Post: #1
Title: بوســـة على الهــواء..... العميـد وجك المويـــة
Author: سجيمان
Date: 12-19-2004, 01:21 AM
جورج قرداحي... العامل فيها سمح دا.... كمل ملاين ناس الام بي سي..... ومشى على قناة لبنانية واشتغل اجاويد..... وبقى يجيب اتنين متشاكلين ويقعد يحنس فيهم ويصالحهم....مرة شفتو جايب راجل ومرتو متشاكلين وخاتينو قرض....والرويجيل قدر ما وسط وحنس المرة حلفت وقالت تِف ما ترجع لو.... هي حردت البيت ومشت بيت اهلها...جا لجورج وجورج جابهم الاتنين وصالحهم مع بعض.... المرا قالت الراجل كان قاعد ينهرها وينهزرها..ويشتم اهلها..وبعد مرات قاعد يمد ايدو عليها....الجماعة اتصلحو علي الهواء مباشرة....يا خوانا جورجي دا حسي ان جاب ناس دارفور وناس الحكومة ما بيقدر يصالحهم؟....المهم الراجل والمرا اتصالحو...واتشعبطو في بعض وهاااااك يا بوس.... على الهواء.....قلت يا ربي حسي لو ديل سودانين بيقعدو يسوو في النضم دا قدام الناس....؟ الله اعلم...نحن شكلنا ومصالحتنا زي بعضن مافي اي فرق.. علا صرت الوشي...الزين قريبي صالحوهو مع مرتو وداير يسوقا علي البيت.... عاين لها وضحك وقال لها "امشي قدامي علي البيت..عاملا كريعاتك ديل"....حالتو قاعد يهظر معاها. الغريبة هي ضحكت واتبسطت من الغزل السمح دا...وباقي لي الزين وقت نضم في الكريعات ناوي علي شعبطة ناس جورج قرداحي اصلهم متشاكلين لهم شهر.....
وقت قسمو النضم الحلو نحن كنا مسجلين غياب.....يا ربي نحن مادبين اكتر من اللازم...ولاّ..معقدين فوق اللازم؟.....
حلقة معادة..... فيهاعميد الفنانين الفنان محمد الامين... يغني غنا سمح ويرجع يقعد وجنبو جك موية يتناولو ويصنقّع ويشرب....تلفزيون طويل وعريض ومافيهو كوز موية؟ يا اخوانا كيزان في السودان مافي... كملو...؟؟ وبرضو الناس يقولو الكيزان مالين البلد؟.......والله يا جماعة ماكم طالبني حليفة... حاجة عاجباني في الدنيا دي قدر سنون محمد الامين الجُداد مافي......شفتو الزول دا بقى سمح كيفن ؟صلاتي علي النبي........وكلوة وردي الجديدة برضو عاجباني ......وحاجة موجعاني وهارية كبدتي...قدر صلعة عصام محمد نور مافي... عصام غناااااااي...وحسو سمح....علا عيبو الوحيد... انو بيشبه عمك تنقو......
|
Post: #2
Title: Re: بوســـة على الهــواء..... العميـد وجك المويـــة
Author: ابو جهينة
Date: 12-19-2004, 01:31 AM
Parent: #1
سي جي
عاين لها وضحك وقال لها "امشي قدامي علي البيت..عاملا كريعاتك ديل"....
قاعد يكف العين يا دكتور
|
Post: #11
Title: Re: بوســـة على الهــواء..... العميـد وجك المويـــة
Author: سجيمان
Date: 12-19-2004, 03:35 AM
Parent: #2
ابو جهينة
| Quote: قاعد يكف العين يا دكتور |
يكف العين؟؟؟.......لكن اسمح حاجة فيها كريعاتا
|
Post: #3
Title: Re: بوســـة على الهــواء..... العميـد وجك المويـــة
Author: ود الشيخ
Date: 12-19-2004, 01:38 AM
Parent: #1
أبو جهينة العملاق
ازيك يا الحبيب
يا سجيمان هي كان الصلعة براها ما
كويس رأيك شنو في الدقينه والحنك
|
Post: #13
Title: Re: بوســـة على الهــواء..... العميـد وجك المويـــة
Author: سجيمان
Date: 12-19-2004, 04:57 AM
Parent: #3
ابو الشيخ
Quote: يا سجيمان هي كان الصلعة براها ما
كويس رأيك شنو في الدقينه والحنك |
انا مزعلاني الصلعة عشان هو صغير لسه وما بقى للصلعة..... لكن يحتسبها لله
|
Post: #4
Title: Re: بوســـة على الهــواء..... العميـد وجك المويـــة
Author: حمزاوي
Date: 12-19-2004, 01:43 AM
Parent: #1
قلت شنو يا سجيمان ودعم بله
يا اخوانا كيزان في السودان مافي... كملو...؟؟
دا نضم شنو يا زول
. . . .
