وللقــــرود.....نصــــيب

Post: #1
Title: وللقــــرود.....نصــــيب
Author: سجيمان
Date: 01-02-2005, 08:54 PM
Parent: #0

القرد.... العبلاج.... زي ما كانت حبوبتي بتقول....انا كنت معجب بي كلمة عبلاج اكتر من قرد..... احس انو فيها نوع الجرس الموسيقي.....اول مرة اشوف قرد كان لما الحلب يحو البلد..... الحيوانات البيجيبوها معاهم كانت... الحمير والكلاب والقرود.... اغريبة نادر ما يكون عندهم غنم..... امشي اتفرج في القرد.....وانا في غاية الاستعجاب....من الزول العريان دا وعندو ضنب.....برضو كنت مبسوط جدا من القرد الاعمش والنضارة.... لما ابوي كان ينهرني عشان اذاكر وانا ما عندي نفس....... افتح صغحة القرد الاعمش والنضارة واقعد اتفرج فيهو وانا اقرقر ....في غاية الانبساط........وفي حديقة الحيوانات الله يطراها بالخير..... كنت اقيل قبل القرد...... وانا برضو مستعجب.... في كيف القرد قاعد يقشر التسالي...وانا شهر كامل احاول اقشر تسالية واحدة و تمرق سليمة ما قدرت........
وكم مرة اتخيلت انو الناس كل زول عندو ضنب.. وكيف الحياة حتكون....دكاترة للضنب....... الدكتور فلان اخصائي انف واذن وحنجرة وضنب.....ولاّ زول يكون راقد وتعبان .....الزول مالو؟...الزول والله عندو وجع ضنب قايم عليهو والليل كلو ما نام......وحايم بيهو....الرجال يتفاخرو بقوة ضنوبتهم......وبعض الشريرين من الضكور يستعملو الضنب في المشاغلة..... يعني اول ما يشوف واحدة جاية يقعد يهز ليها ضنبو.... ولو واحدة.... حارة تقبل عليهو تنهرو..... يا راجل مالك بي تهز لي في ضنبك؟. والله جنس صعاليق..... يخسي وحات ابوي يخسي......وتلقى الشحادين واحد ضنبو اتقطع في حادث مؤسف يقعد يشحد لانو مسكين وضنبو مقطوع............والنسوان يحنن الضنب مع الايدين والكرعين..... وفي الحفلة تلقى المرا جايبة ضنبها خاتاهو قداما....وتتبوبر بالحنة المرسومة في الضنب....وتقعد تكاوي بها..... رفيقاتا المبشتنات.... الضنبهم اغبش ومافيهو حنة....والحنانات يضعن سعر للحنة ويسعلن بالاول ...دايرة اايدين وكرعين وضنب.....ويكن عيب كبير لو واحدة ما معرسة وحننت ضنبا....رقصة العروس برضو يكون فيها دور لابراز محاسن ضنب العروس.... يعني تقعد تلولوحو باغراء شديد مع ما تلولح من ملحقات.......واغاني الرقصة تشكر الضنب وجمالو......

لعبي ... ....الضنب

عشان يتكسر اب شنب

او

الضنب..... ..لعبي

والعريس.... لهلبي

Post: #2
Title: Re: وللقــــرود.....نصــــيب
Author: Mohamed Elbashir
Date: 01-02-2005, 11:01 PM
Parent: #1

حبيب الكل الدكتور سي جي السلام عليكم
كل سنه وأنت طيب وكل أحبابك بخير

سماحــــه الضنب الطــويل عند سيدو

محمد علي

Post: #7
Title: Re: وللقــــرود.....نصــــيب
Author: سجيمان
Date: 01-03-2005, 02:04 AM
Parent: #2

محمد البشير
Quote: سماحــــه الضنب الطــويل عند سيدو

والراجــــــل يمـــــد ايـــــدو

Post: #3
Title: Re: وللقــــرود.....نصــــيب
Author: حمزاوي
Date: 01-02-2005, 11:29 PM
Parent: #1

