذلك راجع للكتاحة والحر أم هي مواد غريبة تم إضافتها إلى المويه.
آخر الكلام
واحده خليجية قالو بتتكلم مع جارتها السودانية قالت ليها يا أم فلان والله بلدكم جميلة وخضراء لكين إيش فيهم الأوادم ؟
|
Post: #14
Title: Re: الزول دا...... شغــال في طــاحــونة؟
Author: سجيمان
Date: 09-11-2004, 01:59 PM
Parent: #11
الملا عمر
ملاحظة
انت كتااااااب جدا بالمناسبة..... لكنك بخيل
| Quote: واحده خليجية قالو بتتكلم مع جارتها السودانية قالت ليها يا أم فلان والله بلدكم جميلة وخضراء لكين إيش فيهم الأوادم ؟ |
كان تقول لها..... كان لقيو اللقيتوهو كانو يبقو اسمح منكم
|
Post: #15
Title: Re: الزول دا...... شغــال في طــاحــونة؟
Author: almulaomar
Date: 09-11-2004, 11:28 PM
Parent: #1
يقول عمر بن أبي ربيعة في الشيب:
رأين الغواني الشيب لاح بعارضي
فأعرضن عني بالخدود النواضر
وكن اذا ابصرنني او سمعنني
سعين فرقعن الكوى بالمحاجر
فان جمحت عني نواظر اعين
رمين بأحداق المها والجاذر
فإني من قوم كريم نجارهم
لاقدامهم صيغت رؤوس المنابر
ورغم جمال الشعر وقوته إلا أنه لم يجيب مريسه تامزينو وشتت الجكاسية منه وفرت فرار السليم من الأجرب.
وتقول إحدى الطقطاقات في رقصة العروس
الشايب ده الله بيني وبينو الإبرة تطير وتقد ود عينو
فلم تكتفي بأن يفكها الله من هذا الشايب بل تعدى الأمر ذلك بأن تمنت له أن تطير الأبرة من أى مكنة خياطة أو غيرها وتقد عين هذا الشايب بضربة قوية مستهدفة عدستة سوداء كانت أم زرقاء أم عسلية ، ويصبح بذلك شايب وأعور وأظنه بذلك سوف يكون أكثر بأساً من كلب عقور ويمكن قتله إذا تم إضافته إلى قائمة الفأر والعقرب والكلب العقور
ويقول أحد الشعراء
وأضاءتِ الشمسُ الظلامَ بِمِفْرَقي
شَيباً تَلأَلأَ فِي الصبـاحِ المُشْرِق
لا تجزعي يا نفسُ مِنْ هذا الذي
كالفَجرِ يَبزُغُ بعدَ ليـلٍ مُغدِقِ
والشيبُ بستانُ الوقارِ ورمـزُهُ
عَقلاً وجِسـماً أو يُزانُ بمنطِـقِ
وأظن الكلام في غير ما حاجة إلى تعقيب وأن حال شاعرنا يرثى له وأهو بطريقة أو بأخرى بضحك على نفسه زيو وزي أى واحد يكذب ويكون أول المصدقين لكذبته.
ويقول الشيف توني لكل أولئك الخائفين والمهمومين والمهمومات من الزحف الأبيض للشيب والذي هو خير من ألف زحف مظفر للتصحر والصلع والقرع خاصة وأن صيف بلادي يمتد كثر من تسعة أشهر وسبعة أيام حسوما في العام الواحد ، يقول بالرغم من الشيبات البادية على الشعرات الباقية في نصف رأسه الخلفي بعد أن فعل الهدام فعلته بالنصف الأمامي فصبح وجهه ما بشبه قفاهو ولا بشبه وجه النهار حتى يقول في وصفته العجيبة لعلاج الشيب أو التمويه بإخفائه
المقادير:
أربعة ملاعق كبيرة من أوراق المريمية + نصف فنجان من الماء بشرط يكون موية صحة (سوبا يا حبوبه)
إثنين ملعقة كبيرة من الحناء ماركة التاج الممتازة الرقيقة الناعمة + ملعقة صغيرة من مسحوق القرنفل
نصف فنجان من الشاي المغلي بشدةعلي أن يكون شاي الغزالتين أو البقرة الضاحكة و تمساح أمواس ناسيت أو ديك العدة
طريقة التحضير:
يُغلى نبات المريمية غلياناً وافيا ثم يترك المغلي ليبرد، ثم يصفى، ثم يضاف القرنفل والشاي إلى المغلي مع التقليب ثم تضاف الحناء.
طريقة الاستعمال :يوضع هذا الخليط على الشعر وفروة الرأس ويبقى لمدة 30 دقيقة ثم يشطف بالماء العادي.
رضاؤكم هو هدفنا إتصلوا ان ولا تترددوا ولو حصلت ليكم حاجة على مسئوليتكم لأنه يجب عليكم قبل الإقدام على هذه التجربة سؤال مجرب وإستشارة طبيبكم الخاص. وتكرم
|
Post: #16
Title: Re: الزول دا...... شغــال في طــاحــونة؟
Author: سجيمان
Date: 09-12-2004, 00:43 AM
Parent: #15
الملا عمر
| Quote: رضاؤكم هو هدفنا إتصلوا ان ولا تترددو |
دي شغلة زول.....ليهو اقل شي عشرين سنة مشيب
|
Post: #17
Title: Re: الزول دا...... شغــال في طــاحــونة؟
Author: walid taha
Date: 09-12-2004, 00:54 AM
Parent: #1
سجيمان ازيك...
عمك كبير حلف انو شايف الهلال ومصر على كده ..
الناس: يا حاج فلان وينو الهلال هسه؟!
عمك: يهنداك يا جماعة ..يهنداك بأشر
فى النهاية لقوها شيبة فى رمشو..
لا هلال لا حاجة..
اها ده شنو؟
|
Post: #18
Title: Re: الزول دا...... شغــال في طــاحــونة؟
Author: سجيمان
Date: 09-12-2004, 05:42 AM
وليد طه
دي الاندراوا...الما تتداوا
|
|