انت مش قلت عندك نزله طيب نبوسك كيف ؟
|
Post: #17
Title: Re: بوســـة على الهــواء..... العميـد وجك المويـــة
Author: سجيمان
Date: 12-19-2004, 08:14 AM
Parent: #4
حمزاوي
هوووووي يا زول...... ما تشبكني ساكت
|
Post: #5
Title: Re: بوســـة على الهــواء..... العميـد وجك المويـــة
Author: مريم بنت الحسين
Date: 12-19-2004, 01:50 AM
Parent: #1
صباح الخير يا دكتور... يديك العافية ضحكتني من الصباح..
بنت الحسين
|
Post: #6
Title: Re: بوســـة على الهــواء..... العميـد وجك المويـــة
Author: خال فاطمة
Date: 12-19-2004, 01:57 AM
Parent: #5
| Quote: وباقي لي الزين وقت نضم في الكريعات ناوي علي شعبطة ناس جورج قرداحي اصلهم متشاكلين لهم شهر..... |
قلت لي الزين مهد للطريق بالكرعيين .. 
|
Post: #20
Title: Re: بوســـة على الهــواء..... العميـد وجك المويـــة
Author: سجيمان
Date: 12-19-2004, 12:37 PM
Parent: #6
خال فاطنة
| Quote: قلت لي الزين مهد للطريق بالكرعيين |
لا
لا
بالكريعاااااات
|
Post: #7
Title: Re: بوســـة على الهــواء..... العميـد وجك المويـــة
Author: محمد ابراهيم قرض
Date: 12-19-2004, 02:00 AM
Parent: #5
كتب سجيمان :
| Quote: مرة شفتو جايب راجل ومرتو متشاكلين وخاتينو قرض... |
حذرتك دشليون مرة يا سجيمان أنك ما تستخدم القرض أو مشتقاته
في نضمك العجيب ده ... أعملها تاني و تلقى صاروخ (قرض - جو) ناطي
ليك بالشباك و مفشفش فشافيفك يا سجيمان ...
|
Post: #8
Title: Re: بوســـة على الهــواء..... العميـد وجك المويـــة
Author: A.Razek Althalib
Date: 12-19-2004, 02:29 AM
Parent: #7
الأخ/ سجيمان
لك الود والتقدير
| Quote: يا خوانا جورجي دا حسي ان جاب ناس دارفور وناس الحكومة ما بيقدر يصالحهم؟.... |
بقدر ونص
قوم أعزموا لينا
عبدالرازق عيسى الطالب
|
Post: #10
Title: Re: بوســـة على الهــواء..... العميـد وجك المويـــة
Author: وليد محمد المبارك
Date: 12-19-2004, 03:02 AM
Parent: #8
سجيمان
والله انت فوضى
هاهاهاهاهاهاهاهاهاها
|
Post: #24
Title: Re: بوســـة على الهــواء..... العميـد وجك المويـــة
Author: سجيمان
Date: 12-20-2004, 10:18 AM
Parent: #10
وليد محمد المبارك
Quote: والله انت فوضى
هاهاهاهاهاهاهاهاهاها |
بعد دا كلو كمان بتضحك؟.....ما كفاية الشفتو منك شفتو منك والله اكتر من يبكي
كلام غريب !!!!!
