Post: #1
Title: طـــلاق...بأمــر ملكــي
Author: سجيمان
Date: 03-03-2005, 09:06 AM
Parent: #0
زي وزي أي مستهلك.... مستهلك للاكل مستهلك للهدوم..... مستهلك لي صحتي..... مستهلك لاي حاجة تقع تحت يدي...مستلهك للنضم برضو ان لحقت فتحت خشمي تاني يسدو الله....حتى النوم دا بعتبر نفسي مستهلك درجة اولى ليهو..... ان لحقت نمت تاني ما بقوم بي هينة.....وان اطربقت الدنيا فوق تحت ما بصحى...... قاعد اخاف من الموت.... كل يوم اشحد في الله اموت وانا نايم.....الملك حسين قالو ليهو انت حتموت ...د حين امشي جيّه امورك وتعال موت..... الراجل مشى و جيّه امورو وفوّر اخوهو وختّ ولدو....ورجع مات......انا لي حسي بعتبر الملك حسين راجل ضكر بمن الضكرنة يقيف لها حد......غايتو دا كان انا ... الطرطشة والبشتنة والبهدلة....ما بتخليني اسوي شي.....
انا مستهلك للافلام المصرية والغير مصرية....مستهلك للقنوات الفضائية....ديمة مكوع وشايل الريموت واقلب في القنوات..... شفت فلم اسمو..... امرأة هزت عرش مصر....فيهو الملك فاروق..... الملك فاروق دا اتاريهو ما كان ساعل في زول......الشي الحيرني انو بيطلب من واحدة انو يعرسا.....مع انو عارف المرا في حبل راجل تاني...وهي قالت لو كدي..... قال لها..... راجلك راجل طيب بيحب الملك وحيطلقك.... المرا مسيكينة فرحت...وخلاص خططت انها تبقى ملكة مصر والسودان وطلقت راجلا....قوم يا فاروق الجن ادي المريّة شاكوش وعرس واحدة تانية.....نان هي تستاهل جدعت وليداتا وبيتا وراجلا....وبارت فاروق ترقص وتسكر وترقد معاهو....غايتو فاروق دا ان بقى حكمو للمصرين زي الشي الشفتو في الفلم يبقى زول متلوم لوم شديد....الفلم كان من بطولة الفيشاوي...و نادية الجندي عاملة كريعاتا الملولوات ديل.......
استعجب في رقاصة.... تدخل غرفة الملابس وهي لابسة هدوم الرقيص.....حقيقة هي لا لابسا ولا حاجة......ويكون جنبها زول تقول لو ممكن تطلع برا عشان اغير هدومي؟...... هدوم شنو؟ العليها؟ هدوم السيح والريح.....لو غيرت وما طردت الزول اخير.....فيفي عبدو ممثلة ورقاصة....وغير مستهلكة للهدوم.....زي اللبنايات..... طاقة قماش دبلان انا مستعد افصل منها هدوم لي نسوان لبنان لي حدهن....ويفضل منها باقي.....شبرين قماش تكسي اجعص واتخن لبنانية......يعني جلابية واحدة من جلاليب نسوانا.... تستر بيروت كلها......قالو لي فيفي عبدو مرا صالحة....وبتخاف ربنا.....هي ما خافت ربنا في لحما الفارشاهو في السهلة يتفرج فيهو الكلب وفايت الدرب......بتخاف ربنا وعندها خيمة في رمضان عشان تفطّر الناس الصايمين.....لكن بيني وبينكم عندها جسم لادن.. ....باقي لكم فيفي دي بي تدخل الجنّة؟...........
مسابقات الفضائيات والتلفونات دايرة تجنني..... الايام دي في مسابقة بمليون ريال..... اتصلت واشتركت.....وبشروني قالو لي مبروك دخلت السحب... يعني دخلت التصفيات...... من اليوم داك وانا بتعامل مع نفسي زي وزي أي مليونير.....جاري سعودي اشترى عربية جديدة ليكزس..من الصباح لقاني واقف عندها واتفرج فيها.....وسعلتو الشي دي بكم؟..... قال لي بمائة وخمسين الف....قدمت كراع واخرت كراع وغزيت كوعي ولويت خشمي استصغارًا واستهانة بالسعر.....وقلت ليهو والله رخيصة جنس رخصة.... هووبلي....وبرضو خططت اشتري بيت في المنشية...ولازم يكون جار ترباس الحيطة بالحيطة ..... لكن نويت اتغا عليهو و امغصو في الدنيا دي جنس مغصة.... سلام الله دا..... ما اديهو ليهو.......... هو قايلو نفسو براهو المرطب في الدنيا دي؟..... انا زاااااتي ترطيبة.......