أخوي سجيمان ود عم بله
كيفنك يا جنا
الضنب ضنبي براي
قبلي جاي قبلي جاي
تعرف يا سجيمان الزمن دا
الضنب زاتو بقى خشم بيوت

Post: #17
Title: Re: وللقــــرود.....نصــــيب
Author: سجيمان
Date: 01-03-2005, 09:42 AM
Parent: #3

حمزاوي
Quote: الضنب ضنبي براي

اوعى تشارك زول........نصيحة لك

Post: #4
Title: Re: وللقــــرود.....نصــــيب
Author: فريد ودالمسيد
Date: 01-02-2005, 11:46 PM
Parent: #1

والله بالغت عديل يا دكتور

تبدأ لينا السنة الجديدة بي ضنب وقرد

معليش الجاتك في ضنبك سامحتك[BLUE/]

Post: #5
Title: Re: وللقــــرود.....نصــــيب
Author: Ismaeil H. Mohamed
Date: 01-03-2005, 00:08 AM
Parent: #4

يا سجيمان
يا دكتور ( ديك تور)

الأتنين عندهم ضنب .. ده ما خيال جد جد
الله يمرقك منها

والله انا ضحكت لمن عيوني دمعت الله يديك العافية
كل سنة وانت طيب والسنة دي اكثر إبداعاً

إسماعيل حميم

Post: #20
Title: Re: وللقــــرود.....نصــــيب
Author: سجيمان
Date: 01-03-2005, 10:06 PM
Parent: #5

اسماعيل اطش محمد
Quote: الله يمرقك منها

آآآآآآآآآآآمييييييييييييين

Post: #19
Title: Re: وللقــــرود.....نصــــيب
Author: سجيمان
Date: 01-03-2005, 11:53 AM
Parent: #4

ود المسيد
Quote: تبدأ لينا السنة الجديدة بي ضنب وقرد

وبهناك بي حمارة.....حقوق الحيوان

Post: #6
Title: Re: وللقــــرود.....نصــــيب
Author: عمر الفاروق شيخ الدين
Date: 01-03-2005, 00:28 AM
Parent: #1

الحبيب سجيمان :
والله ماشاء الله ما نسحرك 2005 دي نشييييييط من البداية ساللي ضنبك وشغال الشغل الما خمج ..
ضنبي وضنبك دخلو الضبانة يقدر ضنبك يضنب ضنبي زي ما ضنبي ضنب ضنبك؟؟؟ ماااا اظن ..
ده كلو هيين اها اخوانا الشعراء ديل كانو يكونو في شعراء العيون وشعراء الحب وشعراء الضنب :
يا ضنب انا كنت قايلك خفت من تعب العفص ..
ومن مجاراة البكاسي ومن شلاليت والرفس...

والعجب غنا البنات :
يا عجبو يعاين لي.. لولح ضنبو يعاين لي ...
حمارتو عارت.. يعاين لي فنيلتو طارت.. يعاين لي ريالتو سالت.. يعاين لي
وفي زحمة المواصلات خليها ساي ..هوي ده منو العافص ضنبي ده ..بالله زح ضنبك من ضنبي ده
وفي الاعراس كمان اوووووو اوووو اووو ده فهم تاني تطلع رقصة اسمها :
الضنب ..الضنب..الضنب يكون فيها الاضناب دي فوووووووووق تتلولح ...
وفي القطيعة وونسة الجكس خليها ساي :
ووووب علي ياااااااااااااااا لولا والله وائل عندو ضنب رهييييييييييييييييييب والعجب سامر مباااااااااااااااااااااالغة ضنبو بس فرو ثعلب ..
الغريبة بعد ده كللللللللللو يا سجيمان ما كنت بتقرا قصة الثعلب المشي يسرق البطيخ وقام ربط اكبر بطيخة طمع منو ولمن جا يجري ضنبو اتقطع ..
صدقني لو كان قريتا ما كان اتخيلت الضنب ده اصلو والله يكفينا قرايتك لكتاب المطالعة لانو الخوف المرة الجاية تقول لينا (طه القرشي في المستشفي)