|
Post: #23
Title: Re: بوســـة على الهــواء..... العميـد وجك المويـــة
Author: سجيمان
Date: 12-20-2004, 04:30 AM
Parent: #8
عبد الرزاق عيسي الطالب
Quote: بقدر ونص
قوم أعزموا لينا
|
يا زول.. والله جورجي دا غير الاحوال الشخصية ما بيعرف لي شي
|
Post: #22
Title: Re: بوســـة على الهــواء..... العميـد وجك المويـــة
Author: سجيمان
Date: 12-20-2004, 01:00 AM
Parent: #7
محمد ابراهيم قرض
Quote: حذرتك دشليون مرة يا سجيمان أنك ما تستخدم القرض أو مشتقاته
في نضمك العجيب ده ... |
يا اخوي القرض ثروة قومية...زيو وزي شوارع الزلط يحق لك مواطن استعمالو في اي وقت يشاء
|
Post: #19
Title: Re: بوســـة على الهــواء..... العميـد وجك المويـــة
Author: سجيمان
Date: 12-19-2004, 10:19 AM
Parent: #5
مريم بنت الحسين
| Quote: صباح الخير يا دكتور |
صباح النور..على البلور
|
Post: #9
Title: Re: بوســـة على الهــواء..... العميـد وجك المويـــة
Author: alfatih
Date: 12-19-2004, 02:42 AM
Parent: #1
سجيمان
الفنانين كركبوا وبقوا خًُرد خلاص
بس الظاهر قطع الغيار كترت فى السودان
وانشا الله يتصالحوا ويتباوسوا فى الضلام زاتو
بس ما يقدونا ...
صدر فى شهر صامولة
|
Post: #25
Title: Re: بوســـة على الهــواء..... العميـد وجك المويـــة
Author: سجيمان
Date: 12-20-2004, 11:27 AM
Parent: #9
الفاتح
| Quote: الفنانين كركبوا وبقوا خًُرد خلاص |
ايوا.....ومفروض لما يصلو سن معين يعتزلو الغنا...عشان يحافظو علي اصواتهم الجميلة الفي ازهان الناس
|
Post: #12
Title: Re: بوســـة على الهــواء..... العميـد وجك المويـــة
Author: المكاشفي الخضر الطاهر
Date: 12-19-2004, 03:37 AM
Parent: #1
اخوي الكبير سجيمان انت قبلت على ناس عصام محمد نور ومحمد الامين وخليت ناس ........................
|
Post: #27
Title: Re: بوســـة على الهــواء..... العميـد وجك المويـــة
Author: سجيمان
Date: 12-20-2004, 10:31 PM
Parent: #12
المكاشفي
| Quote: اخوي الكبير سجيمان انت قبلت على ناس عصام محمد نور ومحمد الامين وخليت ناس |
اخوي الصغير المكاشفي..... ديك ما خليتهم
|
Post: #14
Title: Re: بوســـة على الهــواء..... العميـد وجك المويـــة
Author: almulaomar
Date: 12-19-2004, 05:29 AM
Parent: #1
أخي الدكتور سجيمان
النجم الكبير جورج قرداحي إعلامي لامع زي صلعة هناي ، والبرنامج ده بالذات بذكرني مباريات المصارعة الحرة البجيبوها في التلفزيون واحد أضعف من بدر الدين شنا يدق ليك واحد طول بعرض أها دي يبلعوها كيف ، أها زولك ده أظن وظني دائماً إثم – نسأل الله العافية والمعافاة – بكون متفق مع الناس البجيبهم ديل وأنا فكرت أعمل فيهو مقلب وأقوم أشاكل أم أحمد ونركب أنا وهي ونسافر بيروت منها نتبرد في الحمامات الرومانية خلف شارع المصارف ونفطر في مطاعم الباتروس في عين المريسه بفندق قدموس – الله يسألني يا سجيمان الكلام ده صحيح ما تقول بضحك عليك أسأل أى واحد بعرف بيروت أصلي نا قريت في