Post: #1
Title: المـا فيــها شــق.....ما بتقــول طـــق
Author: سجيمان
Date: 12-07-2004, 02:19 AM
Parent: #0
زول مجنن وابلّم....وتربالي.....والسقافة في الشرق وانا في الغرب.... مكجن السياسة والكورة والنطيط الاسمو الاوبرا....وخاصة لما يجي زول كلو حلاقيم ويفتح خشمو....ويقعد يكورك....والكورال برضو مكجنو....وباقي لي اصل الكلمة كوراك....وانقلبت الكاف لام لزوم الفلهمة....مكجن الكورة في القبل الاربعة....وشحدت الله يجي فكي ويقول الكورة حرااام....استغرب في زول يلعب كورة ويقيف قون......والله انا العب كورة ما اقيف قواني اصلو... نهارت باكر يقولو بيضها بيضها....ويسمو وليداتي ولاد البيضها...ومرتي تبقى مرت البيضها....ويسو محطة باظات جنب بيتنا ويسموها محطة البيضها...والكمساري يكورك البيضها..... في زول نازل؟...وان بقت في مرا نازلة علا تتبلم بي توبا حتين تنزل عشان ما يعرفوها.....وانا ان جيت ماشي بالشارع أي زول يقعد يعاين تحت بين كرعي ويتنسى متين ابيضها.......محنني حكم الكورة اكتر زول بيجري ويجارا في الميدان ومضطهد... المذيع مضطهدو ما بيقول اسمو علا وقت يدور يقول الحكم غلتان والجمهور برضو....نان هو يستاهل القالو اشتغل حكم منو؟...ما بيشوف في الولاد القاعدين يلعبو ديل ويجيبو في القينان.. القون بالشي الفلاني.. يا اخوانا دا حسي ماهيتو كم؟....تلقى حسي بعد جريهو دا ما لاقي ياكل.....
انا راجل زي وزي الرجال ..بريد النسوان..عديل كدي لا لف لا دوران.... الراجل الما بيريد النسوان يراجع نفسو؟..... والمرا الما بتريد الرجال؟ تراجع نفسها...الحياة كدي....
نضم السقافة ما بعرف لو....وان لقيت لي كلمة هنا في المنبر حقت سقافة واول مرة اسمع بها....اقيف قبل الكلمة دي واتمحن....زيييييييين.....واقفل الكمبيوتر اقول ادخل الكلمة دي في جملة مفيدة.... يقلبني...تب....كلمة"ينداح"....قدر ما سجيّت ولجيّت...ما قدرت....في النهاية غايتو الجملة المفيدة القدرت ادخل كلمة ينداح فيها هي" انداحت المرأة علي اختها عشان تباكيها في راجلها...وقعدن ينداحن لمن الله غفر لهن"....
قصدت في بوست استقبال زميلاتنا بالعجائز الناس القدام في المنبر..... مش القُدام بايولوجيا..... يعني القُدام قدم المكان و الزمان المنبري..يا قول المعتزلة....انا باقي معتزلي وخاصة في البتيخ اعرف البتيخة الحمرا من رقدتا في الواطا من غير ما المسها..... حتى كانو يوقلو لي اب بتيختن حمرا وشرارة.... دا ما عوضور.....وانا ما سويت شي اتعضر لو.. لكن عشان لو في واحدة شكّت في رقبتا ما ابقى مسعول منها لو قامت ركبت راسا ومشت تشد جلد وشيها....تقوم تمشي لي دكتور ماهو عارف شي..ويقعد يشد في الوشي ويشد لحدي ما كررررررر يشقو النص....ويجي يلم الشق عشان يخيتو تاني يقوم يشقو من ورا النص برضو....ولحدي ما يدخل نُقولتي فاهم وتفتيحة..ويقولو يا معلم خيّت الجلد واعمل لو عمود زي الجلابية..عشان ما يتفتق تاني....ويعمل العمود عمود بي ورا وعمود بي قدام....وتكون بت الحلال شايله لها وشي فيهو عمودين من ورا ومن قدام ...وشي جناح امجكو...وتقعد تجك في الحلة..والجكة دي لله.....
