Post: #1
Title: هيـــصة....و...زيـــطة....و...زمبريــــطة
Author: سجيمان
Date: 10-10-2004, 07:37 AM
الخرف.... مرحلة ..ختامية لحياة البني ادم...والخرف يعني زول يصوط النضم والفعل فوق تحت....حبوبتي التاية خرفت قبال تموت بخمستاشر سنة.... عجاف..... ضوقتنا فيها المراير...كانت في كامل قواها الجسدية....لكن مخرفة....وحوامة.... اليوم كلو الناس كايسة للتاية....الحوامة كوم والنسيان كوم......تنسى اي شي.... باللوال كان الفترة بين كل نسية ونسية طويله... عقبان في الايام اللخيرة.. بقت تنسى كل خمسة سواني.....
مرة جيت بالليل..وكنت ماني لبابة.....لقيت حبوتي التاية...تصلي في العشاء كانت ساجدة.... رقدت في عنقريب قصادا....وكل ما ارفع راسي..القاها ساجدة...يمكن ساعتين..علي الحالة دي...كوركت لي امي..... قلت لها الحقي امك...ماتت وهي ساجدة بين يدين الله....جات امي وكفتا علي ضهرا.... علا واشوف حبوبتي التاية وقفت فنتروب وكبرت ودايرة تصلي تاني..... علا امي حلفت عليها تاني ما تصلي كفاها...
برضو تاني يوم نفس الفلم..... لكن المرة دي كانت في وضعية الجلوس.. بين سجدتين وكانت نست تسوي شنو تاني؟...وانا برضو ما كنت لبابة....ساعتين حبوبتي التاية مصنقرة..وانا ارفع راسي والقاها مصنقرة....واتعجبت واتحيرت حبوبتي التاية دي اتعلمت "اليوقا" وين؟
ايامي العريس... يوم الحنة علي شقاوتي..حبوبتنا التاية قاعدة جنبي في عنقريب الحنة....وكل مرة تنسى الحاصل شنو...وتمسك اقرب زول تسعلو......لا اصبري يا دي...... الهيصة والزيطة والزمبريطة..دي شنو؟....البت تجاوبا تقولها....دا ما عرس سجيمان يا حبوبة؟...... كدي؟ اكنو الليلة هو عرسو؟.... سجيمان وينو ابارك لو.....البت تقول لها..تراهو جنبك..حبوبتي التاية تقبل علي وتشعبط فوقي وتشعلق في رقبتي....وتنسى انها مشعلقة في رقبتي...ويا الله ويا امين يفكفكوها من رقبتي...وبرضو تاني تاخد لها خنسا و تسعل... لا اصبري يا دي.... الهيصة والزيطة والزمبريطة ..دي شنو؟.. والبت تجاوبا......وحبوبتي التاية تشعبط وتشعلق في رقبتي ...وتنسى انها مشعلقة في رقبتي ونقعد نفكفك فيها....نان الحنة انا شوفت لها شي؟...الليل كلو حبوبتي التاية تسعل من الهيصة والزيطة والزمبريطة..وتشعلق في رقبتي ويفرتقوها........
جات مرة من السهلة.....المغرب...ووفنتروب قعدت في عنقريب..العنقريب كانت فيهو عقرب وهي تقعد فوق العقرب والعقرب قصرتا.....وتسرخ.... وتكورك العقرب قرصتني.....وقت الناس اتلمو....حبوبتي التاية تنسى العقرب قرصتا وين..؟!؟!؟!؟!؟...؟...مرة تقول لهم في راسي ومرة تقولهم في كراعي.....اهتدو لي فكرة في اعتقادي الشخصي انها جيدة.... اتنين من النسوان ملصو حبوبتي التاية... وعملو مسح لي جسما من فوق لي تحت....واحدة من الراس نازلا...والتانية من اصابع الكرعين صاعدا...وبالتناوب....وكل مرة واحدة تقولها هنا؟....وهي تقول لا....وماشات كل واحدة في اتجاها المحدد....لحدي ما تلاقن في النص....واحدة قالت هنا؟؟؟حبوبتي التاية...كوركت وقال لها اهااااااااااااتك.... بس هنا.....وحددو مكان قرصة العقرب بعد مسح دام التلات ساعات صادفته كثير من العقبات.....المصيبة انها كانت في اثناء المسح تنسى النسوان ديل بيسون في شنو...وتقبل عليهن وتنهرن.... يا بنوت هوووووووي بطلن المسخرة... كايسات لي شنو؟.......
ماتت حبوبتي التاية....قبل خمسة سنوات....لكن انا لي حسي ماني مطمن وخايف تكون نست انها ماتت
|
Post: #3
Title: Re: هيـــصة....و...زيـــطة....و...زمبريــــطة
Author: Dr. Moiz Bakhiet
Date: 10-10-2004, 11:13 AM
Parent: #2
الخرف والله عند حبوبتك..