الإنجيلية وكمبوني – ونتغدي يا سيدي في مطاعم الشحرور – ودي ما المرة الشينة ديك الفتيتو ليها وشرشحتها شر شرشحة – ومطاعم الشحرور دي في منطقة الروشه ونحن برضو عندنا الروشه والدوشه إلا روشتنا روشة العدو ، زمان حبوبتي كانت بتقول لي أخوي الأكبر مني الجنا الأروش ده أرسلو لي برسيم يجيب لي قصب أب سبعين – ما علينا حبوبتنا ماتت والغنم ما حضروا جماعة حماية الحياة الفطرية وإنمائها وإنقرضن ولحقن ستهن – أها بعد داك نتعشي في مطعم سوشيمودو وده ما في طوكيو برضو في بيروت بعين التينه شارع فردان ، وبعد ما نملأ كروشنا نقوم نمشي التلفزيون ، لكين للأسف قدمت للتأشيرة قالوا لي – تقول بهم جب – شهادة إعفاء من الخدمة الإلزامية ورسوم الفضائية وزاد المجاهد والشنطة حقت شيلة الشهيد لازم سته سته طقم - وتأمين بأنني سوف أرجع البلد تاني وما أزوغ زي ناس العمره ، أها وكت صعبوها علي كدي يا سجيمان يا أخوي أكلتها في حناني وقلت لي أم أحمد وهي تغلي من الزعل ما بتتذكري لمن جيت أتقدم ليك وأطلب يدك كان بيتكم جالوص وباب بيتكم زنكي ، صرت لي وشها وقالت لي أها كان باب بيتنا لونو شنو ؟ قلت ليها هو في زنكي عندو لون. طوالي الحاجه عملت فاصوليا ورجعت المياه لمجاريها.
|
Post: #30
Title: Re: بوســـة على الهــواء..... العميـد وجك المويـــة
Author: سجيمان
Date: 12-21-2004, 02:05 AM
Parent: #14
الملا عمر
Quote: طوالي الحاجه عملت فاصوليا ورجعت المياه لمجاريها.
|
فاصوليا؟.......
|
Post: #47
Title: Re: بوســـة على الهــواء..... العميـد وجك المويـــة
Author: almulaomar
Date: 12-22-2004, 11:21 PM
Parent: #30
عملت نايمه
عملت شاي
عملت فاصوليا
عامله فيها خمسه بي قرش
وعامل فيها عنتر إلخ.. سك العمله
من فصل يفصل فصلا بايخاً وهو فاصل وهي فاصله والفاصوليا بكلام الرندوق ولغة الشماشة تعني لمن تكون مبوز ويحنسو فيك وفي النهاية تظهر عليك إبتسامة الرضا الما بتندسه مهما حاولت التمثيل في ذلك ، أها برضو الفاصوليا من البقوليات وهي طعامنا طوال العام وحتى في شم النسيم بنشم فاصوليا.
لك العدس والفول والبازلاء والتحيات النواضر
|
Post: #59
Title: Re: بوســـة على الهــواء..... العميـد وجك المويـــة
Author: سجيمان
Date: 12-27-2004, 09:35 AM
Parent: #47
الملا عمر
| Quote: لك العدس والفول والبازلاء والتحيات النواضر |
لك البامية والملوخية والرجلة والتحيات المفروكة
|
Post: #15
Title: Re: بوســـة على الهــواء..... العميـد وجك المويـــة
Author: willeim andrea
Date: 12-19-2004, 06:21 AM
Parent: #1
وحاجة موجعاني وهارية كبدتي...قدر صلعة عصام محمد نور مافي... عصام غناااااااي...وحسو سمح....علا عيبو الوحيد... انو بيشبه عمك تنقو......
صبرك كان ما شكيتك لشرحبيل شن جاب لي جاب
|
Post: #31
Title: Re: بوســـة على الهــواء..... العميـد وجك المويـــة
Author: سجيمان
Date: 12-21-2004, 04:00 AM
Parent: #15
وليم اندريا
| Quote: صبرك كان ما شكيتك لشرحبيل شن جاب لي جاب |
عاين دا...