والسمحة المسرحا ضنب العتود
ام وشين مفصّل.. وشاقيهو عمود
والمافيها شق....ما بتقول طق
والبتقول طق قطع شك فيها شق
|
Post: #2
Title: Re: المـا فيــها شــق.....ما بتقــول طـــق
Author: ebrahim_ali
Date: 12-07-2004, 02:33 AM
Parent: #1
الدكتور سيجمان سلام واحترام بعدد اغاني ندى القلعة وغميت العيون في كل حفلة وربة
****************
المريخ امة وقوم وشعب وقبيلة واسرة ومجتمع والمريخ رجالا ونساء واطفالا وشيوخا والمريخ بيتا كبيرا وزعيما يقدمه أهله علي انفسهم واولادهم والمريخ جذور وشرايين ودماء حمراء تهب لون الانتماء المميز وتسري في القلوب حبا وعشقا لاينتهي
|
Post: #12
Title: Re: المـا فيــها شــق.....ما بتقــول طـــق
Author: سجيمان
Date: 12-07-2004, 07:24 AM
Parent: #2
ابراهيم علي
| Quote: المريخ امة وقوم وشعب وقبيلة واسرة ومجتمع والمريخ رجالا ونساء واطفالا وشيوخا والمريخ بيتا كبيرا وزعيما يقدمه أهله علي انفسهم واولادهم والمريخ جذور وشرايين ودماء حمراء تهب لون الانتماء المميز وتسري في القلوب حبا |
يا زول قول بسم الله.... حسي الجاب طاري المريخ منو؟
|
Post: #3
Title: Re: المـا فيــها شــق.....ما بتقــول طـــق
Author: abas
Date: 12-07-2004, 02:43 AM
Parent: #1
استغرب في زول يلعب كورة ويقيف قون
يعني يقيف شنو
انت بتشجع علي هدم اللعبه الحلوه
وانت انسان ما رياضي
يعني انت راس حربه نفهم من كلامك ده
اسي ابوبكر الشريف يومته صدي ضربتين جزاء يغننو لي جني الجني كل مشجع يختلو هديه تاني القون مالو ما زي هيثم طمبل
|
Post: #17
Title: Re: المـا فيــها شــق.....ما بتقــول طـــق
Author: سجيمان
Date: 12-08-2004, 01:45 AM
Parent: #3
عبس
| Quote: اسي ابوبكر الشريف يومته صدي ضربتين جزاء يغننو لي جني الجني |
بالله القواني دا اسمو ابوبكر..... هو نيجيري يا عباس
|
Post: #4
Title: Re: المـا فيــها شــق.....ما بتقــول طـــق
Author: ود الشيخ
Date: 12-07-2004, 02:47 AM
Parent: #1
أنا سمعت المثل بقول العود المافيه شق ما بقول طق
بعد قلت اندياح والله وقعت لي في جرح
ما بين رُؤْيتها في كفهِ كرةٌ
و بين رُؤْيتها قوراء كالقمر
إِلا بمقدار ما تنداح دائرةٌ
في صفحة الماء يُرمَى فيهِ بالحجرِ
خلاص انت يا سي جي ما تنداح شديد كده كويس
ود الشيخ
المُنداح بين روضات الشعر إندياحاً
|
Post: #20
Title: Re: المـا فيــها شــق.....ما بتقــول طـــق
Author: سجيمان
Date: 12-08-2004, 05:06 AM
Parent: #4
ود الشيخ
Quote: ما بين رُؤْيتها في كفهِ كرةٌ
و بين رُؤْيتها قوراء كالقمر
إِلا بمقدار ما تنداح دائرةٌ
في صفحة الماء يُرمَى فيهِ بالحجرِ |
اللقيماااااات؟؟؟؟؟
|
Post: #5
Title: Re: المـا فيــها شــق.....ما بتقــول طـــق
Author: أحمد الشايقي
Date: 12-07-2004, 02:53 AM
Parent: #1
((((((انا راجل زي وزي الرجال ..بريد النسوان..عديل كدي لا لف لا دوران.... الراجل الما بيريد النسوان يراجع نفسو؟..... والمرا الما بتريد الرجال؟ تراجع نفسها...الحياة كدي....)))))
