قـد آن وقت الفيــاغــرا....فاشتدي زيـــّم

Post: #1
Title: قـد آن وقت الفيــاغــرا....فاشتدي زيـــّم
Author: سجيمان
Date: 10-31-2004, 08:56 AM

زي العادة.... بعد المغرب بقعد اتفرج علي التلفزيون....وعلي الديش.... من عامني عندي رسيفر ديجيتال....وعاجبني...الاسبوع الفات جبت كباية الشاي وكوعت وقابلت الدَش...وفتحت قناة القشيرة...ولقيت برنامج اسمو للنساء فقط.....وقلت اقعد اسمع نضمن شوية..... حتين امشي بكان تاني...كانن ينضمن سمح في سن اليأس عند المرأة....ونضمن شدة ماهو نجيض....وعديل..... قومن كدي بلا بسم الله قبلن علي الرجال وقولن عندهم سن يأس... اريت ربي يمسخ عليكن حياة الدنيا كان مسختن علي كبيبية الشاي دي.....قعدن يوصفن وانا اجغم في الشاي داك زي القرض.....قالن.. اولك بالتبادي سن اليأس عند الراجل تبدأ من سن الخمسة وتلاتين.....ان شاء الله خمسة وتلاتين سلمية بينات فرقات اضنيكن ديل....وبعدين من اعراض سن اليأس....وجع الضهر....القلق..... النوم المتقطع....وضمور العضلات ومحلهن يبقى شحم.....يعني الراجل يسمن....
يا حليلي انا.....لي سنة كدي قامن لي جضيمات وكريشة...وشدة ماني فرحان... بالكريشة...ومتكيّف..بعد مرات اقيف في نص البرندة واقعد ادق فيها زي الدلوكة واغني من فريع البان....اتاريهو مو سُمُن...اتاريني داير اقطع...وماني عارف.....يومن اسود الشفت فيهو الحلقة دي.....قالن دا كلو من انو التيستيستيرون بينقص....وكل مالو ماشي ناقص سنة ورا سنة لمن يعلم الله....التيستيستيرون دا الهرمون المسعول من الفحولة... يسعلكن نكير بركة سيدي الحسن........
الخواجات ديل كلو شي عرفو لها... مالو يا اخوانا تستيستيرون الجن دا ..داير يغلبون؟.....جات النشرة وشفت بوش ونضم النسوان ديك في راسي....والله ضحكت ضحك.... قلت في سري حسي بوش دا يكون باقي لو نقيطة واااااحدة اللت تيستيستيرون...وفي حوامتو دي لي بعد الانتخابات.....تكمل عليهو فوق الدرب و يقعد اباطو والنجم.....
انا قبيل مالي ومال القناة الشوم دي..قناة السودان مالا؟.... ناس طيبين....وداير يكتلهم شوق للرسول...ينضمو وينضمو....ووقت ما يلقو شي يقعدو يمدحو... بس ان كمل تستيستيرون الدنيا دي كلها ما بيهمهم
التصبح علي الواطا بس...من دغش الرحمن وامشي المستبشي.. اول شي اقيس السجم دا التستيستيرون....وتاني شي اشوف لي دكتورن فااااااالح...واقع لو فوق راسو...وارقد لو في الواطا دي....واقولو تفتشني حتة حتة...وايك يا بكان قاعد يهرب ولاّ يكب ولاّ ينقط منو تستيستيرون تقفلو......والله ما عندنا تيستيستيرونن فايق للمحقة....

Post: #2
Title: Re: قـد آن وقت الفيــاغــرا....فاشتدي زيـــّم
Author: يازولyazoalيازول
Date: 10-31-2004, 11:12 AM
Parent: #1

انت يا سجيمان القاعد تقطع طوالى ، يادوب عرفت انك قطعت؟؟؟؟

لكن شنو ظاهرة الرجال الكبار القاعدين يعرسوا فى البنات الصغار فى الخرطوم دى كيف؟؟؟ وكت هم قاطعين الشلاقة ليهم شنو؟؟؟؟

Post: #5
Title: Re: قـد آن وقت الفيــاغــرا....فاشتدي زيـــّم
Author: سجيمان
Date: 10-31-2004, 05:03 PM
Parent: #2

يا زول يا زول
حمد الله على السلامة
المنبر نور
Quote: وكت هم قاطعين الشلاقة ليهم شنو؟؟؟؟

يكون خبرو لهم ممباصرة للتستستيرون دا

Post: #3
Title: Re: قـد آن وقت الفيــاغــرا....فاشتدي زيـــّم
Author: Dr. Moiz Bakhiet
Date: 10-31-2004, 11:53 AM
Parent: #1

سجيمان
اتصل
عندي ليك الحل الناجع
بدل ما تشيل حالك قدام ندى القلعة كدا

(قالو بتدخل البورد غومتّي)

Post: #4
Title: Re: قـد آن وقت الفيــاغــرا....فاشتدي زيـــّم
Author: السفير
Date: 10-31-2004, 12:36 PM
Parent: #3

والله ديل شغالين بى جاز المصاااااااااااافى يازول
وكتره قروش مغلباهم

لكم التحيه

Post: #6
Title: Re: قـد آن وقت الفيــاغــرا....فاشتدي زيـــّم
Author: حبيب نورة
Date: 10-31-2004, 05:12 PM
Parent: #4

لووووووووووووووولز
وبتقولا من غير خجل!!!
والله انا لو التيستيرون دة أنقطع مني
ألا أتّمو غلاط
لكن لمن نوصل للمرحلة دي
بتكون المدام ما عندها التكتح من الأستروبوجين
ونبقي متعادلين صفر صفر
و ننوم نوم العافية