اها يا اخوانا...... والله انا ماعندي صبر لمن استلم الجائزة....دحين داير لي واحد منكم اخو اخوان يديني المليون ريال......وعلي الطلاق بالتلاتة اول ما استلم الجائزة ارجعهن ليهو علي داير المليم.......وكان اكلتو...... ان شاء الله تاكلني سُعلوّة... في ليلي دا..........
|
Post: #2
Title: Re: طـــلاق...بأمــر ملكــي
Author: ست البنات
Date: 03-03-2005, 09:22 AM
Parent: #1
ان لحقت نمت تاني ما بقوم بي هينة.....وان اطربقت الدنيا فوق تحت ما بصحى......
سجيمان أخوى ، وكسترد البورد ،
تحيات وسلامات ،
وانا مشتركى معاك فى الجملة الفوق دى !
وكان لقيتلك ويحيدن دينك كلمنى بيهو الاجر منو حتى انا كمان !
دايرالى تمباك وراس الليل سكر وطرقى وكركب !
الموضوع ظريف والله ! لكن انت النضم السمح دا قعد تجيبو من وين ?
والا انت بريط أخو ربيط جدك !
يعنى بقيتو انجليس تب ! أها ماشى لنوندون متين عند ناس بلير ود اعمك ?
ست البنات .
|
Post: #3
Title: Re: طـــلاق...بأمــر ملكــي
Author: saif massad ali
Date: 03-03-2005, 09:31 AM
Parent: #2
والله يا سجيمان يا اخوي تقدر تغيب شهر ناس البوردي ده علا يقولو الروب يا حبوب
|
Post: #4
Title: Re: طـــلاق...بأمــر ملكــي
Author: Balla Musa
Date: 03-03-2005, 10:49 AM
Parent: #3
| Quote: ....وبارت فاروق ترقص وتسكر وترقد معاهو. |
| Quote: هي ما خافت ربنا في لحما الفارشاهو في السهلة يتفرج فيهو الكلب وفايت الدرب |
سجيمان كيفك
المنبر دا فيهو رشاشات سامة وعقارب وام نويويرات مابتخاف منهم? أظنك شارب عروق ياخوى.
|
Post: #13
Title: Re: طـــلاق...بأمــر ملكــي
Author: سجيمان
Date: 03-05-2005, 10:49 AM
Parent: #4
بله موسى
| Quote: المنبر دا فيهو رشاشات سامة وعقارب وام نويويرات مابتخاف منهم? أظنك شارب عروق ياخوى |
خايف منهن......لكن نضمي دا حسي مالو؟..... ما فيهو شي
|
Post: #12
Title: Re: طـــلاق...بأمــر ملكــي
Author: سجيمان
Date: 03-05-2005, 06:04 AM
Parent: #3
سيق مساعد
| Quote: والله يا سجيمان يا اخوي تقدر تغيب شهر ناس البوردي ده علا يقولو الروب يا حبوب |
تسلم يا سيف
البوردي بيخيرو...والبركة فيكم انت والناس الحلوين الزيك
|
Post: #5
Title: Re: طـــلاق...بأمــر ملكــي
Author: سجيمان
Date: 03-04-2005, 05:01 AM
Parent: #2
ست البنوت
Quote: والا انت بريط أخو ربيط جدك !
يعنى بقيتو انجليس تب ! أها ماشى لنوندون متين عند ناس بلير ود اعمك ?
|
بلير دا عندنا فيهو شك..... انو ما انكليزي اصلي.....عشان كدي انا اتحفظ علي حكاية ود عمي دي
|
Post: #6
Title: Re: طـــلاق...بأمــر ملكــي
Author: صباح احمد
Date: 03-04-2005, 05:16 AM
Parent: #1
وحاة الرسول يا سجيمان بيسحروك الما بشبهوك
|
Post: #7
Title: Re: طـــلاق...بأمــر ملكــي
Author: bayan
Date: 03-04-2005, 10:00 AM
Parent: #6
سجيمان كنت عايزة ارسل ليك المليون.. لكن لقيت ما عندى فكة..
الافلام المصرية دى بتجب ليك ارتباط فى الرباط..
فى يوم المرأة العالمى حندى ام الخير وسام الصبر والخدمة الممتازة
قلت لو نمت ما بتصحى يبدو انه دا مرض صايد رجال السودان جت عليهم..
|
Post: #15
Title: Re: طـــلاق...بأمــر ملكــي
Author: سجيمان
Date: 03-06-2005, 00:17 AM
Parent: #7
بيان
Quote: فى يوم المرأة العالمى حندى ام الخير وسام الصبر والخدمة الممتازة
|
والله والله والله..... يا دكتورة... ام الخير تستاهلو
|
Post: #14
Title: Re: طـــلاق...بأمــر ملكــي
Author: سجيمان
Date: 03-05-2005, 11:04 PM
Parent: #6
صباح احمد
| Quote: وحاة الرسول يا سجيمان بيسحروك الما بشبهوك |
ما سحروكي انتي يا السمحة ام عجن وست النضم..... انا يسحرو لي شنو؟
|
Post: #8
Title: Re: طـــلاق...بأمــر ملكــي
Author: jini
Date: 03-04-2005, 10:12 AM
Parent: #1
| Quote: زي وزي أي مستهلك.... مستهلك للاكل مستهلك للهدوم..... مستهلك لي صحتي..... مستهلك لاي حاجة تقع تحت يدي...مستلهك للنضم برضو ان لحقت فتحت خشمي تاني يسدو الله....حتى النوم دا بعتبر نفسي مستهلك درجة اولى ليهو..... ان لحقت نمت تاني ما بقوم بي هينة.....وان اطربقت الدنيا فوق تحت ما بصحى...... |
يا خوى انت يومك دا خمسين ألف سنة مما تعدون! سلفني أربعة وعشرين ساعة بس!