الحمــد للـــه.
|
Post: #16
Title: Re: المـا فيــها شــق.....ما بتقــول طـــق
Author: سجيمان
Date: 12-07-2004, 10:08 AM
Parent: #5
احمد الشايقي
مبـــــروك
|
Post: #6
Title: Re: المـا فيــها شــق.....ما بتقــول طـــق
Author: شريف درار شريف
Date: 12-07-2004, 03:05 AM
Parent: #1
| Quote: انا باقي معتزلي وخاصة في البتيخ اعرف البتيخة الحمرا من رقدتا في الواطا من غير ما المسها. |
هيع..والله عزال العزل المو خمج من رقتدتها تعرفها....والله دي ما سبقك عليهازول
بعدين قول لي عزال في البتيخ بس ولا في حاجات تانية كمان...اصلو العزيل خشم بيوت.
|
Post: #22
Title: Re: المـا فيــها شــق.....ما بتقــول طـــق
Author: سجيمان
Date: 12-08-2004, 09:44 AM
Parent: #6
شريف درار شريف
| Quote: بعدين قول لي عزال في البتيخ بس ولا في حاجات تانية كمان. |
غايتو لو داير تعرس وداير تعزل عروس...تعال لي وانت مطاااااامن
|
Post: #7
Title: Re: المـا فيــها شــق.....ما بتقــول طـــق
Author: willeim andrea
Date: 12-07-2004, 03:17 AM
Parent: #1
غايتو حاولته بس غلبني ياربي اعمل شنو
|
Post: #23
Title: Re: المـا فيــها شــق.....ما بتقــول طـــق
Author: سجيمان
Date: 12-08-2004, 11:25 AM
Parent: #7
وليم اندريا
| Quote: غايتو حاولته بس غلبني ياربي اعمل شنو |
حاول تاني..... لكن ما تستعجل
|
Post: #8
Title: Re: المـا فيــها شــق.....ما بتقــول طـــق
Author: حمزاوي
Date: 12-07-2004, 03:19 AM
Parent: #1
والبتقول طق قطع شك فيها شق
أموت انا في الحصاحيصا
|
Post: #9
Title: Re: المـا فيــها شــق.....ما بتقــول طـــق
Author: خالد أحمد عمر
Date: 12-07-2004, 03:25 AM
Parent: #8
ويسو محطة باظات جنب بيتنا ويسموها محطة البيضها...والكمساري يكورك البيضها..... في زول نازل؟
البيضها دي تكون قبل الدايات مباشراً ولا رايك شنو يا سي جي
خالد
|
Post: #26
Title: Re: المـا فيــها شــق.....ما بتقــول طـــق
Author: سجيمان
Date: 12-09-2004, 10:50 AM
Parent: #9
خالد احمد عمر
| Quote: البيضها دي تكون قبل الدايات مباشراً ولا رايك شنو يا سي جي |
اقتراح ممتاز...وكمان ممكن يكونن محطتين..... بيضها قبل الدايات..وبيضها بعد الدايات
|
Post: #10
Title: Re: المـا فيــها شــق.....ما بتقــول طـــق
Author: جمال السنوسي
Date: 12-07-2004, 05:22 AM
Parent: #1
يا سجميان
فرزت الناس كيمان كيمان
كوم للرجال وكوم للنسوان
اها انت عديل كدي قلت بتريد النسوان
بس سؤالي هل النسوان بريدوك
انت راجل عنصري ومعادي للرجال
يعني لو انت نزلت انتخابات ما شايف نفسك محتاج لاصوات الرجال عشان تفوز
اها كان وقعت ليك في شكلة كبيرة والعكاكيز جاتك كع كرع فوق راسك ماك محتاج ليك لي رجال ينجدوك
اها بتنادي كيفن (يا ابو مروة) واللا (يا أم مروة)
اها كان جاك حرامي منو البيسكو معاك
اها كان داير تعقد لي بنياتك ديل ما دايرلك رجال في العقد
بعدين النسوان ديل غاليات ومكلفات
يمينا بالله لو جاك عيد وعايز تقدم هدايا للحريم علا تسرق ليك بنك عشان تكفي
الدهب بي كم والتوب بي كم واللبسة بي كم
لكن الرجال هداياهم بسيطة ورخيصة
العجايز طاقة دبلان جلاليب وعراريق
والشباب جلاليب ملونة بي شالة طقم مع الطاقية (بدل العمة) وكل واحدة ما بتفوت 8 دولار
بس بينك بينك كوم الحريم سمح بالحيل وخاصة لو كانن من بوردنا ده
وانا بقترح لي عضوات البورد السمحات يعمل ليهن تيم وانت تقيف قون
وتقبل للميدان بضهرك وتمسك اي زول يجي داخل ساكت
وكان سألوك مقبل بالعكس ليه في القون
قول ليهم في الكورة اسمو حارس مرمى
وانا هنا حارس كومي
لان كوم السماحة الجوة الميدان ده كومي انا
وكل زول بيحرس كومو
وانا حارس كومي
جمال
|
Post: #25
Title: Re: المـا فيــها شــق.....ما بتقــول طـــق
Author: سجيمان
Date: 12-09-2004, 06:10 AM