ان شاء الله تشتكيني للبلابل زاتووو
|
Post: #16
Title: Re: بوســـة على الهــواء..... العميـد وجك المويـــة
Author: nagla abshar
Date: 12-19-2004, 06:49 AM
Parent: #1
اهلا يا سجيمان
جورج قرداحى مش يصالح ناس دارفور وبس
وبعدين حكاية البوس العلى الهواء دى انت قايل ناسنا هنا ما بعملوهانحنا ذاتنا بقينا زيهم.
ما عاجبك كمان شعر محمد وردى البقى مسبسب
|
Post: #18
Title: Re: بوســـة على الهــواء..... العميـد وجك المويـــة
Author: Dr. Moiz Bakhiet
Date: 12-19-2004, 08:26 AM
Parent: #16
| Quote: عاين لها وضحك وقال لها "امشي قدامي علي البيت..عاملا كريعاتك ديل".... |
حبيبنا الغالي سجيمان،
ممكن سؤال؟
الشافع في السودان لما يتدّشى بدون مؤاخذة
بقولو اتكرّع..
في علاقة بين اتكرّع دي والكريعات
|
Post: #34
Title: Re: بوســـة على الهــواء..... العميـد وجك المويـــة
Author: سجيمان
Date: 12-21-2004, 09:44 AM
Parent: #18
د.معز
| Quote: في علاقة بين اتكرّع دي والكريعات |
والله قدر ما كست لي العلاقة ما لقيتا
يكون يا ربي عشان الشافع لما يدشا بيرفس بي كريعاتو؟
|
Post: #33
Title: Re: بوســـة على الهــواء..... العميـد وجك المويـــة
Author: سجيمان
Date: 12-21-2004, 06:52 AM
Parent: #16
نجلا ابشر
| Quote: ما عاجبك كمان شعر محمد وردى البقى مسبسب |
انتي عارفه الزول كل ما يكبر شعرو قاعد يتقلب سبيبي......حسي انا ماشاء الله شعري بقى سبيبي
|
Post: #21
Title: Re: بوســـة على الهــواء..... العميـد وجك المويـــة
Author: ابو مهند
Date: 12-19-2004, 03:45 PM
Parent: #1
| Quote: وقت قسمو النضم الحلو نحن كنا مسجلين غياب.....يا ربي نحن مادبين اكتر من اللازم...ولاّ..معقدين فوق اللازم؟..... |
ياسيجيمان دي قوية دي لكن حلوة,,وداير اهترش معاك في موضوع الوزوج والزوجة السودانينيين,
عندنا واحدة قريبتنا متزوجه واحده مستعجل السنه كلها ياخي ده من عجلتو مرة حرد صلاة المغرب في رمضان عشان الامام صلى بي صورة طويلة شوة وبعد قال للامام كدي عيب لي الاخلاص والكوثر,,,المهم يوم طالعين والمدام تبعو في زيارة عائلية وكالعاده هي وراهو بي كيلو كده لما وصلوا المحطه كان البص عايز يتحرك هوركب بالباب الامامي وهي باخر نفس بالباب الخلفي بعدين جاها الكمساري يطقطق قالت ليهو مع الراجل اللابس جلابية عمه قدام,الكمساري فتش مالقى الوصف لما نزلو الكمساري جائها تاني ولقى الراجل المعاها لابس بنطلون قال ليها انتي راجلك ماعارفاهو لابس شنو,,,ردت وقالت للكمساري هو انا من استعجالو بعرفو لابس شنو...