لك الود

Post: #10
Title: Re: وللقــــرود.....نصــــيب
Author: دورنقاس
Date: 01-03-2005, 02:24 AM
Parent: #6

سيجمان

ضنب الحبيب وين قالو لى سافر

Post: #22
Title: Re: وللقــــرود.....نصــــيب
Author: سجيمان
Date: 01-04-2005, 10:06 AM
Parent: #10

دورنقاس
Quote: ضنب الحبيب وين قالو لى سافر

يا ضنب الحبيب كم لي فيك مراح

Post: #21
Title: Re: وللقــــرود.....نصــــيب
Author: سجيمان
Date: 01-04-2005, 01:38 AM
Parent: #6

عمر الفاروق شيخ الدين
Quote: (طه القرشي في المستشفي)

انت من زمنو الفي المستشفى؟ انت وين يا زول؟.....حسي(طه القرشي في نيفاشا)

Post: #8
Title: Re: وللقــــرود.....نصــــيب
Author: عامر الأمير
Date: 01-03-2005, 02:19 AM
Parent: #1

سجيمان

كل سنة وإنت طيب

Post: #9
Title: Re: وللقــــرود.....نصــــيب
Author: Adrob wad Elkhatib
Date: 01-03-2005, 02:23 AM
Parent: #8

العبلاج....ماهو قرد الطلح ?

Post: #24
Title: Re: وللقــــرود.....نصــــيب
Author: سجيمان
Date: 01-05-2005, 02:52 AM
Parent: #9

ادروب ود الخطيب
Quote: العبلاج....ماهو قرد الطلح ?

لا

العبلاج اسمح شوية

Post: #23
Title: Re: وللقــــرود.....نصــــيب
Author: سجيمان
Date: 01-04-2005, 12:42 PM
Parent: #8

عامر الامير
Quote: كل سنة وإنت طيب

وانت طيب........والمعاك طيبين

Post: #11
Title: Re: وللقــــرود.....نصــــيب
Author: aboalkonfod
Date: 01-03-2005, 03:12 AM
Parent: #1

Quote:
يعني اول ما يشوف واحدة جاية يقعد يهز ليها ضنبو.... ولو واحدة.... حارة تقبل عليهو تنهرو..... يا راجل مالك بي تهز لي في ضنبك؟

Banana is Banana & Monkey is Monkey
at the same time Horse is Horse
and Donkey is donkey
How u dare sayed, Monkey is a donkey
could u repeat it again
I'm not speaking about tail

يديك العافية أخوي سجيمان .. حٍل الغلوطية دي

Post: #12
Title: Re: وللقــــرود.....نصــــيب
Author: shiry
Date: 01-03-2005, 03:59 AM
Parent: #11

سلام مربع

ولو واحد يوم اتمرد يقوموا رفقاء السلاح يمسكوا ليهو زله
انو كان بتلاعب بضنبو ..
ولمن يهددهم بكشف (ضنبتهم)
يقوموا (ينتهكوا) حقوق ضنبو
ويعملوا مؤتمر ينادوا فيهو بالشفافية
بكشف انتهاكات الضنوب الواسعة النطاق
هاهاهاهاهااهاهاهاه

Post: #13
Title: Re: وللقــــرود.....نصــــيب
Author: A.Razek Althalib
Date: 01-03-2005, 04:13 AM
Parent: #12

الأخ/ سجيمان
Quote: اتفرج فيهو وانا اقرقر ....في غاية الانبساط........
الزعلة فكت يا ناس المنبر تعالو
سجيمان مبسوط جنس إنبساطه....
يا أخوي والله خوفتنا أمس قلنا يمكن يطق ليك عرق ولا حاجة...
ساكت.... بلا جنيه...
أعوك من الزعل... ومن الركزة.....

دي سوبا إتخربت..... يوم نجي وما نلقاك...
يا شعبي..... إنت

ولك كل الإنبساط

-----------------
عبدالرازق عيسى الطالب

Post: #30
Title: Re: وللقــــرود.....نصــــيب
Author: سجيمان
Date: 01-05-2005, 10:14 AM
Parent: #13

عبد الرزاق الطالب
Quote: أعوك من الزعل... ومن الركزة.....