Parent: #10
جمال
Quote: سؤالي هل النسوان بريدوك
|
ان بي يريدوني ولا بي يكجننوني.....انا برضو بريدين......شفت اللُبط دي؟
|
Post: #11
Title: Re: المـا فيــها شــق.....ما بتقــول طـــق
Author: علي محمد علي
Date: 12-07-2004, 05:44 AM
Parent: #1
البتقول طق قطع شك فيها شق ، انت يا سجيمان مجكن الكورة والقمر اكتمل والنجوم غابت
|
Post: #13
Title: Re: المـا فيــها شــق.....ما بتقــول طـــق
Author: hamam
Date: 12-07-2004, 08:09 AM
Parent: #11
الأخ سجيمان:
تحياتي
بمناسبة الكورة و حارس المرمى ، قالوا في واحدة (الله أعلم بكلامك ده يمكن تكون قريبتك) قالوا المرة ما تكره شيء في الدنيا قدر كرها للكورة و ما عندها أي معلومات ، على حظها قام عرسا واحد هوايته الأساسية كورة. و هم في شهر العسل كانت في كورة مهمة طرفها الفريق البيشجعو العريس، قام ساق المرة و مشو الملعب. بدل ما تسكت و تتفرج!.. العروس قنبت تسأل في العريس ده شنو و داك منو ! لامن جات عند الحارس ! قالت ليه الزول داك واقف براه بعيد كدي ليه؟ قال ليها ده! ده أحسن حارس مرمى في البلد! انت عارفة ده سجلوه بكم؟ ده دافعين فيه 50 مليون و كل شهر بيدوهو الشي الفلاني إنت قايلة ده هين؟
ردت بسؤال ! 50 مليون!!!!!!! ليه بيعمل شنو؟
رد عليها: ده ما بيخلي كورة تمر و تخش قون الشبكة دي ما تتهزا أبداً.. حارس ممتاز خلاص
بعد تفكير طويل و تأمل العروس قالت للعريس:
هسع بالله الناس الغبيانين ديل لو جابوا ليهم ألف طوب أحمر و روري رمل و كيسين أسمنت و بنو ليهم حيطة في الحتة الواقف فيها أبو خمسين مليون ده ما كانوا وفروا قريشاتم ديل؟
غايتو ما عارف يا سجيمان ... بعد داك رجعوا البيت و لا رجعا بيت أهلها!!!
|
Post: #30
Title: Re: المـا فيــها شــق.....ما بتقــول طـــق
Author: سجيمان
Date: 12-10-2004, 07:15 AM
Parent: #13
hamam
| Quote: غايتو ما عارف يا سجيمان ... بعد داك رجعوا البيت و لا رجعا بيت أهلها!! |
والله نضمها صُح.....كان رجعها اهلاها يبقى اتلوم فيها..واتلوم في الكورة
|
Post: #27
Title: Re: المـا فيــها شــق.....ما بتقــول طـــق
Author: سجيمان
Date: 12-09-2004, 08:11 PM
Parent: #11
علي محمد علي
| Quote: انت يا سجيمان مجكن الكورة والقمر اكتمل والنجوم غابت |
الكورة مكجنا صُح....علا القمر دا يكجنوهو في شنو؟
|
Post: #14
Title: Re: المـا فيــها شــق.....ما بتقــول طـــق
Author: willeim andrea
Date: 12-07-2004, 08:40 AM
Parent: #1
غايتو يا جمال بالغته عديل اها نقول في كلامك ده شنو غايتو انا بقيت مروحه اقبل جاي واقبل جاي لكن برضو ما فهمته
|
Post: #31
Title: Re: المـا فيــها شــق.....ما بتقــول طـــق
Author: سجيمان
Date: 12-10-2004, 10:07 AM
Parent: #14
وليم اندريا
| Quote: غايتو يا جمال بالغته عديل اها نقول في كلامك ده شنو غايتو انا بقيت مروحه اقبل جاي واقبل جاي لكن برضو ما فهمته |
مالو فهمك الايام دي بقى تقيل؟
|
Post: #15
Title: Re: المـا فيــها شــق.....ما بتقــول طـــق
Author: Ehab Eltayeb
Date: 12-07-2004, 09:48 AM
Parent: #1
Quote: والمافيها شق....ما بتقول طق
والبتقول طق قطع شك فيها شق |
سجيمان:
لك الشكر علي هذا الاندياح
|
Post: #19
Title: Re: المـا فيــها شــق.....ما بتقــول طـــق
Author: aboalkonfod
Date: 12-08-2004, 04:23 AM
Parent: #15
|
Post: #33
Title: Re: المـا فيــها شــق.....ما بتقــول طـــق
Author: سجيمان
Date: 12-11-2004, 02:50 AM
Parent: #19
ابو القفند
مبروك
اتعلمت اللغة بسرعة.....وبقيت بتاع حركات وبركات كمان
|
Post: #32
Title: Re: المـا فيــها شــق.....ما بتقــول طـــق
Author: سجيمان
Date: 12-11-2004, 01:54 AM
Parent: #15
ايهاب الطيب
| Quote: لك الشكر علي هذا الاندياح |
اندياح انت..... انت قايلني ما بعرف كمان؟!