ولي قدام
|
Post: #26
Title: Re: بوســـة على الهــواء..... العميـد وجك المويـــة
Author: saif massad ali
Date: 12-20-2004, 11:45 AM
Parent: #21
يا سجمان ازيك يا سمح
عارف اول يوم لي مع زوجتي كنت قاعد في الكمبيوتر لي تكسع علي اقوم ادخل عليها في الغرفة لقيت الزولة بتلبس ,عارف عملت شنو , قفلت الباب وقمت جاري راجع لي الكمبيوتر وبقول ليها انا اسف
اضحك دي تربية دي ولاي تقفيلة
|
Post: #42
Title: Re: بوســـة على الهــواء..... العميـد وجك المويـــة
Author: سجيمان
Date: 12-22-2004, 07:07 AM
Parent: #26
سيف مساعد
| Quote: اضحك دي تربية دي ولاي تقفيلة |
ما انت براك يا اخوي..... الله يدينا العافية بس
|
Post: #36
Title: Re: بوســـة على الهــواء..... العميـد وجك المويـــة
Author: سجيمان
Date: 12-21-2004, 11:59 AM
Parent: #21
ابومهند
| Quote: مرة حرد صلاة المغرب في رمضان عشان الامام صلى بي صورة طويلة شوة |
ههههههههه
والله دا لو جا صلى في الحرم في رمضان....علا يحرد الاسلام كلو
| Quote: هو انا من استعجالو بعرفو لابس شنو... |
اوعى يكون قاعد يلبس في الشارع وهو ماشي علي الباص؟؟؟
|
Post: #28
Title: Re: بوســـة على الهــواء..... العميـد وجك المويـــة
Author: فريد ودالمسيد
Date: 12-21-2004, 00:35 AM
Parent: #1
الغالي سجيمان
الأديتنا الأمان
تعرف أنا بدخل البورد دا وبكون بفتش فيك كده زي الطالبك قروش..
وبالمناسبة دي واحد قالوا طالب لي واحد قروش مشى ليهو لقاهو بصلي
حرسو لحدي ما خلص صلاتو لكن صاحبنا قام تاني وقال نويت أن أصلي
مائة ركعة لله (نظام زوغان)تعرف لو واحد لايوق كان قام وصلى معاهو.....
نشوف موضوع جوج والتحنيس وقمستنا التعيسة في الكلام الحلو
والحنيةقالوا واحد سوداني ماشي في الحديقة لقي لبناني وزوجتو
قاعدين والحبووالغزل والكلام الحلو عوووووك ماإديك الدرب
وصاحبنا عجبتو الشغلانة قال يرجع البيت ويسمع التاية دي كلمتين
حلوين ويشوف رد الفعل شنو ممكن تحن عليهو الليلة وتخت ليهو
العشا بدري وصاحبنا جايي داخل على التاية ويعصر على لسانو
الما متعود على الكلام ده ويقول ليها والله إنتي زي القمر
تتخيلوا التاية تقوم مخلوعة كدة وتقول ليهو سجم خشمي
يا راجل الليلة ماك براك يا أبو الطيب مالك ميرود ولا شنو..؟
|
Post: #29
Title: Re: بوســـة على الهــواء..... العميـد وجك المويـــة
Author: benyya
Date: 12-21-2004, 00:53 AM
Parent: #28
سيجمان
قرداحي بكون خائف
من البقول
البخش بين البصله وقشرتها ما بشم الا عفنتها
لى قدام
|
Post: #41
Title: Re: بوســـة على الهــواء..... العميـد وجك المويـــة
Author: سجيمان
Date: 12-22-2004, 05:23 AM
Parent: #29
بنية
Quote: البخش بين البصله وقشرتها ما بشم الا عفنتها
|
البصلة منو.....والقشرة.....منو؟..حدددي
|
Post: #37
Title: Re: بوســـة على الهــواء..... العميـد وجك المويـــة
Author: سجيمان
Date: 12-22-2004, 01:42 AM
Parent: #28
ود المسيد
حبابك مليون
| Quote: يا راجل الليلة ماك براك يا أبو الطيب مالك ميرود ولا شنو..؟ |
ليها حق والله......نحن ناس كعبين ونضمنا مُر وما بنعرف ننضم مع النسوان
|
Post: #32
Title: Re: بوســـة على الهــواء..... العميـد وجك المويـــة
Author: الزنجي
Date: 12-21-2004, 04:05 AM
Parent: #1
انا من عندى وقدر قدرتي بقدم هدية كبابي موية لتلفزيون السودان
الا بس يا سجيمان يا اخوى النخيس فى تلفزيون السودان مو عيب عليك
|
Post: #38
Title: Re: بوســـة على الهــواء..... العميـد وجك المويـــة
Author: سجيمان
Date: 12-22-2004, 03:37 AM
Parent: #32
الزنجي
ازيك
Quote: انا من عندى وقدر قدرتي بقدم هدية كبابي موية لتلفزيون السودان
الا بس يا سجيمان يا اخوى النخيس فى تلفزيون السودان مو عيب عليك |
النضم دا كان في تلفزيون النيل الازرق
|
Post: #35
Title: Re: بوســـة على الهــواء..... العميـد وجك المويـــة
Author: صديق الموج
Date: 12-21-2004, 09:58 AM
Parent: #1
دخيل عينك بطل ار فى ارداحى...لكن يا سجيمان ... الله يادرك ...على المذيعين تبعك
هدولك ...ليش عمتحكى عن جورج ارداحى ورفاتو جالك العما...