انا زعلان ما بيجي بي هينة......وزعل قصير الاجل

Post: #29
Title: Re: وللقــــرود.....نصــــيب
Author: سجيمان
Date: 01-05-2005, 07:34 AM
Parent: #12

شيري
Quote: بكشف انتهاكات الضنوب الواسعة النطاق

هههههههههههه

شيري..والله ووحات نضري شرفتي المنبر والبوست

Post: #27
Title: Re: وللقــــرود.....نصــــيب
Author: سجيمان
Date: 01-05-2005, 04:23 AM
Parent: #11

ابو القنفد
Quote: يديك العافية أخوي سجيمان .. حٍل الغلوطية دي

ما قدرت والله.........

Post: #14
Title: Re: وللقــــرود.....نصــــيب
Author: democracy
Date: 01-03-2005, 06:49 AM
Parent: #1

الدكتور سجيمان ...الما راضي يتم نفسو ويكملها...عشان يكون سجمان

تحياتي وتشكراتي علي اتاحة الفرصة للابتسام واحيانا كثيرة الضحك(بقرقرتو)..قرقرتو دي زي( بتوضيحاتها)بتاعة الصادق المهدي...
انا داخل أسألك ...دحين فيلك دا باكستاني؟؟؟!!قالو عندهم افيال عجيبة الواحد زي فيل ابرهة...ركبتك ليهو...تجيك نوع حمتك الزمان جاتك ديك..وتشوف قرود،واولاد طهور،والمن القلعة ديك،اللحو،واعضاء(الشنو كدي ما عارف ديك)

لك كل الود

سيف الدولة احمد خليل

Post: #31
Title: Re: وللقــــرود.....نصــــيب
Author: سجيمان
Date: 01-05-2005, 01:37 PM
Parent: #14

democracy
Quote: الما راضي يتم نفسو ويكملها...عشان يكون سجمان

التصغير هنا للدلع

اما عن الفيل.... قلنا لكم مليون مرة بيطلعوهو ما بيركبوهو.... اصحو معانا

Post: #15
Title: Re: وللقــــرود.....نصــــيب
Author: ود الشيخ
Date: 01-03-2005, 07:38 AM
Parent: #1

سي جي
والواحد يجيب ضنبو ويقعد يكتب وكل مرة
يمسح بيه

Post: #16
Title: Re: وللقــــرود.....نصــــيب
Author: Ali Alhalawi
Date: 01-03-2005, 08:06 AM
Parent: #15

يعنى واحد يكون ماشى فى الشارغ يشوف ليهو بنية يقول لى صاحبو .. و الله البت دى مجننانى .. فيها حلاوة ضنب يخلى ضنبك يرجف

واحدة تزعل من راجلا تقولو .. إنتا وين ضنبك مع الرجال

و الأولاد ماشين للمدرسة تلقاهم مكفكفين ضنابتهم عشان ما تتوسخ

النسوان يحلفن بالتقطع ضنابتن

و الواحد يمد ضنبو قدر لحافو

والرجال يقيسوهم من ضنابتن

لكن قول لى يا أب ضنب .. المواضيع دى بتجيبها من وييييييين .. و مشتاقييييييييييييييين

و تتضنب على خيـــر

Post: #34
Title: Re: وللقــــرود.....نصــــيب
Author: سجيمان
Date: 01-06-2005, 05:25 AM
Parent: #16

الحلاوي
الحلو
Quote: و الواحد يمد ضنبو قدر لحافو

واللحاف يعملو ليهو زيادة رقيقة عشان يختو فيها الضنب

Post: #32
Title: Re: وللقــــرود.....نصــــيب
Author: سجيمان
Date: 01-06-2005, 01:24 AM
Parent: #15