Post: #11
Title: Re: قـد آن وقت الفيــاغــرا....فاشتدي زيـــّم
Author: سجيمان
Date: 11-01-2004, 12:40 PM
Parent: #6

حبيب نورة
Quote: بتكون المدام ما عندها التكتح من الأستروبوجين

Post: #9
Title: Re: قـد آن وقت الفيــاغــرا....فاشتدي زيـــّم
Author: سجيمان
Date: 11-01-2004, 04:57 AM
Parent: #4

السفير
Quote: وكتره قروش مغلباهم

كترة القروش دي ..مالا ما بتجينا نحن

Post: #7
Title: Re: قـد آن وقت الفيــاغــرا....فاشتدي زيـــّم
Author: سجيمان
Date: 10-31-2004, 11:50 PM
Parent: #3

د.معز
Quote: (قالو بتدخل البورد غومتّي)

يا زول قول كلام غير دا

Post: #8
Title: Re: قـد آن وقت الفيــاغــرا....فاشتدي زيـــّم
Author: mekki
Date: 11-01-2004, 00:30 AM
Parent: #1

سجيمان يا خوى ده كلام شنو؟؟؟؟؟...انت ماك عارف انو سن زواج الرجل فى السودان بقت 40 سنه؟؟؟...!ه
انت عايزنا نغرق فى المصير..ونحنا لسع فى البدايه؟؟!!؟؟ه

Post: #12
Title: Re: قـد آن وقت الفيــاغــرا....فاشتدي زيـــّم
Author: سجيمان
Date: 11-02-2004, 04:56 AM
Parent: #8

مكي
Quote: انت عايزنا نغرق فى المصير..ونحنا لسع فى البدايه؟؟!!؟؟ه

بداية اربعين سنة؟.....بدايتن سودا

Post: #10
Title: Re: قـد آن وقت الفيــاغــرا....فاشتدي زيـــّم
Author: mohamed osman bakry
Date: 11-01-2004, 07:16 AM
Parent: #1

Quote: .....قالن.. اولك بالتبادي سن اليأس عند الراجل تبدأ من سن الخمسة وتلاتين.....

ســيــجــو
ديــــل نــســـوان حــاقــــدات
مــاتســــمـــع كــلامـــن

Post: #13
Title: Re: قـد آن وقت الفيــاغــرا....فاشتدي زيـــّم
Author: سجيمان
Date: 11-02-2004, 09:55 AM
Parent: #10

محمد عثمان بكري
Quote: ديــــل نــســـوان حــاقــــدات
مــاتســــمـــع كــلامـــن

والله انا برضو قلت كدا.....نان ما شفتهن قعدن يهرجن في جنس هرجة

Post: #14
Title: Re: قـد آن وقت الفيــاغــرا....فاشتدي زيـــّم
Author: serenader
Date: 11-02-2004, 06:21 PM
Parent: #1

الله يجازي محنك يا سجيمان.. والله يمسخا عليهن محل ما قبلن كان مسخن عليك "كبيبة الشاي"..
بس تعال نوشوشلك في إضيناتك ديل:
دحين إت إن بقيت زي صورتك الفاضحك بيها د. معز، كان كدي أخير لك تشوف لك حجة وعُقب تدسَ ليك في خلوة في قعر البطانة، ولا أمشي صاقر الجنجويد في بكانهم...يا غرق يا جيت غامتها...
باقي لي من صرة وشك دي إنت ندى الخلا ما بترضى بيك، ناهيك من ست الاسم..
وتاني باقي لي إت من صورتك دي، ما فضل ليك سي سي CC واحد.. لانو صاحباً لي بيطري قال لي قبل ده إن الإنسان بكون عندو رطلين بس من الما بجيب اسمو مما يبلغ لمن يموت.. أها من صورتك دي، أظنك كشحتهم بدريييييييييييييييي...
تجي أسلفك؟ غموتي زي دخولك البورد...

Post: #15
Title: Re: قـد آن وقت الفيــاغــرا....فاشتدي زيـــّم
Author: سجيمان
Date: 11-03-2004, 04:38 AM
Parent: #14

serenader
والله احبطني جدا....حسي دي حالتا اسمح صورة عندي.....
ما شفت النفخة دي كيف؟......
Quote: تجي أسلفك؟ غموتي زي دخولك البورد

تسلفني فياغرا؟.....انت بقيت عليها يا جنا؟

Post: #16
Title: Re: قـد آن وقت الفيــاغــرا....فاشتدي زيـــّم
Author: jini
Date: 11-03-2004, 07:54 AM
Parent: #1

سجيمان

حلفوا ناس قالوا شافوك في عمرة 27رجب وإنت متعلق بأستار الكعبة وقاعد تدعو: يا الله إنشاء الله يومي قبال يومو
جني

Post: #17
Title: Re: قـد آن وقت الفيــاغــرا....فاشتدي زيـــّم
Author: سجيمان
Date: 11-03-2004, 11:43 AM
Parent: #16

جني
Quote: حلفوا ناس قالوا شافوك في عمرة 27رجب وإنت متعلق بأستار الكعبة وقاعد تدعو: يا الله إنشاء الله يومي قبال يومو

حسي داير الحق حقت 27 رمضان.......

Post: #18
Title: Re: قـد آن وقت الفيــاغــرا....فاشتدي زيـــّم
Author: serenader
Date: 11-05-2004, 03:27 PM
Parent: #1

لا ما الفياغرا.. التانية..

Post: #19
Title: Re: قـد آن وقت الفيــاغــرا....فاشتدي زيـــّم
Author: سجيمان
Date: 11-05-2004, 07:08 PM
Parent: #18

serenader
Quote: لا ما الفياغرا.. التانية..

طيب....سمح

تسلفني لكن اردها ليك من وين؟؟؟ يا النجيض