|
Post: #44
Title: Re: بوســـة على الهــواء..... العميـد وجك المويـــة
Author: سجيمان
Date: 12-22-2004, 09:16 AM
Parent: #35
صديق الموج
| Quote: ليش عمتحكى عن جورج ارداحى ورفاتو جالك العما... |
والله يا صديق....غايظاني سماحتو دي
|
Post: #39
Title: Re: بوســـة على الهــواء..... العميـد وجك المويـــة
Author: الزنجي
Date: 12-22-2004, 03:42 AM
Parent: #1
العتب على النظر
|
Post: #40
Title: Re: بوســـة على الهــواء..... العميـد وجك المويـــة
Author: Mahmoud Mustafa Mahmoud
Date: 12-22-2004, 04:32 AM
Parent: #1
سجيمان الظريف والناس الظراف الهنا... وخاصة كدي د. معز
وووييييييي... لقيت ليكم العلاقة بين "التكرع" و "الكريعات".... لكن ما حا أقولها ليكم... كدي ساااااااااكت كية في سجيمان..
بالمناسبة زماااااااااان كان عندنا في الحلة زول لذيذ خلاص... كان جنه مريسة... فكان طوالي بيدخل الحلة كدي مع المغيرب ونحن نكون جايين من التمرين..ولما يقوم كدي ويقول ليك : هاااااااااااع ويتكرع.. كان يحمد الله بصوت عالي جداً...على هذه (الشبعة).... ونحن نضحك بين حاسد وبغران ومستغرب ... إيييييييييييييك... زمن
|
Post: #45
Title: Re: بوســـة على الهــواء..... العميـد وجك المويـــة
Author: سجيمان
Date: 12-22-2004, 10:26 AM
Parent: #40
محمود مصطفى محمود
يا ظريف
Quote: وووييييييي... لقيت ليكم العلاقة بين "التكرع" و "الكريعات".... لكن ما حا أقولها ليكم... كدي ساااااااااكت كية في سجيمان..
|
انت كدا بتكاوي د.معز.......لانو هو السعل
|
Post: #43
Title: Re: بوســـة على الهــواء..... العميـد وجك المويـــة
Author: bushra suleiman
Date: 12-22-2004, 07:57 AM
Parent: #1
تعرف يا سى جى عصام ده احسن يعمل ليهو كركاسه لى راسو
|
Post: #46
Title: Re: بوســـة على الهــواء..... العميـد وجك المويـــة
Author: سجيمان
Date: 12-22-2004, 11:24 AM
Parent: #43
بشرى
حبابك وجيدن جيت
| Quote: تعرف يا سى جى عصام ده احسن يعمل ليهو كركاسه لى راسو |
بتنفع لكن؟؟؟؟..... المهم يبقى سمح..... والله غناهو سمح وهو غناااااي....علا لكن السماحة مو بالليد
|
Post: #48
Title: Re: بوســـة على الهــواء..... العميـد وجك المويـــة
Author: ود شندي
Date: 12-23-2004, 00:35 AM
Parent: #46
سي جي مان
سلامات انت ما سمعت الخبر الراجل بدور يقبي ماذون القنوات
راجع الماسنجر
|
Post: #49
Title: Re: بوســـة على الهــواء..... العميـد وجك المويـــة
Author: سجيمان
Date: 12-23-2004, 03:49 AM
Parent: #48
ود شندي
سلامات
راجعتو.........