ود الشيخ
Quote: والواحد يجيب ضنبو ويقعد يكتب وكل مرة
يمسح بيه

والواحد بدل ما يقول اديك شلوت

يقول ولالله اديك ضنبوت حسي

Post: #18
Title: Re: وللقــــرود.....نصــــيب
Author: ست البنات
Date: 01-03-2005, 10:31 AM
Parent: #1

سجيمان ،
ٍسلام ،
انت براك كايس لزيادة أعباءك !!!
لأنك تزيد فاتورة الموز للصرف!
ونص متر قماش ينضاف لأى لبسة نسائة أو رجالية !
وخواتم ويمكن غويشات للضنب لزوم اكسسوار !
وريادة حجم الكراسى والبنابر !
وزرع شجر عشان يتلفلف فيه الضنب ساعة القيلولة !
وأردبين تسالى كل أسبوع !
مع الأستعداد لتعويض الكبابى والحاجات البيكسرها الضنب ويعتر فيها !
زائدا فاتورة لعلاج أمراض وجروح الضنب !
ست البنات .

Post: #25
Title: Re: وللقــــرود.....نصــــيب
Author: Adrob wad Elkhatib
Date: 01-05-2005, 03:31 AM
Parent: #18

Post: #26
Title: Re: وللقــــرود.....نصــــيب
Author: Adrob wad Elkhatib
Date: 01-05-2005, 03:38 AM
Parent: #25

Post: #37
Title: Re: وللقــــرود.....نصــــيب
Author: سجيمان
Date: 01-06-2005, 12:01 PM
Parent: #25

شكرا ادروب للصورة

بس لو كان لابس نضارات............

Post: #35
Title: Re: وللقــــرود.....نصــــيب
Author: سجيمان
Date: 01-06-2005, 07:50 AM
Parent: #18

ست البنوت
Quote: انت براك كايس لزيادة أعباءك !!!
لأنك تزيد فاتورة الموز للصرف!
ونص متر قماش ينضاف لأى لبسة نسائة أو رجالية !
وخواتم ويمكن غويشات للضنب لزوم اكسسوار !
وريادة حجم الكراسى والبنابر !
وزرع شجر عشان يتلفلف فيه الضنب ساعة القيلولة !
وأردبين تسالى كل أسبوع !
مع الأستعداد لتعويض الكبابى والحاجات البيكسرها الضنب ويعتر فيها !
زائدا فاتورة لعلاج أمراض وجروح الضنب

والله فكرت في نضمك دا......وحمدت الله ان ما سوى لي ضنب....واكان يوى لي ياني القاطعو... نحن ناقصين هم

Post: #28
Title: Re: وللقــــرود.....نصــــيب
Author: وليد شريف
Date: 01-05-2005, 05:29 AM
Parent: #1

المحترم سجيمان
رائع ويديك العافية وما تحرمنا من واحتك الظليلة عشان شمس الزمن حارة وكل سنة وانت والسودان طيبين .

Post: #38
Title: Re: وللقــــرود.....نصــــيب
Author: سجيمان
Date: 01-07-2005, 03:29 AM
Parent: #28

وليد الشريف
Quote: وكل سنة وانت والسودان طيبين

وانت طيب..........

Post: #33
Title: Re: وللقــــرود.....نصــــيب
Author: Salah Yousif
Date: 01-06-2005, 02:57 AM
Parent: #1

الدكتور سجيمان

شكرا على الخيال الرائع دوما والموضوعات الشيقة التي تطرحها بأسلوبك الفريد0 إن ما تقدمه يقع في خانة فنية صعبة المراس حتى بالنسبة لكتاب الكوميديا0 ولعل أجمل ما فيها بعد إضفاء الإضحاك تحريك مشاعر الآخرين للمجاراة والتحليق معك في سماء المادة المطروحة0 لقد أضاف عمر الفاروق شيخ الدين وعلى الحلاوي أو الهلاوي وشيري وست البنات وقد تطول القائمة0 ولم يبق إلا أن نقرأ إضافة منك حول صفات ومهام ضنبك انت بالذات وهل يا ترى تضعه على كتفك كالملفحة لزوم الوجاهة أم أنه سيظل واقفا مثل الأريل يلتقط حوارات الآخرين ويرسلها عبر الأثير0

