غـــز الكــــوع....و...فلهمـــة المُــدن

Post: #1
Title: غـــز الكــــوع....و...فلهمـــة المُــدن
Author: سجيمان
Date: 10-27-2004, 08:44 AM

سجيمان احسن زول يغُز كوعو.......على وجه البسيطة.... غز الكوع منتهى الفلهمة والقرضمة....ودائما لما ادور اتفلهم علي زول اقيف علي حيلي....واقدم كراع واخر التانية واغز كوعي.....وانداح فيهو.. لحدي ما يامنو ظاطو.....وما اديهو أي فرصة يفتح خشمو......واخليهو مندهش و مشرور وامشي اهلي....كان عندي اعتقاد انو غز الكوع نوع من الوسامة والاغراء للجنس الناعم....كنت ايام مغامراتي الغرامية اول ما اشوف واحدة جاية طوالي اقدم كراع واخر كراع واغز كوعي....واقعد ارمش واعاين لها...لكن في نوع من الجنس اللطيف لا لطيف ولا شيتين. يحدرني ويصر وشيهو ويقول لي المعولق دا....وللتاريخ وللامانة انا خلال فترة غرامياتي اتقال لي يا معولق متين تلاتة وخمسين مرة....اخر مرة كانت في عام1980... غزيت كوعي لي واحدة ورمشت عويناتي.... وما كان منها الا ان دنقرت ومسحت الواطا وكتبت لي عوااااااااااااااللللللللللليق كبيرة وواضحة وبالخط الكوفي... في النهاية عرفت انها كانت بكماء......
لي كمين يوم كدي..... قايمة علي فلهمة جديدة.... بقيت اكوس لي نضم الشعراء والادباء ....وافرتقو واطلع عيوبو كلها...... اصلا انا عندي حاسة شنافية واجنح الي شيل الحال من كنت صغير...... اصلو ما بقول لي زول انت شيتك دي سمحة.....اصلو.....وان في زول قال لي زول شيتك دي سمحة جنبي النيران تطلق فيني......واكجنهم الاتنين لمن يامنو ظاطو.. العندو الشي السمحة والقالو الشي دي سمحة..........
ان السغافة السودانية تمر بمنعطف خطير.....".يا قول ناس السياسة المالين البورد"...ولابد من منقذ لهذه السغافة......لقيت اني قدري قد كلفني بهذه المهمة الشاقة...... ان مسغفي النت....والدلوكة .....ودعاية مرقة جداد ماجي...هم خطر كبير ولابد من محاربتهم..........ناس يقعدو يشكرو في كواريك الزرازير....ويقولو لها شقشقة...وزغزغة...وما بعرفو شنو؟....كدي واحد فيهم يبقى صايم وراقد ومتغتي بملاية وراقد تحت نيمة وتجي زرازير تكوريك فوق راسو...وكل مرة تجيهو شي واقعة من فوق.... ان شكرا تاني لوموني....ولاّ يقعدو يدلعو في السُقدة ويقولو لها كيروان....السُقدة؟ السُقدة اللوم السوتو هين؟؟؟؟يوم موت الرسول اتكحلت واتمسحت واتمكيجت ومشت البِكا؟ دي دحين ب دلِعا؟.. وربنا جازاها قلب لها رومشا الكحلتن ديل شوك وكل ما تجي تغمد الشوك يطعنا وخلاها الليل كلو ماتغمد وتزوزي وتكورك......
اول زول بدا اللخبتة والسواطة حقت السغافة......المدعو ادريس جماع.... اكِنكم كدي عاينو لي بيت الشعر دا.....

قم يا طرير الشباب غني لنا...... غني

اكِنكم كدي شوفو كلمة "طرير".... هذه الكلمة الشتراء...... اكِنكم كدي اقسموها علي اتنين..... تبقى "طر".... و..."ير"........ امسكو القسم الاول"طر".....لنفرض جدلا انو في زول بيلقي في القصيدة دي وهو زول تمتام....وعلّق في كلمة "طر" دي....وقعد يسوي في ال"طر......طر.....طر....طر"........عليكم الله حسي دا نضم يقولوهو في مجتمع....ولاّ.... قدام رئيس الجمهورية ونائب رئيس الجمهورية والسادة الوزراء؟......يقيف واحد ويقعد يطرطر في وشيهم......باقي لكم بيمرق منها؟......

Post: #2
Title: Re: غـــز الكــــوع....و...فلهمـــة المُــدن
Author: Raja
Date: 10-27-2004, 09:52 AM
Parent: #1

سيجيمان العزيز..

ســلامات..

Quote: اول زول بدا اللخبتة والسواطة حقت السغافة......المدعو ادريس جماع....

يا ريت كل اللخباتين والسواطين زي إدريس جماع..

حالنا كان اتصلح..

قلت لي كم مرة قالو ليك يا: خطير..؟!!

Post: #3
Title: Re: غـــز الكــــوع....و...فلهمـــة المُــدن
Author: Esameldin Abdelrahman
Date: 10-27-2004, 10:23 AM
Parent: #2

الاخ سجيمان
Quote: "طر......طر.....طر....طر"........