|
Post: #18
Title: Re: المـا فيــها شــق.....ما بتقــول طـــق
Author: المكاشفي الخضر الطاهر
Date: 12-08-2004, 04:15 AM
Parent: #1
عووووووووووووووووووووووووووووووووووككككك
|
Post: #34
Title: Re: المـا فيــها شــق.....ما بتقــول طـــق
Author: سجيمان
Date: 12-11-2004, 03:25 AM
Parent: #18
المكاشفي الخضر الطاهر
| Quote: عووووووووووووووووووووووووووووووووووككككك |
بركة الجمعتِ
|
Post: #21
Title: Re: المـا فيــها شــق.....ما بتقــول طـــق
Author: almulaomar
Date: 12-08-2004, 07:27 AM
Parent: #1
أخي الدكتور سجيمان سليط اللسان بليغ البيان سريع الطعان رهيب السنان إذا ما شتا.
والله ما بعرف الخلاني أقول الكلام الفوق ده شنو لكين أهو كل ما أقول التوبه يا قلبي يجي عنوان من عناوينك تقول بتغنيو ماجده الرومي على طول تووش أدخل والحمد لله لغاية الآن كل دخولي لمقالاتك ومساجلاتك مكسب كبير لي أنا وبرداً وسلاماً ، وسبب تعليقي هنا هو أنك راجل جندري تميل ميلاً بيناً إلى نصرة الرجال على نساء العالمين وخليني الليله يا دكتور سجيمان أفتوا وأطلع في الصفايح وأمرق الفضايح وأسمع الما سامع وبالضرورة أقوم يكون في مداخلتي هذه تأليب عليك من ناس المنبر والمنابر المجاورة والإنترنت والإنبتوين زاتو أول حاجه إنت لخباط وسواط زيك وزي أى خلاط براون أو مونليكس المثل يا سجيمان الذي أوردته عنواناً لمقالك هذا ما كدي أبداً ، سمع أضاني عن الزبير عن ود عوج الدرب عن ود الشديره عن أم رحيل بت أحمد أنها سمعت جدها لأبيها يقول أن عمه اللحمر ود جبل الحم – بضم الميم ضماً شديداً – حدثه أن جدهم أبو البتول سمع عمه العكام يقول أنه مومنين بت أحمد قد سمعت الشادلي ود الشيخ الطيب يقول في هذا الشأن:
ما في عود قال طق بلا شك ، ولم يثب عنه أن أورد المثل بطريقتك الهجومية تلك التي تحاكي طريقة تلاته خمسه إثنين. هذا بداية ثم ما شأنك وشأن الكوره ، ألم تسمع أخي بأنها اللعبة الشعبية الأولى في العالم وأنا يا كافي البلا ساكن الشعبية وقريت في مدارس شعبية وهسع سواق حافله في خط الشعبية وحتى النزلة العندي بتكون شعبية وأنها – كرة القدم - تدر ذهباً وأنه جنون بعينه أن يتقاتل إثنان وعشرون رجلاً ركضاً خلف كرة من جلد عتوت أو تيس أو بقرة حتى وأن الركض يستمر لمدة تجاوز الساعة ونصف الساعة في حالة وجود زمن إضافي وأن الحكام يتبعهم المساعدون من رجال الخطوط يؤشرون برايات معلنين حالات التسلل أو تلك المخالفات التي تحدث بعد أن يدير الحكم عنقرته في هجمة مرتده للفريق الآخر ، وأن الجمهور خلال تلك الفترة الزمنية الطويلة يكون قد إلتهم تسالي وقصب سكر وحرق الكثير من الجرائد والعمائم والتمباك وخرج يبحث عن حافله أو رقشة أو دفار للوصول إلى دياره والمغلوب طبعاً يبقن عليهو إثنين جوع وغلب حيث أن جل محلات الفول أصبحت تغلق الأبواب بعد إنتهاء المسلسل اليومي بربع ساعة تقريباً بالتوقيت المحلي.