مع صادق ودي

صلاح يوسف

Post: #39
Title: Re: وللقــــرود.....نصــــيب
Author: سجيمان
Date: 01-07-2005, 08:38 AM
Parent: #33

صلاح يوسف
Quote: شكرا على الخيال الرائع دوما والموضوعات الشيقة التي تطرحها بأسلوبك الفريد0

وشكرا لك انت... للمتابعة ومحاولة فهم ما اكتب من خرابيط ولخبطة

Post: #36
Title: وللقــــرود.....نصــــيب
Author: مزدلفة محمد عثمان
Date: 01-06-2005, 08:39 AM
Parent: #1

ياسجيمان اب ضنب جاااااااااااااااااك ابشنب .............حتعمل شنو؟؟؟؟؟؟؟؟؟

Post: #40
Title: Re: وللقــــرود.....نصــــيب
Author: سجيمان
Date: 01-07-2005, 11:45 AM
Parent: #36

مزدلفة محمد عثمان
Quote: ياسجيمان اب ضنب جاااااااااااااااااك ابشنب .............حتعمل شنو؟؟؟؟؟؟؟؟؟

مبروووووووك التسجيل في المنبر....ومبرررروك الشنب

Post: #41
Title: Re: وللقــــرود.....نصــــيب
Author: سامى عبد الوهاب مكى
Date: 01-07-2005, 12:39 PM
Parent: #1

والله ياسجيمان ضنبك تحفه اقصد موضوعك تحفه..ياعنى لو نطو عليك حراميه ولا لاقاك بوليس يقول ليك ارفع ضنبك فوق!!!!
ولمن يلدوا ولد جديد التعليق يكون "ضنب ابوه الخالق الناطق" ولا يناديك واحد فى السوق يقول ليك انت ود فلان؟؟؟ نفس الضنب ابوك كيف؟؟ ههاهاهاهاهاهاهاههاهاهاها

والله عندى ناس كتار اتمنيت اشوف ليهم ضنب!!!!

Post: #44
Title: Re: وللقــــرود.....نصــــيب
Author: سجيمان
Date: 01-08-2005, 03:54 AM
Parent: #41

سامي عبد الوهاب مكي
Quote: والله عندى ناس كتار اتمنيت اشوف ليهم ضنب!!!!

يا اخي دي ساهلة جدا

لما تجي تنوم... اتكبت بالبطانية..واتخليم عنهم ضنب....واقعد اضحك عليهمك....والله تصحى الصباح وروحك المعنوية في السما....

Post: #42
Title: Re: وللقــــرود.....نصــــيب
Author: نيازي مصطفى
Date: 01-07-2005, 02:02 PM
Parent: #1

قرد الطلح "زولا" قبيح مو سمح

Post: #45
Title: Re: وللقــــرود.....نصــــيب
Author: سجيمان
Date: 01-08-2005, 04:14 AM
Parent: #42

نيازي مصطفى
Quote: قرد الطلح "زولا" قبيح مو سمح

ها....نان هو قايل نفسو مو سمح؟... قادر الله.....والله كان شفتو عليهو جنس فلهمة

Post: #43
Title: Re: وللقــــرود.....نصــــيب
Author: عماد عثمان
Date: 01-07-2005, 05:56 PM
Parent: #1

سجيمان .... الله يديك العافية

( وكم مرة اتخيلت انو الناس كل زول عندو ضنب)

طيب انا إقتنعت بتخيلك ده

طيب الأساساً عندهم/هن .. ضنب

يعملو كيف مع ضنبك الجديد ده

عماد عثمان

Post: #46
Title: Re: وللقــــرود.....نصــــيب
Author: سجيمان
Date: 01-08-2005, 04:18 AM
Parent: #43

عماد عثمان
Quote: طيب الأساساً عندهم/هن .. ضنب

يعملو كيف مع ضنبك الجديد ده

يتبرعو بهو....في ناس ممكن ضنبا يتقطع في حادث

Post: #47
Title: Re: وللقــــرود.....نصــــيب
Author: almulaomar
Date: 01-08-2005, 04:41 AM
Parent: #1