في واحد مسطول قال لي واحد تمتام قول تراكتور ، اها التمتام قام علق في ترا........ترا...... ترا
المسطول زهج وقالو انا قلت ليك قول تراكتور ما قلت ليك دوروا.
ولو في واحد تمتام عايز يقول سجيمان ، سج ...سج ... سج ..... سج
دس مش شقشقة برضو ولا شنو ؟

Post: #4
Title: Re: طلع فى الكبوت ضربت ليهو بورى
Author: wadabdean
Date: 10-27-2004, 11:34 AM
Parent: #3

سيجمان .. ازيك وكده
على ذكر غز الكوع والبوع يقال انو فى واحد مطلش زيك كده قال يتفلهم ويغز كوعوا لاحلى بت فى الجامعة وهى متقرضمة وعاجباها روحا قدر ما حاول يلقا سكة معاها مافى سكة لا نفع غز الكوع ولا جر النور الطويل .. البت عندها عربية .. قام صاحبنا قبل ما تجى ركب فى الكبود القدام عشان بس تقول ليهو زح او انزل يا عواليق .. جات فتك فتك .. فتحت باب العربية ركبت ودورتها وقامت ضربت ليهو بورى عشان ينزل
قرقرقر
ودعابدين

Post: #8
Title: Re: طلع فى الكبوت ضربت ليهو بورى
Author: سجيمان
Date: 10-28-2004, 06:39 AM
Parent: #4

ود عابدين
Quote: فتحت باب العربية ركبت ودورتها وقامت ضربت ليهو بورى عشان ينزل

اوعى يكون العوير نزل؟؟؟؟؟؟؟؟

اسمع

وين رسائلك يا حليلا

Post: #6
Title: Re: غـــز الكــــوع....و...فلهمـــة المُــدن
Author: سجيمان
Date: 10-27-2004, 11:52 PM
Parent: #3

عصام الدين عبد الرحمن
Quote: دس مش شقشقة برضو ولا شنو ؟

دي سكسكة.... سكسكة العناقريب

Post: #5
Title: Re: غـــز الكــــوع....و...فلهمـــة المُــدن
Author: سجيمان
Date: 10-27-2004, 01:16 PM
Parent: #2

رجوية
Quote: قلت لي كم مرة قالو ليك يا: خطير..؟!!

متين اربعة وخمسين .. بي حقتك دي

Post: #7
Title: Re: غـــز الكــــوع....و...فلهمـــة المُــدن
Author: aboalkonfod
Date: 10-28-2004, 00:21 AM
Parent: #1

المطوفِش ...
قٌت لي شنو .. (أبعة وابعين) .. يا شقي
أها النقولك كمان:
استخرج معكوس (طرير) وأقسمو على إتنين !
تحصل على (ري) ... أها أجدعها لي (تمتام)
.. الله يرحمك يا خلف الله حمد !!

Post: #9
Title: Re: غـــز الكــــوع....و...فلهمـــة المُــدن
Author: mohamed osman bakry
Date: 10-28-2004, 06:47 AM
Parent: #7

Quote: سجيمان احسن زول يغُز كوعو

وبوعو كيف؟

Post: #10
Title: Re: غـــز الكــــوع....و...فلهمـــة المُــدن
Author: Dr. Moiz Bakhiet
Date: 10-28-2004, 05:27 PM
Parent: #9

Quote: ان السغافة السودانية تمر بمنعطف خطير

الغالي سي جي،

بل أكثر من ذلك والله..

إن المنعطف الخطير يمر «بسغافة» سودانية..

Post: #13
Title: Re: غـــز الكــــوع....و...فلهمـــة المُــدن
Author: سجيمان
Date: 10-29-2004, 08:50 PM
Parent: #10

د.معز
Quote: إن المنعطف الخطير يمر «بسغافة» سودانية..

نحن شنو حكايتنا مع المنعطفات دي؟

Post: #12
Title: Re: غـــز الكــــوع....و...فلهمـــة المُــدن
Author: سجيمان
Date: 10-29-2004, 10:59 AM
Parent: #9

محمد عثمان بكري
Quote:
وبوعو كيف؟

الله يقطعك.............

Post: #11
Title: Re: غـــز الكــــوع....و...فلهمـــة المُــدن
Author: سجيمان
Date: 10-29-2004, 07:54 AM
Parent: #7

ابو القنفد

يا مقنفّد
Quote: استخرج معكوس (طرير) وأقسمو على إتنين !

ما بتقبل القسمة

Post: #14
Title: Re: غـــز الكــــوع....و...فلهمـــة المُــدن
Author: سجيمان
Date: 10-30-2004, 11:54 AM
Parent: #11

فوووووووق

فلهمة...و....غز كوع

Post: #15
Title: Re: غـــز الكــــوع....و...فلهمـــة المُــدن
Author: محمد الامين احمد
Date: 10-30-2004, 12:42 PM
Parent: #1

Quote:
وما كان منها الا ان دنقرت ومسحت الواطا وكتبت لي عوااااااااااااااللللللللللليق كبيرة وواضحة وبالخط الكوفي... في النهاية عرفت انها كانت بكماء

بهبب بس

Post: #16
Title: Re: غـــز الكــــوع....و...فلهمـــة المُــدن
Author: سجيمان
Date: 10-30-2004, 11:01 PM
Parent: #15

محمد الامين احمد
Quote:

بهبب بس

نهبب لك وانت عريس يايابا

Post: #17
Title: Re: غـــز الكــــوع....و...فلهمـــة المُــدن
Author: سجيمان
Date: 11-01-2004, 05:43 AM
Parent: #16

يمكن يتلقي زول يهببو لنا