راجع انت
|
Post: #50
Title: Re: بوســـة على الهــواء..... العميـد وجك المويـــة
Author: ayooby
Date: 12-23-2004, 11:05 AM
Parent: #49
سجيمان ياخوى عندى ليك اقتراح !!!!! رايك شنو اتوسط ليك مع قرداحى صاحبى يستضيفك انت وندى القلعة عشان يحل ليك مشاكلك المحرقة روحك دى وبعد يصالحكم وفى نهاية البرنامج اعملو فيها انكم ما سودانيين ..... رأأأأأأيك شنووووووووووووو ؟
|
Post: #51
Title: Re: بوســـة على الهــواء..... العميـد وجك المويـــة
Author: سجيمان
Date: 12-23-2004, 11:21 AM
Parent: #50
ايوبي
| Quote: وفى نهاية البرنامج اعملو فيها انكم ما سودانيين ..... رأأأأأأيك شنووووووووووووو ؟ |
اقتراح في السلك
|
Post: #52
Title: Re: بوســـة على الهــواء..... العميـد وجك المويـــة
Author: سجيمان
Date: 12-24-2004, 05:53 AM
Parent: #51
بس كدي
|
Post: #53
Title: Re: بوســـة على الهــواء..... العميـد وجك المويـــة
Author: Rama
Date: 12-24-2004, 07:25 AM
Parent: #52
Quote:
والله يا جماعة ماكم طالبني حليفة... حاجة عاجباني في الدنيا دي قدر سنون محمد الامين الجُداد مافي......شفتو الزول دا بقى سمح كيفن ؟صلاتي علي النبي........وكلوة وردي الجديدة برضو عاجباني ......وحاجة موجعاني وهارية كبدتي...قدر صلعة عصام محمد نور مافي... عصام غناااااااي...وحسو سمح....علا عيبو الوحيد... انو بيشبه عمك تنقو...... |
انت يا سجم الرماد ما بتتوب
الجماعة ديل ما قالوا ليك ما تتكلم فيهم من عمك المشيب داك
عاد الله يديك العافية
|
Post: #54
Title: Re: بوســـة على الهــواء..... العميـد وجك المويـــة
Author: سجيمان
Date: 12-24-2004, 08:57 AM
Parent: #53
راما
Quote: الجماعة ديل ما قالوا ليك ما تتكلم فيهم من عمك المشيب داك
|
انا حسي نضمت فيهم نضمن سمح!!!!!
|
Post: #55
Title: Re: بوســـة على الهــواء..... العميـد وجك المويـــة
Author: نادية عثمان
Date: 12-24-2004, 06:01 PM
Parent: #54
شو ياسيجو حبيبنا
ليه مابتجى اندينا ؟
والله ليك وحشة كبيرة يارجال .. هيك ياسجيمان مابتراعى كم الاشواق ؟
والله ماكان العشم فيك يالذيذ يارايق ....سفن اب !!
البرفع بوستى سيجو ..برفع ليهو بوستيهو ..والمابرفع بوستى سيجو بغطس حجر بوستيهو ..
بث!!
|
Post: #56
Title: Re: بوســـة على الهــواء..... العميـد وجك المويـــة
Author: ود شندي
Date: 12-24-2004, 11:53 PM
Parent: #55
C .G.Me
سلامات
الصمد يحيكمن ال إل بي سي ويطلب مساعتك؟؟
|
Post: #58
Title: Re: بوســـة على الهــواء..... العميـد وجك المويـــة
Author: سجيمان
Date: 12-25-2004, 03:07 AM
Parent: #56
ود شندي
| Quote: الصمد يحيكمن ال إل بي سي ويطلب مساعتك؟؟ |
يا زول الصمد نجيض...ما بيحتاج لي مساعدتي
|
Post: #57
Title: Re: بوســـة على الهــواء..... العميـد وجك المويـــة
Author: سجيمان
Date: 12-25-2004, 01:47 AM
Parent: #55
الفاتنة نادية
| Quote: البرفع بوستى سيجو ..برفع ليهو بوستيهو ..والمابرفع بوستى سيجو بغطس حجر بوستيهو |
ابشري...... انا جاهز لرفع بوستاتك في اي وقت
|
|