جني
|
Post: #9
Title: Re: طـــلاق...بأمــر ملكــي
Author: layon
Date: 03-04-2005, 12:30 PM
Parent: #8
افتكرنا لمن تلم بيهم
|
Post: #18
Title: Re: طـــلاق...بأمــر ملكــي
Author: سجيمان
Date: 03-06-2005, 01:50 PM
Parent: #9
ليون
Quote: افتكرنا لمن تلم بيهم
|
طيب...... بس ادعي لي
|
Post: #16
Title: Re: طـــلاق...بأمــر ملكــي
Author: سجيمان
Date: 03-06-2005, 09:00 AM
Parent: #8
جني
Quote: يا خوى انت يومك دا خمسين ألف سنة مما تعدون! سلفني أربعة وعشرين ساعة بس!
|
قالو الغول يا جني..... ينوم سنة كاملة ويصحا سنة كاملة
|
Post: #10
Title: Re: طـــلاق...بأمــر ملكــي
Author: abas
Date: 03-04-2005, 09:20 PM
Parent: #1
دحين داير لي واحد منكم اخو اخوان يديني المليون ريال......وعلي الطلاق بالتلاتة اول ما استلم الجائزة ارجعهن ليهو علي داير المليم
لا بالله عليك
انت بتتكلم بي جدك
اكون بيلو
|
Post: #19
Title: Re: طـــلاق...بأمــر ملكــي
Author: سجيمان
Date: 03-06-2005, 09:33 PM
Parent: #10
عبس
Quote: انت بتتكلم بي جدك
اكون بيلو |
يا اخي خلي الطمع دا
وبعدين حتى لو اكلتك.....مليون ريال حتعمل لك شنو؟
|
Post: #11
Title: Re: طـــلاق...بأمــر ملكــي
Author: فريد ودالمسيد
Date: 03-04-2005, 11:14 PM
Parent: #1
العزيز سجيمان
ناس الضرائب والزكاة أخدوا خبر
جهز نفسك للدفع
عليك ضرائب 250 ألف وزكاة 400 ألف
دا غير ضرائب المغتربين ودمغة الشهيد
ورسوم مغادرة لو جيت ولا ماجيت تدفعا
وناس الفريق عايزين ليهم 100 ألف دعم للنادي
والفاتحين خشمهم كتيرين
أعتقد العندك خلاص كملت
فتش ليك لي مليون تاني
|
Post: #20
Title: Re: طـــلاق...بأمــر ملكــي
Author: سجيمان
Date: 03-07-2005, 06:13 AM
Parent: #11
ود المسيد العريس
Quote: عليك ضرائب 250 ألف وزكاة 400 ألف
دا غير ضرائب المغتربين ودمغة الشهيد
ورسوم مغادرة لو جيت ولا ماجيت تدفعا
وناس الفريق عايزين ليهم 100 ألف دعم للنادي
|
تعرف لو سمعو بالنضم دا... يكونو لا بدين لي حسي ومنتظرين متين اجي لي عندهم
|
Post: #17
Title: Re: طـــلاق...بأمــر ملكــي
Author: صباح احمد
Date: 03-06-2005, 09:22 AM
Parent: #1
يسحروك في نضمك الطااااااااااعم دة
تعرف ياسجيمان انت سيجمان زيك كدة يقلبوا المنبر شربات
|
Post: #21
Title: Re: طـــلاق...بأمــر ملكــي
Author: محمد حامد جمعه
Date: 03-07-2005, 06:21 AM
Parent: #17
باقي لكم فيفي دي بي تدخل الجنّة؟...........[/B
سجيمان
........... اسعلنى دبل !
|
Post: #23
Title: Re: طـــلاق...بأمــر ملكــي
Author: سجيمان
Date: 03-07-2005, 03:00 PM
Parent: #21
محمد حامد جمعة
دبل كليك؟
|
Post: #22
Title: Re: طـــلاق...بأمــر ملكــي
Author: سجيمان
Date: 03-07-2005, 10:52 AM
Parent: #17
صباح احمد
| Quote: تعرف ياسجيمان انت سيجمان زيك كدة يقلبوا المنبر شربات |
تعرفي يا صباح انا واحد وفي ناس هجانين مني لو بقينا اتنين حينتحرو
|
|