سجيمان يا أخوي إنت بتجيب الأفكار دي من وين ولا عندك بنات كتار عشان كده بقوا يقولوا من بنات أفكاري إلخ. المهم في الشأن الضنبي

·الغنماية ضنبها نص رباط على وزن شنب نص رباط
·أما الكلب فضنبو لو ربطت فيها مكوه برضو يرجع تاني يتعوج زي صفارة الشفع بتاعت زمان ديك تكون مدوره أول ما تصفر تتفرد وتبقي عديله وترجع تاني – دي طبعاً ما لبعت بيها لكين كلموني بيها لأنني من أبناء الأقاليم وما عندنا غير شليل وينو أكلو الدودو
·أما ضنب البقرة ففي نهايته كمية بتاعت شعر سبيبي خشن وهو يشبه الهبابات البشيلوها رجال الحبش وبعض القبائل عندنا لزوم الزينه وفي الأعياد الرسمية والشعبية ، وضنب البقرة سيئة الذكر إذا ضربتك بيهو في عينك أخير ترفسك لأنو بقلع لينك عينك من محجرها عديل كده.
·وهناك ضنب الضب وده ضنب غريب جداً فما أن تهبش هذا الضب أو حتى تضرب الحيطة جمبو بالبرطوش على طول يخلي ليك ضنبو ويشتت بدون ضنب وبلا خجله وبعد فترة من الزمن يجيك الضب زاتو بي ضنبو الجديد وهو ربما يستخدم نوع من الكريمات لتساقط الشعر عفواً لتساقط الضنب.
·وهناك ضنب الورل وضنب التمساح.
·أما ضنب الكديس فهذا من أكثر الضنبه – جمع ضنب – البتغيظني خاصة إذا كنت جاي من التمرين ولابس شورت الكديس توش يخش ليك بين كرعيك نظام حنيه وكده ويقعد يتمردغ ويجيك ضبنو في كرعيك لمن شعرة جلدك تكلب أى تكون من الفصيلة الكلبية ربما.
·أما ضنب البعير أو الجمل فيجوز فيه ما جاز للعنز أو الغنماية
·وضنب الحصان أكثر الضنبات شهرة حيث أن ذاع صيته بأن أصبح ماركة تجارية وإسماً كبيراً في عالم التسريحات وهو نوع من التسريحات لا تجوز إلا لصاحبة شعر غجري مجنون يسافر في كل الدنيا مش زي شعر فاطنه بتي اليادوب يسرحو ليها السودان قفل.

وللضنبات بقية ، يا سجيمان يا أخوي ، الطريف أن ضنب التور يتم تضبيب العصا به ويكون الناتج عكاز يرميك على حمير – ضم الحاء وتسكين الميم وتشديد الراء بعد فتحها – قفاك.

Post: #48
Title: Re: وللقــــرود.....نصــــيب
Author: سجيمان
Date: 01-08-2005, 05:14 AM
Parent: #47

الملا عمر
ايها الرجل الحديقة
الحديقة دي اتعلمتها من المنبر انا
اما انا بعد ما اكمل بهايمي ديل..حاكون سجيمان ايها الرجل الزريبة
Quote: سجيمان يا أخوي إنت بتجيب الأفكار دي من وين ولا عندك بنات كتار

فعلا عندي كمية من البنات.... لكن سمحات احمد الله..الشعر سبيبي والعيون فناجين...

Post: #49
Title: Re: وللقــــرود.....نصــــيب
Author: عماد عثمان
Date: 01-09-2005, 10:12 AM
Parent: #1

يا سجيمان ..

عندى ليك سوعال

هل للضنب .. فوائد

طبية .. ورياضية

عماد

Post: #50
Title: Re: وللقــــرود.....نصــــيب
Author: سجيمان
Date: 01-09-2005, 10:27 AM
Parent: #49

عماد عثمان
Quote: هل للضنب .. فوائد

طبية .. ورياضية

نعم.....