في تركيب هذا الإندياح ونسبه إلى بيت البكا فأعترف امام الله الواحد الأحد إنك لمتمكن وعبقري وأن الأفكار تنداح عليك إندياحاًُ وأن هذه التركيبة الخطيرة تجعل منك دكتور سجيمان بطلاً لا من بطولات الفورميولا ون إنما من بطولات تلك المسلسلات التي يلبس فيها الممثلون عمائم مزركشة وملونة ويقولون لك بسبب وبدون سبب ثكلتك أمك ، ولمن يحنو عليك يقولو ليك ويحك يا هذا والله مرة يا سجيمان بتفرج على هكذا مسلسل الساعه النهر فيها الخليفة حقهم واحد من الجماعه وقال ليهو ويحك يا هذا لمن أنا بي بره نطيت وبصراحه دي حقاره والله يقول لي ويحك أقول ليه ليك براك.
أها أنا هسع قلت طق يا دكتور؟
|
Post: #28
Title: Re: المـا فيــها شــق.....ما بتقــول طـــق
Author: newbie
Date: 12-09-2004, 11:44 PM
Parent: #21
| Quote: والله انا العب كورة ما اقيف قواني اصلو |
عارفنك ,,,,, بتقيف ألف احمر
|
Post: #29
Title: Re: المـا فيــها شــق.....ما بتقــول طـــق
Author: المسافر
Date: 12-10-2004, 00:27 AM
Parent: #28
سجيم مان
الجماعة قالوا
كان اللمبة قالت بق
تبقى اللمبة دايرة الدق
اها يا سجيم
شقك دا أكان قال طق
يبقى داير شنو
اشرح ليك بالطباشيرة؟؟
المعطيات إذا كان كلمة من حرفين تعادل كلمة من حرفين:
بق = دق
المطلوب
طق = ؟
|
Post: #40
Title: Re: المـا فيــها شــق.....ما بتقــول طـــق
Author: سجيمان
Date: 12-11-2004, 12:52 PM
Parent: #29
المسافر
السؤال دا اجباري؟
|
Post: #38
Title: Re: المـا فيــها شــق.....ما بتقــول طـــق
Author: سجيمان
Date: 12-11-2004, 11:27 AM
Parent: #28
newbie
| Quote: عارفنك ,,,,, بتقيف ألف احمر |
دا كان زمان.....
حسي قاعد اقيف لمبة
|
Post: #35
Title: Re: المـا فيــها شــق.....ما بتقــول طـــق
Author: سجيمان
Date: 12-11-2004, 04:20 AM
Parent: #21
الملا عمر
| Quote: فيها الممثلون عمائم مزركشة وملونة ويقولون لك بسبب وبدون سبب ثكلتك أمك ، ولمن يحنو عليك يقولو ليك ويحك يا هذا |
ويحك....ويحك..ونص.....يا هذا
|
Post: #36
Title: Re: المـا فيــها شــق.....ما بتقــول طـــق
Author: almulaomar
Date: 12-11-2004, 06:17 AM
Parent: #1
أخي الدكتور سجيمان
عن السياسة فإن علاقتي بها أنها أى السياسة هي في الأصل من ساسه يسوس سياسة أو سوساً – ما سوس التمر – أها نحن أهلنا من زمان بنسوس الحمير والبقر والغنم ولا عند الجداد وطبعاً سياسة البقر والإبل نسميها سياسة اليد الطولي وسياسة الحمير هي سياسة دول العالم الثالث وكده أما سياسة النعاج والمعزة والتيوس في سياسة عدم الإنحياز وسياسة الجداد وما شابهه فهي سياسه داخلية وكده. والله لو تجيب لي حمار وحش إلا أسوسه ليك وأخليهو زيو وزي حمار عا قزاز ، وأوعك تقول لي الأمريكان والروديو والحركات إيها تركب ليك تور لمدة تلات دقائق أو دقيقيتين وما تقع ، نحن عند واحد إمتطى صهوة حمار جامح والحمار المسكين قدر ما فنجط ما عرف يرمي زولنا اللايوق ده أها قوم يالحمار من الغيظ أدخل بالراجل العنكبوت ده تحت شجرة شوك عسي ولعل إنو يقع وحاتك يا دكتور سجيمان الحمار إتشخبط بالشوك لمن دمو سال وزولنا الحبه دي ما جابتو أصلو ما عندو دم ، أها باين لك لو في كاميرات وقنوات فضائية ناس فوكس نيوز وإن بي إيه أو إن بي هناك ما كان زولنا ده جاب كأس الفروسية لركوب الحمير العربية الأصيلة بدون بردعه أو سرج.