ده ما case report عديل كده..
___________
سجيمان يا أخوي..
إنت عارف إنو الخرف ده مرض وراثي
وبنتقل عن طريق الحبوبة للحفيد؟
وبالذات لو أول حرف في إسم الولد الحفيد «عادل الصادق المكي»
وبدلعوه يقولولو «سجيمان»؟؟!
عارف ولا ماك عارف؟
|
Post: #4
Title: Re: هيـــصة....و...زيـــطة....و...زمبريــــطة
Author: خضر عطا المنان
Date: 10-10-2004, 12:13 PM
Parent: #3
قشيران :
غايتو أنا خرف حبوبتك دي ما بعرفو
لاكين وصيتي ليك وعشان يطمئن قلبك
حول مصير حبوبتك دي : بس تمشي هناك
عند أبو الهول وتسأل جدتك حتشبسوت
واللا عمك بعانخي مكان ماهو مدفون!!
دي وصية تاريخية مني .
خضر عطا المنان
|
Post: #9
Title: Re: هيـــصة....و...زيـــطة....و...زمبريــــطة
Author: سجيمان
Date: 10-11-2004, 08:16 AM
Parent: #4
خضر عطا المنان
Quote: وعشان يطمئن قلبك
حول مصير حبوبتك دي : بس تمشي هناك
عند أبو الهول وتسأل جدتك حتشبسوت
واللا عمك بعانخي مكان ماهو مدفون!! |
اوعى تقول لي لاقتك حايمة بهناااك؟
|
Post: #7
Title: Re: هيـــصة....و...زيـــطة....و...زمبريــــطة
Author: سجيمان
Date: 10-11-2004, 01:36 AM
Parent: #3
د.معز
| Quote: الخرف والله عند حبوبتك.. |
عليك الله يا بروف....من الله خلقك وفي حوامتك دي ابدا لاقاك جنس دا؟
|
Post: #5
Title: Re: هيـــصة....و...زيـــطة....و...زمبريــــطة
Author: abas
Date: 10-10-2004, 08:05 PM
Parent: #1
حبيبنا سجومي
انت ذاتك يا اخوي ربنا يصبر اولادك علي خرفك
تقعد تخرف ليهم كده علا يسوك نادي عديل كده
|
Post: #10
Title: Re: هيـــصة....و...زيـــطة....و...زمبريــــطة
Author: سجيمان
Date: 10-11-2004, 10:35 AM
Parent: #5
عباس
| Quote: انت ذاتك يا اخوي ربنا يصبر اولادك علي خرفك |
باقي لك انا بقعد لحدي ما اخرف؟
ما اظن
|
Post: #6
Title: Re: هيـــصة....و...زيـــطة....و...زمبريــــطة
Author: nasiradin
Date: 10-10-2004, 10:47 PM
Parent: #1
و الله يا حبيبنا سجيمان
انا بقيت شاكي انك انت زاااااااااااااااتك خرفته
غايتو انحنا منتظرين و الله يكضب الشينه
تحياتي ... ناصر البطل
|
Post: #8
Title: Re: هيـــصة....و...زيـــطة....و...زمبريــــطة
Author: شمهروش
Date: 10-11-2004, 02:21 AM
Parent: #6
سيجيمان ,,,, سعاااااااااااااال
حبوبتك كانت معانا في البورد دا؟؟
ولا شنوا؟؟؟
لانو نفس الحالة العانت منها حبوبتك
بيعانوا منها ناس كتاااااار..
في واحد من البورداب المرموقين جدا
نسا انو ســـــاقط في امتحان اللغة العربية
وفي مادة الرياضيات (بق زيروو)
واشتغل فينا اعراب
اضان حبوبتي بت الفكي طرشاء
وحبوباتكم قبلن وبراهن,,,, ماهن رايقات اظنهن كانن
|
Post: #12
Title: Re: هيـــصة....و...زيـــطة....و...زمبريــــطة
Author: سجيمان
Date: 10-12-2004, 01:10 AM
Parent: #8
شمهروش
Quote: لانو نفس الحالة العانت منها حبوبتك
بيعانوا منها ناس كتاااااار..
|
شايفهم....انت قايلني ما شايفهم؟
|
Post: #11
Title: Re: هيـــصة....و...زيـــطة....و...زمبريــــطة
Author: سجيمان
Date: 10-11-2004, 08:07 PM
Parent: #6
نصر الدين
| Quote: غايتو انحنا منتظرين |
منتظرين تقرصني عقرب؟
|
Post: #13
Title: Re: هيـــصة....و...زيـــطة....و...زمبريــــطة
Author: سجيمان
Date: 10-13-2004, 09:43 AM
Parent: #11
*
|
|