طبيا....ممكن مرا يكون عندها شافع عندو وجع راس وهو دايرا تمسك ليهو راسو وهي تكون مشغولة قاعدة تورق في ملوخية مثلا.... بدل ما تخلي الملوخية..... تقول كدي وتجيب ضنبا وتلويهو للشافع في راسو.... وتستمر في وريّق الملوخية......اتخليت المنظر البديع دا؟

رياضيا... لو انت في السودان وقاعد تلعب بلي... اصلو ما حتدنقر تعمل شخيت... تشخت الواطا بي طنبك..وانت واقف ومرتاح...... يا لها من نعمة

Post: #51
Title: Re: وللقــــرود.....نصــــيب
Author: Sobajo
Date: 01-10-2005, 05:18 AM
Parent: #1

ياجماعة في سوال مهم الناس ما ختت بالها ليه ,,,
و اي زول حسب فهمو طبعاً ..

الضنب البنتخيل فيه ده فيه صوف ولة ضنب املس ساكت كدي ...
لو الاحتمال التاني كدي نتخيل،،،

ضنب .. و املس .... ده هسكون منظر غريب جداً ... و باذات مع الحنة ....

بيني و بينكم الله ستر الما بقى عند البني ادم ضنب ...
عشان ما ممكن يكون عندو لسان و ضنب ...
و دمتم ..

Post: #53
Title: Re: وللقــــرود.....نصــــيب
Author: سجيمان
Date: 01-10-2005, 08:21 AM
Parent: #51

: Sobajo
Quote: الضنب البنتخيل فيه ده فيه صوف ولة ضنب املس ساكت كدي ...
لو الاحتمال التاني كدي نتخيل،،،

ضنب .. و املس .... ده هسكون منظر غريب جداً ... و باذات مع الحنة

عشان نريح دماغك..... الشنب حيكون املس البطن.. اشعر الضهر... يعني الحنة حتكون من جوة...والدايرة نوري حنة ضنبا تقلبو..تقلبو في وشي العدو

Post: #52
Title: Re: وللقــــرود.....نصــــيب
Author: سامى عبد الوهاب مكى
Date: 01-10-2005, 06:39 AM
Parent: #1

سجيمان بالله ورينا فائده الضنب لاصحاب المهن المختلفه ابتدا من رجال المرور!!!

Post: #54
Title: Re: وللقــــرود.....نصــــيب
Author: سجيمان
Date: 01-10-2005, 11:01 AM
Parent: #52

Quote: سجيمان بالله ورينا فائده الضنب لاصحاب المهن المختلفه ابتدا من رجال المرور!!!

ناس المرور ممكن يستفيدو منو في التاشير للعربيات.....وممكن يكتبو بيهو الغرامات...

المدرسين..ممكن يدقو بيهو الطلبة..ولو ضنب مفروش ممكن يمسحو السبورة بيهو....

وبعدين طبعا البناطلين حيكون فيها جيب طويل عشان يدخلو فيهو الضنب..ويسموها مضنبّة....طبعا دا بيستعملوهو الناس المؤدبين الما دايرين ضنبهم يتكشف علي امة محمد...وبرضو للمحجبات....
الفنانين ممكن يمسكو بيهو المكرفون ويخلو الايدين للرقيص...وبرضو يكون في فنان حريف في دق العود....وممكن يدقو بي ضنبو....

والباقي فكر فيهو انت

Post: #55
Title: Re: وللقــــرود.....نصــــيب
Author: سامى عبد الوهاب مكى
Date: 01-11-2005, 07:43 AM
Parent: #1

اجمل مافى الموضوع تصحى من الصباح تطقطق ضنبك وتتمغغغغغغغغغغه...

Post: #56
Title: Re: وللقــــرود.....نصــــيب
Author: سجيمان
Date: 01-11-2005, 12:18 PM
Parent: #55

Quote: اجمل مافى الموضوع تصحى من الصباح تطقطق ضنبك وتتمغغغغغغغغغغه