وإنت قايل السياسة صعبه يا دكتور كل متطلبات هذه الصنعه أن تحاول ولا بلاش بكره يقولو ليك الملا ده أصلو من حزب الخضر أو جماعة الحمر من حمير طبعاً مش اللون
|
Post: #37
Title: Re: المـا فيــها شــق.....ما بتقــول طـــق
Author: المسافر
Date: 12-11-2004, 07:19 AM
Parent: #36
الملا عمر
بمناسبة الحمير ( لا مؤاخذة)
هناك قصة يقولو انو النميري أدخل مشتريات الحمير في ميزانية البنتاجون الأميركي
خاصة لما كان الأمريكان بدعمو الصراع بين الرئيس حسين حبري وجوكوني وداي في تشاد، وكانت الشاحنات بالسهولة كشفها بالأقمار الصناعية ويتم اكتشاف إمدادات الأسلحة للمتمردين التشاديين..
النميري اقترح ترحيل الأسلحة على الحمير ، ونجت الخطة ،، قاموا الأمريكان يشتروا في الحمير من الأسواق بالدولار فأرتفع سعر الحمير ( في السبعينات) وجنى الحلب ثروة خيالية من تجارة الحمير... وسكنوا العمارات..
|
Post: #39
Title: Re: المـا فيــها شــق.....ما بتقــول طـــق
Author: Emam Hassan
Date: 12-11-2004, 12:50 PM
Parent: #37
سجيمان..
والله أنا فترت أبدى كلامي في بستانك..أحم.. قصدي في بوستاتك ب:"الله يجازيك ياسجيمان".. لـكن:
إنت بتجيب الكلام ده من وين يا زول ؟؟؟؟
________________________________________________________________________________
ملحوظة: على ما أعتقد أن معظم القراء الكرام لم يفطنو لغرض أخونا سجيمان من البوست..
إذا أنا فهمت صاح.. ممكن البوست يقرأ كالتالي
http://الرشيّم اللخدر....ازاي اناالمكســر....في جِكــس المنبـر
ورد في آحد البوستات
Quote: لاحظت كما لاحظ غيري الاحتفاء الكبير من زملاء المنبر - الرجال - بزميلاتنا القادمات الجدد..
وبنظرة سريعة في البوستات ستعرفون ما اعني.. |
و تعليق أحد المتداخلين/ات
Quote: كلامك صاح... ويمكن يكون السبب نظرة ومفهوم سطحي جدا ويمكن يكون العكس نظرة
ومفهوم عميق جدا يعني من زاوية جندرية ... ويمكن أن نعرف ذلك من اساليب الترحيب المختلفة |
ويصبح التالي الرد -وليس المقصود المريخ آو البطيخ:
| Quote: زول مجنن وابلّم....وتربالي.....والسقافة في الشرق وانا في الغرب.... مكجن السياسة والكورة والنطيط الاسمو الاوبرا |
| Quote: انا راجل زي وزي الرجال ..بريد النسوان..عديل كدي لا لف لا دوران.... الراجل الما بيريد النسوان يراجع نفسو؟..... والمرا الما بتريد الرجال؟ تراجع نفسها...الحياة كدي.... |
| Quote: قصدت في بوست استقبال زميلاتنا بالعجائز الناس القدام في المنبر..... مش القُدام بايولوجيا..... يعني القُدام قدم المكان و الزمان المنبري..يا قول المعتزلة....انا باقي معتزلي وخاصة في البتيخ اعرف البتيخة الحمرا من رقدتا في الواطا من غير ما المسها |
|
|